رواية سداد وبنت الفصل الثالث عشر 13 بقلم الزهيريه

بقلم الكاتبة الزهيريه الزهيريه 

لم يؤلمني السقوط 

ولا بعد المسافة ولا حدة الارتطام 

آلمني انني كنت أثق باليد التي دفعتني 

ألق/ طبعًا كل شي تتوقع بس غدر وخيانة انسان هاي أصعب الخيانات يعني كل شي إجى في بالي الا غدر هيثم بيه ما إجى في بالي واني من سمعت جميله تحچي وفهمت المقصود بس حبيت أغالط نفسي وادعي من الله أكون غلطانه والا وين أروح وظليت مثل بلاع الموس لا اگدر ابلعه ولا اگدر اطلعه اذا بلعته جرحني واذا طلعته فضحني والأفكار تضارب براسي ومن طلع الصبح وبعد ليله تعيسه مرت عليه ورده گعدت وبعد شويه رجعت 

ورده / اگلچ ألق جميله تگول اليوم لا تطلعن من الغرفة 

ألق/ اي واذا نحتاج حمام شي شلون يعني قابل احنه محبوسين 

ورده/ تگول گومن هسه تريگن سبحن واخذن مي ودخلن للغرفة وبعد لا طلعن راح يجوني ضيوف وأني راح أسبح هسه واجيب ريوگ ومي وبعد ما اطلع اويلي شوكت يجي الكفيل ويجي ياخذني ضياء ونخلص 

ألق / صدگ ضحكتيني ورده من كل گلبي يعني اني مصدگه انه ضياء خطيه غالق خطه على مود الكفيل والله انتي على نياتچ 

ورده/ شنو قصدچ ورده ترى خفت 

ألق/ لا تخلين في بالچ روحي سبحي 

وراحت ورده وآني أتصلت على هيثم وهو جاوبني بعد ما دگيت عليه يمكن اكثر من اربع مرات يله جاوب 

هيثم/ شكو شو اليوم من الصبح مخابره 

ألق/ شوف هيثم اني اريد منك تحولي الفلوس كلهن النطيتهن الك 

ومن گتله هيچ بالبداية سكت كأنه چان يدور على كذبه وبعدها حتى من جاوبني چان مرتبك 

هيثم/ هاااا شنو أحول الفلوس وليش اكو سبب 

ألق/ ماكو سبب بس اريد الفلوس يمي 

هيثم/ شوفي خلي اگلچ من هسه فلس أحمر ما انطي وشتردين سوين سوي احولچ فلوس شنو انتي كل عقلچ 

ألق/ هذا آخر كلام عندك 

هيثم/ اي فلس ما انطي ويله بعد لا تخابرين لما يجي الكفيل 

ألق/ وغلق الخط بوجهي يعني صحيح همه دى ينتظرون يجي الوقت المناسب حتى يسلمونه للكفيل يعني هيثم خلاص اخذ الفلوس وبعد ما أشوفه ورجعت أتصل على هيثم لگيت خطه مغلق هنا ثبت عيد عندي ظني بمكانه خلاني افور احس الحرارة گامت تطلع من راسي بوخت حضرت ملابس إلي أريد أدخل للحمام وبس طلعت ورده من الحمام واني گبل دخلت نزعت ملابسي وگفت جوه الدوش هنا خانتني قوتي ودموعي گامت تنزل شگد بچيت لما الله گلي بس الى ما خلصت طاقتي ودموعي يله طلعت ورحت يم ورده بالغرفة وهي محضره آكل ومي وبعدها گامت قفلت الباب 

ورده / شبيچ ألق شو احسچ مو على بعضچ أكو شي 

ألق/ شوفي ورده راح اگلچ شي بس لازم نسكت لما نشوف شنو راح نسوي واياچ وبالچ تخلين جميله تعرف شي من الراح اگوله الچ 

ورده/ شكو الق قلقتيني صاير شي اني وما أعرفه 

ألق/ وحچيت كل شي سمعته من جميله وهي تحچي بالموبايل وظلت خطيه مصدومه ودگ على رجلها ووجهه 

ورده/ ولچ ألق شلون بينه وين راح نروح اني على أهلي بعد ما اگدر أرجع والله بس أرجع على اهلي يذبحوني وهذا الكلب ضياء غدر بيه وباعني 

ألق/ هذا كله عرفنا انه احنه نصب علينه بالحب واجينه لهنا وباعونه المهم من هذا كله والشي المجهول والما عرفنا وهو هذا الكفيل راح يودينه المن وشنو راح يسوون بينه 

ورده / عفيه ألق خاف يذبحونه 

ألق/ يمعوده يدفعون فلوس على مود يذبحونه لا بس لازم راح يستخدمونه بشي احنه بعدنه ما مفكرين بي وشوفي جميله من گالت لا طلعن من الغرفة يعني هذا الضيف جاي علينه وشوفي وگولي گالت ألق لهذا لازم نراقب جميله وبعدها لازم ننهزم منا أفضل النه 

ورده/ واذا طلعنه منا وين نروح 

ألق/ خلي نطلع منا وبعدها نشوف 

وبذاك اليوم ما اجى الضيف المنتظرته جميله بالنهار اجى بساعه متأخره بالليل واجتي جميله اكدت علينه انه ما نطلع من الغرفة بس احنه بقينه نريد نعرف منو ضيف الحايره بي جميله وحبستنه على موده وبعدها سمعنه أصوات گلاصات وحچي وأكثر الحچي چان بلغه ما نفهمها وبعدها بوقت هدئت الحركه وفتحنه الباب نسمع جميله دى تحچي بس ويه واحد والغريب چانوا يحچون عربي ورده خافت تطلع من الغرفه آما اني على اطراف اصابيع رجلي ورحت تقربت على الغرفه البيها همه واسمع جميله تگول / ادري ترى تأخرتوا كلش شوكت تاخذوهن 

واكو رجال يجاوبها/ جميله اكو تشدد من قبل قوات البيشمركة والدخول لأربيل صار كلش صعب والكفيل يگول اني قبل كم يوم تكفلت بنات ودخلتهن لأربيل وما معقوله الكفيل نفسه يتكرر أكيد قوات البيشمركة راح تتخذ إجراء ضده وهنا ماكو واحد يتلاعب بالقانون 

جميله/ ادري چانت سهله شوكت ما تجي البنات كلها أيام ويجي الكفيل ياخذهن ليش هذا التشدد على شنو 

الرجل/ كلامچ صح بس هسه شوفين هذا التشدد لإن منتشر مرض الأيدز بهذني القرى الناخذ الهن البنات وهمه يعرفون ماكو واحد ينقل مرض الأيدز غير البنات الي يدخلن لأربيل دخول غير شرعي فهمتي لهذا قوات البيشمركة مشدده وحتى اكو قرى غلقوها بس ما طول السالفه الا ما نلگى حل والبنات اليمچ كلها أيام ونجي ناخذهن 

وبعدها آني ابتعدت من منهم ورجعت يم ورده من بلغتها شنو حچوا 

ورده / ولچ ألق تدرين الأيدز ما ينقل غير بس عن طريق الدم والإتصال الجنسي يعني شنو احنه ماخذينه گح.... هسه عرفت ليش يدفعون كل هاي الفلوس 

ألق/ گظينه ذيچ الليله كلها قلق بقلق شلون لا عدنه فلوس ولا عدنه آحد اروحله صرنه محبوسين يم جميله واتفقت ويه ورده انه نبوگ فلوس من جميله وننهزم وبعدها الله يدبرها النه وبس احنه في بالنه انه بعد گدامنه أيام مثل ما سمعت جميله والرجال أتفقوا بس تجري الرياح بما لا تشتهي السفن 

بعد يومين من مقابلة جميله والرجال بالليل واحنه نايمات اجتي جميله گعدتنه وچانت الساعه 3 ونص بالليل 

جميله/ يله حبيباتي إجى الكفيل وضياء وهيثم ينتظرون بأربيل يله روحن ويه الكفيل والله يسعدچن 

ألق/ظلينه أني وورده وحده تباوع على الثانيه متفاجأت وگتلها لجميله هسه نبدل ونجي وهي طلعت 

ورده/ شنو راح ياخذونه شلون الق 

ألق/ البسي بنطرون حتى نگدر نركض يله بسرعة بدلي 

وبدلنه ملابسنه وطلعنه وشفنه أكثر ومن شخص وأكثرهم ما يحچون عربي بس واحد وهو 

گال / يله شوفن ذيچ السياره السوده اركبن بيها هسه نجي وقبل ما اطلع حسبتهم چانوا سبعه ويه هذا اليحچي عربي طلعنه بره شفت سيارات 2 سوده عالية واني وورده نمشي ونتلفت ورانه نريد نشوف اكو احد يمشي ورانه واكو واحد چان واگف بالباب الداخلي مال بيت جميله وعينه علينه واحنه هم سوينه نفسنه رحنه على السياره وفتحنه الباب وهو بس بعد نظره عنه احنه ركضنه بكل سرعتنه طبعًا وين رايحين ما نعرف بس المهم نركض وساعه متأخره من ليل وبذاك الليل نسينه شنو خوف إضافةً الى الظلام وورده شويه دبدوبه كل ساع تگلي 

ورده / ولچ ألق والله فحطت الله عليچ اوگفي خلي آخذ نفس 

ألق/ ولچ بس نوگف ننتهي أركضي 

ورده/ ولچ بس گليلي نركض وين راح نروح 

الق/ ولچ اي مكان نقطة سيطره ابو سياره مستطرق او خلي نلگى باب بيت ندگه آلمهم نخلص وصار علينه ضوه مال سياره 

سداد/ كل يوم يفوت عليه احس نفسي بكابوس وأتمنى اصحى منه بس مع الاسف كل ما التفت بكل الوجوه ما الگى وجه أبني أيليا ولا وجه بنتي روجيدا أعرف انه هاي حقيقة وحتى صرت اوهس على بنتي يبرق أراقب كل تحركاتها أخاف هم صير مثل روجيدا وبعد ما حقق الضابط فرقد ويه آريا وشوفني اجاباتها اني ما أقتنعت بيها 

فرقد/ شوف سداد اني دى احچي وياك من منطلق ضابط تحقيق على مدار سنوات الله وكيلك اعرف البشر صادگ لو كاذب قبل لا يحچي بس إني عليه بالادلة الگدامي يعني المحكمة عليها بالادلة مو بشكوك المحكمة ما إلها شغل بشنو يشك فرقد عليها انطيني ادلة على الاتهامات العندك فقط غير هذا الشي ماكو وأنت رجل قانون كذلك وتعرف سياق قوانين المحاكم بس اني گتلك قصه كلها يم زوجة حضرتك ما تعبرها أبد وانت شفت اجاباتها يعني المخبل ما يعقلها وبقى بس ننتظر تقرير الطب العدلي غير هذا الشي ماكو 

سداد/ اني أعرف كلام فرقد صحيح بس ما بيدي شي لان حالي حال فرقد ما اعرف شنو صار بذيچ الليله الگشره وبعد ما استجوب فرقد آريا ب 3 ايام إتصل بيه فرقد وگلي تگدر اليوم تمرلي للمركز واني هم رحتله وبعد ما سلمت عليه وگعدت 

فرقد/ شوف سداد اكو أشياء راح اگولها الك والله يساعدك على ما بلاك اول شي طلع تقرير الطب الشرعي ويگول صحيح انه الطفل قتلته اخته وطريقة قتلها اله انه مخليه أخوها بحضنها بحيث ظهره على صدرها ومخليه ايدها على رگبته بحيث بذيچ اللحظة هي خايف من شي وحاضنه أخوها قوي وصاير عدها تصلب بالأعصاب وما عايفه أخوها الا هذا الشي الخايفه منه راح منها يله عايفه اخوها بس خطيه هي يمكن كل ظنها انه دى تحمي بس هي قتلته بدون ما تعرف اما الشي الثاني انه بخلال ما رفعنه بصمات أكو بصمات موجوده على بوب البيت وعلى أثاث بيتكم وهاي البصمات نفسها حديثه يعني بنفس اليوم ونفس البصمات قبل يوم هم موجوده ومن احمد خبير البصمات بالطب الشرعي قارنها ويه بصماتك وبصمات زوجتك ما طابقت ابد 

سداد/ شلون بصمات مال شنو 

فرقد/ اعذرني بس لازم اگلك الحقيقة بصمات رجال 

سداد/ مستحيل انت على شنو دى تلمح ترى آريا تحبني واحتمال ذني البصمات مال رجال الشرطة إلي دخلوا للبيت او زوج جيرانه وهاي دائمآ تجي عدنه خاف زوجها دخل بيوم الحادثة وهاي بصمات ايده 

فرقد/ سداد اني شگتلك أثناء كلامي گلت هاي البصمات موجوده مو بس بليلة الحادثة فقط هاي بصمات قديمه هم موجوده يعني أحتمال قبل يوم واحتمال قبل يومين ورجال الشرطة دخلت بس بليلة الحادثة وزوج جيرانكم غير دخل بس بليلة الحادثة لو هو دائمًا يدخل يمكم 

سداد/ لا مستحيل أصلًا هي زوجته ما داخله يمنه زوجها شيدخله يمنه 

فرقد/ خلاص نگطع الشك باليقين وراح يتوجهله استدعاء للاستجواب هو وزوجته 

سداد/ الله يخليك من يجون وتريد تستجوبهم اريد أكون موجود ولو صير زحمه عليك 

وبعدنه نحچي دخل سلام / سيدي تذكر البنيه المهزومه من اهلها ما ندري مخطوفه اجى عمها وابوها واكو واحد وياهم يگول اني من مكتب السيد ويريد يشوفك وصار ساعه يتهدد على نقيب مهند ويگول اذا ما شفت مدير المركز اليوم اعزله للمركز 

فرقد/ شوف هاي العطلات ويگلك القانون فوق الجميع هو وينه القانون شو القانون يمشي بس على المگرود الفقير وما شاء الله الواسطات قضايهم تمشي بسرعه دخلهم  

سداد/ دخلوا إثنين متقاربين بالإعمار يعني واحدهم بالخمسين أو اكثر وياهم واحد لابس عمامه ودخلوا 

وهذا ابو عمامه / سيدي احنه من مكتب السيد…. وهذا الأخ نزار وعنده قضية شرف بنت اخو ما هيه 

فرقد/ أتشرف بيك مولانا انت والسيد بس يصير انتوا اهل القانون تهددون ضابط من عدنه وتگولون نعزل المركز إنتوا خير من تعرفون القانون فوق الجميع لو القانون ناس وناس 

آبو عمامه/ لا سيدي انت تعرف احنه دمنه حار والأخ نزار بنت اخو عرض ما هيه شلون تريده يكون حاله وخطيبها خطيه حتى مهرها دفعه وهي ما هيه 

فرقد/ شو تحچون بخطيبها واحنه أبد ما شفنا شنو ما صدگ خلص منها 

سداد/ تعجبنه من گال عمها هذا خطيبها اباوع عليه چبير كلش يعني حقها اذا هجت منه 

فرقد/ هذا اني عبالي أبوها على العموم سيدنه عمها يگول مخطوفه وخطيبها ما أدري ابوها يگول انهزمت واخذت فلوس عمها ومهري هسه سيدنه دخيل جدك المن نصدگ شنو نلعب طره كتبه ونعرف منو الصادگ ومنو الكاذب شو ما شاء الله يلعبون علينه مگالب عمها وخطيبها 

ابو عمامه / سيدي انت ضابط تحقيق شلون الى الان ما لزمتوا طرف يوصلكم هي مهزومه لو مخطوفه 

فرقد/ والله مولانه هذا ألي خبلني يعني اني گدامك ضابط تحقيق تشهدلي مكافحة الجرائم الكبرى بكفاءتي اجيت على قضية هاي البنيه تحسها لغز وقضية هاي البنيه مطبقة مثل يگول گرصة خبز لا تكسرين وباگة فجل لا تحلين وطاسة لبن لا شربين وآكلي واشبعي شلون ما أعرف شلون تشبع يعني عمها من إجى بلغ هو وخطيبها چان يوم خميس وهذا اليوم تحديدًا چنت خفر وهذا الولد گدامك بنفس الليله نقتل أبنه في وقتها حچوا ويايه ورادوا دوريات تنادي بالبنيه المخطوفه وبلغتهم انهم ينتظرون أقل شي 48 ساعه يله نقبل التبليغ ونادي دوريات بغداد بالبنيه ومواصفاتها وتعميم صورها  

ابو اسكندر/ هواي 48 ساعه البنيه تكون وصلت لليونان 

فرقد/ هذا قانون يطبق عليك وعلى غيرك وانت ما تجي تعلمنه شغلنه ومع ذلك مولانه ثاني يوم اني بالبيت واجاني إتصال من جهة ما أريد أذكر أسمها گالوا عقيد فرقد نادوا الدوريات بالبنيه وعمموا صورها على السيطرات وأخذوا الاجراءات اللازمة في حين البنيه ما مر ساعات على اختفائها مع ذلك اتصلت بنقيب مهند وچان هو ضابط الخفر ونادى كل الدوريات وعمم صورها على السيطرات وراح ويه عمها نزار لبيته عمها ما عنده كاميرات في بيته والجيرانه المقابيلهم ما عدهم كاميرات لان ذوله ساكنين إيجار لهذا ما مخلين كاميرات بس بيت واحد بصف بيتهم عنده كاميرا وسحبنه تسجيل الكاميرا مال قبل يوم الحادثه وهو يوم الاربعاء ويوم الحادثه نفسه اليوم الخميس وبعد يوم من الحادثه وهو يوم الجمعه وتسجيل الكاميرا ليل ونهار البنيه أبد ما ظهرت بهاي الأيام الثلاثه أبد لا طلعت للبيت ولا دخلت للبيت وبس عمها وزوجته يطلعون ويدخلون للبيت وطبعًا الاخ الطلع خطيبها هم يدخل لبيتهم هسه أريد واحد عاقل يجي يفهمني البنيه وين تبخرت شلون وين راحت لو صارت معجزه ونرفعت للسما مثل سيدنه عيسى عليه السلام وهذا التساؤل راح يخلينه أمام احتمال وهو انه البنيه تكون نقتلت وعلى أيد عمها أو زوجته وتخلصوا من جثتها لان ماكو أحد طلع ودخل للبيت غير عمها وزوجته لهذا نزار وزوجته رهن الاعتقال وتوجه لهم التهمه قتل ألق ما لم تظهر المجني عليها او جثتها