رواية ذاري النجوم الفصل السادس عشر بقلم زهراء السراي
ومن بين الركام تبنى
أجمل البدايات
:
:
:
:
:
:
:
:
:
:
ليل
________
العناية المركزة
مستشفى ال……العام
خفارات ليلية متعبة للجسد
وجهد يحمل بطياته خوف وأمل احيانا
من تبدي ساعات الخفارة البس كمامتي
والكفوف الطبية واتجهز بشي مريح لمواجهة
عالم ثاني أحس اني أنفصل عن العالم الخارجي وادخل عالم العناية المركزة وأترك ورايه
ضجيج وهوسة العالم بره
حتى ادخل ضجيج من نوع ثاني
ضجيج الأجهزة والأنفاس المنقطعة
طقوس الخفارة الليلية بالعناية المركزة
تختلف عن طقوس الخفارات العادية
نواجه بالعناية المركزة معركة ثانية
معركة هدوء وحذر
نبدي جولاتنا بين الاسرة
نقره الملفات نراجع الجرعات
كل مريض قصة وكل شاشة هي
قصة أنتظار لأهل المريض
هالأيام بالذات صعبة بشكل چبير
گاعدة عالكرسي مقابيله اسمع سمفونية
المونتور بنص الليل بعد ماوديت نوح يرتاح
بدأ جسمه ينهار ويفتر كانولته بيده بسبب الاجهاد
اراقب صدره يرتفع وينخفض دگات
گلبه ساعات تكون رتيبة ومطمئنة
وساعة يتسارع فجأة يخلي گلبي يسبق دگات
گلبه من خوفي
خلال هالأسبوع صار وقتي معظمه
يمهم هم الأثنين خفارتي اغلبها اقضيها
يمهم وطن خلال خمس أيام نقلنا لغرفة نقاهة
بعد عملية رجله
وهاجس لا زال تحت غيبوبة مصطنعة
تمر ساعات واني اراقب ضغط دمه المحاليل
واحس انها عمر كامل مو مجرد قراءات
وأرقام گاعدة اباوع لعيونه اللي
خليتلها مرهم عين حتى متجف لأن
مفتوحة جزئياً وشفافه اللي ابللهم بقطن
ومي شويه حتى ميتشققون
اجاني اتصال نوح رج التلفون
-ها ليل
-نوووح نااااام اني يمه
-ماااعرف شلون اشكرچ
-راح احظررررك كافي روح ارتاح
-راح شويه اغفى اطمأنيت على وطن
نايم راح انام يمه بس يصير شي
اتصلي
-ماكو شي والله ارتاح روح
غلقت الجهاز وسندت راسي عالسرير
يمه واني مگابلته عالكرسي
اباوع كل هالاجهزة والصوندات متصلة
بي شكله شاحب ولا كأنه ذاك الشاب الاسمر المملوح
تنهدت وعيني علي ياترى راح
تطلع منها بشجاعة لو تنتهي وتذوي
غمضت عيني واجتي لحظات معرفتي بالخبر
ببالي بساعة اللي اتصل بيه نوح بعد اختفاءه
لعدة ايام الى أن بيوم بخفارة الطوارئ بالليل
اجاني اتصاله اني بأستراحة الاطباء
ارتاح شويه فتحت الخط اجاني صوته المتعب
نووووح يمعوووووود وينك
خوفتني شو مترد
-صعديلي للطابق الخامس ليل
-عناية مركزة شصااااااير
-جبت اخوووتي اثنينهم
دگ گلبي داخل صدري ونبض بقوووة
واني اتذكر كلمة وطن ابريني الذمة
-نووووووح شصار فدووووة
كمل كلامه وانكسر صوته بحسرة
-اثنينهم ليل
اخوتي اثنينهم
بين الحياة والموت
تركت مكاني وركضت للمصاعد
بين ماوصلت صار بوجهي جدهم
ورياجيل اثنين ويا وثلث نسوان
نوح واگف يحچي گوه ولحية صايرة
عالية مشيتله بسرعة بس شافني
مشالي وجهه تعبان
-نوووح
-ماااعرف شگول متدمرين
وگعت دموعي حزن على منظره وعيونه
الحمرة الرافضة تنزل دموعها
ابتسم بقهر واشرلي عالغرفة
-اثنينهم مررررة وحدة وطن ميگدر
يحچي رجله متدمرة منعرف
وهااااجس ……
مسح وجهع بقهر وكمل
-هاجس منتهي امعاءه متدمرة
اصابته كاررثية الدكتور اللي سواله
الجراحة يگلي حرفياً لمينه جروحه
لم متملخ
-شصااار
-بيت ممشطينه مابي شي
تخيلي شنو المفجور عليهم
-شنووو
-حيووووان كلب مفخخي داخل البيت
ومحنط بس دخلو مجموعة فجروو عليهم
صديقه ابو صعبة اصابته براسه وثائر
ابو روان استشهد لأن قريب هو وهاجس
ووطن شويه ابعد
واربعة شهداء ثانيين
اشرلي للغرفة مشيت وصلت لجدو
سلمت علي باس راسي
اشرلي هاجس على ابو
-هذا ابويه
يابه هاي ليل بت عمتي ريحانة
ابتسم وجهة الحزين
-تشبهين جدتچ
هزيت راسي بموافقة اشرلي عالرجال
الثاني
-هذا عمي جمال
سلم عليه وخله ايده على صدره
بأحترام والنسوان اشرلي
-عمتي ميعاد
وعمتي نهاد
اثنينهن ردن
-هلا
ماطولت وياهم دخلنا الغرفة بيها سريرين
ياريت مشفتهم بهالوضع
وطن رجله منتهية ومخيطيها
بكل الاتجاهات ونايم وجهه مجروح
وشضايا مغطية بسيطة مغطية صدره
اما هاجس الشضايا
ما خلت بجسمه مكان صاحي
أصعب اصابة هي الشظية اللي
فايته ومسويه مجزرة بالأمعاء
والأسوأ القسطرة اللي تنزل دم ويا الادرار
دليل على اصابة مثانته
-شسووله
-من رحت چانو مدخلينه عمليات
الدكاترة طلعوا من العمليات گالو
گصينا جزء من الامعاء
بسبب التلوث العالي
اصاباتة صعببببة فوگ متتخيلين
-ليش مبقيت ويا هناك
-بغداد صايرة فوووضى المستشفيات
من گالو راح ندخله غيبوبة
مصنطعة استأذنتهم وتأكدت من قابليته
اذا نقلتة قررت انقلهم هنا بأسعاف على
حسابنا
-خلي اهلك يرتاحون ليش خطيه جدك
وابوك وعمك باقين ماكو فائدة
-هو هسه راح ارجع وياهم اسبح
واغير ملابسي واجي
-ليش مترتاح واني هنا
-اذا تگدرين اني هم اروح لبيت
صديقة بنته وعمتها منتهين انتهت
الفاتحة ومحد وصلهم بعد
شويه وطلعنا اني ويا بلغهم بحالة
اخوانه المستقرة وطلعو
بقيت حواليهم الى أن رجع
وبعد استئذان وكلام اخذ الموافقة
نكمل المتبقي من خفارات الطوارئ
هنا بالعناية المركزة
وفعلا بديت ويا رحلة الخوف بالنهار
صار ينزل يرتاح واني يمهم وبالليل يرجع
وأصعب لحظة بالخفارة لمن يجي الليل
وأبقى بس أني وياهم باليوم الرابع
وطن صاحي بعد العملية اللي
سووها اله باليوم الثالث
بس ساكت من الصدمة
گعدت يمه يباوعلي
والشيطنة وسوالفه مختفية من عيونه
وحلت محلها نظرات توتر وقلق
گعدت گباله ابتسمت
-مهندسنا العظيم
ابتسم بتعب رجعت احاچي
- سبايدرمان زييين لتخاف
مخلينه يرتاح وتلتئم جروحه ونصحي
هز راسة خفت من سكوته وگفت
-وطن تگدر تحچي لو اكو خلل اشرلي
براسك
بالگوة نطقها
-تعبان
بلا شعور مني مسحت جبينه
وشعره
-ياااابطل واني گلت ابو صوت الحلو
صايم عن الكلام
-خايف
- لا مااااصدگ
ذب حسرة ورد
-على هاجس
-شوووفه شلون شبعان نوم
شبيك اصلا فررررصة للنوم هايه
- اني گلت مات
غص بالكلمة وسكت غمض
عيونه وگعت دموعه وخجل مسحهن
فتح وضحك يخفي احراجه
-يمكن عيوني متحسسة شوفيهن
فحصت عينه واكدتله سلامتهن
-ممتاز يابطل صح حساسية بسيطة
باوعلي بنظرات مليانة رجاء
-ليل اخوي يطلع منها
-يطلع ويتحسن ويرجع لدوامه
وحتى للسانه الطويل وأزعاجه
باليوم الثاني الصبح طمنه الدكتور على رجل
وطن ووافق نخرجه لغرفة نقاهة
يوم واحد وبعدها يطلعو للبيت منا لمن يتحسن
قبل ليطلع بيوم
كملت دوامي اريد اطلع رحت اطمأن
علي ماكو بالغرفة طلعت ماشية
وكأني عرفت مكانه دخلت لغرفة
هاجس لگيته واگف على عكازة
ومنحني على هاجس حاضن راسه
وساكن وياه ماردت اصيحه دخل
نوح يبدي دوامه لليوم واني اطلع
باوعلهم حتى الكلام ضاع من لسانه
رفع راسه وطن يبچي ودموعه تتساقط
بهدوء على وجهه
-بس لا يروووح من ايدينه بروح
امي نووح مااابي شي مو
توجهه نوح بسرعة حضنه
مااعرف يهدي هو
لو يهدي نفسه
-والله يطلع منها شبيك
الدكتووور كل يوم يأكدلنا ان
وضعه ممتاز
-لا يمووووت ترى اموت
وراه اني مالي غيركم انتم
سمعتتتت لا يمووووت
ارتفع صوت نحيبه واني
انسحبت بره الغرفة بس
اشوفهم من الگزاز اللي حول الغرفة
واسمعهم
-مابي شي شوفه
باوعله
انحنو علي اثنينهم حضنو
واكتاف نوح اللي تحركت تعلن
انهياره وطن حاول يتماسك
سحب نوح ويسوي نفسه
مبي شي
-يعني اطمأن مووو اي اطمأن
انت وليل وكل الناس تگول زييين
هو يطلع منها
انيييي چان المفروض اكون
بداله هوووو شيسوي
من ندخل مكان يصير گدامي
والحيوان المفخخي اني
المفروض افحصه مو هوووو
بس سبقني وگالي وخر
هذا مو شغل مهندسين
وهو التضرر ادفعله عمري
بس يگوم منها
اباوعلهم منظرهم وهم يواسون
بعض خوف وطن وحنية نوح
وتضحية هاجس شكلت لوحة
أباء وقوة بفترة چانت من أصعب
الفترات المرت علينا
بعدها دخلت سلمت عليهم تاركة المكان
ادعي ان يگوم هاجس مو بس لنفسه
لخاطر اخوانه واهله اللي مستنفرين
بأنتظار خبر عنه وهيج طلع وطن الحمدلله على امل الشفاء الكامل
اما هاجس بسبب قوة الاصابات
بقى تحت الغيبوبة المصطنعة
صارت خفاراتنا اني ونوح عبارة عن قلق
من ابقى يمه كل شوية أفحص الدرين وأدعي ما أشوف خروج طالع منه لأن معناه الخياط فلت والأمعاء انفتحت
صوت الأجهزة كل صوت يصير بالجهاز
يسوي بيه سكتة قلبية
أخاف ينزل ضغطه وماالحگ علي
الحرب اللي تصوب بيها چانت بره قائمة
بس معركتنا الحقيقية چانت ويا
ويه كل نبضة تطلع على الشاشة
من نخلي المريض تحت غيبوبة مصطنعة
بهاللحظة المريض يصير بين إيدينه
مثل الطفل بلا صوت بلا حركة
بس جسد ونبض وأجهزة
نوم اجباااااري بسبب الاصابات وهالشي
ضروري امعاءه شايلين جزء منها
وعنده إصابة بالمثانة
الألم اللي بجسمه ميتحمله بشر
يعني اذا صاحي راح يتگطع من الوجع
وممكن يسحب الصوندات ويأذي جروحه
لهذا نقرر ننيمه ونريحه
شلون ننظم هالنوم الاجباري
جهاز صغير يضخ البروبوفول
أو الميدازولام بالوريد القياس بالقطرة
الوحدة عيني على الشاشة
إذا شفت ضغطه نزل أقلل الجرعة إذا شفت عيونه بدت ترمش أو نبضه صعد يعني بدة يحس
بالوجع وهو نايم فأزيد الجرعة شويه
أحنة اللي نتحكم بعمقه ونومه
بما إن هو بغيبوبه يعني عضلاته مرتخيه وما يگدر يتنفس بوحده جهاز التنفس الاصطناعي هو اللي يشهق ويزفر بداله
كل يوم نحركه بخفة ونمسح جسمة بمعقمات
حتى ميتقرح ارطب شفايفه بقطنة مبللة
امسح عيونه بمرهم حتى متجف
ونحرك مفاصله حتى متتيبس
كل يوم جده وابو وعماته وحتى
مرت ابو يجون يطمأنون وخايفين من الغيبوبة
شگد ميحچي نوح جده يلوب يريد
يطمأن اكثر الى ان بمرة تخربط وضعه
وراد يوگع جبتله كرسي وگعدت بالگاع گباله
اباوعله
-جدو افهمك اني هذا نوم العافية
جسمه تعبان والوجع هواي
وإحنا منيميه حتى الجروح تلتئم براحتها
يعني انت شتفضل نگعدة ويتألم لو نايم
ومرتاح وجسمه يتعافى براحته
نطت وحدة من عماته
-وشنووو امره بيدچ
التفتت ارد عليها تهز بيدها رديت حتى اخرسها
-لا هذا كلام الدكتور الاختصاص
واحنه ننفذه ومن باب العلم بالشيء
امرنا كلنا بيد رب العالمين
باوعت لجده وابتسمت
-الشفاء اله ولوطن جدو
طبطب على كتفي ووگفت معتذرة
-والله لو ترحون ترتاحون بالبيت افضل
جدو وضعك تعبان وهنا شفت كل شويه يگلولكم
ممنوع
ابو هاجس صاحلهم
-كلامها صح خل نرجع للبيت وطن هم
ظل وحده وأبوي تعب
تركونا وطلعو وهيچ مرت خفاراتي وياه
الى أن تم عشر أيام واذن الدكتور بتبديد
الغيبوبة بالتدريج واني دائما اخاااف
من لحظة الفصل لمن نحاول نقلل البنج
حتى نشوف استجابته
الايام المضت كلها چانت خفاراتنا
ويا هي حراسة اله وهو بين النوم الأبدي
وبين الرجعة للحياة شنو راح
يكون احساسه بعد ميوعى للصار منعرف
اصابته مو هينة من تحت العنق
لنهاية البطن وبده الترقب بعد تخفيف
وانهاء الجرعات المخدرة
چان الوقت بحدود الثنتين بالليل
گاعدة بصف سريره أراقب شاشة المونيتور
فجأة شفت جفونه ترتجف
مچانت صحوة هادئة
چان أشبه بغريق يحاول يلتقط أنفاسه الأخيرة
بدت أصابعه تتحرك بتوتر
وكأنه يدور عن شي فقده بعتمة الغيبوبة
وگفت بسرعة وعيوني توسعت بأنتظاره
وانفاسي محبوسة
رفت اجفانه مرة ثانية وانفتح جفنه بهدوء
- هاجس تسمعني
مجاوبني بس انين مكتوم طلع من صدره
أنين حسسني أن الألم صحى قبل لا هو يصحى
عيني منه وعالشاشات حوالي وعالصوندات
اللي طالعة من اماكن جروحه
بده الوعي يتسلل لجسمه قطرة قطرة
بدت عينه تفتح ببطء
واخيرا انفتحت بشكل كامل چانت مغيمة
تايهة مليانة حيرة
ثواني و بدت تتركز على السقف الأبيض مال الغرفة
مفتوحات بقوة كأنه مستغرب المكان
وكل شي حوالي مشوش
چان وضعه الصحي صعب شحوبه يميل للاصفرار وضغطه يتأرجح بين الهبوط والارتفاع
چنت حاسة كأسانة وعارفة وموقنة
كدكتورة أن رحلة العذاب بدت هسه
استئصال جزء من أمعائه يعني أن معركته
الجاية هي ويه الجوع الدائم
والامتصاص المعدوم
جسمه هسه عبارة عن ساحة حرب خاسرة
يعتمد كلياً على اكياس التغذية الوريدية
حرك راسه بألم وون بوجع وبصوت مبحوح
صاح
-ااااااااااخ
بسرعة بعدت الماسك
عن وجهه وجر نفس ضعيف وصابه الألم
وصرخ بضعف
-ااااااااخ
حاول ببطئ يحرك راسه واني اهدي بي
-تسمعني هااااجس هدي نفسك لتتحرك
بصعوبة فتح عينه ونزلت نظراته وشاف الأنابيب الطالعة من جسمه بهاللحظة شفت الرعب بعيونه
ايده اللي ملفوفة بسبب الجروح
حاولت أن تمتد لبطنه لمكان الجروح
وكأنه حس بالفراغ اللي تركه استئصال الأمعاء
ماگدر يمدها وگعت بتعب
بسرعة ورجع غمض ووجهه شااااحب
طلعت القلم الضوئي بسرعة
من جيبي ايدي من الخوف ترتجف
أكثر من المعتاد وجهت الشعاع الصغير لعينه
وتقلص بوبؤ عينه بسهولة
حسيت بالراحة لأستجابته خفت
من اغماضته ضربت على خده بهدوء
-هاااجس افتح عينك
بده يتململ بووووجع وانين الأنين اللي
صدر من عنده چان مرعب
كأنه صرخة مكتومة ضد الللي صار
فتح عينه تماماً هالمرة وبده صراخ
بصوت اعلى
-اااااااخ ………
حاولت احاچي رافض يرد بس الونين
والصراخ يصدر منه بصوت مبحوح
موجوع
ارتفع نبضه وتقربتله افحصه وهو يصرخ
بهدوء سديت حلگه بيدي واني اهمس
-اهدأ هااااجس بس لحظات اهدأ
ماحسيت الا بشفافه تنفتح
ويلتقط كفي بقوة عضني تحت
صدمتي ووجعي واني احاول اسحب
ايدي وصراخه المكتوم بكفي وونينيه
العالي الثواني صارت دهر
واني اسحب ايدي منه ورافض يتركها
الى أن ضغطت على جرح صدره
توجع تاركني من صدمتي وگعت عالكرسي
الورايه وهو يصرخ بوجع
ايدي بيها نقاط دم من اثر اسنانه
اتصلت بنوح اللي راح يرتاح
شويه وجاوب بسرعة
-تعال نوح صحى هاجس
غلق التلفون ودقايق وصار
يمي وجهه مخطوف وبيده ابرة
بس صاح
-هاااااجس
ميل راسه هاجس شويه
وگوه طلعت الكلمة من لسانه
-اموووووت
ركضله فتح الكانيولا خله الابرة
وخله راسه على راس هاجس
يهمسله
-رااااح ترتاح اشش سمي بسم الله
عيني من هاجس جسمه يرتجف
طلعت بطانية واشرت لنوح
-لازم ندفي
حاوطنا بحرام طبي وبعدين البطانية
بقى نوح حاضن اكتافه منظرهم الحزين
هز كياني نوح الخايف
وهاجس المتوجع الساند راسه
على صدر نوح يحاول يستمد القوة
منه دقايق سره المسكن
بجسمه ونوح سنده عالسرير
ورفع راسه شويه وجهة مرتاح شويه
عينة صارت بعيني واني لافه ايدي باوعلي
نوح
-شبيچ
مشالي ابتسمت بهدوء حتى مااضوجه
-ميدري بنفسه من الالم عضني
-والله اعتذر بداله
-شنو القضية نوووح
ندسته ومشيناله نعدل مكانه
-الحمد لله عالسلامة
هز راسه بتعب فجأة غمض وفتح
عينه بخوف
-وطن ……
-بخييير والله وطلعته للبيت الحمد لله
-ابو ……
مخلى نوح يكمل
-ابو صعبة اصابته براسه بس بسيطة
مو خطرة هم خمس ايام وطلعو من المستشفى
فتح عيونه فجأة ونطق
-ثاااائر
هز راسة نوح متأسف وهو غمض عيونة
وانسابت دموعه طلعت بسرعة
تاركتهم وعيني من بعيد تصد عليهم من
الشباك
نوح حضن راسة اكتاف هاجس تهتز
بخفة معلنة حزنة وبكاءة على صديقة
ربع ساعة رجعتلهم ونوح يعدل المخدة
لهاجس ويسألة
-حبيبي تريد شي
-ابوي وجدي
-الساعة هسه بثلاثة بالليل
الصبح قبل ماتكمل خفاراتنا اجيبهم
-طلعني للبيت رووان شلون
باوعلي نوح محتار شيحچي
وگفت يمه اشرتله فهم عليه
-هاجس صارلك اسبوعين بغيبوبة
والفاتحة خلصت وقمنا بواجبهم كامل
بلع ريگه وسأل بأستغراب
-اسبوعين خويي مدفون من اسبوعين
-اذكر الله هاجس واسمعني اصابتك حييل قوية
جزء من امعائك استئصلوها
رفع راسه يريد نرفع الغطى
-خليك مرتاح هاجس كل شي يخلص
بس ارتاح الحمد لله من گمت بالسلامة
بتعب همس
-رجليه مگطوعات
-لا والله هذا خدر بسيط
من النوم والمخدر
- طلعني نوح
-ميصير هاجس حالياً امعائك متوقفة بشكل
كامل مسويلك ستوما خارجية
سأل بأستغراب
-شنو
-كيس خارجي يجمع الفضلات لحد
ما يتحسن جرح امعائك
صفن وعيونه جحظت بعصبية بصوته التعبان گال
-اطلع انت وياها
رد علي نوح
-خل افهمك والله بسيطة
گالها بيأس
-بره
اشرلي نوح وطلعنا وگفنا بره
وعيونه حيرانه على باب الغرفة
-شلون افهمه
-اني افهمه غصباً علي
-وضعه مايتحمل
-يتحمل بطل اللي طلع من نص
الموت ماعلي شي
-والله چنت يم المدير گال تساهلت
وياكم انت ودكتورة ليل لخاطر ابوك
وجدك رجعو لنظامكم بعد من باچر
نبلش نتعاگب بخفاراتنا
-يكون افضل حتى واحد من عدنا عالاقل
يكون متواجد يمه كل يوم وميبقى بوحده
-راح ارجعله
-لا روح اساساً هو تحت خفارتي
ولازم اغيرله ستوما ميحتاج تدخل
-بس ………
-لتخاف مااكل اخوك
ضحكت وهو نزل للطوارئ
سويت الراوند مالتي وكملت
بعد ساعتين المفروض ارجعله
دخلت وهو باوعلي چان واعي
اكثر وحتى صوته شبه طبيعي
بدون تفاهم اول مشافني گال
-بره
-تمام اطلع بس حالياً اني جاي اسوي
واجبي
-خلي غيرچ يجي
-هي مو طماطة تختار على كيفك
انت حالياً بخفارتي فلازم اكمل شغلي
-صيحييييي نوح
اتصلت بنوح وفتحت سبيكر
لأن ميگدر يلزم التلفون
-ها ليل
-تعااال حيوان
-تمووون بعد اخوك گول
-وين مولي ومخليني بيد
اليسووى والمايسوى
باوعتله الحقير سحبت التلفون ورديت
على نوح
-دكتور نوح الماتسوى راح تطلع
وانت تعال للنقيب او خلي هو يعالج نفسه
ذاتياااااااا
-لخاطري دكتورة الوضع ………
ماخليته يكمل غلقت السبيكر وسمعته
-وضعه صعب والمضاعفات هووووايه
-ليظل بالك
-اعتذر مرة ثانية
غلقت الاتصال ومااهتميت لأسلوبه
تقربتله رفعت البطانية وراها الحرام الطبي
مديت ايدي لبطنه اتأكد من الكيس مد ايده
لزم معصمي
-تركيني
-ميصير هذا الكيس حاليا يشتغل شغل الامعاء
يجمع الفضلات لازم لازم نغيره والا ترجع البكتيريا
والاحماض على جلدك تحرگك
نزل ايده بتعب واني بديت اجهز اغراضي
الاحتاجها كيس ستوما جديد
قاعدة واقية تحمي الجلد من عصارة الأمعاء
مي دافي معقم وشاش حتى انظف المنطقة
بديت ابخ بخاخ حول المكان شلت طبقة اللاصق
من الستوما القديمة
مسحته بطبقة كريم تحمي الجلد من التقرحات
رشيت بودرة خاصة حول المكان حتى
تمتص الرطوبة لون الامعاء وردي يطمن
يدل على عملها بصورة صحيحة قياس القاعدة
لازم يكون مضبوط اذا چانت واسعة العصارة
راح تاكل الجلد
واذا صغيرة راح تجرح الامعاء كل شي
لازم يتم بدقة دفيت الجزء اللاصق بيدي
ولصقته بهدوء ضغطت على كيف الى أن ثبت
باوعت للمكان داير ميدور ماكو فقاعة
هوا كل شي مضبوط
غطيت بطنه چيكت كيس الادرار
طبيعي بلا دم او قيح
بديت اعقم جروحه اللي بصدره متحتاج
ان نلصقها اغلبها رفعو خيوطها
وصلت لراسه بجبينه يم حاجبه
بهدوء مسحت المكان همسلي
-عطشان اريد مي
هنا حرت شگول وشحچي شفافه ذابلة
وتعبان غلست وكملت شغلي رجع سألني
بعصبية
-جيبولي مي
گعدت گباله عالكرسي وگلت المواجهة هسه
افضل شي خليت عيني بعينه وبديت اشرحله
-اصابتك چانت كلش چبيرة الأذى الاكبر ببطنك
امعائك مثانتك الطحال كذلك
-وهالهوسة شعليها بالمييي
گالها ويريد ينفجر غضب هديت ورديت علي
-الاصابة بالأمعاء يعني امعائك حاليا
ماعدها قدرة على الهضم و الامتصاص
متكدر تشرب او تاكل اي شي حالياً
عبر الفم
-اكل عبر الاذن مثلا
ماعرت كلامه وتهكمه اهمية وكملت
-شوف هاي الاكياس اللي معلگه فوگ راسك
هاي تغذيك بدل المي والاكل عبر الفم
كلوكوز دهون احماض كلها جاي تنحقن عبر
الوريد
-شيلوووووها مااريد
-الموضوع موو لعب هاي السوائل
هي الخيط الوحيد اللي يوصلك بالحياة
يعني جاي نغذي دمك مباشرتا
املاحك وغذائك كله معتمد عالمحاليل هاااايه
تمام
غمض عينه على كلامي وشفافه جافة
بلع ريقه بصعوبة
ياالهي شگد صعب الانسان القوي
يوگع بحفرة ضعف فجأة
وگفت بللت قطعة قطن بالمي
وتقربت بهدوء بللت شفافه فتح
عينه متفاجئ
فتح حلگه بللته داير مداير
مد لسانه يتذوق قطرات المي
وتحركت اكمل بقية الاجراءات
سحبت الدم واتصلت اخذو للمختبر
حتى يجيكون وظائف الكلى والاملاح
وهذا الاجراء نسوي كل كم ساعة
گعدت اجيك الدرينات كل شي مضبوط
چيكت كل شي واجه وقت الابرة المميعة للدم
وگفت عقمت كتفه باوعلي
-شتسوين
-علاجك
-تردين تسمميني
-اي ياهارون الرشيد
ضحك مستهزئ ضربته الابرة وهي فعلا
تأذي چان يگلي
-تنگطين سم
-شسوي كووووبرا مو بيدي
تركته بعد ماخلصت كل شي ردت اطلع
همس
-دكتورة ظلام
ضحكت هو بيا حال ويقطر حقارة التفتت
-نعم
-شگد تستمر هالوضعية
-الكيس
-اي
-اذا تعاونت ويانه وقاومت والعلاج وكل شي
مضبووط مراح تطول اكثر من ٣ اشهر
نزل راسه بتعب وذب حسرة واشرلي
-رووووحي يلا
استغفرت ربي مجنون هالشخص
بعد مااطمأنيت على وضعه وشفت تحاليله
قفلت ملفة لليوم وطلعت مكملة خفارتي رحت
لنوح اللي لگيته يريد يصعدله
-ها دكتور
-شنو الوضع
-حچيتله كل شي بشكل واضح وصريح
حتى يقوووي نفسه تمام
-وشگال
-تنگطين سم
-هههههههههه الامور تبشر بخير
-باچر اني استلمه انت اشبع نوم
-هو راح ادزله الوالد وجدي ووطن گال
اجي يشوفونه
-يلا اروح اني
ودعته وطلعت للبيت
وبعد استراحتي لوقت طويل
بالليل راسلت نوح گال الوضع تمام
بس خايف على وطن لأن مكتئب اتصلت
بي ورد بعد ساعة
-ثگلان علينه العراق
-ظلاااام
-شلونك يابطل
-عال العال اعرج واخببببل
-بالعلاج الطبيعي تتحسن
-بعد مايهمني شي
-ليييش يائس وطن
-شفتي شصار بأخوي
-والله بخير اليوم طردني ولسانه
طولة متر
-والله شبيك
-راح اجي أشوفه
-لا ارتاح لتجي وتضغط على
نفسك
ذب حسرة ورديت
-روحك الك وطن گول ياالله
-والله اگول بس سنننننة واكثر مرت
من دخلو ذوله الخنازير لهسه ماكو
لو موجودة چان اتصلت حافظة رقمي
عن ظهر قلب والله ياخووووفي
سكت شويه واني جاوبته اهدي
-تعرف لحد الان محاچيلي قصتكم
بس رؤوس أقلام
-اووو قصة قصيرة بس مجنونة
تنفس بتعب ورد
-اسمها گلزهار
-اوووف شهالأسم الحلو
-من جمالها اهلها مسميها گلزهار
يعني بستااااان ورد
-شگدددد حلوة لعد
-مو بس حلاوة شكل
وحلاوة روح ولسان
حبيتها مااگلچ من اول مرة شفتها لا
لأن اول مرة گعدت احشش على
اسمها وغسلتني وجه وگفى وطلعتلي
لقب
-الله عليك
-والله سمتني الاچلح
لسانها بالعربي شطوووله وبالكردي
بعد اطووووول طول الاشهر الاولى
تباوعلي صفح وتشمر عليه قنابل كلامها
الى أن بمرة وهي ماشية فد شي وگع
وراها مشيت لگيتها مداليا ذهب مستطيلة
منقوش عليها طاووس بجهة
وبزاوية المدالية شمس واشعتها منتشرة عالمدالية
وبالجانب الثاني حية كأنما واگفة مستقيمة
وعيونها شذرات حمر ومضلل عليها غصن زيتون
فد شي غريب ومشغول بأتقان
شلتها بجيبي وضحكت وگلت
أجت والله جابها
رجعت للقاعة بس شنو عيونها من البچي
متنشاف صديقتها تهدي بيها
-نرجع للسنتر خاف وگعت هناك
-لا اول مدخلت السنتر مديت ايدي
ماكوووو برگبتي اموووت اذا ضاعت والله
غصت بشهگتها وماصبرت گمت رحتلها
-گلزهار
رفعت راسها باوعتلي
-شتررريد
ردت اشيلها براشدي على اسلوبها بس
استغفرت وطلعت المداليا من جيبي
-هاي شفتها وگعت منچ يم الدرج
خليتها عالستيج مالتها ومشيت
وهي ارتفع صوتها بالبچي
ممصدگة لگتها
طلعت بره ورة شويه اجاني صوتها
-وطن
التفتت الها الشمس وراها
زايدتها حسن
-اني اعتذر والله چنت ……
-عادي
ردت اگوم مشت وياي
-والله عزيزة عليه مدالية
ماما
-الله يحفظها شدعوة ممخلية حيوان
بالغابة ممخليته بيها
وگفت صفنت بوجهي وردت
-شوووويه ثقافة رجاءاً
وماما ميتة
وهاي رموز ديانتي فبلا استخفاف
بساعتها ادركت اني چفصتتتتها
خجلت من موقفي ولثاني يوم
جبت عصير وكيك وگعدت يمها بالقاعة
ماتتحمل الحرارة اغلب الوقت
تتحول لجمارة من الحمار فتگعد
بالقاعة
-عربووون اعتذار
سحبت عصيري
-احب البرتقال الرمان مو طيب
-بالعافية واعتذر
-مقبولة
-ممكن اسأل
-تفضل
-شنو الديانة اللي هاي رموزها
-أيزيديه
-تشرررفت
ابتسمت وكملت
-تعرفها
-اسمع عنها مو تعبدون النار
-لا لا شنو هاي احنه موحدين
وبدت تشرحلي عن ديانتها والرموز مالتها
بهدوء وبصوتها اللي يجلجل بلطف
-الديانة الإيزيدية من الديانات التوحيدية القديمة والمغلقة
-شنو مغلقة
-متبشر بالدعوة يعني نتوارثها عبر الاجيال
بلا دعوة للاخرين ان ينتمولها
نؤمن بأله واحد الله هو خالق الكون
وهو كلي القدرة والرحمة
ونؤمن بأنه اوكل رعاية العالم للملائكة
السبعة وعلى رأسهم طاووس ملك
نعتبرة الوسيط بينة وبين الاله
اكو بعض الناس يعتقدون احنه نعبد الشيطان
والنار وغيرها لكن لا هالاعتقاد مغلوط
نؤمن بأن الخير والشر ينبعون من الانسان نفسه
منؤمن بوجود شر يوازي قدرة الله
-سامع انكم تصلون للشمس
-لا مو نعبدها لكن نصلي نحوها
نور الله والمصدر الأساسي للحياة
ونقدس النار والتراب والمي
-والحية والزيتون شنو
- بالروايات الشعبية الإيزيدية يگولون
إن حية سدت ثقب بسفينة نوح ومنعتها من الغرق
لذا فهي تحترم وتقدس
واكو بمدخل معبد لالش النوراني
منحوتة لـحية سودة عمودية بجانب الباب
الحية بالمفهوم الإيزيدي رمز للحكمة والإنقاذ
اما شجرة الزيتون فهي شجرة الحياة
نستخدم زيت الزيتون لأضاءة القناديل
اللي نوقدها كل ليلة بمعبد لالش
ترمز لبقاء نور الله مضيئ بالعالم
ابتسمت واني اسمعها تشرح بهدوء
وثقة عن ديانتها كملت وگالت
-وهسه فهمت
-جدااااااا تشرفت گلزهاااار
صدگ شنو معنى أسمچ
-بستان الزهووووور
-يااااابه جنووون العظمة يعني
بستان زهوووور مو زهرة وحدة
خجلت وحمرت خدودها
-ليش مااستاهل
-تستاهلين
ومن هاليوم انطلقنا بعلاقة صداقة
هادئة رقيقة مثلها لحد نهاية السنة الاولى
اعترفتلها وهي كذلك
والسنة البعدها زادت علاقتنا قوة
لدرجة صار ابوها يجي يشوفها متنزل
خاف تفارگني
واني من تعطل وتطلع من القسم اطلع
وياها وين متحب
بدت السنة الثانية واحنه بذروة تعلقنا
كأن بغداد والموصل توحدو بسبب گلبين
بنهاية السنة الثالثة
بدة ثقل الحقيقة يضغط على گلزهار
چانت تبتسملي بس عيونها بدت
تحمل نظرة وداع محتمل
ديانتها
وديانتي
مجتمعها
ومجتمعي
اعتبارات هوووايه واجهتني بيها بيوم
واحنة گاعدين بزاوية هادئة بالجامعة
عينها تنزلها وترفعها ورموشها الشگرة
مبللها الدمع گالت بغصة
-تعرف شي
-گولي يابستان
ضحكت مثل كل مرة من اشاقيها
-تعرف ان بديانتنا ممنوع الزواج من غير
الايزيدي قوانينا أصعب من حجارة الجبال
اللي اجيت منها
اني بكل عنفوان الشباب وقوة حبي
بذاك الوقت وعدتها بالمستحيل
وان هي متكون لغيري بس الرياح
جرت بما لا تشتهي السفن
نقطة التحول صارت من جازفت وبلحظة
غباء مني بأن ابلغ جدي وابوي بخبر
اعجابي بيها وكل ظنهم انها مسلمة
قررت اشيل هالمعلومة على امل ان تكون
عائق بسيط يمكن حله وره نص السنة
بعدها مجاية اتصلت بيها قبلها بيوم
وهي كذلك گالت نحاول
ووصلنا واستقبلونا احسن استقبال
وابوها بمنتهى الادب گالها دياناتنا مختلفة
عاداتنا مختلفة ومستحيل انطيها
الصار اني فجرت قنبلة داخل البيت
من رجعنا جدي بوقتها صار من ناحيتي
بس ابويه رفض رفض قااااطع
اما هي فأتصلت بيه تبچي گالت
بابا گال مدام صداقتچ تعدت حدود الدراسة
هالمرة فثقتي بيچ
صفر وانتقلت من الجامعة ورجعت للموصل
بواسطة وصارت رسائلها تجيني من ارقام
اخواتها وجدتها وحتى صديقاتها
الى أن مشتريتلها صديقتها تلفون صرصور
صارت بره البيت تتصل ومن ترجع تغلقه
ومن تخرجت وعن طريق صديقتها دزتلي صورها
وبقينه على تواصل عبر التلفون بعد تخرجها
بالليل من ينام الكل اتصل بيها ولو ثواني وتقفل الجهاز
الى ان بده يتدهور الوضع وصار اللي صار
اتصلت بيه مرة الجهاز مقرب يطفى
شحن اتصال سريع بچت بي
ومگالت بس كلمتين
-اني أحبك لتنساني
وانغلق الجهاز صرت اتصل واراسل كل رقم
راسلتني منه لكن كلها ماكو
وهاي سنة واشهر اختفت گلزهار وتلاشت اخبارها
مثل ماتلاشت ازهار الجبال بسنجار
صرت مثل المجنون كل مااشوف زيتونة
تصير عيونها الخضرة گدامي
وكلما شرقت الشمس رفعت ايدي مو عبادة
بس حتى اتذكر بستان الزهور المر بحياتي
وغيرها للأبد
گال كلمته الاخيرة بغصة وجر نفس
عميق وكأنه يمنع نفسه من الانهيار
-وطن
-نعم ياظلام
-انت زين
-مووو زين ليل ابد مووو زين
غص بكلمته وقطع الاتصال
كسرته وغصته چبيرة عكسها بوجع
وطن اللي يشوفه يگول ماشايل
هم بس خلف قناع الفكاهة والضحك
اكو وجع عميق
شويه ووصلتني رسالة منه
-ظلااااام ترى خلص الرصيد
ابتسمت واني ادري استحى
مني لأن بچه وحقه من يبچي
الفضائع والكوارث اللي صارت بالبنات
الايزديات تخلي يبحث مثل
المجنون وهذا الصار
هاليوم مر گعدت على صوت المنبه
طلعت اتوضى صارت بيبي گدامي
-ها بيبي صباح العافية
-صباح الخير عذوووبة
-ماتخليني اسويلچ ريوگ
-ارتاحي ياحبيبتي وين بيچ حيل
-بعدني شبااااب
گالتها واني حضنتها
-اكوووو ناس ودولچ سلام
-خفو هم وسلامهم
-بيبي الله عليچ صدگ يعني ابدد
متسامحي
-يابيبي شايفة السلية التشلعينها
من ايدچ وترتاحين
-اوووف لهالدرجة
-اي وروووح عمي سالم
من حلفت بعمها معناها صدگ
توضيت وصليت وياها وطلعت
لدوامي استلمت شغلي بين مراجعة
علاج تسجيل معلومات مراقبة هذا
وذاك دخلتله الغرفة هدوء وشبه ظلام
اضاءة ضعيفة نايم بشبه جلسة
مغمض أمنت فحصت حرارته
الدرينات الاكياس متغيرة وجديدة
فز جسمه اهتز ببساطة فتح عيونه
بلا كلام همس بصوته التعبان
-القرچ
افحص بصدره رفعت نظري اله ونزلته
-دكتوووورتك حالياً انت تحت ايدي
ابتسمت بأنتصار وهو بلل شفافه بلسانه
مبين عطشان
-محتاج شي
-عطشان
تقربت فحصت مكان امعاءه ماكو اي
صوت يدل على عملهن من جديد يعني
هم ماكو مي
-مااگدر انطيك
-يمتتتتتى
-بس حررركة بسيطة اسمع بأمعاءك معناها
رجعت تشتغل وانطيك
تقدمت بللت شفافه بالگطن
عيونه غايرة بمكانها سألته
-تحس بشي
اشرلي براسه بمعنى اقتربي
اقتربت منه باوعلي بنظرة حقيرة
-اممم بس بشفافي احس
-بغض النظر عن سوالف العسكر
المعتادة شتحتاج
-مسكن بسيط راسي يأذيني
-تمام
ضخيتله مسكن جرعة بسيطة
وگعدت اكتب اللي سويته بملفه
اكتب واكتب الى أن خلصت سألني
-شگد تطول هالوضعية
-بس انطي مجال للأمعاء تتحسن
-اريد اتحرك
-من باچر بلغنا الدكتور نبديلك حركة
-احس جسمي متيبس
-لا چنه نحركك يومياً اني ونوح
بشكل متواصل
باوعلي بأهتمام يريد يعرف واشرلي عالسرير
-عدلي شبه جلسة
-تمام
عدلته اله وسحبت كرسيي وگعدت
-نحركك لأن الحركة جزء أساسي من العلاج
حتى نمنع تجلط الدم وتحفيز الأمعاء على الحركة
چنة نحرك اطرافك باليوم ثلث مرات نثني ركبك
اديك مفاصلك وحتى اصابعك
ندلك رجليك واكتافك حتى نمنع التجلطات
نجلسك شبه جلسة مثل هسه حتى منطقة
البطن تتحرك
-ليش مخليني بغيبوبة
-الايام الاولى بعد الاستئصال صعبة
والالم قوي واصاباتك هوووواية
هاي من صحيت بعد العملية ب١٤
يوم وشفت الوجع شلونه
-وطن شنو وضعه ليش بس يگولولي زين
-لأن فعلا ماكو شي وخلال شهرين علاج طبيعي
يرجع يمشي احسن من قبل
صفن بالسقف وهدأ واني فتحت
تلفوني باوعلي وسألني
-اتصليلي بنوح
اتصلت بنوح وهو حچة بصيغة
الأمر
-دزلي تلفون بي نت اشتركلي
شهري
انطاني التلفون حاچاني نوح
-بشري
-الحمد لله احسه احسن ولگيت بملفه لازم
نحركه باچر اخلص ب٢ راح امشي
يلا اطلع
-راح اجيبله تلفون اخلي شويه يغير جو
ابتعدت عنه وسألته
-مو يشوف الوضع خاف موزين على نفسيته
-ميخالف راح ينجن گضه البارحة عصبية
وغضب
-تمام بيدمن تدزه
-اني اجيبه وياي
غلقت الخط وهو منتظرني يسأل بفضول
-هم سامعة خبر عن صاحبي من نوح
-ايي اتصل بي گدامي
-والله
باوعت لوجهه اللي تغير ويدور عالحقيقة
بوجهي مستفسر
-والله گدامي اتصل اصابته براسه بس زين
هز راسه ساكت واني تركته وصلت باب الغرفة
سألني
-يمتى تطلعوني من هالغرفة عبالك
گبر
-باچر اسأل الدكتور
سكت واني طلعت سويت الراوند
المعتاد ورجعتله الصبح بالتسعة
گاعد من النوم اجة الاخصائي
فحصه واكدلي عالمشي وسألته عن
الغرفة گال تمام بس المراقبة تبقى
مشددة وهنا بديت الاجراءات
بالبداية قبل نص ساعة انطيناه المسكن
وفصلنا كل الاكياس المغذية رتبنا الستوما والدرينات
حتى نهيأه للگعدة جلسته نص جلسة جابولة
گاون جديد ويا بيجاما لبسه المساعد
الخطوة الأولى چانت الگعدة على حافة السرير احتاجيت لمساعدة ممرض حتى نسنده
خوفاً من الدوخة
سندنا مگعدينه ضبطنا مكان رجلي وجهزنا مشاية
حتى نسنده بيها
سحبنا على كيف وبهدوء بعد ماتأكدنا
من شغل المسكن غمض عيونه من گعدنا انحنى
وقوس ظهره غمض عيونه ونفسه صار گوه يسحبه
جبينه تعرق بغزارة
-هااااجس
-همممممممم
گالها بوجع
-افتح عيونك شو احچي وياك
فتحهن حممممر من گد الضغط
-باوعلي
هز راسه منتبه لكلامي
-شوف لا تجر نفس قوي لا على كيف
وحدة وحدة مثلي هيچ
بديت اجر انفاس قصيرة وهو وياي
لدقيقة گتله
-هسه جر نفس قوي بس برااااحة
تمام
ذب نفس مرتاح وغمض عيونه فتح عينه
- اسمعني هسه بدت المعركة الحقيقية
الوگفة يحتاجلها جهد تمام وهالجهد راح يشد
عضلات البطن وتحس بألم
وحتى نخفف هالالم لازم نلبسك مشد
هز راسه موافق سحبت المشد فتحته
من الكيس وحاوطت بي ظهرة صرت
گدامه
-تگدر ترفع ايدك
هز راسه رفع ادي شديت المشد بحذر
محاوطة الكيس والدرينات مثببتهم
ثواني وحسيت ايدي نزلت بتعب على
اكتافي مارفعت راسي الى ان كملت
على كيف زحت ايدي منزلتهن
اشرتله
-هسه مستعد توگف عالمشاية
وافق واني والممرض ساعدنا وگف
الحمد لله اشرلنا نتركه
-خمس دقايق تگدر
-اي
تحركت ويا بصفه يخطي بتعب خطوات
قصيرة بطيئة حول الغرفة الى تمت الخمس
دقايق
-يلا عاشت ايدك ترجع للسرير
-لا يصير اگعد عالكرسي شويه
-اي يصير بس تتعب
-خمس دقايق بس
گعدت اني عالسرير وهو عالكرسي
فجاة غمض عيونه بقوة وگفت
-تحس بشي
-احس الم عصر معدتي
-لازم ارجعك تتمدد
ايقنت ان امعاءه ممكن تكون تحركت
بهدوء رجع لفراشه رفعت المشد رجعت
المحاليل ورفعت الگاون عن بطنه همس
-رومانسية مفرطة
-انت بيا حال
ضحك بدون صوت ضغطت المكان
بالفحص تأذه
-فضيييني
-بس اسكت ثوووواني خل افتهم
سكت واجاااااني احلى صوت ممكن
نسمعه بعد عملية الاستئصال سمعت
حركة الامعاء بشكل واضح
رفعت راسي مبتسمة ورد هو بتهكم
-بشري حاااامل
-تحركت امعائك
-فهميني
-بعد العملية الامعاء تتورم والتخوف من التسرب
وشلل الامعاء وهوايه امور طبية يثير القلق
حركة الامعاء تقربك خطوات من ارجاع مسار الامعاء
لطبيعتها ورفع الستوما
-كل الكلام موووو مهم اگدر اشرب مي
-لازم نسأل الاخصائي
-شمنتظرة
كالها بنفاذ صبر وهالشي من حقه
نزلت للطابق الاول وبعد كلام وتاكيد
من الاخصائي گال مقدار استكان فقط
اليوم لحد منتاكد بعد الهضم يدخل كيس الستوما
او يتسرب لجوف البطن وهالنقطة هي نقطة الخوف
صعدتله ووجهه عالباب متجه كأنه بانتظار الموافقة
-هاااااا
-وافق ومقدار صغير لمدة ساعة اذا تصرف بالكيس
يعني تمام
-يييييلا شمنتظرة شهالفهاوة
ميجوز من طبعه الحقير فتحت بطل المي
والسرير بوضع نص الجلوس
مد ايده ياخذ البطل
-لا انيييي اشربك
عض لسانه كالعادة خليت البطل يم شفافه
وشربته مد كفه ضغط كفي وشرب اكثر من المقرر
سحبت ايدي بسرعة ووگع المي على ملابسي
رفعلي حاجبة ممتعض
-الشمر شيقربلچ
-ابن خااااالي
فهم عليه ان اقصده
-ميصير يعني جاي احچي لمصلحتك
-هاي القطرات وگعت على گلبي طفته
مثل قطرة ماي توگع عالجمر چنت عطشان بساعة
تمشيط البيت وتخيلي مدى عطشي
تأسفت للي صارلهم وواسيته بكلام مشجع
-انتم أبطال وهاي مجرد عثرة بس
هز راسه ورجع سألني
-شوكت نتأكد من الهضم
-هسه ننتظر اذا حسيت بلوية بسيطة
گلي
نص ساعة وعفس وجهه واشرلي
-شووووفي شغلچ
الاسلووووب منعدم
تقدمت فحصته والحمد لله حركة
شبه طبيعية
-الحركة تمام راح يجي نوح وافهمه
اليوم العصر هم تشرب شويه
وبالليل
من باچر نبدي بسوائل خفيفة
شوربات سااااائلة فقط
قفلت الملف وردت اطلع كملت خفارتي
-تطلعوني لغرفة اعتيادية
-اي راح ابلغ نوح
اني خلصت دوامي محتاج شي
-اتصليلي بنوح
اتصلت بنوح رد
- اني جاي بالطريق
-مو هاجس يريدك
انطيته اله گاله جيبلي ملابس
مدري شرد علي
انطاني التلفون اخذته جاي اطلع
صاح
-اگلچ
-تفضل
باوعلي راد يحچي شي وتراجع
-لا ماكو شي
-تمام مع السلامة
طلعت تاركته التقيت بنوح نبهته وفهمته
على كل شي ورجعت للبيت
النوم ماخذ جزء من حياتي بابا بوقتها رجع
سافر حياتنا ماخذة رتم هادئ اني وبيبي
وماما ناكل نسولف ونتوزع على غرفنا
بالليل اتصل بيه نوح
-عبالچ ماعندچ خفارة واخليچ
تنامين
-شلونه
-احسن هم مشيته وقربتله السرير
بالغرفة الجديدة يم الشباك غيرتله
ملابس
-لتضغط على الدرينات بيهن
-لا جبتله تراك دگم مريح
-شربته مي
-اي وتصرف للستوما الوضع ماشي
تمام التمام
-وطن شلونه
-بس هالاسبوع ويبدي علاج طبيعي
العضلة متضررة ليل احتمال يبقى
يعرج شي قليل
-لا ان شاء الله ماكو شي
-باچر اسويله شوربة سائلة
لو سوب
-اني راح اسويله
-لا للتعبين نفسچ
-ماكو تعب حسب كلام الدكتور
بلا اي توابل ودهون ولا اشياء صلبة
-نفسيته احسن اليوم
-الحمد لله
-يلا اتركچ ترتاحين
نمت بعد هالمكالمة وگعدت من وقت
سويت شوربة من سوب لحم بلا دهن
موجود عدنه خليت بي قطعة بتيتة
وشجر بس وملح من استوت الخضروات
هرسته بالخلاط خليته بحافظات وطلعت
لدوامي
بديت الراوند مالتي لمدة ساعتين
الى أن وصلتله الساعة ب٩ دخلت
لگيته گاعد يتصفح بتلفونه
التفت من فتحت الباب
-صباح الخير
-صباح النور شربيني مي
ضحكت علي كأنما منتظر
شربته شويه مي وبلشت شغلي
غيرت الكيس هو دار وجهه متضايق
كيس الادرار مغيري الممرضين
چيكت المحاليل الدرينات كل شي بمحله
الشوربة بحافظة للحرارة طلعتها
المقدار كوب بكل وجبة
-تاكل
-هم سائل
-اكيد
عدلت السرير سحبت الميز قربته صار شبه گاعد
-اوكلك
-لا عدليلي السرير اني اكل
عدلته اكثر توجع رجعته
-اني اوكلك ارتاح انت
طلعت مقدار الكوب وبلشت ويا
خليت اول خاشوگة بحلگه غمض عينه
براحة دافية الشوربة وطيبة
وملحها معتدل
بديت ويا منا لمن خلص المقدار
انطيته كلينكس مسح حلگه
-راح تحس بألم أقوى شويه
لأن اكل بي عناصر غذائية دخل بطنك
عادي لتخاف
-اخاف ……
گالها مستنكر
-تقلق
هز راسه منزعج
-اگدر امشي
-تمام مستعد
-ومو خطوتين وترجعيني
-امشيك بالممر مال الردهة
بديت الاجراءات چيكت كل شي ردت اصيح الممرض
-مااريد بس شويه ساعديني
بده على كيف يتحرك الى أن گعد بحافة
السرير نظم انفاسه مثل ماعلمته
بعدها مد كفه وهو مغمض
مديت كفي اله ضغط ايدي وگال يالله ووگف
بقة ثابت بمكانه ثواني گلت هسه يترك ايدي
ماكو
-نمشي
-يلا
جاوبني وخطى خطوتين شويه منزل نفسه وحاني
ظهره
-مضايقك المشد
-لا تمام
تحرك واني ويا خطى لنص الممر وترك كفي
وانسند على كيف عالحايط شويه استقام بوگفته
الى ان شبه استعدل وصلنا لنهاية الممر
واستدارينه راجعين كيس الادرار متمسك بي بيده
والستوما ضاغطتها بالمشد جسمة شويه ضعفان
وشاحب رجعنا للغرفة اشرلي
-فتحيلي هذا
فتحت المشد ورجع گعد عالسرير
-اريد شي حلوو
-بس يتصرف الاكلته اجيبلك جلي
-لا مااكله اريد چاي
-ميفيدك يمتص الحديد وانت كل فيتاميناتك
ضاربة اجيبلك بودنگ
-هذا شنو
-مثل الكاسترد بس اخف
-كاسترد مثقفين
-ايييي
-شگد يلا اگدر اكله
-فد ساعة
طلعت اكمل شغلي ودزيتله على كاسترد
رجعتله من كملت الساعة يحچي بالتلفون
ويضحك ووجهه مرتاح
-گلت خوويي مات شعندي عايش
ااااخ ياثااااائر ماامصدگ مصعب لهسة مامصدگ
رجع الطرف الثاني رد وهو جاوب بسوالفة الحقيرة
-گالي نوووح راسك فوگ ماچان مربع الضربة
سوته سداسي الشكل
ضحك براحة وودعه
-رووووح اريد اكل
لا تجي مابيه شي ارتاح انت
اكتست وجهه غيمة حزن وكمل
-الله يرحمه خليت نوح يشوفهم
يگول روان تسأل عني وتبچي
عبالها بية شي
غلق الاتصال وباوعلي
-يمتى تشيلون هاي المحاليل
-مو بهالسهولة
غيم وجهه وتغيرت ملامحة واني اشرحله ببساطة
-فصل المحاليل ميجي بهالسهولة
يعني مو مجرد مااكلت كم لگمة نشيل
الانبوب المركزي
-ان شاء الله مطولين
گالهة بأمتعاض
-العملية تدريجية تمام
تعتمد على كفاءة الامعاء يعني من البارحة
قللنا التغذية الوريدية چانت ٢٤ ساعة صارت ١٢
حتى نخليك تحس بالنهار بالجوع
-خلف الله عليكم هم جوع وهم عطش ضربوني
طلقة وفضوها
-لمصلحتك كل شي شوف يمتى نشيل
التغذية الوريدية من جسمك يمتص عالاقل
ستين بالمية من احتياجاته عبر امتصاص الامعاء
-وشلووون جسمي يأمن هالحاجات واكلي
كله سائل شنوووو عبر البلوتوث
-شويه شويه وحسب كفاءة الامعاء
نبدي نزيد الاكل صلابة لازم يطلع الغذاء
المهضوم من الستوما ثگيل شويه
غمض عيونه قرفان ضحكت اني وكملت
-مسألة متتجاوز الشهر وانت خلصت نصه
ومن هاليوم صرت أحسبله كل خاشوگة شوربه
وكل رشفة عصير الطبيب چان ينتظر أن يمتص جسمة الغذاء فعلياً
مو مجرد أن يمر الطعام ويطلع فوراً من الستوما
بدينة التقليل من التغذية الوريدية تدريجياً
بالتزامن ويه زيادة الأكل الصلب گام يتحرك
وحده بشكل افضل
مراقبين دمة طبيعي وزنه طبيعي ماكو نقص املاح
شطلب جده وابو وعماته والكل ينفذ الاكل العصائر موفريها بشكل كامل بس بعده الاكل سائل يطلع
للستوما لذلك مفصلنا المحاليل خوفا علي من
الجفاف چنه داخلين على شهر بيومها
اجيت كملت شغلي كالعادة ودخلتله
متعرق وتعبان
-شبيك
ركضت للفحص علاماته الحيوية طبيعية
سكر ضغط كل العلامات مستقرة
-الم ببطني
فحصت صوت الامعاء قوي استبشرت
فحصت الستوما واخيييييرا علامة النصر لا اراديا
سويتها بيدي وضحكت
-ها فرحانة الحية
عصرت ايدي وكلمته السخيفة غثتني
-مباقي شي ونشيل الانبوب امعائك اشتغلت
والاكل المهضوم شبه صلب بالستوما
-ويعني
-يعني راح نفصلك من التغذية الوريدية وتگدر
تطلع للبيت
نزل راسه براحة فقبل فترة اسبوع اصابة المثانة
تحسنت حسب كلام الاطباء ورفعو الكيس وصار
يدخل الحمام لوحدة
وراها بخمس أيام اجه الدكتور وبلغنا
نرفع الانبوب الوريدي
طلع الدكتور بعد ماكتبله الخروج بعد يوم واحد
چان گاعد اشرتله يتمدد
عيونه بيها لمعة راحة سحبت اللاصق بهدوء
وانتزعت آخر أنبوب يربطه بالأكياس البلاستيكية
چان الوريد تحت الترقوة
سحبت المخدة من جوة راسة خليتة تسطح
تماماً سحبتة وبيدي شاش معقم
بس سحبتة ضغطت المكان بقوة
لمدة ١٠ دقايق كاملة الى أن تأكدت
المكان انسد ذاتيا لصقتة لصقة
طبية وامتدت ايدة تتلمس المكان ابتسم براحة
وهمس
-الحمد لله الحمد لله
-أن شاء الله حسب كلام الدكتور
بس تخلص هالشهر ونص عالستوما
ونرفعها ويعاد توصيل الامعاء
-ان شاء الله
رتبت اوراقه وكل شي يخصه
وقعت وختمت الاوراق اللي چانت
ضمن الراوند مالتي ووگفت گباله
گعد براحة وگتله
-وهيچ اكون خلصت شغلي هنا
الحمد لله على سلامتك
درت وجهي طالعة صاح
-ظلاااااام
التفتت رفعتله حاجبي ورديتله بمثل
اسلوبه
-نعم جاثووووم
ابتسم بخبث واشرلي
-بس بعده شغلنا ماخلص
