رواية تحت ظل السعف الفصل الحادي عشر 11 بقلم ميار

صدفة شفناك ‏ونسينة شلون چنة

‏الحمدلله ‏اندارت عيونك علينة

‏وذَكرتنة بـ روحنة وگعدات اهلنا

‏كثر ما بيها امان النظرة منك

‏چنة نتمنى ‏مثل عينك وطننا .،، 

__♕___

ريام

-توني ادير وجهي اريد ارجع شهكت من انحطت ايد صارت فوك الثامي اتسد حلكي وجرتني وره النخله شهكت بخوف

حطيت ايدي على ايده اريد يحلني بس ما كدرت جسمي يرجف هدئت من سمعت صوته همس قريب من اذني

جهاد:: اشش اني جهاد لا تخافين راح اوخر بس لا تحجين بين ما يروح هلـ چلب واكف ليغاد لا تسوين حس

- وخر ايده ودرت عليه كمش راسي وداره علـالمضيف جان واكفين فراس وابوه واكو شخص وياهم

بقينه ننتظرهم يرحون بالساعه واكفين جرني حيل

وره النخله كعدني وهو كرمز وعينه عليهم ظلمه 

كوه اشوف ملامحه ويا ما وصلو بيتهم طفت الكهرباء 

صارت هندس ما تنشاف رحت الايد ردت اكوم بس 

خفت وصوت الچلاب تخوف وصوت الططوه فوگانه

همست بخوف جهاد وينك نبقى هيج تره خفت عفية 

جهاد:: اشش بس خلي نتأكد راحو ونحجي لا تخافين

-بقيت ساكته نص ساعة وسحبني نمشي بنص البستان ظلمه ما اعرف شلون نمشي واني اذب رجلي عمياوي

بس هو عبالك حافظ الطريق مدري شلون افترينه وصرنه 

وره بيت عمي محمد كمنا نمشي ويا الحايط وكفنا يم الباب

جهاد:: فوتي بعدين نحجي لا تطلعين ابد خوش اني ادزلج

خبر بعد ممنوع تطلعين ابداً ابن عمج ما ناوي علي خير 

-ما لحكت ارد عليه لان مشى نفس الطريق توه اطب البيت 

صار بوجهي وسام جفلت بس عبالك جان يدري لان ما سالني

بس كال

وسام:: روحي نامي خويا وراج امتحانات

-هزيت راسي واستغربت لان ما حجه شي عفت ورجعت

لفراشي واني بالي يودي ويجيب كوه غمضت ونمت.. 

ريتاج

كعدتنا امي من الصبح حتى نروح نمتحن رباب

امبدله وتنتظرني كملت ادحك ريام نايمه لامه روحها

مثل الجاهل ابطن امه وايدها جوه راسها دحكت شو

نايمه بشالها هزيت ايدي وطلعت رباب واكفه وتحجي

ويا وسام وهو يقنع بيها وكفت يمهم كتلهم شكوو خيركم

رباب:: تعالي انوب الحجي ما يجينه عنده مريض وحظرت

الاساتذه اخوتج عدهم شغل ويردون انروح ويا عماد 

-اي خوش وين المشكلة اهم شي ما انفوت الإمتحان

رباب:: ما اروح اخيي هذا مزعج خلي نروح ويا بنات خالي 

وسام:: مو افرك حلكج هسه بابا شبيج هذا ابن عمج هو

يوديكم وعود اذا لحكت اني ارجعكم هاي عود الهادئه 

ريتاج:: تخوصرتله كتله شقصدك استااااذ وسام 

وسام:: اهوووو عمي ما قصدي وهذا دك هورن يلا ولن 

-طلعنا بس رباب مدلغمه صعدنا وهو رفع عينه بالمرايه

بس شاف رباب گالبه وجهه بقى ساكت بس مدري ليش 

حسيته انقهر هاي شبيها الاوادم اكو شي صاير وراي وما

أدري وصلنا وبس ذبنه باب المدرسة شخط السياره دحكت

رباب عينه وره سيارته استغربت عافتنه وطبت واحنه طبينه

وراها كعدت وزعو الدفاتر ودعيت وقريت ايات وبديت اكتب

خلصت وطلعت الحمدلله خوش جاوبت وكفت انتظر رباب

طلعت رحاب وراها تبارك بقت بس رباب رفعت راسي وكفت

سياره شفت جهاد اشر لتبارك ركضت عليه مدري شحجه 

رجعت يمنه تركض هااي شبيج تركضين امشي على كيفج

تبارك:: يلا خلصن جهاد يرجعنا كلنه كتله بس رباب تخلص

رحاب:: لا عفية استحي منه هسه يجي عماد يرجعنه 

تبارك:: انجبي هو گايللهم ودازين جهاد علينه هااي رباب

-درت وجهي شفته طلعت وكفت يمنه واشرتلنه تبارك 

مشينه وياها صعدنا وره وتبارك لجدام هو بس صعدنه

حرك وعين بالموبايل وعين بالسياقه وطول الطريق موبايله

ما سكت وهو كضاها اي وسهله وخوش ما افتهمنه منه شي

وصلنا القريه وكف بالساحه الي بين بيوتنا نزلنه مشينه 

لبيتنه من دخلنه البيت هدوء يخوف درت على رباب مصدومه مثلي صحت يماااا يوووووم اميييي ماميي امي

امنه:: وجعت امي شبيج ولج

-هاي شبيكم خوفتوني ليش هادئين 

-تردينه نستقبلج بالطبول وهو بس اني واخيتج جاي تقره

- ليش وين زلمتج وولدج 

امنه:: ابن عمهم مريض وداز عليهم راحو الفجر شبيج واخوتج مدري وينهم يجوز بالكاع ويا ولد عمج جاسم

-يمه شمدريني ابوي طالع تره جوعانه وصدك شبي ابوي رجع لو بعده اكول يمه هو منو ابن عمهم غير اعرف

امنه:: يمه تمشين من گبالي لا اهفج بعصا شعليج

انوب بابن عمهم يلا روحي بدلي وطلعي اغسلي الصبه

-رفعت حاحبي عود ما عاجبني وهي بيدها عصى مالت 

ماسحه الحمام هي رفعتها واني ركضت للغرفه لكيت

ريام تقره عود بس رفعت ايدها تسلم ودنكت تراجع

بدلت وطلعت انظف الطرمه الساعه 11وتصمط حر

جاي اغسل واغلط على البنات اندك الباب ذبيت الماسحه

ومشيت افتح الباب صحت منو ما رد رجعت صحت منووووو

زياد:: و وجع على هلصوت شبيج تجوعرين 

ريام:: نعممم شقصدك اجوعر احترم روحك 

-محترمها اكثر من ما محترمج شكو تفتحين الباب 

وتعيطين صوتج وصل لديون عمج الخايس مو صوت مدفع

-شدخلك وشتريد جاي 

زياد:: ما جاي على خلكتج الزفره روحي صيحي عمتي

-وعمعامه تعمك يلا منا والله ولا اصيحها تغلط عليه واصيحه

اذا ما كلت لخالي عليك يكسر ظهرك كون يخليك سنه ما تمشي 

-مو افوت اكسر ظهرج اني ولي منا يلا وجه البومه 

ريتاج:: انت وجه البومه حيوان قليل الادب 

امنه: شكو ولج هاي عليمن تغلطين وشكو واكفه بالباب 

ريتاج:: ابن اخوج المو محترم يغلط عليه ترضيها يكولي بومه يروح فدوة لوجهي وصوتي عابت شكله يغلط عليه

امنه: اصخام الصخمني فوتي فوتي جوه الا السانج اكصه

ريتاج: دفعتني حتى افوت غميت الباب وردت ادخل بس 

وكفت من سمعته يحجي لامي عليه وكفت وراها اسمعه

زياد:: عمه شنو هل خلفه ترضيها واكفه وتغلط حتى حسين 

بي انوثه اكثر منها الله وكيلج اجعلي مو الساني رشاش ويصلي علينا صلي انوب اريد الحك ارد عليها ماكو اني قليل ادب

امنه:: ياا يمه لا والله فدوه لطولك بعد روحي وين اكو

منك بس بعدها اصغيره اني اعلمه مو تكول لخالك يموتها 

والله خوش يمه بعد ما تعيدها جاهل ومدلله طالعه عينها

ريتاج:: فتح عيوني اني طالعه عيني من الدلال عضيت اصبعي ودخلت ادردم عليه ورباب واكفه تغسل خس

وتحضر الثريد دحكت عليها وجهه مخنوك بس واحد

يحاجيها تبجي عفتها ما حاجيتها كمت اساعدها وحتى

ريام جت ويانه بين ما نصب الغده فزينه على صوت طلق

مروى

: جاي نصب بالغده الولد كاعدين ويا جديتي يسولفون

ما نحس غير صوت الطلق تبارك جفلت وكعت الماعون من

ايده جرتنا فاطمة وتبارك بس تعيط تخاف طلعو الولد يتراكضون وامي بقت تحجي عليهم لان طلعو تخاف عليهم

دنكت الم الكزاز وايدي ترجف امي وجديتي واكفات بالحوش ينتظرن الولد اخذو ارواحتنا لحد ما رد ابوي للبيت

تلكته امي تسأل بي بخوف هو من شافها خايفها سحبها

باس راسها ويمسح دموعها واحنه بس نريده يحجي يفهمنه

فاطمة:: شسالفه يابه هذا شنو الطلق والولد وين؟ 

احمد:: ماكو شي يابه بس عمر متكاون ويا ولد جبار 

ولد جبار شايلين اسلاح رامين صلي بالسما عود يخوفونه

ابتسام:: احمد ولدي ما بيهم شي ليش ما جو هاا روح 

جيبهم لا يصير عليهم شي اموت والله قربانك ردهم يمي

احمد:: شسالفه ام جهاد ايقابل ولدج اصغار لا تخافين

راحو يم ولد خالهم ما عليهم شي هسه يجون شو تعاي. 

-سحب امي ودخلها جوه واحنه وراهم كعدو بالهول 

بس ابوي وجهه ما يطمن عرفنه اكو شي بس ما راد 

يحجي فوك الساعتين واخوتي ما بين واحد بيهم

وامي شكد حجه ابوي بس بقت تلوم عبنها ملجوم

گلبها ورجعت للحوش واكفه بهلشمس الي تصمط صمط

تفرگ بديها وتصفگهن بقلة حيله انفتح الباب ودخل معاذ

وراه جهاد وزياد وشهكنا كلنه من شفنه جهاد ملابسه دم

وحتى معاذ بس مو مثل جهاد ركضت امي عليها ادك وتلطم

وماكو على السانها غير هاي الچلمه الولد يردون يفهمونها

ما تقبل تصيح بصوت وملخت روحها وتنعي وادك على وجهه 

ابتسام:: ويمه وليدي ولك يمه حاررث عمت عيني عليك يمه يمه ماتت روحي ولكم جبتو مدمه يمه

وليدي كون ميته ولا شفت يومك عزيز امك ولك حارث

يا روح امك ولكم دفنتو اخيكم وجيتوني لفه التراب

جهاد:: كافي يمه اشش دحكي عليه اشش ماكو شي 

يمه لا تضربين وجهج ما بيه شي مو دم هذا مو دم

-ولك يمه عفية على گلبي دافنه عزازه ولج يمه خالد

وحارث فد يوم عمت عيني عمت عيني واشتم هوى وراهم يمه يولي چتلو اخيي ووليدي هذا هذا دم منو

هاا خالك دم خالد لو دم حارث ولك شلون تعوفهم 

معاذ:: يمه فدوه لوجهج كافي اصحي گنالج ماكو

شي دكومي يا عيوني كومها جهاد نفوت جوه 

-على صوت امي دخلو خالي محمد وخالي جاسم وفرات

وراهم وجهه مخطوف لونه سحب امي من جهاد وگاله

فرات: امشي جهاد غير ملابسك امشي كووم جهاددد

-عاط بي وجهاد عينه على امي الي تتصرف بدون

وعي كعد خالي محمد يمسح بوجهه ويرجع ملفعها على 

راسها وفاطمه بس صوت شهكاته ومگابله امي حتى ما

تكدر تحجي ظلو يحجون وياها امي بس ما يفيد لحد ما

خالي جاسم دحك عليها وحجه عليها ورجع يغلط على 

خالي خالد وامي ادحك عليه وبعصبيه ضربت وجهه وكامت

ابتسام:: لا تغلطط عليه لا تغلط من وراكم من وراك مات

مو انت كتله تزوجها حتى لا تخرب بيت اختك وتالي حتى

امي ما ظلت تحجي وياه مو انت خيرته بينه وبين بنته 

كله من وراك ولك هنت اخوك بمضيف ابووو علمود

الفلوووس انت دزت عليه حتى تهينه ورجعت طردته وكتلو

هاك ارتااح مات خالد وصفت كلها الك مات خالد مااات

-حجتها ووكعت بالكاع واني وفاطمه وخالي محمد وكفنه

يمها نهدي بيها بس ما يفيد ظلت بس تنوح و تبچي رفعت

عيني شفت فرات وجهه مخنوگ حتى شريان بكصته طالع

وعينه على امي وفاطمه الي ما طلع حسها بس دموعها

تجري اخوتي ما واحد بيهم تحمل صارت دموعهم تجاره

طلع جهاد من البيت وره ما بدل وكف يم امي سحبها

وگومها وبيدها الثاني سحب فاطمه ومشى دخلهن للبيت

ابوي جان واكف اباب الاستقبال ويدحك علينه وهو مو اقل

من وجع امي ظل خالي محمد يمنه لحد ما هدئت امي 

ويا صوت اذان العصر ومحد منه تغده ولا النه نفس كامت

امي واني وراها اخاف لا تسوي بنفسها شي لو تگع ادحك

عليها غسلت وجهه وتوضت ولفت ملفعها زين ورجعت

فرشت المسجد وكفت تصلي واحنه من شفناها صلت

يلا ارتاحينه كام خالي طلع وصاح لجهاد ومعاذ اخذ ابنه

وطلع وفاطمه هم كامت تصلي عاطته بينه جديتي حتى نصلي ركضنه اني وتبارك توضينه وصلينه ورجعنه كعدنه

اندحك على امي الي ظلت كاعده بمكانها وتسبح رفعت

عيني على دخلت عمتي كمت سلمت عليها وكعدت بسد امي تحاجيها وتصبرها وامي بس تهز راسها بدون ما تحجي

مهى

واكفه انظف بالمطبخ وانتظرهم يجون شهكت 

واني اشوف عمر مضمد معلگ ايده وكوه يمشي ركضت. 

عليه وهو سحبنه لحضنه يهدء بيه وامي جت وراي تلطم

ورحاب من جهه انريد نفهم شبي رفعت عيني على وجهه

-هذا صوت الطلق عليك ضربوك انت؟ 

عمر:: ماكو شي هيج عركه خفيفه وهذوله جعاويط لا تخافن هاي مو هياني گبالجن شو امسحن دموعجن

عماد: وخرن يابه ما بيه شي هاي لو اني ما تبچن عليه

رحاب:: اسم الله عليك هاي شبيكم لا تخوفونه عليكم

عمر:: يروح اخوج عليش تخافن اخوتجن زلم ما ينخاف عليهم يلا بنياتي اروح ارتاح وانتن روحن ادرسن خوش

-هزيت راسي وهو راح لبيت فرات وامي ولا عبالك بس

اول ما شافته لطمت من شافته راح لبيت فرات ظلت

تغلط عليه عفناها وجديتي ما تحركت حتى على صوت

عمتي ابتسام لا راحت ولا تحركت وكالت اروح اشوف 

بنتي شبيها بيدها المسبحه وصافنه ما ينعرف شبيها

دخل ابوي يسب ويغلط على عمتي وره شويه جيه وراه

فرات واحنه ظلينه مثل الاطرش بالزفه ما مفتهمين شي

ولليل بيتنه متكهرب واكفين نصب عشه و رحاب تحضر

عشه عمر سوينه معلاك شوي طب عماد مگلوب وجهه

عماد:: ابوج وين

-جوه بالغرفه ليش

عماد:: حمدان يريده وجه الفگر من جيه لهسه نطلع

من مشكله ندخل بمشكله امشي صيحي مالي خلكه

مهى:: عافني وراح غسلت ايدي ومسحته بثوبي ورحت

لغرفة ابوي دكيت الباب ودخلت جانو كاعدين هو وامي

جاسم:: شكوو انتي هم 

- عمي حمدان بالمضيف ينتظرك 

جاسم:: اي ناقصني اني ناقصني يلااا وليي هسه اجيي

عفتهم وطلعت هسه اني شكو هو شويه وطلع وامي

وراه بس راح دارت عليه وغمتني وتقدمت وكالت.. 

نسرين:: شوفي ولج راح وره ما تخلصين امتحانات تجي 

خالتج تطلبج لابنها والله اذا رفضتي اموتج اصب عليج

نفط واحركج كافي تريدين تظلين بايره شووفي ولجج

سوالف اتمعشك ما تمشي يمي حتى اخلص منجن فد مره

مفهوم كلامي مفهووووم ردي عابت هل وجهه چلبه حيوانه

مهى:: انهضمت منها هسه هي كوه ما اريد بس يردون 

يخلصون منه لو ما شايلنكم بالصلاوات كعدت بكاع المطبخ 

وابجي ورحاب يمي تقنع بيه اوفق وادري امي محاجيتها

رحاب:: عود ليش ما ترضين تره ما ينطونج لمعاذ وشفتي

اسلوبه وبعدين انتي تريدين تتزوجين بالمدينه وهاي جاج

ابن المدينه مدرس وشحلاته ولج امكانيتهم زينه والله 

تعيشين ملكه وحتى يجوز يسفرج امسحي دموعج وافقي

-عافتني وكامت بالله هاي شحجي وياها ولو ما اعتب

عليها اعرفها تعلوم امي كمت غسلت وجهي وكفت اكمل

بالعشا شفت ابوي طب اشرلي اصب الاكل هزيت راسي 

درت العشا وكعدنه كوه ناكل بس جديتي مو طبيعيه بس 

ساكته وحتى اكل ما اكلت ادحك ابوي ولا اهتم ياكل ولا

عبالك امه ادحك عليها عينها عليه عافت الاكل وكامت

واني ورحاب وحده دحك على الثانيه انقهرت عليها كمت

وراها لكيتها بغرفتها دخلت وكفت يم راسها احاجيها 

-جده شبيج عيوني شو كمتي بدون ما تاكلين مو زين عليج

حسنه:: ما اريد روحي لا تجن يمي مالي خلكم اطلعي وسدي الباب وراج اريد انام ومن تطلعين طفي الضوه

-: طفيت الضوه وطلعت گلبي يوجعني عليها صح

هي عصبيه وتحجي علينه ومرات حتى احسها ما تحبنه

بس تبقى جديتي والله وضعها يقهر اكو شي قاهرها وما تحجي رجعت اغسل مواعين وبالي يمها ويا ما خلصت

دخل عماد بيده الموبايل يراسل اشرلي بيده جاي واني

نعسانه واريد اراجع صبيتله وهو وكف يمي يحسب الستكاين 

عماد:: انوب يابه تره الولد يمنه ولا اكول حطي الستكانات

والشكر والجاي اهناك انصب روحي انتي اقري طالبةسادس 

-همزين حسيتو والله على هذا حجيكم ولا اطلع معدل 

بعدين عماد غير نفتهم شبي عمر وليش متكاون ما تحجون

عماد:: يمعوده علمود السگي و ولد جبار هم يدورون

مشكله وهذوله طايشين وبيدهم السلاح عود يخوف

بعمر ضارب بالسما ومن شايف عمر ما مهتم ضربه 

وجت بيده وجت من ميل ابوج راح يفصلهم وياخذ 

افلوس تعرفينه ناس محتاجه وين شايفين الفلوس 

دجيبي خلي اروح يمهم وانتي روحي ادرسي اندور معدل 

مهى:: غير لو افتهمت عليه رحت لغرفتنا تمددت بفراشي

وافكر باخوتي وبحالتنه فعلاً ابوي ما يفكر غير بالفلوس

يبيع الاول والتالي وهو بالحجي وياك للموت بس جبت 

طاري الفلوس باعك بقيت حايره بموضوع امي بس قررت لا

كافي خلي اوافق واطلع مناي عليش باقيه شابعه قهر 

فاطمه

عگب هل مشكله امي ظلت ساكته وابوي يروح ويرد يحجي 

وياها وفعلاً شويه تحسنت امي وره وفات حارث صار عدها

خوف و واهس بحيث مقيده الولد اذا طلعو بالليل لو اذا

طولو خو زياد كتل نفسه على جامعات بغداد ما قبلت وراح

قدم بجامعة محافظتنه وطلعتله راد اقسام ما قبلت خطيه 

يطلع من 6الصبح ساعتين مدري ثلاث يلا يصل تخاف عليه

واكفه اطبخ بالغده اليوم تبارك تخلص امتحانات وتريد

نكافئها عود مشتهيه تشريب لحم ومروى لان سادس ما خليتها تشتغل كملت الغده وطلعت گلت خلي احوش خضره للغده اخذت المكص امي حاطته بالرازونه حتى 

من تريده تكص بي خضره كعدت احوش والشمس تصكع

براسي حشت فجل وكمت احس قبق راسي راح ينفجر 

ويا ما كمت دخت عيوني غوشن اريد بس اندل الكاع حتى اكعد حسيت ايد لزمتني وكعدتني بالكاع جسمي يرجف 

جهاد:: شبيج خويا فاطم اخذج للمستشفى مررووى ميي

-لزمت ايده حيل ما بيه لا تخاف مابيه شي جهاد بس يمكن هبط ضغطي لا يظل بالك هسه بس ارتاح ما يظل بيه شي 

جهاد:: ادري يا خويا متوازيه تحوشين خضره بهلـ ظهريه

-شمدريني اشتهيته الكم ويا الغده وتبارك تحبه

جهاد:: اووف من هلـگلب الطيب يابه اروحلج فدوه 

-ههههه يروحي انت اسم الله عليك خلي اكوم انظفه

بس جهاد شو راجع من وكت مو عندك دوام صار شي

جهاد:: لا يابه ماكو شي بس من طلعت الصبح شفت فرات

ماله خلك وظل بالي يمه ما كدرت اركز بشغلي فـ رجعت

-هاا بيها الخير خويا يلا عجل بدل بين ما يردون الولد نصب

الغده 

- ماشي يابه انتي هم طبي جوه الشمس حاره لا تتأذين

فاطمه:: هزيت راسي ودنكت اشيل سلت الخضره ومشيت

للبيت وتفكيري صار كله بفرات كعدت انظف الخضره وافكر شبي فرات مريض لو شنو انتبهت روحي عود اني 

ليش افكر بي طبه حمس خوش حيري بروحج ناقصج اهموم وتفكرين بالعالم عفته الخضره وكمت رحت للغرفه 

مقهور ليش وعليش مقهوره ما ادري صارت مروى گبالي 

مروى:: شبيج فاطمه وجهج احمر بيج شي؟ 

-لا مابيه شي خوش وامشي ولي ساعديني تعبت شغلكم ما 

يخلص يلا روحي نظفي الخضره وسوي زلاطه للغده تعبت 

انيي تعبت كله عليه عوفوني ارتاح فد يوم عمري خلص وشغلكم ما يخلص يلا شكوو صافنه عليه شنو خبله گبالج

مروى

تفاجئت من شفتها عصبيه واني ادري بيها مو علمود الشغل

مقهوره اكو شي قاهرها وصدك هي ما ارتاحت من تطلگت

رجع كل شغل البيت عليها وجهال معاذ وامي من صفحه وضعها ما يعجب عفتها وطلعت ما اريد ازيدها عليها طلعت

من الغرفه صار بوجهي جهاد من ملامحه عرفته سمعها

بعدني ما حاجيه عافني وطلع هاي شبيهم اليوم اخوتي 

كعدت انظف الخضره وجت جديتي يمي وتحمد بريحة الاكل سحبت مني السله وهي كامت تنظف وتحجي علينه

الجده:: ولجن خلن رحمه بگلوبجن ما دارن اخيتجن

انتي وتبارك تره فاطمه متعوبه وما لحكت تريح گلبها

ذبو جهال اخوج عليها وهم خاف تلوم نفسها وتحسب

بسببها تطلكت امهم اعينه اكعد وياها چلمه مني چلمة منج انطيب خاطرها فطيم خوش فطيم هالله 

هالله بيها يجده بلجي الله واهل البيت يعوضها 

مروى:: انقهرت عليها وكلام جديتي صدك صح اني هسه

سادس بس ميخالف لازم اعين فاطمه ويا اذان الظهر التمت

العائله وفاطمه هي الي صبت الغده ادحك عليها دائماً تضم

قهرها بگلبها وتضحك وتسولف ويانه حتى لا ننتبه عليها بس

اكثر من مره اشوفها من انام تكعد تبجي ادحك عليهم الكل

ساكت وياكل بدون نفس وعايلتنه من وفاة حارث ما بقى بيها فرح اتشوف جونه اربع وعشرين ساعه الحزن والضوجه

مخيم علينه وره الغده لزمت كتابي اقره رياضيات واستصعبت المسأله اكره الرياضيات صعب حيل كمت 

لكيت جهاد واكف وبيده الفلوس يحسبهن وكفت يمه 

وهو رفع عيونه يدحك عليه عرفني عندي سالفه او واسطه

جهاد:: هاا يابه خيرج 

مروى:: جهاد عادي اروح اقره رياضيات يم ريام هي حيل

شاطره وتفهمني والله ارجع بس اكمل خاف ارسب بي

جهاد:: خلي اخوتج يقرونج شكو رايحه اهناك كولي لزياد

-لا عفيه زياد يكاوني وما يفهمني زين واني اريد على واهس

ريام عفيه جهاد اني جيت عليك حتى تكول لامي مو انت ترفض 

جهاد:: شني اشتغل واسطه يمجن يلا عمي روحي امري 

لله جيبي عبايتج والحگيني حتى اوصلج بدربي ومن ارجع

امر عليج 

مروى:: من فرحتي كمزت وجريت راسه وحبيته وركضت

للغرفه اخذت عباية فاطمه لان معلگه گبالي وشلت كتابي

وطلعت لكيته واكف يحجي ويا امي وامبين على وجهه ما راضيه بس ما تكدر ترفض جهاد طلع واني مشيت وراه 

بعدنه ما وصلنه بيت خالي محمد وفرات صاح على جهاد

فرات:: ويين ابو الجود يلا راح نتأخر ورانه طريق

جهاد:: اصبر لك خلي اوصل اهلي و اجيك يلا يابه روحي

مروى:: درت عليه كتله روح جهاد اياني وصلت هسه

عمه تفتحلي الباب وماكو احد انت وراك شغل وطريق

هز راسه واشرلي روحي ومشيت سريع وكفت ادك 

بالباب وجهاد راح صعد بالسيارة وبقى ينتظرني ادخل

بس تاخرو وما فتحو الباب رجعت ادك بقوه سمعت صوت 

اشرت لجهاد روح وفرات ما صدك شخط السياره وراحو

واني واكفه بالفي انتظر يفتحون طگت روحي من الحر هاي 

شبيهم ردت ارجع وانفتح الباب درت وجهي توه ردت احجي صار بوجهي حامد فتح عيونه مستغرب وكفتي بابهم

وطلع يدحك منو وياي من شافني وحدي انگلب وجهه وحجه بعصبيه 

حامد:: شنو وحدج جايه؟ 

مروى: اي وحدي عندك اعتراض وخر اريد افوت يم البنات

حامد: احم شلون تطلعين وحدج والدنيا ظهر يابه ما يصير اخوتج شلون يرضون بنيه شابه وحدها بالله شافج عمي ما تصير مشكلة 

مروى:: لا ما تصير وكول لنفسك شلون ترضاها موكفني 

ساعه بالجول وبهلـ حر وتحجي على اخوتي لا تخاف جهاد 

وصلني وراح وهسه يصير ادخل يم البنات لو ارجع لبيتنا

حامد:: على كيفج يابه تفضلي تفضلي البيت بيتج

مروى:: وخر من الباب واني دخلت وبداخلي احجي عليه

شدخله واكف ويحقق وياي ناقصني ناس معقده فتت للبيت

هدوء وكفت بالهول ماكو حس شنو نايمين رجعت طلعت 

لكيته واكف يترس المبرده رفع راسه شافني واكفه ذب السطل وكف مسافه عني 

حامد:: هاا شو طلعتي 

-شو ماكو احد شنو نايمين 

-لا فوتي بغرفة البنات كاعدات بس ابوي وامي نايمين 

مروى:: والله ما الهن حس خاف نايمات تعال وصلني لبيتنه

حامد:: شبيج يابه والله كاعدات امشي وراي هسه اصيحهن الج شكو تردين لبيتكم هذا هم بيتج ان شاء الله 

مروى:: رفعت حواجبي وهو دنك ومشى واني مشيت وراه

دك باب غرفتهن شويه وطلعت ريام مبتسمه وبس لمحتني

طلعت جرتني وتحاببنه ودارت على حامد من حجه وياها

حامد:: يابه صار ساعه خطاركم واكف بالباب ما تطلعن

ريام: والله ما ادري بيها تعرف ريتاج نايمه وتشوخر يمي

كل الهلا بخطارنه زين جيتي حتى نقره سوه يلا من رخصتك

حامد:: غاليه يابه اخذو راحتكم

مروى:: دخلنه اني وريام رباب من شافتني كامت وتبواسنه

بس ريتاج نايمه كعدنه نسولف ورباب كامت تسويلنه جاي

واني وريام فتحنه الكتاب وبدينه نقره ما شاء الله حيل 

شاطره بحيث شرحته الي بطريقه احسن من المدرسه 

لل4العصر واحنه ندرس وكعدت ريتاج مگابلتنه وتحجي علينه وعمتي من شافتنه نقره صاحت بريتاج حتى لا تلهينه

خلصنه قرايه وكعدنه بالحديقه نشرب جاي ويا البسكت

ونخطط وره الإمتحانات نسويلنه طلع للبستان لو نلتم كلنه

قبل المغرب دك الباب كامت عمتي فتحت الباب عينه عليها

نريد نعرف اخذت شويه ورجعت يمنه بس واضح ضايجه 

امنه:: عمه مروى دزو عليج والله لحيت ما قبل زياد

-لا عمه هم يلا تونست يمكم ان شاء الله بس نكمل نلتم

رحت جبت عبايتي والكتاب وطلعت لكيت زياد واكفلي

بالباب وكفت يمه سلمت على عمتي ومشينه وصدك 

وجهه مال واحد ضايج درت عليه كتله زياد شبيك اكو شي 

زياد:: لا ماكو شي بس يا اخيي امي واهسها يذبح جهال 

خما جهال واحد شكبره وتعال لا تطلع لا شي ما ترهم 

طگت ارواحنا منين ما اجيها ما تقبل الي الله كاتبه يصير 

والموت حق لو نحط ارواحتنا بقوطيه جاينه جاينه بس 

تعال قنع ام جهاد يلا دمشي انتي هم مال اهج واخليكم

مروى:: طبينه للبيت لكينه جهاد ومعاذ وفاطمه كاعدين

بالحوش ذبيت عبايتي وكعدت يمهم جريت حارث ابن معاذ

ابوس بي وهمه مدري على شنو يسولفون وادحك زياد وجهه مگلوب ما يحاجيهم خلصو سالفتهم والتفت جهاد وسألني

جهاد:: هاا يابه درستي والله اذا رسبتي اكعدج بالبيت 

-لا والله انجح والله لو تشوفون ريام من تشرح فهمتني

احسن من المدّرسه واحسن من زياد طريقتها افضل

معاذ:: خوش شنريد احنه اطلعي معدل زين ماكو تعيدين

سنه 

مروى:: لا ان شاء الله وانجح هو الخميس نمتحن اول امتحان سكتنا دحكت على جهاد يدحك على زياد وهذا

گالب الچهره فد مره وصدك واضح عليه مقهور دارو عليه

يحاجونه

جهاد:: خيرك استاذ زياد اشوف مگلوب الوجه بيك شي

زياد:: عوفوني مالي خلك احد ما بيه شي بس ضايج

معاذ:: ادري غير نعرف شنو الي مضوجك دسولف يابه 

زياد:: يعني الله يرضاها الولد مسوين لمه شباب يردون

يرحون للامام علي نزور ونطلع لكربلا وانبات ونرجع جيت

حاجيت امي لو جرمت ويا تريد تموت وين رايح وهذا طريق

شسالفه يابه اني رايح لابو الحسنين عليش هل خوف ياامي

تعبت باقي بنفسي اطلع واتونس ويا الولد وهذا حسين وحامد ويانه تخيلو اطلع للكليه كل شويه مخابره والله 

اخاف اسد موبايل لا تتصل وما تحصلني غير تموت تره 

واهسها مو زين واني تعبت من هذا التقييد حالي حال الشباب اطلع واتونس وما يظل بالي لا امي صار بيها شي من وراي 

-اخوتي كلهم بقو ساكتين ما يفيد بيها شكد حجو وياها

ما يفيد وهمه مقهورين على حالها عايشه بقلق طول اليوم 

ظل جهاد يحجي ويفهم بزياد و وعده هو يحاجيها ويقنعها