رواية عيون المها الفصل الحادي عشر بقلم ظل الياسمين
اقتنعت اخيرا بان لا حاجه لي بلعتاب
فالجميع بعقولهم يدركون ما يفعلون
غمضت عيوني وفتحت بوري المي قوي حتى ما اسمع هوسه ام عبد
والصياح وعمتي دخلت بلخط وهم كامت تصيح علشنو ما اعرف ولا اريد اعرف
لحد ما مرت ساعه واني بلحمام وميته بجي ودكت للباب
_افتحي مها خلي احجي وياج
_فتحته وطلعت وهيه عصبيه وتجر بيه دخلتني جوه البيت وكعدتني
_بس اريد افهم الي سمعته شنو انتي ليش منزله مستواج لهيج بشر ولج ذول حثاله ادوسهم برجلي واطلع كبل تبجين ومتالمه من وحده نعال ما تسوه
_ عوفيني بحالي خلي اروح انام راسي انسطر من الهوسه
_والله لو تجين يمي اهنا تنامين احسن الج ولا تنامين بلخرابه اشلون متحمله البرد والضلمه ما تكللي شجاج
_مشكوره ما اريد منج شي بس عوفني بحالي
طلعت من يمهه ورحت لفراشي تغطيت ونمت
كعدت الصبح على اذان الفجر
كمت اجددت وشغلت الجوله وسويت جاي وعدي خبزه كمت احمي واكل
كمت اقره قران الا ان طلعت الشمس
كلت اليوم اروح لعمو سالم
نشتري التنور مشيت بهمه وياما تعديت بيتين اسمع المره تحجي ويه بتهه اي هيه هاي مسويه السحر لابنهم استغفرت وضجت كلش
الله لا يوفقج يم عبد اتهمتيني باطل
دكيت الباب طلع عمو سالم كال تعالي تريكي كتله لا تريكت جرني من الصايه كوه ودخلني ولكيت مرته مدخنه مني
_صباح الخير
جاوبني عمو صباح العافيه تدرين مهاوي من اشوفج اذكر الحجيه صفيه الله يرحمها يمكن انتي نسخه منهه نفس الطيبه ونفس الروح
_مشكور عمو انته الاحسن
يلله خلينه نروح لسوك نشتري ونرجع على وكت كتله عمو اني راح انتظرك بلبيت
رجعت لكيت ام صلاح بلباب صبحت عليهه رادت تحجي بموضوع البارحه اني كطعت كلامهه كتلهه اريد خمره اعجن
هيه دخلت جابتلي واجت رحنه للبيت وسرفنت وكمت اعجن وهيه تعلمني ودثرت العجينه
وهيه راحت واجه عمو جايب التنور مستعمل وملحوم وياه قنينه ومنظم من شفتهن ضجت هو حس كال الفلوس ما كفن وذني الكدرت عليهن اتشكرت منه
كفيت ارداني وخبزت العجين كله لميته وخلينه بوصله وتلثمت ورحت لسوك
اول مره خايفه ومتردده
كعدت الكاع بارده واني اتلفت وما احس الا عمو ابو حازم فوك راسي
_صباح الخير مهاوي ليش عمو اسوين لبراسج
_صباح الخير عمو تعذرني بس ارد اعيش
ليمته اظل عاله وامد ايدي لناس
_عمو اني بلمحل اي احد يضايقج بس انطيني خبر ولو زعلان عليج بس عناد جدج الله يرحمه
_كعدت واني اردد يا فتاح يا رزاق يا عليم
اكثر ليمرون من هذا المكان جنود واكو كم مره مبسطات هنا اني ادنيت يم مره جبيره وخليت كارتونه وكعدت عليهه وسلمت المره مثل الضاجت
كلت خلي اضوج كلمن ياكل رزقه
كمنه نسولف وتعرفنه على بعض وطلعت ام لاربع بنات وتخاف عليهن يطلعن
_خاله انتي اهلج وين ليش تبيعين وحدج
_صفنت بلله هاي شنو اجاوبهه كتله ميتين وجاي اعين نفسي واشتغل
طبعا اني مغطيه وجهي كله بس عيوني طالعه اجه ولد عسكري
كعد كبالي كال
_صدقه للعيون الحلوه اشتري منج الخبز كله بس كون اشوف وجهج وضحكتج
_اني خفت ردت عليه المره يمه عيب عليك كوم منا لا اصيح واخليهم يكسرونك خله وطفر ابتسمت الحمد لله عدت على خير للعصر واني بعت بس اثنين ومحد يشتري لان العالم كلهه تخبز بلبيوت وحصار وماكو
بلاخير كالت المره خاله روحي للمطعم بلكي يشتري منج رحت واني العبايه قديمه وكلهه تراب وكفت باب المطعم عباله مجديه
_السلام عليكم
_دار وجهه كال الله ينطيج
_كتله عمو عدي خبز اذ تريد تشتريه واني مرتبكه وخايفه اشو هذا ركز وياي انتي من يمته تبيعين وظل يسال
_عمو هسه تشتري لو اروح
كال خل اشوفهن كلبهن وكال اشكد فلوسج كتله هلكد طلع فلوس وانطاني
بستهن وحطيتهن على كصتي فرحت اشو هذا لزم ايدي كال يوميه تعالي اخذ الخبز منج سحبت ايدي بنتر كتله انشالله وكلبي يرجف درت وجهي وكبل للسيارات رجعت المغرب
كليت بتيته وخبزه وجاي الحمد لله والشكر اليوم حصلت الف ونص
ظليت يوميه اروح بس من وكت واكمل وارجع مره رجعت العصر ولكيت ام صلاح تنتظرني باوستني ودخلتهه للبيت
_يمه مهاوي عود باجر تعالي ويانه تونسي عرس ابن اخو الحجي البنات رايحات واني كلت خلي اكلج
_لا خاله اني شكو رايحه زحمه ناس لا اعرفه ولا تعرفني
_يا ولج غير انتي بتي كلت اجيبلج من زويزه ثوب وحجاب تلبسيهن وترحين تتونسين وما اريد اعذار منج والله ازعل
_امري لله بيش الساعه ترحون
_ساعه ثلاثه من وكت حتى نرجع من وكت هاج يمه ذني اهدوم زهراء لبسيهن
اخذت منهه الملابس ودخلت غسلتهن وسبحت ونمت بليل حسيت حركه غريبه وطكطه وره البرده كمت من مكاني لكيت رجل عمتي
_خير شتريد جاي لهنا
_مها انتي اشلون عايشه هيج لا كهرباء لا تلفزيون وراضيه وراضخه حتى باب ما عدج تدرين لبعمرج هسه كليه وتلعب بلفلوس لعب
_وخرته من طريقي وتعديت من يمه ورحت للحمام قفلت الباب عليه وكعدت منتجيه راسي ما عدي غير مكان احتمي بيه الا ان طلع الصبح
توضيت وصليت وخبزت العجين
وكمت اسبح ورحت مثل عادتي بس كلش تعبانه كملت ورجعت من وكت نمت وكعدتني ام صلاح على دكت الباب
لبست وطلعت وياهه
بطريق كتلهه خاله اريد اطلب منج طلب
_كولي يا بعد روحي
_فدوه اداينيني عشره الالف اشتري باب بمكان البرده
_يا يمه سوده عليه كتلج البرد ميخالف بس ارجع انطيج الفلوس
_انشالله اجمعهن وارجعهن الج
مشينه رابع فرع من بيتنه وكفنه يم بيت نسمه صاحبتي
_خاله متاكده هذا البيت
_اي يمه هذا
دخلنه جوه واني اشوف صاحبتي كاعده على كرسي ولابسه بدله تخبل
انهضمت وبجيت ليش ما عزمتني ليش اعرف بصدفه
سلمن كلهن عليهه وصلني السره وسلمت وهيه بقت متفاجئه بجيتي اني حجيت برود كتله اشلونج نسمه مبروك
كامت من مكانهه
رادت تحضني وخرت ادبهه
_مها حبيبتي والله وديت اخوي لبيت سالم ما لكاج
_ما صار شي عيوني الف مبروك بتوفيق
_تعديتهن ورحت كعدت بلاخير
اصفن ويه روحي صاحباتي الوياي بنفس العمر وحده تزوج وحده تتعين واني اركض حتى اشبع بطني ليش مو مثل البنات لا اهل لا عزوه
طردت الافكار من راسي وكمت
_خاله اني راح ارجع وحدي ما نمت بليل وتعبانه
_يا يمه استونه اجينه غير تنتظرين المله من تجي وتخلص
_والله خاله ما اكدر احس راسي طبل
رجعت للبيت واني كلش مقهوره
صاحبة عمري تستنكف تعزمني وين وصل بيج الحال يمها
رجعت مكسوره خاطر كعدت بزاويه الغرفه وحضنت نفسي وبجيت 😭
وينج بيبي تعالي شوفي حالي
بقيت للمغرب وكمت صليت واسمع عمتي تحضر وتغسل وتنضف اليوم شكو منو جايهم
_لليل واسمع سيارات وترحيب مديت راسي قوط وملابس فاخره وسيارات كله اولدزموبيل وكافه بابنه
اسمع الترحيب والضحك كلت خلي اكوم اعجن لصبح طلعت فتحت الجوله وحميت المي واستوني كعدت وما احس اله واحد ولد شاب فوك راسي
