رواية دموع لا تجف ( كامله جميع الفصول) بقلم جيجي

 رواية دموع لا تجف الفصل الاول بقلم جيجي 

الأم بتخبز العيش والطفلة بتلعب قدام أبوها وفي لحظة غفلة القدر كان أسرع ولقوها في الترعة بعد ٤ أيام قهر

نبيله... يعنى هتكون راحت فين يا موسى هى مش كانت معاك دلوقتي 

نبيله ست فى التلاتين من القاهره.. قالت كلامها لشاب فى الاربعين ده موسى جوزها من الصعيد وقال بتوتر...

ايوه ايوه كانت معايا وانا دخلت الحمام وجيت ما لقيتهاش... 

نبيله.. روحت الحمام وسبت البنت فين وازاى مش لاقيها 

بخيته ام موسى قالت بغضب... ما تهدي يا بت هو ايه اللي راحت فين راحت فين ما هتتلقى... بعدين ما احنا طول عمرنا بنشيل العيال وبنخبز بيها عادى.. ما بنشيلهاش للرجاله.. انتى اللي سايباها لابوها. وبعدين ايه الهيصه دي كلها ما تتهدي دلوك تاجى هتكون هنه ولا هنه.. يعني هتغور فين الوحش لا بيموت ولا بتحصله حاجه.. دى قرش برانى يرموه يرجع تانى...

نبيله... دى مش عفشه يا حماتي دي بنتي والبنت صغيره ما تعرفش حاجه لسه.. 

موسى... اهدي اهدي انا هروح ادور عليها تانى وباذن الله هلقاها.. 

واخد بعضو ومشى بسرعه من البيت

نبيله قالت بخوف.. هتولى عبايتى انا هطلع ادور عليها بره انا كمان 

بس بخيته وقفت قدامها وقالت.. تطلعي تروحي فين... تطلع روحك من جتتك يا بعيده.. انتى لساكى قاعده على عوايد ناس البندر اياك.... البت تلبس البنطلون الضيق والبلوزه بتاعتها مش مغطيه وسطها وتنزل ترمح في الشارع.. حدانا المره ما تطلعش الا لو رايحه للحكيمه.. وينزل معاها راجلها كمان... 

نبيله.... وبعدين معاكة يا حماتي مش وقتو دلوقت اتخانق معاكي بعدى كدا

بخيته... لاه اتشاكلى وياى اقولك اضربينى ما هو مين هيربيكي يمكن ناس البندر... 

 نبيله...لا ناس البندر ما ربوش وابعدى عشان ما تشوفيش قلة الربايه اللى بتقولى عنها... بعدى من خلقتي يا حماتي 

بخيته... يمكن هتضربينى... طب قسما بالله العظيم لو عتبتى عتبت الباب تدوري على البت ما انتى داخله تاني 

نزلت بنت فى التلاتين من فوق تجرى دى صفيه بنت عم موسى.. وبنت اخت بخيته وقاعده عايشه معاهم فى بيت العيله بعد ما اهلها اتوفو وقالت بسرعه...

 خلاص خلاص يا نبيله اقعدى شويه فى اى انا كنت بتسبح مالك بتبكى ليه

نبيله بدموع.... البنت يا صفيه طلعت بره لما كنت بخبز ومارجعتش وهى مش مخليانى اروح ادور عليها 

صفيه... طب يا خيتي اقعد شويه وهى هترجع... وانتى. يا خالتى خلاص هى قعدت اهى 

بخيته... بقولك ايه يا صفيه همليها انا عايزه اشوفها وهي طالعه... 

نبيله... سامعه خالتك يا صفيه 

صفيه.... حقك عليا بعدين ما هو موسي طلع هيجيبها ما تقلقليش 

نبيله... البت صغيره قوي يا صفيه 

صفيه... معلش شويه كده لو ما رجعتش هنلبس انا وانتى وننزلوا سوا ندورو عليها 

بخيته... جبت الاقرع يونسنى شال الطاقيه وخوفني 

يلا يا اختى انتى وهى حد يجي يشوف العيش العيش خمر وهيقع من على دواره انتم قاعدين تتودوا 

نبيله ضربت اديها فى بعض وقالت بغضب... يا وليه بت ولدك ضايعه وانتى فى العيش اللى على دواره....

بخيته.. وايه يعنى دى بت امال لوكنتى مخلفه ولد وضاع كنتى عملتى ايه 

نبيله بغضب... حتى دى فيها بنت وولد يا حماتي حتى دي

صفيه... خلاص عشان خاطري انا خلاص اهدي دلوك ترجع يا نبيله

وعدا وقت وموسى ما رجعش ولا البنت رجعت نبيله وصفيه طلعو من البيت وبقم يدورو عليها فى كل مكان نبيله مشيت من طريق وصفيه من طريق بس كان من غير اى فايده واليل جيه وعتمتو ملت المكان.. 

موسى... خلاص روحو انتو لحد الصبح وتعالو ندور تاني بكره الصبح ان شاء الله 

نبيله.... انت عايزنى ارجع البيت والبت بره 

موسى... هلاقيها والله العظيم هلاقيها ان شاء الله 

نبيله... انا مش هرتاح الا لما الاقى بنتى  

موسى.. طب بصي روحي انتى وانا هقعد ادور

نبيله ببكى... اروح ازاى وانا ما اعرفش هي فين هروح ليه اصلا ولا لمين واعمل ايه فى البيت وهى بره ف البرد ده

موسى.. الدنيا ضلمه وما فيش حتى حد تسالوه في الشارع.. 

جات صفيه وقالت.. انا سالت كل الحته القبليه قالوا ان البت ما جتش ولا شافوها

نبيله... وانا سالت الناحيه دي يا صفيه ما فيش فايده البنت اصلا مش ظاهره 

وعدت عليهم اربع ايام بلياليهم وهم كل يوم يدورو من الفجر لاخر الليل لحد ما هلكو كانو اصعب اربع ايام فى حياتهم قهر ووجع وحزن وخوف لحد ما لقوها غرقانه فى الترعه والرجاله طلعوها... نبيله جريت عليها وكانت بنت ٤ سنين حضنتها وبقيت تبكي وتصرخ وتقول....

 قومي يا بنتي قومى يا سمرا ما تحرقيش قلب امك عليكى... 

الناس كانو عايزين ياخدوها بس نبيله مش قابله تسيبها صفيه قعدت جمبها ببكى وحضنتها وشدت البنت بعدتها منها واخدوها الرجاله ونبيله لسه هتقوم وراها بس صفيه حضنتها وقالت... 

بس يا خيتى بس يا حبيبتى اهدي اهدي تشفع لك عند ربك.. الله جاب الله اخد الله عليه العوض يا حبيبتي ما تغلاش على اللي خلقها الحقى الحمد يا حبيبتي 

نبيله حضنتها وبقت تبكى بقهر.... وبعد فتره عدت عليهم من موت البنت كانو كلهم قاعدين في البيت... وبخيته قالت... 

وبعد هالك يا ولدي هتفضل قاعد كده قعده الحزينه دى ما خلاص عاد... 

موسى بحزن.. كانت في يدى يا اما كانت بتلعب قدامى اللى قاهرنى انها راحت بسبب اهمالى.. 

بخيته... اهمال ايه يا اهبل انت هتعمل ايه يعني واصلا الغلط مش عليك.... الرجاله ما بتحرسش العيال يا اما بتتحدت في المحمول او فى الحمام او بتطلع مع اصحابها بتروح يمين بتطلع شمال... المفروض امها اللي تحرسها بس هنقول ايه انت اللى اخترتها... وانا قولتلك بت البندر ما تقدرش تربى ما سمعتش كلامى اهى حتت بت واحده جبتها بعد اربع سنين ويا ريتها خلت بالها عيلها... خبر ايه بتعجن 

نبيله بقت تعيط جامد 

وموسى اتنهد بضيق وقال... ما خلاص عاد يا ماما ملهوش لزمه الحديت ده دلوك

بخيته بخبث.. طيب اصلا تتعوض انت بكره ان شاء الله تجيب غيرها.. اخ بس هتجيبو ازاي ومرتك ليها سنين ما بتخلفش خدت ٤ سنين قبل البت و٤ سنين بعدها وما عرفتش تجيب عيل تانى كدا هتقعد على كدا طول عمرك تفضل تتلفت فى عيال الناس.. 

نبيله بقت تبكي تاني بحرقه.. وموسى خبط اديه على بعضها... وصفيه طبطبت علي نبيله وبصت لبخيته بغيظ وقالت.. 

ما خلاص عاد يا خالتي انتى بتهديهم ولا بتعصبيهم.. انتى لو بتحطي بنزين على النار ما هتعمليش كده 

بخيته... انا بقول اللى حاصل دى ما عرفتش تجيب غيرها حتة البت.. لو كان متجوز واحده تانيه كان زمانو جايب عيلين تلاته يلهوهم دلوك ويتنططوا حواليهم.. لكن دي ليها بعد اربع سنين جابتها حته بنت وقعدت عليها 

وقفت نبيله بغضب وتقدمت عليها وقالت بعصبيه...

 انتى عايزه ايه ها عايزه ايه مني بلاش انا عايزه ايه منها ما هي سابتهالك وراحت.. راحت وريحتك... من ساعت ما جبتها وانتى اللى عليكى بنت بنت ليها اربع سنين ما شافتكش فى يوم داخله عليها ببسكوته حتى.. ودلوقت عماله تقهرى فينا بالكلام كان احنا روحنا خنقناها بيدنا... لا ومش عوزاه يزعل عليها ليه ... ايه هى عشان بنت ما يزعلوش عليها... ولا انا لو كان معايا غيرها 10 ما كنتش هتوجع عليها ربنا يقهرك يا شيخه قد ما قهراني ويحرق قلبك كيف ما حرقتى قلبي بكلامك 

موسى... بس خلاص عاد مش وقتو دلوك 

بخيته.... هى دى اللى حرقتك انها مش وقته انت ما شايفش مرتك بتتحدت وياى كيف ما شايفهاش عماله تزعق فيا كيف وانت تقولها خلاص.. دى اللى ربنا قدرك عليها مش وقتو 

صفيه... ما هو صوح برضك يا خالتى ده مش وقت تتكلمي فيه مش شايفه حاله الناس ما بقالهمش اسبوعين دافنين البنت وانتى عماله تنبطى فيهم الله يرضى عليكى خلاص.. وانت يا موسى ما هتنفعش قعدتك فى البيت كده كتير روح شغلك من بكره ان شاء الله وان شاء الله باذن الله ربنا يحسبها لكم شافه يوم القيامه ويعوضكم بغيرها 

نبيله.. انا ما عاوزاش غيرها انا كنت عايزه بنتي 

صفيه... وحدى.. انتى هتعترضى على حكم ربنا ولا ايه

نبيله... لا طبعا استغفر الله العظيم الحمد لله.. 

صفيه.. تعالى ارتاحى ساعه فوق تعالى معايا اوضتى هنومك جارى النهارده 

واخدتها وطلعت معاها الاوضه وحضنتها وبقت تطبطب عليها لحد ما نامت  

عند بخيته قالت.. بص يا موسى انا عايزاك في موضوع 

موسى.... خير ياما 

بخيته... شوف يا ولدي انت عديت الاربعين والبت مرتك دي كاسره ال 30 من بدري... وانت قعدت متجوزها ياما ما جابتش غيرها حته بت واحده واهي راحه... انت لازما تتجوز يا ولدي اتجوز واحده والحق نفسك قبل ما تعجز 

موسى.... ايه اللي انت بتقوليه ده ياما طب ليه اتجوز عليها هي ذنبها ايه في اللي حصل

بخيته... انا ما بقولش انه ذمبها ولا بقول ان البنت ماتت بسببها ولا بقول ان انت هتتجوز عشان البنت ماتت... اني اصلا كنت هكلمك فى الموضوع حتى لو بتك قاعده... انت ما ينفعش تقعد مقطوع كده من غير خلفه ولا حاجه يمكن لما تتجوز ربنا يرزقك بعيل ولا تنين يشيلوا اسمك عارف انت لو هى اللى ما كنتش بتخلف كانت هي سكتت عليك والله العظيم لاه... وكان اتطلقت واتجوزت وقالتلك انا عايزه عيال

موسى... فى تبنى دلوك يا اما ايه رئيك لو 

بس بخيته قالت بمقاطعه... ايه العبط ده وليه.. انت بتقول ايه اصلا كيف تجيب واحد ولد حرام تربيه ماعك ولو ما كانش ولد حرام.. الولد ده لما يكبر تقعدو مع مرتك كيف وتمشى 

موسى... يا اما مرتي هتكون كبرت على بال ما هو كبر 

بخيته... لاه برضك ما ينفعش لازمن عيل من صلبك يشيل اسمك ويورث كل الفلوس دي والاراضى.. مش ابوك ساب لك انت الفلوس دي كلها لما مات... انت بقى هتسيبها لمين لازما تركز كده يا ولدي وتشوف نفسك هتعمل ايه امال انت عمال تجري من هنا لهنا في الشغل وفي الاخر ياخدوها اعمامك وخوالك وتتوزع على كل واحد من الناس اللي مبياجوش يقولوا لنا صباح الخير حتى.. فكر فيها يا ولدى بالعقل... ونبيله ما تطلقهاش اتجوز عليها عادى وخليها وياك.. انا كمان عندي ليك عروسه كده كده في البيت صفيه ايه رايك.. وهى ومرتك اصحاب قوى..

موسى بدهشه... صفيه يا اما دى كيف خيتى عمرى ما فكرت فيها كده 

بخيته.. صفيه بنت عمك وعمر بت العم ما تكون اخت.. صفيه يتيمه وغلبانه وبت اختى يعنى اللى هنقولها عليه هتعملو اتجوزها وهي قاعده في البيت ويانا كده كده.. وتجيبلك العيال اللى محروم منها.. انت بس احسبها وفكر فيها

الفصل الثاني من هنا