رواية تحت ظل السعف الفصل العاشر بقلم ميار
يأگلبَي يالمَا بيَك ظنهَ
اركِد وَلك مأمِش محَنه
لا بالغريَب ولأ بـ أهلنهَ..
اياد الاسدي
__♕_
ريام: ركضت للبستان وما ابالي غير انهزم من القريه
خفت خفت ابقى ويزوجوني لفراس اكثر إنسان اذاني
عبرت الشجر وصلت قريب من شارع قريتنا والتلفت
خايفه احد يشوفني ويا ما اريد اعبر البستان جفلت على صوته
جهاد:: خيررر وين موليه بالهليل
-درت وجهي عليه واني ما مسيطره على نفسي العبره
الي بداخلي شكت زردومي من كثرة الخوف الي بداخلي
وهو من شافني ابجي جيه ركض وكف يمي ويحجي بخوف
-شبيج ريام احد حاجي وياج ليش هلبچي
ريام: عفية جهاد عوفني اطلع مناي اذا ابقى والله اتأذه
جهاد: شنو هلحجي منو يأذيج بعدين وين ترحين شايفه
اذا طلعتي مناي يلكونج وذبحوج على القبله شوفي ريام راح
ابقى هادء وياج تعالي نكعد اهناك ونتفاهم الي تسوينه خطأ
-دحكت عليه وحايره اروح ويا لو انهزم بهذيج الساعه ما
اعرف ومادري فكرتي غبيه بس شكد ما أذاني فراس وخوفي
من انجبر عليه الفكره وحدها مخوفتني مشيت وره جهاد لحد ما
وصلنه لنفس النخله الي نكعد يمها كعد واني كعدت صارت
النخله بوسطتنا واني مستمره ابجي رفع عيونه يدحك عليه
صار ضوه المضيف علينه نزل عيونه مني بقينا ساكتين محد
حجه وبس صوت شهكاتي مسموعه بجيت الا ارتاحيت
جهاد:: كافي يابه تره شكيت گلبي ليش تشهكين كوليلي
منو هاضمج هل هضيمه ومخليج هيج تبجين شصاير
ريام:: عبالك انوب من حجه وياي هيج بعد اكدر حطيت
ايديه على وجهي وابجي بقهر على حضي الي يتمني خلاني
ذليله وكاتلني الخوف شكد بيت عمي محمد زينين وياي
بس اني وياهم بالبيت واحس نفسي وحيده غريبه عنهم
وخرت اديه من وجهي من حط ايده على راسي رفعت
راسي عيني صارت بعينه ابتسم بس واضح عليه القهر
جهاد: ريوم وغلاة الي هو بمعزة ابوي ياهي هضيمتج
بس اعرف منو وراها اذا ما اطلعها من عيونه اني متعب
شبيج يابوي انتي منو وياج خايفه من حمدان وولده؟
-مسحت عيوني من الدموع واحجي... ججهاد عمي يريد
يزوجني لفراس ما اريده هذا اكثر بشر أذاني اكثر من
حتى ابوه اذا ابقى هناي يزوجوني عفيه جهاد عليك الله
ساعدني خليني انهزم مناي تعبت والله تعبت واخاف والله
جهاد:: اشش منو شنو تخافين من هلـ جريذي صدك تحجين يابه انعل والديه بعدين منو كال خالي محمد
يريد زوجج للجريذي فراس هو حتى ما راضي على رجعتهم
-مو عمو محمد هذا جاسم واني سمعت عمي محمد
يكول اخاف يجبروني ويحطوني تحت الامر الواقع ويزوجون
ريام لفراس جهاد انت ما تعرفه هذا كل شي يسوي حتى ياذيني واذا راد شي عنده استعداد يسوي اي شي حتى يحصله
جهاد:: هذا من جان بغداد اهناي انعل خيره اسمعيني زين
اول شي محد يكدر يجبرج وخالي محمد كلنه وياه بس فكره تنهزمين مناي شيليها من بالج انتي تدرين لو منهزمه
حتى خالي محمد الزين وياج ينگلب عليج ويجوز هو الي
يزوجج لفراس يابه ريوم هاي الفكره خطأ الناس الها الظاهر
شمدريهم لان فراس مو خوش ادمي لا راح يكولون البنيه
لو ما عدها شي ما تنهزم وغير سوالف يحطونها براسج انت
بنت خالد حطي ابوج دوم جدام عيونج وخلي كل واحد يشوفج يكول رحمة الله على ذاك الاب على هلتربيه مو حشى
خالي مو تجي المسبه واسمعيها مني البنت مثل الورقه
البيضه ابقي حافظي على نفسج لان اي شي ينكتب عليها
ما ينمسح وحتى اذا انمسح يبقى اثره وتبقين ترباية خالد
ينرفع بيج الراس وشغلة فراس يمي وحگ راية ابو الحسنين ما اخلي يلوح اضفر من رجليج اني بظهرج شحده يلمس شعره منج اعدمه ورايتهم انهي الج وكل
الي اريده منج تسمعين كلامي انتي مو تكولين احنه أصدقاء اخذي كلامي هسه كل الي اريده حيري بدراستج
انتي سادس اطلعي معدل خلينا نفتخر بيج ولا تنسين كلنا
هذا فرات و ولد خالي محمد كلهم وياج والله غدو نار من
شافو حمدان رجع عگب عملته بس حطي ابالج تره رجعته
من صالحنه اذا بعدج تفكيرين تاخذين حگ ابوج منهم
ريام:: كلامك ريحني بس والله من الخوف ما جنت افكر
زين بس لا هاي هي والله بعد ما اطلع ولا افكر انهزم
مسحت دموعي وگتله شلون نستفاد من رجعت عمي
جهاد:: هذا جان يشتغل من جو ليجوه بس اذا ظل جوه
عيونه نعرف تحركاته واكو شي اليوم شفت خالي محمد
واكف ويا ابنه غسان بس من مريت من يمهم سكتو بس
خالي وجهه ما يتفسر ريام هاي شغلتج بلجي يحجي لعمتي
ما اعرف حاولي شلون ما يصير تفهمين شحجه ويا غسان
ريام:: مو كتلك غسان خوش ولد والله يجوز يريد يساعدنه
-عوفي غسان على صفحه ما صار غسان ملاك ونازل علينه
-هاي شبيك هسه تشوف والله بس تعرفه زين انت تحبه
رفع حاجبه ما عاجبه كلامي دنكت العب بالشراشيب الي
بالشماغ
جهاد:: خو عليش خايفه اذا عاجبج غسان نزوجج اله
ريام:: فتحت عيوني مصدومه من كلامه كتله لا والله
تره هو حسبت اخوي لا اكثر ولا اقل اني اريد اخلص
من عايلتهم كلها تره صدك غسان والبنات ما اذوي
بس يبقون ضنه حمدان وما حصلت منهم غير الاذيه
جهاد:: اي اي ما يحتاج تبررين صدكت خاب انجبي
شنو كيفتي ما ننطيج الهم لو طگ نخله بروسهم وانتي
شيلي فكرة الزواج من راسج وفكري بس بدراستج
ريام:: هزيت راسي غير لو يدري اكثر شي اكره واخاف
منه هو الزواج ظلينه ساكتين وما اعرف بيش الساعه
كام جهاد ينفض ملابس ودحك عليها واشر حتى اكوم
جهاد:: يلا يابه كومي روحي نامي ما ظل وكت لا واحد
من الولد يطلعون وشوفونج وانتبهي بعد طلعتج الا اني
اكولج يلا تجين هسه عينهم راح تصير على بيت خالي محمد امشي اوصلج وهم وراج مدرسه ناميلج فد ساعه
ريام:: ماشي باي وشكرا جهاد على كلامك وكفتك وياي
-ابتسم واشر بمعنى روحي عفته ومشيت للبيت بس
دخلت الغرفه حطيت راسي ونمت مرتاحه اختفى الخوف
الي بداخلي وهاي اول مره انام واحس نفسي فعلاً مأمنه
♡♕♡
مهى:
من رجعت عمي حمدان والبيت مگلوب علينه
كعدنا من الصبح عنده مراجعه للكتب ما بقى شي
للامتحانات اخر السنه الجو حار يصمط وكفت انتظر رحاب
تالي كلت خلي اتمشى يما تجي هي عبرت بيت محمد
وكفت قريب من شجرة البرتقال اخذت وحده ما بقى شي
ويخلص موسمه وكفت اكشره شفت رحاب طلعت واني
واكفه مقابيل بيت عمي احمد جاي اكل بالبرتقاله طيبه
حيل جفلت على فتحت باب بيت عمي احمد عبالي البنات
ما احس غير معاذ وزياد بوجهي ارتبكت درت وجهي منهم
شويه ورفعت راسي لكيت معاذ واكف يمي يخزر بيه ورحاب
وكفت يمي ما اهتميت اله ردت امشي وما احس غير انسحب من جنطتي درت وجهي وردت اسحب جنطتي وهو عاط بيه..
معاذ:: اكفيي لجج شكو واكفه وحدج بهلـ صباحيات
مهى: شعليك بيه
-مو اشك حلكج شنو شعليه خرب بروحج لابيج
مهى: لا تسب ابوووي لكك تروحله فدوه
معاذ:: مهى ورب العزه اهفج براشدي اعمج
-تايهتلك وتعميني يلا ولي منا جاي يريد يتحكم بيه
زياد:: يمعودين صلو على النبي شبيكم وخويا مهى
معاذ من خوفه عليج حجه ما يصير تطلعين وحدج
رحاب:: يلا ما صار شي يمعودين لا يطلع ابوي وتصير سالفه روحو منا اذا ماكو زحمه وانتو تعرفون ابوي
معاذ:: شوفي ولج والله اذا اشوفج طالعه وحدج
رجلج اكسرهن طاح حظ فرات واخوتج على هيج
تربيه
مهى:: وحظك لا تحجي على اخوتي وروح علم جهالك
على التربيه مو انت الي تعلمنه متربين احسن منك
معاذ:: مهىىى الزمي السانج والله اكصه الجج حيوانه
جهاد:: خيركم؟
مهى::ردت احجي بس من جيه جهاد سكتت وهو بقى
يدحك علينه يريد يفهم السالفه والبنات خواته هم جن
دحكت على جهاد وكتله خويا ترضاها اخوك يكولي
ما متربيه ويغلط وسب بيه واني ما محاجيته هو جيه يمي
ويغلط على فرات واخوتي وحتى ابوي سبه هو يرضى احد
يحجي حشاكم عليكم ادحك عليه ابتسم رغم جهاد قليل
تشوفه يضحك
جهاد:: خلي يولي لا والله ما ارضى يحجي عليج ولا على اخوتج روحو خويا جيه الحجي واني أدبه الج واخذ حگج
مهى:: هزيت راسي ومشينا لسيارة الحجي وبداخلي احجي يعني عادي يسب ابوي بس على اخوتي ما يرضى
صعدنا ومشت السياره البنات يحجن وياي اني طنكرت
ولحد ما وصلنا المدرسة بداخلي اغلط عليه دخلنا للصفوف
كعدت بسد ريام الي حاطه راسه بالكتاب وتدرس وماشاء الله حيل شاطره رغم سألت رباب عليها كالت مو حيل ضاغطه على نفسها بالدراسه دخلت المدرسه وبدت تشرحلنا وره ما كملنا طلعت للساحه وبيدي كتاب الفيزيا
صعبه عليه حيل شفت مروى جت بتجاهي وكفت بسدي
مروى:: مهى لا تزعلين من معاذ تره گلبه طيب بس انتي
تعرفين اخوتي عصبين وهذا فرات شفتي من يتعصب هم
يغلط والله تره يخافون علينا من الحجي ولا يبطلونه
مهى:: لا والله اخوج خبيث وحقير كل ما يشوفني يحاول
يقهرني شكد اكره هسه جهاد الي الكل يخافون منه مو مثله بلعكس شكد محترم هو وزياد بس معاذ لا ابد مو محترم لا تزعلين مني مروى بس ما احبه لاخوج يقهرني
تبارك:: عليمن يقهرج تستاهلين شكو دايحه من الصبح
عود شوفوني شاطره اطلع من الصبح للمدرسه طاح حظج
مهى: وحظج وحظ اخوج شكد لسنتكم وصخه عابتلكم
تبارك:: مثلج ومثل اخوتج حبي يلا امشن انشوف الشاطره
الثانيه شو هسه كتلت نفسها على الدروس امشن امشن
مهى:: مشينا وياها ريام كاعده على بلوكه بالفي وتقره
وتبارك تعيب عليها وكفنا يمها رفعت اديها عود هلاو
وراسها بالكتاب سحبته منها تبارك وسدته وتغلط عليها
تبارك:: كافي جذب اول وتالي همه يختارون الاختصاص
النه لا اتعبين نفسج غير التربيه لو تذبحين نفسج ما ترحين
ريام:: اي مو بكيفج وبكيفهم دجيبي كتابي ورانه امتحانات
مهى:: اي هو بس اليوم انداوم راح نكعد بالبيت وانتن اداومن وراجن نمتحن ونخلص هلكنه كرهت حتى الدراسه
وكفنا تنمشى ونسولف على دراسه جبنه طاري بنات حمدان
ريام:: انقهرت عليهن فد شاطرات والله امبطلهن هل نحس
تبارك:: طبعاً هو وين اكو نقل وره نص السنه واهم شي روحه اشتعلت روحه وما طفت طبعاً عذرا ادري عمجن
ريام:: هههههه شكد مهتمه انتي عاد يابه اشعليها لا تكولين بس محد مهتم وعابت شكل هيج عم ولا يستاهل كلمة عمي
مهى:؛ هو صدك ما نعرفه بس سبحان الله ابد ما ينحب
ولا عبالك ابن جده حسنه دشوفنها عجوز والله تخبل
مروى:: تره للصدك بس خالي خالد وشويه امي يشبهونها
وريام والله تشبهيها خاصه عيونج تذبح والله وملامحج
كلها ناعمه وعيونج كبار وشهل بالشمس تخبلين والله
ريام:: لا عيني اشبه ابوي شجابني على حسونه لا اشبهه
ولاتشبهني امشن نروح نشتري من الحانوت جعت
مهى:: هههههههه اكون تسمعج تصيحيها حسونه
ريام:: ادلعها شبيج
مهى: رحنه اشترينه من الحانوت ورجعنا للصفوف وبس
خلص دوامنا طلعت للسياره تعبانه اتفقنا اني وريام اذا
صار مجال وحده تشرح للثانيه والصراحه ريام اشطر مني
رجعنا للقريه نزلنه الحجي ومشينه اني ورحاب شفت عمي
حمدان واكف ويا ولد اثنين سحبت رحاب ومشينه سريع
دخلنه البيت وتلكتنه امي بالغلط ويا عايفتني وحدي اشتغل
وشتريدن تصيرن عفناها ورحنه بدلنه وجيت اساعدها رغم
اني ورحاب انظف كل شي بس الطبخ تطبخه امي بس ما يعجبها ندرس ولو ما عمر وفرات ما يخلونه نكمل واني فاتتني سنتين التمو ابوي والولد درنه الغده وكعدنه نتغده
فرات اكل شويه وكام مستعجل صاح عليه ابوي
-فررررات
فرات:: ها يابه
جاسم: وين مولي عدنه شغل
-عندي شغل يابه رايح ويا جهاد شتحتاج الولد موجودين يكملون بدالي واذا فد مره دز على وسام
يساعدكم من رخصتك
جاسم:: لا ماكو طلعه شغلة جهاد مو اهم من كلمتي
فرات: يابه ما عدنه شغل كول ما اقبل لان رايح ويا جهاد
جاسم: اي ما اقبل مرافگ هل قليل الادب عاجبك
قلت ادبه ويا ابوك البارحه جدام الاوادم حتى خالي
ما يكول يرضيك وانتو مثل الجلاب ما حجيتو چلمه
عمر:: ههه راجع نفسك يابه شنو السبب الي يخلي
جهاد ما يحترمك وحتى ديوانك ما يكعد بي راجع نفسك زين وانت تعرف لان جهاد وكلنه نعرفه مو من. طبعه قلة الادب
فرات: يلا يابه من رخصتك
مهى: بس طلعو عمر وفرات ابوي كام من الاكل وهو يغلط
عليهم ويتحلف بيهم كمت اسويله جاي لا يرد عليه يطلع
قهرته بيه شفته طب لغرفته جديتي رايحه لبيت عمي محمد
وكفت انتظر الجاي يخدر ورحاب تلملم المواعين صبيت الجاي واخذته الهم لغرفتهم وكفت بالباب من سمعتهم يحجون تقربت وكفت على صفحه وحطيت اذني على الباب
نسرين:: وهسه شستفاديت من جبت حمدان شو فلس ماشفنه منه هسه يطلع ضاحك عليك كتلك حمدان بليس
جاسم:: اشش اني اعرف شلون اطلع الفلوس منه بس مو
وكتها خلي حسين ياخذ رحاب يلا لان حمدان يريد بنت خالد لابنه واخاف تصير مشكله وتبقى انوب هاي فوك راسنه وانتي ما تلكين زلمه لمهى اي ادري خما تبقى هيج
نسرين:: سهله راح اشوف اختي وانطيها لابنها بس اريد اعرف ليش بعت البيت لحمدان والله خايفه يضحك علينه
جاسم:: لا تخافين مو زين خلو حمدان يكعد بي لو يظل
هذا الجلب جهاد ما يقبل نبيعه كوه كدرنه انقنعه ابيعه
لحمدان عوفج من الفلوس مناي لجم يوم اجيبهن الج
بس خلي ازوج رحاب وراها انطي ريام واسحب الفلوس
مهى:: دكيت الباب من شفتهم سكتو دخلت حطيت الصينيه بيناتهم وطلعت رحت للغرفه مخنوگه كوه لازمه
دموعي بس طبيت قفلت الباب وكعدت ابجي على حظنه
الي لا ام ولا اب مثل الناس ما يفكرون بس بالفلوس ما يهمهم سعادتنه ابوي بس يريد يزوجنه ويخلص منه هضيمه
من اشوفهم مستثگلين حتى لكمتنا ورحاب على الاقل امي
تريدها بس اني حتى جديتي ما تريدني صح اخواني زينين عليه بس اتظل بنفسي اسمع كلمه حلوه من امي او ابوي
فاطمه
:: واكفه يم التنور الطين انتظر اتحمر السمچه
وزنوبه بنت معاذ تلعب يمي شابعه قهر عليهم امهم
لا ابالها ولا عبالك ام عجيب صارلها چريب الاربع اشهر
عايفتهم سبحان الله إله بيها حكمه ولا والله ما تستاهل
الضنه وايجت بالتنور شفت السمچه استوت اخذته ودخلت
وزنوبه ادردم وراي حطيتها على السنگ وصحت على البنات
حتى نصب الغده وكفنا انصب ودخل علاوي يدحك علينه
اشر بس ما عرفت شيريد دار وجهه على تبارك ما افتهمت
كعدت گباله حتى افهم منه شيريد گتله علاوي جوعان اصبلك اكل حط ايديه اثنينهن يمسح وجهه بغصب ابتعد
وكف الباب المطبخ الداخلي وجان يدحد علينه ويغمنه
ويركض للبيت واحنه بقينا وحده ادحك على الثانيه
تبارك:: خاب هذا شكد قليل ادب يمشي ويغم بالاوام
مروى:: هههههههه ولج مو من واحد ما يفهم عليه يغمه
فاطمه:: رجعت اصب كتلهن والله انقهر عليه لو بس يرجع
يحجي سنة الجايه مو راح يدخل مدرسه شلون راح يدبرها
تبارك:: دحكت عليها وغمزتلها وهي فهت كتلها شايله هم
ابن الحبيب سوده عليه ما تقبلين بفرات وصيري امه
فاطمه: انجبي انجبي حيوانه اني شحجيت ذيج المره
وشلون تحجين هيج بالله طب واحد من الولد وسمعج
تبارك:: يلا عمي سكتنا امشن انودي الغده لا نترزل
كعدنا كلنه نتغده وعلاوي كاعد بسد جهاد ومرتچي
على رجله وجهاد يفلس سمج ويلف وينطيه اتكول
ابن جهاد مو ابن فرات والله مرات حتى احسه يشبهه
عود اني ردت اصير حنينه لفيتله سمج وانطيته شو هو
بقى يدحك على لفتي يرفع عينه عليه ورجع يدحك على
اللفه مثل الما عاجبه تالي هز ايده ورجع غمني واهلي
شبعو ضحك رفعت الخاشوكه واهدد بي وهو ولا يمه
-ولكك عليوان ابو اذان شبيها لفتي فوك ما حنينه عليك
دحك على جهاد ويأشرله بمعنى اغمها واني بقيت انتظر
جهاد شيكوله
جهاد:: غمها يروح عمك انت تروحلك فدوه تبوكه
-اي لا هاي هي يابه تشوف ابنك هذا ابن صديقه هيج
باجر يتزوج ويخلف يجوز يذبنه بالشارع لو رادو جهاله
زياد:: الله وين واشوفج بنص الشارع مثل الشواحيذ
تبارك:: برطمت ودحك على ابوي كتله شنو يابه شو ساكت
احمد:: هههههههه ابنية ابوها انعلج والديهم لجهال اخوتج
اطردلج جهاد وضناه ومعاذ وضناه كل شي ولا ابنياتي خط
احمر خلي يولون انتن سلطانات بيتي شحد الي يحاجيجن
تبارك:: تحمست وحجيت حبيبي بابا اني اشوف لو من
هسه تطردهم مو احسن شو تحس بيتنا بس مال ارامل
ومطلقين وزياد هذا وجه يطير النعمه نبقى بس اني وياك
جهاد:: ولج من الارامل وما عاجبينج اخوتج شو تلوصين
-انتبهت لروحي كتله خويه هو انت صدك ما مزوج بس
مرات احسك مثل الارمل سوده عليه امي ما تزوجك
معاذ:: هههههههه والله صدكتي بعد روحي اخوي الارمل
جهاد:: انجبو وكملو اكلكم هاا عمو علوش تريد انوب
تبارك:: سكتنا و ادحك على ابوي صارت عينه على جهاد
مدري من شفت ابوي يدحك بقهر على جهاد تندمت حجيت
كملنا وكفنا نغسل مواعين وفاطمه تحضر بالجاي وتسولف
فاطمه:: راح احاجي جهاد اريد اروح اشوف ريام ترحن وياي
مروى:: مو عدنه امتحانات السبت خاف ما نلحك نقري
فاطمه: لا تلحكن باجر جمعه مو اريد احجي وياها فـ على
الاقل انتن تكعدن ويا البنات شو رحاب كالت جديتي اهناك
تبارك:: لعد ما اروح بس تشوفني تظل ليش ما تجن وليش
ما تسألن عليه ووو عاد ما نخلص بس اني هم اريد اشوف
ريام ولج فد شاطره ماشاء الله عليها تدرين جايبه 100
مروى:: يمعوده صلي على النبي راح تحسدن البنيه انتي
ومهى وريتاج راكضات وراها اقرن مثلها انتن تنجحن
تبارك: عوجت حلكي والله لو نقره لو نموت نفسه بس
هو توفيق من الله وبعدين كلت ما شاء الله ما نحسد
جهاد:: فاطمه يابه محتاجه شي رايح اني عندي شغل
فاطمه:: وين والله بس ردت اكلك يجوز بالليل اروح
لبيت خالي محمد اريد اشوف بنت خالي خالد شتكول
جهاد:؛ اي روحي زين تسوين وما يحتاج تكوليلي خلي
واحد من الولد يوديكم وهم انتي تتونسين غير جو
فاطمه: اي يبعد عمري انت اني متونسه اذا اشوفك مرتاح
تبارك:: باس راسه وطلع درت وجهي على السنك واحجي
بداخلي هسه عود حب راسي اني هم شكو بيها اهم شي
فاطمه بقيت ادردم كملنا المواعين ورحنه ندرس امتحانه
«»«»»«»«»»»»
ريتاج:: واكفين نغسل مواعين وريام نتنظر الجاي كملنا
وهي شالت صينية الستكاين ورباب شالت القوري وطلعنه
للحديقه ابوي وامي واخوتي بس وسام ماكو كاعدين بالحوش الجو بالليل يصير حلو ولو البگ ياكلنه بس ريحة
الزرع والبستان تخبل كعدنه وريام جاي تصب الجاي وندك
الباب كام حسين يفتحه وابوي جاي يحجي لامي على الرزع
دحكت دخلت عمتي ابتسام و وراها البنات حامد فز وكام
وتلكته عمتي تحبب بي وهو بس يريد ينهزم يستحي وهي
مجلبتله تعاتب بي كالتله...
ابتسام:: يمه يروحي انت ولك حمودي ما تجي اشوفك
ما تكول عندي عمه اسأل عليها اشوفها لا انت ولا حسين
حامد:: حگج عمه والله عذريني بس والله ملتهي بالشغل
تفضلو تفضلو كل الهلا بيك من رخصتج عمه اشوف الولد
ابتسام:: مرخوص عيوني فدوه لطولك
-خطيه اخوي بس يريد يفلت دحكت على ريام وابوي كاعدين
ويضحكون على حامد كام ابوي يستقبل عمتي والبنات احنه
هم كمنا وبداخلي ادعي ما تفشل ريام وتسلم عليها حبها
ابوي براسها واني وكفت اسلم على البنات وحبيت عمتي ريام صارت اخر شي جرتها فاطمه وحبتها و وخرت عيني
صارت على ابوي يدحك على عمتي بس سلمت علينه وكعدت وعافت ريام ولا عبالك تشوفها ادحك عليها عيونها
غورگت دنكت وكعدت بسد امي ورباب صبتلهن المي الجو
تكهرب صبت الجاي ورادت تكوم تنطيهن سحبها ابوي
محمد: اكعدي بويا رباب ادير كومي رباب ضيفي
عمتج والبنيات يا كل الهلا خالي شلون فطوم
فاطمه: بخير الحمدلله خالي انت شلونك
-بخير والحمد لله
ريتاج:: شربنه الجاي كوه والسكوت سيد الموقف محد
حجه لحد ما ريام شالت الستكاين وترخصت كامت فاطمه
وراها ادحك عمتي عينها صارت وراها دار عليها ابوي وكال
محمد:: ابتسام شنو هذ التصرف ما حبيت منج
هاي بنت اخوج مال تفرقينها على بنياتي ما اقبلها
ابتسام:: خيي انت تدري بعد عليش هلحجي اني
لا احبها ولا اكرها بس ما احب امها ولا اعترف بيها
خالد بنظري مات اعزب ما عنده بنت ولا تزعل مني
محمد:: صدك تحجين ابتسام كبري عقلج ان رضيتي
او لا ريام بنت خالد وبعدين هي وين تعرف امها البنيه
لا تعرف امها ولا شايفتها ماله داعي حجيج هذه حجه
اذا ما يعجبج تسلمين بعد حتى على بناتي لا تسلمين
ابتسام:: محمد شو هيج تحاجيني الظاهر ما عجبتك
جيتنا كومن كومن مالنه كعده بعد الصوج الي جيت
امنه:: ياا صدك عود صلو على النبي يا جماعه ما مستاهله السالفه وام جهاد شني ما تعرفين محمد
محمد:: اكعدي ام جهاد اكعدي اني ما قصدي شي
بس كل الي اريده منج حطي عينج بعين ريام وشوفي
خالد بعيونها خالد الي جان ماله وحاله كله الج الاخ
الي يضحي بروحه وبسعادته لخاطر اخته تبقى مرتاحه لا تظلمين حظج وبختج خالد يستاهل انداري
بنته لخاطره مو لخاطر احد وبكيفج بعد يلا يابه اروح
اني اشوف الولد واتعلل ويا الربع بالمضيف مرخصتكم
-كل الهلا اخذ راحتك
ريتاج:: كام ابوي وجت ريام جرها حبها ويضحك بيها
هو راح وهي جت بيدها صينية فواكه حطت المواعين
وكعدت كل وحده كضبتلها وحده تسولف ريام وفاطمه
كعدن على صفحه يسولفن واحنه نسولف وحدنه وما
نحس غير على دفرت الباب جلفنه كلنه دخل علاوي
يدحك بوجهنه يتفحص تالي كعد بسد ريام وارتچه بحضنها
وهي تكشر برتقال وتنطي ياكل كالتله طيبه وهو بس هز
راسه وعافها وكعد بسد فاطمه يأشرلها حط ايده على صدره ورجع حطها على فاطمه عطت بيهن كتلهن عرفت شكال
رباب:: اتحداج يلا كولي شكال
ريتاج:: علاوي كتلها انت وهي صح يعني اني وانتي
دحك عليه وصغر عيونه وغمني الحمدلله محد يسلم
من غماته بس ابو وجهاد والكبار جريته واشرح تالي عصب
وفاطمه ابتسم بوجهه واخذته مني وحبته وكالتله
فاطمه:: علاوي قصدك انت تحبني مو
-ضحك وصفگلها وحبها وراح على ريام يجرجر بيها حتى تكوم وهي ما اتعجاز منه كامت ويا على مطبخ يغسل اديه...
ريام:: كمت اغسل ايدين علاوي وعرفته عنده شي غسلتله
ودنكت انشف وجهه وهو تنرفز من الخاولي اخذه مني
وشمره ضحكت على حركاته راح للباب يتأكد ماكو احد
ورجع حط ايده بجيبه وسحب ايدي خله الورقه وحبني
بخدي وطلع اخذت الورقه ودخلت للحمام اخاف ادخل
للغرفه يجن البنات متوتره وخايفه فتحت الرساله جان مكتوب بيها...
السلام عليكم ريام انتظرج اليوم گبل صلاة الفجر وحاولي لا تتأخرين وكل ما تجين من وكت افضل
جهاد
-طبگت الورقه وطلعت للغرفه ضميتها وظليت متوتره
رجعت يم البنات كعدت بسد فاطمه وعمتي امنه تحجي
ويا ام جهاد على عرس حسين قررو يخلونه وره امتحاناتنه
مركزه وياهن جرتني فاطمه حتى نكوم كمت وراها مستغربه
فاطمه:: تعالي ريام نكعد اهناي على الدجه انسولف
ريام:: كعدت ويا بسد حوض المي مسوين دجه احس
عدها حجي بس مدري مستحيه تحجي كتله فاطمه اكو
شي شو احسج من جيتي عندج حجي مدري مستحيه
فاطمه:: هههههههه لا ولج بس ما ادري شلون احجي وياج
شوفي ريومه اني والله احبج وشكثر ما جان حارث يسولف
بيج صرت اتمنى اشوفج حسبيني اختج اي شي تحتاجين
ما يردج غير السانج وره رجعت حمدان من كالتلي عمتي
شلون خايفه ردت بس اخلص عده حتى اجيي واشوفج
ريام: فاطمه حمدان مارجع اذا ما عنده شي اني اعرفه
وخايفه والله خايفه يزوجوني لابنه فراس كل ما اتخيل
يجبروني جسمي يرجف لو تدرين كمية الاذيه الي شفتها
منهم حتى حمدان جان يضربني بسبب ابنه بدال ما يعاقبه
يعاقبني شهكت ابجي واني اتذكر تصرفات فراس واعتدائاته
عليه
فاطمه:: اشش ريام شسالفه شمسويلج كوليلي اني هم
اختج شو دحكي عليه ليش تبجين شسوالج ريام اشش
-ما اريد احجي بس خايفه ما اريد ارجع يمهم يأذوني
فاطمه:: كافي يعمري والله شوفي خالي محمد حتى
على امي حجه لان ما سلمت عليج شلون يرجعج لبيت حمدان لا تفكيرين هيج ولج والله يموت عليج وكلنه يمج
امسحي دموعج ولا تفكيرين هيج اطمئني ويلا كومي نكعد
يمهم نتونس بعد راح تلتهين بالامتحانات وما نكدر نسولف
ريام:: هزيت راسي وكمت غسلت وجهي من الحوض ورجعنا يم البنات يضحكن وناس ناصبه على ناس لل 11
يلا كامن راحن دربناهن ورجعنه رباب غسلت المواعين
الفواكه واني وريتاج كل وحده فرشت لنفسه وفرشت
لرباب لان ريتاج ما تفرش لاحد لو نموتها مددت افكر شيريد
مني جهاد معقوله اكو شي بخصوص حمدان وعرف ليش جيه للقريه جن البنات نامن واني ما اخذت عيني نوم ظليت اتگلب لل3
الفجر كمت بس اخذت عبايتي والشماغ وطلعت وصلت
البستان بس ما لكيت جهاد......
