رواية عشكت جنوبية الفصل العاشر بقلم نسرين الاسدي
هنادي: جنت خايفة منه وتوسلته يعوفني بس ما جان يسمعني
وخذاني بالغصب وبقسوة أذاني حيل ضليت اتحرك اريد افلت ايدي منه حتى ادفعه بس جانت قبضته قوية حسيت نزل عليه شيء
بجيت واتوسلت بيه يبعد عني وهو ماهتم لصياحي ولا لبجيي
ادية خدرن وجسمي كله ضل يوجعني ورگبتي حسيته يريد يگطعها لأن كلما اصرخ يعضها اقوة
لحد ما خلص
باوعلي وانا جنت اناشق من البجي
مسح دموعي وگال: اشش ..شنو هالبجي ..ترى اني عاذرج اليوم لأن أول مرة بس الجايات ما اقبل هيج اريدج تبادليني بكولشي مفهوم هنودة؟
انا ما جاوبته باسني بخدي وراح للحمام لفيت انا روحي بالغطى ودموعي ما واگفه وارجف ماعرف من الخوف لو شنو وجسمي يوجعني چنه مكسر تكسير
طلع هو لاف بس الخاولي على جسمه انا درت وجهي بسرعة
هو ضحك بصوت عالي وگال :شنو هاي مرتي تستحي تباوعلي ..دگومي يلا لو اجي اني اكومج شتگولين؟ !..حتى اسبحج بيدي ويمكن نرجع نعودها ..
عض شفته وكمل: بعدني ما شابع منج
انا خفت گتله عالسريع: لااا..انا اگوم ..لا تجي عوفني
انتجه على الميز وگال : يلا كومي بله
گتله: دور وجهك انته اول
ضحك وگال: لا عيني انتي مرتي هسة ويحقلي اشوف كولشي ..اقصد اني اصلآ شفت كولشي يلا دكومي
گمت على كيف بس حسيت موجوعة كلش وگفت ولزمت الجرباية طاح الغطى عني واستحيت خذيت عباتي من الگاع ولفيت نفسي بيها
هو جان يبدل ومن انتبهلي گال: ها شو بعدج واكفة تردين اجي اساعدج بشيء ..ترى اني ما عندي مانع
انا من تخيلت هو يمكن يرجع يسوي نفس توه تحملت الوجع وركضت للحمام بسرعة دخلت سديت الباب انتجيت عليه وگعدت بالگاع وضليت ابجي انا خايفة منه ومن اهلة ..واريد اهلي مشتاقتلهم ويمكن بعد ماراح اشوفهم
ضليت ابجي بصوت عالي وبحرگة گلب
شوية وسمعته دگ الباب صاح: هنادي ..فتحي الباب بسرعة...شبيج؟...اذا جاي تبجين ترى ادخلج
مسحت دموعي وحاولت اطلع صوتي ما بيه شيء وگلت: مابيه شيء ..مابيه شيء ..عوفني ابحدي
ضرب الباب حيل وگال: ماشي ضلي ..اصلآ انتي ما هامتني ولا گاتلني اعرف شبيج ..دروحي
من سمعته طلع سبحت عالسريع وطلعت اخذ هدومي بسرعة قبل لا يرجع
شوية وسمعت الباب انفتح ركضت رجعت للحمام
صاح هو: وينج ..شنو بعدج شجاي تسوين ؟!
گلت: جاي ألبس اهدومي
صاح هو: لا تگولين اهدوم گولي ملابس ..ماشي؟ !وطلعي بسرعة
طلعت وانا لابسة وحدة من دشاديشي القديمة
باوعلي من فوك ليجوه وصاح عليه صوت خوفني: انتي شلابسة؟ !..شنو هاي الملابس؟ !..عوفيها ولبسي غيرها بسرعة
گلت وانا ابلع ريگي: ماعندي غيرهن ..ما اشتريت
نفخ حيل ..وراح للكنتور ماكو لأن هدومي بعدهن بالجنطة
صاح: وين هاي الـزبايل مالتج
گلت: اهدومي بالجنطة
فتحها وطلعهن گلهن وصاح: هذن كلهن للزبل ولا وحدة تضل عندج واني هسة راح اتصل بمحل ويجيبون غيرهن
گلت: بس انا احبهن وماريد اذبهن
صاح صوت اعلى خوفني بس سيطرت على دموعي گوة وگال: اني شكلت؟ ..هاي مو ملابس هذن للزبل والملابس الي راح اجيبهن هسة تلبسينهن وانتي ساكتة مفهوووم؟ !
وهسة اني طالع لشغلي من ارجع اريد اشوفج لابسة شيء بيه خير وماكو زبايل بالغرفة
طلع وانا گعدت الملم هدومي وانضف وبالي يم اهلي هسة همة يفكرون بيه لو نسوني ..نسوو بتهم هنادي الي صارت وحدها بديرة غرب؟ !
**
هيثم: من طلعت من السجن وسمعت بهنادي منطيها لذاك الحقير وانا لا متهني ولا مرتاحلي بال
دورت بكل مكان واي شغلة جنت مستعد اوافق عليها لأن اختي طاحت بهاي الورطة بسببي وانا لازم اسوي كلشي عالمود ارجعها
ابوي استمر بالبنيان وامي رجعت تخبز وفهد گدر يحصله شغلة حارس مال مدرسة للبتدائية لأن الحارس مالهم مات الله يرحمه
حمدنا الله وشكرنا وانا ما خليت واحد مارحتله عالمود يشغلني
وجيرانه الأستاذ وائل عرف بحقارة ليث ودرى بجذبة الفلوس وقرر يساعدنا ووافق يشغلني عندة كلش تشكرت منه ووعدته ماراح يشوف مني اي تقصير بس انا محتاج الشغل عالمود اختي
ومن شرحتله هو صدگني عالسريع واختارني اصير جوة ايد السكرتير مالته حتى يعلمني وگال راح يدخلني بدورة سياقه حتى اذا تعلمت راح يخليني اصير السايق ماله
حمدنا الله على هالتوفيق واندعينا ما تطول السالفة حتى نرجع هنودة بسرعة
**
ليث: طلعت للشغل من وقت بس حتى ماما وبابا ما يسألوني اكثر ويتحققون وياي وبنفس الوقت حتى ابعد عنها
كولشي بيها مختلف وجاي تعصبني واني احاول ما انطي اهلي فرصة حتى يستهزئون بيها لو يقللون منها ..بس هي تتصرف مثل الجهال ودمعتها بطرف عينها لازم اخليها تبدل هالعادة
وصيتلها على ملابس حلوة حتى تطلع بالشكل الي يليق بيها وماتسمع كلام يجرحها
اني ماعرف ليش مهتم بس من يوم الي صارت بيه زوجتي حسيتها مهمة عندي وراحتها مسؤوليتي
دخل علي سامي وگال: استاذ الأجتماع جاهز انبلش؟
گلت: اي سامي راح اجي بعدك
وتذكرت مروان شكد صارلي ما شايفة لازم اتصل بيه بعد الأجتماع واحاول اراضيه لأن ما اگدر على زعله
**
هنادي: خلصت كلشي وضليت گاعدة بالغرفة حسيت بالملل ردت انزل جوة وخفت ..يمكن ما يقبل هو لو اهلها يضربوني ويطردوني ..ضليت افتر بالغرفة حسيت بوجع وگعدت عالسريع
ياربي شسوه بيه هذا الوحش ..امي گالت الوجع شوية ويروح ..بس انا راح يخلص اليوم وماراح شكد خايفة ..ياريت امي يمي
وية ما جنت گاعدة وانفتح الباب
انا گمت بسرعة حسبالي هو ..بس طلعت هاي المراة الي فتحت النا الباب جابتلي صينية الأكل
حطتها وگالت: هذا غداج يا ..
گتلها: هنادي ..اسمي هنادي
أشرت براسها وگالت: أكلي يا مدام هنادي الأستاذ وصاني بيج قبل ليطلع
وانتي مانزلتي جوة صعدته الج
گلت: مشكورة ..تعبتج وياي
ضحكت وگالت: العفو يا مدام بس هاي شغلتي لا تشكريني
طلعت وانا جنت كلش جوعانة والأكل مبين طيب گعدت وگليت
**
لبنى: أكول ماما شنو هاي مرت اخوي المزعمة ماراح تنزل وتراوينه وجها لو هو جايبها تحفية لغرفته
اسراء: لبنى أسكتي ..عيب هالكلام ..وبعدين انتي مالج دخل بشنو يسوي اخوج هو اعرف بمصلحته بس احنة نريد نتأكد منها وبس
سامر: اني متأكد ليث غلطان ويه هاي البنية بس ميريد يكوللنه لهلسبب جاي يتهرب وميجاوب على اسألتنه ..بس مستحيل اعوفه بدون ما اتأكد بنفسي شنو قصة هالبنت وليش ازوجها هيج سكاتي وبسرعة
شوية ودگ التلفون
الخدامة: اهلا وسهلا تفضلوا ..اي المدام موجودة حاضر ..
:مدام هذا اتصال من طرف اهلج
گامت اسراء وخذت التلفون: يا هلا بأخوي حبيبي شلونكم شخباركم ..يا عمري احنة تمام الحمدلله
صدوك ..شوكت؟ !
باجر؟ !..يا اهلآ وسهلآ خوية تشرفونه والله
مع السلامة ..راح ننتضركم
سامر: منو هذا عيني؟ !
اسراء: اخوي احمد يريد يجي النه هو وعائلته باجر
سامر: اهلآ وسهلآ بيهم مشتاقيلهم والله
لبنى: بابا ، ماما ..شنو نسيتوا وهاي الفوگ من يشوفونها شراح يحجون ..خالنه الوحيد وما عزمنا على عرس ليث ..
اسراء: اي والله صدوك شلون راحت هالقصة عن بالي هسة شلون بله ..اني شحجي وشگول لأخوية من يسألني؟ !
بيش ورطتنا يا ليث
سامر: اهدي يا اسراء همة أول وتالي الكل راح يعرف ماراح تضل السالفة مضمومة بس المشكلة شنبرر وشنو السبب الي نقنعهم بي ؟!
اندگ الباب ودخل الحارس جايب جنطتين كبار خلاهن عد الخدامة وگال: هالغراض لزوجة الأستاذ ليث هو موصي عليها
باوعت لبنى لأمها وابوها وراحت للجنط عالسريع وگالت: فتحيهن بله خن اشوف
اسراء: لبنى حبيبتي الغراض لزوجة اخوج انتي ما سمعتي ..مالج دخل صعديهن الها ام وسام
الخدامة: حاضر مدام
لبنى ضاجت وصعدت لغرفتها عالسريع
**
هنادي :صار العصر وهو ماكو وانا كلش مليت اهله محد اجالي منهم بس هاي المراة دخلت عليه مرتين جابت الأكل وخذته ومن سألتها عنه گالت بليل يلا يجي
رحت للشباك كلش جبير وحلو ميلت البردات وضليت اباوع من فوگ ..شفت حديقتهم شكد حلوة من فوك ذكرتني بحديقة بابا الصغيرة ودمعن عيوني
شوية واندگ الباب ودخلت المراة نفسها ودخلت جنطتين وياها وگالت: مدام هنادي هاي الغراض الأستاذ دازهن الج
شكرتها وراحت
اجيت تقربت عليهن فتحت الأولى جان بيها فساتين وتراكات وبنطلونات وقمصان بس ما لگيت ولا دشداشه وحدة
فتحت الثانية طلعت بيها ملابس. داخلية وملابس نوم اشكال وألوان
ووياهن علاگة صغيرة بيها ثلث احذية كل واحد من نوع
فتحتهن كلهن اشكالهن تخزي شلون تگدر وحدة تلبس هيج ملابس هذول أكيد غلطانين زين انا شلبس هسة وماكو ولا دشداشة وحدة وملابسي ضميتهن
لگيتلي فكرة اطلع منهن دشداشة وحدة وارجع اضم البقية هو ماراح يعرف
كمت خليت هاي الملابس بتعاليك وحطيتهن بالكنتور ومن اخلص راح ابدل
**
ليث: اليوم الشغل جان كولش متعب ومروان هماتين ضوجني لأن مارد عليه خله امه تحجي وياي اني متأكدة هو بعدة زعلان مني
دخلت لگيت ماما وبابا منتضريني بالصالة سلمت عليهم وردت اصعد لغرفتي مااعرف بس حسيت نفسي مشتاقلها
گال بابا: ليث تعال أگعد عدنا كلام وياك
گلت: بس اني تعبان بابا نگدر انأجلها بس اخذلي حمام سريع واغير ملابسي وارجع الكم؟
ماما: لا ليث ..احنة لازم نحجي أول وبعدين روح سوي هذن كولهن
گعدت وگلت: اي تفضلوا اني اسمعكم
بابا: ليث نريد نعرف بالظبط هاي البنت منين وليش تزوجتها ولا تحاول تتهرب من الجواب لأن اني قررت اعزم قرايبنه حتى يعرفون قبل لا يسمعون من غيرنا وتصير مشكلة
گلت: وليش تصير مشكلة يا بابا همة اذا واحد من ولدهم قرر يزوج حيزوج بكيفة محد اله دخل بيه شمعنى اني لمن ازوجت لازم الكل يدخل
صاحت ماما: لأن اسبابك مقنعتنه اصلآ هاي اذا انته انطيت سبب ..بس انته ساكت دحجي گول ..شنو انته غلطت ويه البنية وصلحت غلطتك بالزواج لو سبب ثاني فهمنه ليش تعوفنه هيجي
اني ضجت من الكلام وگلت: ماما بابا اسمعوني زين البنية شريفة واني ما غلطان وياها اطمنوا بس سبب زواجي منها اخوها
همة استغربوا وباوعوا الي
گلت: اي اخوها خذه مني فلوس ومارجعهن الي لأن همة حالتهم فقيرة واني ساومتهم على بتهم ابمكانهن وهمة وافقوا بس اني عاقد عليها عد شيخ يعني هي مرتي
گال بابا : شكد هو المبلغ وليش انته اتساوم الناس على بتهم ..شلون تقبلها يعني هسة اذا اجة واحد على لبنى بنفس السبب انته جنت حتوافق؟ !
اكيد لا انزين شلون انته تسوي هيج؟ !
ماما: استغفرالله ..واحنة ضلمنه البنية وگلنه عليها وحدة بت شارع وهيج طلعت القصة يعني انته غصبتها هي واهلها ..
لك شلون هيج تسوي ليث؟ ! معقولة انته ابني العاقل والرزن وعليك الأعتماد هيج يطلع منك ..مداصدك
گمت وگلت: بابا ماما رجائآ هسة من عرفتوا السبب لا تسألوني بعد ..ولا تگلولي ليش وشلون ..لأن اني نفسي ما اعرف السبب ..عن أذنكم
صاحت امي: وخالك احمد جاي باجر شنو نگله؟ ! انگله ابن اختك طلع واحد ميستحي ولا يخاف الله وراح هدد الناس عالمود ينطونه بتهم؟ !
ابنه ليث الي الكل تمدح بيه يطلع واحد حقير
ألتفتت وگلت: ماما رجائآ كافي ..وخالي اني ححجي وياه وافهمه انتو لا تتدخلون بس سدوا هالموضوع اهلها وافقوا وهي مرتي هسة وانتهى بعد ماكو داعي لهلكلام
عفتهم وصعدت
فتحت الباب دخلت ولگيتها ...
هنادي: خلصت من ترتيب الملابس كلهن ومن ارتاحيت وشفت ماعندي شيء
فتحت الكنتور وضليت أباوع بالملابس وأگلب بيهن گلت بله خل اجرب وحدة بس عالسريع قبل لا يرجع هو
اختاريت واحد لونه ابيض بيه سيور مثل الأتك وبيه وردة صفرة من فوگ وصل لركبتي ووياه عباية خفيفة من تور صفرة بلون الورده
فتحت شعري وباوعتله طلع حلو ..بس مال وحدة تلبسه وهي بحدها بالغرفة
انتبهت لرگبتي تعجبت هاي شصاير بيها صايرة كلها تگع زرك وحمر
گلت: جلب الجلبك شمسوي بيه ..اذا جوعان روح أكل ..ليش هيج
وفزيت على صوته وهو يگول: هاي ألمن؟ !!
