رواية جنية الدولاب كامله جميع الفصول بقلم جمال الحفني
اللي هتقروه دلوقتي يعتبر قصة حقيقية ممكن العقل ميصدقهاش لكن صدقوني العقل لوحده مش مقياس على وجود الشيء وإمكانية حدوثه من عدمه, واحفظوا الجملة دي كويس عشان هتحتاجوها كتير..
أنا أب لأسرة جميلة مكونة من بنتين وزوجة, قررت أنا وزوجتي إننا نغير غرفة النوم ونجيب غرفة جديدة من معرض موبيليا كنوع يعني من التجديد, رحنا واتفرجنا على أوضة عجبتنا واشتريناها والنجار جي ركبها والأمور تمام وزي الفل لحد ما فات أول أسبوع.
بعد أسبوع بالظبط بقينا نسمع صوت خربشة منتظم وخبط جاي من الدولاب, قولت يمكن يكون فار, بس بعدها رفضت الفكرة لإن بناتي معاهم قطط واستحالة فار يدخل يعيش جوه الشقة خصوصا إن الخربشة والخبطات اتكرروا أكتر من مرة!
فتشت الدولاء وكل جزء فيه ومراتي شالت منه الملابس ورجعتها تاني ملقيناش أي فار ولا حاجه توضح سبب الخربشة والخبط اللي بنسمعهم باستمرار!
أول موقف حصل معانا كان مع بنتي, كانت بتلعب جمب الدولاب وكان مفتوح وقتها وغصب عنها وقعت جواه, سمعناها بتصرخ ولما جرينا عليها شوفنا إيدها متخربشة جامد لدرجة إن الحادث دا فات عليه أربع سنين ولسه اّثار الخربشة موجود على دراع بنتي, فتشنا الدولاب تاني وبرضو بدون نتيجة!
وقت الصيف بنتجمّع كلنا في غرفة نومي عشان فيها التكييف, كنت أنا وزوجتي وبنتي الصغيرة نايمين على السرير وبنتي الكبيرة قاعدة على مرتبة جمب السرير في مواجهة الدولاب ومعاها التابلت بتلعب عليه, معرفش إيه خلّاني قلقت ورفعت راسي بصيت على بنتي الكبيرة واتفاجئ بوجود حاجه بيضة صغيرة قاعدة جمب بنتي أو وراها كدا وبتبص معاها على التابلت, وبنتي مش شايفاها ولا حاسه بوجودها أو واخده بالها منها, الحاجه دي بمجرد ما حسّت إني شوفتها راحت اتسحبت بشويش ودخلت الدولاب وكأنها خلاص رجعت مكانها.
ومن وقتها بدأت الظهور بشكل علني, طفلة جميلة صغيرة بضفيرة على شكل ديل حصان بتجري تدخل الدولاب لما أنا ومراتي نشوفها, لكن بتلعب مع البنات عادي وأنا ومراتي قلبنا قوي الحمد لله واتعايشنا مع الموضوع.
في رمضان الماضي المدام كانت وقت الفطار متعودة تعمل عصير كتير وتحط المتبقي في المطبخ عشان لو حد عايز يشرب يعني زي مانتوا عارفين أهمية العصير للصايم وكدا, فكانت لما تدخل المطبخ تاني تلاقي العصير خلص أو اتشرب جزء منه, في البداية كانت فاكره البنات هما اللي بيشربوه لكن فيه يوم لقته خلص من غير ما البنات يدخلوا المطبخ, وقتها كانوا لسه قاعدين قصاد التليفزيون من بعد الافطار, وأنا فهمت اللي فيها.
تاني يوم دخلت المطبخ قبل الفطار بدقايق وجبت كوباية عصير وقطعة دجاج صغيرة وقولت بصوت عالي فطار أهو, وأنا اّسف والله مكنتش اعرف إنك بتصومي معانا, وسبتهم في المطبخ ورجعت الصالة عشان نفطر وبعد نص ساعة رجعت المطبخ تاني لقيت العصير نصه مشروب وقطعة الدجاج اختفت فقولت الحمد لله إنها طلعت مسلمة.
اتعودنا على وجودها خصوصا إنها مش مؤذية وساعات بتحرّك حاجات خفيفة من مكانها والبنات مش بيخافوا منها بس اكتشفت إنها بتحب اللحوم والأسماك والعصاير فقط, وأوقات لما زوجتي تكون بتطبخ وتتأخر في التحضير بتسمع صوت تخبيط جامد في الدولاب كإنها بتقول أنا جعانة.
حصلت بعض المواقف كدا معايا ومع زوجتي والأولاد, في يوم كنت قاعد لوحدي في البيت بتفرج على ماتش الزمالك ومطفّي النور كلّه مفيش بس غير نور الشاشة اللي شغال, وعندي المطبخ فاتح على الريسبشن وفجأة لمحت بطرف عيني بنت صغيرة بديل حصانة واقفة قدام باب المطبخ بتبص عليا, قومت جريت وراها راحت دخلت المطبخ واختفت!
اتضايقت ودخلت أنام, وبنتي بتحكي إنها يومها رجعت مع مامتها بعد ما اشتروا حاجات وكانت جايه عشان تفرجني عليهم, كانت كبيرة وقتها وعندها 12 سنة, فتحت باب الأوضة وهي مندفعة مرة واحدة شافت كائن صغير على شكل بنت فوق راسي مباشرة عنيها حمرا بشكل غير طبيعي وبصت لبنتي بغضب, بنتي من الخوف مقدرتش تصرخ ورجعت لورا خطوات واغمى عليها بس مراتي كانت وراها ولحقتها, ولما فاقت حكت لنا اللي شافته.
حلمت بعدها إن قاعد في الريسبشن وهي ظهرتلي فقومت جريت وراها والمرة دي مسكتها, وبمجرد ما بقت في إيدي فجأة اتحولت وبقت بنت عندها عشرين سنة, قولتلها عاوزه مننا إيه؟ ارتبكت وقالتلي أنا مهندسة واسمي سحر واتقتلت وعاوزاك تساعدني وقالت شوية تفاصيل تاني مش فاكرهم وبعدها صحيت.
أختي كمان جات قعدت معانا يومين هي وأولادها وشافت حاجات مرعبة لحد دلوقتي رافضه تحكيلي شافت إيه ومدخلتش بيتنا تاني.
حتى بنتي الصغيرة شافتها, في يوم كانت بتلعب في البلكونة بعد العشا وأمها لقتها داخله تجري وبتقول روبنزل واقفة على سور البلكونة وممكن تقع, روبنزا دي شخصية كرتونية أكيد عارفينها, والغريب إن بنتي وصفتها بالظبط زي ما بنشوفها احنا.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
