رواية ذاري النجوم الفصل الحادي عشر بقلم زهراء السراي
وَكُلُّ مُؤذِي سَيُؤذَى إنَّهُ قَدرٌ
يَجرِي عَلَى حِكمةٍ لِله في النَّاسِ
مَن نَاوَلَ ٱلسُمَّ في كأسٍ مُخَادِعةٍ
يَومًا سَيَشربُ نَفس ٱلسُمِ وَالكَأسِ
:
:
عذبة
✥━━━༺✦༻━━━✥
هوسة البنيات والصفگة
وفرحة الجهال وريحانة
بينتاهم تدبچ وتصفگ
وانا اعاينلها كبرانة بعد
بيتي اسولف وه نعمة
عن العرس والحنة
ليغاد سمعت صوووت عالي
وصياح وصراخ الزلام والنسوان
طلعنا كلنا نركض
طلعت انا بالباب واسمع
الصوت واحد يصيح
-ياااااااابويه ولكم ماااااات وحيدي موووو
صحت للجهال واجاني واحد
موذح وطاير
-شني خالة شني منهو المات
طاحت دموعي وانا اسمع
جوابه
-خالة هذا محمد ابن ستار ابن بيت الملا
غرگ مايدرون بي ولگو مطوف
ضربت على وجهي ونشغت وبچيت
- خيييييه مزنة اجاچ وليدچ
عله صوت الزلام وصوت ابو يصرخ
-شنهييييييي غرگان هسه گلت
لأمه ماتخلي يطلع خاف يسبح بالشط
الزلم تستغفر والهوسة گامت
اعاين وعيوني مابطلت دمع
وانا اشوف ستار يفوت والزلام
وراه وهو شايله بين ايدي
ذبلان بعد روحي وصاير وجهه
ازرگ وادي طايحات منا ومنا
دشيت للبيت وگعدت بالحجرة مال
البنات وانا اصيح نعمة
-لا تهبطين بتچ وكافي كفن الهوسة
زحمة من الناس
-خية خاف تنچبس
-يمعودة گولي ياالله شنهي السالفة
للظهر گامت الهوسة وطگ الچيلات
وصاحتلي نعمة
-اخذو للنجف نمشي للنسوان لخاطر
خالتي يظل ابن بتها
-مو هسه
-لا زحمة من بنات الملا هن يواصلني
-خوش بس البس
گمت لبست عباتي وطلعت وياها
وبكل نگلة جدم انگل رجلي تجي
حچايات مزنة براسي وهي تبچي وتون على
ابنها
وصلنا حوشهم وشفت النسوان كلها
من السلف تارسات الحوش
اعاين لجبار گاعد وبيده هدم
صغير وبنص الهوسة يبچي ويون
حگه جبار عقله عقل جاهل صغير
وهو ومحمد سوه يلعبون ويفترون
طبينا الربعة واصوات الصريخ گايمة
اعاين فطيم واخواتها ومرت الملا يلطمن
بحيل صدرهن ادور بعيوني
وشفت مرت ستار
گاعدة مسنودة عالحايط تبچي
بس بهداي ومغطية وجهها
والنسوان مگابلتها
اااااااخ يالدنيا هاي تلاگي بأبن مزنة
صرنا كبال فطيم وهي صرخت
-راااااااااح وحيد البيت
ردت امها
-انگطعت تارثه الملا بموتتك يابعد روحي
گامت النسوان تعدد وتلطم وانا
اتخايل مزنة بيناتهن بس فرحانة
اهجس روحي تسودنت
طلعت بره شويه ورديت وانا ابچي
تخايلتلي لأن وليدها راحلها
بليلتها من سولفتلي
گالت
-مرة صحتله اعاين بوجهه
يشبهني اگول بلكي يفتهم
ويعرفني بس هو فرخ جاهل مايعرف
ونوبات اوگف وره البيت اشوفه جاي بكشخته
من المدارس جايبه ابو ويسولف
للجهال عالولاية وحچاية والاخرى يگلهم
امي سوت هيچ امي گالت هيچ
بساعتها اريد اكسر الحياطين واگله
انا امك الصدك
ذيچ ناهدة باگتك مني بوگ
وحرمني ابوك الظالم منك بس مااگدر
ماراح احصل بس چلمة مسودنة
مثل من اگل لأبوي اريده
يگلي مو ابنچ اگله
ابني وابن ستار يگلي انتِ مسودنة
وهذا ابنچ وابن جبار وتجيني ساعة
من گد مايچذبوني انا اصدگ
هذا صدگ ابني وابن جبار السلف كله
يدري ابن جبار وعمه ومرت عمه ربوه
مثل أبنهم
رديت للربعة وهن حمن باللطم
وناهدة مثل الفاگدلة طوير دجاج
تبچي بسكوت
حگها راحت امه الصدگ وهو لحگها
من هدن شويه اخذنا من خاطرهن
وگامت فطيم باوستني
عاينتلي وبچت
-عمة ستار راح يموت وراه
نزلت راسي وجاوبتها
-عمة جبار الراح يموت طلعولة خطيه
يلطم بالحوش
بلعت ريگها وگامت جرتني وياها
من ايدي اخذتني وره البيت
عدهم حوش ثاني
-عذبة شتگولين
-مااگول خيه الله يعين ستار
وحيده راح
ومرت ابو گاعدة مثل الخطار
هاي عود هي الربته
صوفر وجها
-سركم ببير فطيم اذا صاحبة
السر ماتت وابنها لحگها ان چان عرفت
الناس لو ماعرفت ماكو فايدة
-ننفضح بالسلف
-خية صار سنتين ادري مافضحكتم
-لا حشاچ
التفتت امشي صاحتلي
-انا ماراضية عالسوو
-بس عاونتيهم وظليتي ساكتة
ركضتلي
-وروح محمد چنت ابچي وياها
من تبچي
عذبة انا هم انكسر گلبي بهالمصيبة
كاظم ابن خالتچ چان هاويني وانا هاويته
ولوما المصيبة الصارت چان عرسنا وهسه
جهالي بطولي
-كل شي خلص خيه
الاخذه اخوچ ظلم ربنا رده
بالعدل لمزنة وابنها ولحگها حتى يبرد
گلبها
-حوبتها لحگتنا كلنا ابوي خاست
ايده من ضربته سلية
وكلما يگوم ويگعد يگول حوبة
مزنة وهاي الايد الخلتها تبصم عالطلاگ
الله عاقبني وراح تصير سبب
موتي
-حاشى ربنا بس اخيتي ماتت من القهر
على وليدها
بچت فطيم وجرت ايدي على بطنها
تلمستها مثل الحصرة يابسة
-هاي مچان مگوار ابوي
من غافلتهم مرة واخذت الوليد ومشيت
بي لأن ادري بيها توگف عالروازين
تعاين گلت اشوفة الها ولحگني ابوي
وطگني بالمگوار ربتلي علة حدر ضلعي وصارت
مثل الحصرة هاكبرها
لا عدالچ انا سكتت وروح محمد
بكل شغلة تصير اگلهم حوبتها
وهي حاللتني مرة من شفتها
-شيفيد الحچي فطوم ولچ حسرتها هاگدها
-كتلت روحها انا ادري
-الله يرحمها
-ستار سكن الشط من ماتت
ليلية يشعل نار ويگابل الشط
يگول انا شخسران لو مخليها
بالولاية بغير بيت ومخليها مخلفة
غير محمد ومسكت ابوي بمحمد
وهي تأمن ابنها يمي بس الصار صار
-اخوچ نذل فطيم حتى لو زعلتي
هزت راسها ومشينا هي طبت الربعة
وانا مشيت وعفتها وراي وطلعت
من الفاتحة كلها
ويومين وراها الناس
لازمة ستار وهو مناطر عالشط ينوح
على وحيده
وانسدت سالفة مزنة وصدگ مات
سرها وياها
بأيامهة الشيخ تعذر منهم
لأن سوو استخلاف بالبيت لأن جاهل صغير
حتى يعرس لصادق وسهامة
وبدت الناس تجيب وتحط
وسوباط العنب مال الشيوخ انترس
فراش وانا ودت علي الشيخة
تريدني اطبخ وصدگ لخاطر سهامة
رحت الطبخ مخلينه وره السوباط
محاوطين مكان بسياج طين بأيام الحصاد
يخلون بي المحصول هسه سوو للطبخ
كعدت انا والخادمات نشتغل بي
والشيخة كل ساع
تجي تشوف الطبخ
ومسوين مضيف ثاني
للخاطر النسوان هم گاعدات
والزلام گعدتهم بنص السوباط والخضار
زلامهم تستحي مني ماتطب اذا
تريد حاجة واليروح واليرد هاجس
لأن ماعدهم بنات بس الخادمات
مايستحي هو يجي بدشداشته
البيضة وچراويته
المبرومة برم وحزام السلاح
محزم بي حاسب روحه عريس الشيطااان
الچاي يمي كياتلي كبار
والگهوة يمهم بالمضايف النصبوها بالسوباط
انا مستورة ولافة عباتي بخفية
علي وچفيتي بيها
حافة مشرشبة لافتها طايحة على
عيوني واشتغل طب مرتين ثلاثة
وانا عادته مثل الهوا لا اشوفه ولا اعاينله
صاح
-نجممممممة
عاينتله نجمة الخادمة وصاحت
-ها جنابك
-روحي لمضيف الشيخة
النسوان يردنچ
طبت البت وانا اخدر بالچاي وايد
الثانية اگلب الجدورة وهو وياي
حنة الولد والدنيا گايمة
-جنابچ محتاجة شي
عاينتله ودرت
-عذبة
درت وجهي
-تريد شي لو جاي تفتر ترى
الشغل لفوگ راسي
البنات الخادمات يشتغلن خطيه مايعاينن
-ايييييي اريد اشوفچ
فكيت عيوني حيل ووگفت گباله
-هااااااااي انا شفتني ياالله ورانا شغل
صفن بوجهي
-عيونچ يصوبن الطيييير شيلي الشراشيب منهن
-انا ماميتة لا عالطير ولا غييييره
رديت للجدر اشيله ماگدرت صحتله
-تعال عاااااوني احسن ماواگف تفتش مثل المتصرف
مد ايده وياي وشلنا الجدر من الفوح
مال التمن ورديت حطيت التمن المبزول بمكانه
ودرت علي دهن الحر
-خلصتي
-بعد تسع جدورة
خاف اهل الولاية يتعببببون ومايحملون
الحر روح ووديلي واحد كلف يعاوني
جر ردانه حيييل وتگطعت الدگم
-ثمني حچاااااااااايتچ عذببببببببة
-مثمنتها ابن عميييي
بده وياي يوشل الجدور ونرد التمن
المبزول للجدور لمن خلصن كلهن
فرگعت دهن حر وهيل وبديت ادير
عليهن
عاينلي
-صبيلي ماعون گبل لا يهدر
التمن
استغفرت ربي من ذكرته
چان يغافلني ويروح للمطبخ واركض
وراه الگاه صاب التمن گبل لا يهدر واگله
مو زين على مصرانك
صبيتله وعاينلي
-رشيلي دهن حر هيل مااريد
حطيتله واطيته اله
لزم الماعون وعاينلي
-ماراح تگليلي موزين على مصرانك
-ماعليك شي عندك اليخاف عليك
اكو علوة طين گعد عليها ويعاين وانا
اشتغل
-عذبة راح نظل هيچ دوووم
-شبينه عين الله علينه انت
عندك جهال اثنين
وانا عندي بنيتي
كل واحد گاعد ببيته ومرتاح
شنظل بعد
-نظل بعاد ونحچي معلگ
-ايييييي بس حرامات
-شني
-بيناتنا دم واحد
طاحت اللگمة من ايده ووگف نكت الماعون
بالجدر وطلع
هيچ وووووين مااشوفة اذكره بالسوا
الناس تعاينلي عبالها عايشة
انا گلبي مات ويه ذاك الانحرم من شبابه
اااااخ ياجرحك ياخزعل للموت
نابت بنص گلبي
ظليت اشتغل ولشاش اللحم استوت والصواني
بعراويها الصفر المذهبة تسفطت
وگف بالباب صاحلي
-ياالله نصب
-أن شاء الله
انا اصب تمن ونجمة تحط اللحم اعاينلها
مردت اللحم مرد
-نجممممممة صبي التمن حبيبة وانا احط اللحم
-هدي اللحم لا تحترگين
وخرت عن دربه اكو تنكة
فارغة گلبها وگعد اعلى من الجدر
انا اثرد الخبز واطي الصينية
يرش المرگ الاصفر ارد احط التمن
وهو يحط اللحم تسطرت
الصواني وهو صاح
-نجمة صيحي جعفر ووحدة مو يجي وياه
احد
راحت شويه وتحمحم جعفر وطب منزل
راسه
وبده هو وهاجس يشيلون لحد ماخلصت حصة
الزلام كلها وديت بيده الخضرة
والماي والخبز ورد عليه
-عندچ شي بعد
-لا هسه اصب للنسوان وارد للبيت
درت وجهي واعاينله گابلني
يصب وياي كملت وهو وگف صاح لنجمة
-ودي الصواني ياالله
ودن الصواني وانا وكفت اكو سطل ماي
غسلت وجهي اهجسه مثل النار صار من حرورة
الجمرية الهدرت عليها
-اوصلچ للحوش نعمة
-لا انا اروح مااحتاج حرس
-عذببببببببببة
رص سنونه رص راد يحچي
واجت نجمة تركض
-ام ريحانة ترى الشيخة تنطرچ مسويتلچ
مچان تگول لزوم تجي تتغده
عاينت حيييرة شگول للمرة
عدلت روحي وردت امشي صاحلي
-عذبة
-ها
رديت بلا نفس
عاينلي بحلگه حچاية وماحچاها
مشيت ويه نجمة طبيت مضيف
النسوان البانينة
اعاين نسوان معدلة وكلفة شيخيات
ونسوان وين الزينة الزينة
صاحت الشيخة من نص المضيف
-معزبتنا تعاي يمي هنا
رحت وانا اتخطى النسوان واتعذر اعاين
مسويتلي مچان يمها گعدت وصدت عيني
بعين مرت هاجس ذبيت عباتي
وگعدت
-شگول يرحم روح امچ چانت نفس
نفسچ بالطبخ بالاعراس مايهنالي اكل
الا من ايدها سبحان ربي الخلاچ
نفس نفسها بالطبخ
اعاين لمرت جعفر نهاد بصف مرت هاجس
تنادسن وانا مديت ايدي وشلت لگمة
للشيخة
-اكلي هاي من ايد بنيتچ هني وعافية
ضحكت وصاحت
-خايبة ام منعم عايني
اختها ام منعم هاي تصنيف من تجي
للسلف
السلف كله يحبها عاينتلي
-خايبة ام جعيفر عفتي هاي الرموشها چنها
كلبدون ذهب واخذتي ام اللعد والأووووي
ضحكت النسوان وانتفضت مرت جعفر وگامت
صاحت الشيخة
-اكلي يمه تعلمي على ام منعم سوالفها كلها
هزل
اكلت والشيخة تنشدني
-مرتاحة بمچانچ
-الحمد لله الله وگفلي الناس الخيرة
مثلچ
-ولچ صدگ صايرة اسطة مال طرشي بالولاية
انا الطرشي ماماكلته هنا بس جعفر چان يجيبلي
من بغداد
-ااااافااااا وانا وين رحت بس ارد لبيتي
اوديلچ سطل
-وغيره شتسوين
-اسوي دبس وتمر مچبوس
-يااااااا من فدوة لهالأيد دسويلي
گبل لا ترحين
-سهلة بس هاي
-شتردين للتمر
-مااااريد هيل عندچ ظل من الطبخ
خليت نجمة والبنات يضمنه
عوزنا حبة حلوة وكزبرة
-موجودات
-هاي هي بالليل اسوي
ظلينه نسولف لحد ماخلصنا
الاكل انا وگفت
صاحتلي ام منعم تعااااااي ولچ عذيبة
صااااايرة فلعة گمر
گعدت بصفها والنسوان تشرب چاي
عاينتلي
-سولفتلي عليچ ام جعفر مساع
سودة بوجه عدوانچ راح زلمتچ
يايمة الاسود كاسر وجهچ الحلو
ماردت ابچي ضحكت
ودموعي بطارف عيني
-امر الله خالة شسوي
-شوفي يالمعدلة مادامچ بكل حچاية
تگولين الحمد لله الله راح يعلي
شانچ
-صدگ خالة
-شفت بعويناتچ الفرح الجاي
-الله صدگ خالة وأفرح
-ايييييي بس اصبري………
بعدها ماكملت حچايتها وأعاين طبت
مرت هاجس بيدها صينية چاي
گلت بگلبي شعجب تعبت روحها
عبرت من يمي وهي گوه تمشي فتحتلها الدرب
خاف تطيح مااهجس الا النسوان فد صيحة
وحرورة اخذت صفحة راسي ومتني الأيسر
وظهري وبطني صرخت بهداي ووگفت النسوان
وام منعم تصلي عالنبي
وألشيخة ركضت وهي تصيح
-هي عثرررتني صارت بطرررريقي
مو تشوفني مااگدر امشي
من حرورة البيه طلعت والشيخة تصيح
-خااااااايبات البت طگگت صحيلنا واااااحد
من الولد بسيارته هاجس جعفر اي واحد
مااگدر احچي صفحة وجهي ناااااار
لزمت ايد الشيخة وبچيت
-شيخة وجهي فدوووووة
-سووووودة عليه خااااايبات صيحنهم
اجه جعفر بس شافني بره المضيف صاح
-شمسووووووين بيها
ياهو الحارگها
-ولك يمه مو وكت حچي صيح ابو كمال
يجينة البت تسلهفت
ركض جعفر شويه ورد بس شافني جمد بمكانه
-شييييخة شصار
-يمه مرتك جابت چاي لمها وخواتها وطاح
عالبت تلاحگها
اشرلي امشي وانا جمدت
-ماااروح بس وصلني لخواتي
-امششششي اگلچ
مارضيت امشي والشيخة تهفيلي بطرف شيلتها
نص ساعة وسعرت بيه نار وهاجس مناطر الرد
-نمششششي راح تموتين
مشيت ويا من الوجع وگلت للشيخة
-فدوة خل وحدة تجي وياي
وصدگ الشيخة صاحت
-اوووگف يمه تجي وياك مررررة
طبت الشيخة طلعت ام منعم تتدعبل وسندتني
للسيارة هاجس مشى بينه
للولاية وجهي اهجسه ورم
وصار علوه ونصه يمكن طگگ
بس مايحرگني مثل هامة راسي
ومتوني وبطني
بس وصلنا اجتني طبيبة
وطلعت هاجس بره وانا وام منعم ظلينه
فتحت دگم ثوبي وعاينتلي
-مطگگ الحرگ بس اللي بوجهچ
وراسچ
بطنچ هم مطگگة چتافچ بس حمرة
خل نشلع الطگاگ ونعقم وندهن خوش
حتى مايصير اثر
مااهجس شي بس الحروووورة
بالمكان المحروگ راحت الطبيبة مدري شجابت
وردت
وبدت تصلخ بي وانا الهادية
الماينسمعلي حس ارتفع صياحي
وصوت البچي ترس الحجرة
ويصد الصدى بالحياطين
ساعة زمان ومدري شخلت
مثل الخام ابيض نظيف
واشرتلي
-راح انطيكم دهن للحرگ
يتنظف المكان بماي تفورونه ويبرد
يلا
وراها ينحط الدهن ويتغطى
بشاش
لفت المكان ورردتلي ام منعم
هدومي وردتلي الطبيبة
-وهاي الحب والشرب حتى
مايلتهب المكان
طلعنا وهو واگف بالممر
شاف نص وجهي ملفوف
ضرب چف بچف
صعدنا وام منعم يمه وهو بس يريد
ينشد
-شصار
ردت ام منعم
-عين ماصلت عالنبي البت طبخت
ووالعيون تتلاگط چنها بزون وفلانة
وعلانة يتحرگنن وحرگنها
سكت وانا شويه هود الوجع
بس طب السلف گلتله
-وديني لأخواتي
مشى هو وام منعم وياي
طبت ام منعم واخواتي ملتهيات بالهوسة
للحنة بس شافتني نعمة شهگت ولطمت
وانا طاحت دموعي
-يمممممممه شبيچ
صاحت ام منعم
-صلن عالنبي خلن البت ترتاح
شويه حرگ استكين چاي طاح عليها
يالله سووون درب
مشت نعمة وياي وام منعم تحچي
وياها بهداي
-لا تخلين احد يتشمت بيچ حنة
بنيتچ واخيتچ تطيب هسه تجي
النسوان تحني
خلي عذبة ترتاح هنا خووووش
لو تردن اخذها وياي لبيت ابو جعفر
بقن يحچن وانا اعاين
للجهال وبينهم ريحانة
اجت ذبت روحها علي مزوگاتها البنات
وملبساتها بدلتها وتتگلب بكرشها
الحلو وشعراتها الحلوة
حضنتني ومستغربة تتلمس بوجهي
المشدود
ام منعم طلعت ويه نعمة
وانا تمددت عالفراش وطبت سهامة
وسنية يركضن
سهامة تبچي علية وسنية
طلعتلي ثوب البسه هذا يبس من الچاي
لبسني واخذن ريحانة وطلعن وصارت هوسة
النسوان وحنتهن العصر وانا
ردلي الوجع لهناك وهدة الصوت وطبت
نعمة
-عذوبة هاي ام جعفر تريد تشوفچ
خطية دنجت عليه باست راسي
وگعدت بصفي بيدها علاگتين
راحت نعمة تجيب چاي وهي لزمت چفوفي
-عذبة صارت العين بيچ سودة عليه
بس اگلچ شي تسمعيني
-تأمريني ام جعفر
-گلي لهاجس مرتك ماتدري متسودن
وجعفر ويا اثنينهم يجدحون
-لا حتى لو بقصد ماراح احچي
-هن مو اكبر منچ بس عقولهن عقول
جهال مسحيها بوجهي وعمچ ابو جعفر
تسودن گال اخذها لبغداد
-حشاكم العيبة تنمسح بوجوه أهلها
-هاي عباتچ وهذا ثوبچ وثوب ريحانة
-لييييش هالكلافة
-گصيت لاخواتچ ولبناتهن
بس مااچذب عليچ
گالت الحچاية وضحكت
-انتِ غالية عندي ام الوگفات من انتِ
بت صغيرة وتعاونيني بكل شي
ثوبچ يختلف وصيته توصا من الاورزدي
-بعد روحي بس ذكرچ اليه كافي
-انا اروح وشوفي هاچ
مدت ايدها چفية صغيرة بيضة
ملفوفة
-هااااااي امانة مو تردينها
هاي وداها الچ عمچ يگول
خاف تروح للطبيب
-لا والله كافي الثوب فدوة ليش هالكلافة
-ياااا ولچ تردين عمچ
-شلون ارده على راسي
خلت الفلوس وطلعت وانا روحي تغورف
من الوجع واخواتي التهن خطية بيني
وبين الخطار لحد ماغفيت لهناك وهجست
ايد نعمة تگلب الفاف وتعاين فتحت عيوني
وهي بچت
-صدگ حارگتچ مرت هويجس
-ماتدري بعد اختچ
حطت ريحانة بحضني غافية
-ارتاحي بعد روحي خليتلج
عشه
جابت الاكل گوه مديت ايدي
ورديت نمت
ثاني يوم الصبح خليتهن فورن الماي
وگعدت سهامة دهنتني ولفت وجهي
وبطني للظهر بدلت واجتها الحافوفة
زوگتها وصارت الهوسة
انا ماطلعت لمن صاحو الزوافيف اجو
صحت لعلاوي ونعمة
-نعمة ويه الزوافيف راح اروح لبيتي
-يممممممه وحدچ وهذا حالچ
-معليچ علاوي وياي وهناك اروح
للطبيبة تشوفني
-تاني گبل لا توصل الزفة اوديچ ويه
هويجس
-مااااااروح وياه
-تررررحين وتسكتين مرته السوتها هو الياخذچ
وعذبة ماترهم تصعدين ويه غييييره شتگول
الناس
-چا مااروح خل تنزف سهامة وباچر
ياخذني حسين وياه
-احسسن يلا بعد روحي
صارت الهوسة والهوسات
وانا لفيت روحي وعاينت لسهامة
تنزف
وتروح ونعمة ماراحت وياها تستحي
راحت حبوبتها وعمتها
وردت نعمة للبيت تبچي على چبيرتها
عاد لليل ردو الزوافيف وردت بت
نعمة الصغيرة ويه حبوبتها
وعماتها وسهامة وبناتها
هاي حليمة بت نعمة ووووكحة
ونبهة ولسان من التمينه
بالليل بالحجرة امها تنشدها وهي ترد
فلان هيچ وعلان هيچ لحد ما ضحكت
-يممممممممه شفت خالي هاجس
يعارك بمررررته
-صدگ
-اي والله يمه
صحت بيها
-كاااافي ولچ شبيچ معلمة عالفتان والنمايم
-معليچ بخالتچ احچي
-ايييييي يمه وابوها هذا لابس عسكري
واگف ويتعذر من خالي وخالي گاله
بتك ماتبطل من سوالفها خلتني هالكدوتني
گدام الناس وحرگت بت عمي
-اي وشگاله
-يمه ابوها گاله هي مرتك وانت ادبها
بس بويه مرتك حبلة شلون اخذها وياي
شهگت نعمة ونشدتني
-فدووووة چا هي مو عدها اثنين الولد وجابت ولد عمره شهور
-اي
-هاااااي ربطت هويجس بالفروخ
-كااااافي ماعلينا بالعالم
-ولچ گلبچ بارد ولا چنها حرگتج
-چا العيبة عليها وهي الفشلت گدام
النسوان وبينت غيرتها مني
ردت حليمة بلسانها الشطوله تنقل العلوم
-يمممممة وسمعت بعد اخبار
-ها ولچ
-يمه الحضرية مرت ستار ابن الملا
طلگها
ضربت نعمة على صدرها
-صدگ ولچ
-والله يمه سمعت بتهم فطيم
تسولف تگول طلگها بس خلصت الفاتحة
چيف مخلي محمد يمها وهي مالازمته ورايح
للشط
-صخام بوجهها
-وبعدددد يمه بعد
زمخت انا بيها
-حلييييمة بطلي فتان
-خايبة كملي معليج بخالتج
-يمه وتگول ابوها راح يگصون
ايييده خايسة مدري
شبيها
صفنت عليها وأمنت ان رب العالمين
يمد للظالم يشوفه وين يوصل
وقادر بلحظة يمحي ورجع
حگ مزنة ولو بعد حين
لثاني يوم صدگ مشى بيه علاوي
وجاب سيارة ورحنه للولاية
رديت لبيتي واهجس روحي مابيه حيل
اشيل جدامي وديت علاوي لأميرة
راح جابها واجاني
اول ماطبت ضربت خدها
-عززززة العزاني
شبيچ ولچ
-احترگت
-سودة عليه
-سودة بوجه عدوانچ ماطاحتلي
الروحة هناك
-مو گتلچ ظلي هنا وبس بالزفة روحي
-مااگدر زحمة من الشيخة واخواتي خطيه
وتدرين بسهامة شگد عزيزة عليه
بس ماگدرت اظل اميرة فدوة يرادلي غسل
للحرگ ودهن وشد
-هييينة هسه اصيحلچ لولوة
-يااااااهي
-لولوة تشتغل بالمستشفى تضمد جروح
وحروق سستر يعني
-شني سستر
-معاونة للطبيب والطبيبة
-فدوة لعيونچ ياريت
-تعال خالة علاوي وياي
وانت سلطان ظل يم خالتك
هز راسه وگعد يمي هادئ وساكت
ومگابل ريحانة التدردم وصاير حچيها
ينفهم راح تدخل السنة الثالثة ويه نهاية
هالسنة
انا گلت سنة١٩٦٥ خير عليه بس شو تاليها
خوش احترگت
استغفرت ربي چان عمي يگول لا تعادو
الايام فتعاديكم
صدگ السنة شعليها الحقد لعب لعبته
بگلب مرت هاجس رغم انا اگول
حقها تكرهني اذا هاجس مسويها
صدگ ويحچي بيه گدامها
بس هم هي ماقاصرة بالحلا حلوة
وبالثقافة بت بغداد وبالجاه ابوها
رتبتة تسد عين الشمس شبيها بعد
ناشبتلي
شويه وطبت أميرة وياها بت حلوة
صدگ لولوة تلالي طبت وسلمت وجهه
يضحك
-ها حبيبة شبيچ
-احترگت والطبيبة گالت لزوم التنظيف والغسل
كل يوم
-عندچ دوه
-اي عندي
طلعت علاوي بره ورحت نزعت ثوبي
لبست شي خفيف
ورديتلها بيدي صابونة رگي
والدوة والدهونات وماي دافي
گعدت تغسل على كيف
وتنظف وردت دهنت
-باوعي لاتخلينه مشدود ليل نهار
وثوبچ لبسي خفيف منا لمن تطيبين
-استحي من وليد اختي
ضحكت وگالتي
-ردي لاهله يومين ثلاثة لازم الهوا يضرب المكان
-ان شاء الله
شگد تامريني
-اسكتي الجاااار للجار
طلعت واميرة خطيه ودعتني وراحت
وانا لبست ثوبي وگعدت اشوف سطولتي
استوت لو لا يومين بعد ويستلم
حجي ناصر
رد علاوي وگتله ارده لأهله بس اسبوع
وارجعه يمي
سودة عليه تكدر لأن تعلم عالمكان
وصدگ بالليل اجه عباس مر بينه يشوفني
وعلاوي راح ويا
ويومين مرن بعدها واندگ الباب
انخبصت لبست ثوبي ولفيت راسي
وطلعت من وره الباب احچي
-ياهو
-انا هاجس
استغفرت ربي وفتحت الباب دفعة بخفة
ايده وعاينلي وجهي صفحة خدي محومرة
ومجلدة طب للحوش وگابلني
-شلون صرتي
-من الله زينة من عبادة ماخلصانة شوفت
عينك همزين ماانصلخت
-السواها تحاسب
-وانا مو بعازة الحساب تدري
انا ماالوم المرة حقها تحترگ وانت
بالرايحة والرادة جايب سيرتي جدامها
شني گلبها حجر
-ماااااالها حق تغير
-الها حق كل الحق
شلون ماتغير وانت زلمتها
-هي تدررررري محد بگلبي غيرچ
وتدري انا رايدچ گبلها وماهرچ بعقد
-ايييييييي حتى لو درت
تبقى تغار وغيرتها بمچانها
انا مرة عرست وخلفت وترملت
وانت لازگ بطاريي جدامها وهالشي
الله مايرضى
-هاي هي تتحمل مادام تدري گلبي وين
-لا ما مجبورة تتحمل انت المجبور
تبطل تذكرني وتجيب طاررريي بعد
كف وعيييييييييب وانا على ذمة غيرك
تذكرني على لسانك
-راح لرحمة الله
-لو مايظل بس اسمه هم يظل هو هو
بگلبي
-حچي تحرگين بي گلبي انا ادري
-لا والله شوووووف هاي شمس الله
وسما ياهاجس من ساعة الحطيت
غيري على ذمتك وانا ربي ودالي شي
مسح على گلبي وخلاني مااشوفك جدامي
خزرني وعاين بعيني
-والمسحني حط خزعل بمچاني
-لاااااااااا خزعل مااخذ مچانك لأن مچانك
صغيييير خزعل تربع تربع
وترس كل صفحة چانت فارغة بگلبي
وروح عمي ووووووروحه هو الراحت خسارة
بالموت
ياهاجس مرات احاچي روحي
حسبالي انا وياك وسالفتنا حلم
والله صدگ حسبالي حلم
من ذيچ السنين ماكو بگلبي وببالي غير
خزعل وعشرته ترس گلبي ترس وماخله
بس مچان صغير لريحانة
انا اگول ربي يحبني ومايريدني اطيح
بالحرام هالترسني ترس بعشگ خزعل
سبحان المله روحي بي بسنتين بسسس
گعد على سياج حوض الورد بتعب
-أيستيني عذبة خااااااايبة سچاچين
كلماتچ ذبحتني
گعدت گباله
-شوف هاجس وروح عمي
انا مانسيت السويته بيه
ولك تعررررف شصار طلگني خزعل
من وره حچاياتك لليوم تدگ بگلبي
دموعه وهو يگلي لو ذابحني ابن
عمچ ولا حاچيلي هالحچي
وربك نصفني وردني بنفس الشهر
تعرف كل يوم چنت الغروب اطلع
ادعي عليك وانشغ لربي
وارد اگله لا ياربي لاتسمع دعوتي
لخاطر عمي چان يحبه لأن وحيده
ولك حسبت حساب للدم لآخر سوالفك
السويتها
هسه اذا صدگ انا بت عمك والدم
جامعنا واسماء اهالينا لا تأذيني
بعد
عاين لمرتك لعايلتك لا تخليها تنشب
عداوة وانا لا يمها ولا گرباها
شتحلالي وانا مصلوخة بالچاي جدام
الناس
اسمع حچاية نعمة رغم السويته
تگول من تميل المايلة مالنا غير ابن
عمنا
وجهالها يسمونك خالي اذا صدگ
ظالتلي معزة بگلبك خلي بنيتي
هم تصيحلك خالي ……
ماخلاني اكمل
-ماااااگدر ولچ ماتهجسين ششاعل بگلبي
-لا تكسرني ترى انا هم وحيدة
ومن يميل الدهر انتچي عليك
هز راسه وانا تذكرت الگلادة وطبيت جبتها اله
-هاي تخصك
عاينلها وضحك
-فلوسها منچ وهي الچ والله حرمت علي
دوووم
ووگف نكت بنطرونه ومد ايده لجيبه
وطلع سفطة فلوس
-من هسه انتچي عليه ولا تردين ايدي
مديت ايدي اخذت الفلوس
-مااردك انا اليه حصة چبيرة بنجماتك
ضحك ووگف بالباب
-اخذچ للطبيب
-لا تجيني بنية هنا تداويني
-شتحتاجين تندلين البيت
وراح اطيچ رقم تلفون المركز
مد ايده لجيبة طلع قلم وورقة صغيرة
كتبه وخلا بيدي
-من اي واحد عنده تلفون خابريني خاف
تردين شي
هزيت راسي وهو طلع سلم وودعني وراح
راحة نزلت على روحي بعد الحجيته الحجي من وره گلبي
بس هيج يلا اطبگ دفتر الماضي
بوجهه وينسى سنين گبل ويلتفت
لبيته ويعوفني اعيش روحي
وبنيتي
عود نسيت السوا لا والله هيهات
للموت ماانسى
بس السنين تمشي والناس تتغير
وانا هم تغيرت اريد اسد بابي
على بنيتي وابطل ركض وگلبي
يهدى ويرتاح
وسديت باب هاجس
مدري ظنيت انا سديته بس
طلع مو باب طلعن بوب
سديت منهن وظل واحد چبير مشرع
راح نتحاسب علي وكل واحد
ياخذ حقه
بالأيام البعدها التفتت لبيتي
وبنيتي وشغلي الصار خير من الله
وحجي ناصر جاب كاكة مراد
الطلباته محددة ويعرف شيريد
وماينقص من حگي فلس ياخذ
طرشي وخل
وتمر وصارو يودولي بهاراتهم
وتوابلهم واعشابهم اچيسها الهم
عالمگدار المودينه وهم احصل عليهن
چم فلس وعلاوي اخذه الواهس جرها
شهر بالسلف وردلي وره الشهر
متحضر حتى
احطه بالمدرسة
وانا الحمد لله طبت وظل حمار خفيف
بطارف خدي
بهالشهر مرتين هاجس يجي
ويشتري كمية طرشي مني مثل
مايگول لجماعته
بس احترم كلامي ويگعد
يتانيني يم حوض الورد وريحانة
تركضله علمتها تصيحله خالي
بيوم الاجه علاوي اجه هاجس العصر
يشتري گعد يم الورد ويحاچيني
-ماتجيبين رازقي
-مااريده ينكت ورگ
سكت وسمعت صوت علاوي
طب
طلعت اتلگاه وديته على مسواگ
لاگيته بالحوش عاين لهاجس سلم من بعيد
وهو معلم يسلم علي ويباوسه
-شلونك خالي
وگف هاجس وصاحه
-صاير زلمة ولك تعال
راح باوس هاجس ومدري شماله وجها مغيم
طب جوه وانا جبت العلاليگ لهاجس
-هاي خمس كيلوات
-فلفل خليتي
-اي سويتلك چيس وحد
-خوش
خله الفلوس بيدي وطلع للباب
-اگلچ عذبة ماتجيبين تلفون
-ماعندي فلوسه
-مايرادله شي انا امشيلچ معاملته
-شو مايفيديني
-ليش يفيد وكت العازة
-الله كريم
طلع وراح وطبيت وره علاوي
يلاعب بريحانة
-شبيك علاوي خالة شو وجهك مغيم
-خالي هاجس خالة
-شبي خالك
-اسمعي الحچي ترى انا مو جاهل
واعرف شسوو بيت عناد بيچ
-وخالك شعلي ببيت عناد
گابلني وحلفني
-بروح عمي خزعل لاتگلين لأمي ترى
حلفتني مااحچي گالت تصير مشاكل
وخالتك مابيها حيلها
-ولك بادت رجليه من الخوف شصاير
وگابلته وسمعت سوالف أبليس مامسويها
-شوفي خالة من رحت لأهلي كل يوم انا
وصحباني نلعب بالگيعان وتصير لمتنا بگاع
بيت الملا وبين گاع بيت عناد
اكو علوة تراب من نخلص لعب نتمدد
غاد بيومها لعبنا وهم طشو وانا مددت بالفي
حدر العلوة گاعد وصوت ولد عناد
يصدح ويتراجفون خضير يگل لأخو
-هو يحلها ماعليك
-اگلك گالي انا ماعليه سهلت امركم
وفضت
شويه وسمعت صوت سيارة وعمي
هاجس صاح
-خضييييير شعندك مودي علي
شنييييي كبر راسك ماتجي
-لا جنابك حشاك بس ردتك تحلها
ويه ستار ابن الملة متسودن علينه
منا حزين على ابنه ومنا
يتراجف عالمتر الانگطم من گاعه لساجيتنا الجديدة
-وانا شعلي بيكم
-الگاع انت الجبتها وتعرف حدودها والورق عنددددك
-الزم لسانك لا اگصه
-كمل زينيتك ويانه
-يازينية الحدود مبينة والملا صادگ
انتم ماخذين متر من گاعه
-اطنه الورق واحنه نحلها
-حلم ابليس بالجنة خووووووش
شني بويه فوگ
شينك انت وياااااا تبوكوووونها فلوس
وتكسرون ايدها
ومات الجاهل ببطنها
وجايني هسسه تدور حدود
-اسمع جنابك مرت خزعل چذابة
-تخسى ياعاااااار الگاع گاعها
-وشني بعد ماصارت بأسمنا تردها الها
-اكلو من خير الگاع ومااسمعلكم حس
خوووووش
-نريد الورق الگاع وبالطابو بأسمنا
-وانا مثل ماحولتها بأسمكم
اردها الها خووووش
تردون المتر للملا وتطمون الساجية خوش
-چا مادام الحچي صار فشگ
احنة نگل لمرت خزعل لوووو نرووووح
للباشا نسيبك
ماسمعت بس صوت الچيلة ثارت
وصاح بي
-هالمرة الچيلة بالهوه المرة الثانية
بين عيووووونك خوش
سكت وعاينلي
-خالة انا مو جاهل فهمت خالي هاجس
هو المطيهم الگاع
هو يحچي وانا هاي روحي أنسلبت من القهر
هاي الگشاية الكسرت ظهري عاينتلة
-علاوي البس
لبس علاوي ولبست ريحانة ولبست
عباتي اخذت جيزداني وقفلت البيبان
وطلعت للسلف
اليوم ولا غيره هو يوم اخذ الحگوگ
وصلت وانا روحي ممرودة مرد منا
نعمة المارضت يوصلني الحچي
ومنا هاجس الخسيس الماخله
شينة ماسواها وياي
للغروب وصحت علاوي
-تروح تگل لخالك هاجس
خالتي بالليل تنطرك حدر السدرة
تريد تحاچيك بسالفة
راح وردلي يركض
-گال انا ناطرها
لليل وعاينت نامت كلها
لبست عباتي تلثمت ورحت
اعاين بس ضوه الجگارة مبين
نزلت نزلة الشط ودار وجها
مد ايده الزمها لزمت طرف ردانه
ونزلت يمه
حاطين احنه جذع خشب حدر
السدرة گعدت علي
وهو گابلني مگنبص وعيونه حدر
ضوه الگمرية يتلامع
-وديتي عليه
-اي والله محتاجتك
-امريني
-اگلك اريد ارد گاعي من
بيت عناد
-غير الورق عدهم والگاع بأسم عناد
-زين ماتگدر تسويها من يمك
وتردها اليه چاانت مو الحكومة
-اسمعيني بس خل احچي ولا تگولين
تساومني
-گول
-بس ارضي نتزوج والله مااوصلچ
ظلي ببيتچ منا لمن يطيب خاطرچ
وتگليلي تعال انا اريدك ورضيت
-وتردلي گاعي
-اردها من عيونهم الچ
-ليش مارديتها گبل
صفن بوجهي وانا گوه احچي
اتمنى بيدي محراث نار
اشعله بي
-ليش مارديتها گبل حتى لو انا وياك
متخاربين اظل بت عمك صح لو لا
-فاتتني الزينة بعد وهسه التردينه والله حاضر
-خوش ردلي ابني
وگف يبالع بريجه
-ردلي ابني المات وماشفته من ضربة
خضير اليه
وردلي گاع خزعل الچان يحبها مثل عيونه
وردلي الفلوس الچانت معيشتني انا الارملة
وبنيتي اليتيمة واخذوها ويه اوراق الگاع
-انا………
-كل شي هين عندي والله الگاع الله معوضها
مادامها انوخذت باطل بس سچين نبت بگلبي
من وصلني الخبر وطلعت انت مطبب علي زلام
غرب شافوني مفرعة
ولزموني بچفوفهم النگسة
-لا لاااااااااا منهو الگالچ بااااااطل
احچي ويا بهداي وهو يجدح نار
بس يريد يبري روحه
-تدري من وصلي الخبر گلت
أهون عليه لو هو بيده طاب وبايگني
ولا الغربة يكشفوني تظل انت ابن
عمي ومكشوفة عليك گبل
بس اغراب ويفزعوني وانا حبلة ووحيدة
هاي الوگفت ببلعومي ونشبت مثل
ما تنشب السلية بالبلعوم وتكتل صاحبها
هيچ هاجس ردت تجردني من كل
شي وماطاح بيدك
هاي انا الله نصرني من يمه ومااعتازيت انذل
الك ولغيرك لييييييش عبني ماشيتها بيضة ويه
الدنيا وماعندي هاگد دغششش
-اكتلهم وعلي ياهو الوصلچ
الحچي احفر گبره بيدي والله
بااااطل
-تنكر گبل چم يوم بگاع خزعل
وخضير وده عليك علمود طلابته ويا
ستار عالساجية تنكر الورق مال الگاع عندك
وانت الموديهم عليه
گعد عالجذع ورجلي ماحملته وگفت انا
-شعدالك سوايتك تنضم انا الله واگفلي
لأن وحيدة ولك سويت سواياتك كلها
وگلت لخاطر عمي سالم
ولخاطر هالدنيا التريد زلمة يوكفلنا احنه
نسوان بس حييييف الشوووووارب والله
التوديلي زلام غرب يتلمسون بيه ………
انتفض مارضى
-كاااااافي سكتي كافي
-مااسكت بس چنت من ادعي
مو من كل گلبي هسسسسه ياهاجس
مخلية العباس ويااااااااك
الگاع تردها ماتردها مايهمني
انا مناطرررررة ربي يردلي حگي
وأشوف عجاييييييبه بيك بس
انت ادعي عليك
ماادعي لا على مرتك ولا على
جهالك
-سمعيني ………
-ماااااسمعك حسبي الله ونعم الوكيل
حسبي الله ونعم الوووووكيل حاطة الله
وياك منا للموووووت ادعي عليييييك
مشيت وهو صاح
-اسمعيني
وگفت
صوته يرجف وايدي يفرك بيهن وحدة بالأخرى
يحچي ويريد يقنعني ويقنع روحه
السوا لأن يحبني
- عذبة تظنيني حجر جلمود
تظنين ماعندي گلب يوجعني
والله لو تدرين شصاير بيه
من ذيچ السنين من عرفت خزعل خذاچ
چان كفيتي لومچ عني
أنا ما سويت السويته چيف أكرهچ
أنا ردت أكسرچ لأنچ كسرتيني
بيوم الرضيتي بخزعل
من عرفت ورديت للسلف
كل ليلة أمر ببابچ
چانت تطلع روحي وترد لو سمعت
صوتچ
وافتر فرة حوالين البيت بلكي المحچ
چنت امر وره البيت وأشوف ثيابچ وثيابه
معلگات سوه امووووت الف مووووتة
هذا هي ثياب شحالني لو تخايلتيلي وانتِ
بحضنه
-ماااااايشفعلك كل حچي تگوله انت رجال نسيت
العشگ وكتلك الثار الأعمى
- أنا ما نسيت لا الأيام هدتني
ولا السنين بردت ناري
كلما غمضت عيني أشوف رسمچ
وكلما شفت غصن الرازقي بگاعنا يميل
تخايلي طولچ
چنت عايش ومناطر وسويت السويته بخزعل كله
ومتاني الدنيا تدور وتجيبچ الي ومات خزعل
ودارت الدنيا حتى ترديلي واني بچفي ديرتها
-حااااااشى لرب اسمه الكريم يخلي دورة
الدنيا بيد بششششر ردت تكسرني
وربي سندني
-أنا ماردت كسرتچ
انا چنت أريد أطفي حرگة سنيني بيج
-يخسى اي واحد بعد زلمتي يلزم طااااارف ثيابي
-گلتيها وسويتيها وخسيت انا وماخليتيني
بسسسس ماگدرت مو مات خزعل
وصار حدر التراب بعدني لهسه تصير بگلبي
طعنات خناجر خزعل خذاچ وضيعچ مني
وأنا الچنت سد الچ صرت ذيب امعط الگدامي
وامشي على دمه حتى اردچ
-هذا حچيك تحچي لروحك حتى ماتموت من ملامة
النفس
-ولچ يااااااااا ملامة نفس ولچ
عشگج مرض سكن عظامي ونهلني
انا صرت نذل وخسيس بعينچ انت
مااطيتيني فرصة ارد شرررريف
سديتي البوب كلها بوجهي وماخليتيلي
غير هالدرب الوصخ حتى اوصلچ
-تروووووح تكسر گلبي
تخليهم يبوكون حلال بنيتي
تخليهم يدوسون عتبتي وانا ستوني
ميت زلمتي ويموتون وليدي
بياشرع هذا حچيك
-لوووووووو تدرين وتهجسين لوعة
الحلاله صار بيد غيره
چان سجدتي
لربي شكرا چيف لهسه
واگف على رجلي وما ذبحت روحي ببابچ
-شني من حچي هاااااجس حتى المسوووودن
مايصدگه
ولك تحبني وتكسرني
تحبني وتسلط عليه انذال يجردوني
من كل شي واظل ملطمة ببيوت
الناس
تحبني وابني وتهدم وتكسر
گلبي شتحب بس اريد اعرف
شتحب انت تسودنت چيف كسرت
چلمتك عبالك وحيدة وراح ارضخ
وارضى بيك حتى وانت ماخذ علي
وحدة بلاية علمي
گنبص كبالي وانا گاعدة عالجذع
وحط عينه بعيني
يضرب على صدره بيده حيل
وصوته مخنوگ خنگ
مثل الذبيحة الترافس وتون
- لا تباوعيلي هيچ
والله هالبرد البعيونچ يچوي ضلوعي
أكثر من نار جهنم
تظنين لوعتي عليچ لوعة زلمة يدور حگة الضاع
لا وحگ ربي أنا لوعتي لوعة الضامي اليشوف الماي بوسط السراب ويمشيله حافي عالجمر
ولچ ثلث سنين وأنا أنام وأفز على طيفچ
كلما غمضت عيني أشم ريحة ضفايرچ تفوح
چنت اجي هنا حدر هالسدرة
وأركض مثل المسودن بلكي أشوف أثر جدمچ بالطين وأبوسه ماااااانكر
انا سويت السويته
كله لجل ذيچ اللحظة التصفين بيها إلي
ردتچ الي ردت أطفي بيچ نار سنين
ردت أسد جوع روحي الما شبعت من غيرچ
عاينتله ووگفت صديت عينه
دارني علي دفعت ايده من متوني
ذب حسرة وگوه حچه ورد گعد عالجذع
-لو گاعي تبلعني
ولو السما تطبگ عليه أهون من شوفة عيونچ
تصد عليه وروحچ لعبانة
أنا بعت الدنيا وصرت واوي
بليل الغدر لجلچ رفضچ الي بكل ذيچ المرات
خلاني اشوف حتى الدم حلال
-كل الگلته فات علي الوكت من حطيت ايدك
بيد غيري وانا غنية عنك وعن الناس
مادام فوگ راسي رب راضيته
خووووش
-اووووگفي
-ماكووووو شي ينگال بعد هاجس
-تاني عذبة والله اردلچ الگاع
بس مااااگدر هسه
اجت الترقيات وانا راح اترقى بس تطلع السالفة
هسه تصيرلي طلابة شكبرها وروح
ابووووووووي اردها الچ
-ماترد انا وكلت ربي عليك وعليهم
-عذبة تااااااااني احاچيچ
ماالتفتت بس وانا ماشية گتله
-للموت مانتلاگه هاجس للمووووووووت
مشيت عنه وبكل نگله
من جدامي چان يطيح ركن من أركان عمري
بذيچ المشية
طاح لثام الگرابة وانكشف چذب الوجوه
ما ظل بگلبي غير القهر
وهوى بارد يرجف عظامي
مو من برد لا والله
بس من الحچي المسموم النفثه هاجس براسي
عظامي انهدت من صلافة كلامه
بس هيهات والله
وأنا النخلة التموت واگفة وما تذل راسها ،للريح
يظنون كسروني
يظنون عذبة صيدة سهلة لأن غاب زلمتها
والله لو أطيح ألف مرة
لأگوم والتراب اليغطيني اسوي بارود بوجوههم
خذو الگاع عساها حطب لجهنم
الگاع تروح وترد
وأنا بكرامتي أشتري عشرة احسن منها
كسروا خاطري ميخالف أجبره بصبري
مشيت ودموعي تحفر بخدي سواجي
امشي وچلمات خزعل ومسامره الي
ومناغى بأذاني من زعلت ومارضيت گبل
لايموت وچلماته تبني بروحي
كل ركن هدمه هاجس والشعر الكتبه
لخاطري وعلگه بالحجرة
-هي النخلة العذراء تهزأُ بالردى
ولو قطعوا بالجور منها الاغصنِ
