رواية حكاية ترف الفصل الرابع عشر 14

لم تكن...

مجرد شخص مر في حياتي... 

بل كنت العمر كله...

كنت عشقي الأبدي... 

ستبقى دائما في قلبي...  

لأنك القدر الذي لا ينسى...

ترف 

طبت امي مثل الاعصار وفشار ومسبه الي عمرنا ما سامعي منها والنوب لزمتني قوي من شعري وتودي براسي يمين ويسار ههههه 

ولچ شنو هذا السمعته

شنو عدج علاقة ويه شهم

شگد صارلچ انتي وياه 

شچان يسويلچ من تبقون وحدكم

چنتو تستغفلوني وماخذين راحتكم

هسه عرفت ليش انتي وياه تختلون بالغرفه على بو جاي نقره وندرس

احچي شسوالچ وبعدين كلّ منچ وعافچ

طبعا هذي الأسئلة والاستفسارات كلها چان وياها كفخات على سطرات على راشديات على دفرات

وخطيه رهف وسيف يحاولون يحموني منها أو يلزموها عني بس هيهات ما گدرولها...

وآني أحاول احمي نفسي من أيدها چنها يدة هاون واصيّح والله ماما ماسوينا شي والله ماما چنه بس نقره

بدت شويه الضربات تقل وتخف قوتها يمكن هي تعبت أو آني گمت ماحس بشدة الضربه

گالت لرهف ولسيف يطلعون بره الغرفه ويسدون الباب بس آني بقيت مچلبه بيد رهف ماريدها تطلع وتعوفني يم ماما وتستفرد بيه بس بصوت قوي من منها رأساً رهف ركضت هي وسيف للباب وسدو وراهم بس بقو واگفين يم الباب لأن شفت رجليهم من جوه

امي لزمتني من التيشيرت وگالت بس شويه صوتها صار اهدأ وانصا 

اي هسه اريدچ تحچيلي كلشي.. سمعتيني كلشي.. وقسما بالله إذا چذبتي لو ضميتي شي عليا اشمرچ منا وأشرت على الشباچ ونگول مخبله وانتحرت 

بقيت ثواني ساكته بعدين گلت

اقسم بهذا كتاب الله وأشرت على كتاب القرآن الكريم الي موجود بغرفتي ، اقسم بكتاب الله راح احچي كلشي وما اكذب ولا أضم شي

هي اشرتلي برأسها بمعني اي ابدي احچي

وبدييت احچي

من سنين ..من وفاة بابا.. ج

چنت زغيره..وچنت احس  شي ناقصني ناقصني فقدان الاب وحضوره ناقصني متابعة الاب وحتى ناقصني آكول كلمة بابا ... ورغم انتي تحملتي مسؤوليتنا وعوضتينه آني ورهف وسيف الحب والحنان والمتابعة ويشهد الله ما خليتينا نحس بأي نقص

وجدو وعمو فارس وعمو ليث وحتى خالو دلير هم چان حبهم واهتمامهم بينا شي چبير وماخلونه نحس بيوم احنا ايتام أو محتاجين شي

بس آني چنت اشوف بشهم الاب والاخ الچبير والسند  وهو الوحيد الي أكدر اعتمد عليه بكل شي بكل مشكله تواجهني چنت احچيله وهو ينصحني ويلگالي الحل المناسب وبديت اتعلق بي وماأتخيل يمر يوم إذا ما اشوفه وأشوف اهتمامه بيَّ 

وحتى من چنت مرات اطلب منه شرح أو حل للدروس چانت هاي حجه مني بس حتى يجي  واگعد يمه واحچي وياه 

وبديت أحبه.. امي رأساً باوعت وعيونها مخنزره عليَّ من گلت هاي الكلمه كلمة احبه.. بس آني تجاوزت نظراتها وكملت كلامي .. اي حبيته وگمت احاول اجذب انتباهه لو من يگعد يمي اطخ بي لوأحط عطر قوي لو افتح شعري واخلي كلساع يلمه ويوخره من عيوني من چنت أحل واجباتي ..يعني چنت أسوي حركات بلكي ينتبه الي وينتبه لحبي ويحس بيه وفعلا حركاتي جابت نتيجة واعترفلي بحبه وچنه نگضي الليل كله اتصالات بالموبايل وبس نحچي عن حبنا وعشقنا وچان دائما يگولي أنتي الي ..وچنا مقررين نعلن عن هذا الحب ونتممه بالخطوبه من أنجح من السادس

- اي لعد شنو الغير قراركم 

- الغير قرارنا هو ..بدأ يتغير ويتحجج ويريد يتأكد من حبي اله

- يعني شلون يتحجج 

- چان يريدني ابطل واكعد بالبيت وما اداوم كليه يريدني اساعد عمه سعاد بالبيت وخيرني لو دوام وكلية لو خطبه وزواج 

وآني اختاريت الدوام والدراسة 

- امي گالت وبأستغراب : بس شهم دارس ومتعلم ومثقف ..متأكدة چان هيچ يريد

- اي والله ماما.. هذا الشي الگاله الي

- هسه احچيلي شجنتو تسوون من تبقون وحدكم بالصالة..

- والله ماما ماچنا نسوي شي 

(كفخه قوية على راسي) 

- احچي شچان يسويلچ

- والله ماما بس يحضني

(هم مفخخة ثانية وبصوت أعلى) احچي بعد شسوه بيچ

- والله ماما ..ترددت أگول لو لا.. بعدين ويه الكفخه والسطره القوية گلت

- باسني منا وأشرت على حلگي ..ومنا وأشرت على رگبتي

(دفره قوية) احچي بعد شسوه 

- والله والله بس هاي وبعد كلشي ماسوه بديت ابچي وگوه أطلع الحچي والله ماما حتى من مرة ثانية هم راد يبوسني بس آني ما قبلت وگتله هذا الجاي يسوي غلط ..

- متأكدة ماتماده وياچ ؟؟ ما شال هدومچ؟؟ ماشاف جسمچ؟؟؟

- لا والله ماسوا هيچ..

غمتني بأيدها وگالت ٱمداچ وأمده تربيتي .. صوچي آني الچنت حاسبتكم اخوه طلعتو لاعبين لعب من ورايا

شفت أمي تغيرت وبديت احس بيها گوه تتنفس وأشوف وجهها بدا يتعرگ ويصير احمر وخشمها طگ دم

گمت اعيط.. رهف وسيف رأساً دخلو يمنا..آني من خوفي مااعرف شسوي بس رهف شالت خاولي وضلت تمسح الدم من وجه ماما وسيف ركض جاب گلاص ماي.. شربتها ومسحت وجها.. تمددت على قريولتي..وبدا يرجع لون وجها ..وهم هدأت شويه 

احنا گاعدين دايرها ..آني لازمه چفها وافرك بأصابعا  وهم سيف لازم الچف الثاني ويبوس بي

ورهف تمسح بوجه ماما بالخاولي وكلساع تطبع بوسه عليه

يارب يارب كلشي ولا يصير شي بأمي ..شويه وامي حاولت تگوم..ساعدناها لان رادت تنزل لغرفتها..نزلناها الدرج على كيف بايه بايه

وصلناها لغرفتها وتمددت على الچربايه طفينا عليها الضوه بس بقينا يمها بالغرفه 

وره ساعه تقريباً سمعت صوتها تريد ماي .. اطيتها وشربتها وگامت شويه وانتچت على ضهر الچربايه كالت

- تعاي گعدي هنا أشرت يمها

تقربت وگعدت يمها

كالت من مات حسام (بابا)فقدت الحب الچبير الي چان مالي گلبي ... اترملت وچنت بوقتها زغيره وچان ممكن اتزوج واجيبلچ اب ثاني بس لاگلبي ولا عقلي ولا تفكيري يخليني افكر برجال وادخله لبيتي واگعده يم اولادي وأكول حسبو مثل ابوكم .. وقررت لازم احافظ عليكم وماخليكم تحتاجون شي .. وحتى چنت دائما أطلب من رب العالمين ماياخذ أمانته الابعد أن اكمل رسالتي وياكم ..

كلناصحنا وبچي ماما عمرچ طويل 

وجهت كلامها الي ..الي سويتي كلش غلط وللاسف خنتي الثقه الچنت مطيتها الچ.. وشهم هم چنت حاسبته واحد من عدنا وهم خان الثقه وخان البيت الچان يدخله شوكت ميريد ويعتبر بيته الثاني .. واكيد شهم من شاف هاي التصرفات عندج غير رأيه بيچ وشافي مو انتي المناسبة اله ويفتح بيت يكون عائلته وياها واتحجج حتى ما ياخذچ.. شلون تخلي يبوسچ لويحضنچ هذا التصرف بس لبنات الشوارع مو بنات الأصول...

ضليت مدنگه وابچي..اي كل  الحچي الگالته امي صحيح ..

هسه الي أريده منچ تگطعين كل علاقة ويه شهم لا اتصال ولا تليفون.. ما تحچين حرف حرف واحد وياه حتى إذا صادفتي أو التقيتي بي ماتحچين وياه كلمه وحده  ..تشوفيه منا تطلعين منا تلغيه تماماً من حياتچ ..  بيتهم ابد ابد ماتفوتين له.. سمعتيني وقسما بالله إذا ما سمعتي الگلته وطبقتيه لا انتي بتي ولا اريدچ..

والنوب وجهت كلامها لرهف ولسيف وانتو اي حرف اي كلمه من الحچيناه ماريده يطلع خارج بيتنا... وكلكم أريدكم تتعاملون ويه بيت عمكم طبيعي بس شهم بعد تتعاملون وياه بحدود ...

وكلنا أيدنا كلامها وقررنا نسمع كلامها ونطبقه..

وشربت امي حبه بندول لان صار عدها صداع قوي.. وأثناء ماچانت تريد ترجع تنام هم شفت خشمها ينزف دم بس اشرتلي وكوه تحجي كالت طفي الضوه ...بس آني كلش خفت من هاي الحالة.. وگلت لازم اوديها للمستشفى 

رأسا لبست عبايه اسلاميه فوگ هدومي وطلعت بره ألدنيا ليل هندس  و تصوصي وهم چان منع تجول ردت اروح لبيت عمي بس اتذكرت وعدي لأمي ما فوت البيتهم ورأسا رحت لجيرانا البيت الگبالنا بيت ابو محمد دگيت الجرص وره شويه طلع ابوهم ويصيح من داخل البيت منو منو ..(آني وبصوت بچي)

-عمو آني جيرانكم بيت ام سيف ..

الناس بذلك الوقت چانت تخاف تطلع بالليل للباب من انتشار حالات القتل و الاغتيالات  

طلع ابو محمد وياه مرته .. استغربوا لان ابچي 

- هاا خاله شبيج.. 

- خاله امي مادري شبيها خلي نوديها للمستشفى 

ام محمد اجت وياي للبيت تشوف امي وگالت الرجلها يحضر سيارته

من طبت وشافت حالة امي گالت تعاي بسرعه لبسي امچ خلي ناخذها للمستشفى 

لبسناها وسندناها آني وأم محمد وآمي گوه تمشي گلت السيف بسرعه جيب تليفوني من غرفتي ...طلعنا ولگينا الرجال مطلع السيارة وموگفها اباب بيتنا..صعدت ام محمد يم رجلها وآني وآمي ليوره..  رهف وسيف بقو بالبيت وگلنالهم طبو قفلو الباب ويبقى الإتصال بيناتنا حتى اطمنكم على ماما...

الطريق گله چنه فاتحين الضوه الداخلي للسياره حتى السيطرات الموجودة بالشوارع تتعرف على داخل السيارة ويمشونّا 

وبالشافعات ياله وصلنا لأقرب مستشفى على منطقتنا

رأسا الكادر الطبي أخذو امي للطوارئ وسوو الفحوصات والتحاليل 

وضلينا كلساع نتخابر آني ورهف وابلغها واطمنها على حالة أمي 

وابو محمد هم چان يخابر على بيتهم ويطمنهم

بس تفاجأت من سألني ليش من تخربطت ام سيف ما رحت لبيت عمي ...

واحتاريت شجاوبه بس بالاخير گلت جرص بيتهم عاطل ودگيت الباب كم مره ويمكن ما سمعوني 

چان خابرتيهم ويأشر على تليفوني

ما اجه أبالي لان طلعت اركض..

اي صحيح عمو هو الواحد تتخربط أموره ومايعرف شلون يتصرف خصوصاً بالحالات المفاجئة 

چان التشخيص لحالة امي جلطة دماغية بس عدت .. ارتفاع كبير بضغط الدم.. وبعد أكثر من ثلاث ساعات بالمستشفى بدأ الفجر والضوه يطلع وهم بدت تخلص ساعات منع التجول وتقريباً استقر الوضع الصحي الماما وسمحوا النا بالخروج ..اطونا العلاج المناسب وچانت اهم التوصيات لازم تراجع دكتور مختص ولازم تبتعد عن الأكل المالح والدسم والاهم من كلشي لازم تبتعد عن التوتر والعصبية وماتتعرض لأي ضغوط أو مشاكل او اي شي  يسببها الانهيار العصبي... رجعنا ووصلنا للبيت وهواي تشكرنا من ام وابو محمد.. من دخلنا تلگتنا رهف وسيف وحضنو امي ويبوسون بيها ..دخلناها للغرفة حتى تتمدد وتنام لان اكيد الأدوية والمحاليل الي اخذتها بيها مهدئات.. بس رادت تغسل قبل كلشي ومن گلت الها ادخل وياها واساعدها رفضت وگالت مابيه شي ماما أكدر أغسل وحدي..

طبيت للمطبخ وسويت ريوگ وچاي على السريع.. من طلعت ماما من الحمام ما رادت تاكل كلشي بس رادت تشرب چاي وبدون شكر لان بعدها خايفه من ارتفاع الضغط

دخلت نامت ووصتنا هم كلمن يروح لغرفته يرتاح وينام لان البارحه گضينا الليل كله سهرانين... 

وكلساع أحمد رب العالمين ماصار بأمي شي من وره تصرفاتي الغلط 

انعل شهم لابو حبه 

وجريناها نومه للعصر وفزينا كلنا من سمعنا دگ قوي على الباب الخارجي ووياه صوت الجرص طنطن طنطن ...

نزلت الدرج اركض وتلاگيت ويه رهف وسيف والنوب كلنا ركضنا للباب الخارجي نريد نعرف شكو ومن  فتحنااا چانت المفاجئة شفت عمو فارس وعمه سعاد وشهم وخطيبته منى