رواية أبناء ابليس كامله جميع الفصول بقلم محمود الأمين
لسه الجلسة الجاية انا زهقت انا قاعد بقالي ساعتين.. طلع الحاجب وقال محكمة
القاضي طلع وقال
حكمت المحكمة وبإجماع الاراء علي المتهم عزيز صابر الخلعي بإحالة أوراقه إلي فضيلة المفتي
كنت فاكر نفسي هسمع صراخ من المتهم لكن المتهم تقبل الحكم بابتسامة خفيفة بانت علي وشه
أول مرة اشوف حد بياخد أعدام ومش بيصرخ ويقول انا مظلوم
سمعت عن الحادثة دي عشان شغلت الرأي العام فترة كبيرة
الراجل المجنون اللي قتل مراته واللي في بطنها ودبح دجال في احدي قري الصعيد.. واخر حاجه كان بيقولها انقذوا القرية من ابناء ابليس
يا تري اي الحكاية؟
..
قربت من القفص وانا بقوله
_ هو أنت معندكش محامي ولا أي؟
رد عليا بلهجة الصعايدة وقلي
_ وهجيب محامي ليه يا بيه؟.. أنا قتلت ومعترف وعارف اني هتعدم.. الموضوع خلصان يا بيه
_ أنت غريب يا أستاذ عزيز بجد!.. هو في حد عايز يموت ومسلم كده
_ يمكن أنت بتقول كده عشان أنت معشتش اللي انا عشته ولا شوفت اللي انا شوفته
_ للدرجة دي أنت شوفت اي؟
_ ابقي تعالي زيارة قبل تنفيذ الحكم وهحكيلك كل حاجه
ولو عايز تشوف حاجه بنفسك ابحث عن قرية الصيادين بس منصحكش تروح هناك
..
شغفي زاد اعرف اي اللي حصل معاه بالظبط.. بس قررت اني ابحث عن القرية دي واشوف اي النتيجة
خلصت الجلسة اللي ورايا ومشيت.. رجعت البيت حاسس بإجهاد لكن شغفي كان غالب عليا وعشان كده طلعت الاب توب بتاعي وشغلته ودخلت علي البحث وكتبت قرية الصيادين
طلعتلي أخبار كتير عن قرية بيحصل فيها حوادث كتير الفترة الأخيرة.. وبيوت بتولع لوحدها
الموضوع كان مريب وكان لازم أفهم الاول من عزيز وبعدين اقرر اذا كنت هروح القرية ولا لأ
قومت وأنا بقفل الاب وبقول بكرة يحلها حلال
نمت نوم عميق.. نوم تعب ومحستش بنفسي غير والمنبه بيرن الساعة 9 الصبح
قومت دخلت الحمام ولبست وفطرت.. وانطلقت علي السجن اللي محبوس فيه عزيز.. وصلت هناك بعد ساعة
دخلت لمأمور السجن وقولتله أني عايز أقابل المتهم عزيز صابر
حسيت ان وش المأمور قلب كده وكشر.. وبعدين طلب من العسكري يجيبه من العنبر بتاعه
عشر دقايق ودخل عزيز اللي لسه نفس الابتسامة الخفيفة مرسومة علي وشه
وقلي
_ أهلا بيك أنت جيت برضو.. علي فكرة شغفك ده هيوديك في داهية
_ عزيز أنا عايزك تحكيلي كل حاجه وصدقني هدافع عنك لو في الاستطاعة
..
ضحك عزيز وهو بيقولي معاك سيجارة طيب عشان أحكيلك
طلعت سيجارة وقولتله
_ ممكن اعرف أنت بتضحك ليه؟
_ بضحك علي كلمة أدافع عنك دي.. اصل انت مش هتصدقني اصلا عشان تدافع عني
_ يا سيدي أحكي جايز اصدقك
_ هحكيلك بس حاول تستوعب اللي هتسمعه
_ احكي بس وانا هسمعك
..
قلي: زي ما قولتلك انا من قرية أسمها الصيادين وهي أسم علي مسمي يا بيه.. أحنا معظمنا صيادين
كل يوم بنطلع البحر نجري علي أكل عيشنا.. ونرجع اخر الليل بالرزق اكل وفلوس والحمدلله العيشة كانت مستورة.. أنا كنت متجوز صابرين بنت الاستاذ فايز مدير المدرسة الابتدائي
بس ربنا موفقناش بخلفة.. 3 سنين جواز ولف علي دكاترة ومفيش خلفة واللي بيتقال مفيش حاجه تمنعنا من الخلفة كنت راضي انا وصابرين والدنيا كانت ماشية تمام
لحد ما في يوم صحينا كلنا علي رجوع العامر.. وقبل ما تسأل مين العامر؟
العامر ده ابن عتمان كان ابوه التربي بتاع البلد زمان.. الله يجحمه مطرح ما راح كان راجل مؤذي بتاع اعمال وسحر وقرف
ورجوع ابنه بعد السنين دي كان عليه علامات أستفهام كتير!
لما رجع كان عامل فيها الشيخ الواعظ الدقن والجلبية البيضة والسبحة.. وأشتري بيت كبير من بيوت البلد
محدش كان عارف هو جاب الفلوس دي منين.. لكن الكل قال ربنا يهديه
محدش كان عارف اي اللي بيدور في عقل الشيطان ده
لكن من تاني يوم خرج للناس علي منبر الجامع وقال
_ يا أهل البلد أنتوا اهلي وناسي اللي مليش غيرهم وعشان أنتوا اهلي بطلب منكم اي حد محتاج مساعدة ميتأخرش محتاج علاج يجيلي وكل العلاج بكتاب ربنا.. بيتي مفتوح ليكم في أي وقت
..
بلدنا يا سي الاستاذ بلد جهل وفقر كل اللي معاه مشكله كان بدل ما يصلي ويدعي لربنا.. كان يروح للعامر ويطلب منه المساعدة
اللي مش لاقي ياكل واللي تعبانة والناس قالوا عليها جن
واللي مبتخلفش
وتعالي علي نقطة مبتخلفش دي وحط تحتها مليون خط
عشان قصتي بتبدأ من هنا
أول واحدة راحت للشيخ العامر وسامحني اني بقول عليه شيخ
كانت واحدة اسمها ناهد.. كانت بنت راجل غلبان اسمه عوض.. راحت للشيخ العامر بعد ما زهقت من اللف علي الدكاترة
لما راحت عنده ورجعت حكت لمراتي أنها
لما دخلت عنده كان مشهد ولا الافلام.. الشيخ قاعد علي كرسي وقدامه المبخرة وعمال يتمتم بكلام مش مسموع.. قعدت قدامه فضل يقري عليها ويقول كلام مش مفهوم وقالها تاجي بعد يومين
من غير تفاصيل لما رحتله تاني أداها كيس في بودرة لونها اسود وقالها تدوبيها في شوربة وجوزك يشربها
هي مسألتش ليه.. حاضر وخلاص
وقالها تاجي بعد يومين كمان
والمقابلة دي كانت الكارثة لما رحتله المرة التالتة
قالت انه ولع بخور ريحته تقيلة شويه خلاني دوخت ومحستش بنفسي.. ولما فوقت معرفش بعد قد اي
لقيته مبتسم وقلي قريب هتسمعي خبر حلو.. بس مطلوب منك ولمدة 40 يوم مفيش صلاة مفيش ذكر لاسم ربنا.. مفيش قرآن لو عملتي كده هيكون العقاب شديد
..
طبعاً لما سمعنا الكلام نصحنا ناهد مترحش تاني للراجل ده.. وان اللي بيطلبه منها ده كفر بمعني الكلمة
لكن هي مسمعتش الكلام
ويمكن اللي سكتنا ان ناهد حملت.. اه والله حملت
محدش كان مصدق.. والكل بقا يقول علي الشيخ العامر البركة.. حلال العقد.. قولتلك الجهل متمكن منهم
لكن اللي حصل كان كارثة
صحينا في يوم علي صرخات.. مكناش عارفين في اي؟
الناس كلها خرجت علي منظر جوز ناهد والنار ماسكة فيه والناس كلها بتدلق عليه مية وبتحاول تلحقه
المنظر كان صعب جداً.. لكن الادهي لما دخلت بيته ومش هتصدق شوفنا اي؟
