رواية معلم ستيني كامله جميع الفصول بقلم جمانه السعيدي
هاي القصه راح تعلمنا شلون الكلام يكدر يغير حياة الناس
مرات للافضل
مرات الكلام يغير حياتنا للأسوء وممكن هذا الكلام يوصلنا للموت بعض الاحيان
هاي القصه راح تخلينا نتوقف بمحطات عمرنا الي مرت علينا ونذكر اكثر الكلام الي اثر علينا
الكلام الي غير هواي اشياء بحياتنا
اني ستار عمري حاليا عمري ٦٠ سنه
معلم ابتدائيه معلم صف اول ابتدائي مو معلم عادي
اني المعلم الي خرجت أجيال
اي طالب عندي مايطلع من صف اول اله يعرف يقرأ ويكتب
ماعندي طالب مايقرا ويكتب
الشطار اللهم جوائز يوميه تحفيزيه
اما الطلاب الي مستواهم واسط اصادقهم
واخليهم يحبون الدروس منا لمن ارفع مستواهم
واخليهم وياا الشطار
اما الطلاب الكسلى عندي وياهم اسلوب تربوي
حديث يمكن محد غيري مسوي
اروح ازورهم بلبيت واكعد ويا العائله
وافتهم شنو المشاكل الي جاي تواجهه هذا الطفل
ليش مايقرا ويكتب ليش مايجي محضر دروسه
اخذله هديه علبة اللوان ودفتر رسم
او اشتريله أقلام دفاتر
اتعرف على عائلته
اذا اكو مشكله تخص العائله احاول اساعدهم
احجي ويااا ولي امره واخلي ينتبه هاي المشكله جاي اتأثر على الطفل
مجاي ينتبه للدروس
ومستوى الدراسي بلنازل
ممكن اساعد اهل الطالب اذا اكدر واحل المشكله
اذا كانت مشكله بسيطه طبعا
ومستعد اجي للبيت انطي دروس بحضور الاب
وأعلم الاب كيف ممكن يساعد ابنه بلدراسه
من اتواصل ياا عائلة الطالب
خوف الطالب من المدرسه يختفي لان راح يعتبرني واحد من العائله
اخذ رقم تليفون الاب او الأخ وابقى آتواصل وياهم
ادزلهم التحضيرات اليوميه
اصادق الطفل وابقى اسئله عن احواله واحوال اهله
حتى يطمن
ماكو طالب من صف اول اني درسته اله شاطر ويعرف يقرا ويكتب
اني حتى الطلاب الشطار
ازورهم بيت اهلهم واشكر الاهل لان مهتمين
للطالب
امدح الطالب وامدح مستوا وذكائه كدام اهله
حتى اعزز ثقته بنفسه اكثر
جمانه السعيدي
اول بدايه كل سنه دراسيه باب بيتنا مااكدر اسده لان الاهالي
يجون للبيت حتى الطفل يكون بلصف الي ادرس بي
توصيات تجينا من كل مكان
اني ودي اخذ كل الطلاب ادرسهم
بس هاي القوانيين
اني مو اقلل من مستوى المعلمين الي يدرسون وياي
بلعكس كلش زينين
بس اني اسلوبي بالتدريس يختلف عنهم
سمعتي طيبه والناس بالمنطقه يشهدولي
بلا سلوب الي ادرس بي
شكد تجينا مكالمات اول السنه بحيث شعبتي اكثر شعبه بيها طلاب صف اول
هاي حياتي على الجانب المهني
اما حياتي الخاصه
اني الحد هذا العمر اعزب بدون زواج من اتابعون قصتي راح تعرفون شنو الأسباب الي خلتني ابقى بدون زواج
اما من الناحيه الدينيه
اني لا اصلي ولا أصوم
بعبد جدا عن العبادات جماعتي يكولون انت ملحد
لا اني مو ملحد
ماانكر وجود الله
بس ماعندي اي طقوس عباديه
لحد يسئلني ليش اني نفسي مااعرف ليش
بيت اهلي بلريف منطقه زراعيه بيوت بسيطه
اني اكبر واحد بعأئلتي
من بعدي اخوي مرتضى بعده علي
والبنات زهور وامل
ابوي موجود وامي سالمه
عائلتنا معتمده على الزراعة وتربية الحيوانات
اني شاب شكلي عادي ويمكن اقل من عادي
تكدرون تكولون مو حلو حنطاوي شعري مجعد
جسمي عادي لا سمين ولا ضعيف
طولي ١٧٠
اما اخواني الاقل مني بنات وولد كلهم احلى مني
من اني زغير شاطر بلمدرسه اني واخوي مرتضى
كلش شطار
بمنطقتنا ماكو غير مدرسه ابتدائيه
اني واخوي طلعنا من الاوائل
هذا الشي حفز ابوي وشاف من مصلحتنا نكمل دراسه
لان الشهاده بيها مستقبل
بس شلون نكمل دراسه احنا زغار والمدرسة بعيده علينا
المدارس الزينه بلولايه
اهل ابوي يعني بيت جدي
ابوي عنده اخ اخرس اخرس ولادي
بس شاطر شطاره مو طبيعيه
تعلم خياطه من هو زغير اشترا مكينة خياطه
وبدا يخيط الاهل القريه كلهم
خياطه كلش حلو مايصعب علي شي
بلبدايه كان يخيط على رجله يعني مكينه ام الرجل
بس حاليا لا عنده مكينه على الكهرباء لان قريتنا وصلتها كهرباء
طبعا عمي الأخرس هذا مزوج زوجته تحجي مو خرسه مثله وعنده اولاد وبنات
الضريف بلموضوع اولاده وبناته كلهم يحجون
ولا واحد طلع اخرس علي
وعندي عمه وحده جبيره ومامزوجه عمتي مو حلوه فاتها القطار
وماازوجت
عمه سكينه
باقيه تخدم بلبيت لان امي تطلع للزرع ويا ابوي
وعمتي مسؤله عن شغل البيت والطبخ والتنظيف
هسه نعرف شلون اني اجيت للولايه
ابوي كان محتار يريدنا ندرس ونكمل وناخذ شهاده
بس مايعرف شلون
راح نسكن بلولايه ومنو يبقى يمنا يدير باله علينا
جمانه السعيدي
بيبي ام ابوي قررت تحل هاي المشكله
طلعت ذهبها الي ضامته من سنوات كله ذهب ثقيل
واله قيمه
بيبي...لا تحتار هاك هذا الذهب بيعه واشتري بيت بولايه
وخلي ولدك يكملون مدرستهم
ابوي...تحجين صدك يمه الله يحفضج ويبارك بيج
بيبي...بس عدي شرط واحد
البيت يتسجل باسمي واذا متت وصيتي نص البيت
لسكينه لان هيه تعبت علينا
والنص الثاني الك انت الأخرس
ابو ستار...صار يمه هاي وصيتج اضل حافضها للموت
ستار....نزل ابوي للولايه ولكا بيت جبير٣٠٠ متر
مبني وكامل بوقتها مبني على احدث موديل
راح قيم ذهب بيبي شافه يوصل الفلوس البيت
بس يعوز شويه
رجع علينا للبيت
ابوي.. لكيت بيت والذهبات جابن خوش سعر
بس نعوز شويه فلوس حتى نكمل فلوس البيت
ستار...جدي بوكتها طلع فلوسه حسبهن
وامي طلعت اكلادتها الذهب اطتها الابوي كملن فلوس البيت
ثاني يوم ابوي غبش من الصبح للولايه
اشترا البيت بمكاتبه مبدئيه واليوم الي بعده
اخذ بيبي وراح فتح بيان وسجل البيت باسمها
وهيج صار عدنا بيت بلولايه ومنطقه حلوه
بقت مشكله منو الي راح يجي ويانا ويخدمنا بلبيت
بوقتها امي ماتكدر تعوف ابوي والحلال واخواني وتجي ويانا وخواتي زغار بعدهن سنتين وتلاثه
اكيد ماؤكدرن يجن يخدمنا بلبيت
بس بيبي لكت حل مناسب للكل
بيبي..تروح وياكم سكينه خليها تروح تشوف الولايه
وهم اضل وياكم هناك
بيبي جان اباله غير تخطيط
بلكت سكينه يشوفها واحد من الولايه ويخطبها
لان ايست هنا ماكو وواحد يريدها
جمانه السعيدي
كيفت عمتي راح تعيش بلولايه وتشوف الناس
والدنيا كلها
عبالك جانت تحلم ورب العالمين حقق حلمها
بين يوم وليله عمتي راح تنتقل من الريف
وحياته المتعبه
وتعيش بلولايه
اجا ابوي قدملنا بلمتوسطه اني واخوي ثنيبنه
لان اني اهلي اخروني سنه قبل لا اسجل بلاول
حتى اني ومرتضى نصير سوه بصف الاول
لازم نجهز البيت حتى نكدر نسكن بي
اجا ابوي للولايه اشترا طباخ زغير ومواعين
قبل الناس تطبخ بجدوره فافون وتاكل بمواعين فافون
وحياتنا حدا بسيطه
جابلنا ابوي حب نشرب منه ماي
اكو ثلاجات مو ماكووو بس احنا مابقت عدنا فلوس نشتري
ثلاجه
وجبنا ويانا فراش من اهلنا
هذا اثاث بيتنا وبس
طباخ زغير وموأعين وفراشات وحب ماي
بدت المدرسه واني ومرتضى ماعدنا شي غير الدراسه
اهم شي ندرس وننجح
بوقت فراغي ازرع بلحديقه
كلشي زرعت طماطه وسلج وشمنت وباميه
قسمت الحديقه مربعات زغار وزرعتها
بلاضافه اهلنا كلما يجون للولايه يمرون علينا
يجيبون وياهم بيض حليب روبه جبن عرب
دهن حر زبد
اذا عدهم ذبيحه يجيبون حصتنا
بايام العطل ننزل للعرب نشوف اهلنا نبقى يوم يومين ونرجع
