 |
رواية جمعنا حرف الـ ش الفصل الثالث بقلم فاتن اسامة
الخطوات بتزيد
ناس داخلة وناس خارجة
وأنا واقفة ملتزمة الصمت قدام البوابة
بصيت ملقيتش حد!
كلهم مشيو وأخدوها المستشفي، وأولهم عمي جابر إللي باين عليه تعلقه وخوفه عليها
وقبل الخطوة الأولي إللي كنت هخطيها تجاه البوابة وألحقهم
قررت إني أدخل جوا
قرار متهور!
بس حلو، أنا بحب المغامرات
_ تخيلي كدا يا بت يا عشق لو دخلنا جوا وطلعنا عفريت من مصباح قديم ولا حاجة
وقالنا شُبّيك لُبيك
هتطلبي إيه!
'كل دا بكلم في نفسي
ولاقيتني متجاوبة والحديث بقا لذيذ'
أنا أمنيتي الوحيدة إني أتحب!
أتحب زي مانا من غير مجهود
وبالنسبة لشكل علاقتي بـ شريك حياتي
عندي دايمًا concept عن شكل العلاقة اللي حابة أكون فيها إنها تكون قوية، مش عايزة الحب الجامح ولهفة غير مبررة وإستعراض مبالغ فيه لأشكال الحب، أنا عايزة علاقة قوية وهادية، تحصل مشاكل ونعرف نعملها skip، نعرف نواجه غلاسة الناس وزحمة الشوارع وأصوات البشر وتُقل الشغل
يجيلي مهدود أصلبله ضهره
أروحله خايفة يُردني مطمنة
أصوات عقله تعلو أسكتهاله
كلام الناس يأذيني يمسح عني الأذى
أنا ببقى مطمنة لما أكون مع شخص قوي، قادر يحل مشكلة، يواجه كلام، يسمع بتركيز، يسعى لحلم، يخلق دُنيا
'وصلت الدور التاني'
_ دا كله عبارة عن أوض!
يا تري هلاقي السر فين
فضلت أتمشي بين الأوض
ومن كتر التمشية حفظت كام بلاطة في الدور
ولا إني تجرأت أدخل أوضة منهم
ولا إني ريحت نفسي وفضولي
وفجأة لفت إنتباهي أوضة منهم مفتوحة
باين عليها البهدلة، فـ دماغي جمعت إن دي أكيد أوضة وديدة، عشان من الخضة أخدوها بسرعة ومشيو
خطوة ثابتة وخطوة مهزوزة
حاساني حرامي داخل يحقق حلمه العريق في إنه يسرق الشقة إللي قصادهم
_ دا يخربيت فضولي
وفي الخطوة الأخيرة، لمست الباب
دخلت بـ ثقة مزيفة، وأنا بحاول أكون عادي
_ فيه حد هنا!
محدش رد، إيه دا؟
ما طبيعي محدش يرد
وقفت في وسط الأوضة، إللي قد شقتنا حرفيا!
واسعة وشباكها كبير، أنا نقطة جنبه
عيوني بدأت تمر علي كل شبر فيها
لطيفة ونَفَسها مريح
وقتها نسيت هدفي، ومفتكرتش دخلتها ليه
كل إللي شدني وقتها الصورة الكبيرة إللي قصاد سريرها بالظبط
لـ طفل عمره يوم
حاولت أحدد هي حقيقية لحد تعرفه
ولا مجرد صورة عجبتها
مقدرتش
ويادوب لمستها، حسيتها بتتحرك
_ دي بتتحرك!
مش ثابتة كأن وراها حاجة
شكي طلع في محله لما حركتها شوية ولاقيت تحتها صورة متثبتة علي الحيطة نفسها
لـ راجل وست بـ شعرها، إسود وحلو وملامحها هادية
مش أكتر من الراجل الوسيم إللي جنبها
حسيته شبه خالي عزيز بس ملامحه طيبة
هما مين دول!
= إنتي بتعملي إيه هنا؟
'لَفيت وشي بـ خوف من الصوت إللي جه ورايا فجأة'
_ أنت؟
= إنتي؟
_ أنت إللي بتعمل إيه؟
'مردش عليا لـ تاني مرة ومشي ناحية دُرج التسريحة
كان بيدور في أوراق بطريقة عشوائية'
_ بتعمل إيه في أوضة سِتي!!
= إنتي إللي بتعملي إيه في أوضة سِتي!
_ سِتك منين مش أنت إبن عمي جابر؟
= رخمة ورغاية كمان! وسعي كدا
'زقني من طريقه وطلع جري بعد ما أخد دفتر معرفش محتواه إيه ونزل بسرعة'
'طلعت وراه، وقفت علي السلم وعيوني معاه لحد ما خرج برا خالص'
معرفش ليه قلبي بدأ يدق بـ خوف
هيعرف الكل إني كنت في الأوضة!
بس أنا مكنتش بسرـق
'أخدت نَفسي وقلقي وتفكيري بشويش لـ أوضتي
برغم إني بخاف لما أكون لوحدي غير كمان دا بيت غريب عليا
بس حاولت أكون هادية'
ـ ألو! أيوا يا عشق
_ مين!
ـ أنا خالك يا حببتي خالك سعيد
'عيوني بدأت تدمع وفي لحظة كنت هعترفله بـ خوفي'
_ إنتو فين يا خالو ومشيتو وسيبتوني لوحدي
ـ سِتك تعبت فجأة ودلوقتي هي بخير
_ هتيجو طيب؟
ـ مش دلوقتي هي في العناية
هفضل جنبها أنا وخالك عزيز، والباقي هيكون عندك كمان دقيقتين بإذن الله متقلقيش
_ تمام
'قفلت معاه، لميت شعري، وفردت ضهري علي السرير
محتاجة أنام والليل قرب يخلص
دي أطول ليلة عدت عليا في حياتي'
ـ والموضوع إتفتح إزاي بقا! متقولوش إن نغم الغبية هي إللي فتحته
ـ أنا؟ أنا متكلمتش في حاجة يا سارة علفكرة
ـ والله؟ أومال هيكون مين غيرك غبي في البيت دا
- يمكن حسام أخوكي يا سارة، ما هو برضو مؤيد للموضوع دا، مش زي أبوكي إللي معندوش ضمير
- بعدين أبويا مين إللي معندوش ضمير يا...
'وقبل ما إيد جيجي تنزل علي وش نغم
كان إبن عمي جابر وقفها'
= زعيق وقولت ماشي، ماسكاها غسيل ومكوة وقولت برضو ماشي، إنما تمدي إيدك! ليه يا سارة أخوها ماـت؟
ـ سيب إيدي يا راشد أحسنلك
= ولو مسيبتش؟
- في إيه؟
'دخلت مرات خالي سعيد، فـ نغم جريت عليها وهي بتبكي بـ حرقة، ووراها مرات خالي عزيز'
ـ بصي يا ماما، بصي سارة
'مرات خالي سعيد شرانية شوية
دي يادوب دخلنا البيت وإتكلمت مع بنتها بهدلتني!
كانت لسه هترد، بس حسام دخل
فَض الخلاف وقال كل واحد يروح ينام'
-- معلش يا عمتي شربات إمسحيها فيا المرادي
ـ مش كل مرة أختك تقل منها وأنا أسكت
'ردت مرات خالي عزيز'
ـ معلش يا شربات، حقك عليا أنا
'الشرانية دي إسمها شربات!
شربات حادقة أكيد'
'إعتذرت وبعدين بصت لـ سارة بنتها وقالت'
ـ إطلعي فوق، يلا
'نزلت أنا بعد طلوع سارة
وفجأة الكل بصو تجاهي
وكأنهم نسيو وجودي من الأساس'
-- هي مين دي؟
'ردت مرات خالي عزيز'
-- دي بنت عشق بنت عمتك صفية أنت متعرفش ولا إيه!
'بَصِّلي حسام بـ إستغراب وطلع علي أوضته
والباقي طلعو واحد ورا التاني'
ـ مكانش فيه وقت أسلم عليكي
'إبتسمت'
ـ أنا نعمة الله مرات خالك عزيز
_ الخناقة دي كويس أنها حصلت
'ضمت حواجبها فـ رديت بسرعة قبل ما خيالها يسرح بيها'
_ أقصد عشان عرفت أساميكو، حتي عرفت إسم دا
'قولت الجملة الأخيرة وأنا باصة لـ...'
_ قولتلي إسمك إيه!
= عمك راشد بيه جابر
_ عمي منين إن شاء الله
'نعمة الله واقفة كاتمة الضحكة وكأنها متعودة علي إسلوبه المتعجرف'
_ تحط كوباية الشاي بـ تكشيرة، وقولنا ماشي
تسيبني ومتردش عليا، قولنا ماشي
وكمان ليك عين ترد عليا دلوقتي! يا بجاحتك والله
= عدي ليلتك
_ ولو معدتهاش يا دكتور البهاـيم؟
'ضحك فـ كملت كلامي بـ ضيق'
_ وبارد كمان
= بتستقلي بـ كليتي!
_ أهه
= تعرفي إن كليتي دي ليها أهمية كبيرة جدا يا عشق
'رديت بـ لامبالاة'
_ وإللي هي؟
= مخلياني أعرف أتعامل معاكي دلوقتي
'قال الجملة ولساني عجز عن الرد
وشي إحمر وعفارـيت الدنيا بدأت تتنطط قدامي'
= شكلك حلو وإنتي متعصبة يا قطة
'لمس مناخيري بـ خفة ومشي وسابنا
فـ قربت مني نعمة الله وهي بتقول'
ـ دا راشد بيحب يهزر وينكش في الكل بس قلبه طيب وإبن حلال
'قعدت علي الكنبة وأنا بقول بـ صوت عالي من الغضب'
_ هو مين دا عشان يكلمني بالأسلوب الوقح دا، ميعرفش أنا مين
= مانتي برضو متعرفيهوش هو مين
'رجعت خصلتين من شعري لورا وأنا بقول بـ عدم إهتمام'
_ إبن جابر البواب
= دراع وديدة اليمين
'بصيتلها بـ إستغراب فـ قعدت جنبي
مسكت شعري وبدأت تعمله ضفيرة وهي بتتكلم'
ـ وديدة وشاكر عبد ربه كانو ولاد عم، بيحبو بعض أوي من وهما صغيرين، والقدر جمعهم بفضل الله وإتجوزو، خلفت ٣ صبيان وبنتين
وعملو الإمبراطورية إللي إنتي فيها دي
'كنت لسه هبتسم بس لفت إنتباهي شئ غريب'
_ ٣ صبيان؟
ـ أيوا
'خلَّصت عمل الضفيرة فـ لفيت وبصيتلها بـ تركيز'
_ خالي سعيد وخالي عزيز، مين التالت
ـ إيه؟
'علامات التوتر بانت علي وشها
وكأنها نسيت نفسها وهي بتحكيلي'
_ الموضوع سر ولا إيه؟
ـ لا بس..
_ هو أنا مش واحدة منكو؟
'حضنت وشي بـ كفوفها'
ـ بيتك ومطرحك، بس الحكاية فعلا طويلة
حكاية حولت حياتنا لـ رماد
وكل دا بسبب الحب
'رجعت ضهري لـ ورا علامة لـ إهتمامي بالحديث'
ـ سمعت زمان جملة عجيبة:
يكفيك شر نار الست لما تعشق راجل
طلعت جملة حقيقية بمعني الكلمة
ونار الست دي هي أساس الرماد إللي إحنا فيه
_ هي مين!
