رواية هو لا يشبههم الفصل السادس بقلم تبارك الوائلي
«جمانه»
كعدت من النوم ومالي خلك افكر شلون راح تتغير حياتي كلها وليش امي همها تزوجني بسرعة على مود يزوجن خواتي.. زين ليش بس اني هيج يصير ويايه جنت اكول بيني وبين نفسي هسه تتزوج فرح واضوج على فراكها ونبقه اني وشهد بالبيت.. وبعدين يجي دور شهد وتزوج وابقه بس اني يم اهلي واحس فراغ خواتي.. واكوم انتظر جيتهن من يجن خطار علينه.. والله جنت هيج افكر بس امي عبرت كل المراحل واني والله اخجل احجي ويا ابويه واكله ماريد اتزوج شكد يحبني ومدللني بس احترمه واخجل منه حيل اوفف ياربي شسوي هسه اني.
فرح: ها خير شبيج.
جُمانه: أنتِ ليش ماتحسين بيه.
فرح: خير هم نفس السالفه سويتيها قصه جمانه وكبرتيها تره هسه بس راح نسوي خطوبه وراح تبقين سنتين.. ويجوز احنه نتزوج قبلج وأنتِ ورانه.
جُمانه: والله ماادري مامرتاحه ابد.
فرح: لا لتفكرين وعيشي فترة خطوبتج مثل بقيت البنات و بهاي الفتره احجي ويا بسام وتعرفي عليه.
جُمانه: لا عيني والله اخجل ولا احجي ويا حتى اذا اجه.
فرح: يااا أنتِ شلون بيج بس كليلي خلي اروح اكمل الغده احسنلي.. وها صدك شراح تلبسين بحنه سرور لان احنه مانروح بالزفة تگول امي..لان زفتها راح تصادف بحفلة خطوبتج.
جُمانه:وليش عمتي مستعجله شكو.
فرح: ماادري هيه هيج كالت وعازمه الكل وحجزتلج يم الصالون.
جُمانه: والله ماادري...
(حجيت بگلبي كلت معقوله بسام تعمد يسوي خطوبته بعرس سرور على مود يسوي روحة مامهتم العرسها؟.. والله ماادري بس سرور كالت كلشي خلص بيناتنه وما النه نصيب.. ايييي والله محتاره بهـ لعرس الي ماداخل عقلي بس خليها على ربي مينساني ابد.. هو اعلم بكلشي).
سُندس: اكلج شهد باجر ترحون للحنه؟.
شهد: اي نروح الصبح.
سُندس: والله اتمنيت مو حامل جان رحت وياكم.
شهد:اي تمنيتي خيه بس أنتِ حامل باجر تبقين بالبيت أنتِ وابويه وصالح.. ديري بالج على البيت.
سُندس: شهد شنو شكالولج عليه مااهتم بالبيت لو ما اعرف اشتغل غير حامل والدكتورة منعتني.
شهد: اي لعد حقج ماتشتغلين مدام منعتج.
أم صالح: هااا هااا سندس وشهد شكو خير شبيجن تتعاركن.. شهد كافي وكومي غسلي المواعين.
شهد: اي ليش لا..راح اغسلهن..بس اكلج يمه باجر نروح الصبح من وره الريوك؟.
أم صالح: اي يمه الصبح نروح.
جُمانه: زين وليش منحضر الزفه.
أم صالح: لا راح تصادف بيوم خطوبتج.
جُمانه: جان اجلناها.. من وره الزفه.
أم صالح: لا عمتج متقبل.
جُمانه: ها خوش.. خير ان شاء الله.
أم صالح: يله كومي بدلي على مود تأجرن بدلة خطوبتج.. فرح يمه وينج يلا جهزي روحج.
فرح: اي يمه اني مجهزة روحي وخلصت.. يله جمانه لبسي بسرعة.
جُمانه: اي اي بس لو اعرف ليش هيجي مستعجلين.
«جمانه» لبست على السريع وحتى مالي خلك اروح.. بس شسوي غير امي تلح عليه.. وصلنه للمحل ماالفساتين.. هنه كلش حلوات بس اني مالي نفس بيهن.. راحت فرح تختارلي بدلة....
فرح: جمانه شوفي هاي البدلة شكد حلوه.
جُمانه: لا مو حلوه.
فرح: لا حلوه..أصلاً أنتِ شعرفج.. اخذي هذه الون السمائي حيل حلو.
جُمانه:(اففففف فرح حتى البدله أنتِ تختارينها الي
و لاغيه وجودي.. اخذي بمكاني وخلصيني منه).
فرح: شبيج صافنه وتحجين ويا روحج.
جُمانه: لا لا يله هذا هو على اختيارج.
فرح: اي طبعاً غير اني اعرف ذوقي .
فرح: اي عيني هيه هاي احجزها النه باجر ان شاءالله بلـ 9 الصبح اجي اخذها.. تسلم.. هاي عمتي وبسام اجوي.
أم بسام: ها يمه شلونجن.
فرح: هلا بيج عمه الحمدلله.
بسام: السلام عليكم.
فرح و جُمانه: هلا بيك بسام.
أم بسام: ها يمه اختاريتن بدلة.
فرح: اي هاي عمه.
أم بسام: الله كلش حلو.. راح تطلع تخبل على جمانه.. هاك عيني هاي فلوس الإيجار.. يمه بسام روح وصل البنات.
جُمانه: هسه شكو قابل مانندل.
فرح: اسكتي وامشي.. عيب لا يسمعج.
أم صالح: هلا عمه بسام تعال فوت.
جُمانه: لا والله اريد اروح.
جُمانه: اي تسوي فضل بس روح.
أم صالح: يله براحتك عمه الله وياك.. ها اختاريتوا
فرح: اي اختاريت وحده لونها يخبل باجر تشوفيها.
أم صالح: بالعافية يمه مهناية.. ويوم الفرح ونفرح بيها.
فرح: غير منتظرة باجر اجرب البدله قبل جمانه.
جُمانه: اي عيني جربيها كدامج.
فرح: تسلمين حبيبتي الغالية.
أم صالح: يله يمه كومن سون العشه.. ابوجن على جيه.
فرح: صار ام صالح تدللين.
ابو صالح: السلام عليكم.
أم صالح: وعليكم السلام هلا عيني.
ابو صالح: باجر ترحون البيت اختج ام حميد.
أم صالح: اي عيني نروح اني والبنات ان شاءالله وعگب باجر حفلة جمانه بس تلبيس الحلقات.
ابو صالح: ان شاءالله اني وره الغده اطلع علمود تاخذون راحتكم.
أم صالح: اي عيني براحتك.
«جمانه» كملنه العشه وكعدنه نسولف شوية..وبعدين كلمن راح على غرفتة.. حطيت راسي على المخدة واني فكري يودي ويجيب.. ما ادري شلون وين راح يصفه بيه الدهر.. بس گلبي ابد ماجان مطمأن
.. بس جنت ذابتها على رب العالمين.. وماادري بروحي ونمت.. فزيت على صوت فرح...
فرح: يله اكعدي جمانه يله راح نتأخر.
جُمانه: اي كاعدة.
فرح: بسرعة بدلي.
أم صالح: ها كملتن.
فرح: اي يمه كملنه.
أم صالح: يله خلي نتوكل.
جُمانه: الله شكد متلهفه اشوف سرور بالبدله.
أم صالح: اي ليش لا بعد شوي تشوفينها.
فرح: كلجن راح تلبسن البدله.. بس اني مدري شوكت راح البسها.
جُمانه: أن شاء الله تلبسينها.. أنتِ وشهد.
أم حميد: هلا بيكم خيه شرفتونه.
أم صالح: هلا بيج خيتي.
أم حميد: شلونكم خيه..شلونجن بنات حبيباتي.
_ هلا بيج خالة الحمدلله احنه بخير.
فرح: الف مبروك خالة.
أم حميد: الله يبارك بيج.
فرح: تسلمين خالة..
أم صالح: يمه كواكب حبيبتي شلونج .
كواكب: بخير الحمدلله خالة.
أم صالح: شبيج كواكب يمه؟.
كواكب: والله ماادري شكول يا خاله..بس سمير وداوود يردون يحجون وياج.
أم صالح: خير صاير شي.
كواكب: ماادري والله..بس همه كاعدين بالصالة.. مايردون يحجون كدام البنات.
أم صالح: يله امشي .
جُمانه: شهد خلي نشوف سرور قبل لا تروح لصالون نحجي وياها.
شهد: اي يله تعالي.
جُمانه: عروستنه شلونج شخبارج.
سرور: هلا بيجن بنات.. الحمدلله بخير أنتن شلونجن شخبارجن.
شهد:احنه كل احنه بخير.
جُمانه: شخبار معنوياتج.
سرور: فرحانه حيييلل.
فرح: بالعافية حبيبتي.
«الصالة»
أم صالح: ها خاله خير تردون شي كولوا.
سمير: والله خاله ماادري منين ابدي بس أنتِ مقرره باجر تسوين خطوبة جمانه؟.
أم صالح: اي ان شاءالله باجر تلبيس الحلقات.
سمير: بس خاله امي مو كايلتلج داوود يريد جمانه.
أم صالح: اي صح بس وره فتره كالت.. اذا يجيها نصيب انطيها.. ليش موكفته.. كلت لعد متريدها وغيرت رأيها.. ويجوز بس ابنها يريدها.. ويجوز اختي متريد بنتي بعد وافقت على ابن خالكم.
داوود: اي بس هذا مو صحيح خالة.. اني شنو ذنبي بينج وبين أمي.. وكلمن تكول رأيها.
أم صالح: اي مامقسومه الك خالة كلمن ياخذ نصيبه.
داوود: بس اني اريدها خالة .. تكدرين من ترجعين تلغين الخطوبه مالت بسام.
أم صالح: لا مااكدر لا لا العالم تضحك عليه شتكول عليه فصخت من ابن اخوها انطت الأبن أختها لا عيني لا سدو السالفه عفيه سمير كافي داوود خالة سد السالفة.
سمير: ما الك نصيب يا خوية.
داوود: يله هذا هو.
سمير: وين رايح.
داوود: طالع شوية واجي.
«جمانه» رحت للصالة اني وفرح.. ردنة نشوف امي..وطلع بوجهي داوود..بس شفت نظرة بعيون داوود من جنت بعمري قبل ماعرفت معناها بس من كبرت فهمت شنو جان معناها..شافتني فرح وسألتني..بس ماحجيت الها اي شي.. طبيت لكيت سمير وكواكب يم امي بس جان سمير ضايج وكواكب ضايجة.. كعدنه يم امي..وحجت ويه فرح بس جانت مزعوجة حيل..
أم صالح: كومي جيران بيت خالتج الي گبالهم حفافه خلي تاخذ شوية من حواجب جمانه.. بس شويه من جوه.. لان هيه متحتاج حف حاجب هيه من الله حواجبها اثخان وطوال ومشمورات عبالك احد حافهن.
جُمانه: لا يمه اخاف من الحفافه.
أم صالح: لا روحي بس شويه تعدلهن الج..خلي تاخذجن مرة حميد.
_يله عيني خلي اوديجن.
_السلام عليكم.
_هله حبيبتي شلونج شخبارج اجتي العروس.
_ لا بعدها.. عيني ام مضر اريد بس من فوك تاخذين حواجبها.
فرح: اي عيني اصلاً ميحتاج هنه محفوفات بس
من جوه تدرين خاله من الله هيج حواجبها اختي محد حافلها.
أم مضر: ها ماشاء الله ربي يسعدها.
فرح: تسلمين خاله يوم الألي.
أم مضر: اي هذه هوه كملت.
_ اي تسلمين يله عيني خلي الحك خاف اجتي العروس يله مع السلامة.
فرح: يله فوتي.. طلع وجهج حلو خوش مرتبة حواجبج.
جُمانه:اي.
«جمانه» دخلنه جان داوود واكف.. بس مانزل عيوني مني.. حجيت ويا وهو صافن بوجهي ولا رمش.
جُمانه: ها داوود اجتي سرور.
داوود: ها لا لا بعدها.
فرح: شفتي شلون اكلج بعيونه بس ماله نصيب بيج.
جُمانه: كافي فرح هسه شصار شنو انسد عيون العالم اسكتي عفيه.. عيب هسه يسمعن جناينهم فوتي وفضينه.
فرح: انوب كلبتي عليه شبيج.
أم صالح: ها يمه اللهم صلي على محمد.. فدوه تخبلين طلعتي.
أم حميد: اي خاله بالعافية مهنايه.
جُمانه: تسلمين حبيبتي خالة.
«جمانه» خالتي حست بيه ضايجه بداخلها ونظرة عيونها محاوطتني.. خالتي فقيره عكس امي..
_ يله بنات خلصتن تره اجتي العروس.
فرح: اي يله خلي اكمل مكياجي اكلج جمانه تعالي اخليلج حمره خفيفه تعالي بس اوكفي زعم مخطوبه أنتِ.
جُمانه: مو كلتي بس حمره.
فرح: هسه دوكفي خبصتينه هوه خفيف يخبل المكياج عليج.. يله خلي نروح للصاله نبارك السرور.
جُمانه: هلا بعروستنه الف مبروك.
سرور: حبيبتي الله يبارك بيج يروحي.. هاي شنو مخليه مكياج.. طالعة تخبلين.
جُمانه: اي فرح جلبت على طاري مخطوبه وخلتلي.
سرور: اي شكو بيها.. يله كومن اركصن بعرسي.
_ يله عيني.
«جمانه» الكل جان فرحان على فرح سرور وركصنه كلنه حتى كواكب وفرح وشهد واجوي اقرباء العريس طكو صور وحنو سرور وراحوا.. وطلعنه اني والبنات بالممر وشفت عادل كال تعالي جمانه اكعدي اخذلج صوره اكعدي يمج بالحديقة كتله لا شكراً مااريد كال شبيج هيه صوره دكعدي.. واني نحرجت منه وكعدت اخذلي صوره وراح.. وكال اندزه الج عود.. كتله تسلم.
فرح: هاي شكو اشو لح على الصوره واحنه يمج ماكال تعالن اوكفن وياها اخذن صورة.
جُمانه: شمدريني اني امشي واسكتي عيب ليسمعج
فرح: اخاف بعده باله يمج.
جُمانه: لا لا فرح ابد والله من خطبني اخوه داوود بعد ابد ماباوع عليه باأي نظرة.
فرح: لعد شبي ذبح نفسه يريد ياخذلج صوره.
جُمانه: ماادري والله هيج يجوز.. يله حبيبتي امشي هسه امي صاحت علينه.
فرح: اي يمكن والله.
أم صالح: يله يمه خلي نروح للبيت صار المغرب.
سمير: خالة صدك تحجين هسه ترحين طارت الدنيا باتي يمنه وباجر روحي.
أم صالح: لا خاله باجر خطوبه جمانه مالحك لازم هسه نروح للبيت.. واني ماكلت لبو صالح انبات مااكدر.
سمير: زين والبنات وياج وتطلعين.
سمير: خاله اجه داود.
داوود: خاله تطلعين هسه والطريق طويل وياج شابات متخافين عليهن.
أم صالح: شسوي لازم اروح.
داوود: يله اني اروح وياكم واوصلكم.
سمير: بس هيج انتَ راح تتأخر على رجعتك.
داوود: عادي ابات بـ بيت خالتي وارجع الصبح ماخليهم يرحون وحدهم.. يله طالع كدامكم راح أجر تكسي.
أم صالح: عليمن متعب نفسك وليدي اذا تكسي من الباب للباب شكو علينه.
داوود: لا خاله شلون يصير يله واكف الكم اني.
أم صالح: يله عيني مع السلامة.
جُمانه: يوم بس اسلم على سرور واجي.
أم صالح: روحي بسرعة.
جُمانه: يله حبيبتي اشوفج بخير ان شاءالله مع السلامه.
سرور: الله وياج حبيبتي.
أم صالح: يله يمه مع السلامة.
سمير: الله وياكم خاله.
أم صالح: يله يمه توكل والله تعبت نفسك وليدي.
داوود: تعبج راحه خاله.
أم صالح: يا اني ادفع الكروه هم انتَ تدفع.
داوود: مو عيب خاله شنو السالفه.
داوود: السلام عليكم.
ابو صالح: هله وليدي شلونك تعبناك وياهم.
داوود: لا عمي.
ابو صالح: تعال هنا فرشولك نام.. افرشي هنا جمانه.
جُمانه: اي صار بابا.
فرح: ليش اجه وصلنه الاخ خايف عليمن.
جُمانه: يا فرح شبيج اسكتي.
فرح: اي عيني سكتنه.
«جمانه» نمنه وكعدنه الصبح مخبوصين.
أم صالح: يمه كعدن فضنها.
جُمانه: اي يمه.
كعدن وراجن روحة للصالون.
جُمانه: فرح شوكت راح داوود.
فرح: راح من الصبح من كعدت سويت ريوك لأبويه وماقبل يتريك راح.
جُمانه: ها خطيه والله كلف نفسه الله ويا.
فرح: يله كملي ريوكج.
جُمانه: اي.
فرح: يله لبست اني ومنتظرتج.
جُمانه: اي كملت.
فرح: شبيج صافنه جمانه.
جُمانه: فرح اني حيل متردده من سالفه سوسن ذاك
تذكرين هذاك اليوم من اجتي وحجت على بسام وكالت جان ويا اسامه شاربين وكالت لأمي ليش تنطين جمانه البسام تره يشرب وامي جذبتها وكالت جذب.. زين شنو مصلحه سوسن اجذب.. تره سوسن اختنه وربينه سوه.
فرح: اي ولا تنسين اسامه اخوها ورادج من مصلحتها تحجي هيج عليه وتفركش الخطبة.
جُمانه: لا عيني اني مامقتنعه بهل حجي كله..
زين وعمي مو اجه وكال لأبويه بسام ضارب اخته ومتعارك ويه امه ومتجاوز عليها وعايف البيت وطالع بعد شكو مجلبين بي.. بس كليلي شنو اني مو بنتكم ليش هيج تجبروني عليه مااريده مااريده والله حرام.
فرح: ولج كافي هسه وكته هل حجي العالم منتظره.
جُمانه: ولج فرح عمي ابو هدى يحبنه ويحب مصلحتنه ليش يجذب بهل حجي.
فرح: اي ميحبون بسام وجذب حتى امي كالت.
جُمانه: وشلون امي كدرت تقنع ابويه جذب ليش عمي شنو مصلحته.
فرح: هاي لسه تعيدين بهل سالفه كافي عاد طوختيها.
جُمانه: يمه فدوه اروحلج ليش هيج تسوين ويايه مااريده
أم صالح: كتلج بس اصبري كم شهر وافصخ الج الخطوبه هسه انطيت كلمه للناس وراح يجون.
جُمانه: زين واذا غيرتي رأيج وماقبلتي افصخ احجي لأبوية والله العظيم.
أم صالح: اي عود ذاك الوكت احجي لأبوج هسه اسكتي بس مؤقت الخطوبه لشمتين عماتج بيه وتفصخين.. ليش هاي ملحتج ماادري.
فرح: يله عيني اطلعي.
«جمانه» طلعنه اني وفرح للصالون واني الدمعة بعيني وختنكة.. ضلت تمكيج بيه واني بالي مو يمهن.
_حبيبتي كملت عجبج الشغل؟.
جُمانه: أي.
أم بسام: فدوه اللهم صلِّ على محمد شطالعه عمه گمر.
جُمانه: تسلمين عمه.
فرح: يله عمه نروح للمصور ناخذ صور.
أم بسام: لا لا ليش مصور مو راح انجيب مصور بالبيت ماله داعي.
فرح: يله فضيها.
«جمانه» رجعت للبيت والعالم كلها جايه كرايبنه واجتي عمتي وبناتها.. اجه بسام كعد يمي اباوع عليه ياربي ولا مقتنعه بي ابد.
أم بسام: يله عيني لبسها الحلقة.. اي اي وكلها كيك وطك صوره عيني شربها شربت وطكو صوره اي تعالو نوكف جماعيه وناخذ صوره الك.
«جمانه» الكل فرحان اله اني ماعرفت الفرحه اسمع عمتي تكول لأمي..
أم بسام: عيني ام صالح تره السيد يجي قبل صلاة المغرب علمود نعقد سيد.
أم صالح: اي خيه صار.
جُمانه: حجيت بگلبي يااا هاي شتحجي.. يمه صدك تحجين.. عفتهن وكمت.
أم صالح: وين جمانه.
جُمانه: اريد اروح للحمام.
فرح: ها شبيج واكفه.
جُمانه: امي تضحك عليه وتريد تعقدلي سيد.. يمه أنتِ مو كلتي كم شهر وافصخ الج الخطبه.
أم صالح: اي يا بنيتي والله افصخها الج ماادري بيها متفقه ويا السيد وعيب بعد منها اسكتي واعقدي.. ميخالف اني بعدين افصخلج منه حتى اذا سيد.
جُمانه: وليش يمه كليلها منريد سيد.
أم صالح: لا ميصير يمه.
جُمانه: أنتِ متفقه ويا عمتي.
أم صالح: لا لا مامتفقه ولج ولا ادري بيها جايبه سيد.. كافي العالم منتظره ضحكتي العالم عليه امشي كافي عاد ليخرب المكياج.
فرح: امسحي دموعج كافي جمانه حبيبتي هيه انطتج حجايه تفصخلج امشي فوتي.
«جمانه» طبيت واني مامصدكه بكلام امي عبالك نضحك عليه بهل زواج وما عولت امي تمم زواجي وياريت ماسامعه كلامها وماموافقه بس بعد عقل طفلة وجبانه وخوافه ومااعرف الصح من الغلط وجنت اخجل من نفسي بس نعقد على موتي بهل وكت.. وكمل العقد وراحوا الناس ونزعت البدله.. وكامت فرح لبستها وفرحانه وتفتر بيها وتحلم تلبسها من صدك.. واني بداخلي اكللها ماتمنيت البس البدله والله.. ونزعتها ولبستها شهد وسندس تضحك عليهن وتكللهن عيني تلحكن تلبسنها ليش مستعجلات.. وشهد ترد عليها لا عيني منو كلج مستعجلات بس هيج حبينه انجربها.
جُمانه: اني تعبانه اريد انام.
أم صالح: روحي حبيبتي ارتاحي.
«جمانه» كام كل يومين او تلاثه يجي بسام يزورنه ويلطش يمنه ساعه ياله يروح واني اضوج لان يقيدني مااكدر احجي يباوع عليه.
جُمانه:شلون بله هاي شوكت يروح.
فرح: عيني غير خطيبج يريد تتعودين عليه.
جُمانه: اكلج فرح أنتِ تعرفين خطوبتنه مامطوله ليش هيج تحجين.
فرح: يووو كافي عاد شنو مامطوله ارضي وسكتي ناس تتمنه وناس تتهنه.
جُمانه: لا هذه اتفاق امي ويايه.
فرح: هسه شوفي شلون ثكيل ورزن شتردين بعد.
جُمانه: وهيج قيمتي وعرفتي ونسيتي الحجي الي نحجه عليه.
فرح: لا يجوز كله جذب يغارون منه وميحبوا وحجوا هيج عليه.
جُمانه: أنتِ الحجي ماله داعي وياج خلي اكوم اباوع مسلسلي احسن.
أم صالح: شبيج فرح.
فرح: يمه اسمعي بنتج لسه مصره تفسخ.
أم صالح: لا ماما صار 3 اشهر مخطوبه والولد يجي كل يومين يشوفج ويروح وأنتِ حتى كلمه ماتحجين ويا.. شوفي جنه ورده ماتلكين احسن منه.
جُمانه: ها غيرتي رأيج مو.
أم صالح: باعي سدي الموضوع كافي عاد طوختيها يمه واذا سمع ابوج يكلب الدنيا عليه زين.
جُمانه: يا تضحكين عليه يمه مو كتيلي افصخ الج وره كم شهر.
أم صالح: اي هاي قبل مو هسه شفته خوش ولد والي حجوه كله جذب ليش تردين العالم تضحك عليه ويشمتن عماتج بيه.. ليش كليلي مومن حقي افرح بيجن.
جُمانه:ياا انوب كلبتي عليه.
أم صالح: كافي جمانه واكلج شغله عمتج متريد تنتظر سنتين تريد هسه تزوج ابنها وتفرح بي ومن حقها.
جُمانه: يا صدك تحجين يمه شبيج وغيرتي رأيج.
أم صالح: كافي اجه ابوج وسدي حلكج والله وكت بنات هل وكت يردن ويختارن بكيفهن كافي ولا كلمه.
فرح: تعالي جمانه.. اسكتي ليسمع ابويه.
ابو صالح: السلام عليكم.
أم صالح: وعليكم السلام خويه كل الهلا.
ابو صالح: ها مبين عندج سالفه وضامتها كولي وخلصيني.. ولو اني ماارفضلج طلب احجي.
أم صالح: فدوه اروحلك ابو صالح اختك ام بسام خطيه مريت عليها بالمحل بالسوك وكالت سلميلي على اخويه اريد هل اسبوع اجهز وازوج..
بسام وجمانه.. هذه وحيدي وماعندي غيره بس راسي وراسه وراس اخته طيبه.. اريد اجي للبيت الكه اكله جاهزه احد يغسل هدمتي.. اريد صوت بالبيت فدوه باجر عكبه هيه بعد. زوجته وعاقد
وهو عاقد سيد عليها بعد شكو.
ابو صالح: كملتي سدي السالفه.. قبل كلتي سنتين امنتن عليها.. وعقدو سيد هسه تريد انزوجهم.. بابا بعدهم اثنينهم اصغار و أنتِ مقتنعه ولج الزواج يريد وبنتج صغيرة ومو من النوع الي تفهم حيل شبيج عليها.. وحتى محكمه ماكو شلون يعقدون.
أم صالح: يا ابو صالح هو ابن خالها واذا شنو يعني يتزوجون بعقد السيد وبعدين يعقدون على كيفهم
قابل طايره الدنيا.
ابو صالح: لا ماقبل هسه.
أم صالح: لا عفيه لتزعلني.. عفيه ارضه.
᯽⊱┈──╌❊╌──┈⊰᯽
«بيت ابو هدى»
أبو هدى: اني يا ام هدى بس مستغرب شلون قبل ابو صالح على بسام خطيه جمانه معقوله ماصدك بكلامي.. هذه امه امدللته وماينحمل ابد.
أم هدى: شعليك انتَ يا رجال مالنه علاقه خلي انحير بناتنه الي لسه ماجاهن نصيب وعوفنه من الناس.
أبو هدى: شكو مستعجله ها.
أم هدى: ليش بنتك الجبيره اكبر من جمانه بسنه.
أبوهدى: اي واذا بعدهن صغار.
أم هدى: يا هاي بس انتو عدكم صغار.
᯽⊱┈──╌❊╌──┈⊰᯽
«بيت ابو حسان»
حـَسان: ها اسامه تبقه واكف بالباب ماطب جوه.
أسُامة: من وره ابوك.
حـَسان: كافي اسامه عيب.
أسُامة: ليش عيب..وبعدين ليش فاصليك.
أسُامة: كول منو كلك.
حـَسان: أحجي شسويت من مشكله.
أسُامة: تعارت ويا الامر مالتي.
حـَسان: ها حلو خوش حجي.. لعد ابقه نايم بالبيت
بس كلي شراح تشتغل على خير؟.
أسُامة: هذه الحجي كله عوفه.. هسه صدك صارت خطوبه جمانه وعقدو سيد.
حـَسان: اي صح.
أسُامة: ها والله عمي ابو صالح ميخاف الله ليش هيج سوه ماانطاها اليه.. اني ابن اخو.
حـَسان: وبسام ابن اخته.. اسامه حبيبي عندك علم سوسن من رايحه عليهم اخر مره شحاجيه جمانه الها.
أسُامة: اي كول شحاجيه عليه.
حـَسان: اسمع شبيك ملگوف.. اي كايلتله عليك سمعت اسامه رايدني شلون خطرت على باله اني
و احنه ربينه سوه مثل الاخوان والله حاسبته مثل اخويه اني....
أسُامة: اهووو كافي الله يخليك يا خوه هاي.. الله ياخذها هيه واخوها سوه واخلص هذه هم حظي.
حـَسان: هذا هو سد السالفه.
أسُامة: والله هذه عمك راح ابقه احقد عليه طول عمري وحتى اذا شفته بسوك مااسلم عليه.
حـَسان: زين ليش هو من حقه بنته والي يعجبه ينطيها اله مو عيب متسلم عليه.
أسُامة: والله العظيم مااسلم اذا اشوفه عين بعين ومن يمي يفوت خلي اروح احسنلي.
حـَسان: ولك اوكف وين تروح تعال فوت ابويه نايم والله العظيم تعال اصعد بالغرفة الفوك ومن يطلع هو.. انتَ عود اطلع خوما تبقه بالشارع تفتر شلون اني ماعولت الم شملنه بـ بيت واحد.
أسُامة: اي هذا ابوك ما اريده.
حـَسان: ميخالف الخاطري اني اسامه تعال وابقه بالغرفة عود لتشوفه.. يله بروح امي فوت.
أسُامة: خوش راح ابقه بس والله اذا حجه كلمه وحده ويايه احرك البيت.
حـَسان: اي ماله علاقه بيك يله فوت.
᯽⊱┈──╌❊╌──┈⊰᯽
«بيت ابو صالح»
أم صالح: يله يمه امشي نحجز البدلات لان راح نتأخر يله جمانه فضيها.
جُمانه: اي اجيت.
فرح: ها جمانه اني راح اختارلج البدلات خوش أنتِ متعرفين.
جُمانه: اي فرح اي بكيفج.
أم صالح: السلام عليكم.
_ وعليكم السلام.
أم صالح: بلا زحمةعليك.. اريد أجر بدلتين حنه وزفه.
_ اي خاله كلها كدامج اختاري الي يعجبج.
أم صالح: اي يمه شوفن هذه الماروني حيل حلوه وراح تلوك الجمانه.
فرح: وهاي البيضه.
أم صالح: يا فرح متشوفين شلون ردنها ربع.
فرح: اي واذا يمه غير حلوه عود تلبس كفوف طوال ميبين اديها.
أم صالح: اي اذا هيج اخذيها.
«جمانه» انيصافنه عبالك عرس فرح هيه الي فرحانه وهيه الي تختار الي يعجبها.. واني صافنه عليها ماادري شلون انطاهن كلبهن يشوفن الحزن بعيوني واني مارايده هل زواج.. وهنه فرحانات شلون يختارن ويخططن للعرس.
فرح: يله يمه هاي هيه ختارينه امشي.
أم صالح: اي يمه.. عيني تجيك ام بسام تاخذهن وتنطيك فلوس الإيجار.
_ اي خاله ادللو.
أم صالح: بس اكتب الحجز..
(يوم 15 بشهر 5 سنه 2003 ).. اي بأسم ام بسام موعد الزفه.. تسلم يمه.. يله بنياتي.
فرح: يله.. ها جمانه شفتي شلون اختاريتلج بدلات حلوه.
جُمانه: اي خيه شفت.
فرح: شبيج ماعجبنج؟.
جُمانه: لا ليش اصلاً اني مو من حقي احجي..
وتدرين اني هذا الزواج كله مارايدته.
فرح: امشي احسن وسدي السالفه.
أم صالح: يله امشن واسكتن كافي حجي زايد.
شهد: ها بشرو اجرتوا البدلات؟.
فرح: اي أجرنا ويخبلن اختاريتهن بعد ذوقي اني.
سندس: اي وجمانه مااختارت شي هيه.
فرح: جمانه متعرف هيج شغلات سندس وكافي....
