رواية خطايا واجتثاث الفصل الثاني عشر بقلم نور البصري
عــون..
مو هسه حتحس بنقص
باجر يفر بيك إلزمن
واخذ الثار براحتي
يل علمتني عالسهر
باجر ترد متعوب الي
ما تلكه مثل ولايتي
ــــــــــــــــــــــــــــــــــــــــــــ
عيني على بروان.. الي حسيته متوتر انفاسي ونبضاتي احسهم على النهاية..
بس عمي انقذ الموقف من كال..
: بلة ما تستحون وانت ام آدم.. اني الج كد ما كارهة الولد تردين تأذيه
وانت خوية ترى شيلان.. بنتي مو بس بنتك و بيوم الي نفكر نزوجها ننطيها للي يستحقها لذا معليك بهاي شتحجي و البنت تدرس وكل همها دراستها..
بابا حسيته يباوع لبروان.. نظرة كره بس يهاب عمي لذا سكت نتر بيه
: روحي للبيت..
انتهى اليوم بهدوء والحمد لله انسد موضوع الزواج ومنو سعيد الحظ...
بس بقيت شايلة على مرت عمي شلون هيج حجت ما استحت...
مـــــــــــــــــــــــــريم
اباوع واني بفستاني شلون داروا على عون.. و كتلوه بتواثي و الدفر واخر شي نام نصير.. فوكه و تلاوة وياه
و اثنين من ولد عمنا حددو عون.. و نصير.. على بطنه كاعد تولاه بوكسيات
بس صوت طلقة ثارت ما عرفت مصدرها ظليت اصيح بوجه نصير..
واني ادك الطم...
لمن تفرقت العمام وبين من ورى سيارة بيكب رصاصي احد عناصر الدولة يمكن دورية لأن نزل من السيارة عنصرين جان واحد برتبه نقيب تقدم هو وجماعته حاول يستفهم شكو شصاير و امر ربعة يسحبون ولدنا كلهم...
اما عون.. جان شبه فاقد مدمى وهو كلما يرفعوه يوكع من ايديهم مو واعي كولش وجهه مغطى د،م و عيونه نص مفتوحه جنه يجالع
يريد يتنفس من حلكه حتى نخيلي غرغرة الموت ببلعومه وراها شرك يسعل.. انتبه وهو يون من الألم
: اخ.. اااخ... حموت ضلوعي تكسرت اااخ.
مال براسه صفح وصب الدم من خشمه وحلكه
العناصر صاحوا
: هذا منتهي استعجلوا بساع للمستشفى
اشر النقيب لوحدة من سياراتهم
: كبل للمستشفى حالته مبينه خطره..
باوعت بعيني شلون ولدنا انكرفوا وشلون عون.. نقلوه لسيارة الثانية وكل من السيارتين طلعن بطريق مفترق مختلف..
مر هذا اليوم المشؤم بحياتي مثل جرس انذار لغلطتي وعدم نضج اختياري..
لان اثبت نصير.. مجان يحبني كل هدفه عون.. ميأخذني و جان أداة وسيلة لعمامي استعملوها نكاية بأمي حتى يسحبوني منها..
ظليت كاعدة بيتي رغم اجت بيبيتي وجدي كال تمشين يمنا لمن يطلع رجلج وولدنا متبقين وحدج بس رفضت اروح لبيتهم لأن اعرف اني وياهم مو على حال خاصة عمتي..
العرس طبعاً تحول الى عركه مثل معرفتوا وعمامي وولدهم وزوجي باتوا بليلة العرس بالسجن..
شوي و دخلت امي للبيت و هذا الشي خبل جدي..
: انت شجابج مو اتفقنا ما الج علاقة بمريم بعد
ردت امي
: زواج و ضغطتوا عليه وهددتو نوري و اخذتوها هسه الخطوة الثانيه انطرد مو؟ تمنعوني بنتي ؟! لا حجي خاف الله مو انتم تدعون التدين والألتزام وين دينكم عنكم وانتم هذا فعلكم ابقى يم بنتي لمن يرجع رجلها...
كالتها امي وكعدت ارتاحيت مردت اروح بيت جدي وعمتي تتهمني اني كصتي فكر وابنها اخذوه عناصر النظام....
ضاج جدي ظل يغلط على امي وطلع يدردم
: يطلع نصير.. ميبقى هي عركة قرايب وفضت و يصير خير نشوف شلون تعتبين عتبة بيته..
بس طلع رزلتني امي
: ارتاحيتي الزلم تكاتلت من وراج عون.. كاسرين ايده و ضلعه رض ليش ولج ليش وكال راح اشتكي عليهم اسجنهم ولا نصير.. يتقرب لمريم..
: ما يخلوه بيت جدي الهم معارف بس كون ما يأذون عون..
غمتني : بعتي الحنين واخذتي المغرور يطبج طوب الله يستر كون ما يعاند عون.. لا يدبروله سالفة تضيعه ولا اثق بجدج وولده يتمسكنون لمن يتمكنون
حرامات والله بيج التعب التعبه عون..
سكتت وبگلبي اندعيت السالفة ما توصل محاكم ولا تكبر وظليت بقلق على عون.. من جانب يبقى انسان هواي ساعدني ودللني..
ومن جانب نصير.. بس لا يطلع حركته بيه لان صاير ما يتحمل اي شي يصير بسبب عون.. ينذب براسي
ويتهمني لو ما منطية عون.. وجه مسوى هيج ولا يقاتل حتى ياخذج مني..
اربع ايام و عون.. جبروه يتنازل لأن بيت جدي حاربوه برزقة اذوه بكولشي وحتى ناس الهم مكانتهم ضباط راحولة يتوسطون يتنازل غير التهديد المبطن يذبوه ورى الشمس..
عـــــــــــــــــــــــــــــون
ونيت بألم اريد انكلب من ضلوعي مدا اكدر اريد اتنفس مكدر همست اعاتب گلبي العشك و انغدر بعشگه
هو اني قشمر املتني لمصالحها من اجه ابو الفلوس شمرتني مثل الكلب..
مريم وصالج صار حسره ياريت ما حبيتج...
شهكت كوة واني اريد اجر النفس بس الصار غصيت بألم ضلع مرضوض و شهكت سجين بكلبي يتكطع..
اجر نفسي بالدفعات مو لأن ضلعي مرضوض.. لا..
بس لأن روحي انثلمت بوصال مريم.. المفقود غمضت عيني وما مهتم لأبوي الي من الخوف يريد يقنعني اتنازل..
: عون.. ابني بس انت طلعتلي من الدنيا ما اريد اخسرك وليدي
باوعتله بعيون مورمة من البوكسيات و شهكت بألم لأن ضحكت.. الضحكه ما تتفق ويضلع مرضوض مو بعد قلب مكسور ومهجور و مخيون ومخذول..
فحسيت الضحكه نار بقلبي اكثر مما الم بضلعي.. تغلب الام الخذلان وانكسار القلب على الم الجسد المرضرض...
اقوى الم هو الألم النفسي اقوى من الام الجسد بملايين المرات
الجسد يطيب بس الروح من تنجرح صعب تضمد وما تطيب بسهولة واذا طابت تطيب بتشوه دائم.. الروح ما تضمد وعلاجها صعب جدا..
استهزأت : شعجب ما داعيت بفصل عاد خوش فصل بيه مربع بوية لو تروح للشيخ العام تكلهم ابني بالعرس و جاي يأدي واجب وبالشارع هو و داروا عليه عموميتنا و كسروه تكسر واريد حق ابني مو هاي شغلتك تدور طلايب فلوس بالفصوله..
سكت ابوي ودنك بيدي السليمه ضربت كصتي
: جبحها من كصة فكر لأن انت ابوي تخاف من بيت الحجي مو..؟ الا اخيسة بالسجون
: بالمحضر كلهم شهدوا انت سكران وفايت على بيتهم و حرمهم فكتلوك..
: ما جنت سكران هو كأس واحد و الفحص بين متعاطي بس مو سكران..
: متعاطي الشرب..وكل هذا السويته وتكول مو سكران؟! الحق وياهم ترى بس شهادة المفرزة الفاتت هي وكفتلك
ضحكت
: بيها الخير من كعد حظي و شهدولي ولد عموميتي الي داروا علي واني بالشارع بحالي ممأذي احد
: بالشارع لو طلعوك ولد عمك من حديقه نصير.. سحل وكتلوك بالشارع..
لا عبالك الحجي يسكت ترى يعرف ناس واصله هو تاجر ويعرف كولشي وولده بالحكومه واصلين مراتب..
ابنه ابو نصير قاضي شتتوقع يعني هاااا ترى ميردون يأذوك تاركيك انت تتنازل وتكتب تعهد متوصلهم ولا لبيوتهم..
سكتت هيج الفلوس تسوي كولشي وين صلاتهم التعيرني بيها وصالي (مريمتي)
: و تنحرم عيوني من شوفة مريم.. الى الابد بوية تقبلها بيا قانون وبيا حق من عمري زغير حتى متوني ذن يشهدلي...
من اشتغل حمال و اجيب وانطي مريد تحس اقل من صاحباتها بيا حق تنكرني وتفضل فلوس نصير.. علي ليش وتعبي و گليبي الي نچوى بنار وصالي المفقود مريمتي..
رد ابوي مستغرب
: وصال؟
: اي وصال مفقود بوية مريم.. صارت حسرة علي بعد شوفتها شلون اطلعه و يأخذ حقي بيها يتقرب يابة واني هنا اموت يابة اموت..
حاول يقنعني عصب وهو يشمر بيديه...
: عون.. بنات موجودة جمع فلوس لعرسك واعرسلك وانت شو مثقف ومعلم رياضيات الف من تتمناك..
غمضت عيوني ساكت
واستمرت وفودهم يجون بحجة يتعذرولي و يتوسطون و بين كلمة وكلمة يذبولي تهديد..
لمن ما بيوم دخلوا مفرزة وياهم الي يجي يتوسط و فتشوا البيت بتهمة انتمائي لأحد الحركات الي ضد الحكم
حاجاني على صفحة..
: تنازل مقابل رقبتك هنا
و آشر على ملفات بيده
: اثباتات انت مخرب و منتمي لتنظيم *"*'*"
ابوي سمع و ظل يبجي
: سيدي بيدي اجيبه الكم والله سيدي بس هذا عندي
اجت بفكري مرت ابوي الي حالياً عند وصالي مريم.. ادري بيها تخاف علي يمكن تعتبرني سند الها اكثر من رجلها
جريت نفس و همست
: اتنازل بس تشوفوني مكسر اطيب واجي اوقع تنازل....
بس جبير المفرزه ضربني بالورق البيده ورق كيدية يردون يتهموني بيها اذا ما تنازلت..
: اسمع لك باجر الصبح باجر تنهي تكول مكسر ما تجي هااا ولك يول اعلكك من اذنك هااا ولك يول دتسمع
لهجته تبين منتسب يداوم بمحافظتنا بس اصله من العاصمة حسب توقعي
رجع بوجهي سطرني راشدي
: اسمع هااا ولك هااا ولك يول اسمع غصب عليك لو تجي زحوف لو يجيبك ابوك شايليك شيل تجي طلعهم...
رد نطاني راشدي ثاني وزنكني من ركبتي
: باجر بالعشرة تتنازل بالعشرة وخمسة ماكو تالله لأخليك عبرة...
وهذا الصار التجربة المريت بيها بينت الي الحياة مصالح وين مصلحتك تمشي امورك وصالي المفقود علمتني درس بالحياة..
رحت ووقعت التنازل اعتبرت توقيعي بصمة عار كدام نفسي عفت مريم.. لغيري وأني أدري بيها
(وصالي المفقود) جيت أداوي جروحي
بس جرح الكرامة ما يطيب بلفافة شاش مريم.. باعتني بفلوس نصير، وأني بعت حقي بتهديدهم صرنا ثنينا بضاعة بسوق المصالح..
بعد ما تحسنت صحتي بديت اشتغل بكل مكان و الم فلوسي الي بالتدريج بديت انسحب من ابوي ومرته..
قررت اعوف البيت واحاول التمس بالخولة ملجأي الخولة الي مطبات حياتي شغلتني اواصلهم الخولة الي كلما اجو ابوي يطردهم واني ابقى متفرج مكدر اعوف بيت ابوي لأن جنت باقي لأجل مريم ..
ومريم.. راحت هنا لازم اطلع من ابوي واطلب العون من خوالي...
بس رحت وكفت كبال بيبانهم استحيت ما دكيت الباب صرت عابر سبيل يدور معروف وانقاذ سنين ما اواصلهم ولا اسأل بيهم
هسة اجيهم ذبيت حسرة ودرت ظهري لبيوتهم ومشيت مبتعد واني الغي فكرة الجأ الهم..
اشوف بعيون مرت ابوي حسرة وألم و مثل التريد ابقى اسندها لأن ابوي بخيل وطماع عطال كل شغلته عرايك طلايب فصول و تقفيص بالعالم
ما نسيت وصال.. الاسم الي سميته الها تمني بوصالها وحرماني منها بس تناسيتها حاولت انشغل النهار بين شغل ودراستي والليل رفيقي البطل الي حاولت اتركه..
بس مكدرت حاولت الله يشهد يمكن لو وصالي المفقود.. اختارتني يمكن تصير سبب اتخلص من ادمان الشرب..
بهاي الفترة اني بين سجادة صلاة وصوت قرآن (يا ايها الذين اسرفوا على انفسهم لا تقنطوا من رحمة الله)
وبين بطل العرك وصوت ام كلثوم امي حياتي و اغدا القاه يعني بين التوبه والاثم..
اني شلون تعلمت الشرب ودروب تعبانة لا عبالكم اقلد ابوي
غلطة بمراهقتي مشيت وي شباب علمتني عليه ومنا بيئتي وابوي فجان سهل اوكع بفخ الشرب بس شلون اطلع منه جان كلش صعب...
اكثر من مرة ردت اقتل نصير.. لا الظروف و لا الوقت اليسمح اضيع شبابي لخاطر النذل..
انتبهت على صاحبي الشغلني وياه بالمطعم
: وين صافن روح طاولة خمسة شوف Menu.. شيردون
هزيت راسي ورحت واني البي الطلبات لحد ساعه 1 انتهى دوامي..
رجعت للبيت واني غرفتي صرت اقفلها لكيت القفل مفتوح هنا عصبت..
عاد بساع ركضت للكنتور بس للأسف شفته مكسور وفلوسي ماكو صحت بصوت يرعد فلوس اشهر الم بيهن
و ماخذ قرض من ولد اريد اشتري سيارة تكسي..
رحت دكيت باب غرفة ابوي طلعت مرته وهي تثاوب نايمة جانت بصوت يرجف سألتها
: غرفتي مكسور بابها الكنتور مكسور و فلوسي ماكو فلوس اكثر من سنة الم بيهن لا خليت شغلة ما اشتغلتها
وينهن يمة ام مريم..
صفنت علي و بخوف حلفت وهي هنا بينت لكنه كردية بعربيتها
: مو اني تعرفني ما ابوك
كعدت بالكاع ادك على راسي واني اردد
: راحت فلوسك يا عون.. اعرف منو غيره ولكم مو ابو يكرم الله ما يرتاح لمن انتحر..
يمة ام مريم.. هسة تعبي يولي بس وياهن القرض من ولد اخذته اشتري سيارة اجره واسدد من شغلي هسة شسوي فلوسي تولي
مكتوب علي كل عمري منهوب الفلس الاتعب بي غيري يتهنى بي بس كليلي منين اجيب فلوس العالم لازم اسدد قسط كل شهر يمة دبريني
باوعتلي و كرفصت كدامي و بدت تبجي
: حظي وحظك يا عون.. بنتي الي طردوني من بيتها وليومها ما تتصل وتكول امي و انت ابوك و سوالفه
وخوالك الله يذكرهم بالخير هم تخلو عنك والا واصلوك وساعدوك سمعت هم متمكنين..
رفعت عيوني الها
: خوالي اوف اي خوالي..
هنا لازم اذب الخجل جانب متورط بقرض انسجن اذا ما مدولي ايدهم الحاجه هنا جراتني اطلب منهم معونه او دين...
كمت تركتها وگلبي مجروح منهم بيمن ذكرتني بمريم..
همست
: مالي عيشة وياكم وينه خلي يرجعلي الفلوس...
: من العصر طلع وما رجع
: هة.. اي مبربع...
كلتها ورحت لملمت جنطتي و اهم غراضي و مستمسكاتي باوعت اخر نظرة لغرفتي
ظليت واكف اطول فترة يم كنتوري المكسور وعيوني غوشت هاي الفلوس مو ورق هاي حلالي هاي تعب السهر بالمطاعم هاي عرك كصتي وذلة الحمالة...
جنت أحلم بسيارة تكسي تسترني بس طلع أبوي هو الحرامي اللي يبوك حتى حلمي كلت بكلبي
يا بوية الغريب يكسر ضلع بس أنت كسرت ظهر.
بهذيج اللحظة البيت صار يخنكني والحيطان بدت تاكل بية فقررت أشيل جرحي بجيبي بدل فلوسي النباكت وأمشي.
هنا بهذا البيت انولدت وتيتمت و هنا من عمري الزغير قبل ليخط شاربي طفل بدل ما يلعب يشتغل ويصرف على مرت ابوه و بنتها..
هنا گلبي عاش بأمل عشك و هنا بين هاي الزواية بيوم من ايام حضنتها وهنا كبرت و عرفت دروب الغدر وهنا گلبي انطعن من اهلي وحبيبتي الف مرة..
امشي ومهدل جتفي بحمل ثكيل ما اعرف الزمن شيكتبلي و شيراويني بعد بعدني زغير وشايل احلامي ودمار گلبي و مسؤليات
تعرفون ندخل المعهد بعمر 18 نتخرج بعمر 20 سنتين.
ومن اشهر داومت كمعلم بس الراتب قليل وطموحي كبير...
طلعت مرت ابوي تتوسل وراي
: وين عايفني واني منو الي..؟ صفيت لا بنت تحن وتسأل عليه ولا اني برجال كدها و يتحمل حملي لا تروح يمة والله تروح تنكتب نهايتي انت ابني الما خلفته...
تتوسل وتلزم بية ودنك تبوس بأيدي تخاف من هذا الزمن والظروف الي ما تطمن وخرتها عني و التفتت حضنتها وهمست
: مالي بعد عيشه هنا بالبيت غدرتوني المن باقي بس استقر امرلج كل فترة واني عون.. اسم على مسمى ما اتخلى عنج... وامي ما كذبت من سمتني عون..
عفتها تبجي تتوسل بس عاندت اجه الوقت الي اواجه خوالي.. خوالي الي ابوي بعدني عنهم و شكد اخذ بعرضهم و كرهني بيهم..
اجه وقت اطالب بحصة امي خاف غلسوا و ما ردوها بس اني عايش مميت و حقي اخذه من عين السبع...
مــــــــــــــــــــــــــــريم
تنازل عون.. و مشفته لفترة كولش طويلة يمكن اقتنع خلاص اني مو قسمته و الزواج قسمة ونصيب...
بيتي الجديد ما حسيت بي أمان نصير اللي جان يبتسم صار وحش من غيرة والشك...
بيوم الي رجع نصير.. عود تلكيته اتحمد سلامته شاف امي طردها
: اذا عتبتي باب بيتي اكسر رجليج تريدين تعلمين بنتج دروبج والله اذبحج و اذبحها
طلعت امي سكته دون مترد بس باوعتلي و هي بعيونها دمعة..
: هو هذا البعتي الذهب واشتريتيه
غمتني وراحت ونصير.. باوعلي و اشر
سد الباب ورى امي حيل ورجع باوعلي وعبالك يدور على أثر (عون) بوجهي.
طرد أمي كدام عيوني وكسر خاطري بكلمات مثل السم عرفت بهذيج الساعة إنو الذهب اللي لبسته جان قيد والفلوس ما تشتري ضحكة من القلب....
ندمي جان ياكل بية مثل السوس بس شيفيد الندم والباب مقفول والناس اتطكطك أصابعها عليه من حقدهم...
دفعني حيل وهو يحجي...
: بيت جدي واهلي جاين يتحمدون سلامتي عدلي جهرتج هاي هي هاي جهرة عروس لو تفكرين بالحبيب الكسرته الج..
: ها..
دفعني للغرفة و ظل هو ينتظرهم زين شبي تغير هيج مو جان لطيف و زين شو تخبل علي..
اني شعلي اذا عنده مشاكل وي عون.. اني اختاريته اله المفروض يتعامل وياي بلطف و حنان..
ظل يومين يستقبل أقاربه وأهله و هو ما مكلبني بس يخوزر
حتى كتل كتلني ويتهم عون.. عود من متعاركين بالشارع معيره كايلة اخذت فضالتي وهذا متخبل كولش..
ما اذكر عون تكلم علي هي هذا شكوكه خلته يتخيل وتخبل علي..
ثالث يوم كالعادة ينام بالصالة كعدنا ع الجرس يرن راح جانت امه واجت تهلهل علية
مو هلاهل فرح وعرس لا تغرد شتم و غلط و تتهمني وهو واكف يباوعلها..
: شو ما شفت نيشان ولك هذا عون.. مو باطل يقاتل عليها ويهد ودومه سكران هذا خاف لاعب بالبت اويلي يمة تقشمر وليدي..
وكعدت بالكاع يم رجليه ودك تلطم
سكتها
: كافي يمة شبيج؟ لوك لوك لوك انطي فاصل..
: سمعي يمة ما تدنيت الها شوف هسة تخليني رافل البيت على الخلفتها يمة حدفعيني هسة اموتها كافي لوك لوك ددرمين وتنوحين اكلج ما متدني الها بس كافي عياط صريخ خليني انجب واكل ##### ووحل.
: يبووو ولك يبووو تقشمرنا ما يسوى الجهاز الذهب الصرف على هاي ال&&&&
لزم امه كومها وحضنها
: فهمي وسكتي خلي اكل تبن اني انام بالصالة تعبان نفسياً و مالي خلك كلها ولد عمي و الاقارب الشهدت العركة تسألني العركة على مرة؟ لو بينكم شي وعون ليش هيج يحجي....
اذا نفسه بيها شلون تأخذ مرة منفوسة ما ترتاح وحجي وحجي شلون الي نفس اخذها عوفوني ارتاح لا انت هم فوك همي..
كالها و خزرني و فات للغرفة اخذ ملابسه من كنتور و هو يبدل كتلة بخوف و توتر حجيه لأمه وترني..
: تتريك...؟!
رد بكلمة وحدة وهو رافع حاجبه الي بأتهام مكتوم
: لا..
و كمل تبديل وطلع يحاجي أمه
: يلة يمة لبيتكم مالي خلك اروح و تتعاركن المن عزلت هاي من بيت اهلي..
باوعتلي امه و غمتني و طلعت وتبعها وهو يكول
: اتغدة بيت اهلي للعصر ارجع امج تحرم جيتها لبيتي وانت ممنوع تواصلينها..
سد الباب قفله كعدت بالكاع ابجي حظي باوعت للتلفون و رحت ركض فريت القرص طلعتلي امي...
: يمة اني مريم..
: يمة بنيتي شبيج تبجين؟
حجيتلها
: هو هذا اليردوه واني خوفي من نوري هم جان سبب اسكت و اقبل راح اجي عليج مدام ما لمسج سهلة ان شاء الله ونفسخ ويولي يطبه طوب
: يمة ما اكدر والله جدي هددني يقتلوني لأن كال انت متزوجة تعوفين بيتج هنا تعتبرين شاردة و نعرف منو وراج عون.. اخذج انت وياه للصحراء اذبحكم
: مو هي هيته..؟
: اي يمة هيته كولشي يسون شلون طلع ولده واحفاده ترى سولفوا بينهم و سمعت وعرفت شمسوين بعون.. وشلون رادو يبلوه مو مال تلفون الحجي..
: اي اعرف اعرف...
همست : احس بالندم اني البهذلت عون.. يمه بس معرف شكول وابرر غير مو قسمته اني..
: يشتغل خطية وسمعت يريد يشتري تكسي الله يرزقه خلي يلتفت لروحه بعد ويكون حاله و يتزوج..
بلعت غصة داخلي دوم يكول باعتني لأني فقير..
: ما بطل الشرب؟...
: شيبطل يمة الله لا ينطي العلموه هذا الدرب هم خساير فلوس مستمرين ربعه بكعداتهم و هم يجيبولة الشرب على حسابهم..
واوقات يجيب الرخيص نسيته اذا محصله كعدة وي ربعه يسكت حاله بيه يمة ادمنه صعب بعد يترك
ولا اكو حافز يخليه يترك عود اكول يكون حالة يتزوج يخلف يلتهي بالعيشة والجهال ميلحك بعد على هيج سوالف وبلكت يترك..
: لو عنده ابو من صدك ما انحرف كعدات وشرب و اكيد نسوان
: اكيد كعدة لازم بيها كاوليات..
من كالت نسوان ضجت شنو هيج صارت اخلاقه اول شرب و متركه زاد النوب سرسره همزين ما ازوجته بررت لنفسي
التهيت بدراستي و خاصة السنة سادس استمريت كل فترة اتصل بأمي لمن لزمني نصير.. جر التلفون
: شوفي ام مريم كتلج ممنوع تتصلين ببيتي ولا بنتج انت وحدة...
وظل يغلط امي يمكن من الفشلة سدته باوعلي و جرني من ايدي و هو يضرب بيه بالحايط اصرخ ابجي ما حن عليه
زاد و شمرني عالجرباية وجانت هنا اول علاقة زوجية بطريقة همجية جداً
ورى ما كعد باوعلي و جر نفس و حمد الله مثل الجان خايف اطلع مو بنت وعباله ملعوب بيه لزمني حضني يبجي على بجاي هذا مو صاحي خبل
: آسف ولج شيطان هاي الفترة متربص و خيالات توحيلي بينج و عون.. علاقه و كلامه واني اضربه خبلني معندي غير هذا عذر
آسف ما وثقت بشرفج وعذريني اثنين شباب ببيت وهو نكس يشرب سختجي نسونجي اكيد اشك بعيني امس شفته بحضنه الكاولية
وخرت واني اشهك الام روحي اقوى من الم الجسد بكلبي كولت وشمعرفه بيه شوداه لذيج الاماكن وشافه...
بس ما سألته يجوز وادم توصل وراح يتأكد يلزم لزمه عليه..
ظليت الملم روحي تغطيت وتركته يعتذر و بين يريد يحضن وخرت ايده
: تعبانه عفية عوفني اريد انام فدوة
تركني وهمس
: مثل ما تردين والله راح اعوضج مدام شكي جان غلط و ابن الكلب لوتي راد اشك بيج و اطلك..
سكتت مرديته مفهومي عن الثقة مختلف عن مفهومه
ظل يومية هدية ويدرسني و يطلعني بس ظل قافل على امي كلما افتح الموضوع وياه يسده
: امج مرت منو؟ و ابن رجلها النكس خلينا مرتاحين بلا طلايب بينا..
حجاها وكرص خدي وباسني
: شكد احبج..
جان كلش كريم يحاول يعوضني اول زواجنا و تصرفه وياي يوم على يوم تعلقت بنصير.. من استقرت علاقتنا وتحول التعلق لحب..
طفله جنت وهو رجال ثلاثيني و يكدر يعلقني بي ويقشمر طفله دورت بيه حظن امان واستقرار..
شفت بي شخصية يضمها بوجهه الجدي و اسلوبه الحاد جان حنون
و كريم و صار اب و زوج و كل عائلتي
بس كون ما يعصب و كون ما يغار واذا غار ينكلب طنطل علي هاي مشكلة زواجنه هو غيور غيرته مرض..
ذبيت حيلي عالدراسة وحياتي الزوجيه ومشاكل وي عمتي من تجينا اني ابد ما اروحلهم الا اذا جدي يتمرض او واجبات..
عـــــــــــــــــــــــــــــــون
جانوا خوالي احن علي من اهلي ما جنت متوقع كل هذا منهم..
بيوم الي وصلتلهم مهضوم واني منهار مادياً و معنوياً
رحبوا بية وبقيت يومين متردد اطلب حقي الباقي بذمتهم لمن ما خالي الجبير هو فتح الموضوع..
: مدام اجيت اريد اكللك بوية ترى حق امك محفوظ امانه الله ورسوله بس كلما يجي ابوك نطرده ما ننطيه
كلنا باجر يكبر وليد خيتنا و هو ياخذ الي بذمتنا والله ردت انتظر تنضج بعد اجيكم و احاجيك..
بس مدام اجيتنا و حسيتك مهموم و من ويلادنا انت مسولف يمهم وضعك
شوف ابني تريد فلوسك انطيك
بس ليش ما تخليهن يمنا واحنا مشغليهن وها ضامين الارباح الك صح هن مو ذاك الربح بس يسدن عازتك..
باوعت لخالي
: شلون انطيتوا امي لواحد مثل ابوي من ماتت امي ليش ما اخذتوني هواي تأذيت خالي هواي عشت دور مو لعمري و تدمرت حياتي..
دنك خالي وكلي
: مشاكل وي ابوك بوية ويومية جايب عمامه و هاد علينا وامك قسمتها على صيت اهاليتك نطيناهم مرة ما عبالنا يطلع نوري خرنكي وما بيه خير..
شبع خيتنا فكر وقهر و باك ذهبها و يوزها تطالب ابوي بورثها وابوي عايش لو ننطيها مصيريفها يبوكه منها
اجينا وردناك بس طردنا وانت بعدك زغير ما فاطن زين وراها سنه تزوج هم اجينا طالبنا بيك يمكن ما تذكر انت ما قبلت تجي ويانه...
جنت صبي شاغول وتريد تتكفل الغرب حاولنا وياك رفضت وظليت للسوك اتبعنك واجيك اريد اخذك تشرد حتى رحت لابو مرور كلتله هذا يتبعني يبوكني انت البعدتنا عنك يا روح خيتنا وغواليها..
وراها رجع خالي ينتقد ابوي وسوالفه وسمعته الي ما تشرف حيل انقهر احس بالعار والفشلة..
ردت اطم روحي وخالي يعددلي سوالف ابوي ليش هيج حظي ابوي المفشلني وعار بكصتي هذا هم حظي..
: ابني شتحتاج محد يمن عليك بيوتنا مفتوحه و مضايفنا و الك ارباح من ورث امك الشغلناه..
صح شي بسيط بس ولا الماكو حاول ابوك يطالب بورثها من مات ابوي هم رجع و دزها تطالبنا بس نكرناها لان نعرف الفلس ياخذه رجلها
و كنالها خوية لا تفلسين كل رأس شهر تعاي ارباح ورثج و راح نشغل الج فلوسج و اخذنالها بيت كلنا نطلكها بس ابوك هددها بيك و المرة تضعف كدام خلفتها..
البيت مخليناه بأسمها لا يقشمرها وتحوله بأسمه بس مدام انت موجود
ومحتاج مكان تعيش بيه هذا مفتاح بيتك و نداوره بأسمك
حجيت عن دكة ابوي بيه واني مدنك بداخلي اكول لو ما خوالي ولد اصول لو اجيت وطردوني وما نطوني حقي
وين انطي وجهي و دين الولد شلون اسده...
تصرف خوالي صح من ما انطوا امي كل فلوسها وابوها من وزع ورث ولده بحياته قسمه حسب الشرع قبل ليموت و أمن حصة امي يم خالي بأسمه
لو بيوم تطلك يداوروه بأسمها وينتظرون بعمر ناضج و يداوروه بأسم خلفتها..
طبعا حصتها وارباحها مو ذاك الحساب ولا اصير غني بس اكتفي وانستر
خاصة اخذت الارباح المتراكمة سنين و سديت فلوس الولد و بديت اعتمد عالارباح كراتب شهري رغم مو ذاك الربح القوي بس يسد مصاريفي وما احتاج امد ايدي.. فظليت اعتمده مصرف والراتب اضمه.
استقريت ببيتي ما بيه اثاث خوالي ما قصروا انطوني منهم لوازم دولاب جرباية واشيا
الي تكفي شاب عازب لمحولي اتزوج من بناتهم بس گلبي جفل من الزواج و تعقد من الارتباط
ظليت فترة ما اشرب و اني متأثر بخوالي الي من عرف بيه اشرب اخذني على صفحه
حجيه المعدل و كلامه النصوح و ظل حتى لو ما اجيهم يتعمد يجي وقت الليل خاصة بطلت من المطعم فبالليل ببيتي من الثمانية فضلوا يواصلوني يمرون بيه ينصحوني و بيوم فاتحني
: كل ما اريد احاجيك اكول فشلة بس يبعد خالك انت شنو ما تصلي ؟ ترى الصلاة تنهي عن الفحشاء و المنكر عبني ما اشوفنك تروح جامع.
بيتك مابيه سجاده ولا قرأن جبتلك ذن يحفظنك يبن خيتي
خلا القران بحضني فوك السجادة
وسبحه حلوة...
اباوع الهن رجفه بكلبي توتر قشعريرة من اشوف كدامي التوبة تلوح بس رجع وسواس الخناس يوسوس
رجع سألتي خالي
: ليش ما تصلي مبين مو يم الدين والصلاة شلون تريد ربك يوفقك وانت قاطع صلتك بيه ولك الصلاة هي لقاء العبد بربه توكف على سجادتك بعالم روحاني من التقوة والخشوع...
تحس انت برحاب الله وبين ايدي
تندعي وتبجي بخشوع وانت تتوسله.. تصور الله يرد توسل العبد.؟
تتصور ما يستجابله؟! لا والله ربك رحيم توب وارجع لطريق التوبه اذا كنت ما تصلي.. واذا تصلي.. هنا اني مطمن عليك....
: ما اعرف و ما متعود مو بيدي شي يبعدني كم مرة اصلي واتوضى دون معرفة مدري صحيح لا المهم نية بس ارجع اعوفها... لاني مكدر اترك..
سكتت لا اجفص.
: شيطان بوية استغفر ربك و التجيء اله.. هذا شيطانك متلبس بيك و متحكم بيك تعوذ بالله والتجأ للتوبة وربك ما ينساك راح يخلصك من هذا الشيطان... انت بس اسعى.. وشوف...
: خالي الله كريم..
: والنعم بالله يالله لا تتعاجز كوم توضى اكيد ما تعرف الام ماتت وانت طفل و الاب خرنكي خلي اول يصلي ويصوم ويعرف الله يا الله يعلمك..
علمني عالوضوء و الصلاة واستمريت اشهر بس اوقات مو بيدي شيطان يلعب بعقلي..
فأروح اشرب يم جماعتي و اتأخر للفجر حتى لا يجون خوالي ويحسون بيه من باب اصلي واندم لان شربت ومن باب احن للعربدة و بيوم اجه خالي و كال
: امس مكابل بيتك للعشرة ماكو..؟ شني وين ما وين كلت حن لأبوه وراحله...
تحججت
: اشتغل خالي؟ بالعلوة وتعرف توصل الشاحنات و نزل الصناديك للفجر...
دنك ممصدكني و هز راسه
: الله يوفقك ابني ويهديك..
مدري ليش من ما يصدكني احس متفشل وندم وخجل... لأن خنت ثقة اعتبر..
خلا وراح الندم يأكل بيه يارب خلصني من هذا السم مثل الجكارة مجاي اكدر اتركه واذا تركته اظل احن كل فترة طويلة اشرب..
ظليت الم فلوس الحمد لله رغم حصار بس اني فرد وحدي..
طبعا مكدر اعوف مرت ابوي بعيونها اخر مرة انطبعن بعقلي نظرة الخسارة والسند الي تعتبره وحيد راح تضيعه
امنتها و اتصل مرات من يطلع ابوي من البيت ماريده يعرف مكاني هو اني شارد منه بلكت ما يزل لسان مرت ابوي...
خاصة جاي هاد على خوالي ونكروا يندلون مكاني
واتفقت وياها تطلع بمكان نلتقي اسأل عليها اشوف شمحتاجه وانطيها فلوس مصرف الها وياها انصحها..
: وجهج تعبان يمة نصيحه عوفيه تعاي يمي عندي بيتي..
: يمة شتكول الناس كاعدة بيت ابن رجلها..
وظلت تبجي استغفرت الله شوي وبين ابوي و هو معصب ويرعد عليها
: هاي انتي هنا و اني اكول وين تروح هاي المرة وتلفونات مجهولة و تنسد من ارد لبيت لذا شكيت مصاحبه علي واجيت الزمج وي منو طلع ابني..
دنكت ما اشتهي اباوع بوجهه دمرني شكد اكرهه..
: نوري فدوة منا وادم لا تصيح
جانت تتوسل ينصي صوته بس شاف الفلوس بيدها وكال
: خوش الولد ابني و يصرف عليج و ميذكر ابوه فلس مو كافي عفت البيت مخليت مكانات التشتغل بيهن ما سألت وادورك... حتى خوالك ال&&&&( غلط عليهم) رحتلهم كالو مندري بيه..
رديت من ورى خشمي
: المن باقي يمك حتى تظل تبوك تعبي الملمهن وتاخذهن... ترى لعبالك نسيت دكتك بيه بالعظم لا حجيت ولا عاركت لميت جنطتي وطلعت من البؤرة العشت بيها وياك..
: وانت وين هسة؟
مليت يلح صيحت
: ببيتي ارتاحيت؟ بيت امي خالي مشتريه وميقبل جهرتك تعتبه.
رد يتمصلح
: خوالك شلونهم شاغولين و فلوسهم هواي ملابسك مبينه. صاير انيق..
ردت اضحك خلا عينه ع ملابسي
رد يتمسكن..
: بوية عون.. اريد مصلحتك خوالك باكو فلوس امك وانت اكيد ساكت طالبتهم مو؟ ها انطوك فلوسك لو لا؟
ليش ساكت ترى ابوك مديون و ذول كاعدين على ذهب..
هزيت ايدي وكمت
: الله وياج يمة.. اترخص
لزمني من جتفي
: شو ما تحترمني لو ما امك شريفة جان كلت انت..####
بلعت الفشرة و مشيت وهو يصيح
: ولك عود كبرت وتعوف ابوك والله ادعي عليك.. يا عاق
ما التفتت بس المرارة بحلكي فول
يمكن عاق، بس المثله ما يخلي مجال اصير ابن بار اذا جنت ابن عاق فهو اب سبب لعقوقي اله..
واني اتمشى اريد فورت يأخذني لبيتي
عاد ركبت سيارة 18.. راكب و جاي اكعد و شفت..........
