رواية سداد وبنت الفصل العاشر بقلم الزهيريه
أشاعه يؤلفها الحاقد
وينشرها الأحمق
ويصدقها الغبي
حاول الا تكون من هؤلاء
ألق/ مرات بعز ما احنه مقهورين والقهر ماكل گلوبنه يطلع شخص بحياتك يرفه عن نفسك شويه ويشجعك آنه تقاوم مو بس تقاوم الشخص الظلمك تقاوم حتى نفسك لا تضعف واني بموقفي إي ضعف من جانبي معناها اخسر حياتي ومن شفت عمه بسمه ما اگول شنو چان شعوري كل كلمات العالم مآل الاشتياق ما توفي حق شعوري بذاك الوقت ظلينه نسولف بحيث مر هواي وقت وهي بس تسمعني ومن وصلت شلون الناس تصدق علينه وجيبلنه اللگمه ظلت تبچي وحضنتني
بسمه / الله يكون بعونچ شنو تتحملين اني واخوچ وابوچ يا ربي أنت على راس كل ظالم هاي البنيه تعينها على هذا العم الضالم وانت خير معين بس اگلچ ألق أكو شي معجبني وهو نزار شلون راح يبيع البيت
ألق/ ليش عمه متعجبه هسه يبيعه ويشمرنه كل واحد بديره يعني أنتي شايفته شلون حريص علينه
بسمه/ لا حبيبتي مو شغلة حرص عليكم بس البيت والأملاك كلها بسم آبو الله يرحمه يعني احنه كلنه ورثه بس عماتچ لا بس رياض ونزار وزهير يورثون جدچ يعني زهير الله يرحمه اني اخذ ثمن من حصته مو كلها لأن احنه ما عدنه أطفال ونزار ياخذ حصته كلها لان هو موجود بالحياة المشكله برياض خطيه راح تروح حصته لنزار ويضيعها وانتوا تطلعون ولا فلس زين ادري ما يفكر ويگول ذوله منو الهم
ألق/ عمه ليش حصتنه تروح لعمي نزار وما ناخذها احنه
بسمه/ لان هو يعتبر بالنسبة للدولة متخلف عقلياً لهذا غير مسوؤل عن تصرفاته ولازم وصي عليه والوصي مال ابوچ عمچ نزار وخصوصًا انه من حظ عمچ نزار القوي انه ابوچ عند ذريه بس انتي بعدچ ما بالغه السن القانوني بالعراق هو 18 سنه لهذا هسه عمچ نزار وصي عليچ وعلى ابوچ واخوچ والدوله تنطي الوصايه المطلقه عليكم لان حتى اخوچ منغولي يعني مو بعقله
ألق/ يعني من أصير عمري 18 سنه أصير وصيه على أبويه وأخويه وحچيت لعمه بسمه شلون يريد ينطيني لواحد ما اعرفه منو
بسمه/ اي بعد ما يفلسكم ويگدر يزوجچ لان هو الوصي عليكم هسه لو يقبل ينطيچ إلي چان اخذتچ يمي لما الله يكتبلچ نصيب ويه واحد ابن أوادم بس نزار ما يقبل ينطيچ أبد لان مصلحچي ويصور كل الناس مصلحچيه مثله
ألق/ بعدها راحت عمه بسمه واني الأفكار تضارب براسي يعني شلون عمي ياخذ فلوسنه ويشمرنه شمرت الچلب بالشارع بس شسوي المن أروح شلون شسوي
وبعدها بيومين بالليل حدود الساعه 8 اجى عمي نزار للغرفة وفتح الباب گبل اني فزيت والله عبالي راح يضربنه
نزار/ گومي جبت شربت خلي بثلاث گلاصات وجيبي للضيوف بسرعة
ألق/ ضليت متفاجئة هاي آول مره عمي نزار يصيح عليه حتى اضيف واحد گمت أروح أسوي الگال عليه أخاف لا يجي يضربني رحت للمطبخ شفت بطل شربت گلت بگلبي عسى كون اخليك سم وأموتك وأخلص منك وأخلص البشريه كلها من شرك گولوا خليتهن بگلاصات وأخذت الصينيه ورحت دگيت باب الصاله صاح عمي دخلي ألق وآني سلمت آمري لله ودخلت وما شفت آحد غير عمي نزار واكو واحد تقريباً
يطلع عمره بالخمسينات ومربي لحية وتقريبًا ما مزين لحيته صار سنوات لان واصله لصدره ولابس مناظر چعوب وحتى شكله مشبوه يصيح بالوجه بيني وبين نفسي اگول عمي نزار قابل يصادق دكاتره غير اصدقائه على شاكلته بس الشهاده لله جسمه رياضي وبعدين تعجبت اذا همه بس أثنين الگلاص الثالث مال الشربت المن
نزار/ تعالي ألق قدمي الشربت ابو إسكندر
ألق/ من گال عمي نزار آبو اسكندر ردت أضحك صدگ شر البلية ما يضحك وينه وين اسم إسكندر والله يا الله المهم انطيته العصير أخذه مني وهو يدقق بوجهي وعمي نزار هم اخذ گلاص وآني ردت اعوف الصينيه يمهم على الطبله وأطلع بس حكم القوي
نزار / ألق تعالي اگعدي مقابيلنه
ألق/ گعدت وابو اسكندر يگول خليها شوفني لأن النظره الشرعية من حقها اني بالبداية ما فهمت شي شنو نظره شرعية لآن حمدلله نشأت في بيت عبالك من يهود خيبر لا يصلون ولا يصومون وما طول الوقت حتى عمي نزار گلي روحي ألق لغرفتچ وآني هم عبالك اجاني إفراج بسرعة گمت وبعدها مر يومي عادي ولليل وحدود ساعة تسعة إجى عمي نزار وهم گبل يدخل للغرفة بدون ما يدگ الباب عبالك كونه من تدخل اي بيت بدون ما تدگ الباب
نزار / ألق بسرعة بدلي لاخوچ وجيبي إلي بصاله اني عبالي مثلي من گلي تعالي لصالة وشوفني ذاك أبو اسكندر لهذا بدلت لأخويه واخذته لصالة بس ما لگيت آحد بس عمي نزار
نزار/ جمعي ملابسه وخليهن بعلاگه
ألق/ ليش عمو وين راح تاخذ أخويه
نزار/ على بيت اهل امچ وبعد ما يرجع هنا بسرعه يله
ألق/ حضنته لأخويه وگتله عمو الله يخليك بقي يمي وين ماخذه والله ما اگدر بدونه
نزار/ هو إنتي نفسچ ما راح تبقين هنا بعد يظل يمچ شلون
ألق/ واجى عمي سحب أخويه مني قوي واخذه سحل للگراج وأخويه لكون دائماً عمي يضربه يخاف منه وهو يسحل بي گام يعيط واني اعيط واگله وين ماخذه يا ما عندك رحمه عوفه وعمي فتح باب الرئيسي وطلعه لاخويه وصله لسياره واني مچلبه بي ويريد عمي يصعده بس أخويه گعد بالگاع ويعيط وعصر أيده قوي وگومه ودخله لسياره وقفل البوب وألي اجى جرني من أيدي وفتح الباب ودفعني قوي بحيث من قوة الدفعه وگعت بنص الگراج
نزار/ أمشي دخلي جوه والله اجي أخلص عليچ صوت ما اسمع الچ يله بسرعة
ألق/ وعمي سد الباب وراح دخلت للبيت شفت نضال لصالة واگفه يم الشباك يعني شافت كل شي صار
نضال/ حبيبتي ماكو داعي تبچين دموع باچر تبچين دم ما بقى شي كلها حسبتها أيام وبعد واحد ما يشوف الثاني لان كل واحد راح يكون بديره
الق / ليش عمه انتي وين راح تروحين واني وين راح أروح وأبويه وين يروح
نضال/ اني حمدلله شگد خططت حتى كل شي يصير إلي بس كل شي ما حصلت تاليتي راح ارجع لأهلي صفر اليدين ويايه طفل منغولي اي يا نضال انت تريدين والله يريد والله فعال لما يريد
ألق/ عمه انتي شنو تحچين زين انتي ترجعين لاهلچ اني وين راح اروح وأبويه وين يروح
نضال/ حبيبتي إنتي راح يبيعچ نزار لابو اسكندر وابوچ هسه يشوفله صرفه قابل يعصب على نزار
الق / صدگ صعقتني من گالت يبيعچ عمه نضال الله عليچ تحچين صدگ يبيعني شنو
نضال/ والله شبيچ الأملاك كلها باعها نزار وحولها دفاتر دولارات لان عمچ چان بحوزته أطنان مال كرستال ماده مخدره بس عمچ بيومها رئيسه گله هذا المكان لا تخلي بي لإن مكان مكشوف بالنسبه للدولة لا يسوون مداهمه على المكان ويصادرون البضاعة بس نزار صار براسهم ابو التخطيط وخله البضاعة بنفس المكان على اساس الدوله ما راح تجي تفتش مكان داهموا أكثر من مره وره ساعه من منزلين البضاعة اجوي قوه من مكافحة المخدرات وقوه من الاتحاديه وقوه من سوات وطوقوا المكان وأخذوا البضاعة كلها وشكو واحد چان هناك بذاك المكان أخذوا بستثناء عمچ نزار لآن أصلًا ما چان موجود بالمكان وذوله الچان يشتغل وياهم حبيبتي جماعات بالدوله ماكو واحد يگدر يگلهم لا لهذا شفتي من اجوي أخذوا نزار مو عبالچ يريدون يقتلوا لا ما يقتلوا لان اذا قتلوا شيحصلون بس جبروا يدفع ثمن البضاعة ألي اخذتها الدوله
ألق/ أي واني شنو ذنبي
نضال/ حبيبتي هذا عمچ واني ويا تتصافون اني شلي غرض بيكم
ألق/ ظليت افور واغلي يعني شنو ياخذ فلوسنه ويبيعني شسوي يا ربي وألى نص الليل رجع عمي نزار ويا جنطه وگعد بالصالة وفتح الجنطه وبقى يحسب بهواي فلوس بس مو عراقي كله دولار وهنا اجتني الفكره اخذ هاي الفلوس وانهزم وشيسوي خلي يسوي ورايه
سداد/ طبعًا حالي حال اي رجال بحكم مهنتي الخطره اذب روحي بالنار في سبيل أعيش عائلتي احسن عيشه لان ما عندي أغلى من زوجتي وأطفالي والله الخطوره إلي اني بيها كلها تهون عندي من أشوف زوجتي وأطفالي مرتاحين وما ناقصهم شي وبالفتره الأخيره صرت هواي أقدم تنازلات لزوجتي في سبيل المركب يمشي ومو عيب اذا الرجل يدلل مرته بالعكس قمة الرجوله بنظري أنه الرجل يدلل زوجته ويخليها أميره في بيتها بس مع كل الآسف انه مجتمعنه ينظر لرجل من يدلل مرته على آنه خروف ويخاف من زوجته ما أعرف ليش ما يسمون الأشياء بمسمياتها
ومن رجعت للبيت وقررت أقدم تنازل وشنو تطلب آريا انطيها وحليت مشكلتي ويه آريا وارتاحيت نفسياً من قبلت آريا تسامحني ورحت حتى أشوف أطفالي ما صدمني غير منظر روجيدا چانت مو طبيعيه بحيث السواد داير ما داير عيوني ووجهه اصفر وتگول الوحش الوحش بحيث تخبلت عليها احچي وياها ما تاخذ وتنطي بالحچي أبد وحتى كل تركيز ما عدها حتى ما تباوع عليه صحت على آريا وهي اجتي
سداد/ ليش روجيدا هيچ شبيها احچي
اريا/ ما أعرف صار اسبوعين هذا وضعها وحاولت كل المحاولات وياها بس شسوي كل شي ما فاد
سداد/ وليش ما اتصلتي بيه وانطتيني خبر ليش ساكته على وضعها
آريا/ انت عندك دوام لهذا ما أتصلت بيك ما أريد اقلقك
سداد/ طز بالدوام المهم صحة بنتي
وبعدها اتصلت على صديقي اوزجان وشرحتله الحاله مال بنتي
اوزجان/ والله سداد اني هيچ حالات ما أفهم بيها بس لو توديها على دكتور نفسي لو دكتور مخ وأعصاب ماكو غير حل وهسه ارسلك دكتور نفسي كلها تحلف براسه
سداد/ إلف رحمه على والديك خف أيدك أريد اوديها اله
وبالفعل ما تأخر عليه اوزجان ورسلي العنوان وبي رقم موبايل ومن إتصلت حجزت على نفس اليوم بس موعدنه ساعة 8 ونص بالليل وظليت مخلي روجيدا بحضني وگاعد أنتظر دقيقة دقيقة تمر وأحس الثانيه بسنه بس أنتبهت آنه آريا أحسها دى تمثل انه خايفه على روجيدا وما أحسها خايفه عليها لان لو صدگ تخاف عليها چان بنفس الوقت إتصلت بيه وبلغتني شلون ضلت ساكته هذا الوقت كله المهم اني في ذلك الوقت ما ركزت عليها اهتمامي كله متركز على روجيدا
الى ما صار وقت موعد الدكتور بس بدلت أمها إلها وأخذتها ورحت ومن وصلت ما مر هواي على وصولي حتى صاحوا بسمنه ودخلنه وشرحت لدكتور وضع روجيدا وظل الدكتور يحچي وياها بس نفس الوضع مالتها بعدها كتبلي الدكتور على مفراس للدماغ
وأخذها مني وحتى القراصه بشعرها حديد ما يريدون لكون رنين مغناطيسي والدكتور گلي اطلع بس اني ما قبلت اعوفها ويه جهاز ويه جهاز المغناطيسي وحدها وبقيت يمها الى كملوا أشعه للدماغ
وطلعوها وبعد ربع ساعة طلعت النتيجه ورجعت بيها على الدكتور شاف الأشعة
الدكتور/ مثل ما فكرت انه البنيه دماغها سليم بس مصدومه من شنو وخلاها تردد كلمة الوحش لهذا اني كل شي ما راح انطيها لان سليمه لهذا راح أكتب الها مقويات وفيتامينات لا أكثر بس من هسه اگلك ترى العلاج ترى يطول يعني مو عبالك يوم يومين لا يمكن يطول أشهر او سنين ما نعرف حسب استجابتها
سداد/ورجعتها للبيت وآني طول هاي الأيام مال إجازتي والله كله ويه روجيدا وحتى تنام بحضني وغرفتي ما دخلتها أبد وانتهت إجازتي بس شنو صارت نوع ما أفضل صح من احچي وياها تباوع بوجهي بس بنظرات تايهه بس أفضل من قبل أيام وصار موعد أروح لدوامي وآني طول اجازتي ما خليت آريا تتقرب عليها كله آني اخدمها أكلها علاجها نومتها بحضني ورحت للدوام واني امشي وأحلف آريا انه تعوف كل شي وتعتني بيها
شگد ردت أبعد عن بيتي شبح الموت بس القدر چان اسرع مني
واني بيوم من دى التحق بوظيفتي احس گلبي نغزني والله روحي مخنوگ وروحي تلوب وصلت للباب وأبني ايليا صاح بابا ذبيت جنطتي بالگاع ورجعت عليه يم باب المطبخ شلته لفوگ وبسته من حلگه وظليت ابوس بخدوده ما چنت اعرف انه هاي آخر مره اشوفه بيها وأنزله بالگاع و 3 مرات اوصل للباب ومن يصيح عليه أرجع عليه وبعدها سلمته بيد آريا هاي الايد الي أثق بيها ثقه عميه وشغلت سيارتي ورحت لدوامي وطول ما أني بالدوام كل ساعتين أتصل على آريا واطمئن على الأطفال وبعد 5 أيام من التحاقي وتحديدًا ساعه ب 3 بالليل إتصلت بيه
آريا تعيط وتبچي وتگلي/ تعال الحگلي سداد روجيدا خنگت أيليا
سداد/ أريد أفهم شنو خنگته يعني شنو مات لا أنوب نسد الخط أتصل عليها ما تجاوب بحيث ظليت اعيط واصيح وچان ويايه بهاي الوجبه كوجر صديقي
كوجر / شبيك سداد صاير شي
سداد/ وآني ارجف احس راح يغمى عليه اريد رجلي صار بيهن شلل وكوجر أتصل على المدير وبلغه انه ما نعرف شنو صاير في بيت سداد وراح نطلع اني وسداد لبيته نشوف شنو صاير والمدير گال لكوجر أخذوا وياكم قوه خاف تحتاجوها وجرني كوجر وصاح على 10 شباب منتسبين اجوي ويانه بسيارتهم بس شنو اني حلگي يابس واحس الدنيا غوشت عندي وكل شي ما دى أشوف گدامي ارجف حتى سيارتي عفتها بالدوام واجيت بسيارة كوجر وما وصلت لبيتي الا بطلعان الروح ومن وصلت تخبلت شفت سيارات مال شرطه محاوطه المكان وما يقبلون احد يفوت وصوت عياط آريا لشارع وأصل ومن منعونه نفوت
كوجر طلع هويته وگال لشرطي هذا بيته وهاي هنا زوجته واطفاله ومن دخلت رجلي يرجفن وگلبي احسه راح يطلع من مكانه اريد بس أعرف شنو الصار
دخلت والعرفته من الشرطة انه بنتي الچبيره خنگت أخوها الى ما مات بيدها تخبلت أريد اعرف بنتي وين الشرطي گال الولد الميت أخذوا للمستشفى والبنية بمركز الشرطة احس خلاص انهاريت شنو هاي الفاجعه ما انتبهت على كل شي بحيث كلنه توجهنه لمركز الشرطة ومن دخلنه حمدلله سايب الضابط الخفر موقع على اوراق القضيه وما أعرف وين راح ومن ظل يصيح كوجر على هذا مو وضع شنو مركز سايب ما بي احد نريد واحد نحچي ويا لو نشتكي عليكم بحكومة كردستان انه انتوا ما تتعاونون ويانه لكون احنه أكراد واكو جماعة هم جايين يشتكون على مود بنيه مخطوفه ما اعرف مهزومه وهم چانوا يصيحون على ضابط الخفر وين وأصواتهم عاليه وأسلحتهم بيدهم
واكو شرطي ثاني اجى وگال / بلا زحمه اصواتكم لان اليوم خفارة (عقيد فرقد) وما صار نص ساعه من نام وقبل ما يدخل ينام گال اذا يصير انقلاب بالحكومه العراقيه لا تگعدوني
