رواية جثة نعمات الفصل الثاني بقلم محمود الأمين
البصمات كانت بصمات الست نعمات، ودي الحاجه اللي خلت دماغي لفت.. ازاي والمفروض ان امينه اتقتلت بعد الست نعمات بحوالي ساعه او اكتر، التفسير الوحيد والمنطقي بالنسبالى ان الشخص ده قتل الست نعمات وامينه شافته
وهو كمان شاف امينه وهي قدرت تهرب منه وترجع على بيتها، فهو اخد سلاح الجريمه من بيت الست نعمات وراح على بيت امينه وقتلها
بس ده يحطنا قدام كذا استنتاج
اول حاجة الشخص اللي قتل الست نعمات.. هل دخل البيت من الباب ولا نط من شباك من الشبابيك المكسره اللي قدامه
ودي تفرق في مدى معرفه الست نعمات بالمجرم
الحاجه التانية المجرم يعرف بيت امينه وبكل هدوء بعد ما خلص على الست نعمات اخد سلاح من بيتها عليه بصمتها وراح بمنتهى الهدوء على بيت امينه خلص عليها هي كمان من غير ما تتكلم او تصدر اي صوت
طيب السؤال هنا.. ليه أمينة ما صرختش ولمه الناس على المجرم ده وهو بيخلص على الست نعمات؟!.. ليه اختارت ترجع على بيتها وتستنى ساعه كامله لحد ما المجرم ده يوصل ويخلص عليها؟
والسؤال الاهم مين الشخص اللي عنده الاريحيه دي انه يدخل بيت الست نعمات ويقتلها ويسرق دهبها ويروحوا وراء الشاهد الوحيد عليه ويخلص منه؟
....
دماغي كانت هتنفجر من التفكير... ويمكن الشخص الوحيد اللي كنت ممكن اقدر اتهمه هو ابنها لكن ما فيش اي دليل عليه
وفي عز تفكيري باب المكتب خبط ودخل منه الرائد معتز
كان معاه راجل في الاربعينات من عمره اول مره اشوفه وقال ان الراجل ده وصل المديريه من نص ساعه وقال انه عنده كلام مهم جداً عاوز يقوله في قضيه الست نعمات
طلبت من الراجل يقعد عشان افهم منه ايه المعلومات المهمه اللي عنده في القضية
فاتكلم وقال
_ انا اسمي سيد اخو المرحوم محفوظ عبد السلام، واللي هقوله ده يا باشا ناس قليله جداً تعرفه وانا واثق ان حتى اللي عارفينه مافيش فيهم حد هيتكلم او هيقول الحق
= طيب اتكلم يا استاذ سيد واحنا هنسمع منك.. وليه بتعرف نفسك انك اخو واحد اسمه محفوظ عبد السلام وده دخله ايه بالقضيه؟!
_ هفهم سيادتك.. اخويا محفوظ كان متجوز الست نعمات بعد وفاه جوزها بفترة والاستاذ خليل عارف ده على فكرة، بس الغريب ان اخويا لما توفى كتب جزء كبير جدا من التركه بتاعته لمراته نعمات وده زعل ناس في العيله عندنا، بس انا باكدلك ان مافيش حد من عندنا عامل فيها حاجه.. اللي انا بقى كنت مستغربه هو حال الست دي واحده معاها الفلوس دي كلها ليه لسه بتشتغل خياطه وهدومها قديمه وعايشه في بيت زي ده؟!
هي كانت خايفه من الحسد ولا كانت خايفه من حد تاني؟
= طيب معلش في سؤال واستحملني فيه، الاستاذ خليل كان عارف انها ورثت الفلوس دي كلها
_ ايوه كان عارف طبعاً.. ما هو ده اللي انا جاي لحضرتك عشانه
خليل طلب من والدته يتجوز بنت والام كانت رافضه البنت دي، لكنه كان عاوزها وطلب من امه انها تساعده في الجوازه عشان ظروف وقتها كانت صعبه لكن امه رفضت وقالت ان معهاش فلوس وقتها عمل مشكله معاها كبيره وراح اتجوز البنت اللي بيحبها وسافر بيها القاهرة، وكذا مره امه تكون تعبانه ونبلغه كان بيدعي عليها انها تموت ويخلص منها
= يعني حضرتك جاي تقول ان خليل هو اللي خلص على امه؟!
_ لا يا فندم انا مش جاي اتهم حد، انا جاي بس احكي اللي حصل
= طيب حضرتك ما كنتش متضايق ان اخوك كتب جزء كبير من الميراث للست نعمات؟!
_ وهتضايق ليه يا فندم؟!.. دي مراته وهو حر يديها فلوس ما يديهاش
= يا راجل، يعني كل الناس اعترضت وزعلت وانت بقى اللي الموضوع مش فارق معاك
_ ابقى كذاب لو قولت الموضوع مش فارق معايا، بس اللي حصل حصل كنت هعمل ايه يعني؟!
= وليه ما تكونش انت القاتل؟!.. وجاي تقولي الكلمتين دول دلوقتي عشان تبعد عن نفسك الاتهام
_ انا جيت وقولت لحضرتك على سر واظن انه التحريات بتاعت حضراتكم ما عرفتش حاجه عن السر ده، وفي الاخر حضرتك عايز تطلعني متهم؟!
= طيب ممكن سؤال معلش، ايه اللي يخلي اخوك يتجوز الست نعمات.. ست كبيره وغلبانه وقبل ما يموت كمان يكتبلها جزء من ورثه
...
وهنا الراجل سكت وكأنه عارف حاجه بس مش عايز يتكلم، ولما طلبت منه يتكلم رفض وقال ان الموضوع ده يخص اخوه الله يرحمه وهو ما يعرفش السبب
بس انا كنت حاسس انه بيكذب، وعشان كده طلبت فيش وتشبيه للشخص ده ووضعه في دايره الاتهام وعمل تحريات مفصله عنه وعن كل القريبين منه
وبعد ساعات كان قدامى تحريات كامله عن سيد ده وعن عيلته كلها... وبعد ما قريت التحريات سيد بقي هو المتهم الرئيسي في قتل الست نعمات.. عشان التحريات اثبتت ان سيد كان بيتردد كتير على بيت الست نعمات في الفتره الأخيرة، وما حدش عارف السبب ايه؟!.. والمفاجاه الكبيره ان سيد راح زار الست نعمات يوم قتلها.. يعني كان موجود في مسرح الجريمه
وده اللي خلانا نقبض عليه عشان نعرف منه سبب تواجده في مسرح الجريمه يوم قتل الست نعمات
واتكلم وقال
_ يعني انا اجي اقول على سر، تلبسوني الجريمه.. ايوه انا كنت هناك يومها فعلاً بس دي كانت وصيه المرحوم الله يرحمه، اني اروح واطمن عليها واشوفها لو محتاجه حاجه
= تعالى دوغري يا سيد من غير لف ودوران، ايه اللي كان بينك وبين الست نعمات عشان تروحلها كل فتره.. وايه سبب تواجدك في اليوم اللي اتقتلت فيه؟
_ اللي بقوله هو اللي حصل.. المرحوم كان موصيني اني اروح واطمن عليها كل فتره، بس حق ربنا لما روحت في اليوم ده عشان اطمن عليها لقيتها ميتة وخوفت اتكلم ادخل في سين وجيم بس والله العظيم انا ما قتلتها، يشهد عليا ربنا اني بريء
= بس انت كذبت، وكذبك ده للاسف هيكون هوالسبب ان حبل المشنقه يتلف حوالين رقبتك
_ انا اللي عندي قولته
= طيب وامينه تعرفها منين؟
_ ما اعرفش واحده اسمها امينه، اه انا كنت بشوف واحده ساعات معاها لكن لا اعرف اسمها ولا اعرف تقربلها ايه؟!
= للاسف موقفك صعب يا سيد، انا بحاول اساعدك بس انت اللي مش عاوز
...
امرت بحبس سيد اربع ايام على ذمه التحقيق.. وهو كان المتهم الرئيسي قدامي عارف حاجات ومخبيها ومش صريح معايا ولا دوغري
وبعد مرور اسبوع في ست راحت على القسم اللي في المركز اللي تابع للقريه وقالت كلام مهم جداً
_ انا اعرف امينه كويس، الناس كلها فاكرين انها غلبانه وطيبه بس ما حدش عارف حقيقتها غيري، امينه هي اللي قتلت الست نعمات بس مين اللي قتلها الله اعلم
بس في معلومه عندي ممكن تقلب القضيه دي.. امينه كان في واحد بيحبها وكان عاوز يتجوزها بس مش معاه فلوس وانا شوفت الشخص ده بنفسي داخل بيت الست نعمات يوم الجريمه
= ويطلع مين الشخص ده؟
_ الشخص ده يبقى...
