رواية تحت ظل السعف الفصل الرابع بقلم ميار
وحرك دم وتعب واهات ودموع
وسلب راحه وسهر والنوم مسلوب
وكل موعد فرح وعياد
ويا وشوف الكون من يروح مكلوب
كل هذا وتكول عوف ونساه
لا ايوب انا ولا يعكوب
سمير صبيح
__♛____
-شسوين هين؟
ريام
: درت وجهي على النخل ورجعت رفعت عيني عليه
-بس امشي بين النخل.. واشوف الصبح من يطلع
جهاد: ارجعي للبيت لا عبالج اهناي الناس ارحم
من عمج حمدان اهناي اذا لكفوج بالبستان يذبحوج
ريام:: عافني ومشى درت وجهي على المضيف ورجعت عيني
على جهاد محتاره شنو راح اسوي وبيمن اثق اهنا كل شي
يختلف يعني ابسط الامور رد فعلهم اربع سنوات عمي موتني
بنظرهم وبس ما لكو عافو السالفه ولا كن مسوي فد شي
برودهم عجيب كعدت جو النخله حايره بزماني ما جاي
اعرف اني عايشه بين مجتمع عجيب كل حياتهم شغل وفلوس سحبت رجله لصدري وحضنت روحي احس نفسي
مختنگه شعور مزعج وحيده حتى بيت عمي محمد احس نفسي غريبه بينهم فكرة انو عايشه بقرية وببيوت كتالين ابوي وحدها تحفر بگلبي حتى نوم ما جاي انام من التفكير
جهاد:: بعدج كاعده؟
ريام: شتريدد انت عوفني اني بكيفي وين ما اريد اكعد
-طبج طوب خوش دكومي ام السان كومي كاعده تتبجبجين هسه يجي عمج الغالي ايخليج تبجين
اسبوع ليجدام عبالج عمامج مثل ابوج راح يطبطبولج
ريام:: مسحت دموعي وهو كعد گبالي مسح وجهه
بشماغه الجو توه يكشف صوت العصافير دحكت عليه
عيونه السود وجهه التعبان متغير هواي شعره نازل على عيونه بقينا اثنينه ساكتين وهو ما حط عينه بعيني ابد
جهاد: ريام شردتي تحركين؟
ريام: بلعت ريجي بخوف كوه حجيت واني مدنگه
ما.. مما ردت احرك شي..
جهاد:: ههه واضح
-رفع عينه عليه وملامحه مغضبه واني متت خوف ردت
اكوم افلت شريد اكوله اريد احرك المضيف مديت ايدي
اكوم هو حجه..
جهاد:: ريوم بويا هذا المضيف اني احرك وحگ ابوج
ما ياخذه غيري اني جنت صابر عليهم لخاطر اندلج
واتأكد والحمد لله اطمئنيت انتي مو كدهم كملي دراستج وانسي وبعد ما اريد اشوفج تفترين بالبستان
ريام: جهاد
-نعم
ريام:: دحك سالفة اعوف گتال ابوي وهذا الخرابه بيدي
احركه وهو وصاحبه جهاد تريد تساعدني واساعدك بكيفك
بس مال تكول انسي وعيشي تره اني فضلت اجي اهناي
حتى اعرف منو وره وفاة ابوي انت صدك تحجي لكك
كتلوو جدامي اني كاعده ببيوت ناس كتلت ابوي جدامي
واني ما اعرف منو منهم بسببهم عشت بذلل بنات الشارع
احسن من عيشتي ويينك انت وين فررات ابوي كضه عمره
يوصيني بيكمم بس وينككم جان يكولي بابا عندج فررات اخ
سندج وشحد الي يلوحج وعندج جهاد السبع حزام ظهرج
ووويينكم وينكم واني بقيت اربع اسنين انكتل وانذللل
وينكم واني اخاف اناممم وينكم واني ينداس على راسي وانسب وينومني عمي بسد التواليييت وينكم واني ابقى
ابوس رجلين مررت عمي حتى ترحم بحالي بگلاص مي
تكولي انسي تره الواكفه گبالك شافت انواع العذاب كله
بسبب صاحب هذا المضيف كل واحد بهاي القريه سبب
موت ابووي لو ما جيه عليهم جان هسه اني عايشه حياتي
مثل باقي البنات مو مشرده وظاله عله وثگله على گلوب
الناس روح انت وسوي الي تريده وعوفني اني اخذ حگي
عفته ورجعت ركض للبيت دخلت گبل للحمام كعدت بالكاع
ابجي واني اتذكر ايامي بيت عمي حمدان شفت اشياء منهم اذوني ولو ما غسان جان يجذب على ابو حتى يخليني
ادرس جان ما درسني واني جنت اذا اريد قلم ابقي ابوس
اديه حتى يشتريلي ولازم اكمل بي السنه كلها غسلت
وجهي وطلعت للغرفه جانت بس ريتاج عرفت رباب كعدت
اخذت ملابس المدرسه ودخلت بدلت ولفيت حجابي ورحت وكفت وياها اساعدها بس ما الي خلك كل شي
♡♕♡
مروى
:: كعدت اخبز من الصبح جاي ارگ بالعجين ودخل
جهاد وجهه مغضب واضح متعصب غسل وجهه من الحوض وطب للبيت واني كملت ركض ركض الخبز وكفت
اسوي ريوك جت امي وفاطمه هم جانت يمنه وهاي هم
امبين على عيونه مقهوره كملت والتمو الكل بس جهاد
ماكو
احمد: اخوجن وين
تبارك: بغرفته يابه
احمد: روحي صيحي يتريك عندي شغل ويا
-راحت تبارك تصيحه واحنه كلنا ساكتين زيد ومعاذ
واحد يدحك على الثاني ومعاذ عود متزوج حرمته
گاضيه عمرها زعلانه وهو ما يوم رضاها من كيفها ترجع
جيه جهاد كعد وشو الجو مو مريح جهاد مختنك وجهه
كملنا ريوك ركض عزلنه المواعين عود ست فاطمه تغسلهن واخذت جنطتي توه نريد نطلع وگبت بين ابوي ومعاذ وابوي يرزل بي علمود حرمته وجهاد واكف يدحك
بخزر ما عاجبه والجكاره بيده وزياد يعلس خبز ويدحك
احمد:: وللك ما تبطلل مو عيب عليك البنيه صار
اسبوع بيت اهلها وهي هيانها بسد بيتك ما تعقل
معاذ: لا ارتاح ما ترجع بعد المره الي تتجاوز عليه
ما الها كعده يمي هي هذا الرادته خلي تشوف الزلم
شتسوي وعود من يصير عندي مجال اروح اطلگها
-معااااذذذ
مروى:: انصدمنه من كال يريد يطلكها وابوي راد يضربه
واحنه عينه على جهاد انريد يدخل ما حجه صد علينه وكال
جهاد: يلاا امشين اوصلجن
-طلعنا وراه وصوت ابوي بعده عالي مشينا مسافه وين ما يكف الحجي شفنه ريتاج ورباب وحدهن استغربنه ريام
ماكو رفعت عيني على الجهاد درت اشوف وين يدحك
ريام واكفه بسد خالي محمد ومدري شيحجي وياها
وهي بس تهز راسها وعافته ومشت وره البنات لحد ما
وصلت قريب من عنده عيونه حمر هي دوم من تطلع ملثمه
ما اعرف ليش بس بالمدرسة توخر الثامها بس هي معروفه
من عيونه اكبار شهل ملامحها جذابه حيل وصلت لسياره
صعدن واحنه رحنه للسياره وعيني على جهاد الي بقى واكف بمكانه وعينه ظلت وره سيارة حامد وصلنا المدرسه
واخذنا دروس بگلبي احجي عمي هذا السادس شسوه بينا صعب حيل اخذت كتابي وطلعت بالساحه البنات بيهن يلعبن
وبيهن الي لازمه كتابها صارت عيني على ريام بنفسي احجي
وياها بس اخاف لا احد يوصل حجي لابوي ولامي طبعاً
امي حذرتنه نحجي وياها كمت عبرت من يمها وطخيت
بيها معتمده وكع كتابها نزلت اخذه وهي حتى ما حجت
-اسفه وكعت كتابج
ريام: عادي
مروى:: ريام عادي نصير اصدقاء بس نتلاكه بهذن الصفوف
القديمه لو وره المدرسه من ذيج الصفحه احب احجي وياج
ريام: لا عذريني اني مو مال صداقه اهلجن ما يرضون فما يحتاج وشكراً بس ما احب اسوي مشاكل واخاف اعديكم
- حجتها بقهر وعافتني ومشت اختنكت بعبرتي حيل انقهرت عليها صدك بس بنات خالي محمد وياها رغم
اكو بنات بالمدرسة ومن گرايبنه بس هي ما تتعرف
مسحت دموعي ورحت لصفي لحد ما كملنا دروسنا
وحلينه وكفت انتظر تبارك جت تسولف ويا صديقتها
والبنات كل اثنين يطلعن سوه وكفنا ننتظر الحجي
تبارك:: هذا مو حامد
-درت وجهي صارت عيني بعينه وهو گبل نزل عينه وشفته
جيه بتجاهنه ارتبكت ودرت على تبارك هاي صلفه ما اهتمت وكف يمنه بدون ما رفع عينه علينه وحجه بهدوء
حامد: احم خياتي البنات هم شفتنهن ما طلعن
تبارك: لا بعد هسه يطلعن اكلك والحجي شفته
: لا خيتي بعده ما شفته
مروى: عافنه ورجع وكف يم سيارته تبارك تأفف واني
عيني من وحدها تروح عليه طلعن البنات شافنه واكفات
ربااب:: هاا بنات شنو بعد ماجيكم السايق
تبارك:: وين صار ساعه اكوللجن لعد وبنات خالي جسوم
وين وبنت عمي العزيزه والله يجوز عافونه اليوم انعلل..
مروى:: سديت حلكه والبنات ضحكن صاح عليهن راحن
واني وتبارك واكفات مثل شمعت الفكر بالنص امشي
تبارك نرجع خما نظل وحدنه بهلـظهريه فرغت المدرسه
تبارك:
: يلا امشي مشينه مسافه وصارت سياره بسدنه
وكفنا وشفت حامد الخلوق اشرلنه نصعد واختي بقت
مفهيه روح خويا نرجع وحدنه احسن ما يطلعلنه واحد
يسويها شكبرها شكدها معايزين مشاكل توكل
حامد: دصعدن يابه ويا البنات قابل وحدنه اصعدن
تبارك: نزلت رباب صعدت جدام واحنه اندحسنه وره
وادحك مروى وجهه احمر خجلانه ندستها كرصتني كوه سكتت وعيوني على الملثمه وعلى حامد ومروى ثلاثتهم
بيهم اسرار شكد احب احجي ويا ريام بس مدري امي شبيها
منعتنه ادحك حامد يخابر ويسوق من طريقة حجيه عرفته
جهاد
حامد: لا والله مدري بي بعد كلت اكولك لا حاكم يسويلنه طالبه جديده وهمه ما يبقى بالكم يمهن
-الله وياك ابو الجود
-سده وبقو الكل ساكت واني اتحرمص اختي وجهه
طماطه خجلانه ورباب صافنه بالشارع وريتاج ماكو
احساس تريد تنام وصلنا البيت ونزلنه لكينه معاذ
واكف جيه تشكر من حامد ودخلنا للبيت فاطمه
بالمطبخ سلمنه وسمعت صوت بالاستقبال
فاطمه:: جديتي وابوي لا تسألين يلا روحن بدلن
وتعالن حتى نصب الغده الولد وراهم شغل يلااا
تبارك:: اعصابج حبيبة شكو وشصار علمود مرت معاذ
فاطمه: دروحي بعدين تفهمين السالفه امشي بدلي
-رحت بدلت وطلعت لكيتهم ملتمين سلمت وكعدت
الوجوه ما اطمن جهاد ضاربه صفنت عاشق مغدور
معاذ وزياد ماكو احساس يضربون ثريد بالخمسه
فاطمه الوجه وجه ارمله كوه سكتت وما حجيت
بين ما كملنا الغده عفت المواعين على مروى
وجريت فاطمه غصب اريد افتهم شصار وشبيهم
فاطمه: ما تبطلين هو اني الي خلگج
-فاطمه عليج الله احجي فدوه فدوه
فاطمه: غير صارت عركه ومعاذ راح يطلك
وعمامي سوو عمل بس تالي طلعت هي تريد
تطلك وبسام كال اذا اخته تطلك يطلكني اني هم
تبارك:: نعمم وانتي شكو شو هذا يلوص فوك ما متحملته هو اهله فد واحد وابوي ما حجه ما كال
-شيحجي هو كايله اني تحملتها اسنين بلا خلفه
احسن خلي يطلك هو ما يريدني عليش ابقى وياه
تبارك: اي والله عابت وجهه الاسود والله يروح فدوه
لشوارب فرات اخخ يلا اطلكي ونزوجج اله والله يخبل
بس حجيتها وما احس غير كفتني براشدي خله اذاني تصوفر من قوته
فاطمه: انجبي والله اذا عدتي هاي السالفه حيوانه
-عافتني وطلعت ردت ابجي والله خدي كام يحركني
عابت اي والله لو ما اعرف ماضيكم الا افضحكم خفتلكم
انت وفرات تمددت راسي يوجعني من الراشدي بس ماكدرت انام تالي صرت حبابه وكمت فتحت كتبي اقره..
♡♕♡
مهى::
كاعدين اهلي واني اخذت الجاي الهم الولد
طالعين يتعللون انطيتهم الجاي وطلعت وكفت من
سمعت ابوي يحاجي جديتي بخصوص عمي خالد
جاسم: يمه ما معقوله خالد وين وده الاوراق
شنو يدري راح ينكتل وهذا حمدان جذاب
يدري اكو شي وره بنت خالد هل ساكت وضامها
ولا ومدرسها يمه اذا تعرفين وين السندات احجي
-يمه واني شمدريني بيهن هو شايفته سوده عليه
مات وبقيت بحسرته وهاي ابنيته ما تريد تجي يمي
جاسم: اجيبها يمه اجيبها بس اصبري اخليها تخدمج
وهي الممنونه بس خلي ننطي وكت محمد شاد وياي
هاي الفتره بين ما يهدء واحاجي حتى لو اخذها لواحد من الولد وتبقى تخدم بيج وهم ما تروح للغريب
مهى: فزيت على طبگت الباب ركضت بدون ما اشوف منو
دخلت للغرفه رحاب نايمه تحسرت گلبي يوجعني من اشوفها مقهوره ومدري فرات شسوه ويا ابوي علمود
شغلة حسين تمددت وكلام ابوي يدور براسي يا سندات
يا اوراق شدخل بنت عمي خالد يلا شعليه ما ناقصه اني لفيت راسي ونمت كعدت على صوت امي ياررب جمعه خلونه نرتاح كمت شفت الساعه سته الجو بعده مو حيل مكشف لبست شالي ولكيت امي تشنك العجين اخذته منها وطلعت اخبز على التنور الطين ريحة الخبز والجاي
ويا ما كملت دخل فرات ابتسم وجيه يمي جر خبزه ياكل
فرات: اي عاشت ايدج على هل خبيزات جابتني ريحته
-الف عافيه عمري انت
-اسم الله عليج يروحي ابنيتي ابوي كاعد
-اي كاعد ليش؟
فرات: شنو ليش شو تسألين
مهى: تلفتت اشوف خاف احد موجود ودرت عليه
فرات شصار على سالفة بيت عمي حجيت ويا ابوي
فرات: هو جيت حتى احاجي يلا تعالي
-دخلنا جانو الكل كاعدين انطيتهم الخبز وغسلت ورجعت
كعدت وياهم نتريك وعيني على فرات انتظره يحجي وخايفه
فرات: يابه صدك الي سمعته
جاسم: شسمعت
فرات: عمي محمد رايد منه مره
-اي صدك
فرات: اي وشگلتله
جاسم: اكيد انطي وين اكو احسن من ولد عمك
فرات: اي لا خوش ولد وحسين يستاهل ورحاب هم تستاهل ولو صدك بعدها اصغير بس اهم شي قريبه
نسرين: لا انطينه مهى
فرات: لا رحاب الزلمه جايكم على رحاب تنطون مهى شلووون
جاسم: وشعليكك انت لا ادخل نفسك
عمر: هههههه سالفتك ما تتسولف يعني طالبين رحاب
بكيفك انتتت تنطي مهى صدك جذب يابه تره سالفتك
مو بمكانها وبعدين فرات اخوهن الجبير وبكيفه خوش
جاسم: اني كلت مهى وكلمتي الي تمشي
فرات: يابه عمي طالب رحاب لابنه يعني يريد بنتك
تنطي اختها شلون رهمتها تريد تفضحنه صدك تحجي
نسرين:: مهى الجبيره غير تطلع وبعدين رحاب ما تقبل
فرات: هذا الشي هي الي تقرره مو انتي ومهى شكبرها تره اكبر من رحاب سنه والرئي لابوي وجديتي
مهى:: من حجه فرات جديتي نفشت ريشاتها ورثت الجكاره
واخذت نفسي ودحكت على ابوي وحجت وياه بحده وعصبيه
الجده: جاسم كلمه وحده ما اريد ورد خبر لاخوك
رحاب لحسين وكملتي ما تتثنى مفهوم واخذ بنته
رباب لعماد مازال عمر وفرات ما يردون وشوف
بنت خالد اريدها يمي يمه فرات شنو رائيك ناخذها الك..
مهى:: بس حجت اتنفض فرات وعيونه تريد تطلع من العصبيه بس من غص عمر التهينه بي جابتله رحاب مي
ارتاح شويه يلا درنه كلنه على فرات من حجه هو يأشر على جديتي
فرات: شوفي جده هاي اخر مره تحجيها وياي بنت
عمي خالد من هي اصغيره واني اشوفه مثل خواتي
ترديها جيبيها تعيش وياج مو شرط الا تزوجيها لواحد
منه هي بنت ابنج ووحيده حسبيها بنتج وديري بالج عليها وبدال ما تفكرين تزوجيها اكسبيها گلبها طيب
مهى: عافنه وطلع حتى بدون ما يسمع من جديتي امي
بقت تحجي بس عاط بيها ابوي وكال راح يرد خبر لعمي
طلعو ورحاب ركضت لغرفتنا هم ونزاح من گلبي اهم شي
اشوفها فرحانه ردت اروح اشوفها بس امي صاحت حتى انظف المطبخ رحت انظف واني كلي طاقه وفرحانه لاختي
♡♕♡
ريام
:: بعد ما رحت للبستان والتهيت بالدراسه ويا البنات
جنت كاعده بالحديقه الجو بارد بس حلو قريب المغرب
بيدي كتابي وجدامي حلاوة تمر اكل واقره البنات يم
بيت خالهن رادت مني عمتي بس ما قبلت هو محد يريدني
ليش اروح جاي اكل وفزيت على ضربت الباب دخل
علاوي ابن فرات من جيت لهسه اتمنى يوم يفوت طبيعي
اذا ما يدفر الباب ويچفل الاوادم ما يكدر شفته يتلفت
مدري شنو يدور صحت علاوي التفت يدور الا صحت انوب يلا انتبه جيه يركض جيه يمي وعينه على الباب وعلى البيت
هاا علاوي حبيبي تريد شي
دحك زين شاف ماكو احد حط ايده بجيبه وطلع ورقه
ما افتهمت كام ايأشر بس ما افهم عليه حبني بخدي وطلع
يركض وبس صوت ضحكته حيل محبوب بس ناقصه يسولف ما اضم عليكم بالاول خفت بس كلت اشوف من منو فتحته مكتوب بخط يخبل رغم كاتبه بطريقه طبيعيه
بس خطه حلو بالاول ما انتبهت على كلامها كمت اقارنه
بخطي واحجي على روحي صرت سادس اعدادي وخطي مو حلو ذبيت كتابي بالكاع وبديت اقراها جان كاتب....
السلام عليكم بويا ريام اذا ممكن اريد
احجي وياج راح انتظرج اليوم نفس
المكان جو النخله اتمنى تتفهمين
قصدي ضروري انتظرج وره 12ونص
جهاد
-ارتبكت والصراحه خفت شيريد مني ومدري اروح لو لا
بس جهاد الوحيد الي راح يكدر يساعدني ابوي هو وصاني
بي طبگت الورقه وحطيتها بجيبي واخذت ماعوني ودخلت
كمت احظر بالعشتا اجن البنات وتساعدنه واني احس عيوني تعلگت بالساعه ومية فكره جت ابالي وخايفه
اطلع واحد يشوفني لو اخاف اروح ويجوز يسويلي شي
بس ارجع اقنع روحي لا ريام ابوج يعرفه لهذا وصاج بي
تعشينه وكعدنه عمي يسولف ويا ولده وعمتي وما انتبهت
على شنو يحجون بالي مشغول الا على هلهولت عمتي
امنه: اي الحمدلله يايمه يوم الخير وافرح بيكم.
والله خفت من امها ما تنطي ووليدي راديها بعد رروحي عجل شوكت نسوي المهر حتى ابدي اجهز
محمد: هههههه يلا يلا ما ظل شي على عطلته
وهم البنات يعطلن ويساعدنج وزواجه على
اخر السنه حتى لا يلتهي وهي همه تدرس
وسام: اي اي قابل وسام وتحيرون بي هي احضوض
محمد: لا تجذب كتلك وانت ما تريد وحامد هم ماراد
عاد حسين كال رايد بنت عمه وهم جاسم يريد ينطيها
لخوالها وحجيت بيها بس ما انخليها لا نخطب وناخذ
ريتاج: يابه نفنوفي اني اروح اشتري
محمد: اي شعدنه غير ابنيتنا هاي هيه كلجن
روحن عود واشترن واهم شي فريخة ابوها
ريام:: كامت وذبت روحه بحض عمي وتدلع عليه
بس رباب هادئه ولا عبالك خوات لل10والكل طش
كعدت ويا البنات يحضرن ملابسهن باجر دوام كمت
وياهن احظر اريد بس يمشي الوكت صار شطوله
عاد راسي انترس افكار وخوف فراس خلاني
اخاف من كل جنس ادم بس ما اعرف جهاد ليش
من اشوفه احس بالامان رغم مرتين تشاوفنه من رجعت
لهسه اشوفه من بعيد بس وجه لوجه وحتى من شفته
اني جنت متلثمه رتبت غراضي وتمددت انتظر البنات ينامن
وهو انتظر الساعه تعبر 12 اريد اتاخر اكثر خاف الولد او احد يطلع ويشوفني غمضت امثل نايمه وانتظر فتحت
عيوني وحده الا ثلث رفعت راسي اشوف البنات تطمنت
نايمات كمت لفيت حجابي ولفيت الشماغ واخذت عبايتي
وطلعت التلفت فتحت الباب ومشيت سريع امشي بسد
الحايط الطين اخاف احد يلمحني بين ما صرت بسد البستان وصلت قريب النخله تصير بداخل البستان بس
تكف بسده مقابيلك يصير المضيف وصلت لكيته كاعد
جو النخله من شافني تقربت كام ارتبكت كوه مشيت يمه
جهاد: زين ما توقعتج تجين
-شتريد جهاد ليش تريد تشوفني مو انت تكول لا تطلعين شو انت الي طلعتني باخر الليل رايد شي
جهاد: كعدي بمكانج احاجيج
-كعدت مرتبكه وهو كعد مسافه عني رفع راسه عيني بعينه
جهاد: ريام اني اسف ما قصدي اجرحج بس
لازم تعرفين العيشه اهناي صعبه يدورون الزله
على البنيه وبالنسبه الج هذا فرات واسألي واسألي
خالي محمد والله عفت فاتحة اخوي وادور عليج
وعلى عمج اروح لبيتكم القديم عسى الگاج بس ماكو
حمدان ما استقر بمكان نلكاه بين ما نوصل لعنوانه نلكاه
شايل فر بغداد اربع اسنين تعبنه حتى گبل لا تجين بيوم
او يومين رحت لبغداد كالو ابنه يداوم بمكتب.... رحت
جان ما مداوم انتظرته ثاني يوم ما داوم سألت عليه كالو
تارك المكتب عاد محامي ما يفوته شي والشغل كل من جوه راسه تعجبت من كال خالي محمد هو الي مهزمج
من بيتهم وهو الي يساعدج جان حتى تدرسين ولو ما مقتنع
ريام: لا اقتنع غسان خوش ولد ولو ما هو جان من زمان عمي دفني بس الي مصبره غسان يقنعه حتى اكبر وياخذ
املاك ابوي اله وهو الي كالي على... سكتت من انتبهت
على نفسي كمت اروح اروح مشى گبلي صار جدامي
جهاد: شكالج ريام اكو شي تعرفينه بخصوص گتل
خالي وحارث احجي تعرفين منو ريحيني تعرفينهم
ريام: يحجي بقهر ومثل الي غرگان وچلب بكشايه
عيونه ادحك بفضول منتظر احجي دنكت اخذت نفس
وكتله لا اعذرني ما اعرف شي وهاي اخر مره دز عليه
عفته ومشيت خنكتني العبره ملامح وجهه جانت وحدهن
تسولف كمية الالم بحيث مجرد بصيص امل گلبة كيانه عيونه بلحظه انملن دموع ركضت للبيت دخلت بس ذبيت
الثامي وتغطيت ابجي بقهر اعرف حارث وابوي يشكد يهمونه بس صعبه ما اكدر اخاف احجي واضيع حگهم لازم
اخذ حگهم ما يستاهلون همه جوه التراب وگتالتهم عايشين حياتهم للصبح ما كدرت انام كوه كمت بدلت وكفت ويا البنات يحضرن الريوك كعدنه نتريك اكلت لكمتين وكمت بين ما كملن البنات وطلعنا وبقى بالي يم
جهاد وحايره احجيله يساعدني لو اسكت وبنفس الوكت
ما اكدر وحدي وخاصه ما اعرف بعدني اطباعهم وما اطلع
حتى اتعرف عليهم صار شهرين يمهم بس ما شفت احد
بس العجيز تفتر شكم مره جت تريدني بس ما اقبل اروح
تظل تحجي عليه وعمي يقنع بيه حرمه جبيره ما تقصد
وصلنا حامد للمدرسه سميت بسم الله وبديت امتحن
بس غير لو اكدر اركز بقيت مشوشه كوه كملت وطلعت
انتظر البنات يكملن الامتحان ولان نص السنه الكل متوتر
وكفت بالباب شويه وطلعت مروى وكفت ادحك لا حجت
ولا اني حجيت شكد خجوله ابتسمت واني اتذكر حارث
شكد جان يحبها يسولف على خجلها فزيت على صوت الهورن شفت وسام واكف مشيت يمه بس ما صعدت
وسام:: هاا بنت عموو حمامه غراب
-يا ساتر لا ان شاء الله حمامه
وسام: اي من وجهج يلا ننتظر وانشوف من هسه لو تجيبين
50 هم ما تعيدين السنه شدي حيلج صارف عليج وتالي 50
ريام:: اصخام بوجه عودك شوكت صارف يلا يلا عود انت
هسه شكد جبت كلك على بعضك مهندس حاسبات
وسام: وسام المهندس We are engineers
-هههههههه شكد مغرور
-امشي امشي صيحي اخياتج حتى نروح
ريام: ما يفيد بي بس حيل ونس ودوم يضحكني
طلعن البنات اشرتلهن جن صعدنه وهو بقى
لحد ما صعدن بنات عمي جاسم وخوات جهاد
يلا مشى حطيت راسه على الجام وافكر شسوي
بس وصلنا رحت رركض سبحت وكمت اساعد
عمتي والبنات وره الغده كل وحده گضبت كتابها
تقره كملت قرايه وتمددت وافكر واخذت قراري
واحجي لروحي خلاص ريام اجحيله واخذي حق ابوج..
