رواية سداد وبنت الفصل الثامن عشر بقلم الزهيريه
اذا اقبلت الدنيا على أحد
اعارته محاسن غيره
واذا ادبرت عنه
سلبته محاسن نفسه
ألق/ صعبه من تمشي برجلك للمجهول والمصيبة ما تعرف شنو راح يصير بيك يعني تگعد تخمن واني چنت اخمن شنو ممكن عمي نزار يسوي بيه يعني اني كل الاحتمالات والافتراضات مخليتها بدماغي ألا المفاجات إلي صايره بغيابي ما چنت متوقعتها أبد ومن صعدني اوزجان لسياره ويه سداد مشينه مسافة هوايه واني منتبها على سداد أبد ما حچى شي بس مشغل أغاني كرديه وساكت وحتى من نوگف بسيطره يطلع هويته ويخلونه نمر وتحسه اكو شي بداخله لان أكثر من مره نزل من السياره وياخذ بطل مي من السياره ويغسل وجهه وبعدين يفرغ بطل على راسه ويصعد يكمل طريقه
وأني طول الطريق ويا ابد ما سألني جوعانه عطشانه ابد ما گال أكو إنسانه ويايه وكأنه ما موجوده او غير حاس بوجودي بعدها وصلنه على مشارف بغداد والسياره إلي ويانه صاروا بمحاذاة السياره مالتنه وهو نزل جامة السياره وحچى وياهم بالكردي وسد الجامه واحنه بقينه مستمرين نمشي والسياره الثانيه راحت بغير طريق وبعدها حچى إني أول شي ما سمعت شنو گال بس اني گتله شنو شتريد ويمكن الله لا يكذبني عدتها عليه 5 مرات بعدها صاح بيه بصوت قوي اسكتي اني بصراحة خفت وخنست ومن ركزت على كلامه عدل سمعته
سداد/ سيدي البنيه جبتها ويايه من أربيل واريد أسلمها آلك انت لأن أريد اروح لبيتي قابل اخذها لبيتي واني لما اوزجان اني شنو دخلي والله ما إلي شغل بيها
ألق/ فهمت دى يحچي ويا واحد عليه وختم كلامه يا المتصل بي انه بعد حدود ساعتين يكون بالمركز وبس غلق الموبايل رجع عليه
سداد/ اني شگد شايف ناس ما شايفه وما عدها ادب بس مثلچ ما شفت أدري إني أتصلت بشخص ودى احچي ويا شدخلچ إنتي بالموضوع
ألق/ آسفه سيدي اني عبالي دى تحچي ويايه وما سمعتك وسالتك
سداد/ اني من احچي وياچ اگول قنادر راح تعرفين دى احچي وياچ
ألق/ اني من شفت سداد الى هاي اللحظة هو كله تحسه گاعد على بركان على ساعه ينفجر او يريد شخص ينفجر بي وبعد وقت مو هواي وصلنه على مركز مال شرطة ونزلنه بس شنو احس رجليه نشلن من گد ما جمدت من الخوف وهو يمشي وكل شويه يلتفت عليه ويگول يله شنو طالعه مشايه وبعد 3 ايام يله توصلين
اني ما جاوبته بس ميته بخوفي من شفت رجال الشرطة وصلني يم مكتب واكو واحد واگف بالباب
سداد/ سلام وصل عقيد فرقد
سلام/ أي كاكا سداد وطلب بس توصل تدخل يمه
ألق/ وفتح الشرطي الباب ودخلنه مكتب وأكو واحد گاعد شفته چان بشرته بيضه وشواربه كثيفه سوده وشعره اسود گثيف يلمع مرجعه ليوره
سداد/ سيدي هاي البنيه وأصور متصل عليك اوزجان ومفهمك وضعها
فرقد/ والله كاكا سداد اني انت گوه متحملك أنوب أتحمل كاكا اوزجان وياك يصير عندي رجه بالدماغ اني چنت نايم من اتصل بيه اوزجان حتى ما دى أجمع شنو گال
ألق/ واكو فايل بيد سداد وانطى لفرقد وذاك ظل يقره شنو مكتوب وبعدها رفع راسه وباوع عليه
فرقد/ اشرقت وأنورت ظهرت ألق بابا شسوين بملاهي أربيل شنو دى ترفعين من أقتصاد كردستان لو راح تترشحين بأنتخابات كردستان ضد كاكا مسعود بارزاني تدري سداد هاي البنيه منو هاي عمها إلي اجه أشتكى وياك بنفس الليله على اساس مخطوفه هاي وينها وبوقتها تهمنا هو وزوجته بقتلها واخذنا ونسجن وطلع خطيه عنده عاهه برجولته وانتي رايحه يم كاكا مسعود
سداد/ وهسه شنو الاجراء التاخذوا بحقها وخصوصًا المتضرر هو عمها
فرقد/ والله سداد ما أعرف لكن البنيه انهزمت من بيت عمها بعد ما باگت فلوس ورث عمها وهاي صار 3 اشهر هي مختفيه وأكثر الضرر وقع على عمها وهي بعدها قاصر لازم نسلمها بيد عمها لان هو الوصي عليها وحتى ما نگدر ناخذ تعهد عليه إنه ما يمسها بضرر لأن احنه هنا اكثرها يغلب عليها الطابع العشائري وعدهم عيبه مال بنيه مهزومه صار 3 أشهر ما يعرفون وين چانت او ويه منو وبعدها نسلمها إلهم ونگلهم جبناها من ملاهي أربيل أنت شخصيًا تقبلها على عرضك
سداد/ لا والله ما أقبلها غير اتفنن بقتلها
فرقد/ شوف غيرك ما راح يقبلها وصدگ حتى اذا قتلها ترى ما ياخذ حكم غير سنه وحده لإن قضيته تعتبر قضية غسل عار وخصوصًا هي ثابته بأوراق من جهة حكومية إنه هي چانت بملاهي ليليه وهسه لو ينزل وياها وحي ماكو واحد يصدگ انه هي شريفه
سداد/ بس هي بعدها طفله مو چبيره سيدي
فرقد/ والله احنه صرنه نخاف من الصغار أكثر من الكبار يعني توها داخله ب 15 سنه ولعبت لعب من صير عمرها ب 20 سنه شسوي تستلم منصب رئيس الوزراء كفيلك الله أني چنت بعمرها امي تگلي اذا تطلع وتباوع على بنيه لو توگف يم المدرسه مال البنات من ينتهي دوامهن تجي العصفوره تگلي واموتك كتل وچنت مصدگ وما أرفع راسي خاف من العصفوره لا تفتن عليه يم أمي حمدلله عشنه وشفنه
سداد/ والله بعد ما أعرف سيدي تتحمل نتيجة السوته شنو نگدر نسوي إلها اني من رخصتك اريد أروح للبيت والله ميت تعب
ألق/ وبعدها طلع سداد وبقيت اني يم فرقد وهو يتأفف وبعدها دگ جرس يمه ودخل هذا الچان واگف بالباب
فرقد/ أبني سلام اريد منك تگول لنقيب مهند يجيني ويجيب ويا ملف قضية ألق رياض
ألق/ طلع سلام واني مرعوبه شنو راح يسوون بيه وبعدها دخل ولد ثاني وهم بيده فايل وبدوا يقرون بالفايلات الگدامهم وهذا مهند ما أعرف شنو يكتب
فرقد/ يمك مكتوب رقم موبايل عمها نزار أتصل عليه خلي يجي يستلم بنت اخوه وحتى نغلق ملف القضيه نهائيًا
ألق/ وأني أريد كلمه تطلع مني ماكو احس خرسيت ومهند أتصل على عمي نزار وما حچى ويا شي بس بلغه إنه يحضر حالًا لمركز الشرطة وغلق ويا الخط وبقيت على أعصابي وذوله فرقد ومهند يسولفون بمواضيع بعيده عن قضيتي وهذا چان يزيد توتري أكثر
وبعد أنتظار بتوتر دخل سلام يبلغ فرقد وصول عمي نزار وفرقد انطى امر لسلام حتى يدخل عمي نزار
ومن نفتح الباب ودخل عمي نزار بس وأول ما دخل صارت عينه عليه وگبل هجم عليه وخله أيده على رگبتي ويخنگ بيه وما بقى فشار ما فشره عليه بحيث فرقد ومهند وسلام بس يريدون يفكون أيده عن رگبتي ما يگدرون آخر شي فرقد طلع مسدسه وضرب بچعب المسدس على راسه يله عافني وهو ترك رگبتي صرت أستنشق الهوه من حلگي وخشمي گد ما اختنگت مو عبالك ثواني ظليت بدون هوه عبالك صار ساعات
اما عمي خله أيده على راسه وايده بيها دم من ضربة فرقد آله واجى سلام جايب قطن ومعقم ويعقم بالجرح
وعمي متخبل ويصيح / بس أريد اعرف وين چانت ويه منو والله ما تخلصين من أيدي اليوم إنتي جوه التراب
فرقد/ أول شي نزار هيچ شي ماكو بنيه غلطت المفروض تحتويها مو تتهدد عليها وتريد تموتها وانتي ألق جاوبي عمچ
ألق/ اني منا ميته خوف منا عرفت انه ماكو احد يحميني من عمي نزار لهذا أسلم حل إلي اذبها براس شخص حتى عمي نزار يبتلش ويا وطبعًا ما معقوله اگول هيثم لآن أثنينهم من نفس العصابه يعني بسهوله عمي يموتني ويدفني وماكو أحد يدري بيه واكيد هيثم طلع من المنطقه ما لگيت غير شخص هو يشيل السالفه كلها
جاوبت عمي / أنت من چنت تريد تزوجني لابو اسكندر اخذت الفلوس وانهزمت ويه سداد
سداد/ يعني كل انسان عنده حظ سيء بجانب واحد بحياته واني حظي السيء بالنسوان بعد ما رحت لأربيل وروحت الگشره عليه بعد ما خلصت مهمتنه بالفشل على القاء القبض على غزوان من دى أرجع لبغداد اوزجان كلفني انه اوصل بنيه احنه القينه القبض عليها بالنادي الليلي وهو انقهر عليها لكونها صغيره واني والله بحسن نية اخذتها ويايه وأخذت الأوراق تسلمها من مقر قوات البيشمركة حتى أسلمها لحكومة بغداد ماكو بس سلمتها وره ساعه ونص اتصل بيه فرقد وگلي انت متهم بتغرير بالبنيه ألق وتحريضها على سرقة فلوس عمها والهروب معك وبدت مرحلة مشاكل إلها آول وما إلها أخر
فرقد/ بعد ما گدرت أسحب الكلام من روجيدا تكونت عندي خيوط كلها بيدي بقى خيط واحد مهم وهو يعتبر أهم خيط عندي حتى تكتمل الحلقة كلها وچنت مخلي خطه أنتزع منها الحچي واخليها تعترف على نفسها وأتصلت على سداد وبلغته انه تقريباً كل شي عرفت وأريد منه يجي ويجيب ويا آريا وبدون ما يگول إلها شنو نوع الموضوع وهو ما أتأخر إجى وهي ويا ومن حچيت كل الذكرته روجيدا
فرقد/ هسه انكشفت ملابسات الحادثه وشريكچ بالحادثه اعترف عليچ إنه انتي المخطط الرئيسي لكل الصار وبهيچ حاله هو ما راح يكون عليه إي مسؤولية لان انتي دخلتي بيتچ يعني هو ما جبرچ على شي وهذا بالقانون يعتبر ارهاب أطفال أدى إلى قتل طفل بريء وخبلتوا بنيه بعدها طفله صغيره تدرين شنو عقوبته بالقانون
آريا/ كذاب هو چان صاحب الفكره حتى لا أحد يعرفه من يدخل البيت والله آني ندمت على كل الصار
فرقد/ هسه أريد أشوف كلامچ راح يطابق ويه كلامه شلون عرفتي ووين تعرفتي عليه وخلي في بالچ آنه الكلام الأقرب للعقل هو الذي يصدق اما تسفيط هذا تلعبون بي على نفسكم
سداد/ وبدت آريا تروي شلون تعرفت عليه وهو يبيع دجاج وشلون اتفقت ويا عليه وشلون تسحب فلوس واني احس نفسي عقلي مغيب معقوله هاي آريا خانتني وعلى فراشي وهدمت حياتنه وحياة اطفالها
فرقد/ هسه بس گليلي دمرتي عائلة كاملة على شنو بس فهميني زوجچ بعده بعز شبابه وحلو ومركزه زين ومدللچ ليش انتن النسوان من واحد يحترمچن ويحبچن تصورن هذا ضعف من الرجال وتلعبن طوبه ومن واحد يهينچن ويذلچن تحترمن نفسچن وتگومن تركضن وره الرجال مثل الچلب منو يسوه تضحين بولد مثل فلعة الگمر وغيرچ يتحسر على ريحة الطفل وعندي سؤال مهم من مات ابنچ أتواصل وياچ بعد
آريا/ لا ما تواصل ويايه ومن أتصلت بي لگيت رقمه كله مغلق وليومك هذا رقمه مغلق لان أريده يطلگني
فرقد/ شنو يطلگچ هو من الي تريدي يطلگچ سداد ليش ما طلبتي الطلاگ ورحتي زوجتي ابو الدجاج وخلفتوا فروخ وفروجات
آريا/ لا سيدي قصدي يسر يطلگني
فرقد/ شلون تزوجون وأنتي مزوجه هذا تعتبر جريمه زنا انه تجمعين بين رجلين
اريا/ سيدي هو گال المرأه إلها حق إنه تزوج متعه اذا زوجها مقصر وياها
سداد/ تحملت بعد فوگ طاقتي آول مره بحياتي إضرب آريا وگعتلها دگ بس فرقد صار بيني وبينها وذبيت عليها يمين الطلاگ وطلعت من المركز كله ومن صعدت سيارتي هنا بعد ما گدرت أسيطر على دموعي أكثر من هيچ بحيث أسوق ودموعي صب حتى احس غواش صار على عيوني وأكثر من مره كان راح يصير حادث لكن الله لطف بحالي ورحت على بيت خالتي اخذت بنتي يبرق وطلعت منهم ورجعت للبيت واني نقطة ضعفي هي أطفالي روحي من الدنيا همه
فرقد/ بعد ما طلع سداد وبقت يمي آريا ظلت تبچي وتگول أني ندمانه والشيطان لعب عليه
فرقد/ والله يا اخت آريا انتي على هاي سالفتچ أبليس يدگلچ تحية وياخذ يمچ رتبة لواء ركن
آريا/ سيدي آني هسه شنو عقوبتي والله كل الكلام إلي گلته صحيح وما مكذبه عليك
فرقد/ آولاً هو ما گال شي احنه ما نعرفه أصلاً هو منو إنتي هسه گلتي منو أما انتي حاليًا ما متهمه يمي بشي واي تهمه تتوجه الچ لازم تكون من طرف سداد وهسه تگدرين تروحين وفي حالة أشتكى عليچ سداد راح يتم استدعائچ مره ثانية
سداد/ رجعت للبيت والله احس راسي راح ينفجر وعيني على بنتي يبرق معقوله چان يصير ويه اطفالي هيچ من ام عديمة التربيه ونفسيتي كلش تعبت وطلعت ويه مديري لأربيل ومن رجعت جبت بنيه لبغداد وهاي الثانيه ذبت عليه تهمه بس الله اليعلم بيها يعني آني أدري واحد ما عنده حظ بالنسوان بس مو هل درجة وحده خانتني وحده تهمتني وبعد رجوعي لبغداد لگيت آريا رافعة عليه دعوة نفقة على يبرق وتريد تاخذها مني تخبلت شنو تاخذها مني
وأتصلت على
فرقد وطلبت منه اشوفه وهو گال اليوم خميس أشوفك الاحد ويه الدوام
سداد/ سيدي ما اگدر انتظر منا الى الاحد
فرقد/ خلاص أسال هسه وآني أجاوبك
سداد/ سيدي اليوم زوجتي رافعه عليه نفقة وحضانة الطفله شلون اگدر أشتكي عليها
فرقد/ شوف سداد خلي أكون صريح وياك واحنه اثنينه رجال قانون ترى آريا كل دعوه ما تگدر تقيم عليها السبب أولآ ماكو دليل ملموس على اتهامك إلها وخصوصًا بعد ما أثبت الطب الشرعي انه روجيدا هي قتلت أخوها
سداد/ يعني شنو ما اگدر اشتكي عليها اگدر أشتكي عليها بتهمة الخيانة الزوجية وتعدد الازواج
فرقد/ سداد عندك دليل يثبت انه هي خاينه أو مزوجه غيرك وياك بنفس الوقت لا ماكو اي شي يثبت هي مزوجه متعه يعني اي عقد ماكو أما الخيانه من تتهمها بالمحكمة هي خاينه لازم أكو دليل على هذا الشي
سداد/ هي اعترفت گدامك تگدر أنت تشهد على خيانتها
فرقد/ سداد هي حچت بلسانها وتگدر تنكر واني ترى لعلمك ما اگدر أشهد لآن تدري اني اذا عرفوا انه اني چنت احقق وياها في حين قضية القتل نحسمت راح اتعاقب شلون چنت احقق وياها وهي تهمه ماكو عليها وحتى الشهادة مالتي لو نفرض قبلت المحكمه لازم كلامها اثنين شهود يله تنقبل الدعوة سداد انت هسه عليك تهمتين
التهمه 1 / انه انت اخذت بنتك ومتقبل تنطيه لامها وطلگت زوجتك طلاگ تعسفي
التهمه 2/ انه انت تعاونت ويه بنيه وسرقتوا فلوس عمها وغررت بيها
