رواية روح غائبة الفصل السابع عشر بقلم السيد عبدالكريم
بعد يومين من القبض على العصابة كنت في قسم الشرطة مع طارق بيه ومنعم بيه وزيزو ، قال منعم بيه :
ـ أستاذ رأفت .. انت قمت بعمل عظيم .. عمل بطولي .. مش عارفين نشكرك ازاي ... انت قدمت للبلد خدمة كبيرة اوي بتعاونك معانا .
قلت :
ـ سيبك من الشكر المعنوي .. انا عايز فلوس .
ضحكنا جميعا وسمعت منعم بيه يقول :
ـ مش عارف ليه بهاء بيه كان يقول عليك انك غبي .
ضحكوا جميعا فقلت :
ـ انا عاوز اعرف انتوا عرفتوا ازاي انهم استلموا البضاعة ؟
قال منعم بيه :
ـ عارف ان في دماغك اسئلة كتير .. وانا هجاوبك علي كل اسئلتك مرة واحدة .
قلت :
ـ تفضل :
قال منعم بيه :
ـ لما انت خرجت من الكازينو وققفت بجوار العربية وحطيت جهاز تتبع gps .... ساعتها مكناش منتظرين منك تعرفنا هتتحركوا امتي ولا هتروحوا فين ... احنا استغربنا انكم تحركتوا بسرعة من الكازينو رغم انك قلتك هنتحرك بعد ساعتين ... بس مشينا خلف جهاز التتبع ... لحد ما وصلنا القرية اللى كان فيها الفرح المزيف ... ومكناش عارفين ايه اللى بيتم ...وكنا منتظرين تقولنا هيتم التسليم دلوقتي ... بس تصدمنا لما شفنا سيارتك تحركت انت ومحاسن .. انا قررت اتابع سيارتك بنفسي .. وخليت سيارة مندور اللى كانت راكنة علي بعد 700 متر من الفرح ... خليت طارق هو اللى يطارها ... رغم اننا مكناش متأكدين ان العربية دي فيها مندور ... لان الست المنقبة بسمة عبدالعزيز مرات منددور هي اللى نزلت من العربية بشطنة المخدرات ومشيت مسافة 700 متر لوحدها فى عز البرد والظلام ... فعلا لولا انها مسحورة متقدرش تعمل كده ... كنت مستغرب ازاي واحدة ست تنزل من العربية في قلب الصحراء وتمشي بشنطة مخدرات مسافة 700 متر بدون خوف وتردد الا لو كان مسحورة مش في وعيها .. طيب عارف .. فى الاول شكيت انها مندور بس لابس لبس ست علشان التمويه ... المهم انا فضلت ماشي ورا العربية اللى فيها انت ومحاسن ومنتظر منك اي اشارة بس انت لا كلمتنا ولا بعت اي اشارة ... ولما العربية قربت من اسفلت الصحراوي حسيت ان الفرصة هتضيع مننا .. لانهم لو وصلوا لأسفلت الصحراوي كان الموضوع هيتعقد .. وبرضه شكيت ان محاسن كشفتك وأخدتك رهينة .. يعني مكنش ينفع اترككم توصلوا الاسفلت باي حال من الاحوال .. ساعتها أمرت الرجاله يقطعوا طريقكم .. وكنت متوقع تبادل اطلاق النار .. بس انت لقيتك حاضن الست محاسن كأنك ما صدقتك تشوف ست وبتتحجج بقا .
ضحكنا جميعا فقلت :
ـ يا منعم بيه انا كنت حاضنها كده اوي من الخوف والله ... متعمليش زي الاستاذ شماشيري بقا .
قال :
ـ شماشيري مين ؟
قلت :
ـ متشغلش بالك .. كمل .
قال منعم بيه :
ـ خلال التحقيقات عرفنا ان عز هو اللى بيدير لعبة مهمات مهمة ومشتري رقم امريكي من الدارك ويب بـ 5 الاف دولار ... وهو اصلا مهندس التكترونيات ... ومش هتصدق مين العبقري .
قلت فى تركيز :
ـ مين ؟
أجاب :
ـ محاسن نفسها ... هي العبقري .. هي اللى كانت بتدير كل حاجة داخل مصر ... ومندور كان بيدير كل حاجة خارج مصر .. مندور كان بيدخل المخدرات لمصر عن طريق الحمير على حدود مصر مع دولة تانية مش هينفع اقول اسمها ... والعمليات الكبيرة كان بيستخدم فيها مراته بسمة عبد العزيز ...
اعتقد كده جاوبتك على كل الاسئلة ولا لسه فيه حاجة مش فاهمها ؟
هنا رأيت عفريتة رانيا رامي
ايوه شفت قدامي عفريتة رانيا رامي بتبتسم ،انا ابتسمت ، وسمعت منعم بيه بيقول :
ـ مالك مبتسم كده ومش بترد .
لم أرد على منعم بيه وسمعت رانيا رامي بتقول :
ـ محدش هيشوفني غيرك .. دي المرة التالتة والاخيرة اللى هتشوفني فيها ... انا جاية اشكرك .. واسفة اني تعبتك معايا .. واسفة اني تلخبطت لما حكيتك حكاية دفني ... انا مكنتش مستوعبة اني عفريتة اصلا ومكنش ينفع احكي كل حاجة بالتفصيل ... بس انا فعلا تم دفني وهم طلعوني تاني من المقبرة ودفنوني تاني باسم بسمة .... دلوقتي علشان يصدقوك خلي منعم بيه يفتح ايده .
قلت :
ـ منعم بيه .. افتح ايدك .
قال :
ـ افتح ايدي ... هتعاقبني علشان نسيت اكتب الواجب ولا ايه .. الجملة مسمعتهاش من ساعة ما كنت انسي اكتب الواجب والاستاذ يقولي افتح ايدك .
قلت :
ـ متخفش .. انت خلاص كبرت ونجحت وبقيت ضابط .. افتح ايدك بس .
ساعتها قام منعم بيه بفتح بيده ومدها فى الهواء ، ثم رأيت عفريتة رانيا رامي تضع خاتم بسمة فى يد منعم بيه اللى نهض مذعورا لم لقي الخاتم ظهر في يده من العدم وقال :
ـ بسم الله الرحمن الرحيم .
سمعت عفريتة رانيا رامي تضحك وتقول :
ـ مع السلامة يا أستاذ رأفت ز
قالتها ثم اختفت .
شعرت بدمعة تسقط من عيني وسمعت منعم بيه يقول :
ـ مش دا الخاتم المميز اللى كانت بتلبسه بسمة والمفروض هو مع ابوها دلوقتي ؟
قلت :
ـ العفريتة لسه ماشية وهي جات تشركني وقالت هخليهم يصدقوك .
تاني يوم كنت فى فندق رمسيس ومستعد للسفر بس لقت زيزو جاي لي الفندق وقال :
ـ انت رايح فين ايه الشنطة دي ؟
اجبت :
ـ مسافر ؟
قال :
ـ تسافر ايه .. لازم تحضر معايا الخطوبة وكتب الكتاب قبل ما اسافر اسكندرية .
قلت :
ـ هي نسمة عرفت الحقيقة ؟
قال :
ـ لسه .. ومش عارف رد فعلها هيكون ايه .. دا بتيجي تزورني فى القسم على اني مقبوض عليا .
قلت :
ـ نسمة ضحية سحر مرات ابوها .. والبنت بتحبك بجد .. انا عرفت انها بتحبك من اول مرة اشوفها .. انا استاذ فى الحاجات دي ... عامة معتقدش انها هتغير وجهة نظرها .. بس ياريت تعوضها عن الايام القاسية اللى مرت بيها .
اقترب مني عمر بيه وعانقني وهو يقول :
ـ انت شخص جميل .
قلت :
ـ مفيش حاجة بتستخبى في البلد دي .. وبعدين قولي ... حصل ايه مع بسمة ؟
قال :
ـ عرضنا محاسن على لجنة من الازهر الشريف ووزارة الاوقاف وهيئة كبار العلماء وفكوا السحر وهي دلتهم على كتب كانت محتفظة بيها فى دولابها ، ولما السحر اتفك بسمة رجعت لطبيعتها وقالوا ان والد بسمة هو كمان مسحور بالجنون بس هيرجع طبيعي مع الوقت وكلمت بهاء بيه يدخله المستشفي .
قلت:
ـ ونسمة ؟
أجاب :
ـ رجعت لطبيعتها هي كمان وهي قالتلي كده وقالت انها ندمانة على كل لحظة رقصت فيها .. بس يا أستاذ رأفت مش عارف افهمها ازاي اني ضابط .
قلت :
ـ طيب أنا هحط ليك خطة .
