رواية جثة الصحراوي الفصل الثالث بقلم محمود الأمين
رد عليا الرائد نبيل، وقال:
_ جث.ة عصام اخو صفوت.. حضرتك فاكر والد صفوت لما جه هنا، وقال عندي ابن مات والتاني سافر واتقطعت اخباره بعد ما الفلوس جريت في ايده؟ هو في الحقيقة، الفلوس ما جريتش في ايده ولا حاجة، هو رجع وما كملش في موضوع السفر ده، بس رجع على مين؟!.. على بيت صفوت.
= ايوه يا نبيل، بس ده مش دليل ان الجث.ه هي جث.ه عصام.
_ حضرتك بس اسمع الراجل ده اللي جاي يتكلم، وهتفهم انا ليه بقول كده.
...
قعدت قدام الراجل اللي اسمه حسين، اللي اتكلم وقال:
_ انا بشتغل في الكويت بقالى عشر سنين، مستقر هناك، وانا اعرف عصام من ايام المدرسة، هو واخوه صفوت، واللي اقدر اقولك انهم اخوات على الورق بس، انا عمري ما شوفت اخ بيكره اخوه زي ما صفوت كان بيكره عصام، ما كانش ابدا بيتمناله الخير.
الشغل في الكويت صعب شوية، خصوصا في البدايات، لازم تتبهدل سنه على الاقل عشان ترتاح، ودي النقطه اللي انا فهمتها لعصام قبل ما يركب من مصر ويجي، ولكن هو ما سمعش الكلام، وقال انه هيستحمل، ولما جيه الكويت واصطدم بالواقع، قال انه مش هيقدر يكمل وهيرجع على مصر، بس وقتها كان خايف من ابوه اللي دفع دم قلبه في السفريه دي.
فسألته وقتها.. هتنزل ازاي يا عصام؟.. انت عاوز تعمل مشاكل مع ابوك؟ ده انت لو نزلت هيسود عيشتك.
= ما هي دي المشكله، انا مش عارف اتصرف ازاي؟
_ اقعد واستحمل الشغل هنا يا عصام، وصدقني اول سنة بهدله شويه وبعدها بترتاح.
= انا هكلم صفوت، هو قاعد في شقه لوحده دلوقتي، هنزل اقعد معاه لحد ما اشوف هتصرف ازاي؟
_ ما بلاش صفوت، ده ممكن هو اول واحد يبلغ والدك، وانت فاهم انا بقول كده ليه؟
= يا عم زمان كنا عيال صغيره، دلوقتي احنا كبرنا، وصفوت اتغير على فكره.
_ والله انت حر، شوف ايه اللي يريحك واعمله.
...
كلم صفوت في التليفون، وبلغوا بالموضوع كله، والغريب ان صفوت رحب جداً باخوه وطلب منه ينزل ويقعد معاه ويكبر دماغه من موضوع الشغل بره ده، انا كنت فاكر انه هيرفض.
وقبل ما اللي اسمه حسين ده يكمل كلامه، قطعته وقولت:
_ كل الكلام ده ما يخصنيش، فين دليلك ان اللي اتحرق في الشقه ده عصام مش صفوت؟
= انا رنيت على عصام في اليوم ده، كنت عايز اكلمه فيديو كول، بس شكله كان نايم، وبعد شويه رد عليا، واخر حاجه قالها في المكالمه.. انه شامم ريحه غاز، وبعدها سمعته بيصرخ والمكالمه قطعت.
_ وانت ما بلغتش ليه بدري بالكلام ده؟ ليه ساكت لحد دلوقتي؟!
= خوفت ابلغ الكلام ده لوالده يحصله حاجه، استنيت لحد ما اجازتي جت عشان انزل واجي احكي لحضراتكم كل حاجه.
....
وهنا اتكلم نبيل، وقال:
_ ومع كلام ايوب البواب، اللي بياكد ان صفوت هو اللي خلص على رامي اخو يسرا، يبقى صفوت هو اللي عمل كل ده، بس هو فين دلوقتي؟ ما حدش عارف.
= لازم نلاقيه يا نبيل.. لازم.
....
بعد ما خلصنا كلام مع الاستاذ حسين وايوب البواب، طلبت منهم يمشوا، وقعدت مع نبيل افكر هنعمل ايه؟! وعرفت ان اللي سرب الموضوع للصحافه مش من عندنا.. في حد عارف احنا بنعمل ايه؟
وطلبت من نبيل انه يعملى تحريات مفصله عن صفوت، عاوز اعرف كل حاجه عنه من يوم ما اتولد لحد دلوقتي.
رد عليا الرائد نبيل، وقال:
= من غير ما تقول يا باشا، البحث الجنائي شغال على الموضوع دلوقتي، وفي اقرب وقت هيكون قدامك تحريات شامله عن صفوت.
...
ولحد هنا الدنيا كانت تمام، لكن وانا قاعد جتلى مكالمه من شخص بقالى كتير مسمعتش صوته.. وسام عزت، دكتور نفسي وصديق دراسه قديم. رديت عليه وبدات اتكلم معاه، وبعد السلامات اتكلم وقال:
_ انا عرفت ان انت اللي ماسك قضيه صفوت، الشخص اللي اتنشرت صورته في الجرايد، واحب اعرفك ان صفوت ده كان بيتعالج عندي في يوم من الايام، ويمكن هو من اصعب الحالات اللي انا واجهتها، شخص عايش في نظريه المؤامره وان الكل بيكرهوا.
= انت متاكد من الكلام ده يا دكتور وسام؟
_ زي ما انا متاكد اني بكلمك دلوقتي، انت عارف اني ما اقدرش اطلع اسرار المرضى، بس لما عرفت انك انت اللي ماسك القضيه وان الشخص ده محيركم، كان لازم اكلمك واقولك ان صفوت هو اللي عمل كل الجر.ايم دي، بس انا مش بكلمك عشان اقولك كل الكلام ده، انا مكلمك عشان ابلغك عن مكانه.
= وانت تعرف مكانه منين؟
_ انا ما كنتش اعرف، بس انت عارف الشقه اللي انا بصيف فيها كل سنه، كنت هناك من كام يوم، وشوفت صفوت وهو طالع الشقه اللي هديك عنوانها دلوقتي.
...
اخدت العنوان، وتحركنا انا ونبيل ومعانا قوه صغيره عشان ما نلفتش الانتباه، المكان كان معزول تماماً، يعتبر صحرا، الشقه كانت في الدور الخامس.
اقتحمنا الشقه، وكنت فاكر ان صفوت هيقومنا، لكن انا لقيت صفوت قاعد مستنينا، كان بيشرب كوبايه شاي، واتكلم وقال:
_ ما لهوش داعي يا حمزه باشا اللي انت عامله ده كله، وبما انك وصلت لهنا، فانا هجاوبك على كل سؤال ممكن يخطر في بالك، واللي انا هحكيه ده انت مستحيل تشوفه مبرر للي انا عملته، بس انا شايفه مبرر.
من وانا صغير وفي تفرقه بيني وبين اخواتي، وخصوصا عصام، رغم اني انا اللي نجحت في التعليم وانا اللي اشتغلت وكنت بصرف وبساعد في البيت، لكن للاسف هما ما كانوش شايفين غيره، التفرقه كانت عيني عينك، وانا استحملت وشلت في قلبي كتير، لحد ما قابلتها البنت اللي شوفت انها هتعوضني عن كل ده، يسرا، لكن للاسف طلعت بني ادمه مش كويسه، وعرفت انها على علاقه برجاله كتير، ورغم كده كنت مصمم اني اتجوزها، ما اعرفش انا كنت بحبها ليه؟!.. وبعد ما وعدتني اننا هنكون لبعض، راحت اتجوزت اللي اسمه مصطفى، وعشان هو راجل شرقي ما قدرش يستحمل تصرفاتها، وانا كنت بفكر ازاي انتقم منها؟!
ولما ظهرت في حياتها تاني، بقيت معاها حتى وهي متجوزه، لحد ما في يوم جوزها رجع وشافنا مع بعض، انا كنت فاكر انه هيخل.ص علينا احنا الاتنين، لكنه سابنا ومشي، في نفس الوقت اخويا عصام كان مكلمني انه راجع مصر وانه عايز يجي يقعد عندي.
ما كنتش عارف ان في اليوم ده انا ويسرا هنتخانق وهخل.ص عليها، ما قدرتش امسك نفسي قدام بني ادمه، قدام واحده كل يوم مع واحد، شكل انسانه خاينه ومريضه، انا كنت بقرب منها مش عشان بحبها، عشان انتقم منها على اللي عملته معايا.
بس عشان جوزها هيشهد عليا وهيقول على موضوع الخيانه، كان لازم اتصرف، اخويا عايش في الكويت، وما فيش حد عارف انه رجع مصر غيري، اخويا اللي دايما اهلي كانوا بيفضلوا عليا.
خليته نايم وفتحت الغاز، كنت عارف ان اول حاجه بيعملها لما بيصحى انه بيولع سجاير، ولما عمل كده الشقه انفجرت.
لكن ظهر في طريقي كمان، رامي اخو يسرا، حته عيل مدمن تافه عرف بالصدفه اني عايش، وفضل مراقبني، لحد في يوم ما واجهني وطلب فلوس كتير في مقابل انه يسكت وما يبلغش عني، بس هو مش هيكون اغلى عندي من اخويا، وجرعه زايده من الهباب اللي بيشربه ومن الحقن اللي بيضربها كانت كفيله انها تخل.ص عليه.
= طيب مش كفايه كده؟ خلاص مش عملت اللي انت عاوزه؟ آن الاوان بقى تتحاسب، ولا ايه؟
_ بس انا مش منتظر حسابك، انا خلاص قررت انهي حياتي بايدي، ايوه ما تستغربش، انا كنت عارف انكم جايين، وعشان كده اخدت حبة غلة قبل ما تدخلوا.
...
بمجرد ما خلص كلامه، مسك قلبه ووقع مكانه، وبدات رغاوي بيضه تخرج من بوقه ومات.
رغم كل اللي حكاه، الا انه فعلا مش مبرر على اللي عمله، مش كل واحد هيحس ان هو مظلوم هيق.تل وينتقم. خلصت القضيه، والكل مات، المجني عليهم والجاني.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
