رواية عيون المها الفصل الثاني والعشرون 22 بقلم ظل الياسمين

الامور لا تتاخر بل يختار الله لها موعدها الصحيح 

عمو سالم خطب العلويه وحجه ويه السيد والسيد وافق بس كاله خل اشوف عمامي 

مرت اشهر والسيد ما مرجع جواب وعمو كلما يحجي وياه يتملص ويغير الموضوع 

الا ان فديوم كاعدين واجه عمو ضايج 

_ها عمو اصبلك غده 

_لا ما اشتهي فدوه عمو اريد انام مالي خلك بس طلعي الجهال بطارمه 

_خيرك مريض 

_مها مالي خلك احجي بعدين الله يخليج 

عرفت هو متاذي كلش لبست الجهال واخذتهم لام صلاح خليتهم وطلعت لجامعه من رجعت اخذتهم ورحت لبيت عمو بطريق لكيت السيد واكف بلباب يدك 

يحجي وهو مدنك 

_اشلونج خويه ابو حمودي موجود 

_هله بيك سيد اي نايم 

_خليه نايم امر عليه غير مره 

_سيد اليوم عمو جنه مريض صاير شي ما قبل يحجي 

_ها لا ما صاير شي ما اعرف عده العافيه كليله السيد مر عليك اودعناكم 

رفع راسه السيد ابتسم وركز بوجهي ودنك وراح يركض 

دخلت بس كلبي يكول صاير شي والا عمو مايضوج بهيج طريقة 

لكيته يصلي والجهال جوعانين 

رحت توضيت وصليت وسويتلهم شوربه عدس وخبز 

_عمو اخليلك عشه اشلون صرت 

_الحمد لله ما اريد نفسي مسدوده راح اطلع اشويه عينج على الجهال 

مرت الايام واني كلشي ما فاهمه من اليصير باقيه بين الدوام والجهال 

كملت مرحله ثانيه وبدت الاوضاع تتحسن والوضع احسن 

نرجوسه صارت بلاول وحمودي بثالث 

وزيودي متعلق بيه 

امي من تريد ادز صوغه ادزلي ولجهال ههه تحبهم على محبتي 

اندكت الباب وطلع حمودي 

_مها اجت عمتج 

طلعت اركض اول تالي تجيني لبيت عمو سالم 

_تفضلي عمه 

_مهاوي احنه راح نسافر كلت انطيج المفاتيح خاف تحتاجين التلفون تتصلين بامج 

ولو راح اخلي ناظم يجر الواير ويخليه على غرفتج سحبيه والتلفون اخليه الج على الحايط 

انطتني المفاتيح وطلعت 

اجه عمو وسولفتله كال وين يردون يرحون 

كتله ما ادري بس المفاتيح ضلت عدي 

للمغرب رجعت للبيت واسمع صايح بيت عمتي 

_خيريه بسرعه لمي الغراض وخلي نطلع تره ما نعرف اشوكت يجون علينه 

_كم مره كتلك هذا ما يجوز من سوالفه يورط روحه ويورطنه وياه 

عرفت من خلال حجيهم عماد مورطهم بسالفه جبيره صاحت من السياج 

مها هاج التليفون ولا تباتين وحدج روحي لبيت عمج 

اخذته وطلعت لبيت عمو سولفتله وبقيت يومين عد بيت عمو 

صبحنه على دكه الباب قويه كام عمو طلع بسرعه يا ستار يا ربي 

ابن ام صلاح/سالم تره بيت عمت مها حركوه ورادو يحركون بيت مها واحنه وكفنه بوجههم 

_خير شكو ليش حركو البيت 

_كالو عدنه ثار ويه عماد معذب ابنهم وميت جوه ايده 

_الله الساتر هذا شنو من بشر مهجول اهله ولحك بيت اخوه 

كل هذا واني خايفه اروح لبيتي الي هو عباره عن غرفة وملحقاتهه 

ردت اخابر امي وحجيت ويه عمو كال 

راح اجر الواير لبيتي وانتي جيبي التلفون 

صدك خابرت وسولفتله 

_يمه مها ديربالج على نفسج تره الدنيا ما تتامن فدوه يمه يوميه خابريني 

_صار  اشعدي غيرج يا بعد روحي 🥰 

مرت الايام وصرت مرحله ثالثه ومره عمو راد يروح يسوك من الشورجه 

_عمو ديربالج على الجهال اني لليل يلله اجي 

_انشالله عمو بعيني 

طلع عمو لضحى اندكت الباب الجهال بلمدرسه لبست عباتي وطلعت واشوف السيد 

_اشلونج خويه 

_كل الهله بيك سيد 

_عمج سالم موجود 

_لا راح يسوك من الشورجه 

_سلميني عليه احنه انتقلنه لبغداد اني والعايله اهناك استقرينه اذ ماكو زحمه هذا رقم الارضي العماره الاشتغل بيهه اذ عدكم تليفون اتواصل ويه عمج 

_الله يسلمك سلمنه على العلويات 

دقيقه اكتبلك الرقم جبتله الورقه وهو رفع راسه وابتسم بقهر 

_تدرين مها يعز عليه افارككم وهو صافن بوجهي جريت ايدي 

_شنو تقصد 

_ها قصدي سالم والجهال تعلقت بيكم 

دخلت اركض وسديت الباب 

كلبي يدك وايدي ترجف هاي ليش عود اني معقولة ما اتقبل واحد بحياتي العمر جاي يمشي واني هم اريد اصير ام 

اكيد عمو يزوج وياخذ الجهال وارجع لايام الوحده والعزله 

بقيت افكر السيد اشلون صافن بيه وابتسامته 

والله السيد خوش انسان بس مجرد افكر بيه يحتاجله بخت وحظ 

نفضت افكاري وكمت كملت الغده واجو الجهال صبيت الهم 

وكمت اريد ابدل جلب زيودي الا اروح وياج هاي اشلون اطلابه 

وكام يبجي اضطريت اخذه وياي 

وكلساع اعتذر من استاذ لان جايبته عبالهم ابني 

طلعنه واشتريلته ورجعت المغرب لكيت عمو جاي وحامين الاكل وجاي ياكلون 

زيودي يسولف الهم وعمو يضحك 

_عمو اليوم اجه السيد 

اشو هذا التفت عليه وعاف الاكل 

_وين اجه 

_اهنا للبيت وكال انتقلنه لبغداد وانطاني رقم تليفون العماره الي يشتغل بيهه 

_وليش اخذتيه كليله ما عدنه تليفون 

_ها مو عبالي 

صار عصبي وكام مها تره انتي مو زغيره واني اعلمج انطاج رقم كليله ما عدنه وطبكي الباب 

ضليت مخلوسه وما كتله انطيته رقمنه الارضي 

مرت الايام ونسينه شغله الرقم مره دك التليفون وشلته كال الووو 

_تفضل منو 

_عمج سالم موجود 

_منو نكله اني سيد احسان 

_هله بيك سيد بس 

_بس شنو 

_سيد اني من اخذت منك الرقم عمو صار عصبي وما قبل كال ليش اصلا تنطيه وينطيج رقم فدوه سيد لا تكله اني انطيتك الرقم عيب منه 

_صار مااكله بس هو ليش هيج عصبي 

_والله ما ادري عود اني ارد اسالك هو مو خطب العلويه  ليش خربت علاقتكم 

_مو عمامي ما قبلو كالو بنات الساده ما ياخذن عامي والله اني ما رضيت لان سالم خوش انسان 

ورحت الهم ونهيت على بناتهم بس سالم زعل لان ابن عمي هد عليه وهدده يجره بلكرين كون ياخذ العلويه 

فوك ظيم الوكت ما يخلون خواتي يستقرن 

_سيد عمو مو هنا واني ما اكدر احجي وياك تعذرني 

_عاذرج ولا يهمج هاي اخر مره اخابر مع السلامه 

سديته منه وبجيت 😭 

اني اشكد اشوف نفسي مظلومه اكو ناس مظلومه اكثر مني بتخلف وجهل العادات والتقاليد 

ما حجيت العمو على المكالمه راحت الايام ومره اجه عمو كال اليوم عدج دوام كتله لا 

_خلص ترحين وياي لبيت ام جعفر المله 

_ ها شكو رايحين 

_بدلي وبدلي لجهال وبطريق احجيلج 

طلعنه مشي وره فرعنه بشارعيين وهو يكول عدهم بنيه حلوه ونادره 

_عمو تريد تخطبهه 

_مها اني رجال واحتاج مره بحياتي وصار ثلث اسنين من ماتت المرحومه خطبت العلويه وما اطوهه عمامهه 

وهاي البنيه صار شهر اسال واتقصه كالو اسال عن امهه والبت وامهه شريفات وجماله امهه مله خادمه الحسين ع 

_توكل على الله 

دخلنه ورحبو بينه وعمو عرفني عليهم كال هاي بتي اني ربيتهه بت الحجيه صفيه 

وانتي تعرفون وضعي واذ وافقتو بتكم اخليهه على راسي 

طلبو مهله وعمو كال براحتكم سالو واذ بيهه صالح وخير انشالله يصير 

طلعنه ودانه عمو اشترالنه موطه ورجعنه سالته 

_عمو ليش عمام العلويه ما قبلو  والسيد ليش ما اعترض 

_مها هذا الموضوع يضوجني كلش ما اريد اسوالف بيه 

مرت اسبوعين ورجعو الموافقه كام عمو يجهز بلبيت صبغ البيت كله واشتره غرفه جديده واشتره ملابس اله ولجهال وكال عمو مها اشتري تجهيزات المطبخ 

وملابس الج 

_عمو والله عدي كومه ملابس امي ادزلي واذ علمطبخ نشتري كاونتر جديد 

وسنكي وفراشات 

خلال شهر كمل عمو كل شي وازوج واخذ العروسه للفندق بكربله 

وثاني يوم نضفت البيت كله وعفت الهم البيت واخذت الجهال ورحت لبيتي 

ومر اسبوع وهمه وحدهم 

اجه عمو كال راح اسوي عشه لوجه الله تعالى وصدك ذبح وتكفلت ام علي بطبخ وعزم الجيران والكرايب والكل فرحانه لعمو 

ومشت الايام والحمد لله البنيه طلعت كلش خوش انسانه 

اني حاولت انسحب من حياتهم طلبت من عمو يجر الواير مال الارضي لبيتي وصدك جره وكل يومين اخابر امي 

مره كاعد ادرس وفاتحه التلفزيون واختنكت كمت اسال نفسي ليش اني محد يخطبني راح يصير عمري 25سنه اتمنه اصير ام 

ذكرت السيد اشلون جانت النضره الدافيه وابتسامه حزن ممزوجه بقهر 

كلت الله يساعد كلبه ♥️اشكد متحمل اذيه وعدني ما يتصل وابد ما خلف بلوعد اشكد شريف 

اندكت الباب وصحت منو طلعت ام صلاح 

_اني يمه مهاوي 

_هله بيج حجيه تعالي جوه 

سويت جاي وكليجه وكعدنه ناكل ونشرب جاي وهيه تسوالف عن جناينهه واني بالي مشغول كالت 

_مهاوي بيج شي اشو ما تردين عليه 

_ها لا ما بيه شي اضن دايخه وراسي مسطور تدرين هاي اخر سنه وصعبه الدراسه 

_الله ينجحج ويوفقج شدي حيلج اكلج ما سمعتي اخبار من عمتج 

_لا والله بس هيه كالت راح نسافر 

_وهذا البيت يضل هيج 

_ها يعني شنو ما فهمت 

_اكول لو تنضفيه وتاجريه هم تستفادين منه ليش ضال متروك اشو هيه اجت فچه وراحت فجئه 

وهو البيت مالت الحجيه صفيه الله يرحمهه والحجي فلاح وانتي اوله بيه استفادي منه ولو رجعو كليلهم اجرته وما عدي مصرف 

_والله خوش فكره باجر اروح العمو واكله 

واشوف شيكول 

ثاني يوم رحت لعمو وكتله كال اي وياج نضفيه وطلعي الغراض المحتركه وخلي نصبغه ونرتبه ونعرضه للايجار خوش يجيب سعر 

كل هذا واني احس بنقص وكلبي ينعصر 

من اذكر السيد 

صديقتي الوياي بلكليه انخطبت ورحت بحفله الحنه لبست برنسيسه واول مره افتح شعري وما اعرف اخلي مكياج رحت لبيتهم كالت اختهه تعالي ويانه لصالون رحت وياهن وكل حركه وكل موقف اتخيل نفسي وتخنكني العبره 

بس فرحت الهه تستاهل كل خير 

اخذت طالب ويانه  اول مره جان اعجاب وتحول الى حب والحمد لله تكلل بزواج

داومنه وبقيت وحدي امشي لان هيه اجلت السنه 

 واحد من القسم الثاني اسمه باسم سلم عليه واني كاعده بلحديقه وجاي اراجع للمحاضره امتحان 

_السلام عليكم 

_وعليكم السلام 

_مها اكدر احجي وياج 

_كول خويه محتاج شي 

_ها اي ما اعرف اشلون ابدي بس اني اريد ارتبط بيج 

كمت وكفت على حيلي 

_شوف اكلك تره اني مو مال هيج شي اذ جاي ادور علاقات وحبنجيات اسفه هميت امشي وهو يمشي وراي 

_بس اوكفي منو كلج اريد علاقه اني اريد اخطبج واذ وافقتي باجر اخلي امي تجيكم وتروح لعمج 

فرحت من كال هيج يعني اني مرغوبه وما بيه كل عيب وحالي حال البنات اي ليش لا خلي اجرب هذا الشعور 

درت وجهي كتله اذ صدك خل تجي للبيت 

ورحت اركض 

ثاني يوم اجيت من وكت كلت خلي اكعد بلحديقه واشوفه اجه كاشخ 

_اشلونج مها اكلج انتي ليش ما تجين الصبح للكليه 

_وشعدي جايه اني دوامي ساعه 2

_عليج الله تعالي خل نتونس ونكعد بكافتريا ونشوف عالم وناس باجر اني عازمج على غده بتربيه 

_انته صدك تحجي تره اني ما اطلع ويه اي واحد انته كلت ادز امي لذلك وافقت احجي وياك بس 

_لا تصيرين معقدة جنج ذني المعقدات يسموهن الفتره الدينيه ضحكي تونسي 

باجر انتظرج باي 

خله وراح واني بقيت بحيره هذا جاي يضحك عليه لو شنو فلمه 

ثاني يوم بدلت الصبح وطلعت 

بطريق قريت الفاتحه لام البنين ع ولسيدتي ومولاتي فاطمه الزهراء عليها السلام ورحت 

وصلت لكليه التربيه واشوف ماجد واكف يم باسم انصدمت هذا متفق وياه يوكعوني من كد الصدمه والفشله كعدت بلكاع 😓

اني الحافضت على نفسي وخليت ديني كل همي بهاي السهوله انجرفت لان كال اخطبج وين وصل بيه الوكت 

رجعت ركض لسيارات والدموع ما تقبل تسكت 😭