رواية هو لا يشبههم ( كاملة جميع الفصول) بقلم تبارك الوائلي

كلها تصيحلي اوكف لاتفوت شلون

درب كله كزاز وطفل متحفي

وفتت بي متاهة ومن كضت رديت

والدرب ما حافضه وامشي اعله اثر نزفي

᯽⊱┈──╌❊╌──┈⊰᯽

جُمانه: گاعدين اني واهلي نشرب چاي.. وكل عادة ومثل أي بيت عراقي ما يخله من أب يحب يجمع اولادة ويسولفلهم عن الماضي وعن احداث. محد يعرف بيها من حزن ومن أحداث وقصص لأشخاص ماتو وخلو اشياء هواي وراهم.. فقط الجان حاظر بهذيج الفترة يكدر يسترجع بالذكريات ويذكر السالفة بكل تفاصيلها بحزنها بواقعها المر.. التمينا كل احنه واجت امي جايبه الجاي لان اذا مو من أيد امي مانحس الكعدة لو السوالف بيها طعم.. وطبعاً امي ماتحس يومها كامل اذا مو سوالف ابوي الحلوة والي تحسسها بقيمتها ومعزتها.. 

ابو صالح: هلا بشچايت همي.. هلا بالعزيزة. 

ام صالح: يبعد روحي أنتَ.. 

جُمانه: صدك بابا ليش ماتسولفلنه شلون مات عمي وشلون ماتو البقية دائماً تذكر احداث الهم بس ماتكمل السالفة.. 

ابو صالح: لعد تعالوا خلي اسولف الكم.

جُمانه: سولف النه الصار وگال..... 

جُمانه:

١٥ كانون الثاني ١٩٨٨ 

"الساعة ١١:٥٩ ظهرًا... وكلشي بعدها راح يتغير."

في إحدى مناطق بغداد السكنية.. 

_هنا تبدي احداث قصتنه بسنه 1988بغداد شهر الواحد جان نهار شتاء والجو بارد وعالكين الصوبه والكل منجمع على الغده لان.. جان ثواب جدي الله يرحمه وكاعده بيبي وعماتي الـ الاربعة وعمامي.. وابويه.. جانوا يتغدون بس جان واحد من عمامي

بالخدمة العسكريه لهناك وجان تندك الباب ويجي صديق عمي ويكول ابنكم اتأسر بـالحرب اخذو اسير وهنا الدنيا انكلبت على حزن وبجي وصياح ومن شافو ملابسه گالت بيبي لا ماكو هيج حجي جذب اكيد ما مات ابني وتخربطت.. ونقلوها للمستشفى وطلعت جلطه عده المسكينه.. وجانت زوجة عمي المفقود كاعده وهم انغمه عليها ومن نقلناها للمستشفى طلعت حامل، خطيه جانت محتاره بين التبجي لو تفرح بحملها.. جانت حامل بطفلها الخامس لان هيه عدها (2بنات و2ولد) وهسه حامل. هنا الحزن خيم علينه كلنه... وبيبي خطيه بقت( 6اشهر) من ورا فقد عمي 

ومن كد البجي اتوفت (الله يرحمه) وسوينالها الفاتحة والناس رايحة وجاية.. احنه جنه بيت بصف بيت عمامي الاثنين بصفنه بس عندي عم واحد بغير منطقه عايش هوه وزوجته واولاده عنده (7ولد و2بنات).. وشبه منعزل منه.. كل وين وين انشوفه منطوي ويا اهله وميحب التواصل بس عمي الأسير بيته بصفنه وعمي الزغير بيته هم بصفنه (وعماتي 3)مزوجات بمناطق متفرقة.. بس عمه وحده بصفنه كاعدة.. وهيَ متزوجه خالي لان خالي وحيد على (2 خوات) بس ومن اتزوجت امي أنتقل بصف بيتنه لان ابويه وامي وابناء خاله.. طبعاً اهل امي من محافظة الانبار وخالي حيل يحب اخواته ومتعلق بيهن خالتي متزوجه وعايشه بـ بغداد.. وامي هم عايشه ببغداد... 

فـ خالي اتزوج عمتي واجه كعد بصف اهلي وصرنه جيران احنه وبيت خالي وعمتي.. يعني بالمختصر ماخذين ومنطين..(ابوي ماخذ امي وخالي ماخذ اخت ابوي عمتي) وايام زمان جانو ينطون مره وياخذون مره.. هنا مرت الايام والاشهر وصار شهر العاشر وجابت زوجة عمي ابنها.. بس صار عدها نزيف ونقلوها الغير مستشفى.. وبقت 3ايام بالمستشفى واتوفت( الله يرحمها) وعافت طفلها الرضيع و4 اطفال وعينها وراهم المسكينة.. هنا الكل داخ بهل طفل المسكين الي فتح عينه يتيم لا اب ولا ام.. فـ قرروا عمامي وعماتي وابويه ينجمعون ويشوفون حل لاطفال عمي المات جان اقتراح عمي الجبير يبقون الاطفال بـ بيتهم وكل اسبوع واحد يجيبلهم مسواك.. بس ابويه العزيز و الحنين كللهم همه محتاجين رعايه اكثر من المسواك اشون انعوف اطفال خمسه وحدهم بلبيت واكبرهم. عمره 15سنه والبنيه عمره 13سنه هذه الطفل منو يربي ويهتم بي خلي نقسمهم كل واحد بينه ياخذ طفل او طفلين يمه هيج احسن؟.. طبعن عماعي الاثنين اعترضوا وماقبلوا وگال احنه منكدر نستقبلهم ببيوتنه وضروفنه تعبانه وهذوله مسؤولية علينه.. واخر شي كلمن راح البيته وعافوا.. ابويه صافن واجتي امي كالتله ليش هيج حاير ومهموم ربك مايكطع بينه عوفهم يمنه واني اربيهم ويا جهالي ناكل سوه ونجوع سوه ولاتشيل هم اني زوجتك وبنت خالتك هذوله لحمنه مانعوفهم بـ شارع ابد.. ابويه صفن ودموعه بعيونه وكللها اصيله أنتِ والله.. بس تكدرين أنتِ؟.. راح يصيرون 9عليج شلون تقومين بيهم وتكدرين الهم ضحكت امي وكالتله اني هم من فتحت عيني يتيمه الاب بس امي وهم حاسه بيهم واني وياهم نعيش ان شاء الله وربك ميعوفنه.. ومن عدها بده مشوار ابويه وامي.. راحوا جابوا ملابسهم وقفلو بيت عمي وجابوهم يمنه هنا اني عمري سنتين واجوي عاشوا يمنه ورا سنين وايام... الفقر والجوع والحصار ابويه

جان شايل همنه اشلون يصرف علينه.. وامي كامت تخبز للجيران علمود تكدر تعين ابويه بالمصرف وفتحت بصطيه بالباب تبيع بيض وحلويات لان العيشه حيل صعبه.. اما عمامي فرحوا من خلصوا من الجهال وعافوهم على ابويه محد بيهم سأل عليهم ولا ساعدو بااي شي لا قطعه ملابس ولا اكل ولا ابد. اي شي ماعرفوهم... كل شي على ابويه ومن يجي العيد جان ابويه وامي يشترون قطعه قطعه النه ويضموهن لحد مايكمل عدد الملابس على كدنه... 

مافد يوم ابويه فرق بينه ابد. ناكل سوه ونشرب سوه ونلبس سوه واحد يحن على الثاني لان هيج تربينه ومره كاعد ابويه يحجي هو وامي وكال الها اريد اشيل بغير منطقه.. واشتري بيت اكبر النه واخذ سياره اشتغل تكسي علمود اكدر اصرف عليكم لان تعبت من الشغل الحر.. يوم بكال ابيع..و يوم ابيع ملابس ويوم ابيع مواد. احسن حل اشتري سياره واشتغل تكسي هنا امي كالتله ومنين تشتري كال راح ابيع بيت اخويه ليش مقفول مامستفادين منه وهوه اكيد مات لو عايش جان رجع واني هم حاير بجهاله واني اصرف عليهم كالتله بكيفك... بس هنا ابويه سوه غلطه عمره من فكر يبيع بيت عمي ولو يعرف هيج يصير جان ماباعه.. بس بعد صارت مايفيد الندم وراح حجه العمامي وكللهم راح ابيع البيت وهمه ماعارضوا 

بـ اي شي وكلوله بيعه بكيفك هوه انت قايم بطفاله ومسؤول عليهم براحتك.. وراح ابويه باع بيته و بيتنه واشتره بغير منطقه بيت على كدنه وسياره على كد افلوسه.. صح بسيطه بس تتسمه سياره.. 

وكام يشتغل بيها تكسي ويصرف علينه وجانت العيشه حيل صعبه بس رغم الفقر والجوع والحصار جنه انحس نفسنه احله ايام حياتنه من اكعد بالباب اني واخويه الصغير ننتظر جيت ابويه وهوه مشترينه بجيوبه ونتعارك اني واخويه علمود نغسل جواريبه اخ والله احله ايام عشناها هيه طفولتنه وابويه فدوه الگلبه اشكد حنين علينه وشايل گلب ماينوصف علينه يكعد بليل يجمعنه ونعلك الصوبه وطافيه الكهرباء وامي عالكه الاله ويحجينه على ايام شبابه هوه وعمامي لو يحجينه على ايام العسكريه من جان يداوم واحنه نفرح حيل بسوالفه وكاعدين بنات عمي سوسن وشيرين وحسان واسامه هذوله اولاد. عمي الي انفقد واني كاعده واخواني اني عندي اخويه الجبير صالح واختي فرح واختي شهد واني اصغر اخواني اسمي جُمانه.. واخويه محمد ابن عمي المفقود اصغر مني 

جنت ما ادري بيه هو ابن عمي.. كل ضني هو يكون اخويه الصغير.. جنه كل يوم نروح للمدرسه اني ويا ونرجع واكعد اقري اشكد احبه ومتعلقه بي ونلعب سوه اني ويا.. واجتي عطلة المدرسه هنا اني عمري 10سنوات وهوه عمره 8سنوات عطلنه من المدرسه وكلنه لأمي نطلع نلعب بشارع لان عدنه فضول نتعرف على جيرانه الجدد لان سكنه بمنطقه جديده بس امي بسرعه تعرفت على جارتنه وكامت توكف تحجي وياها بالباب انشوفها واحنه راجعين من المدرسه.. هنا قررنه نطلع ونلعب ويا جيرانه الجدد.. ولو جنت اعرف طلعتي للشارع هيج اسمع.. جان مافكرت اطلع من الأساس.. طلعنه اني واخويه حمودي نلعب بس اجه واحد من الجيران وكام دفع اخويه.. اجيت لأبن جيرانه وكلتله ليش هيج تسوي بااخويه وكال هذه مو اخوج ماعنده اهل هذه اهله ميتين واهلج مربي وانتو بيت عمه وهنا اني اكله اسكت أنتَ واحد جذاب وحمودي سمعه وكام يبجي وطبينه اني ويا جوه للبيت ورحنه لكينه ابويه وامي كاعدين ويشربون جاي شافوا حمودي يبجي كالوله شكو اشبيكم ليش يبجي اخوج كتله بابا ابن الجيران هيج يحجي وهيج.. ابويه صفن على امي وكال لا بابا جذب ماكو هيج حجي هذه يكرهكم وهيج يحجي ومسح دموع محمد وكال روحوا جوه طبوا.. وبعد متطلعون تلعبون بـ الشارع العبوا بس بلبيت فهمتوا؟.. وجان ضايج حيل وطبينه اني ومحمد جوه بس واني فايته.. اسمع ابويه يكول لأمي يا مره مجوزين من سوالفج المن حاجيه اكيد الطفل سامع من اهله شي اشلون بيج مضبين السانج المن حاجيه محمد مو ابنه احجي..

هنا اني باقيه صافنه مامتوقعه الي سمعته وامي ادكله والله العظيم اني مااقصد شي هيه امه جارتنه من طلعت بقت تسأل بيه واشكم طفل عندي واني حجيتلها وكتلها عندي ولد واحد وتلث بنات بس.. وهذوله اولاد حماي وهذه امه عافته وماتت بالولادة واني رضعته من صدري وربيته هنا ابويه رفع راسه شافني واكفه وصاحلي وكال تعالي بابا تعالي حبيبتي وبطلة ابوها.. مااريد الي سمعتي تحجي كدام حمودي لان ميعرف.. وكتله هذه الي هامك يعرف يعني حمودي مو اخويه؟.. واني ابجي من كل گلبي وهوه يحضني ويكلي لا بابا لا هوه اخوج امج رضعته من صدره وهوه اخوج انتو ربيتوا سوه ليش هيج تحجين.. كتله اني ليش احجي غير انتو تكولون.. كال ميخالف أنتِ سباعيه ادري بيج.. ماراح تحجين ابد.. لان راح ينقهر حمودي ويبجي أنتِ اسكتي واحتفظي بـ السر.. كتله زين واخواني هم يعرفون؟.. كال اي يعرفون اخوانج واولاد عمج كلها تعرف بس أنتِ ت وحمودي متعرفون 

وهنا اني بعمر صغير بس گدر ابويه يقنعني ما احجي كدام اي احد بلبيت او بره.. صح جانت اكو غصه بداخلي وانقهرت بس كلام ابويه طمني من كال احمد اخوج ويبقى اخوج واني حفظت السر وضميته.. ومرت الايام وحياتنه حلوه ننتظر جيت ابونه ونتغده سوه ونكعد سوه .. بس هنا اسامه ابن عمي طب بمرحلة المراهقه وصار وكح حيل.. ووصلت بي يسوي مشاكل ويا اولاد الجيران وكام يمشي ويا شباب بعمره مو زينين.. وتعلم يشرب جكاير وتعلم على غير سوالف مو زينه وتعب ابويه كام يفتر ورا ويحل مشاكله الي ماتخلص ابد وهنا كام ابويه يتعصب بسببه لان يخجل من انتقادات العالم بسبب اسامه واخر شي سوا اسامه

.. جنه كاعدين مره نتغده كلحنه وندكت الباب واجو الشرطه اخذو ابويه..طلع اسامه مسوي مشكله جبيره واتوقف ابويه بسببه وكام يجي علينه عمي الصغير يكتله ويحاسبه وما امتنع ابد وابويه يحجي ويريد

وابد مافاد بي اخر شي سوه امور ماتنحجي وهنا ابويه كله بعد البيت ماتبقه بي كافي تعبت منك.. 

ابويه قرر يطلع اسامه من البيت يمكن بوقتها ابويه سوه الصح او الغلط جنت اصغيره.. ومااعرف بس سمعته يكول لأمي بلكي ينعدل ويعقل.. هنا امي ضاجت على طلعت اسامه واخواته واخو.. بس محد جان يرفض كلمه الابويه وهنا اجه حسان اخو اسامة الجبير وكال عمي اني ماكدر اعوف اسامه بـ الشارع اخاف عليه واعرف هو غلطان بتصرفه بس مااكدر اعوفه وحده راح اطلع ويا بس انت لا تزعل مني اني ماريد.. اعوفه براحته بـ الشارع.. 

ابويه كله ليش تطلع انت شعليك بي عوفه يتعاقب بلكي يعقل ويتوب كاله لا عمي مااكدر هذه اخويه هنا اني مااعرف تصرف ابويه جان بوقتها صح او خطأ

لو ابويه مرجع اسامه للبيت جان ماطلع حسان هم وصارت مشكله بلبيت وعافوا فراغ بمكانهم بعد ماجنه متعودين على وجودهم بـ البيت وهنا صرنه كلنه نشتاق الهم ابويه جنت اشوفه ساكت.. 

مااعرف مقهور على طلعت ولد عمي.. مادري يجبر نفسه يسكت لان جان عنده عادات قديمة ويخجل من انتقادات العالم مادري.. بس كام يجي حسان واسامه علينه بين فتره وفتره ونشوفهم طبعاً بس اسامه يجي بالوقت الي يعرف ابويه طالع اما حسان يجي بحضور ابويه.. بس هنا اني جنت ضايجه حيل عليهم بس ابويه ماكال الهم ارجعوا للبيت ابد ومرت الايام. علينه بين اقره اني وحمودي وبين نكعد بين لمت أهلنه الي ماينشبع منها.. بس جنت دائماً اشوف بعيون بنات عمي حزن على طلعت اخوانهن.. صار عمري 14سنه وحمودي عمره 12سنه جان.. صف سادس ابتدائي وعلمته اشلون يصلي وانصلي سوه اني ويا بس مره صار موقف يضحك مره جنه نصلي اني ويا وصاح ابويه عليه ورد على ابوي هوه ويصلي وكال (ها يابه) وكلنه بوكتها ضحكنه عليه وكلناله شلون تحجي وانت اصلي.. والله ايام مرت علينه حلوه كل شي بيها لحد مااجه عمي الصغير علينه خطار واحنه انگله عمي عفيه قنع ابويه يخلي الولد يرجعون للبيت كال لا لا ابد. عوفوهم خلوهم يتأدبون المفروض من حسان ميطلع وره اسامه هنا شجعه على الغلط جان عمي الصغير حيل متفهم ويانه ويشاقينه وحيل نحبه مايفوت اسبوع اذا مااجه زارنه.. بس عمي الجبير عازل نفسه ميجي ابد علينه بس جان ابويه يروح عليه بين فتره وفتره.. 

هنا جان يوم عرفه وكالوا رجعوا الأسره وراح ابويه وعمي وحسان واخويه صالح يسألون بلكي اكو امل عمي موجود او اله ذكر.. هنا جانت الصدمه عمي طلع عايش لمدة 12سنه كان اسير.. ورايح البيته القديم.. لان ميعرف احنه انتقلنه بغير منطقه بس بقى عمي الصغير بمنطقتنه القديمه عايش.. 

خلي نجي نحجي على عماتي ساكنات بمناطق متفرقه بس عمه وحده بصفنه ساكنة.. وجانت بصف بيتنه القديم لان متزوجة خالي( الله يرحمه) استشهد بل 84 وعنده (4بنات ولد واحد).. جانت مدلله الولد لان بس هل واحد عدها على تلث بنات.. وجانت دائماً تاخذنه امي عليها.. وعدنه علاقه طيبه ويا بناتها 

الجبيره بنتها متزوجه من جان عمرها 13سنه زوجتها لان جانت عده محل تبيع بي ملابس وهيه صدك تعبت على بناتها بس المشكله ماعلمتهم على الحنيه ولا النظام.. لان كل وقتها جان بـ المحل.. 

جانت عمتي كل همها شلون اتوفر لليتامه كل شي وتسد احتياجاتهم بس.. 

مره من المرات رحنه عليهم خطار اني وامي

واخواتي... خولتي جانت علاقتهن حيل وي بنات خالي طيبه وساره وزينه .. جانن يضحكن ويشاقن بيناتهن.. بس جانت طيبه معوقه بيهن وطبعها منعزله عن اخواتها.. 

وسمعت عمتي تحجي لأمي على ضرتها وانو عمتي عدها ضره.. رجعنه للبيت واخذني الفضول أسأل امي صدك عمتي عدها ضره؟.. بدت تحجينه امي على خالي الله يرحمه.. اشكد جان حنين عليها وعلى خالتي واشكد يحبنه وشكد جان انسان طيب. وخلوق كالت خالكم جان يشتغل حداد بيوت بناء ومره راح يبني عماره الرجال هوه وزوجته وعنده بس بنات وشاف ابنيه جابت الجاي الهم ونعجب بيها وحبها وقرر يزوجها على عمتي.. وجانت عمتي عده بس 3بنات والي تزوجها هم جابتله بنيه وزواجه بسر بدون علم امي وخالتي وعمتي ولا احد غير بس عمي ابو هدى جان يعرف بزواجه على اخته هنا استمر زواج خالي بسر.. زوجته الجديدة جابتله ولد الي جان يحلم يصير عنده.. ومن فرحته ناسي هوه ماحاجي لخواته على زواجه وراح فرحان يبشر امي لان بصفها ساكن وهنا امي تنصدم بزواجه وتسمع عمتي وصير المشكله شلون مزوج عليها.. خالي جان عذره الوحيد انو راد يخلف ولد بس وعمتي زعلت وصارت مشاكل.. 

طبعاً لا ابويه ولا عمامي اعترضوا... 

على زواج خالي وره فتره رضت خطيه عمتي وتقبلت الوضع وصار خالي كل يوم يبات يم وحده.. بس عمتي خطيه من غيرتها من ضرتها قررت تحمل وصارت حامل وهيه عدها اربع بنات والخامس بطريق وضرتها عدها بنيه و حامل بولد.. صارن اثنينهن حوامل .. بس خالي طلع متزوج الثانية مو على مود يخلف ولد.. طلع يحب مرتة الثانية ومرتاح وياها.. ومحاجي امي كايل الها حيل مرتاح وياها من ترتيب ونظافة واهتمام عكس حماتج ابد ماتهتم بيه 

استمرت حياتهم كل يوم يم وحده وصار عمر ابنه (6اشهر) وسمه ابنه سامر وجان فرحان بي وطاير بي 

بس ملحك يتهنه بوليده و استشهد خالي بـ سنه (84) حتى مالحك يشبع من ابنه ولا شاف مولوده الجديد.. وره (3 اشهر) من وفاته ولدت عمتي ولد بس انولد من غير اب.. وره فتره كلمن اخذ ورثه وكل وحده اله بيت وعايشه بي بس علاقه امي وخالتي بس ويا عمتي ماعدهن علاقه ويا زوجه خالي الثانيه ابد.. غير كل حين وحين تروح امي خطار تشوفها وتشوف اطفالها بس مجامله.. واني صافنه على تفاصيل حياه خالي الله يرحمه الي ماتهنه بشبابه ولا فرح بولده ومن استشهد عمره 30سنه الله يرحمه ويرحم كل الشهداء

نرجع على عمي الي رجع من وره غياب 12 سنه 

بس رجع ورجعته قلبت كل الموازين.. 

اول شي سوا من رجع شاف.....