رواية خطايا واجتثاث الفصل الرابع عشر 14 بقلم نور البصري

أدمنت ُ صوتك والادمان أذواق 

فالعين تعشق و الآذان تشتاق ُ

كن لي طبيباً فهذا الشوق اتلفني

يا مالك الروح إن ّ الحب أخلاق ُ

ــــــــــــــــــــــــــــــــــــــــــــ 

: منو انتِ وشتردين..

أجر بي بعيد وهو مصدوم نتر أيده حيل 

: هذا تصرف غير مقبول.. 

درت وأني أعدل طوق الفراشة على راسي.. 

: أني سؤدد.. ما عرفتني عمو مازن.. أنت عمي شنو نسيت سؤدد.. 

صفن بوجهي وملامحي واني ببصيص أمل أهز براسي علامة القبول.. 

أي أني سؤدد هيج داكوله أفعل ذاكرته الي نستني عيونه دمعت.. 

: سؤدد.. بنت أخوي شلونج عمو شلون صحتج؟ 

شافني لابسه اسود و توجس حسيت وجهه أصفر وأنخطف.. 

: أمج خوما بيها شي؟ 

: لا عمو..

شفته جر نفس وعيونه لمعت بحسرة رجع جر نفس مرتاح مرة ثانية.. 

: بيبيتج؟! توفت الله يرحمها هي هم من زمان مرة جبيرة..

دنكت أشهك العبرة تتكسر بصدري وصوت بجيه تحشرجت بحنجرتي دمعت عيني التفت للطلاب الي ظلوا يباوعونا و آشرلي وهو يكول.. 

: تعالي وياي منا الطلاب تباوع

: ترى اني بنت أخوك مو صاحبتك! 

: دتعاي بابا وياي نفس سوالف أبوج الله يرحمه و بشاشة الوجه تشبهي

وسعت عيني وأحنا نتمشى وأحجي

: منين أشبهه أبوي شو هو أحمر أبيض مثلك يلج لج و العيون صفر تلالي شجابني عليه يا عمو اني الي لوني مزنجر حتى بالكيمياء تعريف الصدأ بيها هو عبارة عن سؤدد.. 

والله عمو انت هم تجامل ترى اني اشبه خالي سوادي.. 

أبتسم على تشبيهاتي و على هذر كلامي جان دومه هادئ والله يا زمن بعد هاي السنين اني وعمي مازن نتلاگه 

نتمشى و سألني 

: شخبار سوادي صديق العمر جنا دوم سوى و درسنا سوى اعرف خوالج قبل ابوج ربيعتي جانوا بس ابوج الله يرحمه اجه يشوفني و هناك تعرف على سوادي و قوت علاقتهم و أنطوه مره.. 

(أبو سؤدد أخو مازن من الاب فقط) 

حجاها بحسره...  

: يجوز مشاف بيك الشافه بأبوي لذا منطاك مرة بعد حظ سؤدد.. وارثه انت مدري اني الوارثة حظك المجير بفرگنا.. 

وكف ردت أصطدم بظهره جان يمشي كدامي التفت وباوعلي يمكن يكول هاي البنية نكتها بوجهي دتكولي انت فگر زين قابل كذب..

رجعت اكمل منحرجه من نظرته المستغربة كل هاي معلوماتي عنه وعن العشق لأمي..

: و انت عود شكد تلمحله ترى خالي يسولف يكول أغلس من يكلي أريد أناسبك وأخالط دمك.. 

ضحك 

: للاسف سمعتي يم خالج زفت أوف أوف و أنعجب بأبوج الخلوق

و ضحك رديته وأني أحاول الحكه خرب يمشي سريع.. 

: و انت ليش مو خلوق؟!.. 

التفت الي ووكف شوي و ضحك.. 

: هيج يمعودة جانت عندي سوالف شباب بس من لمحت امج بالكيعان تشتغل كلت لهنا وكافي لازم أستقر بعد شكول على سوادي هي قسمة ونصيب و امج مو قسمتي.. 

همستله و اني اشهك ابجي 

: يمكن حسن.. هم مو قسمتي لا اله الا الله، الله ليكولها ان شاء الله يطلع والله نعيد العرس ونتزوج وهالمرة اعزمك مو ما تجي.. 

استغرب شخرط واثرم عليه هم رجع وكف صافن بوجهي.. 

: منو حسن.. و على شنو تحجين ما فهمت؟!.. 

: جنت احجي عالقسمة والنصيب سالفه طويلة نشوف مكان و نحجي.. 

غير الموضوع من حس عيوني حومرن واشهك اضم بجيتي

: اي والله بنت اخوي فخر الي ان شاء الله يوم الي تصيري عالمة فيزياء 

استحيت و تفشلت رديت بصوت ناصي.. 

: بنت أخوك دخلت قسم جغرافية تربية مدرسة المستقبل.. 

بس اني أجيت لكلية العلوم هنا تداوم صاحبتي بلكت اتخرج اشتغل بالاذاعة اذيع أنواا جوية لو اصير باحثة جغرافية.. 

جان يبتسم... 

: ما بيها شي كلها دراسة و اجتهدي الاحلام تتحقق..

: عمو انت استاذ فيزياء.. 

ابتسم : لا 

ضحك و كلي

: اني استاذ كيمياء عضوية ادرس ببعض الكليات الطبية وكليات الصيدلة والعلوم كمحاضر بعقد لأن رجعت للوطن من قريب.. 

: ها اكول دورت الكليات مندليتك طلعت محاضر تجي للعلوم ترى شفتك بأول يوم داومنا مرحلة أولى.. 

صفن و أبتسم 

: ما مقسوملنا إلا هسه نتلاكه.. 

كعدنا بالكافتريا راح جاب عصير و لفات

: جوعانه؟ 

: توني أكلت 

: اني جوعان و اريد اكل المهم سافرت للخارج كملت و رجعت أدورلي مرة اتزوج.. 

ابتسمت : شعجب ما متزوج

: تزوجت بنت عربيه و خلفت منها ومن فترة طلبت الطلاق و طلقتها ورى ما اتفقنا و تتنازلي عن حضانه اولادي الصراحه ما لكيت التتحملني اصلاً الله اني شلون تزوجت مدري بعد قسمة وصارت عوفج مني سولفيلي.. 

حجيتله و اني اهمس بخوف و اتلفت وهو متأثر دمعت عيونه لأن علاقته طيبة بخوالي باوعلي 

: ليش متطلعون للخارج اني باقي هنا لفترة بلكت امي تقتنع و ترافقني فتعاقدت بالكلية الي بيها لمدة كم سنة وهم شويه يوصلون اولادي سن الرشد بس لو امي تقبل تجي وياي والله من باجر ارجع.. 

سكتت اذكر امه جانت تكره امي لأن اختارت ابوي و تركت ابنها و هم مشاكل الصارت بين امي و عمي خلا المرة تجفل گلبها منا هي مو جدتي ولا ام ابوي هي مرت ابو لأبوي 

عاد ظلينا نسولف و من يومها كل كم يوم نلتقي هنا من يجي ينطي محاضرات يسأل اذا محتاجة شي..

لاحظت هواي يسأل على امي بحسرة و عيونه تلمع يمكن لو امي متزوجته جان طلعنا للخارج امنيتي اسافر 

حتى جنت دوم اتخيل نفسي عايشة بالخارج.. 

          مــــــــــــــــــــــــــاجد

كلش ضجت من بنت عمي وخطيبتي سابقاً شلون حرجتني وهي تستفهم هنا بغيض كتلها 

: وانتِ شعليج..

لملمت ماجدة.. روحها وكامت وهي تمشي كوه ايدها على عينها و ساندتها طالبة من بنات الكلية التفتت على بنت عمي.. 

: البينا انتهى لا تدخلي بحياتي 

: هاي مغرورة من وجهها بس تستاهل لأن الخبيثون للخبيثات هسه عرفت سبب فسخت الخطبة.. 

كالتها ودارت دخلت لكليتها الطلاب الي تعاركوا دزوا عليهم لشؤون الطلبة أما ماجدة.. ما اشتكت من كتلها 

: امشي العن والديهم الج خلي اخذج تشتكين.. 

محجت عافتني واستندت على البنات لزمنها ومشت تخوصرت متفشل منا جماعتي بله هاي شلون تفشل بيه

اوف تكسر الخاطر النوب عينها ورمت اروح وراها و الله كريم ركضت لماجدة.. و البنات الاخذنها يغسلنها 

: خوما عينج انعمت بله باوعيلي هاي شكد 

آاشرت بيدي رقم اثنين هي مخلية ايدها على عينها الورمت و بتك عين تباوعلي بخزره.. 

: روح منا ما تتوب مني لمن اخلي بابا يسحلك.. 

ظليت واكف احك بخدي افكر بعينها وهي شوف لسانها درت وجهي صوب جماعتي السمعوها ترزلني و أصوات ضحكهم حيل أستهضمت من ضحكوا ويتصايحون هيييي بووووري بعصبيه كتلها

: حرامات والله ضربت الضربج و هسه اكيد العمادة تدز عليه اي والله حرامات البوكسي اجه بعينج 

لو ضاربج بوكسين واحد بخشمج اليابس كون ينكسر و الثاني بحلكج و تنكسر سنونج و تصيرين ثرمة و بدل ما تهدديني بأبوج و تكليلي يسحلك تنطقيها يثحلك.. 

انطيتها ابتسامة كابتن ماجد الجانبيه رغم طالب جامعي بس منو ميتابع كارتون الكابتن ماجد جماعتي يضحكون رحتلهم اشاقيهم بضربات كذابية 

ظلت واكفه بتك العين والثانية مغطيتها بيدها و هي تتابعني بصدمه من ردي عليها حاجت صاحباتها

: اروح للبيت اضرب المحاضرات مكدر بعد اداوم 

: نوصلج..  

: لا اركب باص 18 راكب تمر على طريق شارعنا.. 

تركت صاحباتها و اني أنقهرت راحت عين البت من ورى ذول تلفتت على صاحبي 

: شفتوا هذا المطي زين ما عماها والله جان سويته اعور بنت بحالها تنضرب بوكسي يله اني اضرب الدوام اروح وراها خاف توكع و محد يسندها.. 

ضحكوا : وانت تسندها خوش دروب عوفها هاي معقدة و نحسة و مغرورة ما توكع.. 

أحتديت وياهم 

: منو كلكم أريد أوكعها؟ وهي مو مغرورة لأن ما تسلم على الولد ولا تحاجيهم تعتبروها معقدة ومغرورة ليش متكولون مؤدبة خجولة؟ 

أصدقائي: 

١- مممم 

٢- مممم

٣- مممم

ثلاثتهم ظلوا يمومون اباوعها تمشي ابتعدت تلفتت على ربعي 

: شجرالكم تمومون جنكم عتاوي يله استنسخولي المحاضرات الي تفوتني ياريت نسختين الي و للقلب.. 

رد ناصر 

: سهلة من ماي عيني بس ادفع.. 

ضحكت : ما بينا اي فلوس ولكم احنا ديره وحدة 

و اني التفت ابتعدت كلش آشرت للربع 

: يله أروح... 

وركضت الحگها خليت مسافة بينا طلعت من الجامعة و عبرت السايدين تريد تلحك سيارة باص كوستر واكفه 

صعدت و اني وراها اكو مكان فارغ بخانه الشواذي يله عادي شواذي نصير اني وياج يرويحة مجودي خوش ادلع روحي

ردت اضحك على فطاريتي كعدت يم الجامه وهي ممركزة كل همها عينها و احسها دتبجي بس دون صوت قهرتني والله كعدت بصفها وخليت اللفكس بحضني..

: تطيب لا توسوسي فد اسبوع الى اسبوعين وتطيب هاج هذا بطل مي بارد ماكو ثلج اشتريته من الكشك عالسريع خلي على عينج حتى لا تؤرم اكثر 

فرحت ما رزلتني وطاعتني اخذت البطل لعد شكد متوجعة محبوبتي رديت اهون عليها 

: انتِ بس لا تفكرين بيها وتمر ايام وتطيب سألي مجرب و لا تسألي حكيم بوياي شكد ماكل بوكسيات.. 

باوعتلها صفح ابتسمت رغم وجهها مبلل دموع.. 

: سودة بوجه بيت مزيعل يرحون فدوة لكل دمعه ألم نزلت من عينج..

تلفتت علي : وذول منو؟ 

فرحت حجت وياي مثل الاوادم يارب يومية دز واحد يضربها بوكسي و اواسيها وتحن تحاجيني.. 

: يمعودة ذول عيال خواتي غير حظي الاغبر ابوي انطاهن لبيت مزيعل بوياي بوياي شابعيهن ضيم و خطبوا بعد خواتي البقن بس منطيناهم ممتوازين والله.. 

ردت بأحراج : واني شكو تحجيلي 

: ومنو سألني عن بيت مزيعل امي اجت سألتني ؟ 

ضحكت من اروح فدوة للضحكه ويلاه ويلاه مو ضحكة ضيم كناري يقوقي و يعزف الحان مكدرت ما اتغزل بهاي الضحكة.. 

: مو ضحكة ضيم ولكم كناري يقوقي.. 

ضحكت 

: قصدك يغرد دتحاول تضحكني معقولة متعرف الكناري يغرد والدجاج يقاقي

رديت استغبي 

: اول مرة اعرف منج زين طيور الحب اكيد تغني مواويل

ردت تضحك

: شنو هن حاتم العراقي هم يغردن عندي طيور حب ثنين.. 

همست المح

: مثلنا اكيد طيرين مو عالغصن و بالقفص لا كاعدين بخانة شواذي الكوستر ماكو أحلى من هيج كعدة ودنغرد سوالف.. 

ردت : نعم؟! 

رديت تلاحك روحي هاي عصبت 

: الأمثلة تضرب و لا تقاس يا روحي

: شو انت رجعت ادبسز شنو روحك؟

اكوم انزل هاي اني وصلت بيتنه

: اعصابج عيني تفضلي نزلي الكروة مدفوعه.. 

 

صاحت نازل و بده يركن السيارة 

: ترى اني دفعت كروتي وكروتك وانت ممنتبه ملتهي تگرگ هواي و تهذر حجي ادري تبعتني متقصد.. 

عصبت بنية تدفعلي الكروة واني صرت بحال المغلس شو منتبهت من عبرت الكروة اني كلت أدفع 

: عيب تدفعيلي و ني زلمه حوك 

طلعت كروتي وكروتها خليتهن بيدها والسيارة وكفت فاتت من يمي وهمست

: يطبك مرض..  

عصبت و نزلت وما تحملت نزلت وراها امشي بعيد عنها ما مشيت بصفها لحد يلمحني وياها من منطقتهم

: يطبني مرض انعم الله عليج واني عملت بنخوتي و اجيت اوصلج لا تتخربطي بالطريق تتمنيلي المرض 

وترى اشتغل لا تكولين ما عنده فلوس يرجع بيهن وشايل كد كراويه لا الحمد لله الله رازقني و مستحيل اخلي بنية تشيل كروتي و كروتها و اني اجيت حتى احميها.. 

التفتت : من منو تحميني بله دروح شكد تهذر حجي و تسولف هواي.. 

دخلت بيتهم و اني رجعت لبيتنا منطقتهم شوي عن منطقتنا مسافه فدكيتها مشي صدك يطبني طوب اخ من گلبك ماجد.. 

بس وصلت البيت تعبان الولد الوحيد لعائلة منكوبة بداية التسعينات يعني اني المدلل بس وصلت تلكاني فيلق خواتي زعلانات و يبجن.. 

: من انعل ابو بيت مزيعل شبيجن ولجن؟ 

: كتلونه و طردونه.. 

ابوي رجال جبير و تعبان شفته مهموم

: ها بوية.. 

: بوية اسكت يردون يطلجوهن متهمين استبرق بايكة ذهب عمتها

: لا والله و اختي تصدك تبوك اصلاً هاي عمتها مال نعال بحلكها السحارة.. 

طلعت اريد اهد عليهم لزمني

: وين رايح بوية وانت وحيدنا ننتظر عمامي و نشوف.. 

اجت المدللة رحمة.. هاي بنتي مو اختي رحمتي الحلوة لزمتني.. 

: لا تعصب خوية بالهدوء كل شي ينحل تعصب وتتمرض هسه وربك بس يجون صاحن نريد زلمنا ذن خواتك مو أمان وتهادد وراهن تتفشل..

استغفرت الله شو لليل اجو بيت مزيعل طاحوا علينا و انتم الزينين ولد الزينين ولكت ذهبها طلعت بتها ماخذته استعارة ومكايله لأمها الله يعلم يجوز كشفوا بتها باكت و غطوا السالفة لذا اجو يتعذرون يردون يردون جناينهم بناتنا... 

: والله لأنعل ابوكم لأبو العرفنا بيكم يله برى و نتقابل بالمحكمة تطلكون

اني النادر ردت عود اطلكهن اخلصهن من هيج بيئة شو طبن يمنا عالزلم يدكن يلطمت خوية لا تهجم بيوتنا خوية نرد وي زلمنا ونريد زلمنا و خلن ومشن وياهم و عافني وجهي الفاهي 

: من نعلا على سلفاي اذا فازعتلجن بعد صوجي والله يطبجن موت تجن زعلانات بعد الا اني اطردجن شلون فشلني 

امي هم غلطت عليهن خلنا وجه الفاهيه ترخصوا عمامي ويهزون ايدهم وترزلنا من وراهن 

اني وابوي شكلك مكادرين لبناتهم شلون طبن مجلس زلم وكعدة و حجي دنك ابوي لا حول ولا قوة الا بالله واني ذبيت حجاية شكبرها عليهن 

: لأنهن ببساطه......... 

امي رزلتني 

: أنجب وتأدب 

: ابوي وعمامي رزلوني انجب ما انجب المهم شبعت غلط منهم و تركتهم ورحت لغرفتي رديت احلم بطيفج يا مجودتي

         مــــــــــــــــــــــاجدة

تلكتني أمي

: عزا العزاني صخام شبيها عينج

سولفتلها و بابا سهيل.. سمع 

: لازم اشتكي عليهم همزين ما عموج

رديته بساع

اي و تعتقلوهم ويختفون مثل حسن.. مو؟ 

ضرب الميز حيل و صيح عليه

: يطبج مرض سالفة الما تخلص شكد بررت الج عقل زمال براسج ابقي ابقي

وطلع ظلت امي يمي وهي تستفهم بعدين جابت ثلج ملفوف بقماش وهي تخلي على عيني.. 

وراها بيوم كاعدة بحديقة الآداب محسيت الا واحد وراي.. 

: تردين بزونه؟ بشت.. بشت.. بزونه.. 

ويمد ايده يريد يشمرها بحضني كمزت.. 

: وخر وخر... 

رحت بعيد اباوع بيده هرة صغيرة بس اني تحسس من البزازين واخاف منهن كلش من جنت زغيرة بمخالبها اذتني مد ايده تجاهي..

: هاي لكيتها يم العمادة ما اعرف أمها ماكو ظاله بلايا ام تصيري ام لبزازيني

ما ارتاحيت لكلامه بس سكتت رجع يحجي كأنما وحده.. 

: احتمال امها دتاخذهن و بعد ما اجه دور هاي هسه امها خطية تدور عليها..

رفعت راسي واباوع بزونه سودة وبطنها ابيض بس عيونها كلش خضر فاتح.. 

: خطية تكسر الخاطر ليش عافتها امها هاي ام قاسية.. 

ضحك

: گلبج رهيف هواي قوي گلبج الحياة ما ترحم ضعفاء القلوب.. 

بوزت من كلامه ونفس الوقت دنكت بخجل بعدين رجعت رفعت رأسي هم ذبله حجاية تضوجني ودوم اكول ليش يحجي بهيج طريقة.. 

 

: شعجب داومتي وانتِ تك لايت؟

: نعم..؟! 

آشر على عيني وضحك رديته

: ماكو شي يضحك و ما قبلت امي اغيب.. 

: عفية امج كلشي وكلتي متقبل ماما.. 

لبست نضارتي شمسية و كال 

: نضارتج شكبرها جنها مال غواص النوب الإطار ابيض منسقته بلون الحذاء.. 

يضحك كلش مستفز غيرت الموضوع واني اباوع للهر

: حيوان خطية.. 

اول صفن بحجايتي و رجع رأسه لورى وضحك من كل گلبه 

: عبالي دتشتميني تكولين عليه حيوان بس من كلتي خطية وصلت الفكرة الصحيحة.. 

بگلبي كلت شو بس يضحك شنو بله اليضحك لا يالفطير احاجي من بعيد كلش اخاف من البزازين

: شوفي عيونها صفر مثل عيونج بسبس ميو طبعاً عدا عينج المورمة لونها صاير خابط.. 

و آشر بالبزونه صوبي مثل اليريد يشمرها عليه يخوفني وهو يتمضحك رجعت ورى ضحك و كمل.. 

: يا ام عيون بزونية.. 

بس هو لفظ يا ام هيج كرر كلماته وهو صافن بعيوني 

: يكرم الله عيونج ذن اشك بيهن استيراد صفارهن يميل لحجر الكهرمان يله غلست عالعين المورمة..

جان ماجد.. بي طابع نكته مدري تفاهة ضحكت على استيراد ونفس الوقت مكدرت اسيطر على خجلي حسيت خدودي احتركن.. 

: يا بوية شلون ضحكة طكيني بعد ضحكة بثواب موتاج.. 

مكدرت اسكت من الضحك شنو هذا شو بس يصنف مشيت وهو خلا البزون يم رقبته يلاعبها وهي تبجي على امها من صوتها مبينه تفتقد امها كسرت خاطري.. 

شوي شوي المسافة البعيدة بينا قلت بس بقيت حدود وهم خفت لا البزونه تطفر عليه.. 

: وين راح توديها 

جان يلاعبها وهو يقلد ينونو ميو  

: هسه ارجعج مكانج تجي امج تاخذج اشش يا حلوة لا تبجي اسميك جيجي ولو انت ذكر بس يله اسميك على الي بگلبي.. 

مدري ليش توترت بس منو جيجي و اني شعليه رجع ضحك وكال

: شنو جايه وياي للعمادة نرجع البزون لأمها شو ماخذج الواهس تماشينااني وبزون ماجي.. 

هنا صحت.. 

: ها نسيت جاي اروح للزراعة و اجيت منا بالغلط بس شو سميتها ماجي مو على اساس أسمها جيجي 

وكف ووكفت بصفه بينا مسافة متر و عيني على أيده لا تطفر عليه ماجي.. 

: الي احبها هم ادلعها ماجي و هم جيجي بس ااخ هامله مشاعري وثولة ولا تحس تلميحاتي مدري غباء مدري ثول مدري عدها فطارية و براءة بس بعد القلب يهوى الثولان.. 

دنك وحط البزون بمكانها و التفت الي واني صافنة مصدومة هذا ديصارحني عود لو شنو همس.. 

: عيونج عيون غزلان سبني جيجي يا عين المها ورموشج سعف نخله برحي.

وسعت عيوني يعني شنو قصده يوصلي يحبني النوب شبي لساني نربط لا اكدر ارزله ولا أضربه على جرأته يا شبي گلبي وجعني وهو نبضه احس بأذني صار.. 

جر نفس 

: فهمتي لو ارسم خارطة قلبي و اكتب بنصه اسمج و اكلج لازم تعرفين مقياس رسم گليبي حتى تعرفين شكثر مساحة حبج هنا.. 

آشر على گلبه و كمل 

: أنتظر الرد.. 

وركض بعيد ظليت بمكاني مصدومه يعني شنو يحبني زين وماما وتحذيراتها لا تصدكين الحب كذب جربته قبل و فشلت بس اني ممجربة الحب و لا أعرف شنو هو

سؤدد.. و مريم.. يعرفنا طول عمري حياة عادية وكل همي ابوية الحرموه مني

ما اعرف شلون كملت المحاضرات وعيونه كلما يرفعها من الستيج تجي بعيني يبتسم خلصت المحاضرة كمت اريد اطلع سمعت بسامير جماعته

: ولك ماجد.. وجه البنيه ظل يذب الوان.. 

عضيت شفتي بخجل و رفعت رأسي شفته يمسح وجهه بجفيته و صاير احمر منحرج من بسامير جماعته صاح بيهم

: كافي يله نروح.. 

اخذهم و طلع ورجع التفتلي 

: انتظر الجواب منج ورى يومين

اما جسمي حالة من حال ورقة خريف هزتها عاصفة محتاجة سؤدد.. 

و سؤدد.. تتجنبني بدون سبب مقنع تحاسبني على شي مالي ذنب بي حي الله هو زوج امي.. 

اكثر من مرة اواجهه يعصب وينكر ويرجع يكول خلاص تركيها علامة صارت عليهم علامة اكس بعد ما ينفع تتواصلين وياهم احتمال مراقبين و انتِ من عائلة بعثية لا تجيبين النا الشبهه.. 

يحجي كلماته بكل هدوء وهو يطلع تاركني بحيرتي.. 

          ســــــــــــــــــــــــــؤدد

رغم الحزن بقيت إجتماعية محبوبة من الطلاب والطالبات 

كالعادة يجي حازم تذكرونه لو لا؟ اذكركم بي الولد الي اخذني للطبابة طبعاً لطش و صارحني

بس من كتلة متزوجة خلا علاقته بيه مجرد سلام ما حجيت عن زوجي والصارله ولا هو سأل ليش ما يوم شفنا زوجج يجيج او يوصلج و ليش لبسج اسود.. 

لو يدرون راح تصير سنتين و اني بهذا اللبس و جوابي على خوالي و هم ابرر احب لون الاسود.. 

باوعت لأصبع الزواج صافنه بحلقتي الي رجعت البسها حتى امنع الشباب تطلب ودي خليتها باليسرى بلكت فال حلو ويطلع حسن.. 

دنكت اني اشرب العصير كدامي لفة اشتريتها من الكافتريا ما اكلتها شوي اجت مريم.. وصاحباتها رحاب... و شمس.. كعدن يمي 

: هلااااو

كعدت مريم.. و بطنها لخشمها ابتسمت يمكن جان اني هم حامل لو والدة ويسموني ام علي لأن حسن.. دوم يكنوه ابو علي ذبيت حسرة ورجعت كتلها

: انتِ يمتى تولدين..؟ 

خلت ايدها على بطنها

: الخبيث ابن الخبيث ينتظر امتحانات ويجي شلون حتى أاجل الامتحان بعد أبوه منو.. 

ضحكت علاقتي بمريم.. رجعت مثل قبل عذرت موقفها حقهم أهلها الوادم تخاف عاذرتهم 

بس ماجدة.. ما كدرت اتقبلها بقيت وياها باردة بالتعامل رغم تجي هي هم من تصدف ريست عدها مثلنا و ننجمع احياناً كلنا.. 

قوت علاقتي برحاب.. و شمس.. كلش طبعي الاجتماعي اله دور شوي طلت علينا بنت الشمال شيلان.. كعدت وهي مصفنه

: شكو

: اشتاقيت لماما و بابا احس بغربه

وظلت تبجي على أهلها خلت مريم.. ايدها على جتف بنت خالتها

: لا تبجين هي سنه تكضي و انقلي

: ما اعرف والله تعلقت بيكم ومحتارة أفاركم بس امي شلون بيها

غمزت مريم.. 

: امها هههه ولجن هاي تحب ربيب عمها ميته عليه والله لا امها لا بطيخ هاي مشتاقه للحب.. 

طلعت شيلان.. صورة من جنطتها وذبت حسرة كلنا مدينا روسنا نشوف الشاب الطويل بالزي الكوردي و يبتسم 

وراه سهول خضراء ذكرتني بكارتون هايدي جبال و سهول مراعي أرض خصبه زاهية الألوان و اليزينها جمال المدعو بروان.. 

 

باوعت شيلان.. و شاكستها

: اكلج هذا يوزعوه بالحصة التموينيه لو لا.. 

ظمت الصورة مصدكه دتحرش بحبها

: بروان.. ملك خاص

غميتها و ضحكت رجعت باوعت لشمس.. ومريم.. علاقتهم صارت مو بس صديقات وصلت الى أخوات فهنا شمس.. حجت على مريم.. التشكي من زوجها 

: لازم متعاركة انتِ و نصير.. لذا تسميه خبيث ترى حباب يموت عليج.. 

ابتسمت وعيونها تلمع

: احسه ابوي مو بس زوجي بعد غيرته مؤذية حيل.. 

ردت رحاب.. 

: ليش هي يا يوم ما تعاركت وكل عرايكها وياه تافهه.. 

غيرت الموضوع لا يتعاركن من شفت مريم.. نططت عيونها باوعت لأيد رحاب.. وعاتبت 

: حلقة ممممم انخطبتي وما عزمتينا

: ولج وين انخطبت ابن خالي رايدني و اخواني ما يقبلون خاصة الجبير طبعاً تطورنا علاقة حب ولبسني الحلقة 

البسها بس من اجي للجامعة يكول أغار احد يخلي عينه عليج و يجي يصارحج ويطلب ودج هاي بيدج تبقى من تجين للجامعة 

طبعاً مكدر البسها بمكان أخواني يتواجدون بي يصير كتلي عمل شعبي

: الله يوفقج وتاخذين رادتج 

كلتها واني اركز بكلاص العصير حسيت دمعتي راح توكع كمت بساع مترخصة

: عندي محاضرة..  

شردت كذب من لا توكع دمعتي أشتاقيت لحسن... شلون بيه حسن.. وينك ارجعلي..

بس اثناء كومتي اجت ماجدة.. حمرة كوة تتنفس تنهت وضعها مبين اكو شي خلت اللفكس وكعدت سدت طريقي 

: هلو بنات..

حاجتها شمس.. 

: الوجه احمر شكو..؟ 

قبل لا تحجي نفخت 

: ماجدة.. عندي محاضرة انطيني طريق افوت 

كامت من القنفة وطلعت جانب طلعت وترخصت و اني امشي بساع كل السمعته رحاب.. تسأل ماجدة.. 

: من يوم العرفناكم انتي و سؤدد.. بينكم برود ليـ.... 

اختفى الصوت ببتعادي رحت بساع امشي ما اعرف لوين تأخذني رجلي امشي واني مختنكة مكدر أطلع النفس 

ايدي على گلبي و ذكريات حسن.. ملازمتني لزمت أية الكرسي الهداها الي وسوالفة ضحكته شقاه تفاهمه ووجه من يعبس لأن أقلد اللكنه بلهجته الريفية ويردني.. 

: الثقافة موش بالحجي يا حشاي گليبي.. 

ويرد يحجي مدينة

: ترى انه اعرفن والله تعلمت احجي مثلكم

أضحا واكوله 

: اعرف نكول مو اعرفن.. 

: كلج كلام يا روح حسن.. 

نزلت دمعتي واني اشوف نفسي نهاية الجامعة مكان متصحر وشارع بعيد عن الجامعة قريب من سياج الخلفي للجامعة هنا صحت.. 

حسن.. تسمعني هم عايش وتشم الهوى هم تأكل لو مجوعيك يعذبونك لو مداريك هم تكتبلي اشعارك الريفية

هم تذكرني يا حبيبي لو نسيت حسن.. اني منتظرتك ما آيست رجعتك.. 

كمبصت ابجي ومر بيه كبل عشاك بيد بأيد وكفوا شوي البنية سألتني 

: بيج شي..؟ متخربطة اوديج للطبابة

كمت و اني امسح دموعي

: البيه ما يعالجه طبيب بس الله يرحمني و يردلياه

حجيتها وعفتهم و اني اعدل شعري و ارجع اخلي ضفيرتي جانب شعري طال كلش مو تحب الشعر الطويل شوف طولته الك بس ارجع 

         

   مــــــــــــــــــــريم 

ترخصت من البنات و طلعت لأن ماخذة رخصة على المحاضرات البقن اباوع لساعتي نصير.. يمر عليه علمود مراجعه طبيبتي لأن الحمل تأخر هواي 

ظليت كاعدة بالحديقة شوي صوت تعبان يحاجيني.. 

: صارلي شكد ما شايفج بوياااي عيوني هسه انملت شوف منج وما شبعت سؤدد.. كلتلج؟ دزيتلج سلام بأول يوم داومتي جامعة 

رفعت راسي و شفته توترت بس لا يجي نصير.. عزا العزاني بساع وكفت ورديته.. 

: طبعاً مكالتلي وهذا أفضل  

و هو كال

: هيج صارت شوفتج بحساب وكتاب اوف ولج ميت تعبان أحاول اعيش اقشمر بحالي ولج اني عون.. الي صرتي عليه انتِ والزمن طاعون شلونج مرتاحه اجيت أطمئن على رباي الغدرني.. 

باوع لبطني و ذب حسرة.. 

: شلون معيشج كدرتي تعيشين احلامج دوني.. 

سكتت مدنكة كالوا اتعين معلم بالنهار يداوم عادي كأي معلم بس بالليل يشرب ويعربد و ملتهي وي ربعه الي التموا عليه و هم ناس بطالة 

ما اعرف بس هيج نصير.. يسولفلي من ربعه بالسوك يوصلون أخبار عون.. لنصير.. يريد يكرهني بي مدري صدك.. 

: عون.. روح نصير.. على جيه وميقبل التقي بيك روح لا تهجم بيتي.. 

ضحك يستهزأ

: لا اهجم بيتج و تخسرين جيبة شلونها فلوسه مونستج مو بعتيني يا مريم.. وسفه 

المهم شفتج تطمنت حلمت بيج حلم مو زين و خفت عليج فكلت اشوفج بالجامعة أطمن بس واعوفج هسه تطمنت يله أروح امنتج عند الله الذي لا تضيع عنده الودائع..

كالها وجاي يروح بس صياح نصير.. والفضيحة من لزم عون.. بوكسيات وذاك ما سكت طلع قهرته بي ظليت أتوسل 

: نصير.. عوفه ولك عون.. راح تموت رجلي راح.. 

طلاب تدخلت تباعد بينهم و من بعيد أمن الجامعة اجو لزمتني شمس.. لا اوكع كل شوي وعون.. صاح

: انعل والديك اخذتها مني اناني وانتِ لأن فقير عفتيني ولك متحبك باعتني علمود جيوبك شلون اسامح خطأج والله لأجتثج من بين ضلوعي بس أخ ما اكدر

الأمن لزموهم وهو ما بطل حجي وعتاب وفضحني بالجامعة ابو العرك..

 مــــــــــــــــــــــــاجدة

مريت يم الكلية الي اكلت بوكسي من طالب اشوف هوسه وتجمهر والأمن سحلوا الطالب الي ضربني بوكسي دون قصد.. 

خليت ايدي على حلكي ونزلت دموعي سواها سهيل.. اباوعله يبجي و يتوسل 

: سيدي والله ممسوي شي بس كلولي ليش تأخذوني.. 

يشتمون بي و يضربوه رجليه مشيت صوبهم واني اريد احاجيهم بس انجريت من ايدي وحسيت أحد يسحبني لبعيد..... 

الفصل الخامس عشر من هنا