رواية جثة المنحل الفصل الثالث بقلم محمود الأمين
= طيب الاول بس انت مين؟.. وتعرف مدام جميله والمهندس عمر منين؟
_ انا راجل معايا محل ببيع فيه عسل اسود وعسل نحل وجبنه وبيض.. تقدر تقول سوبر ماركت بس حاجه على القد كده، بس بركز دايما اني اجيب جوده عسل نضيفة عشان الناس تشتري من عندي، لحد ما في واحد دلني على المهندس عمر، وقال انه عنده منحل في جنينه الفيلا بتاعته، وانه راجل محترم وهيساعدني.. فرحت وأخدت العنوان و روحت على بيته، اول ما وصلت لقيت نفسي في مكان اشبه بالجنة، فلل كتير وعربيات، قولت الراجل ده هيساعدني ليه؟.. واضح انه غني ومعاه فلوس تشتريني انا والبلد اللي عايش فيها، المهم اني قابلت البواب هناك و اللي دخلني وقالي استني لحد ما ابلغ البيه. المهم اني لقيت نفسي في جنينه كبيره، انبهرت بشكلها، ونسيت اصلا انا جاي ليه؟ لحد ما وصلت للمنحل، ومش عارف حضرتك تعرف المعلومه دي ولا لا؟.. لازم اللي يدخل المنحل يكون لابس بدله كده واقيه عشان ما يتلسعش من النحل، بس انا زي ما قلت لحضرتك انا كنت مبهور، المهم فتحت الباب ودخلت، لكن وقتها شميت ريحه مقرفه أوى ريحه عفن.. رجعت خطوتين لورا لما شوفت النحل والدبان ملموم على حته في الارض، لكن وقتها لقيت صوت جاي من ورايا وبيقول:
_ انت مين ودخلت هنا ازاي؟
بصيت ورايا كان واحد في اواخر التلاتينات لابس بدله شيك وكان باين عليه العصبية.. عرفته بنفسي واني محتاج عسل ضروري.. فرد عليا وقال:
_ واللي عايز حاجه يدخل بيوت الناس زي الحراميه كده، انت عارف اني ممكن اسلمك واقول انك جاي تسرقني
= سرقة ايه يا باشمهندس، اعوذ بالله انا بس انبهرت بشكل الفيلا والجنينه، بس لما دخلت المنحل شميت ريحه وحشه اوى، هي ريحه ايه دي؟
_ مش شغلك، حاجه ما تخصكش.. وعشان دخولك الفيلا بالطريقه دي يؤسفني اقولك اني مش هقدر اديك حاجه، واتفضل يلا مع السلامه عشان انا ورايا شغل وخارج.
= انا اسف جداً يا باشمهندس، ارجوك سامحني انا عارف اني غلطت، بس انا فعلا محتاج العسل ده ضروري
_ انت سمعت الكلام ولا لا؟!.. في ظرف خمس دقايق تكون بره البيت والا هطلبلك الشرطه انت فاهم؟
= فاهم حضرتك
....
كنت محرج جداً من طريقه كلامه معايا، انا عارف اني غلطت عشان دخلت من غير استئذان، بس الريحه اللي شمتها خلت عندي فضول اعرف، هي ريحه ايه بالظبط، وقبل ما اكمل كلام انا عارف اللي عملته ده جريمة، واني دخلت بيت واحد من غير ما يحس ومن وراه، الفضول كان متحكم فيا وده خلاني، اراقب الباشمهندس عمر، واشوفه بيخرج امتى؟!
لحد ما لقيت الوقت المناسب وده وقت ما البواب كان واخد إجازة، وكان معايا البدله الواقيه اللي كلمت حضرتك عنها من شويه، خرج وراح شغله وانا نطيت من على سور الفيلا ولبست البدلة ودخلت المنحل، وكنت واخد معايا حاجه احفر بيها
نزلت على الارض، وما كنتش شامم الريحه بسبب القناع الزجاجي بتاع البدلة، فضلت احفر شويه لحد ما اتصدمت، لقيت جثه، جثه لست في اواخر العشرينات كانت هي، هي مراته اللي صورتها اتنشرت في الجرايد وعلى مواقع الانترنت
رجعت ردمت الحفره من تاني، وطلعت من هناك على حضرتك على طول، الست ما اختفتش اكيد الباشمهندس عمر هو اللي قتلها، واكيد هو عنده اسبابه
...
خلص الراجل كلامه وكنت بيسمعه باهتمام، بعدها طلع اذن نيابه فعلاً بتفتيش فيلا الباشمهندس عمر، ولما وصل هناك كان عامل حسابه في البدله اللي قال عليها الراجل ومعاه كام واحد من الرجالة، دخلوا وحفروا الحفره وفعلا لقوا جثه جميلة.. وفي الوقت ده وصل الباشمهندس عمر واللي كان مصدوم وباين على ملامحه الخوف والتوتر، اتقبض عليه وفي الاول حاول ينكر، لكن التهمه كانت لابساه لابساه، وطلب منه المقدم نبيل يتكلم عشان على الاقل يحسن موقفه فى القضية، في الوقت ده الخبر كان اتسرب للصحافه وللاعلام، وانا كنت اعرف كويس المقدم نبيل عبد الحميد، كلمته في التليفون وانا مذهول وقولتله ان الشخص ده جالي وحكالي ان مراته مختفية.. وحكالى كل حاجه من يوم ما اتجوزوا لحد ما اختفت، ومستحيل الشخص ده يكون قتلها، الكلام اللي قاله مش بيعبر غير عن الحب وبس، ده واحد حرفيا كان بيعشق التراب اللي بتمشي عليه، ازاي بعد ده كله يطلع هو اللي قتلها، انا مش قادر استوعب
رد عليا المقدم نبيل وقتها وقال
= يا دكتور منصور، انت دكتور نفسي.. وعارف ان المرضى النفسيين ساعات بيجيلهم حاله انكار وبيرفضوا يصدقوا انهم قتلوا، بس ده لو اعتبرنا انه الشخص ده اصلا مريض نفسي، انا شايف انه قتلها عن عمد وموضوع انه جالك ده، تمثيليه منه عشان تيجي تشهد في صفه.. وتقول انه مستحيل يقتلها. او على الاقل تصنفوا مريض نفسي ويطلع من حكم الاعدام، بس كل حاجه هتبان في التحقيقات.. الادله كلها ضده ولازم يعترف
عمر الاول مكنش راضي يتكلم لكن بعد ضغوطات كتير اتكلم وقال :
_ ايوه انا اللي قتلتها، اديني اعترفت بس هي تستاهل الموت، تستاهل كل اللي حصلها.. ما كنتش متخيل ان هيجي عليا يوم وهحب حد بالطريقه دي، بس يوم ما حبيت حد واتعلقت بيه وكنت مستعد اضحي عشانه، كان هو اول واحد غرس سكينته في ضهري
الموضوع بدأ بعد جوازنا بفترة، بالتحديد بعد ما عرفت اني عندي مشكله ومش هخلف أبداً، بعدها بدات اشوف حاجات غريبة، حاجات لو حكيتها لحضرتك ممكن تقول عليا مجنون.. زي ما الدكتور النفسي اللي روحتله رفض يصدق الجزئيه دي، كنت بشوف جميلة في صوره تخوف وبتبقى شايله عيل على ايديها، كانت بتظهر لي في كل مكان، في البيت وفي العربيه حتى في شغلي وده اثر عليا في كل حاجة، وهي وقفت جنبي
ما اقدرش انكر انها ماسابتنيش او اتخلت عني وقتها، وعشان انا شخص شكاك بطبعي بالذات في موضوع المرض، كنت عايز اتاكد اني سليم ومش تعبان ولا بعاني من اي حاجه، روحت وعملت تحاليل وفحوصات والنتيجه كانت سلبية ما فيش اي حاجة، ووقتها صديقي الدكتور سعيد، قال ان دي ممكن تكون شويه ضغوطات نفسية، لحد ما عرفت انها تعبانة.. كان معاها تحاليل بتثبت ان عندها مرض نادر، ومش من معمل واحد لأ، ده من 3 معامل كبار وليهم اسمهم، قولت انا هفضل جنبها ومستحيل اسيبها، وده فعلاً اللي حصل واللي حكيته انا للدكتور منصور
لكن الحقيقة كانت غير كده تماماً، كنت يومها في الشركه تعبان وكالعادة شوفت جميلة وهي شايله العيل الصغير، كلمت الدكتور سعيد لاني كنت تعبان ومنهار، وقتها طلب مني اروح اعيد التحاليل، ولما قولتله بعد الشغل صمم اني اروح في نفس الوقت، روحت معمل تانى وعملت التحاليل والنتيجه وقتها كانت كارثة.. انا بتعاطى حبوب هلوسة كل يوم، اتصلت بالدكتور سعيد وبلغته وسألنى
_ انت بتشرب حاجة او بتاكل حاجه بره البيت؟
= لا، ما فيش غير القهوه بس اللي بشربها، في البيت وفي الشركة بس حتى البن اللي في الشركه ده بتاعي انا
_ مين اللي جابلك اكياس البن دي؟
= جميلة، قالت ان القهوه دي حلوه جداً وهي مجرباها.
_ طيب لازم اكياس البن دي تتحلل، وتشوف هل فيها اضافات ولا لا؟
= هو انت شكلك في جميله يا دكتور، شاكك في مراتي؟
_ اسمع الكلام يا عمر، وربنا يسترها ان شاء الله
..
سمعت كلام الدكتور سعيد، وللاسف تقرير المعمل اثبت ان البن مخلوط فعلاً بحبوب هلوسه، كنت بسال نفسي طب ليه؟.. ليه جميله تعمل فيا كده؟
وكنت في حيرة، اواجهها ولا اسكت؟!
رجعت البيت يومها كانت في الحمام بتاخد دش، فتشت في دولابها ووقتها لقيت التحاليل والاشعه بتاعتها اللي بتقول ان عندها مرض خبيث ونادر، صورت الورق كله وبعته لدكتور سعيد وقولتله
_ عايز اتاكد من الورق ده سليم ولا مضروب؟
قال انه هيشوف ويرد عليا
وبعد يوم كامل كلمني وقال
= الورق ده مضروب، كله مزور
...
كنت مصدوم من كلامه، ولسه بسال نفسي ليه؟
في اليوم ده رجعت البيت وانا واخد معايا منوم، حطيت منه في الطبق اللي بتاكل منه جميلة وبعد ما نامت فتحت تليفونها ببصمه وشها، وبدأت ابص على الشتات.. وكانت الصدمه ان مراتي تعرف واحد عليا، وهو اللي بيقولها تعمل ايه بالظبط؟! في الاول تشككني في نفسي وتطلعنى مجنون ومش متزن نفسيا، والمفروض انه بعد فترة حبوب الهلوسه هتتبدل بسم، لكن لما عرفت اني روحت عملت تحاليل وفحوصات خافت، فقررت تغير الخطه مع الباشا ده، خصوصا لما شوفتها وهي بتعيط على صور الاطفال وكنت مصر اني أطلقها.. في الوقت اللي انا كنت مراعي مشاعرها فيه، هي كانت خايفه اني اطلقها وخطتها تبوظ… فغيرت الخطه وزوروا الاشعه والتحاليل على انها تعبانه وعندها مرض عشان اقف جنبها واساعدها وما افكرش اطلقها. هي كانت عارفه اني بحبها، ولما اعرف حاجه زي دي هفضل جنبها، وكانت هترجع لتنفيذ خطتها الاولانية وهتسمني بس بسم طويل الأمد وميظهرش فيه شبهة جنائية.. أخدت نسخة من كل المحادثات، هتلاقيها عند حضرتك في الموبايل بتاعي، تصور حضرتك ان الانسانه الوحيده اللي حبيتها كانت طمعانه فيا، قررت تخلص مني عشان كل الثروه تكون ملكها وتتجوز الشخص اللي كان بيخطط لكل حاجة، كنت مصدوم بس في نفس الوقت كان جوايا نار، وكان لازم النار دي تخرج وتولع فيهم، والخطه اتبدلت لكن عندي انا، يومها طبق جميله كان مليان سم، شوفتها قدامي وهي بتتلوى على الارض من الالم وانا واقف اتفرج عليها لحد ما ماتت، أخدت جثتها ودفنتها في ارض المنحل… وكنت متصور اني عمري ما هتكشف، ولو اتاخرتوا 24 ساعة، كان هيحصلها الشخص اللي اتفق معاها على موتي.. كل بياناته موجوده برضه على الموبايل بتاعي، اتمنى توصلوله
....
خلص الباشمهندس عمر اعترافاته، وفعلا اتقبض على الشخص اللي كان متفق مع جميلة على قتل عمر، كان اسمه شهاب محفوظ ومن اول قلم اعترف بكل حاجة، وقال انه كان يعرف جميله من زمان وكان بينهم قصه حب، بس هي سابته لما اتقدملها عمر، ولما طلع مش بيخلف وشافت العز اللي معاه، قالت ليه ما تبقاش مع حب عمرها وفي نفس الوقت يبقى معاها فلوس كتير، ومعروفه من زمان اللي بيعوز كل حاجه بيخسر كل حاجة.
بس الشخص ده اتحكم عليه ب 15 سنة بتهمه التحريض على القتل، واقدر اقولك ان لولا المحامي كان هياخد 25
...
بس يا دكتور وسام، هي دي الحكايه
الدكتور وسام ما كانش مصدق، كان مصدوم من اللي سمعه واتكلم وقال
_ هو في بشر كده، ده احنا عدينا الشياطين بمراحل، بس في سؤال عندي انت بتقول ان عمر حلل المرة الاولانيه وطلع ما عندهوش حاجه، والمرة التانيه طلع بيتعاطى حبوب هلوسه طب ازاي؟
= اثر الحبوب في الجسم بيختفي بعد 12 ساعة، وعمر كان شغله 12 ساعه في الشركة واكيد مش كل الايام كان بيشرب قهوه في الشركه، بس اكيد كل يوم كان بيشرب قهوه في البيت
والمره الاولانيه هو عمل التحليل بعد ما خلص شغل، يعني اثر الحبوب في الجسم كانت راحت، لكن المرة التانية استاذن مديره وراح عمل التحاليل والنتيجة كانت انه بيتعاطى حبوب هلوسه.. وصلت
_ وصلت، ربنا يعافينا بجد.. وفعلا النوايا مخفية.. لدرجه انك ممكن تكون بتفكر تجيب لشخص نجمه من السما ونفس الشخص ده بيفكر ازاي يطربقها فوق دماغك
= عرفت ليه بقولك الجمله واقعيه
_ عندك حق، ربنا يكفينا شر شياطين الانس والجن
= اللهم امين يا رب
..
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
