رواية ذاري النجوم كامله جميع الفصول بقلم زهراء السراي
بسم الله نبدأ حكايتنا
وها قد عدنا ياجميلات
بقصة جديدة
لا افتح باباً قديماً
بل باباً جديداً
أروي من خلاله وجع لم يُحكَ بعد
أعود وفي صدري حكاية
شخصياتها تنتظرني بصبر
لأروي مشاعرهم بالكلمات
قصة جديدة تروي ألم وأمل
عدت لا لأكتب فقط بل لأترك أثراً
✥━━━༺ زهراءجودةّالسراي ༻━━━✥
#ذاري_النجوم
#الجزء_الاول
:
:
تصويتكم بنجمة ياجميلات
قبل القراءة دعماً للقصة
كلماتكم الجميلة في خانة
التعليقات💛
:
كل انتظار لا يكافأ
يتحول في النهاية إلى خيبة
تعلمك أن تتأخر قليلاً
لكن لا تنتظر أحداً كثيراً
:
:
✥━━━༺ ليل ༻━━━📝𒍝𒄴𒊏𒀀 زهرة 🌼
يالها من أيام مليئة
بالخيبات
ياله من قلب متعب
.
.
هدوء السيارة فجرية
والهوا باااارد ميصده عن
دخول السيارة بس الجامات اللي
رافعتها وبالي المشغول بذكرى البارحة
ويا لحظات تساقط قطرات المطر
صوته وهو يتصل يبحث
عن رضاي ويدور أستعطافي
وهو يخلي سماعة التلفون
مطلعلي أغنيته المفضلة
وصوت رياض أحمد الدافي
أنساب لأذني اضطرني
مااغلق الاتصال واستمع
- من تزعل توحشني الدنيا
وأتصور غيرت ظنونك
من ترضى يظل شوق البيه
يذوبني بنظرات عيونك عيونك
من أزعل ترجع تتعذر تتعذر
وبعد أيام وهم تتغير تتغير
من أزعل ترجع تتعذر تتعذر
وبعد أيام وهم تتغير تتغير
وكم مرة تبعد وأغفرلك
كم مرررة طبعك صاييير
صايير مرررة ومرة
نفضت مشاعري المتراكمة واني
داخلة كراج المستشفى
نزلت لابتوبي وجنطة
مستلزماتي والسكراب
نزلت بسرعة استلم واجبي
من الاطباء الخفر دخلت
من باب الطوارئ والتقيت وجه
بوجه بدكتور نوح بس شافني
وجهه تغير
-صباح الخير دكتور
-صباح النور دكتورة ليل
غرفتج مشغوولة شكلي ويه
دكتورة تيسير تمام
-تمام
-اني طالع تلگين كل الكيسات
والطبلات وكل بيشنت مكمل
العلاج اخر دورة صيدلية بالستة
هسه تلگيهم مخلصين
ب٨ العلاجات كالمعتاد تتنظم
وهيج نقفل طبلة البارحة تمام
-تمام دكتور
ابتسمت بتعب وهو طلع
لغرفة الاطباء ياخذ اشيائه
يوقع ويطلع
مشيت بخطوات سريعة استلم وابصم
دخلت للردهة ريحة المعقمات المعتادة
مافادت هالمرة بتهدئة أعصابي
فمشاعري وأعصابي حالياً
داخلة بحرب ضروس بين المنطق
والحب
مشيت خطوات وتجمدت أقدامي
على بعد أمتار شفت شخص
بظهر عريض وبدلة عسكرية
واگف بصلابة اعرفهاااااا هالوگفة
حبست أنفاسي احس الدم تراجع لوجهي
شاعل بي جمرة نار
هاي الوگفة والأيد اللي مسنودة عالمسدس
وكأنه بوضع استعداد للاطلاق هذا
طبعه متأهب لكل شي
انحناءة الكتف بالوگفة نفسها
لا يمكن يكون غيييره بس ماألتفت
طريقي يمر من جانبه رفعت الكمامة
على وجهي ومشيت بسرعة
خاطفة الى ان عبرت الزاوية اللي
واگف بيها
طول ساعات المناوبة بعدها جنت جسد بلا
روح بديت افتر عالردهات
لازم اقيس ضغط المريضة خليت
الجهاز بالعكس ورجعت عدلته
الممرضة ويايه تساعدني
گلتلهة كتبي
-٤١ على ١٢
نبهتني بأستغراب
-دكتووورة شلون ٤١
-اقصد ١٤ على ٩
گدامي مريضة گالت أسمها
اني طلعت ملف مريض
ودماغي يقرأ ويكتب ويتسائل
معقووولة هووو لو عقلي من التعب
گام يتخيله بكل مكان
الساعة ثمانية اخذت اغراضي
اتجهت للمكتب دخلت بتعب خليت الجنطة
بالخزانة الصغيرة طلعت السكراب حتى ابدل
لاحتلي باقة ورد أبيض وأصفر
مغلفة ببساطة مستفزة دورت
عالبطاقة عررفته هوو من خط ايده
المبعثر
-كبرتي بالسن وصرتي متفرزنين
وعبرتي ماسلمتي بس يلا عطرج سلم بدالج
حقج هيبة العسكري ترهب بس مو لدرجة تنسين رجلج
2 تع
ضحكت رغماً عني
ضحكة ممزوجة بدمعة محبوسة
بتعب وتفكير ولخبطة
هالسخافة وهذا الغرور المبطن بالخبث
مايملكه إلا هو
بعده مثل ما هو ماتغير
بعدة يعرف يستفزني
ويطلعني من صفنتي وسكوني
لعواصف شعوري وجلجلة صوت اعصابي
فتحت باقة الورد خليت منها وردة
بجنطتي والباقي خليته ويه الكارت بسلة
الزبل صورته ونشرته مخصوص
حتى هو يشوف وكتبت
-بعض الهدايا مكانها الطبيعي هو النسيان
أو سلة مهملات في ممر عابر
- شفت الورد بالزبالة بس اكو وردة برتقالية
ناقصة بالباقة ويييين وديتيها
لو عجبتچ وضميتيها بين أغراضچ حتى تشميها وتتخيلين نفسچ متوسدة صدري مثل قبل
رجع خله ايموجي نار عالستوري
وكمل باستفزازه
-العسكرية علمتني أحسب حساب كل خطوة
وعلمتني إنو التمرد هو أول علامات الاستسلام
تدرين زين إنو ريحة هالوردة من ريحتي لذلك
اخذتيها وعنادچ هذا مجرد محاولة فاشلة حتى تقنعين نفسچ إنچ نسيتي بس عيونچ بالمستشفى اليوم چانت تكول غير حچي يا دكتورة ليل
تسمرت بمكاني واني اشوف رده
فتحت الجنطة بسرعة ولگيتها فعلا
الوردة البرتقالية الوحيدة بالباقة
-صباح العافيات
سحبت ايدها أبوسها حضنتني
-ولج چتافج ثلج گعدي
حدر اللحاف خل اصبلچ حليب وچاي
تلفلفت يمها واني گاعدة
شربت الحليب والجاي
واني صافنة
باوعتلي بنظرتها اللي متخيب
-تعاااي نامي على رجلي
-تتعب رجلچ بيبي
-مو اكثر من تعب راسچ تعااااي
خليت راسي على رجلها مسحت على راسي
بهدوء
-شسوالچ
-يابيبي ماتخلص هالدوامة راح تكبر وتكبر وتظل
مثل خورة الماي تسحبچ
تلاحگي روحچ وقرري ابوچ مل من الرايح
والراد والمسودن كل يوم جايبله كتيبة عسكر
علمود الصلح
-بعدني بيبي
-شبيچ يابيبي ليش دموعچ طاحت
ولچ لا ترخصيها خليج عزيزة
-مليت من ادعاء القوووة يابيبي مليت
وهذا گلبي لو امره بيدي چان حرررگته
-ااااااخ يابيبي الگلب مالنا علي سلطان
سنين العمر مرت والگلب بعده يغلي
1 تع
-بيبي
-يابعد عيوني
-وتحچيلي
-شتستفادين من سالفتي
-اخذ حكمة منها عسى ولعل تفيدني
ضحكت وهي تضربني على راسي
-گومي صلي ونامي يلة وبالليل تعاي
نامي يمي واحچيلچ الجرة على بيبتيچ
وشصار
تركتها ورحت صليت وغطيت
بفراشي ماصحيت الا على صلاة الظهر
والغدة وهم رجعت نمت
العصر گعدتني بيبي
-ليلة
-ها حبيبتي
-گعدي بيبي لا تغورب الدنيا وانتِ نايمة
مايصلح
-طالعتلي ليلة جانت ظفيرتي هيچ
نفس ظفيرتچ
رفعتها باست طرفها ونزلتها على كتفي
وذبت نفس
-شتذكرتي بيبي
-كل شي يابيبي كل شي
الراح اسولفه الچ غير التعرفي انتِ سامعة
بس اطراف القصة يابيبي
وشتسمعين لا تح$ين لأمچ
اخاف على گلبها من الكسرة لو سمعت
هزيت راسي وباوعتلها غمضت عيونها
بقوة وكأنها جاي تسحب
نفس من هوة ذاك الزمان
ملامح وجهها ارتخت
وگامت تجاعيدها الحلوة
تحچي قصة حياة كاملة
بدتها بوصف جو قريتها اللي تربت بيها
وبدت بصوت حالم تشرحلي وكأنها هناك
قرية ال............ ناحية ال......
بعدني لهسه روحي معلگة
بيها ولهسا من أغمض عيوني
أشم ريحة طين السواجي
مخبوط ويه ريحة البردي
چانت شمسها مو مثل شمس المدينة تحرگ
چانت شمسها بيها دفو وحنية
تراري من بين سعف النخل مثل خيوط الذهب
تنزل على وجوهنا تسويها ملونة بحمرة دفو
والهوا يابيبي
الهوا جان يجينا عذيبي يرد الروح
محمل بريحة القداح والورد الجوري
المزروع بباب كل بيت وصريفة
چان الضوه بالقرية صافي
مثل ليرة ذهب تراري برگبة حليوة
ماكو دخان ولا صوت عالي
الصبح چان يبدي بصوت الديوجة
وغنى العصافير على اطراف
الشجر وصوت خضيض الحليب
طالع من كل دار بالقرية
حتى تصبح العوايل تاكل
زبد وتشرب شنين
بيتنا چان مگابل راگ الشط
حوشه واسع مفروش برمل ناعم
وبالنص سدرة الشمس من تطلع
على حيطان الطين تطلع منها ذيج الريحة
الترد الروح ريحة جورة وصحبة حلوة
وخوة ريحة امان
أتذكر بهاي الشمس وبذاك الضوة
چانت امي ومرت عمي سالم
يتنطرن ردة ابوي وعمي من الولاية بعد
ماياخذون المحصول البسيط
الطالع من گاعهم الصغيرة يبيعونه بالولاية
ويردون
واني واخواتي اثنينهن وابن عمي هاجس
نناطرهم بعتبة الباب
لو يم السدرة على حافة الشط
يعبرون بالبلم ونتلگاهم جيوبهم معباية
بيض اللگلگ وذروگ الفار ومصقول
ويه غيبة الشمس يردون ونتراكض
احنه الاربعة للحوش نبشر أمهاتنا
عمي سالم چان نظرة مو زين وشوفه
ضعيف ومعتمد على أبوي بكل شي
امي وعمتي أم هاجس صاحبات من
يوصلون أبوي وعمي للحوش
يلگوهن اذا صيف فارشات الحوش
بحصران الگصب وراشات الگاع
حتى تبرد
وأذا شتا مسويات جمرية
بنص الربعة مال الحوش
-شنو الربعة بيبي
-شلون تگولون صالة مال خطار
تصير طويلة مربعة لو طولانية
مسگفة بجمالي من عمدان التوث
وحصران الگصب ومطينة بطين
مفروش سيايد ......
-شنو سياييد
-سجاجيد
ضحكت وهي ابتسمتلي
-لهجة أهلنا بعدها معلگة بلساني
1 تع
-اي بيبي
-اي يابيبي تگعد امي وعمتي حاطات
جدر العشه على حافة الموگد عالجمرية
الناعمة
ويصبن العشة نتعشى ووراها نشرب ستكان
الجاي المهيل
عمي ياخذ مرته وابنه ويدش حجرته
وامي وابوي ياخذونه ندش حجرتنا
الصبح يطلعون لگاعهم
الصغيرة يعدلون بيها وان چان
مو موسم زرع يزرعون خضورات
عدنة چم هايشة وصخلة
ممشين بيهن عيشتنا والحياة ماشية
والدنيا بنعمة وخير انا عمري بوكتها سبع
سنين واخواتي اكبر مني سنية عمرها تسعة
بعمر هاجس ابن عمي
ونعمة عمرها ١٢
كل يوم تگعد امي الصبح
ايام الصيف تخض الحليب
بسرعة تخاف علي يحمض
وعمتي ام هاجس تحوش الجت
للحلال وانا وهاجس أيد بأيد
نلعب بالگاع اذا ابوي وعمي موجودين
ونفتر حوالين السدرة على
راگ الشط ومن ازعل منه
يركض يشلعلي رازقية من گااع
الشيوخ ويرد يخليها بيدي
وبمرة ملتمين ولد وبنات نلعب
عالراگ مال الشط فات واحد
من الولد الصغار جر ظفيرتي
شافه هاجس وتسودن طيح بالولد
وسحله بالتراب ونام على خوانيگه
اجر بي ماينجر
اخت الولد تلعب ويانه خافت على
اخوها جري حجارة من الگاع
وشمريها ماشفت بعدها شي
غير راسي بحضن هاجس
والجهال ركضت تفزع أهلي
انشگ حنجي جوه شفتتي ظل الأثر
ومن يومها صار هاجس مثل خيالي
وگام من يروح يم جعفر الشيوخ يقرة
لو ياخذني ويا لو من يرج يعلمني شتعلم هو
ومرت هالسنة وصار عمري ٨ سنوات
وهو ١٠ الصار بهاليوم عمري مانسيته
ماخذينه ابوي وعمي وياهم انا
وهاجس للزرع واجتنا اختي الچبيرة
نعمة تهف وتصيح مانفهم صيحتها
شنهي ركضلها هاجس وابوي وعمي
يركضون
ويه ماوصلها هاجس طاح للگاع
ركضت وياهم وياريت ماوصلنا
عمتي ام هاجس گارصتها حية وهي تحوش
جت للحلال مالحگنا نوصل لگيناها بحضن امي
گوه تجر النفس وما بلسانها غير هاجس من وصل صدت بعينها علي وسمعت صوته من صاحلها يمه
وغمضت عيونها من شافته
وشالت عامود من عمدان البيت
عمي صار طوله مايكدر يصلبه
وحان وكت الدفن
واحتارينه مسافة طويلة للولاية
ومن بعدها للنجف
ومنين نجيب سيارة
وسبحان ربي واحد جارنه أسمه
عليوي ابو خزعل
چان يشتغل بالولاية بدائرة
حكومية سايق
ماعنده بس خزعل الجابته امه وماتت
گعد علي عمرة ١٤ سنة بوكتها
سبحان الردة للقرية بذاك اليوم
دگ صدره وطلع بالدفانة عمي مايگدر
يشيل روحه راحو بيها ابوي وامي
وابو خزعل بس
وانا واخواتي وهاجس وعمي
القرية كلها ظلت حوالينه عندي
خالة وحدة اكبر من أمي دارت بالها
عالبيت وعدى النهار وليلة ثاني يوم وگلوبنا
نار ليش تأخرو
راحو كلهم يشيعون الغالية
ومادرينا الجنازة تصير جنايز
راحو يواسون عمي لأن فگد مرته
مادرينا هالدرب ياخذهم ااااخ ياذيچ
الطلعة المابعدها ردة
وياذاك الدرب المارحم دموعنا
البيت فرغ بلمحة بصر
وانا أتلفت لا أم التناغيني ولا أبوي
اليحاميني
ادور بالحجر وادور طيوفهم
هاجس ماخذله زويه يبچ ي بسكوت بيها
رحتله روحي رايحة
-هاجس ابوي وامي بطو بالدفنة
عقلي چان مايفرزن انهم راحو
والبيت فرغ باوعلي ونظرتة مكسورة
-كلهم شالوو عذبة أيسي منهم محد يرد
1 تع
وطفت شموع البيت وظل بس السواد يلوح بكل زاوية
اااااخ يا ذييچ الليلة الاولى
$انت أثگل من الجبل على صدورنا
انا ابچي وادور حضن امي
لامة روحي واناشغ ادور
ريحة ثوبها الچنت اشمه گبل لاانام
وادور شماغ ابوي المعلگ ببسمار بالباب
محسسنا بالأمان من ضيم هالدنيا
أخواتي محاوطاتني ومابلساني غير
أريد أمي
وانسد الباب علينا اول ليلة
خالتي باتت يمنا
وعمي سالم لمنا انا وهاجس واخواتي حدر عباته
1 ت
وگعد يحچيلنه قصة عن الصبر على
المصيبة مذكرنا بمصاب السيدة زينب
بت الامام علي عليهم السلام
وشلون فگدت اخوتها وولدها بنهار واحد
گلبي الصغير چان مايگدر يصبر
ولا تقنعه قصة ولا سالوفة صبر
مر اليوم الثاني والثالث والرابع
وخلصت معزة اليتيم وتطشرت العالم
وگامت خالتي كل يوم تجي تساعدنا
بعدين صارت طلابة ورجلها حلف يمين طلاگ
انها ماتوصل النه بحجة عمي زلمة
وزحمة تدش البيت وهو موجود
بچت خالتي وتتعذر بس الصار
اختي نعمة جبيرة ومعدلة
اخذت الشطارة من امي وعمتي
وبدت شويه شويه تسوي التگدر علي
بس الگاع ظلت وعمي مايگدرلها
عيونة طفت قِصٌصٌ مَآيِّ هِوِبَِّس بيها نور الحياة گام خلاها عد واحد من القرية زرعها وتالي لهف الزرع وماحصلنا غير تفاليس الحالة ضنكت وهاجس چان يدرس
ويه ابن الشيوخ عاف مدرسته
وبيوم وليلة تحول من وليد عمره
١٠ سنين لزلمة شايل هم أهله
ببيوت الشيوخ اشتغل راعي
ويداري حلالهم صار اسمر من لاحته الشمس
وعيونه السود زادن حدة من التعب
نعمة بالبيت تخبز تنظف وتداري عمي
وانا وسنية
وهاجس گام من القليل اليلزمه يصرف علينه
وحلالنا صرت اني وسنية نطلع بي
حوالين الحوش واطراف النهر نرعى
بس هاجس تسودن ماعدنا مرة تسرح بالحلال
صار ياخذ حلالنا ويا حلال الشيوخ
وربنا راد يصيب الحلال مرض
يقضي علي وهيچ صفت الگاع بور
والحلال راح وصرنا نتنطر جية هاجس
وشو شجايب بيده
لو صايدله سمجة لو بيده چم فلس
وأنعجن هاجس بطين التعب گام
من يطلع للشغل ويه الشيوخ
تشوفين مشيته مشية زلمة
وگعدته وحچايته ومن يجي للبيت
يتولى أمري يطلعني العب بگيعان
الشيوخ بين الزرع والتراب وتلوح بعيونه
عرامة الطفولة
وهيج مرت السنين لحد ماصار عمر
نعمة ١٥ سنة ودگ بابها أبن الحلال
واحد من قريتنا ابن ناس ومعدل
عمي گاللها بويه عرسي شو اخياتج
حواليه وهاجس مامقصر
وصار وتزوجت نعمة صح انا عمري
صار ١٠ سنين بس أنام بحضنها بالليل
صرت اخنگ روحي خنگ عن لاابچي
وعمي يسمع صوتي وينقهر
بس الأمني هو چف هاجس الينمد
ويلزم چفي وأغفى والسنة جرت الأخرى
وصار هاجس يسكن طارف رموشي
وية كل رمشة اشوف عيونه
الحلوات يحچنلي قصص وأشعار
1 تع
وحول هاجس حلم عمرة بالدراسة
وتعاون ويه جعفر ابن الشيوخ وصار يدرس
وبباله حلم واحد نجوم تزيين چتافه
وكبرت انا وصرت ١٥ سنة
كبرت ودار عودي بلوني هذا
الجانت البنات تتحسدني علي
وجرة عيوني ولونها
ازلام القرية ياهو اليجي يتخطبني
وعمي حچايته وحدة بنيتي
بعدها صغيرة
بس انا ادري عمي يعرف بوليده هاويني
گام هاجس يلاحظ لبستي وگعدتي وحچايتي
ومايرضالي اطلع الا ملثمة عن العيون لا تشوفني
وعن لا اضوج ويضيج خلگي سوالي حديقة
يم ساجية الماي بباب البيت
حاوطها بسياج سعف وترسلي الگاع
رازقي وجوري وصارتلي مثل جنة
عدن كلما هفني الشوگ لريحة هاجس
اشملي رازقية
1 تع
وكبرنا وعرست اختي سنية
وظليت آنا وياهم
قايمة بواجب البيت عرفت نومته
وگعدته وحچايته
اتخطف ساعات للحجرة
مالتهم العفتها ونمت بحجرة اهلي
من كبرت افوت للحجرة من تفرغ
اشم ثيابه وريحة الدخان والنار بيهة
من يشتغل بگهوة الشيوخ
وصار هاجس
من صدگ هاجس ساكن طيوفي
وصرت اتنطر نومته حتى اتنوع
لملامحه عدل وضميت هالشوگ بگلبي
عن لا يطفح على ملامحي ويفضحني
وكل يوم اگعد أگطعلي وردة
واني اسألها يحبني لو مايحبني
وهجست محبتة من صار يبوگ من الليالي
وكت ويجي يبوس طارف ظفيرتي وحسبالة
نايمة
وبليلة بيها الگمر تارس الحوش
والنجوم تارسة السما
طلعت ادور هاجس باردة
وتگص گص وهو مالفة
طلعت من البيت اتنوع للبعيد ووگعت
عيني على جمرية حدر السدرة على
راگ الشط لفيت لثامي ورحتله راكضة
سمع صوت اجدامي واتلفت
-هااااجس الدنيا بردت دش للبيت
حجرتكم دافية خليتلك بيها
جمرية
باوعلي وهز راسه وگام
اني اتراجف من البرد
وبس ضوه الجمرية والگمر يصد عليه
اول مرة يسويها ويتگربلي هالكثر
-عذبة
-هااااا
ماعت روحي وانا اشوفه يجر طرف
ظفيرتي من حدر الشيلة ويبوسها ويخليها على گلبه
-عذبة تذكرين يوم الچنه صغار ونركض بين
زروع الشيوخ الاعبچ حتى تنسين
شوگج لأهلچ من ذاك الوكت واني گلبي ماهود
ادريچ تحبيني مثل مااحبچ
لأن عينچ ماتغمض الا وانا موجود
ومناطرچ ببباب الحوش وانتِ تنطرين جيتي
يلا تنامين خلاني اعرف ان گلبچ هذا الرهيف
مايعرف ومادگ غير اليه
سحب اللثام وعينه بعيني
-صار واضح مو من اتنطر العيون تنام
وامشي على طروف اصابعي
مثل الحرامي اشم طرف ظفيرتچ
واسمع صوت نفسچ الخايف وادريچ
واعية بس لا تخافين
وياااااي أمني عذبة
انا حبي الچ جبير رغم حفنة سنين عمري الصغيرة
كبرنا يا عذبة وتغيرت ملامحنا
بس الصار زادت محبتچ بگلبي أضعاف
واني اشوفچ واگفة تتنشگين ريحة هدومي
وانت تعزلين حجرتنا عرفتچ هاويتني مثل
ماهاويچ
الدنيااااا سوت السوته واخذت من عدنا
الاخذته حتى روحي تنعجن بروحچ
اسمعيني......
نزلت راسي
رفع راسي وخلى عينه بعيني
-هالطول مايتوسد بس طولي
وهالظفيرة ماتنحل الا على صدر هاجس
ركضت وهو ضحك ولحگني خلاني حدر عباته
الصوف ويحچي بهداي
-ادفيچ وتدفيني
وصلني باب حجرتي ولفني بعباته وراح يدندن
ابوذية شعر ودش حجرته
نمت هالليلة ملفلفة بعباته
لامتني مثل حضن دافي منسيني
تعب سنيني وانا افكر شلون
اخلي يعرف بيه احبه وصار وطلع
شوگة طافح وزايد على شوگي
قوووط
ومن هاليوم عرف عمي الصدگ
وياهو اليتقدم عمي يگول عذبة موگفة لهاجس
صرت كل يوم حدر السدرة
اتنطره يرد عالفرس
تعبان بس بيده رازقية من بيت الشيوخ
يزرعها بظفيرتي
گعداتنا الطويلة وسوالفنا تالي الليل
وهو يتنوع للنجم
-راح ازززرع من نجوم الليل بجتافي
واخليج مرية الضاابط هاجس سالم
-مو بعيدة على الله
التفتتلي وبيده الورقة والقلم وعلى ضوة الفانوس
اشرلي عالحرف
-وهذا شسمه
-هذا ك
-خوووش بالله اطيني كلمة بهالحرف
-أحبك
ضحك وهو يكتبها ويكتب بصفها كلمة
-أحبك هاجس
ضحكت واني اوگف واتقشمر وياه
-صايبك غرور الطاوووس
ياهو الگالك احبك واريدك
وگف وسحبني صرنا وجه بوجه وعيونه
نطت وخزرتني
-چا تحبيمن
اريد اسحب روحي منه ماكو
-هاجس ثوووبي انشگ بيدك شبيييك
هد ثوبي من ايده وجرني جر باس خدي حيل
-لسانچ هذا ثمني چلماته من تحچين
وهالحچاية ماتنگال بس لهااااجس
خووووش
دفعته ودشيت حجرتي
دفع الباب عليه واني اسحب
الغطوة الف روحي خاف مبين مني
شي
-باوعي عذووبة
-اطلع ارد انامن
-مااطلع وجعتچ موووو
-مابية اطلع لااصرخ واحشم عمي
عيونه جدحت شرار وضحك
واجاني بسرعة گبل لااصرخ بصوت
سد حلگي
صرت بحضنه وساندني عالنضد مال
الفراش
-شووو خل احلچ ولا تصرخين
بعده ماعايف وجهي
جر شيلتي وطلع ظفيرتي جرها
جر منها نفس
-يااااابويه حلم العمرررر هاي
تفرغصت من بين ادي حتى
يهدني رد حضني
-حررررام عليك وخررر
-لو دخلتي لجهنم على
هالشوووفة هم راضي
مد ايدي تلمس الجرح حدر شفتي
-يگولون الگمر بي ثلمة ومعيوب
شو گمريتي الثلمة الحدر شفتها
راح تدخلني النار رااااضي ووووقانع
گالها وباس الجرح حدر شفتي
وبسرعة الذيب من يخطف غزال
وخر عني وانا أنتفض
-اطلع وروح اهلك واهلي يااااهاجس
لساني مايطگ لسااانك دووووم
طلع يضحك وصوته يطرب آذاني
ثاني يوم گعدته لمدرسته ومنها يرد
للشغل يم الشيوخ
بدون لااصبح علي ماقبل يتريگ
ودفع عليه استكان الچاي لأن كل يوم نتريگ سوه
عمي نايم وانا مثل عادتي طلعت ورا
ارش الماي حتى يرد سالم
التفتت
-دشي جووووة ماعايز رشة الماي بمنية
دشيت وانا أفور من القهر وگلبي نار
فوگ ماغلط وياي هو الزعلان
صارت صبحية واندگت باب الحوش
فتحتها وصوت أختي نعمة فتحتة وياهة
بتها الچبيرة سهامة وعلاوي
وبتها الصغيرة وچانت حبلة
-صباح العافية عذووووبة
-بعد روووحي جيبيهم بااااردة
خليهم بحجرتي
-فدوة لوجهچ عذبة راح اخليهم
يمچ
-بعيوووني بس وين رايحة
-للكاظم خايبة نذر حبالتي
بالبت الصغيرة بعدني لهسه ماموفيته
وراح اجيب ادور يضربني ابو الجوادين بشارتة
-تباتون
-اي مانلحگ نرد
باستني وراحت طببتهم لحجرتي
رديت نومتهم وگمت كفيت شغلي
وريگت عمي وگعدت أسوي بالغدة
عندي دجاجة صغيرة مشيت بيها
أذبحها يم بيت خالتي
بعد سلام وكلام ذبحوها وجبتها
هلستها وطبختها
گعدو الجهال سهامة وعلاوي
يلعبون بس البنية الصغيرة ماسكتت
على فرد بجية وكلتها لبستها
حچيت وياها طلعتها لرازقياتي
ماسكتت وية الغروب علاوي يفتهم وسبع
عمرة ٦ سنين گتله روح صيح
خالتك سنية خل تشوف البت
شبيها ركض مطفح ردلي راكض
#يتبع_تكملة_البارت
-خالتي سنية مو بالحوش
وبس عمي حسن موجود
صحته
لطمت خدي
-ولك شسوي بعمك حسسسن
دهر صابك
بعدني أحجي واندفع الباب
وصوت حسن يصيح
رديت ليوره رفعت لثامي
وطلعت
-هلا خويه
صفن عليه ورد
-ها مطرشتلي صاير شي
-لا لا
البنية سمعت صوته وطلعت تركض
لحضنه
-هاااااا عمي شبيچ
-تريد امها وأبوووها
-تعاي تعاي بعد عمچ
راحتلة اخذها وطلع للباب ركضت
ورا مسرعة بخطواتي
-حسسن لا تاخذها امها امنتها يمي
هسه تسكت
باوع لحسن وخزره
الولد تتلوه وحار شيگول
مدله هاجس ايده
-شني بعد أخوووك البيت ماله حرمة
-لا شسالفة هاجس من الباب
اخذت البت
-والبت هاياها ماماتت تبجي اييييي بس مو ميتة
حچاها وعاينلي خزرني خزرة ركضت من وراها
ركاض للبيت
دش لحجرتي وره شويه سهامة خافت
والبت الصغيرة بيده وساكتة
وعلاوي خايف وگعد بالفراش
الفرشته الهم
-هااااااچ لزمي
-خاااايبة خاااالة لا تفاولين على امچ
وأبوچ بالونين
اببببد چنها ماتسمع جرتها جر حتى
وهي تتعشى تبچي ماملت
ساعة وطبلنه هاجس للحجرة
صاح
-المايسكت اذبه للغريرة
لو السعالوووووو اخليها تاكل مخه
اششششششششش
الولد غط راسه بالفراش ونام
والبت حطت راسها على صدري تناشغ
طلع من الحجرة والبت ردت تبچي
رد دخل وصاح بيه
-فررررشيلي هنا ارد أشوف يااااهو اليعوي
ويبچي بعد
باوعتله ماراضية خزرني
-أنا شگلت
فرشتله بصف الولد وأنا والبنات على صفحة
نصيت الفانوس وتمددت وهي
على صدري ساعتين زمان يلا نامت
غمضت عيوني من أمنت عليها
وذبيت شيلتي من أمنت هاجس نام
بعدها عيوني تغرغر بالنوم
وانجرت ظفيرتي وصوته الرايح
من النعاس يحاجيني
-زعلااااانة
فزيت دفعت ايده
عت ظفيرتي عت وغوربت عيووونه صارت
تخووووف
-مااگوم وكافي روح لحجرتك لا اگعد عمي
والله
سد حلگي بيده وجرني من الفراش
-راااااسج اليابس هذا كسرته على ايدي
شالني شيل وطلع من الحجرة
گوه جريت روحي منه
-ميييل غااااد انا أمشييييي
گوه يجر النفس وروحه طالعة
دفعني ببطن السگيفة مال الساجية
مسويتلي بيها طينية مثل الكرويته
گعدت عليها والدنيا ظلام وبس الگمر ضاوي
والبرد يذبح اتراجف نازعة چاكيتي
وبطرگ الثوب يفتر يباوعلي ظفيرتي على
متني وگذلتي نازلة على عيوني
-ايييييييي بالله عذوبة
شووو حسن تركضين ورا تحجين
وهاجس كش وبرررة مالچ خلگ
حتى تگاسمينه الريوگ
1 تع
-هااااجس الزم حدك
افتر عليه وعت ظفيرتي لفها على
اييييده
-شوووو اريد انعل أبو حدي وماااااالزمة
صار وراي وحضني وهو واگف
-وخرررر هااااجس ابعد غااااااد
تسودنت
-انچبي وفسريلي طلعتچ وررررة حسيون
-ماطلعت ورا طلعت أجيب بت اختي الأمنتها
عندي
-أنعل أبو بت أختتتتتچ
هالچلب ابن الچلب مو مرة ودة اخو
يرررريد يخطبچ لو لا
-حچاااية عاااااابرة
نفسة العالي ولشته الترجف من الأعصاب
وظفيرتي البين ايدي كلهن هفتن مثل جمرية
مشتعلة طاح عليها چف ماي وطفاهة گتله
-وأذا وده اخووو أنا عندي گمرررر شسوي
بالنجوم
طاحت ظفيرتي على متني من هدها
وحطني حدر جنحة
هدة صوته ويحجي بهداي
-هيچ هاويتني ولچ
جريت روحي جر من بين ادي
ووگفت
-وأكثر بعد بقوووط مو قاط واحد
عدلت گذلتي واجاني
-حسيون مو بعينج
-ولا عشرة منة ولا مية
-وبعد
-انت ساكن ضلوعي من جنه نتراكض بگيعان
السلف ونسابق الگمر
-وهسه
-هسه صرت هاجس ليلي
المايمرني النوم اذا ماغط وطلعلي بحلمي
-شسوي بحلمچ
ضحكت ومشيت
-ماتسوي شي بس ملاحگني
مثل الجاثوووم
-افاااااااا هاجس صار جاثوم
-لا حلم سوا ربي صدگ وجبر گلبي
ذابت عيونه الكحيلة واشرلي
على فتحة باب السگيفة مال الرازقي
-اطلعي عذبة لا اعرررس هالليلة
ركضت وانا اسمع ضحكته
ودخلت الحجرة
وسمعت باب حجرته هو وعمي انطبگ
نمت مأمنة روحي وگلبي وكلي
بين ادين الزلمة الوحيد الخش عقلي
وگعدت على دگة الباب الصبح
لنها اختي نعمة اخذت جهالها وراحت لبيتها
جايبتلي وياها صوغة
كحل حجر بمكحلة صفر
وريحة
گعدت عالبيت وطلعت عمي للزرع يم زلام
القرية وديته بيد الاولاد الصغار
ولميت الحجرة مالتهم شلت هدومه مال
البارحة حتى أغسلهن وطاحت منهن قوطية
صغيرة مربعة مقدفة بأحمر
باوعتلها ردت أفتحها بعدين رديت
روحي وگلت عيب هاي أمانة
كملت وطرشت الغدة لعمي بيد الاولاد
وطلعت للساجية
مالتي گعدت اعدل بالمكان اشيل هاي واحط
ذيچ
لحد مالاولاد ردو عمي للبيت شربله استكانة
چاي ونام
بهاليوم رد هاجس وويا كتب اكثر من العنده
ويادوب خلة اللگمة بحلگه
طلع بالسگيفة مال الرازقي
وجمريته واجه والچاي على حافتها
لتالي الليل كل ساعة اشوفه خاف يريد
شي
-هاجس
-روحة البين اجنابه
-ليش ماترتاحلك ساعة
-أمتحانات ماالحگ
-اعاونك
التفتلي وضحك
-صدگ
-والله شبيك اني اقرة كلش زين صرت
انت احچي وانا اعاين اذا حچيك صح
-تعاي
-بااااردة هنا دش للحجرة يم عمي
-لا بحجرتچ السالفة مطولة ماانام
اليوم الا اطلع للامتحان يلا
حطيت الجمرية بالطاسة
وهو شالها
شلت قوري الچاي ورديت على كتبه والفانوس
وگعدنا بحجرتي يدليني اليريد يقرا
وانا أعاينله يحجي واشوفه صح
لو غلط
كل ساعة وصبيتله أستكان چاي
اباوع لچفوفه ترجف
-هاجس
-بعد روحي
-ماماكل شي مو
-ماالحگ
-چفوفك تتراجف لا تطيح
شوف عندي چبدة مال دجاج اشويها الك هسه
عالجمرية واملحها شويه
-لا تتعبين روحچ
-لا انا هم جوعانة شگلت
رحت جبتها مغطيتها بمنخل عن لا يلوحها
تراب ووصخ بالمطبخ
ملحتها ووياهه راس بصل
شويتها وخليتها گدامه
-يلا سمي
مد ايده ياكل مايكدر يلزم اللگمة
مديت چفي سند چف ايده
-شوووف تموت روحك بدون اكل
ليش ماتاخذ زادك منا لشغلك
-ماالحگ بين خيل الشيوخ
والمدرسة والحلال ماالحگ أگعد
-اروحلك فدوة چا خلافك انا وعمي
ياهو النه خليني كل يوم
اخليلك شي تاكله تسند گلبك
-أنا مايسند گلبي
غير هالوجه وغير هالبدن من يتمدد على صدرررري
سااااعتها گولي أرتاح هاجس
غطيت بعرگ المستحة وگتلة
-اكل لايبرد الزاد
كمل أكل وظليت ويا ويا نقره
لحد ماصبحت الدنيا اخذ هدوم المدرسة
مصفطتهن اله حدر الفرش بالنضد عن لا يتكرمشن
وخليتله بيضات سلگتهن وخبزة وملح
-لو متعذر للشيخ اليوم
-لا اسرح بحلاله ساعة زمان اشبعهن
واسلمهن للراعي العنده
البس هدومي ويه جعفر ونطلع للمدرسة
-صدگ جعفر يسوق
-ايييي ابو جابله سيارة
-اتمنى أشوفك بهدوم المدرسة
-لااااا اريد اشوفج روووحي بهدوم العسكرية
طلعت وراه للباب بيدي طاسة الماي
رشيتها ورديت للبيت
نمتلي ساعة بين ماگعد عمي
وهيج جرت أيام الأمتحان سهر
للصبح لحد مايروح
ويردلي ويه الغروب تعب ووجهه
ذبل لحد ماخلص آخر أمتحان رد
للبيت الظهر بدون مايحچي عرفته
تعبان وخلصانة روحة
فورت الماي واخذت الطشت والسلبچة
كاسرتله بيها الماي ورحتله للحجرة
متمدد حتى حيل مابي
جريت ادي غسلتهن
وهو ساكت غسلت رجلي مارضى
سكتة وغسلتهن صرخ عبالي من التعب
نشفتهن
-تاكلك لگمة
هزلي راسه لا بس اشرلي
دنجت علي اسمعه شيريد
على كيف جر ايدي وباسها ونام
خليتة نايم وطلعت بره جريتلي دجاجة
من دجاجاتي ورحت لبيت خالتي
ذبحوها الي رديت هلستها ونظفتها
وسلگتها حطيتها على صفحة
نظفت الحجرة وطلعت عمي يم ربعة
ياخذله ساعة
وگعدت عندي هدوم اغسلها
غسلتها وشريتها للمغرب وجيت الجمرية
وخليت سيباية وشويت الدجاجة
وتمن وماش وروبة وگعدته
-هااااجس
-هاااا
-اگعد اكلك لگمة يلا
-مااگدر
-لخاطري شويتلك دجاجة من العزيزات
ضحك وگعد
-ياهيه منهن
-رازقيييية
-ههههههههههههه اعوضج بدالها
بالتردي
-اررريد رازقية بس مو دجاجة
-بعد ورد رازقي اترسلج الساجية
-اييييييي
-من عيوني
وگف مابي حييييل سند چفه بچفي
اباوعله يعرج
-شبييييك يمه ليش تعرج
-سكتي لا تحچين گدام ابوي
الفرس جمحت بيه من البارحة وطحت
وهسه بين عليه
-من هاي صرخت من غسلتها الك
-ايييييي
-وتالي
-مابيه سهلة سهلة
-هااااجس
-هااااااا ولج شو عله صوتچ
-رجلك زرگة
-باجر جعفر ياخذني للمستشفى للولاية
مشيته غسل ورد للحجرة
وديت واحد من الاولاد يجيب عمي
تعشو ويسولفون اخذله عمي ساعتين ثلاثة نام
وهو ظل گاعد
وجهة تغير لونه وراسه يبش عرگ
-هااااجس
-بعد روحي
-توجعك
هز راسه ماگدر يحجي
-اسندك تنام بفراشك
-لا طلعي الجمرية لحجرتج
ورديلي
طلعت الجمرية ورديتله بيده
الفانوس
مايگدر حتى يحچي
جبتلي ملح وشويه دهن حر
دفيت ايدي عالجمر وفركتها اله
مايحجي بس روحه رايحة
سند راسه على ركبة وسكت
ربع ساعة ورفع راسه
-شديهة الي
جبتلي وصلة نظيفة شديتها اله
مابي حيل وجهه صوفر من الالم
على گعدتي حط راسه بحضني
فزيت وجمدت بمچاني
-مرغيلي راسي راح أموت
مديت ايدي لگصته مشتعل نار
مصخن
مرغت راسه شويه وهدا صوته ورد
غفى ظليت اتنوع لعيونه
ولحيته الخشنة مثل عمي
مد چفة اخذ چفي خلا بين چفوفه
نام وغفى وعله صوته
ماكو ساعتين وظل يهذي من الصخونة
ماعولت يطر الفجر گعدت عمي
نشوفله چارة
-عمييييي
-ها عميييي
-عمي هاجس ماله خلگ مانام
ليلة يمكن رجله انكسرت
-أنا أبوووووووج وينه
-نايم وواج ناااااار انا لبست
البس انت ونروح لبيت الشيخ جعفر
گايلة أنا اخذك للطبيب
لبس عمي چاكيته وعباته
وطلعنا بسرعة
لگاع الشيوخ وصلنا وجعفر راكب سيارته
بس شاف عمي نزل
-اخيك ماگام مصخن
باوعلي وصد عينه
-أنا گتله اخذك بساعة الطاح مارضى
وهسه جايكم عود
اصعد عمي اصعدووو
صعد عمي ويا وانا وره
والگاع تشيلنه وتحطنا
حجار ووتراب
وصلنا نزلت انا گبلهم
-هاااااجس فدوة اروحلك أگعد
گووووة فتح عيونه
-اجاك شيخ جعفر تروووح
مدلي ايدة گومته لشته ترجف من الصخونة
لبستة چاكيته ولفلفته وبعباته لف الغترة
ومشيت بي بس وصلنا الباب
اجانة صوت جعفر يعاتب عمي
اصابعه هدت أصابعي صدلي وهو ملثم
باوعلي مخنزر واشرلي
-روووووووحي
دفع ايدي ومشى وغابو ووياهم عمي
لنص النهار أنا مناطرة يم الساجية
فاتحتلي فتحة صغيرة بسياج الگصب أتاني
ويه العصر طبو ووگفت السيارة
تانيت لمن حرك جعفر طلعت
ركضتله عمي يسنده ويمشون
سوة وصلته وأشرلي لا تجين
مشيت وراهم نزل بفراشه ورجله
مصبوبة وملفوفة
-هاجس
مارد عليه
عمي رد
-ها بويه
دفيت الغرفة وگعدت سويت شوربة
ماش للعشة گعدته خزرني
وحجة بصوت ماينسمع
-ابوي ينام وحسابج يمممممي
عرفته مايفوتها الي وطلعتي الصبح
راح يغسل شراعي علمووودها غسل
نام عمي وانا انهزمت گبلها للحجرة
شوية اندگ الباب
-فتحي لا اطيح حظج خوووش
استخطيته باردة علي
فتحت الباب وسند روحه ودخل الحجرة
-تعااااااي لا تلبدين وره والفرااااش
-خل اسولفلك
-شتسولفين تعاااااي أنا ياخذني جعفر
على صفحة ويگلي البت الأجت ويه أبوك رايدها
لطمت على خدي
-ششااااااف مني والله ملثمة
-بت الچلااااااااب شاف عيونج
عيونه تجدح واعصابة نار
-هاجس شبيك گول ياالله
-الف من ذكرررررره تعااااااي جاااااي
-بروح عمتي لا تجر ظفيرتي
برد وباوعلي
-تعاااي مااسويلج شي
-احلف
-وعيوووونج يابت الچلب
-لا تسب ابووووي
-نگطع مهر جذبت وگلت لجعفر هاي مرتي
وفوگ هاي ابوي ماراضي يگول الناس اكلت
وجهي شلون بنية حدثة ببيت واحد ويه زلمة
-وشگتله
-نگطع مهررر ونعرس من اتخرررج
ضحكت وهو لزم وجهي
-فرحتي
-شلون ماافرح وزلمتي هاجس
-اااااااخ ياااابه لو ما العااازة والماكو
جاااان هسه عررررست
بعدت عنه فتح عباته ومد ايده لجيبه
طلع القوطية المربعة المقدفة
-تعااااي هناااااا
فتحها ورحتله وطلع گلادة ذهب
زنجيلها طويل وبيها مدالية
مربعة بنجمة
-هاي من روضت خيول الشيخ اطاني
فلوس وردت اشتريلج شي
اجاهم تاجر الذهب لبيت الشيخ
واخذت فليساتي جبتلچ هاي
عود ردت اطيچياها من انجح
بس هسه اجه وكتها
فرني وعلگها برگبتي
-هاي وعدي الج
-كافيني گلبك
-هاي نجمة وبعد وحدة غيرها بس
اتخرج يتعلگن ووووياها
گعد يمي وتسامرنا بليلتها للصبح
گظه هاجس عطلتة ١٥ يوم يمي
بالليل نگظي ساعاتنا سوالف
ونحسب الايام حتى يتخرج ونعرس
وكملت العطلة بساع وفتح هاجس رجله
وصرت كل ليلة من طب الصيف
اتنطره حدر السدرة على راگ الشط
يواعدني بنجم
ويرسملي الدنيا بورد رازقي
ومايهناله نوم لو ماباس طرف ظفيرتي
وخلصت السنة بنجاحه
وماضلة غير سنة تبعده عن حلمه
وردت أيام المدرسة وسهر الساعات
وياه
وهو ذاب روحة بالشغل
بس أنا ماخليته گوه
قنعته اطلع بالحصاد بس علمود
چم فلس نلمهن البيت طايح نصه وگوه
شايل روحه
قبل بس على عمى عيوونه
موسم الحصاد لمينه رواحنا
گال البيت جبير ليش مانهد الحجر
ونسوي بس ثلاثة
ومطبخ وحجر اهلج نخليها گاع
بچيت بليلتها ضاع أثر أهلي
بس لعيونه رضيت عاد گام
و عدل حجر البيت
كلهن وفرش الحوش رمل
وكلما يصحله فرصة يعدل حاجة
وحتى سياج البيت بنا طابوگ
لان چان ناصي وعندي ذهبات ناعمات
من ريحة امي چم چلاب
وتراچي وخزامة صخيت بنصهن
حتى يجيبلي خروف ونعجات يفيدنه
للخضاض وكثرلي الدجاجات وزرعلي
حافة الشط جت للحلال وهيچ
رتب كل حوايجنا گبل لا يكمل هالسنة
وامتحن نص سنة وعدت برمشة
عين وصارت الامتحانات الاخيرة
ماگعد يمي يقره گام يبات ليلة ويه
جعفر وجماعته بديوان الشيخ
يقرون لحد ماخلصو وأرتاااااح
بالبيت اسبوع ماطالع گاضيها نوم
وباله يقره ويكتب وليل نهار تفكيره
بالنتيجة
لحد مارد لشغله بهاليوم غاب
ومارد عدى النهار والعصر والمغرب
والليل وگلبي اشتعل نار گعدت
بسگيفتي اگطع بالرازقي وهناك
وسمعت صوت جدامه بالباب
صحتلة
-بعد رووووحه بعدج مناطرة عبالي نمتي
-بطيت گلت نسى الوعد لو غواه شغل الشيوخ ونساني مو واعدتني ترد من وكت اليوم
- شلون أنسى وعندي بشفايفج ذمة
نزلت راسي واحس حتى جدامي
ترجف من چلماته
-الشيوخ هدوا حيلي گضيت نهاري أركض وره
خيلهم وأروض بمهرة الشيخ ورحت للمدرسة
ورديت راكضلج بالخبر
-فررررحني بروح امك
-نااااااجح ماظل شي يابعد الراح
والأجه وهالچتاف تتزين بنجمات
-خاف تروح وتنساني وتلگة شيخية لگلبك غييييري
-أنا خيالج وبس
يجي يوم وأبنيلج بيت حدر السدرة
وأخليج شيخة كل البنات
هـالصدر الشال ضيم الشغل والتعب
ما يهدة إلا إذا حس بنفسج جريب
شلون انساچ
وانتِ البياض الوحيد بليالي السووود......
