رواية سراج السادة الفصل الأربعون بقلم غسق ادريس
يُكَلِّفُ اللَّهُ نَفسًا إِلَّا وُسعَها لَها ما كَسَبَت وَعَلَيها مَا اكتَسَبَت ﴾
اللهم صلِّ على محمد وآل محمد
ادعولي ب الشفاء ♥.
التصويت + التعليق بين الفقرات
خلونا ويا السادة....
" مهره "
لدموع تساقط من عيوني بغزارة مو دموع عادية لا جانت تطيح من عيوني وتنهار مثل المطر
فركت إيدي بتوتر يحرك صدري أحاول أسيطر على رجفتي بس جسمي خانني
خجل؟
إي خجل وخوف من الي منتظرني من مصير يمكن يغير حياتي كلها
فتحت إيدي أباعلها… جانت ترجف
كأنو ايدي تستنجد
رجيفها يفضحني كدام الكل
بسرعة سديتها ضامتها بقوة عن أنظار الموجودين
ما كدرت أرفع عيوني
كل نفس يطلع مني يفضح ارتباكي
راسي ضل نازل
لأن الموقف الي انحطيت بيه بهاللحظة جان أقسى من كل موقف بحياتي موقف استزف طاقتي
اجاني صوت بنت
جان هادءء مثل النسيم رفعت راسي لا ارادي اريد اعرف صاحبه الصوت منو
شفت بنت حلوة واكفه كدامي مبتسمه ملامحها طفولية وهادئة جانت لابسة ربطه سودة وجبه سودة
شبهت عليها من جنت اروح للحوزة اشوفها
باوعتلي مبتسمه
حجت
_عاتكة :: باردة مو؟
عكدت حواجبي ب استغراب
_مهرة :: شنو؟
_عاتكة :: جاي ترجفين
دنكت راسي اباوع لايدي بعدهن يرجفن
سديت ايدي بقوة
رفعت راسي باوعتلها مبتسمه بخجل
_مهرة :: لالا مو باردة بس ايدي بيها رجفة
هزت راسها ب اي ساكته
مشت تكعد على القنفه كدامي ابتسامتها ماغابت عن وجهه
باوعت حولي شفت بنيه ثانيه كاعدة على الجهه الثانيه تباوعلي هم عرفتها هاي العلوية مهجان اتذكر حاجيه وياها ب الحوزة مرة
بس ماعرف يتذكرني لو لا
التفتت اني والبنات على طلعه العلوية جهاد
باوعتلي العلوية مبتسمه
حجت
_جهاد :: ها مهرة بنيتي شلون صرتي؟
هزيت راسي ب اي
حجيت بتوتر صوتي يرجف
_مهرة :: زينه علوية احسن
_جهاد': عندج طاقة تسولفين؟
دنكت راسي عيوني مدمعه
انهاريت بنفس الساعه ابجي واشهك بقوة ايدي على وجهي ضامته عن انظارهن
حسيت بيهن تجمعن حولي يحاولن يهدني
جنت منهارة كل ماتذكر الي صار وياي انهار واصرخ مرعوبه ماريد الي صار بيه يتكرر مرة ثانيه ماريد ارجع اعيش الشعور مرة ثانيه كل ماذكر الي صار جسمي يرجف
حسيت ب العلوية جهاد ضمتني لصدرها تمسح على ضهري واني بحضنها اشهك بقوة
خلتني براحتي ابجي ماسكتتني لو قيدتني ب دموعي جانت تمسح عليه بهدوء وهذا الشي زادني ب البجي
حسيتها تكلي ابجي طلعي الي بداخلج لاتكتمين
جنت مكسورة ومخذولة ابجي عتب ويا الدنيا على المواقف الي انحطيت بيها
ماجنت استاهل... !!
مر الوقت واني بمكاني العلوية ماطلعتني من حضنها جانت منطتني الوقت كله حتى ابجي وافرغ الي بداخلي
من حسيت نفسي ارتاحيت وعيوني وكفو دموع
رفعت راسي من حضنها بدون ماحط عيني بعين العلويات كعدت اعدل شالي وامسح بدموعي
اجاني صوت العلوية
جانت تحجي بطمأنينه تهديني وتحسسني ب الامأن
_جهاد :: كومي غسلي وجهج هسة البنات يحضرلج الغرفه حتى ترتاحين
هزيت راسي ب اي موافقة ماكدر ارفض هيج طلب اني اصلا ميته تعب وكوا كاعدة اريد بس ارتاح واغفى
يمكن يخف الي بداخلي
كمت من مكاني امشي خلف العلوية جهاد اخذتني ب اتجاه المطبخ اغسل نزعت شالي خليته على كتفي
اخذت من الماي البارد اغسل وجهي الماي جان بارد بس داخلي جان ناررر جنت احترك من جوا
سديت الماي واخذت شالي امسح على وجهي
سمعت صوت العلوية تحجي وياي
_جهاد :: كعدي اكلي يلا شوفي وجهج اصفر
_مهرة :: ماريد علوية مو جوعانه
_جهاد :: ماجاي اطلب منج اني جاي انطيج علم هسة راح تكعدين تاكلين لاتنسين الي بطنج ترا هذا روح يحتاج يتغدى
دنكت راسي اباوع لبطني ضحكت بيني وبين نفسي شلون نسيتك يا ماما من ضيم امك نسيت انت بداخلها
رفعت راسي للعلوية هزيت راسي ب اي موافقة
ابتسمت واشرتلي على الكرسي
سحبت الكرسي وكعدت ايدي على الطاولة
صارت عيوني على باب مفتوح ب المطبخ يطل على حديقة جبيرة
صفنت على الحديقة ب اعجاب الخضار تارس الارض والشجر بزواية الحديقة الوردة متوزع على اركان الحديقة جانت اكو مرجوحه بيضه صايرة على زاوية الحديقة على جهتها شجرة ورد وردي نازل المنضر جان يجنن ماعرف اوصفة
اتمنيت اطلع اكعد بيها الخنكه الي بداخلي تحتاج تتفرغ بهيج مكان هادء
فزيت على صوت العلوية جهاد
التفتت عليها واكفه كدام الطباخ تباوعلي
اشرت على الحديقة وحجت
_جهاد :: طلعي ب الحديقة تنفسي شوي على مايكمل الاكل
_مهره :: هاا
_جهاد :: يلا شوفي الجهه الثانيه راح تعجبج اكثر
جنت كاعدة بمكاني اباوعلها بصدمه شلون سمعتني شنو قرت افكاري؟ معقولة دهشتي ب الحديقة هيج فضحتني
باوعتلها بخجل استحي اكوم
حسيتها عرفت الي يدور براسي باوعتلي مأشرتلي امشي وراها
كمت من مكاني امشي خلفها مشت للحديقة واني وراها امشي توزعت عيوني على المكان بدهشة الحديقة جبيرة كلش باوعت للجهه الثانيه الي ماجانت طالعه من باب المطبخ
جان اكو مغتسل جبير وعلى الجهه الثانيه نبات متسلق على الحايط مغطي الحايط كله حتى المغتسل متخطى ب النبات انواع النبات والورد والشجر بزواية الحديقة ترتيب الحديقة يفتح النفس وريحه الحديقة تجنن
اختلطت الروائح بخشمي بس ريحه وحدة جذبتني اكثر من غيرها التفتت على مصدر الريحه مبتسمه
نبته الياس غمضت عيوني اشم ب النبته بهدوء عطرها يدخل لاحشائي مو بس لخشمي
فتحت عيوني بهدوء اباوع للورد
التفتت مالكيت العلوية عرفتها مشت حتى اخذ راحتي هنا
مشيت ب اتجاه المرجوحه عيوني تتوزع ب الحديقة
كعدت على المرجوحه اهز بنفسي على كيفي
جنت مرتاحه مرتاحه بطريقة غريبة ماعرف هل راحه منين اجت اني ويا اهلي ما ارتاحيت هيج
رغم اني بمكان بعيد عن اهلي وعن محافظتي وبين ناس غربة بس داخلي مطمأن ومرتاح
رفعت راسي لسما الدنيا مغيمه تريد تمطر
غمضت عيوني مرتاحه احس روحي بلبل طلع من قفصة شاف حريته
فتحت عيوني بخوف متذكرتهم شلون اذا اجوني راح يسلبوني هاي الحريه راح يرجعون يسجنوني
بلعت ريك بخوف كافي مهره كافي لاتذكرين شي انسيهم انتِ ماسويتي الى الصح
التفتت على صوت العلوية جهاد
جانت شايلة صينيه الاكل وجاية ب اتجاهي كمت من مكاني اباوعلها بخجل
حجيت
_مهرة :: تعبتج علوية
_جهاد :: تعبج راحه اخذي الصينيه خل اجيب الفرشة نسيتها
اخذت الصينيه من ايدها وهيا رجعت للمطبخ جنت مركزة بطولها جانت طويلة تقريباً من تجي تدخل للمطبخ وتوكف عند باب المطبخ طولها يوصل لنهاية الباب وهذا الشي زايدها جمال وهيبة اول مرة احب وحدة طويلة وانعجب بطولها خفت احسدها بكد ماركزت بيها
رجعت ب ايدها فرشة
فرشتها ب الارض على الحشيش اخذت الصينيه مني واشرتلي اكعد كعدت وهيا نزلت الصينيه
جانت مسوية كبه وسمبوسة طماطه وصحن لزلايط وصحن كيمر عرب واستكان جاي
الاكل يشهي مدري اني جوعانة اخذت الخبزة وكعدت اكل حتى استحيت منها عود توني كتلها ماريد مو جوعانه
جانت ساكته طول الوقت تباوع للحديقة ماتباوعلي عرفتها ماتريد تخليني استحي لو اتوتر من وجودها ونضراتها
كملت اكل وهيا ساكته ماحجت شالت الصينه مشت تطلع من المطبخ واني خلفها
دخلنا للمطبخ غسلت ايدي ووجهي ولبست شالي
طلعت العلوية واني وراها
شفت العلويات كاعدات ب الصالة كل وحدة بيدها قرأن ماخذة زاوية تقرة وحدها
اشرتلي العلوية امشب وراها
هزيت راسي ب اي ومشيت خلفها
فتحت باب الغرفة اشرتلي ادخل دخلت للغرفة
باوعتلي وحجت
_جهاد :: ارتاحي ونامي لاتقيدين روحج البيت بيتج محد من سادتنا موجود ف اخذي راحتج
_مهرة :: شكراً علوية تعبتكم وياي
_جهاد': ماكو تعب هذا واجبنا وانتِ بحمايتنا بعد.. ارتاحي بعدين وراج كعدة طويلة
دنكت راسي ساكته عرفت قصدها يعني تريديني احجي الي صار هزيت راسي ب اي ساكته طلعت من الغرفة خلتني وحدي
التفتت اباوع للغرفة مشيت ب اتجاه الجرباية كعدت على طرف الجرباية ايدي على بطني
مسحت على بطني بهدوء
حجيت كلماتي المعتادة الي تعودت احجيها من صرت حامل حسيت الي بطني تعود يسمعها كل يوي ويشاركني بيها
_مهرة ::_" عد واني اعد ونشوف ياهو اكثر هموم "
" من عمري سبع سنين وكليبي مهموم "
" راحو ويلي راحو بعد ماردو احبابي "
_"عندي وتخاف عليك وتدورك امك "
"موش بسواد العين بصبيها اضمك "
_" راحو ويلي راحو بعد ماردو احبابي "
" يل ماعليك هموم عونك ياهل الماي "
" جاخنيبت ومحيت لو بيك الي وياي "
_" راحو ويلي راحو بعد ماردو احبابي "
جنت احجي وعيوني تصب دموع
ليش هيج جاي يصير وياي ليش بس اني مجبورة اتحمل كل هذا الضيم
نمت بيومها ولاول مرة انام واني مرتاحه انام واني مطمأنة ومو خايفة بهذا اليوم مافزيت من نومتي ولا نمت واني حاضنه بطني وخايفة لا اكعد على سجينه تغرس احشائي
فزيت من نومتي على صوت جاي من خارج الغرفة الصوت طالع من تلفزون
كمت من مكاني امسح على وجهي اخذت الشال لبسته باوعت لروحي ب المراية بطني بارزة ب الدشداشة
رجعت اخذت العباية لبستها فوك ملابسي
ومشيت اطلع من الغرفة
فتحت باب الغرفه بتردد مستحيه اطلع عليهم فجأة
طليت من الباب ماشفت احد الصالة فارغه
طلعت من الغرفة افرك ايدي بخجل لا استحي اطلع بعد شلون
بقيت واكفة بباب الغرفة منتضرة وحدة من العلويات تمر
شفت العلوية عاتكه طلعت من المطبخ تنزل بردن ملابسها مبين عليها جانت تتوضى
رفعت راسها شافتني
باوعتلها بخجل مستحيه منها
ابتسمت بوجهي واجت ب اتجاهي تمشي
حجت
_عاتكة :: صح النوم
_مهرة :: يصح بدنج
_عاتكة :: زين كعدتي حتى تصلين ويانا
_مهرة :: اي اصلي بس اتوضة
_عاتكه :: اي تعاي وياي
مشيت خلفها للمطبخ توقعت راح اتوضى ب المطبخ بس لا اشرتلي على الحديقة مشيت للحديقة اشرت على المغتسل
_عاتكه :: هنا نتوضه
هزيت راسي ب اي نزعت العباية انطيتها الها
واني مشيت ب اتجاه المغتسل
كعدت اتوضى وبداخلي ادعي ادعي الله يخلصني من المصيبة الطحت بيها
كملت الوضوء لبست شالي والعباية ومشيت اني والعلوية نطلع من الحديقة
مشينه ب اتجاه باب موجود ب الصالة توقعت هاي غرفة بس من فتحت العلوية الباب انصدمت ب الي شفته
غرفة جبيرة موجود بيها رفوف مليانه كتب سجادات الغرفة على الرفوف والقرأين الي مسطرة واحد خلف الثاني محجر جبير مليان ترب ومسبحات
ريحه الغرفة عطرر بس مو مثل اي عطر عطر شامته بس بضريح الامام الحسين مثله ب الضبط
وكفت بمكاني صافنه على العلويات كلهن التفن يباوعلي
اشرتلي عاتكه ادخل للغرفة هزيت راسي ب اي سلمت ودخلت كلهن ردن ب ترحيب
العلوية جهاد جانت كاعدة ببداية السطر بصفها علويتين كبار يسبحن خلفهن نسوان يجي اعمارهن ب ٣٠
خلفهن العلويات الاعرفهن مهجان شاهيناز حوراء حميدة وخلفهن العلويات الاصغار
اشرتلي العلوية جهاد اجي بصفها
مشيت اكعد بصفها
كعدت بصفها مستحيه منها اجت عاتكة ب اتجاهي ب ايدها سبحه وتربة خلتهن يمي ورجعت خلفي
بقيت ساكته على سكوتهن
العلويات جانن يقرن قرأن واني اسبح
من اجه وقت الصلاة كامن العلويات واني وياهن نصلي ماعرف شلون الصلاة الي صليتها جانت عبارة عن هدوءء وسكينه
كملنا الصلاة اني كعدت اسبح والعلويات يقرن قرأن انتجيت على الحايط اريح ضهري طلعن العلويات الكبار من الغرفة
بقيت اني والعلوية جهاد وعاتكة وشاهيناز ومهجان وعلوية وياهن ماعرف اسمها اول مرة اشوفها
عرفت اسمها من العلويات حجن وياها اسمها " ملاك "
باوعتلي العلوية جهاد حجت بصوت ناصي تسمعني
_جهاد :: ارتاحيتي؟
هزيت راسي ب اي مرتاحة
هزت راسها ساكته
باوعتلها وحجيت
_مهرة :: علوية اني اريد اسولفج كل الي صار
رفعت راسها تباوعلي هزت راسها ب اي
حجت
_جهاد :: هسة البنات يطلعن حتى تاخذين راحتج اكثر
التفتن العلويات كلهن علينا
حجت العلوية شاهيناز
_شاهيناز :: يعني انطردنا؟
هزيت راسي ب لا اضحك
حجيت
_مهره :: عادي علوية مو مشكله احجي وهنا موجودات
_جهاد :: تمام براحتج اذا هيج
هزيت راسي ب اي
دنكت راسي اباوع للسبحه ب ايدي حضنت السبحه لايدي بقوة رفعت راسي اقوي نفسي ماريد اخجل من الي راح احجي
غمضت عيوني وبلعت ريكي
فتحت عيوني على اثر صوت صياح مسلم جاي من خارج الغرفة
كمت من مكاني مرعوبة ركضت على باب الغرفة اريد اقفلة مالكيت مفتاح الغرفة
بجيت بخوف شلون اذا اجاني هسة
التفتت على حمام الغرفة ركضت على الحمام دخلت وقفلت الباب
كعدت ب الحمام جسمي يرجف من الخوف يارب احميني والله يموتني هذا
كمزت من مكاني على دفعه باب الغرفة سمعت صوته يصرخ ويغلط
صرخت مرعوبة من دفع باب الحمام بقوة
صرخ بعلو صوته
_مسلم :: فتححيييي الببباب لجججج ادبسززززز فتحي الباببب لا اموتج
_مهرة :: مسلم شتريددد مني عوفني الله يخليك
_مسلم :: الله لايخليني اذا ماربيتج من جديد يامهرة ولج انااااا ترحين تشكين لعمامي مني انااا
خليت ايدي على حلكي ابجي بخوف
راح يكسر الباب حصرت روحي بزاوية المطبخ ابجي بخوف وينج يمه تعاي شوفي بتج وين وشبيها
صرخت بخوف ورعب من دفع الباب بقوة ودخل للحمام حسيت الطفل الي بطني راح يطلع من حلكي من الخوف
شفته وعساني لاشفته عيونه حمرر شعره مخربط وجهه شاحب وعيونه السواد ماليهن اجه ركض ب اتجاه ركضة مسودن ولكه شي يفرغ بي طاقته
سحلني من شعري واني اصرخ جوا
نزل عليه ضرب ب الحمام جان يضرب عشوائي مايهمه الضربة وين تجي اهم شي يضرب ويفرغ طاقتة المكبوته
رفع رجله ودفعني بنص ضهري صرخت من الوجع الي اجاني ماجنت مهتمه بنفسي خوفي جان على الي بطني ماردت افقدة بسبب ضرب مسلم
جرني من شعري
صرخت بوجع من حسيت شعري نشلع من جذورة
صاحت بقوة
_مسلم :: صرخي صرخي ولج اموتج اذا ماتصرخين اليوم اريد الناس كلها تسمع صوتج شكوو كواد اريدة يسمع صوتج
ضربني على ظهري مره ثانيه ضليت اصرخ بقوة اريد شخص يجي يطلعني من جوا ايدة اريد واحد يرحمني منه
جان يضرب بدون وعي جان يضرب بحركه كلب تعبان ويريد يطلع تعبه
انفتح باب الحمام دخلت مسرة وعمتي يركضن يردن يبعدنا عني
جرته عمتي تريد تبعده عني دفعها من كتفها بقوة رجعت بخطواتها للخلف طايحه على ضهرها
هنا نخبص الجو بصريخ عمتي ومسرة عمتي تصرخ من طيحتها ومسرة تصرخ على طيحه امها واني اصرخ من الضرب الي جاي يجيني ومسلم يصرخ لان جاي يضربني
دخلن نسوان حمويني هنا ورجولتهن ماهتمو بيه والي جاي احصله ركضو على عمتي يتصارخون
مسلم من شاف امه طاحت
اجه يضربني على راسي ويصرخ
_مسلم :: ارتاحيتي كله بسبجج ياجلبه يابت الجلب
غمضت عيوني اصرخ وابجي جسمي مايتحمل بعد ضرب جسمي انهك من هذا التعذيب بعد ماتحمل اني بداخلي روح جاي يأذوني ويأذون الي ببطني
مافتحت عيوني على من شالو عمتي وطلعو من الحمام ومسلم طلع وراهم بعد ماشبعني ضرب واذية
باوعت لروحي كاعدة بزاوية الحمام حاضنه نفسي ابجي كمت من مكاني اعرج على رجلي باوعت لروحي ب المراية شعري متكطع ووجهي مزورك من الكدمات باوعت لعيني ابجي
جنت منتضرة الزراك القديم يخف هذا زادد
سديت باب الحمام نزعت ملابسي ووكفت جوا الدوش ابجي تعودت كل يوم لازم انكتل
اني ماعرف شلون متحمله كل هذا
طلعت من الحمام بدون ملابس ابجي بوجع روحي تحركني ليش هيج شسويت حتى احصل كل هذا
بس لان شكيت لعمامي لان كتلهم مسلم يرجع للبيت سكران ومو بوعيه يرجع يكتلني ويأذيني ردت منهم حماية تالي ماجتني غير الاذية
لبست ملابسي وكعدت على الجرباية صافنه ويا روحي من يوم المسلم بلش يتعاطى بيه مخدرات ويسكر صرت ماشوف الراحه
مسلم صح ماجان زين من البداية وماجنت متقبلته ولا رايدته بس جان اهون ماجان هيج جان عندة حساس ولو شوي !!!.
اتحسرت امسح على بطني عيوني مدمعه اني الهاضمني محد يهتم ب اذيتي حتى امي من رحت شكيت الها جان ردها قاسي برد خاطري منها
اتذكر كلماتها من كالت
_جنان :: شبيج مهرة كل يوم جايتني تشكين من رجلج مو حتى راسي راح ينفجر
_مهرة :: لعد المن اشكي انتِ كله بسبجج ماوكفتي ويايي رحتي شمرتيني على مسلم
ضربت على افخادها بقوة تصيح
_جنان :: ب ايدي هيااا ب ايدي
_مهرة :: ييمه شبيج اكلج جاي يكتلني يمه البارحه جواني ب الجكارة شوفي زندي شوفي
طلعت الها زندي اشوفها الحرك باوعتلي ب انزعاج اتحسرت وحجت
_جنان :: هيا هاي المرة تنهان تنكتل مرجعها لرجلها انتِ مرة متزوجه بعد هاي طبيعي بين المتزوجين يمه ياهي ماتنكتل
صحت بيها من حركه كلبي
_مهرة :: ترا بس المذلولة ترضا على روحها الكتل
_جنان :: انجبي لج انجبي بس المذلولة شنو هسة انتِ مو انكتلني رضيتي وسكتي لووو لااا؟؟
دكيت على وجهي ابجي
_مهرة :: تعايريني انتِ وين اروح اجيج ترجعيني عليه اروح يمه يكتلني لو ادري بيج وادري ب اخوي تسندوني ارجعله والله اليوم اعوفة اليومممم
ضحكت من تذكرت الي صار بعدها اخوي محمد سمع كلامي تعارك وياي وامي طردتني من البيت مثل كل مرة واني الفطيرة ارجع الها بكل مرة اكول يمكن حنت ولانت يمكن يصحى ضميرها
بدت حياتي تسود ب الزايد مسلم صار مجنون نفسي
النوم صار شيء لايذكر عنده صار يطلع من البيت ويرجع الصبح دايخ اما سكران او متعاطي ومحد يطيح بيها غيري
هواي شكيت وهواي بجيت ردت بس شخص يساعدني شخص يخلصني منه ويحس محد
حتى اهله ب البداية جانو يوكفون وياي بعدين ملو لان شافو ماكو نتيجه من مسلم حتى ينصلح
بدى الخوف عندي من صرت اشوفة يحاول يقتلني واني نايمه
بكل مرة افز اشوفة صافن عليه السجينه ب ايدة واذا حجيت ويا لو ردت افهم ليش هيج يسوي
يجاوبني بكل ثقة وبدون خوف
_مسلم :: الي ببطنج مني يمتى ماتضوجيني اسلبه منج بهاي السجينه
توقعت الدنيا نسدت بوجهي وخلص ماكو امل اهرب من مسلم
بس بيوم من الايام جنت امشي اني وعمتي ومسرة تونا طلعنه من صحن الامام الكاظم عليه السلام
صادفني شخص اعرفه وشايفته قبل شخص خله وغزة بداخلي لان بيوم من الايام طلبت مساعدته وهوا تخلى عني
السيد مفرقد شفته واكف يحجي ويا سيد ثاني
وكفت بمكاني صافنه عليه مامستوعبة معقولة جاي اشوفة بعد هاي المدة كلها
حسيت بنغزة اجت بكلبي خليت ايدي على كلبي اباوعله
جنت صافنه عليه بنص الطريق عمتي ومسره يمشن مامنتبهات عليه
شفته هز راسة ب اي خلة ايده على صدرة يتوادع ويا السيد الثاني دنك رأسه ومشه يعدل بعباته عيونه ب الارض
رجلي وحدهن اخذني صرت امشي خلفه بدون مايحس عليه مامهتمه لعمتي ومسرة وين راحن
ماوكف مشي واني هم ماوكفت اتبع خطواته
من شفته راد يدخل لامام هنا عرفت اذا دخل بعد ماكو امل التقي بيه
وكفت بمكاني وصحت بصوت عالي
_مهره :: سيدد مفرقد
وكف بمكانه ملتفت ب اتجاهي صارت عينه عليه عكدت حواجبه للحظات بعدها فتح عيونه ب استيعاب متذكرني
ومن هاي الحظة بدت حياتي تتغير....
رفعت راسي باوعت للعلوية جهاد
_مهرة :: اكيد السيد مفرقد حاجي الج الي صار بعد
هزت راسها ب اي
_جهاد :: حجالي واني هم ردت اسمع منج
_مهرة :: علوية اني ماريد ادخلكم بمشاكل وياي ولا اريد اصير سبب ب اذيتكم بس اني محتاجه مساعدتكم بعد الي صار والي سويته محد من اهلي يتقبل وجودي او يرديني
اخذت ايدي ب ايدها تطمني
_جهاد :: احنا يمج اطمني مستحيل نعوفج وحدج
_مهرة': علوية قبل كلشي اريد اطلب منج طلب بس اتمنى ماترديني
_جهاد :: عيوني الج
اتحسرت وحجت
_مهرة :: علوية اني ماكدر اكعد هنا بينكم
_جهاد': ليش اكو احد زعجج؟
_مهرة :: لا والله محد زعجني بس اني يعجبني اعيش وحدي وماكدر اكعد وياكم وانتو عائلة واني مارتاح بكعدتي
صفنت العلوية جهاد
باوعتلي وحجت
_جهاد :: مهره ابوي مستحيل يقبل تطلعين من البيت دام هوا جابج جوا عباته تضلين جوا عباته
_مهره :: الله يخليج علوية ماكدر والله ماتقبل ولا ارتاح بكعدتي
هزت راسها ب اي ساكته فعلاً اليوم الثاني بليل بعد الحاح على السيد وتواسيل وبجي مني يلا قبل اطلع
وماقبل اكعد وحدي كعدني ويا مرة جبيرة عايشه هيا وبنتها ب البيت وحدهن بيتهم قريب على الامام علي يعني تمشايه دقايق نوصل للامام
من هاي الحظة اكدر اكلكم بلشت حياة مهرة من جديد
" شاهيناز "
طلعت من الغرفة بالي بعيدد الافكار تجيني وتوديني
كعدت على القنفه ب الصالة صافنه
التفتت على صوت باب غرفة اهلي طلع ابوي من الغرفة يعدل بعمامته
رفع راسه شافني كاعدة ب الصالة وحدي ابتسم واجه يمشي ب اتجاهي
اخذ راسي باسة
كعد بصفي حاضني من اكتافي
حجه
_منتظر :: شلونها بنيتي
_شاهيناز :: الحمدلله سيد انت شلونك
_منتظر :: انا اصير زين بشوفة بنيتي الحلوة
ابتسمت بفرح على كلام ابوي
رجع حضن راسي يبوسة
اخذ ايدي يمسح عليها بهدوء
حجة
_منتظر :: شهودة بابا عندي وياج موضوع وانا الصراحة خجلان ومتردد احجي نوعاً ما
_شاهيناز :: ليش سيد احجي اسمعك
ابتعد عني متربع بمكانه باوعتله متردد يحجي ماعرف السبب وشنو يريد يحجي بس توتر ابوي خلاني اخاف اسمع الي يريد يحجي
باوعلي وحجه بتركيز
_منتظر :: انتِ بنيتي وعزيزتي وانتِ تعرفين معزتج عندي ومكانج بداخل ابوج
_شاهيناز :: اكيد ماشك بهاي المعزة
ابتسم على كلامي سحب راسي باسه
رجع باوعلي وحجه
_منتظر :: بابا شهودة انا راح انطيج الموضوع وانتِ اكعدي ويا نفسج اخذي راحتج ب القرار والتفكير الج المدة كلها تراجعين الموضوع ويا نفسج لان ب النهاية انا اريد قرار صاب وصح وانا ماريد اضغط عليج لا انتِ حرة والقرار الج
هزيت راسي ب اي اسمعه
كمل كلامه
_منتظر :: تذكرين الموقف الي نحطيتي بي الماضي بسبب جادح وزوجته الموضوع انا ازعجني بشدة ولهذا اليوم افكر بيه ومحمل جادح السبب ب الي صار
دنكت راسي بخجل متذكرة الموقف وقت جميلة تهمتني عندي شي ويا جادح
كمل ابوي كلامه
_منتظر': الموقف هذا صار من الماضي ونسدت صفحته ومانريد نعيدة ونعيدة مشاعرة
ب السابق انا كلت مستحيل افكر انطي بنتي لجادح بعد الي صار. تعرفين شنو السبب؟؟
هزيت راسي بلا
حجه
_منتظر': لان انا ماردت تصيرين خيار ثاني بين جادح وزوجته مو لان انا ماريدج ويا جادح. جادح ابن عمي واعرفه زين والنعم منه بس اليوم
رفعت راسي اسمع لكلام ابوي بفضول
ابتسم ابوي من شافني رفعت راسي
حجه
_منتظر :: جادح يابنتي طالبج مني وهل مرة انا ماكدر ارفض لان الرجال وحيد ومحتاج انسانه بحياته وهوا مختارج انا مارفضت ولا وافقت انا كلت القرار ب ايد بنتي هيا التقرر اي لو للا انا رجال اسلم بنتي بس ما اجبرها
بلعت ريك بتوتر وخجل من كلام ابوي دنكت راسي افكر ايدي خجلانه
صارت ايد ابوي على راسي حجه
_منتظر :: بنتي جادح خوش جادح ويستاهل الخير وانتِ الخير
رفعت راسي باوعت لابوي وحجيت بتردد
_شاهيناز :: سيد اني...
_منتظر :: براحتج بابا اخذي راحتج ب التفكير اريدك تصفنين ويا نفسج وتشوفين الصح موافقتج او رفضج انا ماجبرج عليهن
ختم ابوي كلامه بقبلة على راسي قبل لايغادر البيت متوجه للحوزة
كعدت بيومها صافنه
قراري؟ اني موافقة اي موافقة بس ماعرف اكدر اكمل حياتي ويا جادح بعد كل الي صار؟
ثاني طلعت من غرفتي ارد الخبر الابوي
جان ابوي وساجد اخوي كاعدين ب الصالة مشيت ب اتجاه ابوي كعدت بصفه مستحيه
مادري ليش ماريدت الخبر ب ايد امي ليش اني الي رحت
باوعت لابوي باوعلي بفضول منتضر احجي وانطق
دنكت راسي افرك ايدي
حجيت
_شاهيناز': بابا اني موافقة
رفعت راسي اشوف رد فعل ابوي شفته مبتسم غمض عيونه وهز راسة ب اي حجيت بسرعه اصحح موقفي
_شاهيناز :: اني مو مستعجله بس حتى انت لا تكعد تنتضرني
ضحك ابوي اخذني لحضنه يمسح على راسي
يمكن البعض يشوف موقفي وتسرعي برد القرار استعجال مني بس لا اني جنت ماخذة قراري من قبل
ثاني يوم الكل عرف والكل جان مصدوم واني اصلاً جنت مصدومه من نفسي
السيد من شافني ابتسم فرحان يغمزلي
دنكت راسي خجلانه من السيد اضحك على رد فعله
" صفية "
حجت امي
_وفاء: اكلك خاف يجذب عليك دلهب؟
التفت حازم على امي
ضحك وحجه عيونه على الطريق
_حازم :: لالا هل مرة صدك ناويها ابنج
_وفاء :: وعود ليش من النجف شنو خلصن النسوان ببغداد؟
ضحك حازم وحجه
_حازم :: يكولون نسوان النجف سبعات محد يسوك عليهن خاف الج نيه يعني تسوكين على جناينج دلهب جابلج وحدة من النجف هيا ادبج فوك روسنا
باوعت امي لحازم صفح ماعاجبها كلامه
مشه حازم ب السيارة ب ارجاء وطرق محافظة النجف
بعد ما اجانا خبر من دلهب يريد يخطب وحدة من النجف امي ماسمعت خبر بسرعه جابتنا واجت تركض
وكف حازم بسيارته كدام بيت باوعت للبيت جبير بس قديم يعني من البيوت القديمه هنا
نزلنا من السيارة اني وامي نباوع للبيت مادري بيت منو هذا معقولة بيت البنيه نفسها الدلهب يريد يخطبها؟
قبل لا نفكر ونكعد نحلل طلع دلهب من البيت مبتسم كبرت ابتسامتي لشوفته فرحانه واخيراً شفته بعد طول هل مدة
ركضت عليه اني وامي فرحانات حضني اني وامي ب ايد وحدة لصدرة اباوع ايدة الثانيه ملفوفة هيا هاي ايدة الي تصوبت
باس راس امي مبتسم بفرح لجيتها رجع باس راسي
باوعلي وضحك
_دلهب :: ها فصعونه
ضربته امي على كتفه تعاتب بي شلون ماحجالها على الحادث الي صار جان يحجي وياها واني عيوني على البيت
باوع النا دلهب وحجه
_دلهب :: يلا بوية دخلن جوا ليش واكفات
_حازم :: ماكو زلم تعزب
التفتنا اني وامي على حازم بسرعه صاح
_حازم :: بس دلهب محشوم
هز دلهب راسة ساكت اشر النا ندخل
دخلنا اني وامي ودلهب خلفنه قبل لايدخل حازم سد دلهب الباب بوجهه وقفله من جوا
مشه كدامنا واحنا خلفه
سمعت صوت حازم يصيح بس مادري منين جاي صوته يمكن يمكن من شوقي اله صوته جاي يجي ب اذني
دخلنا للبيت صارت كدامنا الصالة جانت مفروشة شتوي والتدفئة بنص الصالة فوك التدفئة قوري جاي مهيل شلون عرفت مهيل ريحه الجاي اجتني اول مادخلت لصالة اجواء الغرفة تجنن ودافية
كعدنا اني وامي ب الارض ودلهب بقى واكف باوعت امي لدلهب وحجت ب استغراب
_وفاء': ولك دلهب هذا بيت منو؟
_دلهب :: بيت داوود
هزت امي راسها ب اي ساكته
التفتت اني وامي على الصوت الي اجانه
كمنا من مكانا على التهليل والترحيب الي اجانا من ام داوود وسلامها الحار
جانت مرة قمه ب الخلاق والترحيب ضيفتنه وكعدت ويا امي تسولف وتضحك وامي مندمجه وياها ب السوالف
كعد دلهب منتجي على الحايط يكلب ب تلفونه حواجبه معكودة ب انزعاج
بعد مدة طويلة من السوالف حجت ام داوود ب ابتسامه
_ زينب :: خيه بيت السادة ونعم منهم اني هم خطبت لابني داوود وحدة من علوياتهم
_وفاء :: يااا صدك ب المبارك
_ زبنب :: اي والله شلون ناس هيج حسيت روحي مالكه الدنيا من وافقو على داوود
اتونست امي بمدح ام داوود
تحمست اكثر على مدح ام داوود اكيد
اتفقنه اني وامي نروح لبيت البنيه نشوفها
جنت اشوف فرحه دلهب وحماسة كل شوي يشوف الساعه منتظر الوقت الي نمشي بيه
الى ان اجه الموعد الي نروح بيه
مشينه اني وامي ويا دلهب بسيارة حازم
اباوع لحازم مطنكر مايحجي ويانا مادري شبي
كل شوي يلتفت دلهب على امي
_دلهب :: يمه ماوصيج شنو يطلبون كولي تم
_وفاء :: واذا سألوني على شغلك؟
_دلهب :: يعرفوني يمه ولدهم اصدقائي لاتركزين بسالفة الشغل
هز دلهب راسة ب اي ساكت
صفن شوي ورجع التفت على امي
_دلهب :: يمه اريدها ترا
ضحكت امي تهز راسها ب اي
_وفاء :: الك يمه ومو لغيرك
سكت دلهب يباوع لجامه المراية يفرك ايديه
بعد طول الطريق وصلنا للبيت
قبل لا ننزل حجه دلهب
_دلهب :: يمه ماوصيج اسمها العلوية عاتكه
نزلنه من السيارة اني وامي
وكفنا كدام البيت
عيوني صارت على الشجر النازل من الحايط التفتت على امي مبتسمه
_صفية :: ها ام دلهب مستعدة؟
_وفاء :: مستعدة يلا
مشينه ب اتجاه الباب نطرق عليه
جنت متحمسه وفرحانه اريد اشوف البنيه الي اختارها اخوي
سمعنا صوت رجال صوته خشن جاي ب اتجاه الباب ابتعدت اني وامي عن الباب منتظراته يفتح النا الباب
انفتح باب البيت صار كدامي شخص طويلل لحيته كثيفة محددة عيونه كبار وسود بشرته بيضة تلم لمع لابس دشداشة سودة دنك راسة سلمت امي وهوا رد السلام
_وفاء :: وليدي رايدة العلويات
_غضيمر :: اي تفضلي يمه
دخل جوا البيت واني وامي بقينه واكفات منتظرات وحدا من العلويات تجي تستقبلنه
فعلاً دقايق وطلعت مرة جبيرة تهلي بينه
_لباب :: هلا يمه زارتنا البركه تفضلن ليش واكفات
تسالمنه وياها ودخلنا جوا
طبعاً هما مايدرون بينه جايين على خطبه لان ام داوود انطتهم علم جايين نريد نحجي ويا العلويات بي ماحددت ليش
دخلنا اني وامي جوا خلف العلوية كعدنا ب الصالة على القنفه العلوية ترحب بينه وتهلي طلعن نسوان بعد يسلمن علينه
بقينه كاعدات اني وامي ب الصالة والعلويات كاعدات كدامنا يسولفن
صار عندي فضول اريد اشوف العلوية الي يريدها اخوي وين عيوني تتوزع ب المكان
حسيت بروحي احتاج اروح للحمام استحيت ب البداية احجي بس بعدين ماتحملت
باوعت للعلوية
_صفية :: علوية اريد اروح للحمام اغسل
_لباب': اي بنيتي... عاتكهه عاتكه يمه تعاي وينج
دقايق ونزلت بنيه من الدرج
جانت تجنن نسمه نسمه وتمشي
سلمت علينه وحجت
_عاتكه :: ها علوية
_لباب :: اخذي البنيه للحمام
هزت راسها ب اي باوعتلي واشرتلي اكوم كمت من مكاني هيا تمشي كدامي واني خلفها جنت صافنه عليها مركزة بخطواتها وشكلها
التفتت عليه ب ابتسامه اشرتلي على الحمام هزيت راسي ب اي ومشيت ادخل للحمام واني اقارن بينها وبين دلهب
هاي ناعمه كلش من شفتها انطيتها عمر 17 على بنيه جسدها ودلهب ماشاء الله طول بعرض ماعرف شلون رهمها براسه ياخذ وحدة ماتوصل لصدرة
طلعت من الحمام واني بعدني اقارن بينهم باوعت عاتكه ماموجودة ماهتميت كعدت اغسل ايدي
باوعت للمكان محد موجود
فتحت الشال ارجع الفه دام محد موجود فتحت شعري حتى ارجع اربطه مرة ثانيه كتر الشعر ب ايدي فزيت على صوت باب نفتح
التفتت على الباب بسرعه شفته توا يطلع مامنتبهه عليه رفع راسه صارت عينه بعيني رفعت شالي اغطي بيه وجهي ناسيه شعري
سمعته يستغفر راجع من المكان الاجه منه باوعتله اختفى بسرعه لفيت شالي ورجعت اركض لمكاني ايدي ترجف
كعدت بمكاني اباوع لامي كاعدة كدام العلوية تاخذ الها خيرة عكدت حواجبي ب استغراب شنو جاي يصير امي جاية تاخذ خيرة لو تخطب؟
رفعت راسي على دخله عاتكه جانت عاكدة حواجبها تتلفت من شافتني فتحت حواجبها مبتسمه
_عاتكه :: اكول وين راحت
ابتسمت بوجهه خجلانه من الموقف الي صار
نفس الشي الي فتح الباب النا هوا نفسه الي توني انثولت كدامه ادري ليش غطيت وجهي ليش مو شعري ليشش
بسبب هذا الموقف بالي كله اتخربط حتى مانتبهت امي شحجت وشصار الي اتذكرة بس ودعنه العلويات وطلعنه
اخذنا دلهب وحازم وكل مايحجي دلهب امي تكله ب البيت ب البيت احجيلك
رجعنا للبيت ودلهب على نار شوي ويطك من الانتظار
رحت ويا ام داوود اساعدها ب الطبخ وامي ودلهب كعدو وحدهم ب الصالة
من رجعت لصالة
اباوع لدلهب يهز رجلية بعصبية ماطايق روحة
باوعتلة امي وحجت بهدوء مبتسمة
_وفاء:: ولك يمة والله استحيت اكلهم جاية اخطب بنيتكم
كمز دلهب من مكانة فاتح عيونة
صاح ب استغراب
_دلهب:: ليششششس استحيتي؟؟؟
_وفاء:: ولك يمة سادة ويسطرون هذول ومو اي سادة سادة ال.... كلها تحلف ببختهم تريد ينطوك مرة يا بعد امك اني من دخلت للبيت ضليت صافنة
ضربت على رجليها وصاحت بقهر
_وفاء:: ولك يمة ريحة البيت ايمان ودين اني اعرف الدين يبين ب الوجه ب الخلاق بس ريحة؟ لا ماشايفة ولك يمة البيت مريح من دخلت وكعدت كلبي مطمأن والعلويات حتى ببيتهن لابسات جواريب وشال وين لاكيها هاي يابعد امك
جان دلهب يسمع لامي صافن عليها مامستوعب الي تريد توصلة الها
رجعت امي حجت
_وفاء:: اني يشهدددد الله علية اول مارحت نيتي اخطبها الك بس من شفتهم وشفت ايمانهم كتلهن اريد اخذ خيرة
ضرب دلهب على وجه بعصبية
_دلهب:: اخذجج تخطبيني ترحين تاخذين خيرة؟؟
_وفاء': من فشلتي
دك دلهب على وجهه مامستوعب
_دلهب ::صدك تحجين يعني انا ماخليت خالتي ام داوود تروح وياج ولا كتلهم راح ادز امي حتى تشوفيننننن يقبلون ينطون بتهم لوو لا ترحيننن تاخذين خيرة؟
_وفاء :: بس خوش خيرة ياخذن
هنا دلهب كلش انفجر ماتحمل كام من مكانه منزعج من امي ومعصب بس ماراد يطلع نارة بساعتها
باوعت امي اله تضحك
عكدت حواجبه وصاح كاتم عصبيته
_دلهب :: ليش تضحكين يمه انا بيااا حال جاهل انا وتضحكين عليه؟
_وفاء :: كالت جايتكم فرحه قريبه
هز دلهب راسة ب اي ساكت
حجت امي بضحكه
_وفاء :: حجيت وياهن كتلهن اني ام دلهب وجاية اطلب ايد بنيتكم عاتكه
التفت دلهب على امي فاتح عيونه بصدمه
كملت امي كلامها ب ابتسامه
_وفاء': كالن نحجي ويا السيد ونرد خبر يعني نوعاً ما موافقين
" مهجان "
نزلت الدرج مبتسمه بفرح فرحانه بهذا اليوم فرحانه مثل اي بنت بحياتي الجديدة
اليوم خطبتي من داوود
باوعت للبنات كلهن فرحانات بيه
محد مصدك اجه هذا اليوم اجه اليوم الي راح تزوج بيه حفيدة من حفيدات السيد عبد الرؤف واني اول حفيدة بين حفيداته يفرح بيها
كعدت على الكرسي كلنا منتضرين جيه داوود واهله الخطبه جانت بيوم الجمعه خطبه عائلية ماعزمت ناس للحفلة حبيت تكون بينا بس كعائلة اهلي واهل داوود بس
مر الوقت واجو اهل داوود دخلت امه تهوس بعابتها وتهلهل كمت من مكاني ابوسها اخذتني بحضنها فرحانه بيه
كعدت بمكاني اباوع لفرحتهم
شعوري جان عادي ماجنت متوتره بزيادة لا عادي يعني لابأس بمشاعري
حتى من كمت اعقد ماجنت متوترة ورديت موافقتي بهدوء ورجعت لمكاني
دخل داوود سلم عليه وباسني من راسي وكعد بصفي ايدة ب ايدة حسيت الوضع غريب شوي يعني فجأة شخص ب الجديد تعرفي يصير يلزم ايدح ويبوسج؟
خلصت الحفلة ولان مابيها هواي اجواء مرت بسرعه بس بهذا اليوم صرت مخطوبة وصار عندي انسان يشاركني بحياتي
كلش جنت حابه وجود داوود بحياتي جان نسمه هادئة والي جان يجذبني بداوود هدوئة هذا الشي الي جنه ثنينه نحبه ومنسجمين بيه هوا هدوء داوود
بعدها بفتره تزوج غل وخلود راحن البنات بس اني لا مارحت
اكيد عرفتو شاهيناز وجادح راح يخطبون؟ اي السيد حجه بموضوعهم بس مارسمو على يوم محدد للخطبه
ومانسى عتوكتي الحلوة نخطبت ولمنو؟ لدلهب متخيلينن؟؟ دلهب وعاتكه؟؟؟؟
كذالك نحجه بموضوعهم بس ماصار موعد محدد والسبب جان السيد رافض هذا الشي
لاحظت بهاي الفترة صارت حرب باردة بين السيد وعمتي جهاد محد عرف سببها بس واضح حرب قاسيه من عمتي تسببته بمرض السيد وطيحته
حياتي جانت هادئة خالية من الاكشن كلشي بحياتي هادء...
" قدس "
طلعت من الغرفة ايدي على بطني. وكفت بباب الغرفة مغمضه عيوني متوجعه من ألم بطني
فتحت عيوني من سمعت باب غرفة غل وخلود انفتح
شفت خلود تطلع من الغرفة ماجانت منتبهه عليه
سدت باب الغرفة والتفتت باوعتلي ب استغراب عاكدة حواجبها اجت ب اتجاهي تباوعلي
حجت
_خلود': ها قدس شبيج؟
_قدس :: مابية شي
_خلود :: شلون مابيج شي شوفي حالتج ووجهج اصفر
صكيت على سنوني من وجع بطني
باوعتلها وحجيت
_قدس :: لا مابية شي بس شوي تعبانه هسة بس ارتاح اصير زينه
_خلود :: رجعي ارتاحي بغرفتج شتسوين طالعه اني انظف البيت عوفي انتِ لاتسوين شي
نفخت نفس احاول ماصرخ من الوجع الي جاييني ببطني باوعتلها وحجيت
_قدس :: مختنكه من غرفتي
_خلود :: هااا اي اذا هيج تعاي نكعد ب الصالة
هزيت راسي ب اي ساكته اخذتني خلود من ايدي تمشيني. ايدي الثانيه جانت على ظهري كوا امشي من بطني هاي اخر ايام شهري ماعرف بيا وقت تصير عندي ولادة والموضوع كلش مخوفني
نزلت اني وخلود للصالة شفت عمتي كاعدة تلبس بجواريبها لابسة اسود تريد تطلع صبحنه عليها اني وخلود مستغربات ليش لابسة اسود ووين رايحه؟
حجت خلود سابقتني
_خلود :: ها عمه وين؟
_رنا :: عدنا فاتحه ب الحلة اني والولد رايحين
_قدس :: رايحن للحله؟؟؟
كامت من مكانها بعد ماكملت لبس جواريبها باوعتلي وحجت
_رنا :: اي عيب لازم نعازيهم.. وتعاي قدس شبيج يمه ليش هيج شاحبه؟
_قدس :'لاعمه مابيه شي توني احجي ويا خلود كتلها شوي تعبانه بس ارتاح اصير زينه
باوعتلي وحجت بشك
_رنا :: متأكدة خاف تصير عندج ولادة واحنا مو هنا شوفي روحج زين حتى ابقى اني وغضنفر كلشي يصير
_قدس :: لاعمه عليمن روحي ماعندي ولادة بس وجع بس لا ماعتقد ولادة
هزت عمتي راسها ب اي التفتت على خلود وحجت
_رنا :: خلود انتبهي على قدس وعينج عليها
_خلود :: اي عمه بعيوني قدس
_رنا :: سالمه عيونج.. يلا وهاي كفاية خليها تكعد من النوم لاتطول بنومتها
_خلود :: صار
لبست عمتي عباتها واني كعدت على القنفه امسح على بطني طلعت خلود تحجي ويا غل واني بقيت كاعدة بمكاني
سمعت عمتي تحجي ويا غضنفر التفتت عليهم شفت غضنفر يباوعلي ب استغراب وخوف اجه ب اتجاهي كعد كدامي متربع اخذ ايدي وحجة
_غضنفر :: قدس تعبانه ابقى يمج؟
_قدس :: لا غضنفر روح مابيه شي
_غضنفر :: شلون اعوفج خاف تصير عندج ولادة؟
ضحكت امسح على بطني
حجيت مطمنته
_قدس :: لا مو اليوم تنور بنتك
ابتسم بفرح على كلامي باوع لبطني بحماس مسح عليها وحجه الضحكه شاكه وجهه
_غضنفر :: امنيتي تنور الدنيا اليوم قبل باجر
_قدس ': اني هم تعبت واني انتظرها
_غضنفر :: مابقى شي حسبي احسابها ويانا بعد
ابتسمت بفرح اهز راسي ب اي
كام غضنفر بعد ما اتأكد اني بخير باس راسي ومشو عمتي وغضنفر وغل وجادح جان سابقهم من البارحة
بقيت كاعدة بمكاني صافنه ب الفراغ ماعندي شي اسوي كسر صفنتي صوت رن التلفون باوعت لتلفون قس جاي تتصل كامرة
فتحت الخط اجاني وجه قس وصوت اصياح نضال
حجت قس بصياح وحماس
_قس :: ولججج عميي محمد يريد يتزوج على نضال وهسة نضال محضرة المكص تكول اريد اطه# رة
اجاني صوت نضال تصيح
_نضال :: متونسه قسسسس متونسه عمج يزوج عليج ولج عبالج كل نسوان العم مثلي تجيج وحدة تكفخ بيج
_قس :: اي وشنو انتِ فقيرة هم تكفخين بينه
نزلت نضال على قس غلط وقس تضحك اخر شي سدت الاتصال ماعرف وين راحت اعتقد نضال كسرت التلفون على رأسها
طلعت خلود من المطبخ تباوعلي بخجل عاضه على شفتها اجت كعدت كدامي تريد تحجي بس مترددة
طبعاً علاقتي ويا خلود سطحيه كلش مابينه سوالف ولا ضحك وبنفس الوقت مابينه كره ومشاكل اني ماعندي مشكلة وياها بس من اشوفها اتذكر اختي قس وكسرتها وبنفس الوقت هيا حبابة وماعدها شي وياي يعني ماله داعي اكرهه
حجت خلود بعد حرب طويلة بينها وبن نفسها
_خلود :: اكلج قدس صدك سؤال بس يعني فدوة لاتعتبري تطفل وتدخل مني
_قدس :: سألي
بلعت ريك وحجت بتردد
_خلود :: هيا هاي اختج قس هم رجعت حجت على غل يعني بعدة ببالها لو بعدها مقهورة منه لوو اتخطت عادي؟
رفعت حاجبي اباوعلها صفح
من شافت نضراتي وشلون ماعجبني سؤالها استحت وحاولت تعدل موقفها
_خلود :: لا والله باعي مو مثل ما اجه ابالج.. اني اقصد يعني نست وعاشت حياتها لان والله اني عايشة بتأنيب ضمير لا اكون سبب بحزنها
هزيت راسي ب لا وحجيت بعدم اهتمام
_قدس :: لا تخافين قس تخطت وعاشت حياتها وعلى فكرة اكيد تعرفين هيا بموافقتها صار زواجج انتِ وغل ف هيا تخطت من نفس الساعه وقس بطلة ترا مستحيل تحزن على هيج اسباب
هزت راسها ب اي ساكته
رجعت باوعتلي عاكدة حواجبها ب استغراب مثل المتذكرة شي
_خلود :: صدك قدس شبيج البارحه بالي ضل يمج؟
عكدت حواجبي ب استغراب
_قدس :: شبيه؟
_خلود :: ماعرف من اجيتني بليل على المكص حسيتج حيل تعبانه ردت اسألج بس من شفتج ماتحجين سكتت
رفعت حاجبي مامستوعبة ولا فاهمه الي جاي تحجي
حجيت
_قدس :: البارحه اني ماجيتج على مكص؟
_خلود :: لا شلون اجيتي بليل الساعه ب 2 وونص يمكن هيج شي
غمضت عيوني وفتحتها بصدمه
حجيت بعدم استيعاب
_قدس :: يمتى هذا الحجي؟
_خلود :: قدس شبيج؟.. البارحه بليل من اجيتي لغرفتي جنتي لابسة دشداشة بيضه وشعرج فاتحته حتى استغربت لان اعرف بيج تلبسين الشال من تجيني لان غل موجود
ضحكت اباوعلها
حجيت
_قدس :: تضحكين عليه شنو؟
_خلود :: لا والله ليش؟
_قدس :: خلود اني البارحه نمت ب 11 ماكعدت بعد ولا جيتج اصلا ومالابسة دشداشة بيضه اني بهاي دشداشتي من البارحه
صفنت خلود بوجهي تحاول تفهم او تستوعب الي جاي احجي
ضحكت بخوف
_خلود :: لا باعي ترا اني اخاف لاهيج تشاقين وياي
_قدس :: اشاقة ليش
_خلود :: لان انتِ البارحه اجيتي لغرفتي وطلبتي المكص مني وقتها جنتي تعبانه وصافنه حتى من حجيت وياج مارديتي عليه وعفتيني ومشيتي
بقيت صافنه بوجهه بخوف ماعرف هيا تتخيل لو اني صدك رحت لغرفتها معقولة صدك طلعت من غرفتي؟؟؟ لالا مستحيل اني اتذكر البارحه نمت من وكت وماكعدت بغير وقت
باوعتلها وحجيت مأكدة كلامي
_قدس :: اكيد تتخيلين لان اني اتذكر كلش زين البارحه نمت وماكعدت ولا اجيتج ولا جنت لابسة ابيض يمكن جنتي تحلمين ماعرف
كملت كلامي وكمت من مكاني ايدي على بطني
باوعتلها وحجيت
_قدس :: رايحه لغرفتي انام اجتني النعسه
هزت راسها ب اي خايفة.. باوعتلي وحجت
_خلود :: تمام من اكمل الغدة اكعدج
هزيت راسي ب اي وكملت اصعد لغرفتي فعلاً اجتني النعسه واني كاعدة خليني انام يمكن يخف الوجع الي عندي
دخلت لغرفتي افكر معقولة صح الي صار ويا خلود بس اني ماتذكر صار هيج اكيد هيا جاي تتخيل
جنت احجي ويا نفسي وامشي بغرفتي
اخذت الشال من راسي اريد اخلي على الميز اتصنمت بمكاني مصدومه من الي شفته
شفت المكص موجود على الميز هذا مكص خلود اعرفه كلش شيسوي عندي ليش توني انتبه عليه
البارحه ماجان موجود !!!
صفنت متذكرة كلام خلود معقولة صح !!!
بلعت ريك بخوف احاول اطرد هاي الافكار من راسي
مشيت لجرباية اخذت الخاف غطيت جسمي غمضت عيوني بسرعه ماريد افكر بشي ماريد اخوف نفسي غفيت من التعب بسرعه ماحاسة على نفسي بسرعه رحت ب النوم
ماعرف شكد مر وقت بس الي اتذكرة فتحت عيوني على وجع ببطني جنت نايمه على يسرتي باوعت للغرفة ظلمه بس ضوة النشرة الحمرة تضوي
حاولت اكعد ماكدرت جسمي لازك ب الجرباية ماعرف شبيه جسمي متحنط
فتحت عيوني بفزة على صوت جاي من الجهه الثانيه صوت مكص ينفتح وينسد الصوت يتقرب مني شوي شوي
الصوت اشبه بشخص بيدة مكص يفتر ب الغرفة تقرب الصوت لجهه الجرباية بلعت ريك بخوف جسمي كله يرجف من الخوف
لحظات اختفى صوت المكص
جنت فاتحه عيوني مترقبة بخوف الي راح يصير
رجعت فتحت عيوني بخوف واتنفس بسرعه من الصوت الرجع بس هل مرة غيرر الصوت جاي من جوا الجرباية الصوت جواي !!!!!!...
عيوني بدت تدمع من الخوف الي جاي امر بيه هذا رعببب وموت على البطيىء !!!
رجع اختفى صوت المكص بس اني جنت محضرة نفسي اعرف راح يصير شي اقوة من القبلة اعرف الرعب مابلش.. !!!
شفتها بعيوني اييي شفتها وهيا تزحف من جوا الجرباية جانت رافعه راسها وايدها وحدة معوكسة تزحف عليها والايد الثانيه جان بيها المكص !!!
حسيت روحي تطلع من مكانها من رعب الموقف ماعرف شلون ماوكف كلبي كن الخوف بساعتها ياصلابتك ياقلبي... !!
طلعت من جوا الجرباية وكفت منطتني ضهرها جسمي جان يرتعش من الخوف بردت من الخوف شفايفي ترتجف
رجع صوت المكص جنت اشوف المكص ب ايدها بس ظهرها علي
دقائق.....
ثواني......
لحظات......
التفتت ب اتجاهي حلكها مشكوك الدم يجري من كل جهه بوجهه ابتسمت بوجهي برعب فتحت المكص وسدته بقوة
صرخت من كل كلبي من شفتها طفرت ب اتجاهي
سحبت الحاف عن جسمي موجهه المكص لبطني
ضحكت بقوة رافعه المكص موجهته لبطني
كمت من مكاني اصرخ ب اعلى صوتي ايدي على بطني بنتييي راحتتت بنتي ماتتت
باوعت ماكو ماموجودة اختفت !!!
معقولة جنت احلم معقولة !!!
خليت ايدي على بطني اكووو شي اكوووو شي تارس الجرباية معقولة هذااا دم بنتي
كمت من مكاني اصرخ ركضت على الضوة شغلته باوعت لنفسي هذا ماي الفراش
هذا ماء الرحم يعني شنووو راح اجيب
فتحت باب الغرفة خليت ايدي على الحايط وصرخت ب اعلى صوتي من الوجع الي جنت احس بي
_قدس :: غضنفررررررررررر لحكونيييييي ولكم راححح اموتتتتتت خلوووددددد وينكممم
كعدت ب الارض ايدي على بطني اصرخ ب اعلى صوتي من الوجع سمعت صوت ركض على الدرج شفت خلود وكفاية جايات يركضن باتجاهي خايفات
باوعتلي خلود وحجت مفزوعه
_خلود :: قددس.. شبيججج !!؟
_قدس :: راححح اجيبببببب
انفزعن خلود وكفاية وحدة تباوع بوجه الثانيه ركضت كفاية تنزل الدرج وخلود اجت ب اتجاهي
تحاول تكومني من مكاني لزمت ايدها بقوة وصرخت بوجهه
_قدس :: غضنفرررر وينننن خلي يجي اتصلييي عليه
_خلود :: كفاية راح تتصلل عليهمم مارجعووو بعددد كومي وياي انتِ كوميييي
كمت من مكاني اصرخ بقوة كوا اتحرك واخطي الخطوة روحي تروح بكل خطوة اخطيها
مشتني خلود تنزلني واني اصرخ وابجي ايدي على بطني
وكفت بمكاني ايدي على كتف خلود باوعتلها وبجيت
_قدس :: خلوددد بنتي راح تموتتتت
باوعتلي خلود بخوف جانت خايفة اكثر مني ماتعرف تصرف بلعت ريكها ماخذتني تكعدني واني اصرخ
طلعت كفاية من غرفة عمتي تركض اجت ب اتجاهي تبجي التلفون ب ايدها
_كفاية :: قدسسس هذاا غضنفر يحجي وياج
اخذت التلفون من ايدها اسمع لصوت غضنفر يصيح مهبوط وخايف
_قدس :: راححح اموتتتت غضنفر
حجيتها وشمرت التلفون من ايدي رافعه راسي اصرخ مالي طاقة للحجي
شفت خلود طلعت من غرفه عمتي تركض لابسة شالها وعباتها وب ايدها عباية
اجت تركض ب اتجاهي تصيح
_خلود :: امشييي قدس امشي نروح للمستشفى
_كفاية :: ويننن تمشن وحدجن بنات
_خلود :: لعددد ننتضرهم على مايجون هيج البنيه راح تموت من الوجع .!! يلا قدسسس
هزيت راسي ب اي مأيدتها ب الفكرة لان مستحيل اتحمل هذا الوجع اكثر بعد كعدت خلود تلبسني العباية والشال واني اصرخ جواها
سمعت صوت الباب فرحت معقولة غضنفر دز شخص ياخذني طلعت خلود تركض تفتح الباب واني بمكاني الوب من الوجع
طولت خلود ومارجعت باوعت لكفاية وصرخت
_قدس :: كومينييي..!!
اجت كفاية لازمتني من ايدي تعيني مشت بصعوبة اطلع اشوف ليش تأخرتتت خلود وينهم عني
شفت خلود واكفة بباب البيت
باوعت لجو مصدومه الدنيا جاي تمطر بقوة والريح قوي معقولة من وجعي مانتبهت ولا سمعت صوت المطر التفتت على خلود من صرخت
_خلود :: لاتلحيننن كتلج مانريد يلا امشي يلااا... انتِ شبيجج ماتفهمينن !!!!
مشيت ب اتجاه خلود
_قدس :: خلود..
التفتت عليه خلود شفت مرة واكفه برا البيت لابسة عباية جانت جبيرة ب العمر بس ملامحهه غريبه خشمها طويل واكو شامه جبيرة بين خشمها وحلكها
من شافتني ابتسمت بقوة حسيتها جانت منتضرتني ومنتضرة جيتي باوعتلي بفرح دفعت خلود تريد تدخل للبيت وتجي ب اتجاهي منعتها خلود تصيح عليه
غمضت عيوني بقوة من الوجع راح اموت مستحيل اتحمل اكثر سمعت صوت المرة تصرخ بخلود وتباوعلي بضحكه
_:: شوفيهااا راح تموت خليني اساعدها لاتوكفين بطريقي
_خلود :: تمشين لا اكطع النعال على راسج
_كفاية :: خلود شكووو!!
_خلود :: ماكو شي مهم تعاي قدس تعاي
اخذتني خلود من ايدي تطلعني خارج البيت وهاي المرة وراي تدور تباوع لبطني كل ماتشوفني اصيح من وجعي تبتسم بفرح وتصيح
_:: اي اي هذا موعدة
مافهمت شبيها ولا شنو رايدة التفتت على صرخه خلود شفت خلود لازمه خاصرتها بوجع والمرة كدامها فاتحه عيونها بقوة بس تخوف اباوعلها كارصة خلود من خارصتها وتحرك بشفايفها بس عيونها يردن يطلعن من مكانهن ركضت كفاية عليها تبعدها عن خلود
عافت خلود بس خازرتها عيونها ما طاحت منها وخلود ماتحجي ساكته من وجع بطنها
باوعت لخلود وحجيت
_قدس :: خلود
_خلود :: امشي امشي مو وقتها
عفناها واكفة بمكانها ومشينه خلود تركض كدامنا تحاول تدور على سيارة ماي المطر ينزل علينه بخزارة جان يوء سيء حسيت الدنيا كلها واكفة ضدي وقتها
بعد معاناة وكف النا رجال حجي حجت ويا خلود ويا تبجي
_خلود': الله يخليكك اخذنا للمستشفى البنيه حامل وموعد ولادتها وراح تموتتتت من وجعها
صعدنا الرجال ومشه بينه بسرعه للمستشفى حسيت روحي طلعت خلاص ماكو امل عيوني جانت تنسد وتنفتح ماتذكر غير طفائف من الي صار
اتذكر دخلت للمستشفى بس بدون روح بس جسد جنت ميته نقلوني بعد ما روحي طلعت وفقدت الامل ب الي ببطني
قبل لايدخلوني للعمليات جنت موقف مستحيل انساه جان مترسخ براسي شفت نسوان متجمات يلطمن كدامهن تابوب
هذا اخر شي اتذكرة قبل لا ادخل العمليات
بعدها كعدت على اصوات من حولي عيوني تدور ب المكان وجع قوة ببطني شفت غضنفر كدامي وشفت عمتي جهاد
باوعتلي ب ابتسامه فرح وخوف
حجت كلماتها الي حسيتهن نزلن عليه من الطمأنينه والسكينه
_جهاد :: مبروك ام فاطمة الزهراء بنتج نورت الدنيا
🤍.
