رواية خطايا واجتثاث الفصل السابع عشر بقلم نور البصري
وظل گلبي بأمل ترجع والاكيك
وكلت خله بأمل ما أحجي خله
محضرتلك لحن ما سامعه العود
مثل الريح تعزف على الگذله
ـــــــــــــــــــــــــ♡ــــــــــــــــــــــــــــ
: حسـن....
صحت بأسمه جان مدنك حاضن أمي ضام وجهه على متنها و ينحب يبجي ويدور بيها مرة ظهره عليه مرة ظهر أمي عليه لمن أستقر ظهر أمي عليه
كمت تماسكت وأني أركضله أمي بنصنا صارت وأيدي حضنته هو و أمي
البنص
جنه حس بلمستي وأني أنطق أسمه عالنص حســ... بس رفع وجهه الي وخرت أيدي بساع ورجعت ورى
الهيئة نفس حسن.. بس الوجه من رفعه مو حسن.. أثر خيبتي وجع طلعت من حنجرتي وجني رجعت لقبل سنتين لليوم الي أفترقت أيدينا
صرخت
: لاااااا ليش ربي ليش مو هوووه ليش ربييييي ولك حسن.. ردلي ولك والله بعدني زغيرة عالفراك ولك حبيبي ردلي..
كعدت أدك ألطم وانهاريت أثر الصدمه من واحد يشوف شخص يتصور يعرفه بس يطلع غيره هنا حسيت وكعت من أعلى مكان..
ظليت أدك على وجهي أمده حظج سؤدد.. أمده حضج مكرودة سؤدد.. ولك حسن.. ها يا روحي نويت ما تردلي..
الشاب وكف منحرج ميعرف شكو وأمي دنكت تسندني جان خالي جلال.. الوحيد البقالي من خوالي..
: أسم الله يمة أسم الله شبيج ولج يمة مالي حيل أكومج تعال خوية جلال..
أجه وكفني بقى ساندني رفعت راسي اله أتفحص ملامحه جهامته الي أختفت بيها حلم رجعه حسن.. بعتاب احجي..
: ليش مو حسن.. شيصير لو تطلع حسن.. وأفرح وأذب الاسود الغلف حياتي..!
حسيته مدمع مقهور عليه أمي وهو دخلوني للبيت شمرت نفسي عالقنفه بس أشهك لمن حسيت ظاك الهوه عليه أختنكت ظليت أشهك أطلب هوه..
أمي تصرخ : جلال الحكني
أجه بساع وأني أحس الفظ أنفاسي لمن صارت دنيتي ظلمه من وعيت عيني على المغذي وأني بالمستشفى حسره طلعت من صدري أنتبهت أمي واكفة يمي و تمسح على شعري..
: ها يمة شلونج هسه ينظر عويناتي
غمضت عيوني رمشت حيل أمنع دموعي توكع حركتني دموعي چوتني هناك بنص روحي الفاكده حسن!
شكد جسمه و طوله و شمرة شعره هيئته تشبه حسن.. بس وجهه مختلف معقوله بعد ماكو حسن.. بس رجع الامل برحمة الله يرحم بحالنا ويرد الغايب.
: يمة صرت أشوف بكل واحد حسن..
يمكن تخبلت لزمت أية الكرسي حيل بكل قوة صرت بيها التمس حسن.. ذبيت حسرة وأمي كالت..
: خالج جلال.. أجانه يشوفنا تدرين أمه تخاف عليه وموش تقبل يجي..
: حقها يمة تخاف يلحك خوالي..
خالي.. أخو أمي من الاب فقط وهي من العاصمة..
شوي ودخل خالي جلال.. علينا بيده أدويه وأمي أستمرت تسولف..
: اليوم كله هاجس بروحي مثل أنتظر أحد وطلع صكد هاجسي أخوي أجا الي اااخ من أمه مال أتناوشها من زردومها
منعته منا والله كبران ما عرفته يمكن عشر سنين موش مواصلنا ملعونه أمه حتى فاتحه خوانه ما خلته..
جانت أمي فرحانه بي دخل يبتسم وباس راسها
: ما اعوفج خوية بعد كل فترة أمر عليج..
: أمك شلون خلتك تجي..
ضحك : كبرت بعد
سكت ورد يحجي
: كلمن يرد لأهله خوية..
رجع دنك و كال
: من ايام عرفت بأخواني مكالتلي عرفت بالصدفه من مر بينا حسين.. وبات يمنا ليلة حجالي كلشي والله عاتبت أمي وعاركتها و أجيت وي حسين.. أنطاني عنوانج و أجيتكم..
: عبني ظلمتك كلت ما يجينا ثاريها أمك موش تقبل تجينا وما خلتك تحضر عزه خوانك طلعت البرعه موش حاجية أصلاً..
ضحك على كلمه برعه
: على كيفج خوية وي أمي ههههههه تطمني كبرت وما أعوفج بعد كل فترة أمر عليج..
: أي أضحك هم كول جذب أمك موش برعه ولله برعه موش تنكدر جويه..
طلعت من المستشفى و خالي أبتسم يباوعلنا بحنية كعد يم رجلين أمي وباس راسها..
: وأمك؟ شلون خلتك تجيني
ضحك بمرارة
: كبرت بعد محد يكدر يمشيني بمرامه..
سكت شويه وكال وعيونه مغرغرة
بحزن..
: صفيت بس أني وياج وكل أخوانا راحو بعد كلمن يرد لأصله يا خوية عفاا عليج كم أخت عندي انتٍ الوحيدة..
لوت أمي حلكها وتهز أيدها من طاري أمه
: وهي أمك الگطعية حارمتك منا ولك شلون تريد تمنعك وتجتث جذورك وأصولك بس تبقى أنت من أصل فلاح أبن فلاح
حتى لو تربيت بنص المثقفين وتحجيت حجي أهل العاصمة تبقى
لو شما طال الزمن لو مر دهر بكبره ترد أي والله
ترد للشجرة المنها نبتت جذورك لـ..هلك ولـ.. أهل ابوك لوتية عود هي فد مسوية أنجاز منعتك هذا هو أنت أجيت لوما أجيت..
ضحك خالي يريد يغير الجو
: أي والله أجيت بس لا تكولين برعة على أمي والله أمي مو برعة هاي حية ركطة ما تنكدر...
حجاها وهو يصنف فد واحد طبع مصنفچي (بوقتنا هسة صارت يحشش/ فد واحد حشاش)
باوعلها ونظرة الحزن رجعت لعيونه..
: بقيت بس أني وياج يا خيتي وكل أخوتنا راحوا..
أشر عليه وكام طلع لفة من العلاكة وهو يرفع معنوياتي
: شوفي خالج الحنين شجابلج عندج فقر دم حاد والدكتور وصى بالأكل لازم تتغذي يله خالو بسم الله..
مد أيده يوكلني وأني عيوني تعلقت بـ معصم أيده بالعرك النابض هناك مثل حسن.. عينتًة رديت أباوع لشمرة شعره لون بشرته جريت نفس وغصة بلعتها
سبحانك ربي ما قسمت زوجي يرجع بس عوضتني بريحة أهلي رجع عمو مازن.. قبل فترة وهسة خالي جلال.. يارب ما أعظمك ومو بعيده عليك ترد الغايب..
فتحت حلكي أجامل اللگمة وأجامل روحي شسوي هذا هو قدري مكتوب عليه أعيش على الذاكرة أتنفس الحياة
هناك مكتوب عليه أبقى بعد أصبر وأنتظر كم سنة بعد يا ربي من عمري
بس أكيد الأمل داخلي بعده راح يجي يوم و أشوف حسن.. من جديد أراويه أني باقيه عالعهد وفية أله..
بقيت أنتظره وأدوره بوجه الغريب والقريب
مــــــــــــ♡ــــــــــــــريم
بقيت بيت جدي كم يوم و نصير.. خابرني
: راح أمدد سفرتي لأن شغلي بالعاصمة متراكم والحمد لله عوضت الخسارات الي خسرتهن
: تمام أوكي من ترجع تمر عليه مو لو أني أرجع..
: لا أنتِ لتجين إني أجي عليج..
: أن شاء الله..
فكرت أمر على بنت خالتي بس شافتني غمتني وضحكت وهي تعرف عربي بس بيها لكنه كوردي..
: عود عشتو عندي بنت خاله ولج من داومنا لليوم بس مرتين شايفتج حتى صاحبت صاحباتج ودوم نلتقي والله خوش بنات حتى صارن صديقاتي مقربات خاصة رحاب وبتول وفردوس وامام و زينب و....
قاطعتها
: راح تسوين جرد بعشرين بنت شلة سنفر سنافيرو..
شوي وعاتبتني..
: هواي أشتاقلج وأحنا مو غرب ولج بنات خالة..
جانت تعاتبني متعرف بضروفي ولا تعرف بلي أعانيه كاتمه ضيمي داخلي
: لا تضوجين هسه أني أجيت تعرفين زواج وبيت أكمل محاضرات كبل لبيتي الملم شغله..
: الله يساعدج بس هذا زوجج نحس خابرت البارحة رد عليه منو أنتِ كتله بنت خالة مريم..
رجع يرزلني
: لا تخابرين هنا بعد ناقصني بس..... ومفهمت بعد شكال حجى سريع..
: وين خابرتي؟ ما فهمت شجاب زوجي..
صفنت مستغربة
: شبيج مريم.. غير أتصلت على بيتكم
هنا حسيت بجرح يعني هو بالبيت باوعت لشيلان.. و نفس الوقت التمت الشلة عدا سؤدد.. سمعت مجازة مريضه كلش أول ما كعدت رحاب.. سلمت
: هلو سنفورات..
ردت شيلان..
: النوب تتنمر لأن طويلة أكلج شكد طولج شو طالعه بينا بالطول
ضحكت : ١٧٥سم
ردت ماجدة : بخت زلمة خشن النوب شلون زلمة محجب بينا وعيونه ملونة بوياي أبيض حواجبة شقر أكلج عيني مو أعتقد طالعلج زغب شارب ذاك هو الشمس تعكس عليه زغرطوا الواد داه كبر وخطو شواربو..
ضحكن ورحاب.. صدكت التصنيف وراحت طلعت مراية زغيرة تباوع لوجهها..
: ماكو وين ترى والنبي حفيت أمس بالبوكه هاي جدتي عدها البنية لازم بليلة العرس يا الله الخيط يلوح وجها.
ضحكنا : والله هاي منتهى أجت هي وشواربها خضر..
سمعت وحجت
: عيب أحف مثلجن محفحفات عيب عيني ما معرسين عود نعرس ونلزم الخيط وجيك جيك نحف..
هي صوتها نبرته عالي أشرتلها والبنات أشرلها أشش..
التفتت: هي شكو ترى أمي ما تقبل أحف
سكتت وصارت حمرة من ماجد.. وشلته وراها يردون يفوتون
: طريق...
صوت شاب حاصرته ضحكة هي خلت وكعدت وصوت الضحك من الشباب من صاحبهم ينعم صوته : لاحكين عالجيك جيك نحف خية أمي ما تقبل.
هي من الخجل دمعت يا الله هاي الشلة ولا مريحة تافهين..
: منتهى حبي خلي بغرفة الطالبات أشيلهن الج ولج بارزات ترى شاربج أخضر وعيب هاي نظافة..
: أمي خاف تعاقبني
: أحسن مما تصيرين مضحكة وهذا شعرج متلوكلج كله سمت خلي كذلة تغطي كصتج جنها ساحة....
: أجازف والله كريم..
رغم سولفت بس أحوس وقلق داخلي أنتبهت الي ماجدة..
: شبيج مريومة؟
: ماكو شي بس مغص يمكن أرجع للبيت أضرب محاضرات
هنا منتهى: والخيط..
همست صوت ناصي جيك جيك...
: شوفي خلي رحاب.. ترتبج بطني مغص..
وكفت وترخصت كل مرة ماجدة.. بوجود سؤدد.. تلتزم الصمت لو متضحك تحجي على كد الحاجة لحد الأن باردة..
بطلعتي أنتبهت للولد الابيض طوخ يباوع لمنتهى ومن منتهى ترفع راسها يسوي على شاربة أشارة ياخذ خيط ويضحك حسيتها متضايقة رجعت التفتت للبنات
: ما اوصيجن بهاي كسبن بيها ثواب..
اليوم سؤدد.. مجازه هالايام دالاحظها دوم صافنة ورجعت تنطوي مثل أول ماراح حسن.. أعتقد تخاف من زوج أم ماجدة.. لا هي التعاديها علناً ولا هي الرجعت صداقتها بماجدة..
شلة وحدة ونكعد ونسولف سوه بس تتجنب ماجدة.. كلش ونظراتها تحجي لوم حزن وعتب ولوعه..
أما ماجدة.. شعور بالذنب رغم أني ما أشوف الها ذنب شمدريها لقاءاتها وي بأبوها.. نتائجه أختفاء حسن..
ومصيره مجهول..
أحاول الهي عقلي وأني أفكر بصديقاتي الى أن أوصل للبيت ما أريد أبجي بالطريق ولا ابين أنهياري
يم باب الجامعة شفت عون.. درت وجهي أتجنبه بس هو وكفني
: عليج بداعه سنين تعبي وياج بس دقيقه
وكفت وكال
: صاحبي يشتغل بمكتب بي شراكة وي رجلج يعني سمعت منه رجلج صاير يشتغل بالفايده والله زمن والله فكرت بيج أختاريتي عود المتدين..
سكتت ديشمت لا ما أبجي رجع يحاجيني
: ويشرب هههه لا وهم نسوان تدرين صاير أبو الدين يحب الحرام سبحان الله هاي حوبه گلبي و عشگي
عشگتج أكثر من روحي عبالج جرح گلبي وسهر ليلي و سنيني الي تدمرت مستقبلي و دراستي الضحيت بيها
و أكتفيت كـــــ معلم مالهن حوبه
بعد وبعد ربج بالمرصاد والله جايج متعني أحجي ذني وأروح من حياتج وبعد ما أراويج وجهي شبعي نعل من الي عفتيني لأجله..
عبالج هو ميت عليج ترى أتزوجج نكاية وكرهاً بيه يحرمني منج وسواها همزين هنا لاكيتج جاي أدخل للجامعة بس كلت خاف الأمن يمنعني..
بس ربج راد المواجهة وكل ساق سيسقى بما سقى تذكري الآية زين يا مريم.. وخليها ترافقج بكل حياتج كلما تعاني كولي كله من أيديه
دار ضهره و ركب سيارته كرونه تكسي مشتريلة تكسي يشتغل بيها مبين حالة أفضل من قبل..
عــــــــــــ♡ ــــــــــــون
نفضت كلشي داخلي وأني أسوق سيارتي أبتسم بإنتصار من زمان شاك بيك غش ومكسرات ياما كالولي عنك مصدكت لمن بعيني تأكدت
لو قبل صاير ذكي وماخذ بكلام صاحبي الفتن عليه وجايب الحجي يشوف أبنهم شنو من قريب تأكد شكي بيك
بين شغلك النكس يا نصير.. خوش جنت بايع دين يم أهلك عرفت كل سوالفك الدفن من ربعي السوق السودة وغيرها النصب والاحتيال والفايد ياترى لو عرف جدي الي يتشيم بيك شنو موقفه..
بس وعدتج بيوم الحساب والدين يرد يا مريم.. واني أكلج حقيقته الحساب أكشفه يم جده هنا يتبرى منه ويطرده من أعمالهم المكلفيه يديرها
بس ظليت متردد وأني بين أنفذ وبين أتراجع وأني شكو وأكله النوب لا يموت و أدخل بخطيته..
ذنب واحد بس سويته لنصير.. حتى أنتقم أما باقي سوالفه معليه بيهن هو أصلاً لو ما أعرف شخص مقرب منه حتى أني ما عرفت بشغله المشبوه
ذنبي فقط هو رجعته للشرب التركه من تزوج حسب مكال المشترك بيني وبينه كال أصلا سفره يكضيها شرب وبالوطن عود سبحته بيده ويخاف الله مخادع بوجهين..
وصلت لبيتي أحس مي بارد على گلبي شمرت نفسي على جربايتي وأجتني نوبة ضحك هستريا والله يا مريم.. عفتيني بس لأني أشرب
بس وكعتي بكل السيئات بي شرب
و نسوان ومستكعدلة مرة متزوجها مدري هيج
أشهر أجمعله مرتاح صفيت حسابي وياج من واجهتج بحقيقته بقى العجوز الهضمني ألا أعرفه حفيده منو وبالدليل...
خوش وكعه وكعتي بأبو الربا كله بالفايد و غش مواد وسوق سوده نصب أحتيال عاشت أيدج خوش أختاريتي أختيار..
وفوكها علاس للتجار وأنعدموا تجار من وراه مملي خطايا تستاهلين هالنصيب تبطرتي عليه..
بس شويه ورجعت الغصة داخلي شهكت و دموعي تنزل حنين واشتياق قلب مهجور منبوذ..
تمددت وأندك باب البيت كمت بساع وفتحته خالي ووحدة من بناته بيدها صينية..
: كوة بوية..
: يكوي حيلك خالي..
: شلون شغلك بالسيارة..
: خير من الله..
: مثل ما علمتك بوية راتبك ضمه لملم رويحتك يبن الحنينة وشغلك مصرفك منه وها أعزل ربع شغلك للسيارة هاي السبوبة بوية هم تريد منك صيانه وللعطلات رتب فليساتك ولا تطشرهن.
: أن شاء الله خالي..
: بويه ما كطعت صلاتك؟ كون تستمر ولا تخلي شيطانك يوزك تتركها
: أي خالي
: يله بنيتي خلي أكل لأبن عمتج هنا يله بوية خاف جويعان..
أبتسمت
: أي اليوم نفسيتي مرتاحة أكو أمور تقريباً صفيتهن حتى أبدي حياتي..
: الله يهديك وليدي كون أبوك يتعرضلك؟
: لا من فترة ما أشوفه..
: هذا هم حضك بوية بهيج أبو ما يستحي والله هضيمه
بوية بنيتي روحي للمطبخ و خدري جاياتج لأبن عمتج..
والله بوية ما تخليني أعرسلك و افرحن بيك عبن بنيات خوالك هواي وسنعات والله يلمنك ويخلفلك أحسن مما عايش هنانه وحيدتك..
أبتسمت : من أريد أعرس ما الكه أحسن منهن بس هسه خالي ما متهيأ للزواج ولا للمرة..
ضاج : كيفك كيفك..
لمحت نظرات بنت خالي وهي تبوك أبتسامات الي دنكت مبتسم أشوفها طفلة تذكرت هم مريم.. هيج ضنيتها لمن طارت من أيدي..
باوعتلي: عون.. الجاي على نار مهدرة مو تنساه من تكمل غداك..
دنكت مستحي : تعبتج خوية
طلع خالي بالطارمه وهي همست بدلال
: تعبك راحة عون..
وطلعت يم أبوها رحت تبعتهم أسد الباب وراهم أخذت الاكل للثلاجة وطفيت الجاي
وطلعت وجهتي لبيت الحجي دكيت الباب طببتني اله الحجية..
: حجي أختاريت وقت أدري بيهم بأشغالهم حتى أحاجيك حجي نصير.. متورط بسوالف غش وعلاسة تجار و هواي أمور
سولفتله أفعال حفيده وأني أبتسم لذة إنتصار مخلوطه بطعم التشفي والشماته.. وكف وبعوجيته ضربني
: أنت منيلك هذا الحجي أذا على الشرب أكيد أنت الي علمته هاي سوالفك..
ضحكت
: والله حجي أني شعليه لا أني تاجر وأدور كعده تجار وكاولية و دك شد وصلة وأركص وياهن وأعربد..
متصدكني مو؟ ترى عمالكم يستحون يفتنون أفعاله الي بأسمك دتصير حرامات سمعتك من وراه هههههه تبطرتم عليه بس الله بالمرصاد..
حجي ثمن الخطيئة هي السمعة و السمعة أذا تشوهت مثل القماش الأبيض مو كل لثكه تزول منه وأفهم أنت بعد وكيفك..
دأطلع وهو صاح معصب
: كذاب ولك كلب وين رايح تشمر حجي ملعون..
التفتت من بين أكتافي
: حجي أسأل سليم ومروان وأسأل حاتم يستحون يواجهوك بس من أنت تواجههم بأن انت عرفت مراح يكذبون
رحت للتلفون أضغط أزرار التلفون وخابرت مروان حاجيته
: ولك زحمة النوب يموت من وجهي تصير شلون اكوله..
: هو عرف مني وأنت رجال ما تكذب سولفله مغامرات نصير أبو سبحه يمه يسبح لله ويم الراقصات يفرها وهو يهز...
انطيت التلفون للحجي الصار أصفر
وهو يسمع شهادة مروان وأني عفته وطلعت قبل حتى لا ينهي مكالمه
شماته مني يستاهلون ما جرالهم لا قلب يرف ولا أهتم اله
شافني كدامه داروا عليه كسروني ما رف قلبه ولا أهتم شايب البين..
مــــــــــــ♡ــــــــــــريم
رجعت لبيتي مستعجلة مكالمة شيلان.. وهو بالبيت وكال مسافر شككتني أكثر و كلام عون.. الجايني يشمت بيه..
طلعت المفتاح ردت أفتح الباب ما أنفتح لان الظاهر نسخته من المفتاح بالباب بالداخل موجوده
رحت أفتريت داير مداير الحديقه لجهة باب المطبخ جان مفتوح و ريحه طبخ يطبخ؟ عشتو من يمتى صاير نادر ويعرف للطبخ؟!
دخلت شفت ابنيه حامل مبينه بشهورها الاخيرة تدمدم أغنية لياس خضر وترجع تحمس شويه و نصير..دخل من جهة ممر الغرف للمطبخ..
: حبيبتي ما كمل غداج جعت وراح أكلج أنتِ بدل الغدة يله يم يم خليني اك..
مكمل لأن شافني
: مــريم...؟!
ما تعرفون المشاعر بوقتها شعور الغدر مؤلم الرجل الشفته مثالي يوم عن يوم يخيب أملي و ظني بي يوم على يوم أتندم رجعت لورى دون أي كلمة أو أعتراض و طلعت ولحكني معصب
: منو كالج تجين كتلج اني أخابر
يعني ما أستحى سكتت وما حجيت أنسحبت بكل خضوع ولحكني يزيد عليه ألم الخيانه هنا متحملت صرخت
: روح للساقـ.........
حسيت بوشيش بأذني من راشدي جر راشدي جر دفرات بوكسيات وجلاليق
: ما ساقطه غيرج لا تغلطين عليها أشرف منج على الاقل ما باعت شرفيات يمي و هي لاعبة لعب وي أبن رجل أمها..
شوفي مريم.. متحمل وجودج لخاطر جدي وتوسلاته وهاي مرتي و حبيبتي و لو ما أنتظر تغيير ديكور البيت الي أشتريته متشوفيها
كتلج تبقين يم بيت جدي لأن جبت هاي يمي هنا لمن يكمل بيتها..
يضرب ويحجي دفعته وركضت للبيت من جديد جانت واكفه تباوع جريتها من شعرها وكتله ودفرات وياها ودفعتها للغرفة..
: يأخذج هنا تنامين بغرفتي بجربايتي عزا العزاني هنا بمكاني مخليج
يا سـا....
: عوفيني مخبلة
: ما الومج لو ما منه تسمعين الحجي ما حجيتي عليه هيج!
دخل وخرني عنها وكتلني كدامها و صاح
: يله لبيت جدي أخذج الهم..
: والله عبالي البيت الكدامنه شكيت بيها بس طلعت برائة و طلعت خوش ضامها عن أهلك لا وحامل..
دفعني دفر لبرى ولسيارته فتح الباب و دفرني داخل ودار كعد مكانه ومرته تبعته تبجي
: نصير.. منو هاي شنو هم مصاحب عليه؟
بس هو صاح بيها
: ولي للبيت أنتِ الثانية وأني رجال متمكن أتزوج أصاحب أنتن الاثنين تنجبن
ردت هي
: أروح لأهلي لعد طلكني كافي قبلت بيك متزوج ومخلف بس لأن حبيتك وكلت يحبني بس مال صاحبتك تهد عليه..
ركضت وهي بطنها شكبرها عفية حيلها من جنت حامل بياسر.. كوة أمشي
والمضحك المبكي عافني بالسيارة وركض يراضيها
: ولج خبلة كذابة تكذب عليج أوكفي ميهون زعلج هاي زوجتي مو تعرفين متزوج
: مو يم أهلك شجابها هاده
: أجت متوقعت تجي هي هاي أم ياسر..
حضنها و هي تبجي وهو يتوسل يراضي عافني لأجلها عافني لأجل مره ثانية نساني ونسى وجودي والتهى بوجودها تبين أني الاشيء بحياته...
لهنا عاد وكافي نزلت من سيارته ومشيت للشارع أشرت تكسي وصعدت...
لا حس بيه ولا أنتبه ملتهي بست الحسن يراضيها وأخذها وفات بيها لبيتي و أكيد لغرفتي و جربايتي أحس بسكين تكطع روحي كرامتج وين يا مريم..
ولج لهاي الدرجة مالج إعتبار ببيتج؟! وغرفتج مخليها عجيب راسي تچيته وأني أعدل حجابي الفوضوي من كتلني وجرجرني...
ضباب عيوني مغوشة بالدموع وصداع راد ينفجر دماغي السايق حس أكو شي غلط
: أختي بيج شي؟
هزيت راسي لا الغصة منعتني أنطق هنا بزردومي أحس شرخ والم أمتد لبين ضلوعي نزيف قلب نبضاته تصرخ وجع وجرح ألم الخيانه أهانة كرامه..
بس وصلت لبيت جدي صحت أدور جدي...
: وين جدي..
مرت عمي باوعتلي بطرف خشمها
: وليش تصيحين عليه ها أدبسز..
: وين جدي؟
ضليت أركز بكل حرف وأني أعيد السؤال كازة أسناني بكل قوة متصلبه بملامحي
: و... يـ ن جدي...
ردت بملل
: ضغطه و انطوه علاج وأخذه عمج يفرفره بالسيارة يغير نفسيته
رديت بستهزاء
: أها يغير نفسيته خير أن شاء الله
وهاي كعده..
بس دخل وجهه تعبان وهو مهموم لازم عوجيته تسنده أول مرة أشوف رجال يسند عوجيه ترجف بين أيديه وهو يطكها بالكاع ويمشي
هو سندها مو هي التسنده أشوف رجفتها وكعت من أيده راد يوكع ركض أبنه وسنده دنك أنطاه العوجية باوعتله بيتم وقهر..
: جدي ليش ظلمتني جدي لو مزوجني عون.. مو حتى أنت تكول مريت عليه و خوالة يمدحوه بطل الشرب ويصلي ويصوم بيمن وكعتني..
: شبيج تعوين؟
حجاها وهو كوة واكف
: هم لوميني مثل عون.. موتوني وارتاحو..
أشهك سولفتله رد وهو يتظاهر بالتماسك..
: أعرف بي متزوج شرط علينا ياخذج بس يزوج حبيبته كتله من تتزوج مريم.. وتخلف منها أزوجك حبيبتك لأن أريد بجريتك من بنت عمك..
أنهاريت وكعدت بالكاع ممصدكه أستغلوا فقري و العوز و طفولتي جنت مراهقه من خلوه بعقلي و أخواته يشجعن بيه وجدي اليلعب دورين مرة مقهور على عون.. الي ما وراه توبه مثل ملمح الي ومرة دور يشجع أخذ نصير..
طلعت مغفله وطلعوا خوش يستغفلون البشر ظليت بس مصفنه وأني بالكاع ما أكدر أكوم ولا أكدر أتحرك لمن حسيت أريد أتقيأ بس مجرد دوار وراح..
سندت نفسي و رحت للغرفة الكضيت بيها أيام بيت جدي وتمددت أبني نايم حضنته أشم عطر الطفولة بي
ومنا كلت أذا فشلت بزواجي أعيش لأبني هذا أمل المستقبل الزرعة الي نزرعها وباجر نحصد ثمارها وأخذت قرار جديد بحياتي..
مـــــــــــــــ♡ـــــــــــــاجدة
ترخصت من الشلة ورحت للمكتبه قله طلاب تجي بس المواضب كلش وأغلب الطلاب تجي بس وقت التقارير وبحوث
رحت اتصفح بالكتب بس بالي بمشاعري الجديده صوت هامس يمي
: ممكن تنطيني الكتاب..؟
درت جان ماجد.. وأستغربت
: موجود نسخ عنه
جر الكتاب مني وكال
: أخذيلج غير نسخه أفيش على عطر الكتاب ورد لأن أصابيعج زهور...
خجلت ديتغزل أبتسمت وكعدت شكد طبعه مكروه يحرج المقابل
: مممم صرنا نبتسم ماكو لسان شطوله ولا غلطات ولا ترزيلات كعد و سد الكتاب و خله عكس أيده عليه و بقبضتها سند وجهه و هو تجاهي صافن بيه رديت بصوت يرجف
: مو تريد الكتاب أشو ركنته
: لأن قريت صفحاته بخدودج الورديه و كم حرف تطشرن معرفت أقراهن بعيونج العسلية كوليلي عنهن..
أحتاريت شرد ديتغزل وشنو كلمات يدورها بعيوني
: العلم عند الله
ضحك وأبتسم
: هم تعرفين أنكليزي
: تقريباً ليش
: لا هيج أني غبي بالانكليزي مثلاً How are you هاي ما أعرف ترجمتها
: هاي معناتها شلونك أو كيف أحوالك
زين وهاي ترجميلي فد أنحرج من أبن أختي يسألني ومجاوب
: أني زينه بالانكليزي وشاطرة أسأل شتريد حاضرة
What is your name :
رديت
: ما أسمك عود صدك ما تعرفها؟! شو ممقتنعة
: غبي أني باللغات واثول
: يا بس ذن مستوى أبتدائي شلون نجحت بالاعدادي
: غش..
وسعت عيني
: عيب تغش ما تستحي ما خفت الله...
صفن بيه وهمس
: ترجميلي هاي I love you
لا شعور ذاتياً ترجمتها : أحبك..
همس وهو أيده على خده ومصفن بيه بولع و فيض عيونه مضيكهن حنان
: وأني هم أحبج
كمت متوترة شلون لوتي طلعت مسلسل هندي مسوي عليه لا ما يعرف أنكلش ولا يحزنون
لملمت غراضي بساع بيدين تتراجف يوكع قلم تلحكه دفتر لو مساحه الجاف..
الملم ويوكعن أخر شي حتى أقلامي عفتهن وشردت حتى ما التفتت بس ضحكته لحكتني الصفيق Je t'aimeصاح بعلو صوته
: مو أنتِ جنتي إعدادية تدرس فرنسي...
وضحك والله فشلة طلاب متواجدة وأمين المكتبه دخل يباوع ويستفسر أني عفت المكان خلي يحتار هو يبرر تصرفه طز بي..
أستمرت الصدف بينا وبديت أتعلق بي مرت شهور السنه الدراسيه والامتحانات كلش صعبه أخر يوم الامتحان الطلاب يتأخرون بالرجعه لبيوتهم
تجمعنا بشلة السنافر بس شرشبيلتنا الجميلة أجه عليها أخوها و طلعت مبقت من وجه أخوها مبين عدهم مشكله يجوز...
سؤدد.. كالعادة بوجودي تتجنب أي حوار مشترك بينا فات ماجد.. و بعيونه حزن صارت مشاعره توصلي
خلال نهايات هاي السنة وكعت بحبه و أكتفيت بس بالنظرات والابتسامات حاول هو ندخل علاقه حب ما قبلت بسبب خوفي من أهلي..
ظل هو مستمر يلح لمن كال اليوم اخر يوم النا بهاي السنه محسيت الا صوته تجرأ هاي المرة يكومني من يم صاحباتي
: السلام عليكم
سلام عام للكل والرد منا جماعي باوعلي
: ممكن أحجي وياج..؟
سكتت رجع يتوسل
: رجاءًا!
ندستني شيلان..
: روحي..
شجعني أستحيت كلش وخدودي احتركن بنار عيونه..
: لا ما أكدر! أعتذر..
بلعت ريكي وأني أرفض بس داخلي يتمناه..
خصمتها شمس..
: أخذها وفكنا منها شكد شنكه! الله يساعدك على ما أبتلاك..
وكفت وتبعته بخجل أذكر المكان جان جوة شجرة كالبتوز باوعلي ضايج وهمس..
: الى متى ماجدة.. الى متى عيونج تغنيلي قصايد حب بس لسانج يغرد قصيدة هجاء..
مدري ليش ضحكت كتله
: لو داخل عربي أفضلك هواي تسولف مرة عن مذكر ومؤنث
قاطعني : نثية وذكر
: عوع بيئة أفضل مذكر مؤنث المهم وهسه تصنف كلامي كـ شعر غزل وهجاء..
جر نفس..
: ولج فطيرة غير أحبج وأموت عليج!
: لازم أروح تأخرت
عفته ومشيت شويه ركض وراي وخلا بيدي وردة مربوط بيها رساله
: ماجدة.. ثلاث أشهر العطله شيكضيها ما أشوفج ولا أسمع صوتج أنتظر اتصالج مكدر أتصل واسببلج أذيه أنتظر منج أنتِ تتصلين بيه..
أبتسمت : أن شاء الله
وكف مصدوم و كال
: هااا..؟!
وكفت وكتله
: أن شاء الله و لا تحرجني أنت عرفت مشاعري الك بس أني من هسه أكولك طريقي صعب وطويل ولو ننجمع لو لا أهلي ناس صعبين وأنت حتفوت درب مو دربك باجر لتلومني نبهتك هواي متسمع كلام والله يستر عليك وعلى شبابك وما تحملني أثم خطيتك...
: سلبية كلش كولي يا الله لابد نوسط ناس لو أعرف أخطبج من سيادة الريس بلكت يحنن أهلج عليه..
ضحكت
: مو لهاي الدرجة وشيوصلك لسيادته ههههه
رديت أتمشى وهو يماشيني فرحان
: ماجدة. والله تأخرتي هواي ولج بآخر يوم يالله أبو الهول نطق ممصدك ربي حنت عليه بكلام حلو
ظليت ساكته وهمست
: خلي مسافه بيناتنا ذيج سيارة بابا سهيل.. الظاهر اليوم صاحب الخط ميجي عليه
أبتعد عني هو بمسافه مترين ويبين للناظر يمشي وحده..
: ضمي الرسالة لا ينتبه
شلعت الرساله من الوردة وضميتها اما الوردة بقيت أشم بيها وكفت السيارة صعدت وأني اساير بابا سهيل على أمل بيوم من الأيام أترك بيته
باوعتله من الجام أبتسم إلي خفت لا ينتبهله بابا سهيل.. أي خفت لا أصير مثل سؤدد.. محرومه من حبيب..
والله حبيته حبيته واخاف عليه خفت لا الله يعاقبني بلي صار لسؤدد.. يصيرلي وأنحرم من ماجد.. جريت نفس من تحركت السيارة
مرت الايام وأني حيل أشتاقله وهو التزم ما خابر بس بيوم ماما وبابا سهيل.. راحوا احتفالات بقاعه(.......) جان إحتفال رسمي سوته الحكومه واستدعت أزلامها و عوائلهم
قبل جانت تجرجرني وياها لهيج حفلات من جنت مراهقة وطفلة وأذكر مسؤول فلا أرتاحيتله لطش وبعدين خاطبني من بابا سهيل.. ورفضه بحجه طفله عليه..
لكيت حارث.. طالع هو و ربعه أما انتصار.. جانت تقرا لأن مكملة سديت باب الكلدور عليه وأني أراقب من الجام و أفر الرقم أجاني صوت رجال كبير
: الوو منهو..؟
ظل بس يكرر منهو...؟
بخوف وأني أرجف همست
: عمو أني زميلة ماجد.. أريده انطيني أحاجيه
: شنهي هاي نوب زميلة ماجد.. ولك مويجد تجي هسه ولك هاي مريه تخابر عليك..
خجلت وسديته عزا شسويت صرت وحدة أدبسز تتصل على العالم النوب أكلهم أريد ماجد..
حسيت خدودي محتركات وكلش مستحية ظليت أبرد خدودي بيدي شويه ورجع دك التلفون توني جاي اطلع من الكلدور دك بساع رفعت السماعه أجاني صوته..
: مشتاقتلي موو بس مو كثر شوقي الج من خابرتي عرفت يعني محد بالبيت لذا خابري..
وهو يحاجيني مسحت رقمه من كاشف حجيت وما أعرف ليش أحرف كلماتي تناثرت مطشرة مكدرت أجمعهن بكلمه مفيده
ضحك : عيدي شكلتي ترى مو أول أبتدائي وتتهجيلي ترجميلي هاي I miss you
: لا ما أترجم توكعني فخ..
سحبت نفس وأني أقوي نفسي بس بعدة جسمي يرجف رجعت همست
: أني ردت اسمع صوتك
شوي كدرت أرابط بحروف كلامي جاوبني هو
: لويش تسمعين صوتي مشتاقه و تحبيني أنتِ Do you miss me?
همست بكلمات متقاطعة وخجل وأرتباك
: ها أي أي أفتقدك هواي العطلة شيخلصها... ضحك
: مو كد أفتقادي الج محتاج أشم عطرج...
بتوتر وخجل كلماتي تبعثرت...
: راح أسده شنو تحاجيني هيج ترى تعرف مشاعري لا تحرجني عفية..
ضحك...
: ولج شحجيت أنتِ متوبين من هجوميتج بساع تعصبين بوياي منج كون عضة بزردومج هديتي عليه.
ضحكت من أسلوبه الفكاهي
: أي هيج ضحكي و هدئي من توترج لا تستحين مني..
رديت بكلام مبعثر هم مكدرت أسيطر أدير كلماتي
: ترى دتخجلني..
: جيجي ولج مجودتي ماجي غير مترزل من أبوية يكلي شنو مرية تخابر عليك كتلة أبنية موش مرية بوية..
حجاهن وضحك وكمل
: وهسه كضيتيها أستحي..
رجع صوته بجدية
: كلش أحبج و أريد أسمعها منج وين رحتي ماجدة.. ولج ماجي
همست : يمك موجودة
بس فسر كلمتي غير
: أويلي وتكلي يمك ولج حلم تصيرين يمي تدرين هنا شسوي بيج
مفهمته : يعني شسوي؟
ضحك : شوف الفطيرة لو أكلج شسوي تركعين التلفون بوجهي..
: أكلك خاف أسد التلفون يعني أجو أهلي راحوا حفل خيري وتبرعات ما أعرف بس بقاعه (.......)
: ممم لعد يتأخرون ميجون هسه توه العصر تلكين لليل يجون..
ظل يحجي عن مشاعره ويحفزني أتجاوب وياه مدا يفهم أني ما أعرف للحب مجرد مشاعر حسيتها ونطقتها بس ما أعرف أتعامل وي الحبيب و لا أتغزل كلت أصارحه بمشكلتي
: ماجد.. أني ما أعرف أحجي مثلك ولا أعرف شلون أتعامل وياك كحبيب وحبيبة..
ضحك
: ولا مصدك تحبيني بس طفرات لسانج قنعتني ولج ممصدك
سكتت رجع كال
: أنتِ كلش بريئة نيالي عليج معندج خبرة بعلاقات الحب أني بيدي أعلمج ومن نتزوج أعلمج شلون العشاق للصبح بلابل تغرد قصايد حب وأحضان و...
ترك جملته ناقصه أخذني الفضول
: وشنو بعد؟
ضحك وما كمل حول كلامه مشتاق الي ويريد نتشاوف
: ماما كلش صعبه بله بابا ممتواجد دائماً بس أمي مشكلة
: ما أريد أعلمج تكذبين عليهم باجر بنتنا المستقبلية هم تحب وتكذب علينا أويلي شسوي بيها..
ضحكت مدري ليش تخيلت وياه الموقف
: كد ما أنتي طيف بحياتي وأتمناه يصير حقيقة الا أسمي بنتي طيف
: حلو الاسم..
ظل يتغزل بعيوني و شفايفي
: تدرين بس نتزوج متحلف بشفايفج أويلي...
خجلت مو جنه صار أدبسز همست أكذب عليه
: يله باي مدري منو أجه يمكن أخوية حارث..
سديته ما دك بعد لأن صدكني بس أني شلون هيج أسوي شلون أتصل و ابين مشاعري شيكول عليه هسه وحدة مو راحة بس والله أحبه
زين وأمي هسه خاف عيب وحرام أكذب عليها أوف يمعودة ماجدة.. من كل عقلج تكولين لأمج وتعترفين الها النوب منو ماجد..
تأكدت مسحت رقمه لو لا و صعدت لغرفتي تمددت أبجي يارب أكتبه الي قسمتي يارب فدوة أروحلك
نمت تعبانه و كعدت على صوت ماما وهي يمي
: شدعوة هلكد نايمه..؟!
: صداع و نمت
: أبوج بلغوه يروح للعاصمة يبقى أسبوع
باوعت للساعه ب ١٢ تثاوبت
: ماما يمتى رجعتي؟
: من الثمانية
: يا... يعني اني صدك جنت نايمة ولا حسيت بروحي من نمت
: أجت وحيدة تكول من باجر ترحين وياها علمود تدرسن مواد مرحلة ثانية تقوية..
: وين شو ما أدري؟
: أنتِ ثولة شمدريج شوفي بنات العالم نبهات على دراستهن حتى يجيبن معدل تراكمي عالي..
حجتها وطلعت واني مستغربة شنو دورة تقوية مدارس أحنا شنو عاد ثاني يوم العصر أجت ترخصت أمي وكالت
: ندرس مصادر مرحله ثانية بالمكتبه
وأني عبالي دورة حجيت عالبنت
وحيدة : خاله بس كلت أكولكم أني حدرس مصادر الثاني وبعد كيفكم بس الافضل ماجدة.. تدرسهن من هسه
هنا رديت : خلي نستلم نتائج أول
جانت أمي تنظف مدنكه تلم بالاوراق عضت وحيدة شفتها الي و غمتني
: أنتِ شاطرة وأني هم ضامنين نجاحنا..
أمي تلملم وتحاجينا
: أي خالة أنتِ شجعيها هاي الخوثة متعرف مصلحتها
رحت وي وحيدة المكتبه قريبة تمشينا الها بس دخلت لكيت ماجد.. كاعد هو و نصار رفعوا أيدهم بحركه سلام ويتمضحكون
نصار : مو كتلك لا تخاف وحيدة تجيبها
ماجد : اي والله يله أني بالحديقة نقرأ من جد وجد..
باوعلي و أجاني وبيده كتاب
: ممكن تشرحيلي..؟
وسعت عيني
: شتسوي هنا هم جاي تدرس للثاني؟
ضحك وطلع وأني وراه كعدنا تحت شجرة ورد جهنمية
: أي جاي أدرس شوفتج ولج مشتاقلج و نصار.. كال ماكو غير وحيدة.. تطلعها من معتقل رجل أمها
بخوف كلت
: لو تعرف شيسوي متضحك؟ ترى قاسي تروح ورى الشمس لو حس بينا
: ما يحس الا وحيدة تعلسنا كون نصار ميضوجها ويزعلها
ضحكت : الله يستر..
: شوف العيون شلون تضوي خاف عايز أشواق ولج يمتى تنورين بيتي؟
دنكت ونفس الوقت سكتت أستمر اللقاء بالمكتبه مندخل بالقاعات لان ممنوع مفصولة أكو للبنات وأكو للاولاد لذا نعتمد الحديقه يومية
صرت أشوفه بحجة ندرس للثاني و زاد تعلقي بي لدرجه صرت أخاف عليه أكثر من رجل أمي
فكرت أصارح بابا لؤي.. يساعدني بس كلت لا مو هسه خاف هم ميقبل بي خاصة من سولف الي عن ظروفه كلت أول نكمل و من أستقر بيت بابا لؤي.. هنا نتزوج..
شــــــــــ♡ــــــــــــيلان
رغم فرحي برجوعي لمحافظتي بس أفتقدت الشلة عدنا عرس أقاربنا لذا متحضرين بألوان ملابسنا البراقه أباوع لدبكات مختلطه بين أقاربنا..
و أجت عيني ببروان.. تبادلنا الابتسامة ورى ما أنتهت الدبكه أشر بسكته و تبعته لمكان منعزل
: اليوم أفاتح أبوية (يقصد عن الرباه)
حسيت بنبضي يزداد
: و آدم..
: مثل ما أضحيله يضحيلي لو كانت مشاعرج اله إني أبتعد
ملحك يكمل الا آدم.. يباوع النا بغضب
: بروان.. تعرف أني أحبها وتريد تسرقها مني؟
بروان بتوتر وحنية...
: أسمعني يا آدم.. هي مخيرة بينا
هنا حجيت : وأني اختاريت بروان..
راح آدم و شويه أجه جايب أهله وأهلي وسوالنا فضيحه كدام الناس
: شوفوا شيلان.. تلعب من ورانه وي منو؟ وي الربيناه المتشرد الي أكرمنا..!
هنا ركض بروان.. و تضارب وي آدم.. و عمي صاح كافي وهو يفاكك و أسمع التبسبس بين عشايرنا الكوردية
صعبة هنا سمعة البنت أذا تشوهت يعني ماكو بعد أحد يكلبها العشائر الكورد كلش صعبين
: آدم.. كافي بروان.. أستحوا تتعاركون علمود بنية؟!
دفع أبنه و رد دفع ربيبه و أبوية لزمني حيل من أيدي وجرني وراه
: فضحتيني الموت الج يا عار شباب تثنين يتعاركون عليج أنتِ منطيتهم وجه مو؟ دتلعبين يـا........!
صحت : عمو الحك بابا راح يموتني..
كلمتي خلت آدم.. و بروان.. يتركون المضارب و عمي صاح ببابا
: لا تصير خبل و تتسرع لأني أصلاً جنت ناوي أخطبها منك بس كلت تكمل دراستها و تنضج البنت الظاهر لازم نستعجل نزوجها كاكه أني أخطب بنتك لأبني .....
