رواية خادمة الفصل التاسع بقلم جمانه السعيدي
بشرى...تغدينا وأخذت حبايه مسكن ونمت
لان وجهي ورم وجسمي يوجعني من الضرب
للمغرب كعدت على صوت التليفون يرن فتحت عيوني بس وحدي بلغرفه
باوعت على شاشة التليفون دكتوره امال
بشرى...الوووو هلو دكتوره
امال...نايمه اسفه ازعجتج حبيت اطمن عليج
بشرى...الحمد لله اخذت مسكن ونمت
امال...نوم العوافي شلون صرتي خوما توجعج ايدج
بشرى...اي توجعني شويه
الدنيا بارده اكيد الجرح يوجع
امال...اجي اخذج للعياده للمستشفى خاف تكولين
اتاذيت بسببكم وما سئلتو عليه
بشرى...لا دكتوره ما قصرتو بلعكس انتم مالكم دخل
قابل دزيتو يرضبني قدر وصار
همزين اني مو انتي ولا الدكتور اتاذيتو
اني فدوه الكم
امال...حبيبتي اسفه ولله مااعرف شلون اجازيج
بشرى....لا دكتوره لا تعتذرين ماصار شي هسه يومين واصير زينه
امال...بس اريد اطلب منج طلب لا تحجين كدام اي احد
مااريد الناس تحجي بينا
اني اهلي معروفين وسمعتهم طيبه
مااريد هسه على اخر وكت الناس تحجي عليهم
الفلوس فدوه يتعوضن بس السمعه ما تتعوض
بشرى...لا دكتوره على بختج شلون احجي
اسراركم هي اسراري لا توصيني اني مستحيل احجي
امال...اي فدوه العينج حبيبتي
ديري بالج على نفسج اي شي تحتاجي اتصلي عليه
بشرى...ممنونه منج دكتوره مع السلامه
جمانه السعيدي
بشرى...بقيت ممده صحت سعدون سعدون مارد عليه
يمكن بيت اهله
كمت غسلت وبدلت شغلت الصوبه
شويه اجا وجايب ويا عشى نص دجاجه شوي
ومقبلات وخبز
سعدون...هااا كعدتي جبتلج عشى
بشرى...شصاير بلدنيا انت تشتري عشى من فلوسك
سعدون ...شعندي غيرج زوجتي الحلوه
بشرى...يااله اللهم ان كان هذا سحر فلا تبطله
سعدون...تعاي ناكل هي الدنيا شبيها
بشرى...اخلي الاكل بلصينيه والقوري على الصوبه واجي
كعدنا ناكل
سعدون...يمتى ترجعين للشغل
بشرى...ليش تسئل
سعدون....اريد اطمن خاف شاكين بشي حتى نتحذر
بشرى...اطمن ما شاكين باي شي
هسه جنت احجي ويا الدكتوره
سعدون....شتريد
بشرى...تطمن عليه وتكول اذا تردين اخذج للمستشفى
خاف متاذيه
ووصتني مااحجي اي شي عن الفلوس تكول
مااريد واحد يحجي عن سمعت اهلي
سعدون....شفتي أفكاري وين وصلتنا حتى واحنا بايكين
هيج مبلغ صاحبت الفلوس ماتريد تشتكي ولا تريد واحد يحجي بهذا الموضوع
بشرى...يمتى اروح اتعالج اريد طفل
سعدون...مو هسه اصبري كم شهر الناس كلها تعرف العلاج بهيج مراكز محتاج فلوس هواي
الكل راح يسئل منيين جبتو هاي الفلوس
وهيج تنفتح العين علينا خل هاي السالغه
تصير قديم ونكول احنا مسوين سلفه
من نستلمها تتعالجين حتى محد يشك بينا
بشرى...تمام
رجعت للشغل بعد يومين بس ايدي بعدها مربوطه
ووجهي ازرك من الضرب
بس دخلت وشافتني الدكتوره اجت عليه حضنتني
وباستني
امال...الحمد لله على السلامه
بشرى...الله يسلمج
امال...ليش اجيتي بعدج تعبانه
بشرى...مااعرف اكعد بلبيت ذني اليومين بس افكر بيج
اكول شلون بيها شلون بلطبخ والتنظيف
امال...حبيبتي حتى وانتي متاذيه بسببي تفكرين بيه
لاتشتغلين ايدج توجعج
بشرى...هيج على الخفيف حتلو بس طبخ
دخلنا للبيت شافني دكتور عدنان
عدنان...الحمد لله على السلامه
بشرى...الله يسلمك
دخلت للمطبخ وبلشت اطبخ ورحت للغرفه طلعت للجراجف والملابس الوصخه
كل نص ساعه تتصل عليه الدكتور تطمن على وضعي
بعد الغده نظفت المطبخ ورجعت للبيت
الدكتوره كالت ارجعي للبيت انجيب عشى جاهز
بهاي الايام الدكتوره تحجي ويا خواتها بلتليفون
وتغلط على اخوها
تكول كلشي توقعت بس يطلع حرامي ما توقعت ابد
حتى خواتها صدكن هو اخذ الفلوس
بعد هذا الحادث بأسبوع تقريبا
رجعت للبيت مالكيت سعدون
دخلت ابدل ووكعت علبة الذهب مالتي
بيها كلاده وتراجي فتحتها كلشي مالكيت
بقيت ادور بلكتتور
شويه واجا سعدون
سعدون...هله اجيتي اليوم من وكت
بشرى...وووين الذهب مالتي
سعدون...اني ضميته اني طول النهار مو بلبيت
اخاف علي ضميته يمتى ماتردي اطلعه
بشرى...خفت عبالي انباك
سعدون. . هو اني هم خفت علي وضميته
جمانه السعيدي
بشرى...مشت حياتنا طبيعي اني ويااا
كلما اسئله يمتى اتعالج لان كلبي طك على طفل
يكول مو هسه اصبري
يمتى نبني بيتنا اصبري
خل نطلع سفره نتونس اصبري
فات ست اشهر على هذا الوضع وهو بس يصبرني
ويكول انتظري
المبلغ جبير وخاف الناس تشك بينا
واني مصدكه وساكته
بعد ست أشهر من هذا الحادث الدكتور والدكتوره سافرو يتونسون
بهاي الفتره اني بقيت بيتي
سعدون يبقى نايم للعصر يكعد يتغدا ويطلع ومايرجع اله بليل متاخر
بشرى...ليش تتاخر وين تروح
سعدون...يم جماعتي نركيله وسوالف
بشري...قبل تشكي تكول تعوفيني بليبت وحدي
هسه اني كاعده بلبيت وانت ماكوووو
سعدون...يعني اكابلج واكعد ترا ما طلعت هاي
ترديني على مزاجج
بشرى...هنا عشر ايام شيصير لو تطابلني وتكعد
اعتبرنا تونا مزوجين
سعدون...مااتحمل ابقى بلبيت اختنك
خلص اسبوع من اجازتي اتصلت للدكتوره كالت بعد اربع ايام ونرجع
اريدج ترحين تنظفين البيت قبل لا نرجع
بشرى...صار من عيوني
جمانه السعيدي
بشرى...عندي ملابس زايده كل مره الدكتور تنطيني
وصايرات هواي
قررت اطلع منهن الي مااريده وانطي الزوجت
مسلم زوجت حماي
كلهن ملابس جدد ونظيفات
خليتهن بعلاكتين كبار ورحت دكيت الباب
طلعو الجهال
دخلت للمطبخ طلعت زوجت مسلم
بشرى...شلونج
.زوجت مسلم.......الحمد لله اليوم شعجب
بشرى...مشغوله اطلع من الصبح للمغرب بلشغل
اجي تعبانه اريد انام
مافارغه اجيكم
.زوجت مسلم.......الله يساعدج بس خوش شغله تشتغلين بيها فلوس
بشرى...شايلين نفسنا والحمد لله
.زوجت مسلم.... شنو شايلين نفسكم وهذا البيت الي اشترا
سعدون عود انتم ضامين علينا خاف نحسدكم
بشرى...بيت اي بيت
زوجت مسلم....شبيج ما نحسدكم بلخير عليكم
بشرى...ترا انتي متوهمه ما مشترين بيت
زوجت مسلم.. يله يله خوش خوش
بشرى...حسيتها تريد اتسكتني
ذني ملابس جبتلج كلهن جدد
زوجت مسلم. ..شكرا
رجعت للبيت افكر بكلامها صدك سعدون مشتري بيت
ليش اني ماادري
خاف مسويلي مفاجئه من يرجع اسئله
للساعه ١٢ رجع سعدون واني كاعده
على نار كل شويه اتصل علي يكول هسه اجي
بس دخل للبيت
سعدون...شبيج تخبلتي ليش تتصلين هلكد
فشلتيني كدام جماعتي
بشرى....شنو موضوع البيت
سعدون...اهووو هم رجعنا الهذا الموضوع مو كلت بعدين
بشرى...مااحجي عن بيتنا هذا
البيت الي انت مشتري
سعدون....اي بيت مامشتري بيت
بشرى...لا اجذب عليه زوجت مسلم كالت مشتري بيت
ليش اني ماادري
سعدون...يااازوجت مسلم يابطيخ هاي شبيها تخبلت
اني ما مشتري بيت
صديقي كلفني يريد بيت ورحنا اني ويااا
عاملنا على بيت وعجبه واشترا
الولد صاحب البيت اجا هنا بيت اهلي واتفقنا
على السعر وتكاتبنا اذا تردين اجيب صديقي
يحجيلج الموضوع
شكد ثوله الخاطر الله هاي زوجت مسلم
طول عمرها ام كاله ام العلوم
ابدال مااشتري بيت ابني بيتنا هذا
بابا لا تصدكين كلشي هاي الناس ادور خراب
وخاصه زوجت مسلم
شكد تغار منج كلما اروح عليهم تحجي عليج
اقطعي علاقتج بيها
وحده منافقه حيه
بشرى...كدر سعدون يقنعني بكلامه
وصدكته لان فعلا زوجت مسلم تموت على الكاله
والقيل والقال
بعدا هاي الحادثه بشهر واحد حسيت اكو تغير
بسعدون
حالق مرتب لحيته هواي يحجي بلتليفون
كلما يرن جهازه يطلع يحجي برا
حاولت افهم شكوووو بس كلشي ماحصلت
كلما اسئله يكول ماكو شي صديقي يريد يزوج
ومحتاج اساعده
وهذا صديقي عزيز عليه
كلت ماكو غير زوجت مسلم هيه تعرف شكووو
وما تظم سالفه ابد
فتحت الباب شفت جهالها يلعبون بلشارع
صحت عليهم خل تجي امكم عندي غراض اريد انطيها
شويه لبست عباتها واجت
بشرى...شلونج
زوجت مسلم...زينه الحمد لله صدك عندج غراض
ماتردينهن
بشرى...اي تعاي ادخلي
دخلتها جوه طلعتها ملابس وعطر وسيت نوم
بشرى...ذني كلهن اللج
وبعد عندي شالات وملابس داخليه وهاي الشحاطه اللج
زوجت مسلم...بعد عيوني شكرا الف شكر
بشرى...اني حاسبتج اختي واريد اسئلج سؤال
زوجت مسلم...اي اسئلي
بشرى....سعدون شنعده هالايام
راسا ملامحها تغيرت وكالت ماادري
بشرى...شلون ماتدرين ماكو غيرج يحجيلي الحقيقه
انتي اختي واني احبج
اني ماعندي احد بهاي الدنيا يتيمه وفقيره
احجيلي بس انتي اصدك بيج
زوجت مسلم...لا مااحجي ذيج المره من حجيتلج على البيت
رحتي حجيتي السعدون واجا تعارك وياي
ويا مسلم وحصلتلي كتله ورزاله منهم
مسلم يكول بعد اذا سمعتج تحجين اطلكج مو عيب تسوين مشاكل بيت اخوي
جمانه السعيدي
بشرى...هلمره اني مراح احجي ولا اجيب طاريج
بيش تردين احلفلج
حتى تصدكين مراح احجي عليج ولا اكول زوجت مسلم حجتلي
زوجت مسلم ..لا أخاف يطلكني مسلم
بشرى...واذا انطيج هاي ٢٥ الف هديه اللج
واحلفلج مااحجي اي شي
هاج شوفيها حمره تخبل حلال عليج بس احجيلي
شكوووو
سعدون شصار عليه
زوجت مسلم...راح احجيلج بس الله عليج
لا تكولين اني كتلج
ولا تجيبيني بلطاري هلمره صدك مسلم يطلكني
بشرى...قسما بلله مااحجي بس فهميني شكوووو
زوجت مسلم...راح احجيلج كل هذا الكلام حقيقه
واني متاكده منه يعني ماأجذب عليج
بشرى...احجي مو كلبي يبس احجي موتيني
زوجت مسلم.....البيت الي حجيتلج عنه سعدون اشترى
وهسه خطب بنيه زغيره يريد يزوجها بلبيت
اني اعرف كل هذا من فلوسج لان سعدون كلشي ماعنده حافي
منيبن جاب فلوس البيت
وشلون راح يزوج يكولون مشتريلها ذهب
ومنطيها مهر زواجهم بعد كم يوم
يكول بشرى مايصير عدها اطفال واني اريد اطفال
هما ما يحجون كدامي يخافون انقلج الكلام
بس اني كلما يتجمعون اروح اسمعهم شيحجون
انتي كاسره خاطري
شلون ياخذ فلوسج وتعبج ويزوج عليج
اذا تردين تعاي اخذج البيته الجديد
وادليج على بيت العروس بس ماادخل وياج
اني مالي شغل اخاف من المشاكل
لان احبج حجيتلج هذا الحجي
بشرى...من سمعت هذا الكلام كعدت بعد مااكدر اوكف
على حيلي
سعدون يضحك عليه اخذ فلوسي اشترا بيت للعروسه الجديده
الله لا يوفقك سعدون
بسيطه كلشي اخذته مني ارجع مربع
اني اعلمك
