 |
رواية بنات النجار الفصل الاول بقلم جنات
تدور احداث حكايتنا فى احدى الحارات البسيطه الموجوده فى القاهرة وتحديدااا فى السيدة زينب .
فى احدى الشقق البسيطه دخلت مديحه والمعروفه بام عاصم وفتحت اوضه ابنها الوحيد وقربت من الشباك وبعدت الستارة وفتحته وسمحت لنور انه يدخل الاوضه .
عاصم اتحرك فى نومه وشاف والدته واقفه جمب السرير ابتسم:صباح الخير يا ام عاصم .
مديحه:صباحك كله رضا يا روح ام عاصم ... يلا قوم ادخل الحمام واجهز على ما احضرلك الفطار .... ستك كمان صحت وبتستناك عشان تفطرو سوا زى كل يوم وعمك ومراته كمان نزلو .
عاصم قام قعد وسند ضهره على السرير:حاضر يا ست الكل .
ــــــــــ
عاصم الحداد يمتلك من العمر ٣٥ سنه وهو الابن الاكبر والوحيد لعيلته .
عاصم درس لحد الاعداديه وكان حلمه يكمل تعليمه لكن تعب والده كان السبب انه يرفض يكمل تعليمه وانه يتفرغ لمهنه عيلته واتعلم اصولها على ايد عمه الوحيد مرتضي واللى كان اصغر من والد عاصم .
وكبر عاصم وبقا هو المسؤل عن شغل عيلته وورشتهم الكبيرة اللى كانت ورثهم الوحيد عن جدهم وكبير العيله عاصم الحداد رحمه الله .
ــــــــــ
عاصم دخل الحمام وخرج جهز عشان يفطر مع عيلته قبل ما ينزل ورشته .
خرج من الاوضه اللى قاعد فيها عاصم فى شقه جدته .
وقرب منها وباس راسها:صباح الفل على عيونك يا ست الكل .
بدريه جدته:صباح الرضا والهنا عليك يا حبيبي .... يسعد صباحك يا ضنايا ويرزقك برزق الحلال ويبعد عنك ولاد الحرام .
عاصم بص لعمه:صباح الخير يا عمى .
مرتضي:صباح الخير يا بنى .
عاصم قعد جمب جدته على الكنبه:ده ايه الرضا اللى انا فيه ده صباح الرضا من ام عاصم والحاجه بدريه يا ولاد .
بدريه ضحكت:لانك تستاهل كل الرضا والخير يا حبيبي ربنا يسعد قلبك وايامك كلها يارب .
خرجت نجاة مرات عمه من المطبخ وبصتله بحقد .
نسمه خرجت من المطبخ وهى شايله طبق الفول وحطيته على السفره:يا عينى يا عينى كل الرضا ده لسي عاصم لكن انا لأ يا تيتا مش كدا !
بدريه:مانتى لو تبطلى تقوليلى يا تيتا دى والله هرضي عنك .
عاصم ومديحه اللى خرجت من المطبخ ضحكو .
نسمه قربت وقعدت جمب عاصم:صباح الورد يا عصوم .
عاصم:صباح الحلاوة يا روح عصوم .
مديحه:يلا عشان تفطرو .
عاصم سند جدته وقعدها مكانها على السفرة وقعد على يمينها ووالدته ونسمه قعدو جمبه وقدامه عمه ومراته وبداو يفطرو سواا .
بعد شويا عاصم قام . وقف:الحمدلله ... هنزل انا الورشه ولو محتاجين حاجه ابقي كلمينى يا ام عاصم .
مديحه:حاضر يا حبيبي .
عاصم:هتنزل معايا يا عمى ؟!
نجاة اللي كانت قاعدة تلوي بوزها وبتاكل ببرود:يا أخويا ما براحة على الراجل خليه يفطر لقمة تلم عضمه ولا هي الورشة هتطير؟ ماهي محطوطة في مكانها من أيام جدك ولا هو مكتوب علينا نعيش في الدخان والتراب طول العمر ؟!
عاصم بصلها بهدوء:الورشة هي اللي عملت للي زينا اسم يا مرات عمي والتراب اللي مش عاجبك ده هو اللي مخلينا نمد إيدينا في جيبنا ومنمدهاش لحد .
مرتضى بحده:خلاص يا نجاة ... يلا يا ابني استعنا على الشقا بالله .
نزل عاصم مع عمه وبمجرد ما نزلو الحارة بدأت السلامات تنهال عليه من كل جانب: صباح الفل يا معلم عاصم ... نورت الحارة يا بطل .
عاصم وقف قدام باب الورشة الخشب القديم ومسك القفل وفتحه وهو بيقول: بسم الله الرحمن الرحيم .. يا فتاح يا عليم يا رزاق يا كريم .
عاصم بعد ما فتح الورشه لف وعينه بتدور على الحارة "حارة الحدادين" نسبه للقب ومهنه اشهر واقدم عيله عايشه فيها وهى عيله الحداد .
عاصم رفع عينه على البيت اللى عايش فيه واللى بيتكون من ٥ ادوار .
الدور الارضي كله خاص بالورشه .
والدور الاول اللى عايشه فيه جدته بدريه واللى عاصم قريب جدا منها وعايش معاها فى نفس الشقه بعد رفضها التام انها تسيب بيتها وتطلع تعيش معاهم .
اما الدور التانى بيت ابو عاصم اللى عايش فيه والدته بعد وفاه والده بعد رحله طويله مع المرض .
مديحه ام عاصم اللى معروفه بطيبه قلبها اللى مافيش منها ولسانها اللى مش بيعرف يسكت عن الحق و الحارة كلها بتحبها .
وعايش معاهم اخت عاصم الصغيرة نسمه وهى نسمه فعلا .
نسمه عندها ٢١ سنه بتدرس فى اخر سنه فى كليه تجارة .
نسمه نسخه من والدتها اخدت طيبه والدتها وحنيه قلبها وهاديه وبتتكسف من خيالها ورقيقه فوق الوصف بس مع الناس القريبين منها فهى مرحه جدااا وبتحب الهزار .
بقلم الكاتبة جنات
٭٭≈≈≈≈٭٭≈≈≈≈٭٭
اما الدور التالت عايش فيه العم الاصغر مرتضي اللى بيتابع الشغل مع عاصم لكنه عنده ثقه كبيرة فى ابن اخوه وبيحبه كأنه زى ابنه .
مرتضي معروف بطيبته وجدعتنه وقريب من اهل الحارة وبيساعدهم دايما زى ما كان بيعمل والده واخوه ابو عاصم .
متجوز من بنت عمه اللى والده اصر عليه يتجوزها .
نجاة اللى شخصيتها عكس مرتضي واللى تقريبا ماحدش فى الحارة بيحبها بس بيكنو ليها الاحترام لانها واحده من عيله الحداد .
ابنهم عز عنده ٣٠ سنه .
عز محبش يتشغل فى الورشه الخاصه بعيلته وفتح محل لاكتر حاجه بيحبها وبيفهم فيها وهى الموبايلات وكل اللى بيخص المجال ده .
والمحل بتاعه موجود فى البيت اللى على يمين بيت عيله الحداد واللى بناه الحاج عاصم لاحفاده عاصم وعز وكل واحد فيهم ليه شقه خاصه فى البيت عشان يتجوز فيها .
بقلم الكاتبة جنات
ــــــــ★ــــــــ
نروح بقااا لبيت عيله النجار البيت اللى قدام بيت الحداد .
البيت اللي ريحته دايمًا خشب ونشارة بس جواه حكايات أصلب من الخشب نفسه ... البيت اللى مقسوم نصين نص فيه الرضا والأدب ونص فيه الطمع والخبث.
بيت عيله النجار بيتكون من ٣ ادوار .
الدور الارضى وده فيه ورشه النجارة ملك العيله بس اللى ماسك الشغل هو الحفيد الوحيد للعيله وهو مجدى عبد العزيز النجار .
والدور التانى الدور الخاص بشقه عبد العزيز الابن الاكبر لعيله النجار واللي عينيه ما بتغمضش دايما بيفكر ويخطط ازاي يسيطر على كل حاجة
و ابنه مجدي نسخة طبق الأصل من أبوه في الخبث والطمع .
ومراته سعاد كانت الوحيده اللى بتتميز بطيبه قلبها فى ام الاسرة الحقودة دى بس توفاها الله .
بقلم الكاتبة جنات
ــــــــ★ــــــــ
اما الدور التالت فده الدور الخاص بمنصور النجار وبناته .
منصور كان قاعد فى اوضته وعلى سرير .
الباب خبط .
منصور ابتسم:تعالى يا بنتى .
زينب بيته الكبيرة دخلت وقربت منه وباست راسه:صباح الخير يا حبيبي .
منصور:صباح النور يا روح حبيبك انتى .
زينب:يلا خلينى اساعدك عشان نخرج نفطر سوا .
زينب جابت الكرسي المتحرك لوالدها اللى بيقعد عليه من وقت الحادثه اللى اتعرض ليها .
زينب نزلت رجليه براحه ورفعت دراعه على كتفها وحاوطت خصره ورفعته عن السرير لحد ما قعد على الكرسي ونزلت لمستواه ورفعت رجليه على المسند الخاص بالكرسي .
منصور:تعبك معايا دايما يا زينب .
زينب:هو انا اطول اتعب العمر كله ليك يا حبيبي انت بس تأمر وانا انفذ ... وبجد هزعل لو سمعت الكلام ده منك مرة تانيه يا بابا ... ربنا يخليك لينا يا حبيبي .
منصور:ويباركلى فيكو يا بناتى .
زينب قامت وقفت ورا الكرسي وبدات تحركه لحد ما خرجو الصاله وكانو اخواتها البنات قاعدين على السفره فى انتظار والدهم .
منار قربت من والدها وباست راسه:صباح الورد يا بابا .
منصور:صباح النور يا منورة .
ايمان وفاطمه قربو وباسو والدهم من خده .
فاطمه:صباح اللوز عليك يا منصور يا قمر انت .
منصور ضحك على جنانها:صباح النور يا حبيبتى .
ايمان برقه:صباح النور يا حبيبي .
منصور ابتسم بحب على رقتها اللى بتخليها تدخل القلب من اول نظرة:صباحك بيضحك يا عيون حبيبك .
فاطمه:دى تفرقه عنصريه على فكرة يا بابا اشمعنا يعنى هى عيونك .
منصور ضحك .
فاطمه:اهااا ماحضرتك سميت بنتك الكبيرة على اسم ماما الله يرحمها وهى الاقرب ليك والهانم ايمان سميتها على اسم مامتك الله يرحمها وبتموت فيهاا لكن انا والغلبانه منار محدش بيعبرنا ابداا .
منار حضنتها:تعالى فى حضن اختك الغلبانه يا غلبانه .
منصور ضحك بصوته كله:ده انتو نور عيونى يا بناتى ربنا يحميكو ليا يارب .
البنات حضنو والدهم بحب كبير .
زينب:ممكن كفايه دراما يا فاطمه هانم وخلونا نفطر بقااا .
زينب حركت كرسي منصور لحد ما وصل لمكانه على السفره وقعدو يفطرو سواا .
بعد شويا .
منار:انا شبعت الحمدلله ... هروح انا بقااا لان عندى الحصه التانيه ومش عايزة اتاخر يأما هدب خناقه مع المديرة العقربه دى .
ايمان:بذمتك فى مدرسه لغه عربيه تقول هدب خناقه وعقربه دانتى المفروض قدوة لتلاميذك يا بنتى .
زينب ضحكت:والله انا مش فاهمه بجد المديرة دى مستحملاك ازاى وانتى كل يوم تتخناقى مع حد فى المدرسه .
فاطمه وهى بتاكل:وهما هيلاقى حد زى منورة فين !
منار:شايفين الناس اللى بتفهم حبيبتى يا فطوم ياللى رافعه راسي دايمااا .
منار باست ابوها وخرجت من الشقه .
ايمان بصت لفاطمه:يلا خلصى عشان منتأخرش على المحاضرة .
فاطمه:البت دى مجتهدة زياده عن اللزوم يا جدعان وانا بحب اتاخر على المحاضرات عشان بزهق بسرعه .
ايمان ضحكت:او تهربي وتروحى تقعدى فى الكافتيريا مش كدا .
منصور:انتى مش بتحضرى محاضراتك يا فاطمه .
فاطمه بصت لايمان بغيظ:تعرف عنى كدا يا منصور بردو ... البت دى قرشه ملحتى مش اكتر .
البنات ضحكو .
ـــــــــــ
تعالو نتعرف على بنات النجار .
★ زينب ★
البنت الكبيرة واللى عندها ٢٨ سنه درست فى كليه تجارة .
منصور سماها على اسم والدتها لانها نسخه منها وهى الاقرب لقلب ابوها .
حنينه وطيبه فوق الوصف اخواتها بيعتبروها امهم مش اختهم .
كانت مخطوبه وخطيبها مات قبل الفرح بيوم وطبعاا من وقتها الكل بيتكلم عليها ان وشها نحس ومحدش بقا بيتقدم ليها من وقتها .
★ منار ★
عندها ٢٦ سنه خلصت دراستها واللى كانت فى كليه تربيه قسم لغه عربيه وحاليا بتشتغل مدرسه فى احدى المدارس الحكوميه .
شخصيتها غير زينب تماما قويه جدااا .
★ التؤام ايمان وفاطمه ★
اللى عكس بعض خالص فى الشكل وفى الصفات .
عندهم ٢١ سنه فى اخر سنه فى كليه تجارة .
ايمان يعنى الرقه والهدوء والخجل .
اما فاطمه فهى الجنان بحد ذاته وشخصيتها مرحه جدااا .
بقلم الكاتبة جنات
ــــــــ★ــــــــ
فى ورشه عيله الحداد .
قاعد عاصم قدام الورش والعمال شغالين جوا .
نزل عز من البيت وقرب من عاصم:صباح الفل يا ابن عم .
عاصم:صباح الخير يا عز تعالى اقعد .
عز:هروح افتح المحل واجيلك .
عاصم:تمام .
نزل شاب من البيت اللى على بعد بيتين من بيت الحداد وقرب من عاصم وقعد على الكرسي اللى جمبه:صباح الخير يا صاحبي .
عاصم ابتسم:صباح النور يا خالد .
خالد بصوت عالى لصاحب القهوة اللى قريبه منهم:القهوة بتاعتى يا صبحى .
صبحى:من عيونى يا معلم يا خالد .
عاصم:صاحي متاخر عن عادتك يعنى ... الواد اللى شغال عندك فتح الورشه من بدرى .
خالد:ماهو كلمنى وقالى انه وصل قبلى وانا قولته يفتح .
عاصم:انت كويس يا خالد مالك ؟
خالد:انت عارف حوارات كل يوم مافيش جديد .
عاصم:يابنى مانا قولتلك طنش مرات ابوك دى وفكك منها .
خالد:ومين قال انى بفكر فيها ... بس هى اللى حطانى فى دماغها وبتعمل كل مشكله والتانيه بينى انا وابويا.
عز فتح المحل وجاب كرسي وقعد جمبهم:صباح الفل يا خالود .
خالد:صباح فل يا عز .
عز:الواد فتحى شكل ناموسيته كحلى لسه منزلش .
فتحى:سامع حد بيجيب فى سيرتى .
عاصم:اهو جالك اهو .
فتحى قعد جمبهم:صباح الفل على احسن رجاله فيكى يا حارة .
الشباب:صباح الخير .
عز:انت لسه هتقعد يا بنى روح اقف مع امك فى المخبز مش شايف الناس اللى واقفه قدامه يا جدع .
فتحى:رايح يا عم اهو ... همشي الزباين دى واجيلكوو .
فتحى مشي وراح المخبز اللى ورثه عن والده الله يرحمه ومشغله هو ووالداته الحاجه اعتماد .
قرب شاب من خالد:معلم خالد فى عربيه جت الصبح ومحتاجه تتظبط .
خالد قام وقف واخد القهوة اللى صبحى جبهاله:تعالى يا بنى معايا .... سلام يا شباب .
ــــــــــ
تعالو نتعرف على خالد وفتحى .
خالد
شاب فى ٣٣ من عمره .
عنده ورشه ميكانيكا خاصه بالسيارات .
عايش فى بيت والده بس فى شقته الخاصه لان والده اتجوز وهو مش بيكره حد قد ما بيكره مرات ابوه .
شخصيته جاد اوى وجدع جداا مع اهل حارته .
اما بقااا فتحى .
هو فاكهه الشله والحارة كلها .
عنده ٣٠ سنه .
بيشتغل فى المخبز مع والدته من وقت وفاه والده
معجب بفاطمه بنت منصور النجار بس مستنى الوقت المناسب عشان يخطبها .
شخصيته مرحه جدااا .
عاصم وعز وخالد وفتحى اصحاب جدا ومقربين جدا من بعض ومع بعض فى الوحش قبل الحلو .
ــــــــــ
عز فضل قاعد مع عاصم اللى شاف والدته اللى منزله السبت عشان تشترى خضار .
عاصم:محتاجه حاجه يام عاصم ؟!
مديحه:لا يا حبيبي خليك انت .. انا هجيب .
منار نزلت من بيتها .
وشافت ام عاصم اللى واقفه فى البلكونه بيتها وبتشترى خضار من فرشه الخضار اللى فى الحارة .
منار:صباح القشطه يا ديحه .
مديحه:صباحك فل يا منورة ... عامله ايه يا بت ؟!
منار:زى الفل اهو قدامك .
مديحه:راحه المدرسه .
منار بضيق:هو انا ورايا غيرها !!
مديحه ضحكت:يا بنتى حبي يا تعملى عشان اللى بتعمليه يحبك .
منار:ونبي مانا عايزاه يحبنى يا ديحه ... دى شغلانه فقر .
مديحه ضحكت:ونبي يا بت يا منار انتى زى السكر ربنا يفرح قلبك .
منار:روحى يا ديحه يلا سلام مؤقت .
مديحه:سلام يا منورة .
عاصم عينه على عز اللى بيبص على منار .
عاصم:عينك ياض احنا منرضهاش لاختنا .
عز بصله ولف وشه .
عاصم:ما تتحرك وتروح تتقدملها انت والاهبل التانى اللى عمال يحب اختها فى السر .
عز:مش لما اعرف هى جواها ايه يا ابن عمى ؟!
عاصم:انت غبي يا بنى .... حتى لو جواها حاجه هتيجى تقولك مثلا ... وبعدين بنات النجار مافيش فى ادبهم واخلاقهم دول مابيرفعوش عينيهم من الارض .
عز بسخريه:الا ام لسان طويل اللى انا متنل وبحبها دى ماشيه تشاكل دبان الحارة يا جدع .
عاصم ضحك:ماهما اللى بيعصبوها .
عز:وهى ما بتصدق ولسانها ده اللى لما بيتفتح كأنه ماسورة وضربت ومستحيل تتقفل بسهوله .
عاصم ضحك وعينه على الزبون اللى دخل محل عز:طب روح شوف شغلك يلا .
عز قام وهو بيضحك وراح على المحل بتاعه ..
