رواية عشكت جنوبية الفصل السادس عشر بقلم نسرين الاسدي
طبعآ انه ضغطت وقتي بس حتى انزللكم بارت اليوم لأن وعدتكم وتفاعلكم حلو فرحني
وكل ما صار التفاعل أكثر راح اتحمس أنزل أسرع
متابعة ممتعة 😘
*
*
*
*
هنادي : فتحت حياة الباب ودخل فهد وكال : شنو نايمين صارلي ساعة ادك بالباب وين جنتم ؟!
ضحكت وكالت : اهدى خوية شدعوة عليك جنة بالمطبخ جاي نسوي دولمة حلوة لهنودة
هو فتح عيونه ممصدك وكال : شنووو ..هنادي؟!
انتي شجاي تكولين حياة ..وبعدين من شوكت هنادي تحب الدولمة الحلوة ؟!..شلج بهالجذبة ترا انه مالي خلك شقة لأن تعبان
كمت انه ورحتله وكفت كباله وكلت : لا فهودي هي مجاي تشاقة ..الله يساعدك خوية
هو ضحك واجه عليه بسرعة حضني ويكول : هنودة حبيبتي ما اصدك انتي رجعتي شكد اشتاقيتلج
كتله : وانه أكثر حبيبي
بعدها كعدنه وضلوا يتشاقون ..كالت ليلى : هنادي ما دريتي؟!
باوعتلها مستغربة وكلت : شنو هو ؟!
ضحكت وكالت : جا غير اخوج فهودي عايش قصة حب من ورانه
ضحكت وكلت : عود صدوك
هو ضربها على رأسها وكال : أنجبي ولج..لا تصدكينها هنودة ترى هي جذابة
حياة : شنو جذابة ..مو احنة شفناها بعيونة ذاك اليوم تمرض بيها هو وما راح للمدرسة اجت دكت الباب وكالت : هذا بيت فهد الحارس؟!
احنة تعجبنة منها
وتالي طلعت وحدة من الطالبات متعودة عليه ولأن ما شافته اجت تتأكد منه
ضحكت انه قوي
وهو ضل يضربهن ويكول : اسكتن جذابات شكو بيها اذا سألت عني وحدة ..سكتن
بعدها اجوا بابا وهيثم وضلينه نسولف لوقت طويل لحد ما حسيت بتعب ورحت حتى اتمدد شوية اجن حياة وليلى وراي
ويه ما فرشت فراشي مو دنكت ونزلت المدالية كدام عيوني
كعدت ولزمتها بيدي باوعت الها ..هاي شلون نسيتها وما خليتها هناك ..
هنة اجن كعدن يمي وشافنها بيدي
حياة : هنودة هاي ذهب ؟!
ليلى : ولج شوفي شنو مكتوب بيها
كلت انه : شنو ؟!
ضحكن وكالن : هذني أول حرفين من اسمج انتي وياه
شكد رومانسي رجلج
ابتسمت وكلت : بنات تعالن فتحنها انه لازم اضمها وبس اشوفلي فرصة ارجعها اله ..لأن ماريد منه شيء
حياة : ولج خايبة هاي انتي شبيج ..عوفيها عندج هو غني وعنده هواي فلوس ما يحتاجها
ليلى : اي والله حجيها صدك ..بله خل افتحها الج
نزلت راسي واجت هي حتى تفتحها شوية وضحكت
كلت مستغربة : شبيج تضحكين ؟!
انطتني المدالية وكالت : هنودة شنو هاي بركبتج؟
رفعت حاجبي وكلت : شنووو؟
اجت حياة وكالت : بله خن اشوف ...ميلت شعري وضحكت
صحت عليهن : هاي شبيجن ؟!..فهمني ...اكو واحد يضحك بلا سبب ؟
كالن : ومنو كلج احنة جاي نضحك بلا سبب
راحت حياة جابتلي امراية واجت خلتها كدامي وكالت :شوفي بعيونج
خذيتها منها وباوعت صفح ..ولكيت علامات على ركبتي ..حسيت بوجهي صار احمر واستحيت كلش هاي من يمته وشلون ما انتبهتلها...بلا شافوها امي لو ابوي لو واحد من خواني..نعله عليك ليث ..حرجتني
صحت عليهن : يلا كافيجن ضحك ..كومن طلعن اريد انام...انتن صدوك ما تستحن...مو عيب عليجن ..يلا روحن لا اكل لأمي عليجن
هنة ضحكن وكالن : لا ..عفية الا امي ...رايحات
**
ليث : بسبب هيثم الكو... اني ضليت بالسجن ١٥ يوم على ما وصلوا للشخص الي ورطني بهاي الشغلة واستغلني خلاني اصير شريك اله بدون ما اعرف جان يرويني شيء ويخليني اوقع على غيره
واعترف جنت واحد غبي وما دققت لمن وكعت بيها صح النذل سجني بس لازم اشكره لو ما هو جان بعدني ما اعرف حقيقة شغل الكو... الثاني
ونص الشهر الثاني اني احاول اخلص قضية السجن والشغل وسمعة الشركة وهسة صارلي شهر اني مشايفها
ولا اعرف اخبارها بس دزيت مروان يتشمملي اخبارهم
ولبنى من عرف ابوي بالموضوع لحد الأن وهو معاقبها لا تطلع وحدها ولا تمشي ويه وحدة غير قرايبنه حتى صديقاتها منعها منهن
وماما بس طلعت من السجن حجت النا كولشي وعرفنه كل كلام لبنى جان كذب
واني مقصرت وياها أول مرة امد ايدي عليها بس تستاهل وبابا معترض لأن كل الصار بسببها هي
وهنادي جايج الدور ..لج اني هيج تسوين بيه ؟!
وتطلعين من البيت واني مانعج؟
بسيطة يا هنودة الا مااندمج ميطلع اسمي ليث
بس خن الزمج وكولشي سهل
**
هنادي : مر شهر من رجعت لأهلي ورحت حللت طلعت حامل بالشهر الثاني وهسة دخلت بالثالث جنت اتوقع ابوي وامي راح يكولون انذب الطفل حتى يسهل علينا الطلاك
بس همة كالوا لازم يضل حرام انموته وهو ماله ذنب وهيثم احتار بين الأثنين بين راضي وبين لا بس فهد الوحيد الي كللهم خن نذبه وهمة ما قبلوا
انه جنت احس روحي مرتاحة وليث من شفته اتأخر أمنت شوية وكلت يمكن هو راح يطلك بدون مشاكل
بس مرات من اشوف المدالية اذكره واحس بشيء بداخلي ما اعرف شنو هو بالضبط ..معقولة انه جاي اشتاقله؟!
لا اكيد لا ..
جنت كاعدة بالحديقة اشم شوية هوا وسمعت صوت امي
كمت وردت ادخل للبيت باوعت لبطني كبرانة شوية ابتسمت ..هذا أحساس الأمومة طلع كلش حلو انه من هسة حاسة روحي احبه واكيد من ينولد راح احبه أكثر
ويه ما ردت ادخل حسيت بواحد واكف وراي
ألتفتت بسرعة وشفت الشارع فارغ
كلت يمكن جاي اتخيل ..اتجاهلت السالفة ودخلت
**
ليث : كعدت ادخن واشرب اني تركت الشرب من زمان بس هي خلتني ارجعله
حاس راسي يريد ينفجر مجاي ارتاح لازم اخلي هنادي وهيثم يندمون ..لازم اخليها تتمنى لو مراجعة لهلها ولا شايفتهم
شوية ودك الموبايل..شفته مروان
ليث : اي كلي
مروان : ليوثي..انته شوكت تجي اني حفضتلك كولشي طلعاتهم ورداتهم وحتى شوكت ينامون وشوكت يكعدون
وتنصت على كلامهم امس سمعت حيطلعون للمحكمة ويرفعون قضية طلاك
كمت عالسريع وشمرت الكلاص كل قوتي صار طشار وعطت: شنووو ..لك هذول صدوك زودوها
ابقى بمكانك مروان اني هسة طالع وجايلك بعد مراح انتضر أكثر وانعل ابو كولشي هنا
لك اني تريد تطلك مني ..بسيطة ..الا أئدبج يا هنادي وين ترحين عني ..جايج
**
هنادي : خلصنا الغدة والبنات خذن المواعين حتى يغسلنهن ردت اكوم وياهن بس ما قبلن
كالت امي : عوفيهن حبيبتي على الأقل يسولهن شيء بالعطلة
كل ايام المدرسة حتى ورقة ميشيلن من الكاع وكلت متعباتني
ضحك فهد وكال : مدام هيج وانتي تعبانة من شغل البيت زوجي هيثم وخل مرته تساعدج
هيثم جنه الحجي معجبة ابتسم وكال : ازوج انته انه بعدني هسة ..بس انته الي مستعجل عالزواج كله من ورا الطالبات الي تشوفهن يوميه
ضحك بابا وكال : هيثم ليش هيج تحجي عنه ترا هو خوش وليد وعيونه ما يشيلهن من الكاع
باوعله فهد وكال : هيج بابا توكف وياه ضدي وانه حسبالي راح ادافعلي ؟
كالت امي : شلون يدافعلك واحنة كل سوالفك عدنه يا فهودي
ضلينا كلنا نضحك عليه واجن البنات وشاركنه ..
احسهم متغيرين شوية ..بس فديتهم الضحكة وياهم الها طعم ثاني
ليلى : اكول شنو راح نسمي الطفل من يجي ؟!
حياة : ما نريدة مثل اسامينه مو حلوات
ماما : وشبيهن اساميجن؟!.. هيثم ابوج اختاره وفهد انه
ليلى : واحنة منو سمانه ؟!
بابا : هنادي اثنيناتنا اتفقنه عليه لأن على اسم خالتكم الصغيرة الله يرحمها وانه وامكم جنه كلش نحبها
هيثم : شلون ماتت بابا ؟!
شفت ابوي مثل تلعثم بالحجي وكال : سالفة طويلة ابني عوفها هسة ورجعوا على الأسماء
كالت حياة : زين واحنا بابا ؟!
كال : انتي امج وليلى انه
باوعنه واحد الثاني شكد تمنينا بابا يكمل وذكرنا خوالنه ..بس مبين ضاج هو وماما لهلسبب سكتنه ورجعنه لموضوع الأسماء
ليلى : انه اختارلج اذا ولد زين واذا بنوته لمار
ضربتها حياة وكالت : ويع مو حلوات اذا بنوتة قبس واذا ولد كيان
صاح هيثم : بلا ما تسكتن انتن شنو تعرفن من الأسماء حتى تختارن ؟!
كال فهد : انه أقترح نسميه البنوتة زهراء حتى تطلع تشبه زهورة شكد حلوة تموت
ضربه بابا على رأسه بسرعة وكال : لك شنو هاي انته صاير قليل أدب..تباوع لبنات العالم ما تستحي ؟!
فهد وهو يفرك برأسه: هاي ليش بابا انه شسويت غير حجيت الصدك...وبعدين هي البنية كلشي ما طالع منها محجبة ومستورة بس ملامح وجه مبينة حلوة
هيثم : مو كتلك هالشغلة راح تخربله اخلاقه يا بابا بس انته ما صدكتني ..شوف هسة بعينك
ويه مجاي نحجي وجان تندك الباب ..الكل استغربوا ما
متوقعين جية أحد ولا مواعدين
كام فهد وكال : انه افتحه
فتحه وطلع ليث بوجه جكارته بحلكه وشكله غريب عيونه حمر وقميصه ما مرتب وما لابس سترته ومخلي ايديه بجيوبه
احنه كمنه كل احنة مصدومين بشوفته وركضن حياة وليلى للغرفة وضلن يباوعن من بعيد
باوع هو الي طلع الجكارة وابتسم وكال : شلونج يا هنودتي مشتاقيتيلي..متعرفين شكد اني مشتاقلج
نضرة عيونه خوفتني رجعت ليورا
وهو ابتسم أكثر ونفث الدخان دفع الباب ودخل
ليث :
لمن كلي مروان ان اهمه يردون يروحون للمحكمة علمود الطلاق أنجنيت دخلت للحمام بسرعة حتى اصحصح لبست ملابسي شلون مكان
اخذت سيارتي ورحت للبصرة ، رغم اشتياقي الها بس بدي الزمها واعاقبها على طلعتها بسيطة يا هنادي..
وصلت للبصرة ولبيتهم وفتحو الباب والتقت عيوني بعيونها نسيت كولشي غضبي تلاشه ، تمنيت هسه اروح واحضنها لصدري ، كولش متغيره بس اتذكرت مثل أول مره شفتها بيها اوف يا هنادي ممصدك انج خليتيني هيج احبج ، جنت صافن بيها وفزيت على صوت اخوانها
هيثم : انته كلمك شجابك هنا
فهد : لك انت صدك واحد متستحي
كلتلهم: اني ماعندي كلام وياكم كلامي وي ابوكم
كال ابوهم : هيثم فهد سكتو ، تعال عمو تفضل
كلت :السلام عليكم ودخلت .. ألتفتله وهي تباوعلي بأنضاره خايفة
كتلها : شلونج حبيبتي هنادي مشتاقيتيلي ؟ شهر هواي
دنكت هيه ومحجت شئ
ألتفتلي ابوها وكال : تفضل عمو كول شرايد
كلتله بدون مقدمات : زوجتي اجيت ارجعها الي ابنك اخذها بدون مياخذ اذني! برائيك هذا التصرف صحيح ؟
كال هيثم : لأنك واحد متستاهلها واختي ما تريد تعيش وياك وانته لازم طلكها
ألتفت لابوها : يعجبك هلكلام عمو ؟
فهد : اعتقد ماحاجة تسئل هلكلام لأن كلنه متفقين على هلشئ
ألتفتلي ابو وكال :هلشي راجع الها اذا رادت تطلك ف مانجبرها ترجعلك واذا تريد ترجعلك ماراح نمنعها
اندار الها وكال :ها بابا هنادي انتي شدكولين
هنادي :بابا اني ..اني ، اجت عينها بعيوني وسكتت ماكملت كلامها
كال ابوها: احجي بابا تردين ترجعين وي رجلج لو لا ، صحيح انه ما حبيت الطريقه التزوجتم بيها بس هيه خلال هذا الشهر الي بقت بي هنا وحجتلي عن اهلك وعن تعاملهم وياها اني قررت انطيك فرصة أخيرة لخاطرهم اهمه ، بس اكيد القرار الاخير يبقئ الها وانه واخوانها رئينه من بعد رئيها هيه
شفت هيثم وفهد ماعجبهم كلام ابوهم بس لأن يحترمونه ماحاجو شئ وضلوا ساكتين...
ألتفت لهنادي وكلت : يلا حبيبتي كوليله لابوج شكد احنه متفاهمين.. ضلت ساكته محجت : يلا حبيبتي ليش ساكته سمعيني صوتج مشتاقله
ضليت اشوف كلما احجي كلمة يزيد غضبهم أكثر
كلت :شفت عمو مبين هنادي تريد ترجع مو السكوت علامة الرضى
رفعت هيه رأسها وكالت : لا اني ماريد ارجعلك
شفت اخوانها ابتسموا بشماته وابوها ضل صافن منتضر تكمل كلامها
كلت : لويش هنودة ..نسيتي اني شنو سويتلج وشلون حبيتج واهتميت بيج نسيتي هذني كلهن ؟!
وذكرتي لهلج بس زينات اهلي؟
هيثم : اعتقد هي هسة كالت رأيها بابا وما تريد ترجعله خلصنه
فهد : اي الأحسن الك تروح واذا عندك كرامة لا ترجع بعد
باوعت الها وكلت : لا اليحب ميفكر بالكرامة واني هنا حتى ارجع حبيبتي هنودة ومحطلع بدونها
صاحت هي : انته جذاب وما تحبني واجيت بس حتى تعاقبني لأن طلعت من البيت واكيد تريد تضربني نفس ذيج المرة وساعتها راح يتأذى الطفل....
وسكتت عالسريع نزلت راسها وخلت ايدها على حلكها
ابتسمت وكلت : هنادي انتي حامل ؟!
كالت وهي متوترة : لا اني مو حامل ..قصدي انته ما تستاهل ... اضل...
مخليتها تكمل كلامها وكمت بسرعة اجيت عليها وهي كامت عالسريع ورادت تركض
لزمت ايدها وكلت : لج وين رايحة هنودة ..هذا احلى خبر ..حامل ؟!
من شوكت ولويش مكتيلي
ضلت ساكتة واشوف الخوف بعيونها
لزمت وجها بأيدي وكلت : لتخافين مني حبيبتي هنودة اني مستحيل آئذيج انتي وابنه
بستها بكصتها وكلت : رجعيلي حبيبتي وحنعوض كولشي ونعيش بسعادة ويه ابنه أو بتنه وأعتذر عن كولشي صار قبل ..اني احبج هنودة واسف مكلتها قبل بس اتأكدي اني من زوجتج لأن حسيت بشيء الج مو قصة الفلوس
ألتفتت على اهلهم الي يباوعولي ومستغربين..ابتسمت وكلت : هيثم اني مسامحك على الي سويته ولازم اشكرك لأن كشفتلي شريكي واني جنت غبي ومعرفته والفلوس اني جبتهن الكم ولا تفكر بفلوس وائل هنة رجعله
يعني هاي العشرين هدية الكم والك لأن نقذتني
هنادي : جنت خايفة منه كولش ومتأكدة جيته راح اتعبني لأن راح يضربني ويعاقبني ويمكن حتى اهلي يدخلهم بالسالفة
بس الشيء الي ما تخيلته فرحته من غلطت وكلت حامل حسيت بيه صار واحد ثاني وفرحته ما تنوصف وحتى حجيه ما توقعت راح اسمعها منه أبد ويكول احبج
هذا مو ليث الي اعرفه هذا واحد ثاني
جنت صافنة عليه واريد أستوعب الي اسمعه مني جان مبتسم وعيونه تلمع حسيت نفسي بهاللحضة مخدرة ولساني مشلول معرفت شرد عليه
وانتبهت على صوت هيثم وهو يكول : لا يا استاذ ليث مشكور احنة ما نريد منك شيء غير تعوفنه بحالنه وتطلع من حياتنه واطلك أختي ونرتاح منك ومن مشاكلك
ابتسم وكال : اني هسة صرت ابو المشاكل يا هيثم ؟!
ومنو الي دخل حياة أختي وعفسها وطلع
اهلي انصدموا لأن هيثم ما حجه الهم عن لبنى اي شيء
فهد : انته شجاي تكول واخوي شعليه بختك ؟!..احجي ولك
لزم ايدي وكال : اني ما اجيت حتى اعاتب لو احاسب اخوك اني هنا عالمود زوجتي وبس واريد اخذها واروح لهلسبب خلونا نطلع بدون مشاكل
لأن اني اكدر ارفع قضيه ضدكم واجيبها بس مثل ما ابوكم انطاني فرصة لخاطر اهلي اني هماتين انطيكم فرصة علمود ابوكم لأنه شخص خير وخوش رجال
صاح هيثم : هي ما تريدك انته ما تفهم ؟! هنادي احجي كليله...
قرب هو يم اذني وهمسلي: هنودة اذا ردتيها تمر على خير ومأذيج انتي وأخذ بثاري من اخوج امشي وياي لأن والله العظيم اذا مسويتيها حراويكم شيء عمركم كله مشايفينه
كلت بخوف : يعني انته راح تضربني..ما اروح وياك
لزمني من زندي حيل سحبني اله وكال : اذا صرتي حبابة ومعاندتي محضربج وعد ..لخاطر الي ابطنج بس اذا سويتي العكس اتعذريني وقتها
فهد : انته شجاي اتكللها بس لا تهددها واحنة موجودين ؟!
ضحك وكال :عفى عليك فهودي اني اهدد حبيبتي وام ابني هنودة ..بس اني جنت اكللها شكد مشتاقلها
بابا : بابا هنادي عوفي اخوانج وكليلي انتي شنو الي تردينه ترجعين لو لا محد يجبرج على شيء
باوعت عليه مبتسم صفح ومركز عيونه بعيوني
كلت : بابا ..اني راح ارجع ويه رجلي ...
همة كلهم اتفاجئؤ
وصاحوا فهد وهيثم : هنادي شبيج نسيتي حجيج قبل لا يجي شلون هسة تردين ترجعيله..هو شنو كلج؟!
هددج مو ؟!...احجي هنادي
بعد هو عني وكال : شوفوا بأنفسكم اني بعدت عنها يلا سألوها
كلت : لا هو ماهددني بشيء ..ولا كال شيء بس اني اريد ارجع ..لأن ..لأن هو ابو ابني ..واني احبه ..جنت غلطانة ..
ابتسم وكال : واني اموت عليج هنودتي ..يلا تعاي..ولتجيبن ملابسج..لأن احنة حنبقى هنا الليلة وباجر الصبح نجي لهلج نتريك يمهم ونسولف شوية ونتوكل
اهلي كلهم ضلوا يباوعولي جنهم مامصدكين
ابتسمت الهم وكلت : لا تخافون ..اني بس استعجلت واجيت وبعدين ليث ما مقصر وياي بشيء ..ان شاء الله الصبح اجيكم
ودعتهم وبوست امي وابوي وخواني الي جانت عيونهم تجدح نار
وصدك طلعت وياه بدون ما أخذ شيء غير العباية الي لبستها وما ادري شعجب ما كلي نزعيها
ركبت السيارة سد الباب واجه صعد يمي وكلبي يرجف من الخوف حتى لو جان ناويلي على شيء ويأذيني المهم اهلي وهيثم ما يصيرلهم شيء
سد الباب حيل واني كمزت
ضحك وكال : لتكمزين من هسة هنودة ..خن نوصل واشوفج شنو معناة كسر كلمتي ..وشلون اطلعين من البيت بدون آذني....بسيطة
بلعت ريكي بخوف وعصرت ايديه حيل وهو ساق السيارة بكل سرعتها
