رواية عشوائيات كامله جميع الفصول بقلم ايسو إبراهيم
تعالي يا آنسة اتبرعي بالدم
بصتله بقرف وماردتش عليه وهي واقفة مستنية صاحبتها
هو بضيق: باين ماعندكيش دم
بصتله بغضب: إيه يا أستاذ مالك بيا، أنا عارفه شغل الهبل بتاع الشباب دا وبتلف ورايا عشان تشقطني بس حلو المرة دي كريتيف
بصلها بعوجة بوق وقال: أشقطك إيه يا أستاذة، باينلك مابصتيش في المراية قبل ما تنزلي
هي بعصبية: ليه شايفني نازلة بشوال بطاطس ولا إيه، حسن ملافظك يا أستاذ بدل ما أصوت وأقول بيتحرش بيا
هو بسخرية: لو صدقوكي يبقى ماعندهمش نظر، أصل هبصلك على إيه بلا خيبة، عنك ما اتبرعتي بالدم وشك مش شكل عايز حسنات ولا بيعمل ثواب
هي بسخرية: وإيه ضمني إنك مش نصاب وبتضحك عليا وعايز تخطفني اكمني واقفة لوحدي
مسح على وشه بضيق وقال لنفسه: أنا اللي جبته لنفسي ماكنش عندي نظر قبل ما أطلب منها كدا
وسابها ومشي وراح يطلب من ناس تانية، وهي بصتله بضيق واتصلت على صاحبتها تشوفها فين
وقالت لنفسها بعد لما كلمتها: صعبان عليا مايعرفش إن عندي أنيميا لو خد مني نقطة هيغمى عليا ووقتها هيوصلي كل الدم اللي خده من اللي قبلي، وهيندم ندم عمره على إنه طلب مني كدا، وبعدين إيه الناس اللي بتكلم بنات دي فعلا شباب آخر زمن
جت صاحبتها ومشيوا في طريقهم وحكت ليها اللي حصل، وقالت: المفروض يكلمني بذوق يقولي يا آنسة ممكن تتبرعي بالدم يشوف حالتي تسمح ولا إيه؟ بس جاي يقولي إيه تعالي يا آنسة اتبرعي بالدم، محسسني إنه بيكلم صاحبته
صاحبتها بضحك: يا بنتي يمكن مايقصدش، المهم الموضوع عدى خلاص، يلا بقى نشوف هنعمل إيه في حوار الشغل دا
فات أسبوع بدون أحداث جديدة لحد ما قالت لها مامتها إن في عريس هيجي النهارده بعد المغرب
قالت لمامتها: يا ماما أنتم بتاخدوا قرارات وأنا آخر واحدة أعرف
مامتها: مش مشكلة مايهمناش رأيك
بصت لوالدتها بنص عين وقالت: ماشي يا ماما اعملوا اللي أنتم عايزينه
أنا نازلة الشغل سلام
ونزلت وهي بتفكر هتعمل إيه
وصلت الشغل وهي زهقانة إنها مش لاقية حل للعريس دا، دخلت قعدت في مكانها قدام الجهاز وطلعت نضارتها وبدأت تشوف شغلها
بعد نص ساعة لقيت زميلها في الشغل وقف قدامها فجأة وقال: الحقي المدير طلبك ومتعصب عشان العميل اشتكى منك
هي بملل: حوار كل أسبوع ماشي يا عم شكرا على جريك ليا وللمدير
خلعت النضارة وقامت ببرود وراحت عند المدير دخلت بعد لما خبطت لقيت وشه لا يبشر بالخير
هي: احم حضرتك طلبتني
المدير بعصبية: يا صفاء دي خامس مرة يجيلي شكوة منك ما قولنا نكلم العملاء كويس
صفاء بضيق: ما هما اللي بيعصبوني أنا مش خدامة عندهم عايزين كل شوية برأي ما يراعوا إننا بنتعب بردوا
المدير بتنهيدة: لازم نعمل اللي بيقولوا عليه لإما بطريقتك دي مش هنشتغل وهننزل في الإشارة بعد كدا
صفاء من تحت أسنانها: حاضر هحاول عن إذنك عشان عندي شغل
طلعت من عنده وهي وشها أحمر من العصبية وقالت لنفسها: شغلانة تعكر المزاج فعلا
وراحت تكلم صاحبتها وتقولها إن في عريس جاي النهارده
المغرب العريس كان وصل وصفاء في المطبخ بتكلم نفسها: أحطله بهارات لحمة عالعصير ونكنسل الملح في القهوة وهتبقى كريتيڤ
جت مامتها وقالت: يلا يا صفاء واعقلي يا بنتي وشوفي مستقبلك وشوفي حياتك
صفاء بضيق: حاضر يا ماما
وطلعت صفاء وهي متوترة ومعها صينية العصير
ألقت السلام وحطت الصينية وقعدت
بعد كلام ومدح للطرفين قرروا يسيبوهم مع بعض
العريس: احم ازيك يا أستاذة صفاء
صفاء: الحمد لله
العريس: حابة تسألي عن إيه
صفاء: عرف نفسك
العريس: ماشي مع إني حاسس بطريقة السؤال دي إني في انترفيو
ابتسمت صفاء بسماجة وقالت: معلش
ابتسم العريس على طريقتها وقال: اسمي صالح، مدرس انجليزي عندي 27 سنة ليا شقتي مستقلة عن بيت أهلي
لو حصل نصيب إن شاء الله نعمل خطوبة فترة قصيرة شقتي جاهزة ناقص بس الدهان والعفش
صفاء: إن شاء الله
وقالت في نفسها هو باين كدا هدبس وهتخطب كلامه وأسلوبه كويسين
بقلم إيسو إبراهيم
العريس: طب عرفت إنك بتشتغلي، دي فترة مؤقتة ولا ناوية تكملي بعد الجواز
بصتله صفاء اللي هو عايزها تشتغل ولا لا فقالت: لحد الآن ما قررتش
العريس: تمام كنت عايز أعرف هدفك بس
صفاء: تمام
دخلوا أهلها وهو استأذن بعد لما قالهم إنه مستني ردهم
في اليوم التالي كانت صفاء في أوضتها محتارة توافق ولا لا
فدخلت والدتها عشان تشوفها اتأخرت ليه
والدتها: مالك يا بنتي مسهمة كدا ليه
صفاء: محتارة في موضوع العريس
والدتها: صليتي استخارة
صفاء: اه بس ماحسيتش بحاجة
والدتها: يبقى توكلي على الله، احنا سألنا عليه والكل بيمدح في أخلاقه وفي شخصيته
صفاء: اللي تشوفوه يا ماما هقوم ألبس عشان أروح الشغل
والدتها: ماشي يا بنتي
وبالليل كانوا بلغوا صالح ردهم بالموافقة، وكل حاجة تمت بسرعة وجه يوم الخطوبة وكانت بين أهلهم صحابهم بس
كان كل الحاضرين مبسوطين ليهم وفرحانين وبيباركوا لهم وتمت الخطوبة
