رواية الوجه الاخر للرحمة الفصل السادس بقلم عبير إدريس
يوسف : مرحباً دكتور
كامله صافحه مبتسم
_اهلاً حبيبي دكتور تفضل ، شلونك شلون الوضع وياك ؟ صرت احسن ان شاءالله ؟
يوسف : الحمدلله بخير
_ ان شاءالله دوم
يوسف : رحم الله والديك
_ أأمرني دكتور ؟
يوسف : جيت اسلمك الملفات
_ مال مرضى ؟
يوسف : اي
_ شعجب الاعرفه تقاريرك يوم بيومه.
يوسف : عندي شغلة هسه احجيلك عنها وبسببها رايد اجازة يومين ، لهذا جهزتلك الملفات..
_ خير ان شاءالله ، صحيح دكتور شنو صار وياك بخصوص المريضة ريحانة ، ولو اللي يعرف الأصول مايضيع ، يعرف شلون يدبر اموره وية مرضاه
يوسف : دكتور الأصول ما الها دخل بشغلنا ، كلمن يحكمه ضميره
_صحيح اخ لو عندنا عشرة منك جان احنا بخير
يوسف : وعليش تتمنى عشرة مني ؟ عد كادرك اعداد صحيح ، دخلهم دورات خليهم يطورون من نفسهم واللي ما يشتغل صح الله وياه ، إيدي وحدها ما تصفك دكتور ، وبيوم يوسف ماكو شلون ؟ تموت الحالات المثل ريحانة ؟
نضل نخدر بيهم ونخليهم ينامون بلا اكل ولا شرب ولا حتى سبح واهتمام بالنظافة ؟
_ لا تبالغ دكتور
يوسف : وين المبالغة كلشي شايفة بعيني ، المرضى ما جايين هنا حتى يموتون جايين لغرض العلاج مو يتخبلون بالزايد..
_ هم وين يحسون ؟ شو نايمين كاعدين نفس الشي هم مخبايل..مو زين ساكتين على وساختهم وأذيتهم ..
يوسف : المخابيل الماعاجبيك يادكتور ، الله سبحانه بجلالته وقدره رفع عنهم القلم يعني ما يحاسبهم على اي ذنب يرتكبوه ، انتم بأي حق تضربون المريض بالعودة او تشمرون على وجهها مي بارد حتى يفز ويبطل عياط لأن والله شنو حضرة الكادر المحترم ينزعج من اصواتهم وكل هذا وتكولي ما محاسبيهم ؟
_ بس
رفع ايده ناهيه يقاطعه
يوسف : اللي ما عاجبه لا يكمل ويانا واللي ما يشتغل بضمير ، نعرف شلون نأدبه ، كل واحد بينا عنده جزء ميت من ضميره ، نصيحة من اخوك الصغير لا تحاولون تجربون حظكم وياي .. انزع ثوب الدكتور والبس ثوب العربي وساعتها محد يخلصكم مني ...
_ كلامك اعتبره تهديد ؟
يوسف : انه صريح نصحت وهددت بنفس الوقت ماخايف ، وموبايلك ذاكرته امتلئت ماراح يسجل اكثر من هيج سده..
الدكتور ارتبك سد الموبايل وحطه بجيبه ..
كام حتى يطلع التفت على الدكتور وكاله..
يوسف : اعتبرني مجاز واجازتي مفتوحة اهلي بشدة ولازم اكون يمهم ، وهذه تقارير المرضى بيها علاجهم الاسبوعي بالساعات ياريت تلتزمون بيه ، واتمنى اتمنى ، لا الأمنية للضعفاء ، اريد من ارجع واداوم الكى الوضع مترتب أكثر من هيج ، ستائر نظيفة ، شراشف جديدة وغطاء جديد، و كل شخص عنده اغراضه الخاصة من صابون وشامبو وغيرها حتى اللي باقي عنده شوية عقل ما نكمل عليه ويتخبل علينا ونفوت بخطيته..
_ بس هاي كلها مصاريف من وين نجيبها
يوسف : جيبك الخاص دكتور ، من جيبك الخاص ، سوي شي ﻵخرتك يشفعلك بيوم لا ينفع بيه مال ولا بنون..
_ صاحب الفكرة هو اللي يبادر
مد ايده لجيب بنطرونه طلع محفظته
سحب منها فلوس حطها على الميز كدامه وكال
يوسف : هذا الراتب مثلما استلمته تبرعت بيه ، ياريت تكون مبادرتك اقوى مني ..
ألتفت حتى يطلع ، حجى المدير
_ بس اني ما وافقت على اجازتك
بدون ما يلتفت جاوبه
يوسف : من ارجع راح احسب كلشي جبتوه ورقة وقلم وعلى الربع دينار احاسبكم
تركه وطلع ، تصادف وية الطبيب المقيم يوسف يمشي والطبيب يمشي وراه ويصيحه دكتور دكتور يوسف ما وكف كمل مشي وصل للباب الخارجي طلع موبايله حتى يتصل بشهم ، وكف كباله الدكتور وكال .
_دكتور وين رايح ؟ وريحانة شلون ؟ هذا هو انذبت راسي يعني ؟
يوسف : شغلك هذا
_ بس دكتور
يوسف : الو شهم وين انت؟ انه خلصت وراح أمر عليك ، مسافة الطريق ما اتأخر ان شاءالله
سده من شهم وألتفت على الدكتور الواكف كدامه مثل الصنم ..
يوسف : دكتور حبيبي انت ، ريحانة ما اتدخل بيها بعد ، اذا ما حابب تكمل وياها قدم استقالتك وانه اساعدك تحلصها بسرعة وسهولة اقدم بيك تقرير بعدم قدرتك على استيعاب المريض وماعندك صبر ولا قوة تحمل وياه ، صدكني ثاني يوم يتعين شخص غيرك يكون كد هاي المسؤولية
_ ولو بس التقارير انت تكتبها ونمشي عليها
ما جاوبه لبس نظارته الشمسية ومشى لسيارته صعد وانطلق بيها لشهم ...
طيبة
الكعدة بينا وبين اهل البنية تمت واخذوا فصل كسر ظهورنا بيه ، تقريباً افلسنا ، منا الحريق ألتهم كلشي ومنا الفصل ..
ضلت كعدتهم وية اهل سارة شوكت تفض ما ادري ، خايفة على ابوي هواي يصفن ..
رفل : لا تخافين الولد سباع ويعوضون كلشي المهم طلعوا سلامات من هذا الحريق
تنهدت جريت حسرة شكبرها
رفل : يولي لو الخساير مو حلال وزرع وفلوس وياها الوادم ، جان شصار بحالنا ؟ ها ؟
طيبة : ولج ابوي ما يمد ايده للولد ، هو ينطيهم ما ياخذ منهم شلون بيه وماعنده شغل
رفل : اجه الوقت اللي يعوضون ابوهم عن تربيته الهم وتعبه وعن كلشي سواه الهم ...
اجه صوت فارس من ورانا كمزنا
فارس : لج رفل
رفل : تف تف تف تف شبيك خرعتني
فارس : هاي عليمن تبصقين ؟
رفل : شني تصقطين ؟
فارس : هاي كلمة بالهندي صعبة عليج المهم عليمن تفلتي ؟
رفل : ما تفلت اخترعت وهيج يسوي المخروع..
فارس : هااا
رفل : اي ، وعلى هاي فززتني ؟
فارس : لا ..
رفل : شرايد فارس ؟
فارس : ولج منو هاي الصابونة المحتسبة معلقتلج على صورتج بالفيس
كمزت سدت حلكه بإيديها
رفل : اسكت لا تحجي لا يسمعوك عليك بداعة امك سد حلكك ..
سحب ايدها من حلكه ونترها
فارس : عبالج ما ندري بيج مو ؟
رفل : ها فتشت بيه من رحت اصلي ؟
فارس : لا ضايفج واعرف هذا حسابج ومتابع كلشي تسويه
رفل : حباب ابوس ايدك لا تكول لأحد عندي نقال فدوة فدوة
فارس : هاج بوسي ايدي
رفل : انجب لك
فارس : مسوية فيس من ورانا ؟ جريمتج بأثنين شيخلصج من اكعد بنصهم واحجيلهم سالفتج منو ينطيج عطوة بلة ؟
رفل : فريس لا تسويها يكفي اخوك لاعب بية لعب
فارس : تحجيلي القصة كلها منو صاحبج ؟ وين تعرفتي عليه ؟ وشوكت ؟ وصار شكد عندج الموبايل والحساب ؟ما احجي ضميتي وجذبتي لا والله احجي واطيح حظج هم..
رفل : النقال انه اشتريته ، وصاحبي اخوك وماشايفني لله الحمد ماعندي ذنب اخاف انفضح بيه ، صدك يولي دفضحني بلكي ويزوجونا غصب وهيج ونتزوج انه ويوسف اخ ، حلمي والله ...
فارس : جذابة منيلج فلوسه ؟
رفل : يا مو اشتغل وي ابوي وينطيني اجمع ماعندي شي اشتريه رحت جبته ..
فارس : منو جابه الج الصابونة المحسنة ؟
رفل : ولك يا صابونة محسنة خبصتني بيها ؟
فارس : هاي التعلق على صورج
رفل : ولك وين اكو وحدة بهيج اسم ؟ ماعندي الصابونة المحسنة ماعندي
فارس : جاوبي لج
رفل : صوتك صوتك وعمة بعينك ليش تصيح ؟
فارس : جاوبي لا تغلسين مني الصابونة
رفل : شنو كاتبة فد كولي ؟
فارس : تكتبلج انتِ تحتاجين علاج بأسرع وقت ومدري شنو ؟ بارت كامل كاتبة والباقي هندي ما فهمت منه شي
رفل : يا ولك اسمها الصابرة المحتسبة مو الصابونة المحسنة
فارس : هاج شوفي شنو مكتوب ؟
رفل : وين اعرف اقرأ
فارس : منو يرد عليها اذا ما تعرفين ، وحتى ردودج بالهندي
رفل : ولك هاي ريمة اختي تكتب وعمة عودين تعرف تكتب هي سوت الفيس وسوت صفحة ثانية نعلق بيها شمدريني بعد
فارس : وانتن منو علمجن على الحسابات طالعة عيونجن حقيرات..
رفل : بنات وية ريمة بالمدرسة علموها كم شهر نسوي بيه ما ضبط آخير شي صديقتها اجتنا للبيت سوته
فارس :و عليش مسويات صفحتين ؟ وتعلقن بيها ؟
رفل : هسه انت شعليك اختك ؟ وتحاسبني ، احجي وية روحي لو هم ما يصير ؟
فارس : وشمدريني تحجين وية روحج مثل المخبلة ..
رفل : اي مخبلة واسولف وي روحي ، طكيت من سوالف اخوك وسواياته بية
فارس : يوسف يعرف عندج نقال و فسفوس ، ضايفج ؟
رفل : لا مايدري بية ، افوتله عود انه مريضة ادز استفسارات نكتبها بألف ياعلي وتالي مايرد علينا عليك الله لا تفتن والله ماعندي غير صفحة اخوك وصفحتي الثانية اراسل بيها كل يوم مسويتها صديقتي واحجيلها اسراري ، ماعندي احد احجيله سري ، حباب لا تاخذه مني
فارس : ما تحجيلي كبر شو كاعد بالبيت وماعندي شي ، مجاز من دوامي ، شغل ثاني ماكو و لا روح ولا تعال يعني متفرغ ، بعد احجيلي احسن من الصابونة المحتسبة على الأقل انطيج حلول تستفادين منها بحياتج ما تضلين تحاجين عقلج الطكة ونص..
رفل : ما تولي من وجهي ، تريد تتونس براسي وتخلص وكت
فارس : لا والله اسمعج
رفل : جذاب ما تسمع تريد تكرز حب على جروحي
فارس : ويروحي نوحي
رفل : ماخذها روحي
فارس : لج قوية صايرة ما عرفتج
رفل : فريس المايعرفك يبهذلك
فارس : يجهلك وثول حتى ثول
رفل : من ضيمي اسولف واحجي لاعبالك مرتاحة
فارس : اوووف يارفل بيج شكبان من القهر
رفل : اي والله اخوك شيلني شكبان قهر فوك راسي
طيبة : فارس اذا خلصت مداهر تعال احاجيك
فارس : حيل لساج واكفة ؟
طيبة : صافنة على مداهركم ، امششششي يخوي عندي شغلة وياك ، من رخصتج رفل ..
اخذته ومشينا ابتعدنا عن بيت عمي قادر ، وكف كبالي مغضب ملامحه..
فارس : طيبة شكو ؟
طيبة : اليوم رايحين لبيت اهل سارة صح ؟
فارس : ما اعرف لو اليوم لو باجر بعد ليش ؟
طيبة : انت تروح ؟
فارس : طبعاً
طيبة : ابوي ما يخليك
فارس : مو بكيفه ، المهم شنو عندج احجي
طيبة : بيوم الحريق الصبح شفت شغلة يمكن تفيدكم ، وبنفس الوقت مترددة احجيها خافن ينهجم بيت نوح واكون انه السبب واللي شفته شي عادي ..
فارس : غير تحجي يمعودة اي شي شفتيه و سمعتيه احجيلنا لا يكعدونا بفصل بعد شننطيهم
طيبة : شوف انت مو جنت بالمستشفى وابوي واخواني وياك
فارس : اي
طيبة : اول ما طر الفجر تمشيت للبستان
فارس : زين
طيبة : الدنيا توها بدت تكشف عن نهارها واشوفلك سارة واكفة قريب من الباب الخارجي ، مشيتلها احاجيها بعدني ما وصلت طفرلها واحد مغطي وجهه...
فارس : يعني ما شفتيه ؟
طيبة : لا ناطيني ظهره ماشفته
فارس : كملي
طيبة : وكفت ما كملت ، حاجاها واندارت من الجهة البعيدة وفاتت للبيت ، خلصت شغلي رجعت ماكو شنو اكلك هيج وقت قليل واشتملك ريحة شي يحترك ، حاجيت امي كالت اطلعي شوفي ، طلعت والباقي تعرفه
فارس : ولج طماطة شلون تضمين هيج شي وماتحجيه النا؟
طيبة : خفت وعيونك
دنك باس راسي وكال
فارس : حكنا راح يرجع مربع والحلال كله يتعوض بهاي حجايتج
حضني من كتفي ومشينا لبيت عمي قادر دخلنا لگينا شهم و ويوسف والبقية من اهلي وعمي قادر ، ركضت لأخواني سلمت عليهم ومن تقربت ابوس يوسف اخترعت من عاينت وجهه ، مديت ايدي تلمسته ..
طيبة : ياخوي شنو هاي ؟
ابتسم حط ايده على ايدي اللازمة بيها خده وكال
يوسف : هسه طابت
طيبة : حاجيني الله عليك
شهم : وحدة مخبلة شكت وجهه يلا اكعدي خلينا نحجي..
التفت عليه يوسف ما رضاله ، شهم هز راسه ساكت
تركتهم ورحت اساعدهم بالمطبخ شافتني امي صاحت
زهرة : ولج طيبة وين وليتي صارلج دهر
طيبة : وي فارس يمة
زهرة : عليش طالعة وياه وعندج شغل كومة
طيبة : آسفة يمة هاي جيتج
سمعت صوت شهم حاد وهو يكول
شهم : عليش تعتذرين طيبة ؟ ماسويتي شي
امي جانت تصب من الجدر تركت الچمچة وعاينتله
زهرة : تحرضها على امك ولك ؟
شهم : محد علمها على الخضوع وما تاخذ حگها غيرج يايمة ، لو معلمتها تكول لا لراحتها جان حالها غير وما انداست هيج
ماعجبها حجيه دارت وجهها وكملت تصب بالأكل ..
سمر
جنت طالعة وي عمي قادر للبستان نحوش من الفواكه حتى نقدمها ورا الغدا ، شلنا سلات الخوص ورجعنا للبيت تلكتنا فطومة بنتي فرحانة وتضحك صاحت ..
_ ماما بابا رجع
سمر : يمه اندهرنا
قادر : شبيج ؟ اخترعتي ؟
سمر : يابة شهم اجى
قادر : عليش فزيتي خله يجي هله بيه
سمر : شهم يعني النار واكيد رايح وياهم للكعدة مال بيت اهل سارة ؟
قادر : خله يروح
سمر : متأكدة تعلك بينهم وربنا الستار
قادر : الله يستر امشينا نشوف الوضع شلونه
اخذت فطومة عل صفحة وحاجيتها وعمي فات للبيت..
سمر : فطوم متأكدة بابا اجى خاف شفتي عمو يوسف عبالج هو ؟
_ لالا هو بابا حتى مشتريلي باعي
رفعت علاكة الحلويات مالتها وتضحك
سمر : اخذيهن وروحي يم جدو قادر اكليهن فد مو كلهن هذن هواي موزين عليج
هزت راسها وراحت ، لفيت روحي بعباتي وطبيت سلمت على يوسف شهم ما شفته ، هاي أول مواجهة بيني وبينه بعد اللي صار ، گلبي مو متطمن جريت نفس، فكرت ، غلط ابقى بعيدة بدون ما أبررله الصار ويسمع مني ..
دخلت للمطبخ لكيت عمتي تصب بالغدا ، تعبانة وجهها اصفر ، اخذت الماعون من ايدها وصبيت الباقي فرشنا السفرة تغدوا انه ضليت بالمطبخ مالي عين اطلع
بعدها غسلت المواعين والجدور ونبأ ساعدت طيبة بتنظيف البيت ، عمتي راحت مددت ترتاح ، خليت الجاي على النار اخدره ، دخل شهم صاح يمه ، بعدها سكت ، جمد الدم بعروكي من كال
شهم : هاي انتِ ؟
بلعت ريك تايهة شجاوبه..
شهم : انتِ مو وياج شجابج هنا ما كلت وجهج ما اشوفه ؟ ما كالولج انه هنا ؟
ضليت ساكتة شحاجيه ، رجع نتر
شهم : مو وياج ؟ ما تجاوبين طرمة ؟
سمر : ماعندي سالفة احجيها
شهم : منو رايد يسمع منج سالفة؟ انه كايل شعندج جاية هنا بوكت جيتي ؟
سمر : وين اروح يعني ؟
شهم : بيت ابوج يم اخوانج الحنينين
سمر : هذا بيتي مثل ماهو بيتك ولو سمعك عمي قادر حاله يتكدر ..
شهم : سمر اسمعيني كلش زين اذا شفتج لو لمحت طرف عباتج مايصيرلج خير ، تختفين لحدما اولي
ألتفتت عليه عيوني مدمعة ، وشفايفي ترجف ، ما اريد ابجي اريد احجي بصلافة مثله وما اخافن منه
سمر : ترة شكيته لگلبي شك كافي تجرح بية ، هسه افوت لغرفتي وما تشوفني ولا تسمعلي صوت
تركته حتى امشي عبرت باب المطبخ صاح وكفت
شهم : اخذي علاكة الحلويات مالتج من فاطمة
طلع مني وراح برا ، ياربي هذا شنو يريد مني ؟ عليش يأذيني بحجيه وبعدين يكسرها وياي بكلمة طيبة ..
هاي عادته من جنا صغار لحد هذا اليوم اذا نطوه ألف يشتريلي الية بخمسمية وأله خمسمية ، اذا جاب جبس نفس النوع يجيبه اذا حلويات نفسي الشي ومرات ينوع حتى نسوي عزيمة وناكل انه وياه بالبستان ، ويلوموني شلون تعلقت بيه وحبيته ، وليش ما كدرت انساه لو حتى اكرهه ، محد حبني وداراني مثله ، فتحت عيوني عليه وعلى حنيته ، ما جنت انام اذا ما ينام يمي وبفراش واحد لحدما كبرنا شوية يلا فرقونا ، شكد بجيت وتأذيت نفسيتي تدمرت ما جنت ادري بيه ابن عمي جنا صغار ما نفهم فد هو يعرف انه مو اخته ويعاملني على اساس الأخوة وبس ...
دخلت للغرفة لكيت فطومة متمددة ويمها بيبي صدمة ، تقربت من فطوم وهمستلها
سمر : وين علاكتي الجابها ابوج الية ؟
اشرتلي براسها ورا البردة ، رحت طلعتها واشوف جايبلي شكو شي احبه ، بعدني ما فرحانة بيهن صاحتني جدة ..
صدمة : يمة سمرة
شديت العلاكة ورجعتها ورا الشباك
سمر : بلي جدة
صدمة : شبيج يعيني اليوم مصفرة ؟
سمر : ها مابية ، يمكن لأن ما نايمة
صدمة : اي زين حسبالي مريضة
سمر : لا جدة مو مريضة
مددت على الفراش رجعت صاحتني
صدمة : سميرة
سمر : عيني جدة كولي
صدمة : ما تدنيلي الصوبة عليّ
سمر : صار ، شنو بردانة؟
صدمة : ماعرف البرد جاس گلبي وعظامي تركص وحدهن
سمر : هسه اغطيج
دنيت الصوبة يمها واخذت البطانية غطيتها بيها ، شالتها وشمرتها
صدمة : ما حبنها تكرصني ، ناوشيني القطوة
سمر : ماكو غطوة هنا بيبي فد بطانيات
صدمة : ما تحاجينهم يجيبون الشف اتقطى بيه .....الشف (غطوتها الخاصة )
سمر : جدة مثبورين منو يروح للبيت محد يرضى ، غطي رجلج ، وهاي الصوبة عندج هسه تدفين
صدمة : طفي الضوة واخذي بنيتج وخلني انامن ساعة زمن
سمر : صار جدة صار
اخذت فطوم وطلعت رحت يم البنات ، جابوا الجاي وألتمينا بالهول انه والبنات وزوجات عمامي كلنا كاعدين ، فات فارس باوعلنا ابتسم وكال
فارس : طيبة عندنا فواكه ؟
انه جاوبته
سمر : بلي اليوم حشناه جديد تريد اجيبلك ؟
زهرة : مو هسه راح يشرب جاي شيسوي بالفاكهة ؟
فارس : مو الية
سمر : لمنو تريده ؟ ابوية كال العصر ناكله
فارس : مابيج كل فايدة لا والله
وراها فاتوا يوسف وشهم وكميل ونوح وعمي عبد الملك ، رجع فارس سأل عن الفواكه ، يوسف باوعله و خزره
فارس : عليش تباوعلي هيج ؟ ماسويت شي صارلك هواي ما جاي.....وضحك
يوسف : شنو سالفتك انت ؟
فارس : ما عندي كل سالفة
شهم : فارس اثكل ، وخلينا حايرين بمصيبتنا وكت فواكه هسه
فارس : صار
كعدوا ، فارس يكعد راحة ، شلون ما يحشش ما يكدر تدنى من شهم وكاله
فارس : شوفها شلون كاعدتله تكول زليخة هيج تحبه ..
قصده على رفل
شهم : راح اطيح حظك كافي
فارس : دشوفها من دخل يوسف لسه ما شالت عينها عنه
شهم : غير يسكت
سكت وراها فات جدي
يعقوب : السلام عليكم
ردينا وعليكم السلام
لف عباته وكعد ، صاح
يعقوب : وين الباقين ؟
كميل : هسه جايين
اجوا عمامي وبلشوا يحجون بسالفة الكعدة مال اهل البنية ، يحجون ويوسف وشهم النار تطلع من وجوههم ما عندهم تفاصيل عمي ما حاجيلهم كلشي مبين من ملامحهم ..
نوح : جدي مع احترامي الك بس اتسرعت من حسمتها وقبلت تنطيهم الفصل كامل
يعقوب : احسن ما تصير ثارات مالنا خلكها ، هاهي انحسمت هيج المهم ماكو دم
عبد الملك : بوية نطينا الفوگانا والجوانا ، وحلالنا راح من وين نعيش بعد ؟
يعقوب : بساتينا خير من الله اكل منها واشتغل بيها بين ما نرجع كلشي مثل ما جان
فارس : خوب انت لا للصدة ولا للردة ولا لعثرات الزمن هيج ماخذيك للكعدة بس خساير ..
جدي شوية سمعه ثكيل صاح
يعقوب : هذا شكال ؟
كميل : ماكال شي ، وانت سد حلكك
فارس : اليوم سديت حلكي باجر منين آكل ؟ شنو نطبخ مركة هوا ؟
كميل : يابه بس اسكت مو دمرتني الكعدة بجفة وسوالفك بجفة ثانية
فارس : اليحجي حق بزمنكم مكروه
كميل : وحتى لا تنكره اكثر جفينا شرك
فارس : صار سكتت واريد اشوف منين ناكل لحم بعد من ورا جدك
دخلوا اولاد عمي راضي باسل وعادل سلموا ، عمة حنة اشرت لرفل تكوم ، وهاي عاندت
حنة : كومي اخوانج اجو
رفل : ادري شفتهم
حنة : ما تخجلين متوسدة بنص الزلم
رفل : يمة وين متوسدة كاعدة حالي حالكم
حنة : حت لو كومي
كامت تأفأف ، ألتفت باسل على كميل وسأله عن الكعدة وشنو راح يصير ، سولفله كميل باسل هز راسه وكال
باسل : خير ان شاءالله خير
فارس : من وين يجينا الخير ويعكوب جدنا ؟
باسل : وشبيه جدك ؟ لازم ما عاجبك ؟
فارس : لا عاجبني ونص ماسوى شي غير تباهى بفلوسنا وتفرهدنا ، الله وكيلك لحم ما ماكلين
عادل : فارس شوكت تعقل ؟ تبقى بهاي سوالفك مال جهال
فارس : من جدك يعقل اعقل ، منين وارثها يعني ؟ منين ما تلتفت تشوف صدمة
ولهناك أشر على الباب جانت بيبي واكفة تباوعلهم
فارس : شوف وهاي اكبر صدمة بحياتي
باسل : فارس هاي شبيك ؟
فارس : مابية وداعتك
نوح : هسه شنو قررتوا ؟ فهمونا اريد اعرف منو ورا حرك بيوتنا وحلالنا ؟
شهم حجى بعصبية
شهم : يعني كل هذا مسويه من ورانا واحنا آخر من يعلم ؟ كملوا اموركم بعيد عني وعن يوسف عليمن جايبينا مستمعين لو شنو ؟
كميل : ليش هيج تحجي ؟
يوسف : صحيح كلام شهم ، جيتنا وياكم مالها كل داعي انتم حاسميها بذيج حسموها بهاي
نوح : نريدكم تجون ويانا ضروري تتواجدون
شهم : المصيبة بهذيج الكعدة اللي تمت واحنا ماعندنا خبر بيها مو بهاي مال اهل سارة براشدي نخليها تعترف على نفسها
نوح : شلون يعني تشيلون ايديكم من الموضوع ؟
شهم : هذا العندي ويوسف مأيدني بيه
صار حجي هواي اخذ وعطا نهاها يوسف من كال
يوسف : اذا تدخلنا بهاي ، نتدخل بذيج
كميل : شلون يعني ؟
يوسف : تعيدون الكعدة وياهم والفصل ناخذه مربع منهم والبنية هم ناخذها
كميل : وين ناخذها ماصدكنا نخلص منها تريدني اعقد عليها ؟ اعقد على وحدة كح... احجوا ترضون بحجي يوسف
يوسف : اللي عندنا حجينا والماعاجبه يروح يقلع شوكه بإيده
نوح : مو حجي هذا يوسف هيب هيج تحاجي اخوك الجبير
يوسف : انه اسف بس دمي محترك من الصار..
نوح : شهم احجي عليش ساكت
يعقوب : المهم ماكو دم وفضت عليمن يحجي خلوه ساكت
شهم : كلامك عين العقل خلوني ساكت
راضي : امشي ورا جدك بالي يرتاح
شهم : ياعمي شلون ترضوها شلة مهتلفين ياخذون فلوسنا ويطلعونا غلطانين والحك وياهم ؟ ما تعلمنا هذا الشي منكم ولا تربينا على الضعف ..
كميل : والحل ؟
شهم : الفلوس ترجع والبنية ناخذها نعقد عليها مثل ما كال يوسف..
كميل : بالنسبة الية راضي انطي العندي والماعندي المهم ما اعقد عليها ما صدكت خلصت منها تريدون تفتحون الموضوع من جديد وترجعوها علية ليش ؟
شهم : كميل احنا لحمنا مر ما ينأكل بسهولة ولو اعرف انطي دم ولا ننهزم ونخسر كلشي
نوح : والكعدة وية بيت سارة شلون ؟ تعوفون الموضوع يمر عادي ؟
شهم : جاييهم ، وحسابهم ويانا ما يضيع شي بس خلونا نشتغل هذولة بالأول ونرجع حكنا
كميل : وشلون ؟
شهم : الشلون يمنا لا تشيلون هم
عبد الملك : انت واخوك على شنو متفقين المفروض حطونا بالصورة
كميل : وهذا رأيي انه هم
نوح : أأيد ابوي وكميل
يعقوب : الصار انحسم وما نرجع نتفح عركة جديدة
يوسف : لا نرجع ونفتح وناخذ حگنا مربع
عبد الملك : ناوين على الشر انت واخوك ؟ مو ؟
يوسف : يابة طلابة وعند عرب شيفضها ويانا..
عبد الملك : انه احتاريت بينكم
يوسف : تعرفنا كلش زين ما تفض ويانا وما نرجع فارغين لو حگنا نجيبه لو تصير دم ..
تم الاتفاق يخلوها ورا شهم ويوسف وهم يحلوها ، وكلمن راح لبيته ، بقينا وحدنا ، لليل كعدت بيبي رادت تصلي جوا السما ، اخذت سجادتها وطلعت وياها اخاف عليها تتعب لو تخترع من بزون شي..
صدمة : طيوب جدة
طيبة : هاي جدة گولي
يوسف والويلاد رادوا جاي كاعدين هناك غاد خدريلهم وروحوا وديه ليمهم
طيبة : صار جدة صار
فرشتلها السجادة ورحت خدرت الجاي وسويت فواكه ، اخذت الصينية وديتها عندهم ، لكيتهم شاعلين نار وكاعدين ، شهم وابوي ونوح وكميل واولاد عمي باسل وعادل .. شافني باسل كام اخذ الصينية من ايدي وكال
باسل : عسانا ما ننحرم من هالدلال يبت عمي الطيبة اسم على مسمى ، ماشاءالله
دنكت راسي خجلت ماعرفت شنو ارد ، اخذها من ايدي وركضت ارجع ، مريت من يم بيبي جانت مفرعه راسها وتدعي
صدمة : كون تشوفني بيهم يوم چلمن أخذ حالنا ومالنا وحرك بيوتنا ..
كامت تصيح بصوت عالي وتبجي
صدمة : ترضاها يبو فاضل فد كولي ترضاها
وترجع تعيد الجملة كل شوية
صدمة : اريدن ترد عليّ ترضاها يبو فاضل ترضاها ؟
سمعت صوت حركة من ورا البردة ( قماش معلكيه يفصل بين الحوش وبين المخزن )
خفت ، صحت بصوت خفيف
طيبة : منو هنا ؟
محد رد كلت اكيد متوهمة ، رجعت كعدت قريب من بيبي ، قهرتني تبجي وتردد بنفس الكلام
صدمة : يعيني يبو فاضل اريدن تحركهم حرك مثل ما حركوا حلالنا ، فد ما كلتلي ترضاها ، ترضى الصارلنا ؟ ترضاها يبو فاضل
اجى صوت من ورا البردة يصيح
_ لا والله ما يرضاها
كمت لكيت فارس خانسلها يضحك
طيبة : تحجي صدك شجابك هنا شعندك متربعلها بهالبرد وعايف الكعدة هناك سويتلكم جاي وفواكه
رجعت بيبي عادت الحجي وصاحتني رجعت يمها
صدمة : ها يبو راس الحار ترضاها ؟
فارس : لا ما يرضاها
صدمة : ولج طماطة سمعتي انه سمعت واحد جاوبني يكولي ما ارضاها
طيبة : لا جدة ما سمعت ، كملي صلاتج هسه جايتج
كمت رحتله فتحت البردة بعدة على كعدته
طيبة : كوم منا لا تخبلها ، عليش تجاوبها ؟ تكولي سمعت واحد يحاجيني وهسه تلمهم وتكولهم هيج دعيت وهيج جاوبني وعبالهم اخرفت مو حرام عليك هيج تسوي ؟
فارس : يمعودة خليها تطب تنام مو راح تطشرنا تطشر بهذا دعائها
طيبة : خلها تدعي على الحرك بيوتنا ، لا يكون انت الحركتهن وخايف ؟
فارس : اخافن من دعائهن صارلها ساعة مادري شتعكد بذيولها وبفوطتها تشد وتفتح تكول تحضر أرواح
طيبة : هاي فطرتهم كبروا وربوا عليها ماعليك منها روح اشرب جايك هسه برد واكل فاكهة ولف راسك ونام وبعدين شلون هيج متربع ورجليك متصاوب بيها ؟
فارس : نسيتها وعلي
طيبة : تموت على سوالف العجايز ، امشي عليك القرآن لا تخبلها خطية
فارس : كوميني رجليناتي خدرن ما يعينني
مديتله ايدي كومته بالكوة كام ويصيح من رجله ، طلعنا صارت بيبي بوجهنا شافت فارس وكالت
صدمة : ها يالاغبر شعندك لابد هنا ؟
ألتفتلي وهمس
فارس : لا ما خبلتها كولي فارس كال وسواها
طيبة : حاط راسك براسها هو هذا الماعنده شغل وعمل بيش يلتهي
فارس : تعيريني طيوب ؟
طيبة : لا ما اعيرنك فد اذكرك
فارس : روحي روحي خلي صدمة تفيدج
وصلته يمهم ورجعت لمحت رفل فاتت للبيت ، شجابها هاي بهيج ساعة ؟ استغربت ، عليمن جاية والكل نايم ، دخلت للبيت واسمع صوت يوسف بالمطبخ عاينت ناطي ظهره للباب واكف كبال الطباخ يحمي الجاي ويحجي بالنقال ...
مشيت اروح للغرفة لمحت رفل فاتت المطبخ ، خفت ييجي واحد يشوفهم وحدهم بهيج ساعة واعرفها ما تكعد راحة وكفت قريب من باب المطبخ كلت اذا تاخذ شي وتطلع ما افوت واحرجها فد اذا جاية على يوسف اطلعها
يوسف يحجي بالنقال ما منتبه عليها ماخذ راحته ، اللي فهمته يحاجي وحدة ويكوللها
يوسف : يمعودة خبلتني ما اعرف شلون اتعامل وياها ، ايدها والسجين
يحجي ويضحك
يوسف : اي هي نفسها اللي حجيتلج عنها صاحبة الجسر عفية ، لو مو انه لو يجي بروفيسور ما يكدرلها
سكت من رفل حاجته ..
رفل : ويامن تحجي ؟
التفت عليها عاينلها ورجع يحجي بالنقال
يوسف : حبيبي نحجي بعدين ، اوك تصبحين على خير
مشت له وكفت طولها بطوله ، مدت ايدها لمست الأثر بوجهه وهمست
رفل : شبيه وجهك ؟
نتر ايدها منه وكال
يوسف : مو شغلج
رفل : منو مأذيك هيج ؟ عساه كسر بيده كون
عبرها يريد يطلع مشت وكفت كدامه سدت الطريق عنه ..
رفل : لشوكت تبقى متجاهلني هيج ؟ ولك حتى ما كلفت نفسك وسلمت علية حالي حال الباقين ، فريتهم كلهم وسألت عنهم ، فد انه لا ، ليش هيج تسوي وياية ؟
ساكت يباوعلها
رفل : جاوبني ليش تسكت مو احاجيك ؟
دار وجهه عنها عتته من بلوزته ، ترك الاستكان من ايده واندارلها ، عيونه يطلع منها شرار ..
يوسف : لج بابة انتِ شتريدين مني مو كرهتيني بشوفة اهلي ..
آخذت ايده حطتها على صدرها وهمست بقهر
رفل : شوكت تحس بيه ؟ اسمع دكاته ؟ مو والله تعبني ، شوكت تحن علية ؟ ليش ما تحاجيني ؟ ليش علقتني بيك وبعدها تجاهلتني ، يوسف دمرتني ..
بجت حطت ايدها على وجهها ..
يوسف : ما وعدتج بشي حتى ادمرج ، انتِ دمرتي نفسج بنفسج ..
رفل : لا تحجي هيج الگلب شال منك هواي ما جنت تعاملني هيج كبل ليش تغيرت
يوسف : العشرة تفضح يارفل والسويتيه ما ينبلع وامشي ارجعي لبيتكم لا يشوفوج اخوانج جايتني ومو حلوة بحگهم ..
رفل : عوفك منهم وحاجيني
يوسف : لج شحجي شحجي ؟
حجاها كاز على اسنانه
رفل : ماجنت هيج شغيرك ؟
يوسف : محد يبقى على حاله ، انسيني رفل انه ما اناسبج ولا اكدر اتزوجج ماكو اي تفاهم بينا
رفل : تستعار مني يوسف ؟
عكد حاجبه وعاينلها
يوسف : عليش استعار منج ؟ مسوية شي غلط غير خرابيط عقلج هاي الجايبتج عندي كلما انزل ؟
رفل : گلبي وحبي صاروا خرابيط عندك ؟
يوسف : مو هيج ياعيني مو هيج بس انه ما اتوالم وياج لا انتِ جوي ولا انه اكدر اسعدج شتسوين بواحد ما يحبج وما عنده ذرة مشاعر اتجاهج ..
رفل : هاي لان ما درست تستعار مني وما تريدني ؟ يعني لو جنت دارسة جان تحبني ؟
يوسف : ماكو فائدة من الحجي وياج اروح احسن ..
قبل لا يطلع حضنته ، شهكت حطيت ايدي على حلكي ، رفل مو هيج شلون تجرأت ..
وخر ايده منها سطرها كف على وجهها ، حجى وياها محذرها ..
يوسف : انتِ من وين جايبة هاي الجرأة ؟ بأي حق هيج تتصرفين ؟ هااا بأي حق ؟ اياج تعيديها وياية والله والله تشوفين شي بعمرج ما راح تشوفيه...
انفتح باب الغرفة طلعت سمر ركضتلها حتى ما تشوفهم وحدهم ..
طيبة : ها سمر ليش كعدتي ؟
سمر : شنو ليش ؟ كعدت وشبيج هيج خايفة ؟
طيبة : ما بية فد استغربت كعدتج
سمر : عادي نمت وكعدت شكو ترجفين بردانة ؟
عين عليها وعين على باب المطبخ ، لفيت جاكيتي علية وحجيت..
طيبة : ها اي اي بردت تعالي نطب للغرفة
سمر : اريد اصب جاي على واهس الحلويات الجابهن شهم ، اصبلج وياي ؟
طيبة : مو هسه خليها شوي لاخ الله عليج ..
سمر : اف منج تعالي نفوت ..
دخلنا للغرفة راحت ورا البردة طلعت علاكة وشكهت ..
طيبة : شكو شبيج ؟
شغلت الضوة وفتحت البردة تدور
طيبة : شتدورين ؟
سمر : حلوياتي وين ؟
طيبة : تاهن خطفوهن ؟ يعني وين جنج جاهل
سمر : لا صدك وينهن يعني شي مو مالتكم ليش تاخذوه ؟
طيبة : شو مادري شلون تحجين هو منو بحال حلوياتج ؟ منو ما ماكل الجبس والنستلة حتى تدنى نفسه عليهن شبيج راح تبجين
سمر : اي ابجي ، تدرين منو جابهم الي لو ما تدرين ؟
طيبة : مو كلتي شهم جابهن
سمر : اي وانقهرت لان من شهم وضيعتهن هسه يزعل
طيبة : وهو شمدريه مضيعتهن ويزعل ؟
سمر : انتِ متعرفين شنو هاي الحلويات بالنسبة الية ..
تحجي وتدور عليهن ، لبست شالها وطلعت طلعت وراها ، عاينت بالمطبخ ماكو لا يوسف ولا رفل ارتاحيت ، مشيت ورا هاي الخبلة وين تروح بهليل ..
ما لحكتها وصلت عند الزلم ، وكفت على صفحة صاحت شهم ، كاملها عاكد حاجبه
شهم : شطلعج بهليل ؟
سمر : وشنو يعني ماكو واحد غريب
لزمها من متنها ومشى بيها قريب الباب وين ما جنت واكفة ...
شهم : شكو شتريدين ؟
سمر : احاجيك
حجتها وبجت
شهم : عليش تبجين ؟ ياهو ضوجج ؟ منو وياج سمر ! فاطمة بيها شي ؟
هزت راسها بلا
شهم : جدة بيها شي
سمر : لا
شهم : منو مات فد لا ابوج
بنص دموعها ضحكت
سمر : عابتلك اسم الله عليه
شهم : شصاير وجايتني بنص الليل تبجين ؟
سمر : انقهرت حيل والله
شهم : غير تحجي عليش مقهورة ؟ شنو قاهرج
رجعت سكتت وتبجي ، نفخ بنفاذ صبر
شهم : لخاطر الله حاجيني مو فتيتيني فت
آخر شي هددها يلا حجت
شهم : بنت الكلب اذا مابيج شي عليش جاية تتبجبجين ؟ حلمانة بية ؟ مو جنتي نايمة شكعدج ؟
ابتسمت ..
سمر : يعني مهتم وتسأل عني وتعرف اذا نايمة لو لا
شهم : اكيد لا اجيت اشوف فاطمة لكيتكم نايمين وطلعت
سمر : هاا
شهم : ما كلتي عليش تبجين ؟
سمر : مو كلتلك مهتم
شهم : ارجعي نامي ارجعي
تركها ومشى ، صاحت وراه
سمر : شهم حلوياتي ماكو ماكليهن
وكف ناطيني ظهره وفد اكتافه تهتز ، لابس دشداشته السودة وغترته ماعت روحي من ألتفت شفت بعيونه اللمعة القديمة ، نفس النظرة من جنت اجيه ابجي وماكلين حلوياتي لو لفتي بالمدرسة وياخذني يشتريلي غيرهن..
رجعلي يتمشى ..وكف عاينلي رخت ملامحه والعصبية اختفت ..
شهم : وعلى هاي تبجين ؟
هزيت راسي بأي ..
شهم : تجيج ابوها فد لا تبجين
سمر : جيبلي نفسهن
شهم : تجيج نفسهن الصبح تلكيهن بعلاكة يم راسج
سمر : لا هسه اريدهن
شهم : منو هسه كاعدلج كلها معزلة لازم انزل للمدينة
سمر : وتنزل شنو يعني اعتبرني فطوم مو بنصاص الليالي تكعدلها تاخذها
شهم : ولج هاي بنتي
سمر : انه هم بنتك
تحمحم رجعت ملامحه جدية ..
شهم : روحي نامي الصبح اجيبلج
سمر : ماما معلية هسه تجيبلي
حجيتها وبجيت انه مو على الحلويات ، لا كبرت على هاي السالفة ، دموعي تنزل برهاوة عليه اريده يرجعلي مثل قبل ، حتى لو ما يرجعني على ذمته المهم ارجع قريبة منه..
شهم : هسه رايح اجيب يلا فوتي جوا نامي ..
سمر : عاجبني اسهر عليهن
شهم : اللهم طولج ياروح ، شلون اسخرلج مارد يجيبهن غير رايح ومسافة يحتاجلي وقت..
سمر : هذا هو انتظرك ، فد شهم ..
ألتفت صاح
شهم : ها
سمر : حاجي شي لأهلك عنا ؟
شهم : بخصوص شنو ؟
سمر : سبب طلاكنا !
شهم : وانتِ شيخصج ان حجيت او لا
سمر : فد انت وعدتني ما تحجي
شهم : ما وعدتج انتِ لحيتي علية وانه ما جاوبت بوقتها..
سمر : والله وعدتني لا تكذب
شهم : خلص اعتبريني وعدت وهسه اخلفت وياج واي وعد بيني وبينج اعتبريه ملغي ، وما يربطني بيج غير فاطمة وبس ، وسوالفج السويتيها كبل شوية لا تعيديها لان ما تفيدج ، ويلا ولي نامي ...
تركني وراح رجعت للغرفة ابجي تلكتني طيبة
طيبة : ها ولج شجاج رحتيله حتى يغثج وترجعين كلتلج نامي..
آخذتها لحضني ونمنا على فراش واحد وامسدلها ...تشهك وتبجي اسكتها ما تسكت آخر شي كالت..
سمر : هو ما رزلني شفت بعيونه نظرة احبها نظرة قديمة شلون من جنا صغار ، فد انه خربتها انه جفصت وياه..
طيبة : شنو جفصتي بلة ؟
سمر : هيج سالفة ما يحبها عدتها..
طيبة : مو تعرفيه يكره تعيدين بالماضي ، انسيه ونسيه ..
سمر : ما ينسى الماضي عايش بينا ، طيبة يحبها يموت عليها ومستحيل يرجع يحبني ، كارهني مجرد ذكرت شغلة بسيطة ، عيونه تغيرت ملامحه غضبت ، روحه جزت مني
طيبة : اكيد يموت عليها حب اربع سنوات شنو جنتي تنتظرين منه ياسمر ؟ موزين منه رضى يتزوج عليها حتى ما يكسرج وتالي كسرها ، حطي نفسج بمكانها تحبين زوجج اربع سنوات وضحكتكم وسركم سوية وتالي ورا زواجج بكم شهر تسمعين جايبلج ضرة ...
سمر : هي حقها وانه هم حقي
طيبة : لا مو حقج لاتزعلين مني..
استمريت احجي وياها الى ان غفت ، مرت ساعة وماكدرت انام هاجت علية المواجع انه منو يسمعني منو يحس بية منو يكول طيبة تشافت لو بعدها ..
لهناك واندكت باب الغرفة ، وخرتها من حضني غطيتها ومشيت افتح الباب ، شهم ناطيني ظهره ..
طيبة : ها ابو الاشهام جعت ؟ اسويلك اكل ؟
التفت عاينلي وضحك..
شهم : هاي بعدج كاعدة ؟
طيبة : اي والله ما مر على عيوني النوم
ضحك ونطاني علاكة جانت بيده وكال..
شهم : هاي حلويات الج ولسمر خليها تاكلهن
طيبة : نامت
شهم : شلون نامت وهي ثبرتني ثبر عليهن
طيبة : اي والله نامت ..
شهم : خليهن بمكان ما تندله الجهال خاف تكعد وعبالها ما جبتلها
طيبة : تحبها يشهم عليش تجذب على نفسك ؟ وهي هم تحبك..
شهم : طيبة الحب وحده ما يكفي ..
طيبة : شلون ؟
شهم : الحب من غير مبادئ ما يسوة شي عندي
طيبة : يعني مابيها مجال ترجعون والله خطية سمر
شهم : اللي سوته ما ينغفر ولا ينسي ، خلها تضوك كسرة ضحى وما اموت اذا ما رجعتلها نفس الاحساس الخلتها تحس بيه..
طيبة : انت گلبك طيب ما تسويها اعرفك
شهم : لا والله ما شفتيها طيبة صورتها ماتروح من بالي وهي تكمز مفرفحة روحها ماتدري شتسوي صوتها مايروح من راسي وهي تكول ، شسوي شهم فهمني شسوي انتقم منك لو انساك ؟ وراح اكدر انساك اكدر
الحجي اتكسر بصوته وسكت ، عافني وراح...
رحت للمطبخ اشرب مي وراها لمحت واحد خطف من يم الباب طلعت اعاين ماكو احد ، مشيت اقفل باب البيت لكيت باسل ، اخترعت گلبي راح..
طيبة : كلها نامت عليمن چاي بهليل ؟
باسل : وين يوسف ؟
طيبة : نايم بالغرفة ؟
باسل : بيا غرفة ؟
طيبة : هناك آخر الممر ..
فات للبيت ومشى لغرفة يوسف مشيت وراه ، من تقربنا عند الباب وكفنا من سمعنا صوت يوسف يعيط على رفل ويكوللها..
يوسف : اريد افتهم من شربوج ممة ما حطولج چيلة كرامة وية الحليب ؟
رفل : فد اسمعني ونصي صوتك الله يخليك
يوسف : جاية بنص الليل ولغرفة شاب اعزب شنو تنتظرين يسوي ؟ ها جاوبي ؟
رفل : مو اللي ابالك يوسف عيب هيج تفكر بية
يوسف : شلون تريديني افكر وانتِ وين ما شفتيني لو بايستني لو حاضنتني ..
رفل : فد احاجيك الله عليك اسمعني
يوسف : ما اسمع منج اي شي عليش هيج تذلين بروحج ؟ المحبة غصب ؟ تجبريني احبج يعني ؟ فاضحتني بين اخواني وبين اهلنا على احبه وما يحبني ما تخافين توصل لأخوانج وشنو يكون موقفهم منج ؟
باسل فتح الباب عليهم وكال..
باسل : سمع اخوها سمع...
