رواية ضحية امي الفصل الرابع بقلم جمانه السعيدي
موقف امي حيل زعلني منها
بس شسوي ما بيدي حيله ومآ اكدر اغير شي
زوج امي ماكان يتواجد بالنهار دائما اكثر شي يجي بليل
مرات يطلع الصبح ومرات يبقى للعصر
اكيد الجوارين كلهم شافوووو
وهو داخل وهو طالع من البيت
بيوم كعدت الصبح تعبانه قررت ادخل اسبح
حتى اتنشط واكعد اقرا
بس دخلت للحمام فتحت الماي اسبح
وبديت انزع ملابسي شفت خيال ورا الباب
احنا بابنا هذا الالمنيوم وجان اكو فتحه بي يعني مامطبوك حيل على الحايط
محتاج جص يملي الفراغ الباقي
بس احنا ما مهتمين لان ماكو احد غريب بلبيت
الفتحه بكد الإصبع صايره
من قربت اشوف منو راسا تحرك وبتعد من الباب
لبست وطلعت بدون ما اسبح جان اشوف
زوج امي واكف بابا غرفتي يريد يدخل بيها
اني صحت شكوووو
هو التفت عليه وما حاجاني ورجع الغرفة امي وهو يدخن
ما كان لابس بس برمودا
دخلت غرفتي وبطلت ما سبحت
منا لمن طلع من البيت
امي كعدت الضهر وحجيتلها الي صار بس ما صدكتني توقعت اريد اخرب بينهم حتى يطلع من البيت
وراها بكم يوم اني نايمه باب غرفتي بس مسدود بدون قفل
ما حسيت اله الغطى انشال وايد امتدت على جسمي
طفرت وعطت بصوت عالي
شفته وهو طالع من غرفتي
كلت ولله ما اسكت كمت اعيط بصوت عالي
امي كعدت واجت
امي شكووو شصار
....هذا الحيوان دخل غرفتي ويرفع الغطى عني
امي منو تقصدين
...هذا الحيوان حمودي
.امي حمودي صحيح كلام لقاء
....شبيها بتج متحمله عليه بس شافتني وكامت تعيط
رحت للتواليت ومن رجعت النعاس بعيوني
دخلت غرفتها بلغلط عبالي غرفتي ورفعت الغطى اريد اخذج بحضني وهي عاطت وفززتني
لقاء دخلت للغرفه بلغلط حيوان كذاب انت متقصد
امي اسكتي لاتحجين اي شي يكلج جنت نايم وما يدري بنفسه لاتكبرين الموضوع
لقاء امي عافتني وطلعت وما صدكتني وصدكت زوجها المصون
كمت كلما ادخل غرفتي وخاصه اذا هو موجود اقفل الباب عليه هذا مو انسان طبيعي
وراها بكم يوم جاي اتراسل اني ومهند وقافله الغرفه عليه
وهو حاول يفتح الباب ويدخل
الايد مال الباب تتحرك
تغطيت وكمت ابجي معقوله هذا حالي بعد ماكنت انام واني مامنه
وكلبي ثلج هسه انام واني خايفه
خايفه لا أنسى الباب يوم وتصير وباي مصيبه ما تنحجي ابد
طبعا هو اخذ راحته يمته ما يعجبه يجي للببت
والناس كلها شافته داخل طالع
بيوم كاعد احضر غدا وهو كعد من النوم ماحسيت
اله حاضني ويكول شنو طابخ الحلو
اني راسا عطت بصوت وضربته بلجفجير
هو ابتعد وكال هاي شبيج ليش هيج انتي وياي
شوفي امج شلون حلوه وحبابه
لقاء امي عميه ماتشوف الحيوان الي كدامها
....بسيطه وين ترحين مني قابل اطيرين
فات شهر على زواجهم واني عايشه بقلق بس يدخل للبيت ادخل غرفتي واقفلها عليه
وما اطلع اله اتأكد هو ما موجود
فد يوم سمعت امي تتعارك ويااا لان يسهر برا ويااا اصدقائه
فهو رد عليها
تقبلين اجيبهم هنا وحساب الكعده عليج
...امي وافقت بس كون زوجها التحفه يكون كدام عيونها
تخاف خاف يعرف وحده غيرها وتاخذه منها
اني تعاركت ويه امي بس مايفيد ابد مصممه على رائيها
لليل اجا وجايب ويااا اربع شباب
وامي حارت شتقدم الهم من اكل وفواكه وكرزات
كلها هاي من فلوس بابا
اي جاي تصرف علي وتنطي مصرف كله من راتب بابا
اصدقائه جانو جايبين وياهم شرب
بليلتها مانمت يعني مجموعة شبابا مخمورين واحنا ثنيين نسوان وحدنا
حتلو يذبحونا محد يعرف
بقيت كاعده بغرفتي وادعي تخلص هاي اليله على خير
وبعد ما ابقا هنا ابد
للصبح يله فضت كعدتهم
طلعو واني هجمت على امي
لقاء انتي ما تستحين بيت لو بار مجموعة شباب منحرفين تخليهم بيتنا وحنا وحدنا
وين يوصل بيج الاستهتار بعد
امي انجبي شنو استهتار جماعته وجاي يتونسون
همه ليليه بيت واحد وليله على حمودي السره
همزبن محد قربلج ست الحسن
اكعدي بغرفتي ونجبي ولا اطلعين
رجعت الغرفتي وجمعت ملابسي وقررت اروح البيت خالي
بعدين فكرت بأمي شلون اعوفها وحدها
هذا شيطان ممكن يذبحها ويبوك ذهبها ولفلوس
ولله تعبت ما اكدر شلون ياربي اني ادري هاي المصيبه منيين طلعت علينا
هو سمع العركه بينا وفاهم اني ما قابله بهذا التصرف
بس سكت وما حجه اي شي دخل نام
ثاني يوم جاي اخدر جاي وامي بلحمام بس اني ما احجي وياها لان ما تقبل تقتنع هذا غلط
هو طلع افتر شويه عرف امي بلحمام اني ترست الكوب جاي واريد ارجع الغرفتي
هو وكف كبالي واشرلي اوكفي
اني صحت شكوووو شرايد
...انتي تكدرين توكفين كلشي بس اقبلي
...اقبل بشنووو
...اني وياج ناخذ راحتنه وبدون امج ماتعرف
...انت صدك حيوان وامي ما ادري منيين لمتك من يا زباله
ولا تحاول تقترب مني ايد
لان عندي سلاح عندي مسدس بابا مجرد تقترب مني اكتلك خلاص ويكون دفاع عن النفس
دخلت غرفتي واني مرعوبه منه ياربي شنو هاي البلوه
اني طبعا لاعندي مسدس ولا شي بس ردت اخوفه
حتى لايتقرب مني واحمي نفسي منه
اختفى يومين مايجي للبيت وامي تكول كاعده على جمر
حركت تلفزيون حرك
وكل شويه تكول كله بسببج انتي خليتي شرد من البيت
ثالث يوم رجع واسمع امي تتوسل بي وتبوس وتكله فدوه لاتعوفني ولقاء اني راح ادزها بيت خالها
وبعد ما تشوفها ابد
نمت واني دمعتي على خدي ياربي وين اروح معقوله هذا بيتي يكعد واحد مثل هذا ساقط وبدون اخلاق
واني اعيش بيت غير بيتي خطاره
الصبح كعدت على صوت عياط امي طفرت مفزوعه
رحت لكيتها كاعده بلكاع وتعيط
الكنتور مفتوح ومكلوب كلاب
لقاء هااا شكووو خير شصار
...ذهبي والفلوس ماكووووو
....دوري زين شنو يعني ماكو
...البارحه اني نزعت كلادتي وخليته وياهن وقفلت العلبه وخليتها هنا وهسه العلبه كلها ماكوووو
والفلوس عندي سبع ملايين ماكوووو
....ماكو غير حمودي النذل هو اخذهن
...اسكتي حمودي ما يسويها ابد
...لعد من يجراء ويمد ايده عليهن راح اتصل بلشرطه وابلغ علي
وهمه اكيد راح يلكونه ويعرفون شلون يخلونه يعترف
ولله اني كلبي ما مطمن اله ابد
....لا لاتبلغين عنه اني هسه اتصل بي واشوف
امي طلعت التليفون واتصلت يطلع مغلق
لقاء يمه هذا الحجي مايفيدخل نبلغ عنه وهمه يعرفون يجيبون حقنا منا
....اسكتي هو ذهبي لو ذهبج فلوسي لو فلوسج
بس اشتكي علي بعد ما يرجع للبيت
...وانتي شسوين بلحرامي يرجع للبيت انتي شحصلتي منه
واحد مستهتر ويركض وراج علمود فلوسج
همزين بس اخذ الفلوس همزين ما ذبحج
...اكلج اسكتي اني ما اريدهن اني انطيتهن اله
ما اريدهن روحي ادخلي بغرفتج واسكتي
لقاء لا ولله هلمره ما اسكت ابد كافي ساكته راح اضيعينا
انتي هذا الحيوان عامي على عيونج
رحت طلعت تليفوني واتصلت بخالي وكتله تعال بسرعه
صارت مصيبه وما ينسكت عليها
بقيت كاعده وامي تحجي عليه ليش اتصلت بخالي
وهي تكدر تحل الموضوع
شويه ووصل خالي
واني حجيتله كلشي من يوم زيارة كربلا لليوم
وحجيتله حتى شلون يتحرش بيه وامي ما مصدكتني
خالي انصدم من الحجي
جان واكف راسا كعد
خالي بابويه ليش خويه هيج نزلتي راسنه بلتراب
تردين تزوجين ميخالف بس مو واحد بكد بتج
وشلون ازوجتي بدون علمي
وليش ما اجه خطبج مني حتى اسئل علي واعرف اصله
زين هاي البنيه شنو ذنبها ليش تعذبينها وياج
راسا خالي اتصل على الشرطه وبلغ علي علمود الذهب والفلوس
والشرطه اجت تحقق بلموضوع
وخالي بقه كاعد عدنا بلبيت منتضره يرجع بس هو بعد
اخذ الي يريدها ذهب قيمته ٢٥ مليون وسبع ملايين فلوس
ليش يرجع
خالي بقا كاعد عدنا يومين بس يروح يدز مسواك البيتهم ويرجع بس ما يحجي ويه امي ابد
وامي كاعده بغرفتها وساكته
ثالث يوم خالي طلع للشغل وكال ممنوع تفتحون الباب الاي احد بس ارجع اجيكم كبل
اجا اتصال الامي من زوجها بعد ماكان قافل التليفون صار يومين سمع احنا مشتكين علي وحب يصلح الموقف
اني بس سمعت الاتصال رحت اسمع شراح يكول وكفت ورا الباب
امي الووووو
...هلو حبي هلو كلبي هلو عمري
...انت وين وليش ماخذ الذهب والفلوس
...اولا اني وياج واحد انتي مو تكولين اني وياك واحد
ثانيا امي محتاجه عمليه ضرورري واني ماعندي فلوس
العمليه اني اتقرضتهن منج قرضه
وصاريومين اني بلمستشفى وماكدرت ارد عليج ابد
لاتخافين راح ارجعلج كلشي
احنا عارضين بيتنا للبيع بس ينباع ارجعلج الفلوس كلهن
وفوكهن بوسه
.....ليش ما كتلي ضليت بقلق عليك ولقاء حجت كلشي الخاله وبلغ عنك الشرطه
...لا ليش هيج اني ابوك فلوسج مع الاسف
هسه ينباع البيت وارجعهن االلج كلهن وفوكهن بوسه
يله حبيبتي روحي تنازلي عن البلاغ
وكولي الشغله انحلت بيني وبين زوجي
واني بليل اجي وجايبلج وياي مفاجئه ما متوقعته ابد
لقاء اني دخلت عليها وكتلها ولله يجذب عليج يضحك على عقلج
امي راسا قفلت الخط وكالت اسكتي لاتحجين
لقاء زين انطيني اسمه الكامل وعنوانه واني وخالي نروح نسئل علي ونشوف امه صدك بلمستشفى لو يجذب عليج
امي اسكتي انتي مالج شغله اني مصدكته
اصلا المره لازم توقف ويه زوجها بالمواقف الصعبه
وتسانده
ميخالف هذا الذهب يروح ويجي غيره
راحت امي تنازلت عنه وطلعته
خالي زعل عليها وحلف بعد ما يدخل بيتنا ابد
واني اخذت ملابسي ورحت ويه خالي البيته
كلت بلكت تشوفني مو يمها بلبيت وتتندم وترجع تفكر
مره ثانيه وطلع حمودي من حياتنه
الفصل الخامس من هنا
