رواية ذاري النجوم الفصل الرابع عشر بقلم زهراء السراي
أذكى أنواع الانتقام من الشخص المستفز
هو أن تمنحه هدوءاً لم يكن يتوقعه
فليس هناك ما يق تل المستفز
أكثر من برود ضحيته
:
:
✥━━━༺ زهراء جودة السراي ༻━━━✥
:
:
ليل
✥━━━༺✦༻━━━✥
لحظات النهايات السعيدة
بعد الامتحانات النهائية
بعد سيل المشاعر طول الست
سنوات
وبعد الانتظار والتعب ولحظات الأنهيار
والاعتقاد بأني مااگدر اكمل
حانت اللحظة قاعة الاحتفالات الكبرى
بجامعة بغداد الأضواء مسلطة على المنصة
وصوت نبضات گلبي يكاد ينسمع
وسط صمت الحضور
الأهل الأساتذة والزملاء الكل ينتظر إعلان أسم
الطالب الأول على الدفعة
ترقرت عيوني بالدموع واني اشجع نفسي
ست سنوات ليل
ست سنوات مو بس أيام وساعات
خلت أجزاء من روحي ذابت بين الممرات وقاعات الكلية
أتذكر أول يوم دخلت بي الكلية
اني ليل الچنت اخاف واكره ريحة المختبرات والمستشفيات
هسه أني واگفة بكل فخر أنتظر جني المحصول
كل سهر ليلة كل امتحان نشف ريگي بي
وكل لحظة انكسار چنت أداويها بالقراءة
والضغط على نفسي حتى اوصل
كلها هسه تمر گدام عيني مثل شريط سريع
تقدم العميد للميكروفون اباوع لأيديه
ورجليه تهتز زميلتي لزمت ايدي تهديني
فتح الظرف العميد وابتسم
-الطالب الاول على دفعة كلية الطب
لهذه السنة هو الطالب نوح كمال هاجس
وگعت ايدي من ايد زميلتي
وعيوني غمضتها بعد ما
غوشت من دموع الخيبة
عله صوت تصفير اصدقاءه والتصفيق يصدح بحيطان القاعة
فتحت عيوني ووگعت دموعي تداركتها
مسحتها واني اشوفه واگف بفخر عالمنصة
رجع العميد كمل
-الثاني على دفعة هذا العام
الطالبة ليل سلطان بشير
تنفست بعمق لخاطر ماما اللي گاعدة بالجهة الثانية
هي وضرغام گمت مشيت خطواتي للمنصة چانت خفيفة
هديت نفسي المراكز متشابهة
ومو كل شي لازم نحصله بسرعة تحولت قناعتي لفرحة واني
اشوف ماما تمسح بدموعها من الفرحة
ابتسمت واني استلم تكريمي وشهادتي ومشيت بفرح كأني جاي أمشي على غيمة
الفخر اللي شفته بعيون اخوين
والدموع اللي بللت وجه ماما چانت هي الشهادة الحقيقية
وعرفت ان الفخر كل الفخر مو بس لتعبي واجتهادي
قلق ماما اللي چانت تبينه بكل اتصال
وخوف اخواني عليه واني بمجتمع غير
مجتمعي
كلمات بابا اللي تشجعني ودعاء بيبي
كلهم حصيلتهم هذا النجاح وهذا التفوق
نزلت من المنصة وبقية الزملاء اخذو
شهاداتهم
واجتمعنا للمرة الأخيرة بقاعات الجامعة
واگفة واجتني يمنى سلمت عليه
-مبروك ليل يارب تحقيق كل امنياتچ
-ولك بالمثل حبيبتي
-اعتذر على كل موقف مو حلو مر
-ليششش مصار شي حبيبتي ليش تعتذرين
-موووو......
-بيني وبينچ مبينين اولاد خالچ مچلوبين
اجاني صوته الكريه
-يمنى يلا للسيااااااارة
التفتت ماشية وصاحلي
-ظلمة
مافهمت رجع خطواته تسارعت
ورايه
-آنسة ظلمة شنو مگطعين ملابسچ قبل
وگفت وخزرته
-شنو هالحچي وبعدين اسمي ليل
-والله غير ظلمة ميلوگلچ
منا وجاي كلماتچ انتقييييها ياطبيبة
المررررركز الثاني يامثقفة
-همممممجي
فتل شواربه بيده وضحك مستفزني
-الدكتورة القرچ
گالها وطلع ماشي
هالمرة لابس قاط رسمي أسود
وقميص ابيض مفتوح
نفخت حيل شگد مززززعج
حتى الهوا الحواليه
شفطه بغثاثته
وأخييييراً رجعت للبيت
دخلت المدييينة وتنفست برررراحة
لو شگد ماابتعد لو وين مااروووح
تبقى مدينتي هي المكان الأقرب لروحي
وحانت فترة الأستراحة
استرااااحة المحارب عندي شهرين استراحة
قبل صدور الأمر الأداري
گضيتهن نوم بالنهار سهر بالليل اني
وبيبي وهي تقطر عليه تقطير بقصتها
ويه بيت ابن عمها هاجس سالم
بس مرات تحچيلي شغلات وتتراجع
متريد تعرف ماما
بس اني فهمت القصة كاملة چان
خاطبها وكسر گلبها بزواجه من وحدة
بغدادية وراد يجبرها تكون زوجة ثانية
بس رفضت تستلم وعمها وگف وياها ضد ابنه
وزوجها لجدو خزعل لذلك عائلتة يكرهون بيبي
واخذو ارضها ورجعتها غصبا
عنهم وهالشي سبب عداوة
استمرت لسنين رغم احيانا بحكم القرابة
يلتقون بمناسبات بس ماكو تواصل عائلي
بينة فمنعرفهم ولا يعرفونا لا اني ولا
اخواني اما بيبي وبابا وحتى ماما
احيانا تأدي الواجبات الاجتماعية
وتلقيهم مرغمة
المهم بالليل سهر وبالنهار نوم
واكل لحد مخلصن الشهرين
كل يوم نسأل ونستفسر لحد مصعدت
القوائم للوزارة وبتمام الشهر العاشر
من نفس السنة صدرت القوائم وطلع
توزيعي حسب مكان اقامتي بأكبر
مستشفى بمدينتي ولسوء الحظ
نوح وياي تغاضيت عن هالشي
وبعد شهر من صدور قرار التوزيع
اجة الأمر بالمباشرة المهنية كمقيمة
دورية ويافرحتي بأول لاب كوت البسه
كمقيمة دورية
ويافرحتي الاكبر بتعلمي لقيادة السيارة
بفترة عطلتي والهدية من بابا واخوتي
سيارة صغيرة بناتية وتم وخطيت اول
خطواتي للمستشفى وبابا وياي لازم ايدي
مثل طفلة صغيرة بأول يوم دوام
بس وصلت باب المستشفى وامن علية
قيادتي مضبوطة وگف
-ممتازة بابا وبطلة يلا
توكلي رفعي راسي
مثل مارافعة راسي دائما
باسني وراح دخلت ولگيت
المجموعة موجودة وبديت رحلة
جديدة بأروقة المستشفى
بديناها بوحدة الذاتية
وإدارة المستشفى حتى نكمل اوراق
المباشرة
اخذنا الاوامر المباشرة وتحددت الدورة
الأولى بقسم الجراحة لمدة ٣ أشهر
أول يوم بالإقامة الدورية
چان يوم لا يُنسى
مزيج من الرهبة الفوضى
والأحساس المفاجئ بالمسؤولية
بدينا اللقاء بالمقيم الأقدم
اللي بده يعرفنا على نظام الردهة
بداية من قائمة بالمرضى
لحد كتابة الملاحظات اليومية
وشلون ندونها باضبارة المريض
واگفين احنه مجموعة وهو يوجهنا
اني واگفة وانتبهت لنوح واگف
گدامي نافخ نفسه بس شافني
اجة متعمد وگف بصفي وحجز
بيني وبين اطباء اخرين
استغربت فعلة بس
ابتعدت عنه وتم تولينا المهام بس
اصعب شي چان الراوند الصباحي
هذا چان الجزء الأهم والأكثر توترا
باليوم الأول الاخصائي ويا المقيم الاقدم
واحنة المقيمين الدوريين
تهت بين الاستماع بتركيز
تدوين ملاحظات الأخصائي
حسيت نفسي ضايعة وسط
المصطلحات الطبية السريعة
خلص الراوند يلا تنفست براحة
وبدينه يومنا الخافر الأول الممرضات
والممرضين القدماء ذوله اعتبرتهم كنز
معلومات اي شي خطأ نرجعلهم
ليلة متعبة مهلكة كاملة خلصت ويه
الراوند الصباحي ثاني يوم
وتسليمنا الردهات للخافرين البدلاء
رجعت للبيت مااندل طريقي بس اريد أنام
تركت غرفتي بس غيرت ملابسي
بوجهي رحت لغرفة بيبي گاعدة
تسبح ومصلية صلاة الضحى
شمرت نفسي بفراشها شويه واجت يمي
-ها بيبي الله يساعدچ
-تقبل الله بيبي
-بعد روحي شلونچ بأول يوم
-بيبي تعبببببببب وفوگ التعب
المغثة
-ياااااا بيبي شلحگتي اليوم اول يوم
همستلها
-نوح ابن كماااال وياي
-شوف الحظ وهذا هم مسودن مثل
هويجس الصغير
-اي بيبي مثل اخو نفس العجرفة
وشوفة الحال
-اعلمچ ذوله شني دواهم
-اييييييي بيبي
-ذوله دواهم بس تصعدين اعلى منهم
يتسودنون
-شلون بيبي
-صيري بكل شي گبله واحسن منه
وهاااااا خاف يغثچ رديله المغثة
وخاف لسانه وصخ انت صيري احسن
منه ردي بس بنظافة وادب
-بيبي ماعندة اخلاق ويتجاوز
-اي بيبي ترباية عماته الحياية
-لعد وامه
-ماتت لأن رويحة حلال وخوش
بت بس جابت الصغير وطن ماتت
-الله يرحمها
-بيبي صدگ اكو وحدة مسميها على اسمچ
-هههههههههههه چانت سهاد حبوبة هاجس
تصيحلها يالماتتسمين حتى ماتسميها عذبة
وتالي سمتها بالبيت نهاد ومشتها عليها
-رااااعبهم اسمچ
-الحق يرعب يابيبي يالله ارتاحي
ونامي
-بيبي مرغيلي راسي
بقت تمرغ براسي وتقرالي
ادعية لحد منمت ومحسيت بنفسي
لليل اتصلت بيه وحدة من البنات ويايه
بعد ماتبادلنا الارقام وبلغتني
ان اقامتنا يسموها بالمستشفى يوم
بيوم
يعني هم الصبح لازم استلم من
الخفر اكلت وجهزت ملابسي لثاني
يوم ورجعت نمت بشكل مبكر
الى أن گعدت اليوم احساسي افضل
من دخلت واستلمت الردهات اني
وزملائي بالردهات مابعد الجراحة
نچيك العلاج
الضغط السكر مستوى الاوكسجين
واذا احتاجيه شي المقيم الاقدم
موجود
وهيچ أستمر الوضع لمدة شهر
صرت متمرسة ونحت الصخر نحت
وصارت الاشادات كلها الية
من كلام حلو لأطراء عن نباهتي
ومااكذب نوح وياين ند بند
نفس المستوى بكل شي
لحد بليلة صارت الخفارة احنه
سويه على نفس الردهات
گاعدين بأستعلامات الردهة
نقفل الراوند وبلا نقاش سألني
-شتعرفين عن قصة بيبيتچ
وجدي
-اعرف الخاين منو والوفي منو
-جيييد وجدتچ گالت ليش تركها جدي
وشمرها شمرة الحاجة القديمة البالية
وگفت عصبية حيل وأحس اريد اكفخه
-شخليتو لسوالف النسوووان وانتوو
تجيبون وتودون كلام غير واقعي
وگف خله عينه بعيني
-من قباحة جدتچ ونذالة افعالها
ماتت امي قهر وكمد وحزن اسكتي
بسسسسس وخلي الاسرارررررر مخفية
لأن تارررريخكم مخااااااازي
مشى واني ردت اروح وراه تراجعت بعدين
حتى مااقلل من قيمة نفسي گدام
احد
خلصت الخفارة بطلاع الروح كل
شي اسوي هو يتدخل ويحاول يحبطني
رجعت بيومها للبيت محملة اسئلة
وعلامات استفهام بعد مانام الكل
توجهت لغرفة بيبي ادري بيها
تصلي صلاة الليل وتنام
لگيتها متوضية وگاعدة
متحضرة للصلاة
-هلا بيبي
-بيبي عندي سؤال
-گولي بيبي
-بيبي نوح گال شغلة واني ادري
بي يكذب بس بيبي هو مقتنع ويگولها
بقهر
-شني بيبي
-يگلي امي ماتت بسبب جدتچ
-ااااااخ المسمومات ماخلن واحد
ما چذبن علي
-يعني تعرفين بهالحچي
-شلون مااعرف وابو كمال بوكتها ضرب
نهاد وهي مرة شگدها شكبرها
-شصار
-كمال ابو هاجس چانت عنده معاملة
يم امچ ورايح راد عليها للدائرة
ومالت الله كمال اخلاق ودين وانا
دوم اگولها ولد هاجس اخير منه
وخوش زلام
المعاملة مال بيت مشتري من اخواته
ولازم يجيبهن للدائرة ويا يوقعن اجن
وشافن امچ مسلمات وهاي ولاچنهن
شو لهناك وتعاي مرت كمال للدائرة
بنص الموظفين لاعبة بأمچ لعب ووياها نهاد
-لييييش مو تگولين خوش مرية
-ايييييي يمه خوش مرة
بس بالغيرة المرة تتسودن
وذني لاعبات براسها خطيه وهي
حبلة بالصغير ستوها الها سبع اشهر
من اجت امچ بيومها راد تموت
ومن يومها شكل وياها الضغط من القهر
مفشرات وغالطات ومتهماتها بشرفها
امچ رادت تبطل بس انقلت بعدين من الدائرة
-وهاي هي
-لا يابيبي انا ماقصرت رحت لبيتهم
خليتهن عد حدهن بس البت مرت
كمال تبچي تگول نهاد وميعاد
گالن شفناها طالعة وياه بسيارته
ورايحين للبيت المشتري وحالفات
لزمتهن گدام ابوهن ......
-شنو ساكنات ويا اهلهن
-لا غير السلطان هاجس الرشيييد
لامهم بنفس الشارع بيت بصف بيت
-هههههههههههه وشصار
-خليتهن يجن وگتله يحلفن عالقرآن
-وحلفن
-لا برابيگ گالن مرت كمال هي شكاكة
وگالت تعالن وياي
گامت البت حلفت عالقرآن هن
گالن والاكدتلها هي نهاد
بساعتها هاجس الرشيد ضربها
ومرت كمال عالصار تعذرت مني
وطلعت
-لعد ليش يگول ماتت من وراچ
-المرة من قهرتها من چذبهن وحلفهن
انهبطت متعاركة ويه رجلها بوكتها
وهو ساد السالفة مايدري جاية للدائرة
لامچ من عرف متعارك وياها ومن الخوفة
انهبطت وجابت الصغير وطن
وره ليليتين ماتت بحمى النفاس
-لا حول الله شنو من بشر ذني
-هاي شويه من سوالفهن يمه
بس انا اعرفهن چلبات ولا تلومين الوليدات
تربية حبوبتهم المسودنة الله يرحمها
وعماتهم الحياية هالتارسات روسهم علينه
-انت مو تشوفين جدهم بالمناسبات
وتسلمين علي عادي
-چا شني بيبي اكفشه من راسه
يضل ابن عمي بعد فات الوكت
يابيبي كبرنا
تركتها تكمل صلاتها وطلعت
لغرفتي افكر بهالعائلة اللي ناصبتلنا العداوة
على لا شيء
وهيچ استمرينا بدورة الجراحة
بعد ماسمحولنا ندخل غرفة العمليات
نتابع نظري
وشويه شويه يدربونا عالادوات
التعقيم والغرز الجراحية
وبسبب تفوقنا طلب منه المقيم الاقدم
بعملية اليوم ندخل اني وكم واحد
حتى نشارك بالجراحة مو بس كمتابعين
خارج العمليات مجتمعين نتعقم
واگفة اني اعقم ايديه
ببرود احس بي ورايه منتظر دوره يتعقم
التفتت ساند ظهره للحايط وعلى شفافه
ابتسامة ساخرة باوعلي وتقرب حچة
بهمس
-المريض حالته صعبة دكتورة
يعني يراد شغل طبي
هاي عملية دقيقة
يااااخوفي تضعفين وتتراجعين
مثل ماضعفت جدتج وضاعت احلامها
گالها بهمس وخبث مووروث من جهة
اجداده بالدم
-ياابن الباشا جدتي نفسها الخلت جدك هاجس
يعيش عمره كله يدور طيفها بالوجوه
وبالنجوم اللي على جتافه
نفسس النجوم اللي لمعتهن هي
بدموع خيانته
اشتدت ملامحه واقتربلي اكثر
من اللازم
-جدي ما وگف حياته على وعد جوه شجرة
متآكلة
حسيت عيوني جدحت شرار فلازلت اني
لليوم احن لجذوري وكلما لفحني هوى
الذكريات اروح لذاك المكان
حسيت بالاهانة الوجهها
لاصول عائلتي
-ترييييد تحدي تمام
المريض اللي بالداخل حالته تعبااانة
والدكتور طلبنا نساعدة
اذا سيطرت انت وخلاك الدكتور تشتغل جزء من العملية وطلع المريض بخير اعترف وگدام
الكل ان أبن فلان هو العلمني الطب
واذا فشلت .........
قاطعني بمكر
-اذا فشلتي ارررريد الگلادة
باوعت الها تلمع على صدري رفعت راسي اله
-شتسوي بيها وشتعرف عنها
-اعرف كل شي اعرف
المهم أررررريدها هي اخر رابط بينا وبينكم
ارييييد اكسره وننتهي
-تممممممم
گلتها بتحدي واني اتذكر
بيبي وهي تضحك وهي تلبسنياها
من داومت كلية اول سنة
-لايگتلج جدة هيج گلادة ماتلوگ
الا للمهرة الأصيلة لا تنسين هالگلادة
سويها مثل ماسوتها بيبيتچ
درج داسته وصعدت علي لاحت
نجوم السما
رديت علي وگتلة تم
-تممممممممم
دخلنا غرفة العمليات وبده
الدكتور يشتغل واحنه بحالة تأهب
لأي طلب الادوات صرت حافظتها عن ظهر
قلب
وكيفية التعقيم وغيرها هو على يمين الدكتور
واني على يسارة نساعده وويانه البقية
طلب الدكتور اداة والطاولة يم نوح
صفن للحظات يتذكرها صاح الدكتور
-صافنيييين
مديت ايدي بخفة انطيتها للدكتور
اشرلي براسه
-صيري عاليمين
ابتسمت داخل كمامتي وهالكلمة معناها
نوح يوخر
وخر من مكانه واني يم الدكتور
نناوله الادوات ويشرح وهو يشتغل الى
ان تمت العملية بخير وصاح بينه
-تتابعون الفعاليات الحيوية للمريض
تمام لحد الافاقة
طلع ونوح واگف يباوعلي
بقينة نتابع المريض لحد الافاقة فعلا
وطلعنا ويا لغرفته نتابع حالته
بليلتها بالليل بقينا خافرين وياه
خاف تطلعله مضاعفات
گاعدين عالكراسي متقابلين عينه بتلفونه
ومنهمك بالأرسال
شويه وجهه بينت علي العصبية سد التلفون وطلع
طلع شويه ورجع بيده كوبين
گهوة قدملي واحد
-بي زرنيخ
-لا سيناييد
ضحكت وهو ضحك وگعد كملنا الخفارة بهدوء
الايام البعدها وبسبب خفاراتنا سويه
صرنا نلتقي بذات الغرف ونتناقش
بالحالات عملي جدا وموضوعي رغم
التنافس
رغم هايه تصرفاته التنافسية اللي چان يسويها
بس لاحظت شغلة بوقت الراوند
الصباحي يدور مكان يصير بصفي
او ورايه ميخلي احد غريب يمي
من يشوفني مخبوصة ولود بلا كلام يسحب
طبلات ويفتر ويايه وبمرة سمعت الاطباء
الشباب يحچون عالطبيبات وهو يشتغل
وهو استنفر
-رجاءاً بنات ناس واخوات نعتبرهم
الكلام العاطل ميصير
اني بره وهو داخل المكتب اسمعه يرزلهم بأدب
-شو دائما دفااااع دكتور نوح
وخصوصا ليل
-ممسموووحلكم دكتورة ليل
انسانة بحالها ومتميزة بعملها وهالشي
بجهدها
-طريقة دفاعك تحسسني هي تخصصصك
-تخصني بت عمتي ياااطباء المستقبل
يامستقبل العرااااق المشششرق
دگيت الباب وكبستهم وهو سكت حتى ميحسسني
يدافع عني وهم فلت وجههم
-حضراتكم اذا كملتو كلامكم المقيم الاقدم
طالبكم واذا الحديث شيق ودسم
ابقو سولفو بالنهاية الكلام راد لاصحابه
تركتهم ومشيت طلعو ورايه حاول واحد يبرر
فات نوح ووگف گدامي سأله
-شنو دكتور محتاج شي
-لااااااا
مشى الدكتور وهو هم مشى التفتلي
-ترحين لو منتظرة احد
مشيت ويا واني ساكتة ومن يومها
صرت التفت لتصرفاته الرقيقة اليخفيها
خلف قناع القوة صار كل يوم يتفقدني
بحجة يتفقد الكل
وقت اكل لو شي يوگف بباب غرفتنا
احنة الدكتورات ويگول تفضلو
ومن مااگوم يگلي وانت هم قابل بقت
عليچ
واحتد التنافس بينه الى أن بليلة تولينا
كيس منتهي گالو يموت قدمتله الانعاش
اللازم لحد مااعتدل النبض وبقيت مقابلة
الشاشات علمود اطمأن على علاماته الحيوية
اجاني شايل لفات جبن وچاي خلا گدامي
-اكلي الليل طويل
-شكرااااا
-تفوقتي عليه
-شكرا على الاعتراف اللطيف
-عفوا ياحفيدة عذبة
-شكررررا جززززيلا
بقينا نحچي عن الحالات الموجودة
ونتناقش بكيفية العلاج بس طبعا المسؤول
الاول هو المقيم الاقدم والاخصائي
وصرنا كل يوم نتراهن ان الطبلة للحالة الفلانية
راح يكون بيها كذا علاج واللي يكسب يعشي
الثاني وصارت المنافسة لطيفة
مضحكة احيانا ندخل التمريض ويانه
ونغش منهم يجيبولنا الطبلات واحيانا
لا فعلا نحزر العلاج وكميته وطريقته
الى أن بمرة اجاني واني مگابله تلفوني
اقرة وتعبااانة بشكل چبير
گعد گبالي باوعلي
-اگلچ
-گول
-كافي عداوة مو
صفنت بوجها وضحكت
-الميدان الطبي
يرادله تركيز وانتِ منا مسطولة بسبب
القراية
-منو گلك تعاديني
رجع ضحك
-الشغلة وراثية بس يمكن عرفت بعض الحقائق
المغلوطة من مصدر موثوق
-نقطعها عادي مو شرط نورثها
رغم بيبي وماما عمرهم ماجابو
طاريكم بالبيت گدامنا فاستغربت
تصرفاتكم رغم اعرف ان اكو عداوة
بس المفروض تتوقف ويه السنين مو
-مووو
-واحنه اكادميين مثقفين ليش مننهي
حلقة الأذى يمنا ونكطعها
-تم
گالها ووگف مادلي كفة
-نقسم ان مندخل عداوة الاهل
بشغلنا
مديت كفي وتصافحنا
-اقسم بالله
-اقسم بالله
ومن هاليوم تشكلت حالة صداقة
من نوع خاص واكتشفت نوح بطريقة
ثانية
اكتشفت شخص حنون دافي بسيط
بعيد عن عجرفته السابقة
شغوف بالطب لحد الجنون بس تنافسي
طبيا وياي
كل خفاراتنا صارت سويه
نكمل كل شي ونطلع بالممرات يم شباك واسع
نگعد فاتحينه وبيدنا اكلنا لو شربنا
ونحچي بكل شي گاعدين وتلفونه يرن وهاي
صار اسبوع نفس الشي بهيچ وقت
يرن وميرد
-انطرشنا نووووح جاوب
ابتسم وسوا صامت
-منو الحلووة التتصل هسه
رفع راسه اليه
-تعرفيها
-يمنى
-اممممم هيچ واضح
-شلون لعد من تباوعلك عيونها تصدر
قلوب حب ملونة وفراشات
بس ليش مترد عليها
-بعد كم هالمشاعر الغير معلنة بينه
تگلي اني اشوفك اخو
-وهسه
-وره هالفترة كلها هي
تتصل وتسولف واحس بمشاعرها
من طريقة كلامها اهتمامها
صراحة المشاعر الغير معنونة
مااحبها شنو احسك اخ
وشنو ليل نهار اهتمام وسؤال وغيرة
گلتلها من تحددين نوع مشاعرچ تعاليلي
وهاي الايام كلها تتصل ماارد لأن ادري بيها
تبچي وتگضيها اعتذار
-خايف خاف تكون مشاعرها فعلا اخويه
هز راسه بأسف وابتسم
-تحبها
-جداااااا
-ليش متبين مشاعرك
-للأسف قدمتلها مشاعري ورفضتها بحجة
الاخوة واني دااااائما مخلي حدود واحترام
لنفسي ويا المقابل
-بس المشاعر تحتاج تأني
-سنتين تأني
اطلق سؤاله تحت استغرابي
-يعني من سنتين معترف
-نعم وانطيتها فرصة طويلة
ورجعت للغيرة وللاهتمام بس معنونتها اخوة
واني اكتفيت
-اني اسفة
-شبيييييچ تردين تبچين موضوع وانتهى
يمعودة
-لا ليش ينتهي
-وتعتقدين اقلل من قيمة نفسي بعد
مستحيل
-بس يمنى تستاهل
-واني مااستاهل التقليل مني
هزيت راسي موافقة
وابتسمتله
-انت تستاهل كل خير تدري شكتشفت
-اتحفيني ياحفيدة الاعداء
-ان انت من الخارج صلب عبالك حجارة
بلا ملامح
-خلف الله عليچ ومشكور
-خل اكمل
-بس بداخلك شي هيچ
لين محبوب شاااايف شنووو
بقيت افكر وهو مبتسم
-شنو بالله
-مارشملوووو حلوى
قطن
-هاي شنو
-نوح انت انسان لطيف ولطافتك
من يتعرف عليك الشخص
الغثاثة البيك وثقل الدم مجرد كڤر
-اني غثيث
-جدا چنت ويااااايه غثيث
-وانت باردة وساذجة
-انييييي
-جدااااااا
-وهسه
-نفس الشي شنو عبالچ اگلچ تغيرتي
-هههههههههههه ماكو مجاملة
-انت بنية عفوية خلوقة وهالشي
شفته بعد الايام اللي قضيناها بخفاراتنا
سويه صدگ النظرة الاولى تخدع
-شكرررررا يافتى
-العفو يافتاة
-اگلك احس دورة الاطفال مرررريحة
-لأن خُدج وهدوء انطي مجال
بس تعبر ١٢ تطلع السوالف
وفعلا صارت ١٢ وبدت الحالات
تشتد
مواليد يحتاجلهم عناية وتأني
واهتمام
كل يوم واحد يصيرله شي والخوف
والرعب ماخذني خاف طفل يموت
بس الصار اني تعودت عالاطفال
وبقائي وياهم صار جزء مريح من اقامتي
الدورية
كل يوم طفل بحكاية وقصة امل جديدة
ترويها اليه الامهات
وكل يوم يطلع واحد بعد ميتم شفاءه
نحس بالانجاز
وقبل لتنتهي فترة الاقامة مال الاطفال
صارت بلبلة وبدت الحياة السياسية بالعراق
تاخذ منعطف خطيير جدا
سقوط الموصل والرمادي تحت قبضة التجمعات
الارهابية المسماة دا**ش
كل شي چان مبهم مخيف حالة توتر واستنفار واسعة
غيرت مجرى تاريخ العراق بالكامل
خلصنا بوقتها اقامة الاطفال وبدينه مرحلة
جديدة بحياتنا كاطباء بسبب نزوح
الاهالي انملت المستشفيات بالجرحى
والمرضى اللي اتجهو خوفا من رعب التنظيم
واحتمو باخوانهم ببقية المدن حتى
يأمنون عوائلهم
الطوارئ صارت هي خط الصد الاول
للمستشفيات
كل يوم نستقبل مئات الحالات
اللي نبدي بتشخيصها واحيانا خياطة
جروح عمليات صغرى تتطلب البنج الموضعي
صرنا مثل النحل
القصص بالالاف والحكايات تكسر الگلب
وتدمعلها العين اني ونوح اختلفنا بالخفارات
وصرت احس بالوحدة
بيوم ولأول مرة هدوء اجاني اتصال من نوح
مستعجل ويحچي بسرعة
-شوووفي ليل جايين للطوارئ مجموعة
مصابين
-شلوووون عرفت
-هاجس اتصل بيه واحد ويه النازحين
اللي يفتشونهم عالسيطرات
طلع ويه التنظيم وخاتل بينهم ومفجر بيهم نفسه
-بي شي اخوك
-جررررحه صعب واني بعيد ماخذ جدي
لبغداد مراجعة لدكتوره وراجع الصبح
شوفي جرحه حساس بالرسغ وبيده اليمين
انتبهيلي بالييييمين يعني انتباه شديد
-تمام
-اني بلغته يجيچ مخصوووووص
معتمد عليچ ليل
-هاي هي والله شبيك
-حتى لو سوه شي غلسي صديقة
مستشهد
-لا شنو القضية احنه بيا حااااال
-عفيه عليچ يلا
سلم وراح واني طلعت بره
ويه طلعتي صوت الاسعاف ملى
المستشفى والناس هووووسة
والاطباء استنفرو ادور بعيوني علي
وشفته بينهم لاف ايده ولازمها باليسار
ويركض ويه هذا ويروح لذاك مشيتله بسرعة
نكزت كتفه
-اترك كل شي وتعاااااال ايدك تنزف
هز راسه وجهه مجرح وجبينه وصاير
خريطة تركته ومشيت لغرفة الجراحة
الصغرى انتظرت واستلمت حالة بسرعة
عالجتها باوع من الخارج وراح ورا المريض
گعدت اعقم المعدات فزيت من
انضربت الباب وانفتح ودخل بكل عصبية
واني أجهز بالمعدات اللي احتاجها
لجرحه
حجة بصوت حاد وبلهجة أمر
- عشر دقايق إذا ما خلصتي
آني أشد الجرح بقطعة قماش وأطلع
شنوووو هالبرووووود بأداء الواجب
رفعت عيني ناحيته ورديت بأعصاب أبرد من الثلج
-أولاً الباب إله يدة ينفتح بيها
مو ينضرب بالبسطال ثانياً
إذا مفكر تطلع والجرح مفتوح
فالباب گدامك بس لا ترجع تلومني من توكع بنص الطريق ويشيلوك جثة بسبب النزف فرجاءاً بلا بطولات وتفضل اگعد
ضرب الميز بأيده المجروحة بقوة
وعيونه تخزر بكل غضب
-لحد هسه جاي أضبط أعصابي وياج
لأني داخل حرم المستشفى
فبلاها الصلافة واعرفي ويامن تحجييين
اشرتله يگعد گعد ردن الزي العسكري مرفوع
گعدت مقابيله رفعت المشرط الجراحي
بمستوى عيونه وبلشت اشتغل واعقم
-الرتب اللي على اكتافك متخوووفني
هنا وتحت هالضوة الجراحي
وتحت مشرطي انت مجرد جسد يحتاج
تصليح
ايدك هاي اللي تضرب بيها الميز بغضب
اذا مااخيط عصبها بهدوووء هسه
بعد متگدر ترفع بيها قلم
فالتحدي ولهجة التعالي مراح تنفع
لأن تطلع منا أنت الخسران
رفع نظراته ناحيتي وأبتسم أبتسامة
خبيثة
-اشتغلي مثل ماتحبين بس خلي
ببالج اي خطأ ممكن يصير راح ينهي
مسيرتج من كل النواحي
كطبيبة. ......
قطع كلامه ورد وهو ينزل نظراته يتفحصني
-وكأنثى
بعد تهديده الواضح اليه غرزت الأبرة
بقوووة وبدون رحمة بيده ضغط بيده
الثانية على الميز لدرجة ابيضت اطراف
اصابعه
رديت عليه
-وخلي ببالك اني مراح انسى انك هددتني بمكان عملي
غرزت الابرة مرة ثانية بقوووة
شد على أسنانه لدرجة فكه اهتز ونزلت قطرات
العرق لونت جبينه بقطرات تلمع
مارمش بس بقى يباوع بعيني بتحدي
ابتسمت وذبيت نفس راحة
-لاااااااا بسبب عجلتك خيطتلك قبل ليمشي
البنج اشوف وجهك تعرق تألمت مووو
-وااااهمة الوجع ونسة عندي
مثل اليتونس بشفاف حبيبته
گال الكلمة واني بلا اهتمام كملت شغلي
بهدوء الى أن كملت كصيت الخيط بحدة
بعد كلمته ونظرات وجهه ناحية شفافي بنذالة
نزعت الكفوف شمرتها بالزبل
-خلصنا وتفضل حضرتك
وجهز نفسك للأسبوع الجاي
نشوووف ايدك تطلع سلامات
لو تتعوق
طگطگ رگبته يمنى يسرى واستند
عالميز
-نشوووف تطيب
لو انفذ وووووعدي
بقى گاعد واشرلي
-جروح وجهي
سحبت الكرسي وگعدت گباله
وبيدي كرات القطن والمعقم
الجرح بجبينه عميق
-تحتاج خياط بجبينك
هز راسه وعينه بتلفونه اباوع
مطلع صورة شاب ووهو واگف ويا
-البقاء لله
رفع راسة اجفانه حمر وكأنه على
وشك البكاء
هز راسة طفى التلفون
وخلاه عالميز
-جبينك ميحتاج تخدير
-خلصيني
-بلا صياح رجاءا
زفر النفس بقوة وباوعلي بغرابة
متألم
-اذيتك ترى ميأذي هالمكان
-خلصي اريد اشوف صاحبي
خلصت جاي اعقم بقية الجروح بوجها
سحب الشاش من ايدي مسح وجهه كله ووگف
-رررررحمة للكائنات شهالفهاوة
مشى للباب والتفتلي
-شكرا
هزيت راسي وسكتت بس طلعت وراه
شفتة طلع باب الطوارئ وركض للطب
العدلي عرفته رايح لصديقه
بس اباوع ظهره من وره القميص مشگوگ
ومليان دم
ركضت اصيح
-هااااااااااجس اووووگف
التفتت ورجعلي بسرعة
-وووووين جااااااية وراي زلم تااااارسة
المكان
-تحس بألم بظهرك
-لا
-صدگ تحچي ادخل
مد ايده لظهره رجعها مملية دم
باوعلي
-عقميها وخلصصصيني
مشيت ومشى ورايه غرفة
العمليات انشغلت اشرتله
-تعال للطابق الثاني
مشى وراي صعدنا المصعد
انفتحت الباب
-طابق الاطفال
-غرفة الممرض فارغة وبيها ادوات
تعال
دخلنا گعد بلا كلام فتح القميص
جواه فانيلة عسكرية
طلعت مگص بعد مالبست كفوف
كصيت الفانيلة جرح متوسط وشضية
حديد نافذة بالمكان سحبتها تحرك هو بوجع
خليتها يمي طلعت صوت بالطبق اللي بصفي
ستيل التفت شافها حجمها اصبعين تقريباً
-راح ابنجك
-يااااااابه فضيني عندي زلم ماتت اروح استلمها
-الى رحمة الله انتظر وانطي مجال
عقمتها وحقنته المخدر وهو گاعد ثاني راسه
بتعب بين ايدي
غرزت الابرة نز توقفت
-جاي تحس
-لا خلصييييييي
رجعت غرزتها هم نز بس شسوي
هو مستعجل خلصتهن وعقمت المكان
جبت الشاش والباندج الطبي الفه اله
لفيته على بطنه واستداريت من گدام
لفيتة حوالين بطنه تحرك صار قريب مني
حيل ابتعدت وختمتها بأن لزكت الطرف
-تمام خلص تگدر تتفضل
وگف يدگم بقميصه عدله ومشى
واني وراه راجعة للطوارئ خطوات مشاها
وبده ينحني ويميل كأنه يريد يوگع
ركضت لحگت الزمه وهو ينزلق ويستند على الحايط
بصف المصعد
گعدت بمستوى مغمض عيونه گوه يتنفس
-تسمعنيييي هاجس
جهاز الضغط المحمول باللاب كوت
وجهاز السكر
چيكت الاثنين مصفرات
فتح عيونه
-هااااجس بس تحرك وياي
ماگدر ينطق مدلي كفه لزمته سند نفسه
گوة بالگاع بس وگف ايده استندت على
كتفي ملت ردت اوگع واعتدلت رجعته للسدية
نفسها
محلول متعادل لنص ساعة
فاتح عيونه ومابي اي حيل
جبت عصير من الثلاجة
-اشرب
-ماااااگدر
-الموضوع ممحتاج صياح تشرب حتى تگدر تروح لصديقك
نزل راسه بقهر شرب العصير وگام
بعد ماخلص المغذي
استند عالسدية عدل نفسه
ومشى واني وراه
التفتلي
-شعندچ ورااااااي بابا
فتح باب المصعد ودخلت وياه رديت بلا اهتمام
-مميتة عليك راجعة لشغلي اخذت
نص وقتي
نزلنا ووصلنا قبل ليفتح الباب التفتتلي
-خففي عطر خنگتيني
باوعتله اريد ارد طلع وهي يشمر اخر
كلمة حقيرة عليه
-لتلغين
وكفت بمكاني سحبت نفس عميق
صحت وراه وهو يبتعد بخطواته الثگيلة
-لحظة حضرة الضابط نسيت شي
توقف أكتافه تشنجت وكأنه استعد لهجوم
التفت نص التفاتة وعيونه ذابلة بتعب وحزن
-شكو بعد مو فضيناها
تقربت منه خطوتين
-ترة ضغطك وسكرك صفر والمحلول مو كفاية
لازم تاكل اي شي حتى لو بسكت وعصير
-بطرررررانة اني بيا حال
-لتوملني اذا وگعت وشالوك للطب العدلي بدل الطوارئ عبالهم ميت لوم عنادك تمام
-خلصتي لغوووووووة
-حضرة الضابط......
اشر على النجوم الثلاثة على كتفه
-النقييييب
-حضرة النقيب لا تستهين بدوخة الهبوط ترى
يموت الانسان بمكانه تمام وميعرف لا نقيب
ولا ضابط
تقرب وباوع منا ومنا خاف احد يسمع
-سكري وضغطي بريئات
عطرج هذا اللي يگطع النفس
هو اللي دوخني مو السكر
بطلي ترشين منه وانتي طالعة خفارة
لا تدوخين الناس الوياچ ترى
مو طيب و يلعب ستين نفس
كلمة خففي عطر خنگتيني وكلماته الجارحة
مراهمة ويه نظرات
عيونه المتوترة والمتألمة
التي تحاول إخفاء امتنانها
وره قناع من القسوة والحقارة خلتني تغاضيت
عنه وعرفته ميعرف يجامل
-غير الضماد بعد يومين
مو تتركه ويعفن الجرح
-رجعنا للغوة
كالها بسرعة ومشى
تركته ورجعت لمهامي
الطوارئ هدأت تقريباً صديقه
الوحيد اللي استشهد لأن من حس
بالارهابي يريد يفجر حضنه
والبقية جروح وخدوش وحتى رضوض
بسبب عاصف الانفجار
للصبح طلعت بعد ماخلصت خفارتي
وشفته بملابسه المدماية واگف
والعساكر وياه والتابوت علي العلم
يربطو عالسيارة
عبرت من جانبه ببطىء
جام سيارتي مفتوح
اكاد اشم بالهوا مزيج من ريحة البارود والدم
وعله صوت الخشب وهو يرتطم
بسطح السيارة عيني علي
ماچان هاجس اللي شفتة البارحة
العسكري المكسور اللي غطى عيونه بيده
وهو ياخذ المحلول الوريدي مدعي النوم
حتى ينهزم من دموعه گدامي اباوعله
اليوم كأنه محارب لابس درعه
صارت عيني بعينه والشمس ضربت
وجهه المجرح شمر جگارته بالگاع
وداسها
حسيته مو يدوس الجگارة كأنما يتحداني
بنظرته ويدوس على لحظات ضعفه
اللي عاشها گدامي وجمعتنا بنفس الغرفة
نظرته الي چانت خاطفة حادة
وكأنه يگولي
انسي الشفتي البارحة
اني هسه بكامل قوتي
ومو مريض تحت مشرطچ
صاح بصوت جهوري بعد
ماعبرتهم
-يلا نتوكل
تحركت سيارتي للبوابة وبمرايتي
الجانبية شفته يركب بالمقدمة
يسد الباب بقوة وراه
مشيت تاركة هالمتعجرف اللي
البارحة قرر ينزل دموعه وهو مغمض
من علگتله المغذي ويغطي عيونه بيدة
بحجة النوم وهسه واگف مثل جبل
عجيب شگد الموت يكسر شوكة الانسان
المهم واني ماشية لا اراديا شميت عطري
خفيف صيفي بارد
واستخدمه شتا صيف لأن ناعم بس هو
همجي وماعندة ذوق
رجعت للبيت مثقلة باللي شفته من الانفجار
ماخذة استراحة فبعد راحتنا لفترة
الباطنية بسبب اللي صار استنفرنا للطوارئ
ومباقي بس أيام وابدي
اقامة النسائية يومين بعدها
واجاني اتصال نوح
-الوووو
-نعم يابطران يامرتاااااح
-وين موجودة
-بالطوارئ
-جايچ هاجس تبدليلة الضماد
-مو انت يمه ليش ماغيرتله
-مااعرف رفض وگال رايح
بشغلة ضرورية
بطريقي اروح للمستشفى تعقمه الخيطته
-تمام سهلة
-ترى جاي وياه قررررد
حاولي تتحمليهم اثنينهم
-شنووو
مافهمت كلامه شويه وفات لغرفة الاطباء
من شفته وگفت طلع بره
سلم رديت السلام واشرتله
-تفضل منا
دخلت واحد من الردهات
اشرتله يگعد عالسرير وغلقت حوالي
البردة
-تفضل تجهز اجيب ادواتي
-ميحتاج جايب كل شي انتظري
ثواني
شويه ودگ تلفونه وهو يدلي
واحد بمكانه
انفتحت البردة ودخل شاب
عمره بالعشرينات
سلم وبيده العلاگة اشرتله
-افتحها اخي وطلعلي الاشياء
عقمت ايديه والادوات ولبست الكفوف
الطبية وهو يخلي الاشياء گدامي ويسـألني
-ست تردين ارتبهن من الاصغر للأكبر
باوعتله مستغربة
-العفووو مو ست دكتووورة
شلون تردين ارتبهن
-عالحروف الابجدية شنو جاي نلعب
خزرة هاجس وهو ابتسم محرج
-گالو بت العمة قرر.........
كح هاجس واني باوعتله فهمت
راد يگول قرچ رفعت راسي
-اللي گالولك ماعدهم اسلوووب
ضحك حيل وهاجس صاح
-لا تظل تگمز ووووطن راسي ثاااايل
انقهرت من سمعت اسمه وتذكرت كلام
بيبي عنه الوحيد اللي مشايف امه
درت وجهي مبتسمة اله
-الفرد الالطف بكائنات ذيچ الصفحة
-بلا لغوووووووة
گالها هاجس ووطن وجهه الاسمر
هلل ضحك ووگف بصفي
-صدگ اسمچ ظلمة
رفعت حاجبي لهاجس ورديت
-اسمي ليل بس ويه اليكرهني
ظلاااااام وانت شسمك
-وطن الحجي الله يحفظه عسكري
وحب يختم التقاعد مالته بأسمي
-تشرفنا
باوع لهاجس من گصيت مكان الجرح
ودار وجهه
-اگلك اني مااگدر اشم ريحة المعقم
راح اگعد بالحديقة
-وليييييييي وفضني
طلع وطن واني بديت اعقم المكان
واحد من الغرز مفتوح
-عندگ غرزة مفتوحة
-خليها
-مينغلق الجرح ويتليف
-خلي يتليف قابل نمونة
-هم صحححح
عقمته وضغطته حيل وهو نز
-يعني بي خراج ومأذيك
خل اعقمه واطلع الخراج واغرزه
-خلصيييني
-رجاءاٌ احچي بأسلووووب
-مممكن جنابچ تخلصيني
عصرت المكان حيل وهو عصر كفه بوجع
غرزته وضمدته
-تگدر تلبس وانطيني ايدك
ملبس القميص مدلي معصمه فتحته
الجرح نظيف الخياطة مابيها
شي عقمته وعدت الضماد
وگف يسد قميصه
-اگعد اچيك الضغط والسكر
گعد يدگم بقميصه خليت الاجهزة
وگفت گباله
-ضغطك طبيعي سكرك طبيعي
اشرلي
-شگد تأمرين
باوعتله صفح
-تفضل مع السلامة
-اختنگنااااااااااا
گالها وطلع مستفزني بكلامه
يقصد عطري عجيييب العطر راااقي
ويشتري اليه فارس من السوق الحرة
بتركيا كل ميجي Chloe انثوي ورقيق
بس هووو ذوق سسسسز
مشيت راجعة لشغللي ومن يومها
و دخلت عالم ثاني اقامة
النسائية الحالات اللي تجي
الحوامل
اللي تفقد طفل واللي تطلع
فرحانة بعد سنين عقم
الاستشارية تمشي بشكل
طبيعي بس حالات الطوارئ
الليلية اللي تجي بيها شفت العجب
العجاب
بليلة شتا كئيبة غيوم كثيفة
وليل أسود گاعدة وبقية الدكتورات
متوزعات واني خافرة بردهة النسائية
بغرف النقاهة
اخذت كوب چاي
وگعدت اراجع الطبلات واشوف
شمحتاجين خلصت الراوند مال آخر
علاج ويه الممرضين والصيدلانيين
وگعدت اخذ استراحة اتصل بيه نوح
وهاي صارت عادته يخبصني
-هسه مو ماعندك خفارة شعندك
سهراااان
-اتشمت بييييچ
-لاجديات ارتاح
-مااگدر من وره هاجس من رجع
التحق عيني صارت ماتاخذ
نوم ابقى قلق وهاي اني وجدي
نكضيها چاي وسوالف وسهر
-وينه الحجي اليوم
-زرگته بفاليوم خمسة خليته يرتاح
-هيچ قلق على هاجس
-لا اليوم راد يسهر ينتظره
نازل اتصل بينه وتأخر
اني گاعدله بالبيت وعبالك ام
البيت سويتله اكل ومنتظر هسه
افتر بالحديقة
-بررررد يمعود
-ورثت قلق جدي
وهو يحچي اجا اتصال علقني
ورجع
-اجة هاجس اعذريني قطعت الاتصال
-ياالله همزين اجه حتى يخلصني
منننننك روووح خل اكمل شغلي
سد الاتصال واني گعدت واخيراً
استراحة اكثر قسم صعوبة هو النسائية
تلگين نفسچ محاطة بالأمهات والخالات
المرافقات للمريضات
اللي يتدخلن بكل شي
وأحياناً يمارسن ضغط نفسي
چبير بسوالفهن
دكتورة شوكت تولد
دكتورة خطية جاي تتوجع
من غير التعامل ويه القابلات
اللي يمتلكن خبرة عملية چبيرة وأحياناً يفرضن شخصيتهن علينه وهالشي يسبب توتر
بعدني افكر واندگت الباب الممرضة
-حاااالة نسائية طارئة دكتورة
صعدوها من الطوارئ
ركضت وياها واسمع صوت صياح
-شنووو هالصووووت
-رجال جاي وياهم
ركضت دخلت للصالة صاحتني
الممرضة
-دكتورة مو بالصالات ماكو مكان
خليتها بغرفة الفحص بجانب الخاص حتى
العام مابي سرير
دخلت الغرفة اباوع مرية تعبانة
وجهه محروگ من الشمس
وعالسرير بنية متتجاوز ال١٥ سنة
رجليها ترجف والملابس مليانة دم
بس وصلت المرية شمرت نفسها
على ابديه
-فدووووة دكتوووورة
بنيتييييي
وگفتها ورحت للبنية
-اهدي خاااالة وفهميني
الحالة
-خااااالة بنيتي هاي شوفيها مابيها شي
هي عليها العادة اااانا ادري
-خالة اهدددي ووحدة وحدة احچيلي
-خالة أني طالعة لشغلي
ومن رجعت لگيتها متعاركة ويه اخوها
ضاربها على بطنها وگامت تصرخ
وتنزف نزف كااافر ترست السيارة
ترس
-متزوجة
-لااااا منيلها خالة جاهل بثالث متوسط
بسسس فدوة جوووة شافوها بالسونار
وغلطن بالتشخيص تگلي الدكتورة
عدها اسقاط مانازل شنيييي خالة اسقاطيش
وهي بت جاااااهلة مامعرسة
صحت للممرضة
-وووين القابلات
-دكتورة الصالة الثانية مليانة
تعرفين الوووضع
تقدمتلها لبست الكف
الطفلة سادة رجليها
عبالهة افحصها وكلها ترجف
جابتلي الممرضة جهاز السونار
وسحبت چرچف غطيتها
وبلشت
المقيم الاقدم ماكو بسبب
اللود بالمستشفى وصول نازحات
من مناطق القتال حوامل
يعانن من سوء تغذية أو صدمات نفسية
هالشي خله الشغل مضاعف وانساني
اكثر اشتغلنا مو بس كأطباء
للعلاج الجسدي مهمتنا تعدت هالشي
للدعم النفسي
اضطرينه نقوم احيانا بدور مو دورنا
والعمل بأقل الإمكانيات
بسبب ضغط الأعداد بهالسنة
والردهات مليانة الوضع كسيف
سميت بسم الله خليت الجل على بطنها
انتفض جسمها الهزيل عيونها الحلوة الصغيرة
چانت ترجف من الرعب
امها تنتظر التشخيص نزف من الدورة الشهرية
والرجال اللي بره چان كلامه اذبحها اذا صدگ
الكل يريد الحقيقة اللي هو مفترضها
بس الشاشة چانت تنبض بحقيقة ثانية
بقايا كيس حمل ممزق باوعتلها چانت
طفلة بكل ما للكلمة من معنى جسدها ناعم رقيق
مااعرف ظرفها ولا للكارثة اللي تخفيها
باوعت لأمها عيونها كلها رجاء
بأن يكون الموضوع سهل ومجرد نزف
وعيونها هي الخايفة وحاسة
بأنها فاهمة اللي ديصير
وگفت واشرت للممرضة همستلها
-بلغي الدكتورة بحالة
شبهة جنائية وضروري تترك
كل شي وتجي
-فدووووة ياخالة شتشاورينها
-خالة اني ميحقلي كتابة تقرير سونار رسمي
هذا من اختصاص طبيب الأشعة أو الأخصائية
النسائية بسبب الوضع اضطريت افحصها
طلعت الممرضة راكضة واني واگفة يم البنية
اللي بدت تختض من الرجفة
غطيتها وهي استقامت گاعدة عالسدية
-فدوووة اروح للحمام
وكفتها امها بمساعدتي وطلعت وياها
ماشية حتى التقي الطبيبة قبلهم
التقينة بنص الممر وجه بوجه
-السمعته صححح وين المريضة
-جوه دكتورة بالحمام
-متأكدة
-دكتورة حسب تدريبچ النه
اللي شفته كيس ممزق منازل
والبنية ممتزوجة طفلة
-مااااعرف الوضع مخيف
مجاي نلحگ نشتغل امشي
ويايه
-دكتورة الرجال اللي وياها
بره شفتي
-شوفتنياه الممرضة
دخلنا وهي رجعتها امها لغرفة الفحص
سدت الدكتورة الباب واخذت امها على جهة
بس حجت وياها شويه وارتفعت صرختها
-يممممممممه نوووويرة صخمتي
وجهي
ركضت اني صرت گدام السدية
والطفلة انكمشت على نفسها ترجف
-منييين ولچ ويمتى وشلوووون
-عيوووني اي كلام هسه مينفع
مدام الحالة طارئة
الام ماگدرت توگف بعد
واني يم الطفلة اللي تمسكت بيدي
بكل قوتها والدكتورة جبرتها عالفحص
باوعتلي بأسف الدكتورة
-لازم نتدخل جراحياً
باوعت لأمها وراحت گومتها
-الطفلة يااما اغتصاب
او هتك عرض وبالاثنين لازم
فتح تحقيق قانونياً
التدخل جراحيا وانقاذ حياتها
اهم من كل شي حالياً
الشي الوحيد اللي اني مسؤولة عنه
حالياً هو بس تدوين المشاهدات اللي
تمليها عليه الدكتورة
- اكتبي وجود بقايا حمل
نزف شديد وتهتك في منطقة
عنق الرحم
عمر المريضة شگد
سألتهة ردت امها بنحيب
-١٥ سننننننة صخاااام صخمني
-يلا جهزوووها ضروري
نزلناها من السدية متگدر تمشي
امها بيدها التلفون يرن واحنه
نمشي رفعت الخط قبل لنوصل نهاية
الممر يم غرفة الاطباء اللي نرتاح بيها
المصاعد گدامنا لازم نصعد طابق العمليات الثالث
اسمع صوت الرجال واضح
بالتلفون وبالممر لأن بقى ورانا والممر معزول
-اييييي حميد اي مثل ماگالوووو
راح يسوولها عملية
انفتح المصعد ودخلت الدكتورة
وامها واني جاي ادفع بيها اريد ادخلها
بس سمعت صوت الصرخة التفتت
انغلق باب المصعد ونظرة الرعب
على وجه امها متنسي
ركضت بلا شعور
من شفته جاي باتجاهنا يصرخ
-نززززززززلتي راسي
شفتة رفع دشداشته ومد ايده
لبجامته طلع سلاح
بسرعة دفعت باب غرفة الاطباء
ودخلت اني وياها وغلقت الباب بالقفل
صوته وهو يدفع الباب ويصيح
وصوت الممرضات اللي ارتفع بالصراخ
صوت ارتطام جسمه بالباب
المقفول چان يرعبني أكثر من صراخه
الطفلة چانت منكمشة بالكرسي
تسد أذنها بأيدها الصغيرة
وتشهگ بلا صوت بينما أنا أستند بظهري على الباب
احس باهتزازات ضرباته ودفراته
التي چانت تريد تقتلع القفل بأي وسيلة
صرخ من يأس من فتح الباب
-افتحي الباب دكتووووووووورة
لا تصيرين حايط بيني وبين عاري
افتحي لا أحرگ المستشفى على راسج
صابتني حالة هلع چنت أتنفس بسرعة
وعرگت عرگ بارد
باوعت حواليه ماكو مخرررج للبنية غير الباب
والباب يعني موتها
مديت ايدي بلحظة خوف لجهازي واتصلت
بنوح اللي هو اول شخص مر على بالي
بابا واخوية ضرغام بتركيا يم فارس وماكو غير
نوح يجيني رن ثلث مرات وانرفع الخط
-نووووح
ارتفع صوت خشن وعرفت صاحبه
-الوو
ويه كلمته انضربت الباب حيل
وصرخات الممرضات بره علت
واني صرخت على صوت طلقة
فلتت
-ياااااربي نووووووح تعاااالي
ارتفع صوووتة وصياحه هوو بالتلفون
-اني هاجس هاااااي انت ليييل شكووو
بلا تردد ولا تفكير وية دفعة الباب
اللي هزتني هز عطت بصوت باكي
-الحگنييييييي هاااااااجس
