رواية تبديل عريس الفصل الرابع عشر بقلم جمانه السعيدي
سلسبيل...خالي دزلي صورة جهاله ياكلون
وكاتب عليها الله يرحمج سميره حتى وانتي ميته ناكل من خيرج الجهال يكولون اكل عمه سميره طيب
( يقصد الاكل الي انطيته الله قبل لا اجي وياا بابا
سلسبيل...الف عافيه
خالي...ناكل ونقرالها الفاتحه الف رحمه على روحها الطيبه
شلونج خالو أنشأء الله زينه
سلسبيل...الحمد لله تمام انت شلونك
خالي... الحمد لله ماناقصني شي بس امج ما تطلع من
كلبي وعيني حيل مفتقدها
وانت ماموجوده حتى اشوفج واطمن
سلسبيل...ياحبيبي دير بالك على نفسك
اطمن اني زينه وهنا كلهم يحبوني ويخافون عليه
خالي...شلون ما يحبونج غير انت سلسبيل الحلوه
سلسبيل... فدوه العينك ماغيرك حلو وكلبه طيب
شسوي وووين تروح بلنهار
خالي...مااطلع حضر تجوال بس اذا احتاج شي اطلع اشتري وارجع بسرعه
مجاي اشتري هواي شغلات جاي ناكل بلاكل الي
انطيتنيا نعمه خير بس مستاحش عليج وعلى امج
سلسبيل....انشاء الله بأقرب فرصه ارجع البغداد
خالي...انشاء الله سلميلي على ابوج
سلسبيل...يوصل
اليوم الي بعده كعدنا اني وبابا على صوت سميه
تحجي بصوت عالي جايه تشتكي على بابا يم عمي
سميه...بله تقبل عايف البيت وكاعد هنا شنو مطرود
عايفنا اني وولدي اربع زلم ويركض ورا هاي الزعطوطه
موعيب شنو كاعد عدكم
ماصدك يشرد من البيت
كلت ماعدنا مكان شنو كفرت خوما كفرت
اني مجذبه ماعدنا مكان تكعد بي سلسبيل
كلب الدنيا وهاي صار اسبوع شارد من البيت بله هاي تصرفات واحد عاقل
جمانه السعيدي
سلسبيل...بابا سمعها ونزل ركض على الدرج
بابا...اش مااسمع صوتج امشي اطلعي برا
انتي مو ميته على البيت عفتلج البيت اشبعي بي
شعندج جايه وراي
عمي.. لا موهيج الحجي عيب
بابا..هيه هاي تعرف العيب جان اعتبرتيها خطار وجاي بيتح
اذا اجا خطار اطردي
شنو ماكو مكان بيت شكبره مابي مكان لبنتي
بس بي مكان اللج انتي وولدج روحي شعندج جايه وراي
مااريد اشوف وجهج
عفتلج البيت اشبعي بي شعندج جايه وراي
عمي...لا ازعلين خويه من كلامه بس اسمحيلي انتي الغلطانه البنيه يتيمه ومكسوره بمكان ما تحضنيها
وتخففين عليها حزنها وتعوضيها عن امها
تكولين ماكوو مكان ليش بيتكم جبير وخير من الله
جان اطيتيها غرفه فوك عدكم ٣ غرف
سميه....غرفتين للولد وغرفه مخزن شنو ابنيلها غرفه
عمي...اي ابني غرفه هاي بتكم مايصير هيج
بابا...عوفها اني قبلك تعبت من الحجي وياها
وحده ما تفتهم عوفها ما تفتهم
سميه...ماافتهم صدك عود عايف بيتك وكاعد هنا
وتالي طلعت اني ماافتهم
بابا...روحي من الصبح لعبتي نفسي
عمي...روحي يجي وراج روحي اني اقنعه
بابا...لا مااجي وراج راح اشتري بيت واكعد اني وبتي
بيتج الي مابي غرفه لبنتي اجيبلها بيت بمكان الغرفه
بتي ماتكعد بغرفه بيتج
تكعد بيت وحدها
سميه...يله اني راح افرغ المخزن وجيبها وتعال
بس مااطلع كل غراض المخزن
بابا...روحي مااريد منج شي
سميه...اي معروفه ساحراتك كبل امها لا من ثوبنا ولامن طبعنا ورحت تركض وراها
هسه تركض وا هاي الزعطوطه عايف زلم مشوربه
وتركض ورا بنيه باجر تزوج وتعوفك
بابا...امشي منا لا ابتلي بيج هسه شنو لعبان النفس هذا من الصبح
جمانه السعيدي
طلعت سميه وهيه ادردم وتدعي عليه من كل كلبها
سلسبيل...اني مانزلت كاعده على الدرج وسمعت كل حجيهم
شكد حاقده عليه وعلى امي
امي ماتت وماخلصانه من الحجي
رجعت للغرفه تمددت
شويه ورجع اجاني بابا
بابا...يله تعاي نتريك ماعليج من حجيها خليها تولي
اذا مااخليها تتوسل
سلسبيل...بابا ارجع للبيت ترا حقها اضوج انت عايف بيتك علمودي
بابا...شنو حقها اضوج هيه حقها اضوج واني مالي كلمه بيتي جان احترمت كلمتي وفرغتلج مكان
عوفيها تولي تعاي نتريك عمج منتظرنا
سلسبيل.....علاقتي بيت عمي اكثر من ممتازه
كلهم يحبوني ويدورون خاطري
انزل اساعد شويه بلبيت بس خالتي ما تقبل تكول
اقري
تجي مره جيرانه تساعدني بلشغل
ركزت على دراستي اغلب الوقت بغرفتي اقرا
وصلنا للامتحانات النهائيه امتحنا الكتروني بس
عدنا كم امتحان حضوري
اخذني بابا البغداد البيت خالي
اول ما وصلت وشافني خالي حضني وكام يبجي
خالي...خفت بعد مااشوفج
سلسبيل....يابعد كلبي خالي شلون ما تشوفني
اني مااستغني عنك
بقيت بيت خالي وبابا رجع
عشر ايام خلصت امتحاناتي بس ماشفت مثنى
ولا اجا للامتحان مااعرف شصاير وياا
الله يستر انشاء الله خير
من بعدها بابا ماكدر يجي ياخذني عدهم طلابه
وراح وياا عمي يحلونها
بابا...حبيبتي مراح اكدر اجي راح ادزلج قائد وتعالي وياا
سلسبيل...خليها لمن تخلص
بابا...لا بعد مااكدر اتحمل تبقين بغداد اكثر تعاي ويا ابن عمج
اجاني قائد يرجعني للبيت
نزل دك الباب طلعت علي
سلسبيل....صباح الخير
قائد...صباح الخيرات
اخذ جنطة ملابسي وصعدنا بلسياره
قائد...تعرفين تعودنا عليج هناك البيت موحلوه
سلسبيل...اني تعودت عليكم
قائد...شلون الامتحان
سلسبيل...الحمد لله تمام
قائد... يستاهل الحمد صعب هذا الاختصاص
سلسبيل...شكد ما تتصور صعب
قائد...اكيد الصيدله مو سهله
سلسبيل... هسه لو يرجع الوضع ونرجع انداوم
قائد...اول مره اشوف وحده تحب الدوام
الناس كلها تكره الدوام وتكره الالتزام
سلسبيل....ليش اكره الدوام احب اختصاصي
قائد.. عفيه هذا الصح
بلطريق وكف جابلي عصير ونساتل
سلسبيل...شكرا
قائد...اكو جاي تردين
سلسبيل .... لاعصير كافي
قائد...اني افضل الجاي على العصير اجيب واجي
صعد بلسياره بس ما مشينا
قائد...اكمل الجاي مااعرف اسوق واشرب
سلسبيل...براحتك
قائد..يله هسا ننطلق
سلسبيل... عندي سؤال شمعنا محامي
قائد...عمي خلاني احب هاي المهنه اني من اشد المعجبين بعمي محمد
جنت اتمنى اصير مثله وهو شجعني على
الدخول بهذا المجال
سلسبيل ...بس مو متعب
قائد...اي متعب جدا لان انت مضطر تلعب على النفسيات
سلسبيل...شلون يعني
قائد...يعني مو كل الكلام الي تسمعه صحيح
مرات قضيه تنبني على الباطل
وواحد يكره واحد ويتهمه باطل مرات جريمه قتل
بس تبين انتحار
تحويل ملكيه وتزوير مو كل شي تشوفه صحيح
ولا كلشي تسمعه صح
بعدين المحامي مو كل وقته اله الصبح محكمه العصر مكتب تليفونه ما يسكت
سلسبيل...هاي الشغله ينراد الها خلك وتركيز
قائد...اني بس من اطلع من البيت اكدر اركز
لان مها ما تسكت بلبيت
سلسبيل..... خطيه ووين تروح تنتظرك
قائد...اي بس موهيج مكينة كلام ولو النسوان
يحبن الحجي وعلميا النسوان تحجي اكثر من الزلم
سلسبيل....هااا صار الهجوم على النسوان كلهن
قائد...اني شعليه هاي دراسه عالميه مو اني الي
كلت
سلسبيل اني اكول لو تخليها تتوضف جان تغيرت
قائد...لا يمعوده هيه كاعده بلبيت كلشي ما اشوف وهلكد تسئل وتحجي لو طلعت غير مااخلص
راح تجي تحجي شكو شي شافته بلعمل،
طبعا هيه ام بيت ومحترمه وخدومه بس لو تبطل
الكلام الزايد
سلسبيل... ولله خطيه كل واحد بهاي الدنيا عنده عيب
محد كامل بس رب العالمين
قائد....اكيد الكمال لله تعالى.اني اهم شي جهالي يكونون مرتاحين
سلسبيل .حلوين الله يحفظهم
قائد ..شكرا
وصلنا للبيت
قائد...تجين تتغدين بيتنا
سلسبيل...شكرا جزيلا اريد ارتاح موجوعانه
قائد...عود كلت تاكلين باجه اليوم المره طابخه باجه
سلسبيل...الف عافيه غير يوم شكرا على التوصيل
قائد...بلخدمه
بس دخلت اجت بنيين تركض
حضنتني مشتاقتلج همزبن رجعتي اني كلت
بعد ماتجي
سلسبيل...ليش ماتجي اني ماكدر استغني عنكم
بنيين...احنا الي تعودنا عليج
دخلت سلمت على خالتي وصعدت للغرفه نمت
بابا بعده ماراجع للبيت هو وعمي
لليل بابا رجع للبيت ويومها اجو خواني الكبار حتى
يرجعون بابا البيته
عمي بقه يحجي على بابا
كاله ارجع الخاطر ولدك رجع بابا بس حالف مايدخل الغرفه الي بيها سميه
ينام بلاستقبال وما يحجي وياها اذا احتاج شي
يطلب من زوجت عدي ماله شغل بيها
بليل يفتح كامره وياي ونبقى نسولف
والنهار كله كاعد يمي بيت عمي
كلما يطلع يرجع عليه بعلاكة حلويات لو عصاير
لو كرزات
جمانه السعيدي
من بعدها بفتره واني فوك سمعت عمي يتعارك ويا عزام
وصار صياح بس مافهمت على شنو
عزام طلع زعلان حاولت افهم شنو المشكله
سلسبيل...شكووو شبي عزام عمي ليش عصبي
بنيين...لا ماكو شي لا تشغلين بالج
مادققت لان هذا الشي ما يخصني ابد
مهما يكون اني خطار والمثل يكول ياغريب كون اديب
يومين وعزام مارجع للبيت
من بعدها خالتي اتصلت علي حتى يرجع
اني الصراحه ما ركزت اني شنو علاقتي
اكيد كل البيوت بيها مشاكل حتلو بيت شيخ لازم اكو مشاكل اكو مثل يكول مصارين البطن تتعارك
طلعت النتيجه ونجحت ولله الحمد
اول وحده اجت على بالي امي
سلسبيل...ماما نجحت الخاطرج راح أنجح واحقق
احلامج كلهن
بنيين تخرجت من الجامعه وبيت عمي سوو حفله زغيره
البنيين بمناسبة تخرجها
حفله بسيطه وحلوه
زوجت بابا اجت باركت وراحت لا حجت وياي ولا حجيت وياها حتى ما سلمت عليه مشيلتني مسؤلية زعل بابا عليها هيه الي خلقت المشكله وذابه الصوج بيه
بس زهراء بت عمي اجت بقت عدنا يومين
هيه وجهالها ورجعت البيتها
من بعدها بشهر تقريبا نزلت بليل وسمعت عزام
يحجي ويا خالتي يحجي بعصبيه
مافهمت على شنو النقاش بس من نزلت اني سكتو
ثنيبنهم وعزام جان مبين ضايج
يمكن اكو مشكله بس شنو مااعرف لان محد يحجي كدامي
اني ماأحب المشاكل ومااحب ادخل بيت عمي
مايستاهلون تصير بيتهم مشاكل
بدا عمي ياثث بيت عزام
اني ماشفت الأثاث بس بنيين جانت تحجي عنه
سلسبيل...انتم خاطبين
بنيبن...لا
سلسبيل...لان مهتمين وتاثثون
بنيين....امي تكول لكينا عروسه بس نكمل اثاث
نخطب وكبل نسوي عرس
يعني هيه خطوبه هيه عرس
سلسبيل ...لازم متاكدين من هاي العروسه
بنيبن...اي متأكدين ابوي مااثث البيت إذا ما متاكد
سلسبيل...بلخير عليكم عزام حباب يستاهل كل خير
رجع الدوام وبابا قرر ينقلني اداوم بنفس جامعه بنيين
بس اكيد بتخصصي
اول شي اخذني البغداد بيت خالي داومت اسبوعين بجامعتي علما كمل النقل
ولو مايهون عليه اعوف جامعتي
وبيت خالي خطيه شكد يفرح من يشوفني يكول من اشوفج عبالك شايف سميره الله يرحمها
بس بابا حيل متمسك بيه ومايقبل يعوفني
واني هم مااكدر استغني عنه
احس بلامان اذا قريب عليه
كدر يحصل نقل ورجعنا البيت عمي اني ويااا
يوصلني الصبح للجامعه ومن اخلص دوام ينتظرني
اذا مايكدر يجيني يدز قائد يرجعني للبيت
بعطلة نص السنه قرب موعد السنه مالت امي
بابا قرر يسوي سنويه ويعزم ناس ويسوي عشى على روحها
سوينا السنويه بنهاية عطلة نص السنه قبل لا ادور سنه امي
تقريبا بعشرين يوم علمود العطله
طريق النجف انفتح وبدت الناس ترجع أزور الموتى
لان هاي الفتره قبل ممنوع واحد يوصل للمكبره خالين سيطرات من كل الجهات
رحنا كلنا حتى بيت عمي زرنا امي سنه كامله واني ماواصله الكبر
بسبب الأوضاع وكورنا بس عزام وقائد ماراحو ويانا
ولا زوجت ابوي واخواني
من رجعت بابا فتح وياي موضوع عزام
بابا....سلسبيل عندي موضوع اريد احجي وياج
سلسبيل....اي كول غرد كلي اذان صاغيه
بابا...عمج خطبج العزام
سلسبيل...بقيت ساكته
بابا....شبيج ليش سكتي
سلسبيل...اني العزام
بابا...اي ليش شبي عزام مهندس متوضف راتبه محترم
بيت وحدج تكملين دراستج على راحتج
قريبه عليه بين اهلج وناسج
سلسبيل...فاجئتني
بابا...عمج من اول مااجيتي هنا طلب ايدج بس اني اجلت الموضوع
سلسبيل....يعني انت انطيتهم الموافقه وجاي يحضرون واني ماادري
بابا....اني كلت العمج اسئلها واشوف رائيها
بعدين اذا انتي رفضتي اكيد راح يدورون عروسه غيرج
والبيت بالحالتين لازم يتأثث
سلسبيل...بس بنين كالت لكينا عروسه ومتاكدين توافق
تقصد عليه هما متاكدين من موافقتي
بابا...معليج بنيين تحجي بكيفها
اني اشوف عزام خوش فرصه الف وحده تتمنى
شاب مرتب حلو موضف بيت سياره عائله محترمه
صدكي اذا يطلب ايد بت رئيس الوزراء توافق علي
ماناقصه شي
هااا شنو رائيج......
.
