رواية ضحية امي الفصل الثالث عشر بقلم جمانه السعيدي
طلعنا من المركز وكمال كال روحي انتي وخالج واني اقفل المحل وباجر من تجين انطيج المفتاح
وفعلا رجعنا اني وخالي للبيت
ثاني يوم رحت لكيت المحل نضيف وكمال جايب واحد يشد جام جديد للمحل
بس شافني كمال كال روحي اكعدي بلمحل مالتي منا لمن يخلص
ثبتو الجام الولد وراحووو
لقاء شلون اخذو قياس الجام بهلسرعه
كمال اني الصبح جبتهم اخذو القياس واكدت عليهم العصر يشدونه وهسه كلشي رجع مثل ما كان واحسن
لقاء شكرا جزيلا اني جايبه وياي فلوس على اساس اتصل
بلولد الي شدلي الجام قبل واتفق وياااا
هاك الفلوس واذا بعد اكثر عادي اجيبلك
كمال انتي تحجين صدك
لقاء اكيد احجي صدك هاي الشغله يرادلها فلوس هواي وانت شنو ذنبك تدفع هاي الفلوس اني عندي خير من الله
كمال اعتبريه شكر مني للموقف الي سويتي ويااي
لان لو ما انتي جان احتركت اني والمحل
لقاء ولله ازعل منك اني هذا الموقف مستعده اعيده ميت
مره اسم الله عليك لان موقف إنساني وميحتاج تفكير هواي
ماكو انسان ياخذ ثمن المواقف الانسانيه الي يقوم بيها
كمال ولو ما أخذ ابد منج اي شي
لقاء الله عليك اخذهن
كمال حلفت ولله ما أخذ اي شي منج ممكن اسئل سوال
لقاء اكيد
كمال ليش تردين تنفصلين عن زوجج ولو هذا تدخل مني
لقاء هاي قصه طويله هسه احجيها الك عندك وقت
كمال حتلو ماعندي وقت اخلقلج وقت
لقاء زين اسمع مني
وبديت احجيله كلشي صار وياي من يوم ازوجت ياسين
لليوم
كمال لا ياحقير لا يانذل
لقاء بلبدايه راح اشتكى عليه واتهمني بلزنا ومن طلع التحليل مطابق
جاي يطالبني ارجع اله شلون ماتثق بيه وتتهمني بشرفي وشلون تريد ارجعلك
بس ولله يحلم لو يبقى اخر رجل بلدنيا ما ارجعله ابد
كمال حقج ماترجعيله ما يستحق وحده مثلج
لقاء
راسا اجاني اتصال لزمو ياسين وهو هسه بلسجن
وباجر يعرضونه على المحكمه
ولازم احضر باجر
المحامي يكول
هاي القشه الي قسمت ضهر البعير
ياسين خط كتاب سجنه بايده من أطلق النار على محل لقاء
ثاني بوم كانت المحاكمه وفعلا كدرت احصل ورقة طلاكي
والقاضي أكد علي ينطيني كل حقوقي
ونحكم على ياسين بلسجن
خلو الكلبجات بايده وهو يصيح ماكان قصدي اقتله ردت بس اخوفها علمود ترجعلي
بس محد سمعه
ماتتخيلون فرحتي شكبرها
رجعت للبيت وعزمت بيت خالي كلهم واخذتهم غديتهم على حسابي
واشتريت جكليت اخذته وياي وزعته على أصحاب المحلات بس ما كلت بمناسبة طلاكي
كتلهم الله فرج عليه ونطاني مرادي
وقررت بس اشوف واحد محتاج انطي فلوس
صدقه لان خلصت من ياسين
شفت هاي المكدايه اجت من بعيد
كلت بكلبي انتي اكيد صاحبة النصيب تاخذين ذني الفلوس مني
اتقدمت عليها بسرعه بس شافتني راسا دارت وجها وغيرت اتجاها
لقاء اوكفي لاتخافين ما اريد منج شي اريد انطيج هاي الفلوس
كامت تمشي اسرع تبتعد عني واني امشي وراها
من سرعة مشيها عثرت ووكعت
اني ركضت عليها ودنكت اكومها وهي تدفع بيه ودير وجها عني
اجتمعو اهل المحلات علينا وجابولها مي تغسل
بس هي رفضت ترفع النقاب من وجها
بس وهي تدفع بيهم وبيه و تحاولت تبتعد وبحركه عفويه ووكع نقابها وحده
وهي راسا رفعت عينها عليه بله شفتها لو لا
اني شفتها واني انصدمت
اتبسمرت بمكاني كمت ما اكدر احجي وكلبي كام يدك على السريع
هي كامت وعدلت نفسها وعدلت النقاب
ولمت العلج والجكليت لان اطشر بلكاع
ومشت بسرعه
بلمح البصر اختفت من كدامي
واني بس اباوع بعيوني ومآ اكدر احجي اي شي
اجا كمال وكال شبيج
لقاء اشرت عليها ودموعي نزلن
كمال ليش تبجين اتاذيتي ا اذتج دفعتج
اني بس دموعي ينزلن ومآ اكدر احجي
سحبني من ايدي ورجعني للمحل وجابلي ماي
كمال ممكن اعرف ليش تبجين
لقاء مسحت دموعي وكتله مابيه شي يمكن وكع بعيني تراب
كمال ولله شكلج مو مال وحده واكع بعينها تراب
هاي الدموع دموع حزن وصدمه
لقاء أريد ارجع للبيت اني تعبانه
كمال شبيج توج جنتي فرحانه وتوزعين جكليت
شصار شغير حالج
لقاء ممكن تقفل المحل اريد ارجع للبيت ما اكدر
كمال دقيقه اقفل المحل واوصلج للبيت
حالتج موطبيعيه
راسا قفل المحل واني بقيت واكفه وكلني ارعش ومآ اكدر اسيطر على دموعي
ولله الي شفته موهين ابد
صعدت بلسياره وشغل وطلعنا كل شويه يلتفت عليه
ويكول ليش ماتكولين شبيج
لزم ايدي وكال
اخذج للمستشفى
لقاء لا اريد اروح للبيت
وصلني وكال ممكن اتصل عليج اطمن على حالتج
هزيت راسي ونزلت من السياره ودخلت بيت خالي
بس شافتني زوجت خالي اتعجبت
...شبيج لقاء ليش رجعتي وليش تبجين
لقاء خالي موجود
...اي جاي يسبح
لقاء عفته ورحت دكيت باب الحمام خالو اطلع بسرعه اريدك ضروري
خالي لقاء ليش رجعتي صاير شي
...اطلع واني احجيلك
كعدت واني الدنيه ادور كدامي الشي الي شفته مو معقول ابد
طلع خالي وهو مرعوب شكو شصاير احجي
لقاء امي امي
...خالي شبيها امج
...شفتها اليوم تكدي بلشارع
...شنو تحجين صدك
...اي ولله تكدي وملابسها تعبانه وحالته حاله
...وين شفتيها
...صار فتره تفتر على المحلات الي يمي وتكدي بس شافتني شردت
اليوم لحكتها اريد انطيها فلوس ونهزمت مني وبس وصلت يمها وكعت
واني احاول اخليها تكوم جانت تدفع بيه وتبعد وجها عني
وبحركه عفويه انرفع النقاب
جانت خايف اشوفها وبس اتاكدت اني شفتها
انهزمت من كدامي بسرعه
خالي وصلت بيها المواصيل تكدي بعد الخير الي جانت عايشه بي الله اعلم شنو الي خلاها تكدي
لقاء وهسه شلون
خالي امشي ندور عليها ونسئل اكيد اكو واحد يعرفها ويعرف وين ساكنه
خلي نرجعها للبيت عمت عيني شلون عفتها الواحد
مثل هذا
طلعنا اني وخالي ورحنا نسئل عليها اهل المحلات
صارت الدنيا مغرب واحنا نسئل وندور عليها
كل الي نسئل يكول ما اعرف
بعدين كمنا نسئل المكاديه وأهل العرباين
ووحده دلتنا عليها
رحنا نسئل وصلنا بيت خرابه يعني خرابه بمعنى الكلمه
حايط بلوك ناصي
وباب عباره عن جينكوه مو باب
دفعنا الباب البيت غرفه وحده وناصي وقديم كلش
وبي بس كلوب واحد مشتغل
خالي دفع الباب وكام يصيح رغد رغد وينج
اني ما صبرت دخلت وخالي كال اوكفي ادخل وياج خاف مو هذا بيتها
دخلنا وهي لاكتنا باب الغرفه
بس شافتنا راسا رجعت ليوره وكامت تبجي
لقاء يمه لاتبجين اني بتج
امي حبيبتي ولله ادور عليج ليش عايشه هنا
تقدمت عليها وحضنتها وهي تبجي واني ابجي
حتى خالي كام يبجي علينا
لقاء كومي ماما ليش ساكنه هنا بيتي وبيت خالي مفتوحا اللج
الغرفه الكاعده بيها بلوك والكاع صبه ومابيها بس مندر ومخده وبطانيه
وكلوب واحد مشتعل بيها
اخذناها وطلعنا رحنا البيت خالي... قصص وروايات عراقية كرار صلاح
اول ما وصلنا دخلتها للحمام وغسلتلها
وطلعت دشداشه من زوجت خالي ولبستها
كعدت امشط شعرها
كل اشويه احضنها واشم ريحتها ولامصدكه رجعتلي
خلينا العشى وتعشينا كلنا
خالي كعد وكاللها احجي ليش صاربيج هيج
ليش تكدين ليش مارجعتي النا
معقوله انتي ام العز والدلال تكدين وللج اني اشم الهوى
وانتي هذا حالج
ليش هيج سويتي بينا وبنفسج
امي من رحت منكم جنا مأجرين بيت زغير كام يستلم الراتب ومآ يرجع عليه كتلني الجوع والضيم
كلما اسئله يكول اشتغل زين جيب مسواك ميقبل
بعدين قنعني اسويله توكيل كال ابيع حصتج بلبيت نشتري بيت زغير ليش ندفع ايجار
اني من غبائي صدكته
رغم هو اخذ الذهب والفلوس ومآ رجعهن وياخذ الراتب
ومآ يتسوك ولايجيب اي شي
باع البيت واكل الفلوس وبلتوكيل يستلم الراتب
وكمت ما اشوفه ابد ولا يجيني
كتلني العوز والضيم رحت ادور علي لكيته هو وجماعته يلعب اقمار كمت احجي علي واصيح
رجعني للبيت وكتلني كتله كسرني تكسر
كتله راح الغي التوكيل
كال اذا لغيتي التوكيل يكون آخر يوم بعمرج
ابو البيت طردني لان ما ادفع ايجار
اهل الرحم كالو اكعدي هنا بهاي الخرابه واضطريت اكدي حتى اعيش
لقاء وليش ما اجيتينا
...خفت ارجع لا اطردوني لان اني وياكم ماخليت خط رجعه ابد
عفتكم ومشيت ورا واحد نذل
