رواية عيون المها الفصل الخامس عشر بقلم ظل الياسمين
الانسان يرث الكرامه بالفطره
والاهانه يصنعها بنفسه.
اجه عمو ابو حازم وبشرني
_ عمو مها طلع اسمج تعالي باجر اروح للمدير ونشوف الاجراءات
_صار عمو تعبتك
_انتي بنيتي تستاهلين كل خير وانشالله التوفيق
طبيت ابجي وسجدت لله الف الحمدلله
بس كون الله تكمل على خير وسلامة
ثاني يوم استحيت اطلب ملابس من بيت ام صلاح رحت لبيت ام علي شافتني بشره اخت امجد سلمت من وره خشمهه
_اشلونج مها وين ما وين
_الحمد لله بهاي الدنيه الحجيه اشلونهه شلون صارت انشالله بخير
اشو هاي صارت عصبيه وكامت اصيح
_انتي جاي تشمتين ما تستحين عيب عليج تسالين على امي شنو من بشر انتي
وخلت وراحت
استغفرت وضجت كلش
طلعت ام علي وسوالفت الهه الموقف كالت_ خل تولي فوك ما تسالين عليهن
المهم دخلي مهاوي حبيبه
_لا والله مستعجله اريد اروح بس اريد من عذيره جبه وحجاب فدوه
_ها ولج شعدج ادورين لبس
_والله شكلج ام علاوي بلكي الحظ يعدل وصدك اصير واوزع ثواب لاهل البيت عليهم السلام
_ههه بس كون قسمه زينه
_لا وداعتج مو قسمه بس شغله من اصير اكلج
راحت جابت ملابس واجت رحت لعمو ابو حازم ركض اول مشافني ضحك
_ههه مهاوي تدرين انتي بخيته هسه جان واحد من المصرف يمي وحجيتله وكال تعالو عليه ندخل سوه للمدير علمود المقابله
رحنه صدك للولد اسمه ابراهيم لابس قاط ومرتب وكاعد على ميز بس شافنه اجه يركض وسلم على عمو ودخلنه على المدير والمدير ما قصر طلب جاي ورحب بينه وكعد يسولفون واني مثل الاطرش بزفه ساله المدير
_بتك خريجه شنو
_خريجه اعداديه وتقبل بكل درجه وظيفيه
_بس لازم موافقه من الامن لان احنه دائره بيهه دواعي امنيه وشغلنه خطر
بيه مسؤولية
_اكيد طبعا اي اجراء تسوه احنه حاضرين
حجاهه وهو مرتبك وخايف
_المدير /خلص اعتبرهه مقبوله وباجر تجي تقابل
طلعنه بس عمو ابو حازم متوتر بس عبرنه الشارع كال
_عمو مها خل تولي الشغله تره بيهه اذيه عليج
اختنكت وكتله عمو الله يخليك خل نمشي بيهه واذ على الموافقه اكيد عدك عرف
_ههه ولج منيلي عرف بلامن بس مثل ما كلتي خليهه على الله
رجعت تعبانه وجوعانه اكلت ونمت للعصر اسمع هوسه وصايح بشارع مديت راسي وصحت لجهال _شكو منين هذا الصايح
_ام عبد توفت
_الى رحمة الله انا لله وانا اليه راجعون
_اشوكت ولك
_استوهه توفت وجابوهه
لبست عبايتي وطلعت اركض تلاكيت ويه ام علي ورحنه وتكابلنه وياهن وكمنه نلطم واني اهوس وهنا يلطمن
كعدن وكمت انعه وكلهه تبجي واخر شي بته كالت لزمي الفاتحه
اعتذرت وكمت اريد نطلع واجت وحده سمينه وسمره وتاشر عليه كالت
_شعدج جايه
جاوبتهه ام علي يا ستار ياربي غير جيران وهذا واجب
دفعت ايد ام علي وجرتني بعد لا تجين اطلعي بره
التمت النسوان على صوتهه وكلهه تسال شكو
درت وجهي لام علي/منو هاي
كالت مرت امجد
_صدك عود
_عود جابهه تخدم امه بزعت المره من المشاكل وماتت المسكينه
بس عيب تطردنه الا اكل لرجلهه لو لحماهه الجبير وخلي بعد تحجي وياج
_يمعوده خلي تولي قابل عليهه الوسفه
ثاني يوم رحت فرحانه للمقابله وبقيت اخر وحده كالو خريج الاعداديه بلاخير
وفعلا قبولني رجعت فرحانه بس مشكلتي الملابس اشلون
خوماضل لازكه بملابس عذيره عدي خمسه ورحت لام صلاح
_خاله فدوه اريد عشره اشتري ملابس 😓
_ولج شلج بيهن ما عدي هسه خليهه بلكي الولد يشتغلون وانطيج
_ها مو قدمت على تعين ولازم باجر اروح
_راح انطيج من ملابس زويزه ودبري امرج بيهن
رحت ثاني يوم وباشرت وامشي بفرح ومريت على عمو ابو حازم
_عمو مهاوي ديربالج على نفسج انتي ما تتوصين بس الدنيه تخوف كوني حذره ولا اجاملين اسمعي ولا تحجين
_صار عمو
رحت اركض وانطوني فحص وكتب اكملهه ورحت مشي تكطعت رجليهه وكملت كلشي
رجعت للبيت هلكانه وملابس عذيره صايرات تراب وصلت للباب واسمع صوت امجد
_مها منو البارحه طارج من الفاتحه
كلبي ❤️ كام يدك سريع صار هواي ما شايفته ومتغير كلش هواي كبران وضعفان جاوبت
_منو كلك ام علي ما صار شي ومرتك معذوره دخلت وسديت الباب بوجهه
اسمعه من وره الباب يتحلف بيهه
_خل تخلص الفاتحه والله كريم
كل ما املك بس عشر الف اشلون ادبرهه لازم اكعد ابيع الصبح واطلع لدوام باجر كمت نضفت وغسلت ملابسي وعجنت سويت خبز 🍞 بزيت وخليت شكر وكعدت اكل
اشويه واندكت الباب اجت ام صلاح
_وينج مهاوي ولج صارلج يومين ماكو
_خاله مو كتلج اركض بلمعامله واستوني اجيت
_اكلج اشو النسوان تسولف بمرت امجد صدك طاردتج
سولفتله وكتلهه اجه امجد واعتذر وما صار شي اني لو عدي اهل ما تجراء عليه بس شسوي للحظ الخله اليسوه والمايسوه يهين ويطعن وكعدت ابجي
_يا بعد روحي يمه مهاوي لا تبجين تروحلج فدوه المطلكه العايبه الخذته بسحوره الله لا يوفقهه ولا يهنيه
_ضحكت كمت سويتلهه جاي وخبز دهن
وكعدنه ناكل وهيه تسولف على ايامهه واهل كبل
ثاني يوم رحت لدائره واطيتهم المعامله كالو بقت بس الموافقه الامنيه اطوني كتاب واجه صاحب عمو ابراهيم
_اشلونج خيتي سلميلي على ابو حازم
كليله خل يروح للفرع مال الحزب بفلان مكان يجيب موافقه
_مشكور رحملله والديك
اخذت الكتاب واني ميته قهر اشلون اذ طلعو ابوي معدوم وجدي محد يعرفله مكان اشلون يربي 😭
كمت الطريق كله ادعي واسبح الا ان وصلت لعمو
_ها بويه مها ليش تبجين شجاك بس تبجين تفائلي بلخير
_عمو انطوني كتاب موافقه امنيه وانته تعرف اشلون دبرني
اخذ الكتاب مني وضل صافن كال اني ادبرهه لا تهمين دار وجهه وكال كلي لرجل عمتج يسويه
_صدك عمو تحجي لو حياتي يمهم ما اكلهم ذولي ناس مجرمين يلزمونه عليه وليه واني يا مستوره انستري كمت ابجي مره ثانيه
_كافيج بويه والله تدبر بس اطيني مجال
مها وين كتاب الجبتيه من الفرع بيه دواعي امنيه
_ها بلبيت شتريد منه
_باجر جيبيه واني اكلج بعدين
رجعت دايخه بزماني ومالي واهس للكلشي اعرف حضي ما فرحت بشي وكمل كبل نمت
كعدت بليل تعبانه كمت توضيت وصليت وكمت انضف واعجن واغسل ملابس
رحت طلعت الكتاب وقريته طبكته وخليته بجنطه
واسمع عماد وخيريه يتصايحون
_كافي عماد لهنا وكافي اكل لاهلك وافضحك والله
البنيه تكول انته جبرتهه وهسه البت تريد تموت لو تزوجهه لو تشوفله حل
_خاب تولي تهدديني اوكلج خرررررر
انتي وياهه هيه وحده ملطلطه بسرعه انجرفت بس كتلهه اخطبج اجت تركض وهسه تريد اصير مره براسي
الا اشبعهه نعل وانعل ابو اليطلع وراهه
دخيلك يا علي شنو ذول ناس ما عدهه مخافه الله اكيد البنيه غلطانه وياه اشلون وما يقبل يستر عليهه
شكد نذل وما يخاف الله كمت ارجف اكول صارله مده مختفي
كعدت على المصلايه وكمت ادعي واسبح بس كون الله يستر عليه
كعدت الصبح من وكت وخبزت وبعت الحمد لله حصلت الله قاسمه رحت ركض لعمو انطيته الكتاب ورجعت كال
_عمو مها اهم شي ما تحجين ابددد راح ازورلج كتاب موافقه واوديه لصاحبي واخليج اداومين غصبن عنهم
_عمو اشلون اذ كشفونه
_كولي يلله محد يكشفنه لازم اندبرهه نخليه بضرف وننطيه لابراهيم يخليه بلبريد كانه جاي من الفرع الحزب
_عمو اني خايفه
_لعد بطلي وكعدي اني جاي اسعه لاجلج ولوما اشوفج مظلومه ما اسويهه واورط روحي
صدك عمو سوه الكتاب وانطاه لابراهيم
رجع كالي اسبوع واداومين
اشكرت منه وسويت ثواب لام البنين والزهره عليهن السلام
كمت اوزع بصينيه تمن ومركه لكل بيت صينيه وشايله الصينيه ولابسه العبايه لاكاني عماد وجه لوجه درت وجهي اريد اروح صاح مها/شنو هذا
_ثواب جاي انطي لجوارين كم بيت
_واحنه مالنه حصه
نزلت الصينيه وانطيته اله كتله اخذهه
ضحك كال تره اشاقه وياج دك الباب طلعو الجهال اخذ الصينيه مني وهو مركز بيه واني اخاف منه وكلساع ادور وجهي كال شنو المناسبه كتله حصلت تعين
_اي يا الله خوش خبر وين
_بفلان دائره وما اعرف شنو اشتغل
_ههه عفيه عليج سباعيه تعالي دخلي
_لا لا اروح عود دزو الماعين بيد الجهال مع السلامه
طفرت واني خايفه منه اشلون يربي هذا عده اسوالف مكسره وكلما يشوفني يصيحني وين اطي وجهي
رجعت بس من اذكر حجيه ويه عمتي خيريه ارعب واتخيله وحش
مديت المصلايه وكمت ابجي وادعي اللهي استرني بسترك اللهي بجاه الحسين عليه السلام جفيني شر كلمن بيه شر
الا ان غفيت كعدت على دكه الباب
منو/اني عماد
_دخيلك يا علي شكو من الصبح
_من وره الباب نحجي افتحي خلي انطيج الماعون وجيبلي خبز 🍞
_خويه بعدني ما خابزه اشوي بعد تعال
_ها يعني ما تفتحين الباب
فتحته لكيته يضحك ولازم اليده مال الباب
_اخذت الماعين منه وهو يضحك بخبث
عفست وجهي كتله ليش تضحك
_انتي خايفه مني
_لا لويش اخاف ماكو داعي للخوف بس جيتك من الصبح مو وارده واذ تريد خبز اشوي بعد اني ادك الباب وانطيكم
شافني جديه خله وراح روحه الراحو
كمت اخبز وابيع وتعمدت ابيع كل الخبز وما اخليله ورحت لسوك اسوكت واجبت الوجبه بطريقي رجعت ميته من التعب
امشي وشايله علاليك كومه
شافني عماد واجه عليه من بعيد تلكاني كال اوصلج
_خويه مشكور هسه اشوف الجهال يوصلوني اخذ العلاكه نترت ايده كتله مو كلنه ماكو داعي تزحم نفسك
فشل خله وراح
يربي هذا اشلون طلابه وياه كلما اطرده يجلب اكثر دار عليه ومخليني بعقله
بديت اداوم واشتريت جبه مرتبه اداينت فلوسهه من ام صلاح عشره وام علي عشره
وجبت حذاء وحجاب لونه فستقي وحلو كلش واخذت عبايه مال ام علي اداوم بيهه
صارت العالم بهاي الفتره كلش ملتزمه بلحجاب كالو اكو سيد طالع بنجف يحث الشباب على الالتزام والصلاه والحكومه كلش خايفين منه ناس تذمه وناس تحمد بيه والوضع يخوف كلمن يكول شكل
المهم داومت والفرحه ما سايعتني اول يوم كالو اجه كتاب المباشره وعنوانج اقل من كاتب يابه ليش
مواني خريجه اعداديه خلوني امين مخزن وارتب ضباير وهم بيه مسؤليه
داومت اسبوع واحس بتعب متقيده من الصبح لضهر ارجع هلكانه ذبو عليه شغل اضافي
فد يوم كاعده على الميز واسجل وافتح حسابات وما اشوف الا عماد يصيحني من الكاونتر انحرجت كدام الكل وهو طويل ولابس ملابس انيقه
استغفرت وكمت اريد ادخل المخزن صاح مره ثانيه مها تعالي
كمت ارجف من القهر رحت يمه
_تفضل رايد شي
_شبيج هاي عدي صك صرفيه الي
_واني شنو اخذته بنتر وانطيته للبنيه الكاعده بلكاونتر ورجعت الكل انتبه
خلصت دوام وطلعت وما احس الا واحد جرني من عبايتي
_تعالي صعدي اوصلج للبيت
نترت ايده قوي لا تلزمني لا اكسرهه ليدك
_انته شتريد مني حجيته بعصييه
_هههه جان غيرج اقوه واشطر وبعدين صارت جوه ايدي مثل الطير المذبوح
دفعته حيل ورحت اركض للكراج
كمت الهث صعدت بسياره درت وجهي لجامه وكمت ابجي بحركه
