رواية لأني عاقر الفصل التاسع عشر بقلم مريم خفاجة
...
جانت أمنيتي اسمع مبروك انتي حامل
حلمي ينتفخ بطني وماكدر انام من الثقل
حلمي ما انام اليل واني اتخيل ملامح
وجنس طفلي
حلمي انو ابشر الدنيا كلها بحملي
انا الأم التي تتمنى الأمومة ويتلاشى
حلمها كل شهر
تمنيت لو الحياه أختبرت صبري بشي غير هذا
كلشي تلاشى و وصلنة لنهاية الطريق
وهذا حالي
إيمان:-؏ كيفج امشي يمة
لازمة خاصرتي وامشي ؏ كيفي
دخلت للغرفة وگعدت ؏ جرباية أمي
وهمست:-اريد ماي
ركضت وحدة من خواتي جابتلي ماي
شربتة واني مغمضة وصورتهم ببالي
حـ تلبس البدلة البيضة؟
ويركصون سوة ويتبادلون الحلقات
راح يبوسها
ويكللها الف مبروك
اليوم ليلتهم
واني الليلة موتي!
گلت سهلة
وهيَ أبد مو سهلة
اليرضة بفراگك
رضا بموت أهلة!
ضليت صافنة ؏ حيطان
وامي بصفي تهمس
سمعت صوت سامعتة من كبل بس ماتذكرة!
صوت منو
باوعت وعيوني مغوشة
صوت بنية لابسة عباية راس
وتهزني:-ولج ملاك اني حوراء
ملاك:-منو؟
حوراء:-اني حوارء ولج صديقتج هذا بيتي كبالكم
هزيت راسي ورجعت اباوع لگدام
باستني حيل:-شصاير بيج الله لا يوفقهم ولا ينطيهم
سكتت
رجعت گالت:-ملاك سولفيلي احجي لاتضلين ساكتة خالة اطلعي خليها بلكي تحجيلي
طلعت امي
وصفينة بس اني وحوراء
هزتني حيل وهمست بصوت مخنوك:-ملاك سولفي
ملاك:-من يا جرح ابديلج؟
حوراء:-الترتاحيلة احجي
ملاك:-حوراء وصلت مرحلة كرهت بيها نفسي
جاي اذل روحي كبال روحي من حبة
صرت مخبلة
مهووسة ، بدون عقل ، گلبي گلبي يدك بس ألة
اسمع صوتة گلبي ترجع دگاتة اسمع اسمة
الهوة يمر من خشمي
باوعتلها ودموعي ماتلامس خدي
تنزل للكاع:-شسولفلج؟
عن يا أذية؟
سكتت ودموعها تجري وياي
وضلت تسولف وياية وتحاول تهديني
حوراء:-شوكت عرسة؟
ملاك:-قصدج موتي؟ ب8 بليل؟
حوراء:-ملاك كسري گلبج بأيدج ولاتخلين واحد يكسرة
ملاك:-كرهت گلبي ولج كرررررهتتتتتتتته
يأذذذذذيييينننننيييي يأذذذذذيييينننننيييي ولللج ككككل دگةةة منه يفزززز جرررررح منيييي كررررهتتتتتة اااااخ ولج ماجاي اسيطر ماجاي افكررر عدددل كل افكاااري كمال كمال كمال كمممممااااال ليييييش بسسسس هووو بگلبببي لييييش لييييش فهمووووني
واني اضرب بجهة كلبي وهي تحاول
تلزم ادية
ملاك:-جاي اموت افهموووو الي نطيتة
روحي ودنيتي عيوني فتحتهن علي كلبي رجعت
دگاتة بأسمة
عافني هسه وراح يتزوووووج يتوننننسسس ليلتة اليوووم يحضنها ويبوسها ويشمها وهي تبادلة وملاك هنا كاتلهااااا الضيييييم هنا گااااعددددة هناااااا
ادك ؏ افخاذي وشهگاتي گطعن گلبي
ضربتني راشديات وهي تصيح علية
ملاك:-اضررربيني خلي اصحى من حبببة اضرربيني
جرتني وحضنتني وضلت تبوس براسي
واني اهتز بحضنها
ساعات لو دقايق لو ثواني لو كم يوم اني
؏ هاي الگعدة؟ تزوج هو لو بعدة؟
دخلت أمي وجرتني من حضن حوراء
وحضنتني وضلت تبجي
وتهدي بية
ملاك:-يمة راح راح يزوج
شايف من تحس غيرك سكن كلبه!
هنا تغار تموت تبجي المسأله صعبه
بوطن حظن امك ومتروس بالغربه
شايف من يكلك رايح اتزوج؟
وتطفه الدنيا بيك ودمعتك تنوج
الكاع تحسها مرجوحه أعلة متن اعرج...
ايمان:-اششش عسى الله ينتقم منهم
من عمرج ثواني وانتي ما مرتاحة ياربي خلي حرگتها
تحرگهم بنار جهنم
ضلت تدعي وتتحسب
ضليت بحضنها وابجي وشهگاتي تعلى
بكل ثانية
ورا ساعات طويلة ؏ هالگعدة
بديت استعيد وعيي احاول استوعب
وخرت عن حضن امي
ومسحت وجهي وحوراء كبالي گاعدة
اخذت كلاص الماي شربتة كلة
ورجعت ضهري ؏ تاج الجرباية وضميت رجلية
لصدري وغمضت عيوني
حوراء:-هو العرس وين راح يسوي؟
ضحكت:-بالقاعة
حوراء:-وكلتي ب8 بليل؟ وهسه الساعة ب4
تلحكين تروحين مو؟
باوعتلة واني مضيكة عيوني وكوة
اشوف الغواش احتل عيوني:-وين اروح؟
حوراء:-مو كتلج كسري گلبج بأيدج؟
ملاك:-حوراء شدتحجين؟ واشوفهم كبال عيوني؟
حوراء:-حتى تكرهي ويطلع من كلبج مو هيج خالة صح؟
أيمان:-بيوم علاء تزوج كمت اهوس بجفية ماتشوفن كلبي مات
التفتتلها وعاكدة حاجبي:-انتي تكرهي يمة؟
حوراء:-وحبج اله شفادج؟ شمستفادة انتي حالياً؟
ملاك:-اسكتن عني
حوراء:-راح اروح اجيبلج فستاني واجي تكومين غصباً ما على راسج
ملاك:-روحي وبعد لاترجعين
أيمان:-مو بكيفج روحي يمة حوراء
سكتت واني اتخيلهم سوة واحترك بالزايد
اني بدون ما شايفتهم وهيج روحي محترگة؟
لعد اذا اشوفهم سوة شيصير بية؟
شوية واجت حوراء
تعاركت وياهن وحتى امي دفعتها عني
وتعاركت ويا حوراء:-مااااررررييييدددد اروووووح مااااارريد عوفني ماريد ابوس ايدج
حوراء:-اششششش
لزمتني امي وهي تغسل بوجهي حوراء
واني دموعي تصب
خزرتني بكل قوتها:-ملاااااك دتفتهمين انتي كاااافي غباااااء كااافي حبج ماراح يوكلج خبز
روحي وشوفي بعينج وطلعي من كلبج
ملاك:-هو يحبني مايحبها
حوراء:-اليوم ينام وياها وباجر تتغير الاوضاع يابعد روحي اثبتي وسكتي يلا
غمضت عيوني وهي تمكيجلي
مافتحتهن ابد
لحد ما خلصت وضلن يسحبن ويعدلن
ذني شمتوقعات؟
بأذني صفارات وهوسة
دخت وضليت لازمة الميز جابتلي
امي خيارة وبيها ملح وجبرني اكلها
جابتلي الثوب
جان لونة بنفسجي طوخ
ضيك من الصدر لحد الخصر والباقي
نازل لجوة كسرات
وكركشة ؏ شكل ورود من يم الصدر
وفتحتة توصل لفوك الركبة
وطويل كلش
جمالي وطول شعري وجسمي
وكل شي بية متناسق ومتكامل
ليش لعد راح تزوج؟
ضليت انتضر الثمانية تدك
واني اعرف عنوان القاعة وين بس نطيت اسمها
لحوراء اندلتها
تلمس الكلادة شكد جنة فرحانين
اني وياك؟
شكد جانت ايام خطوبتنه حلوة؟
ياترى اني فكرت بهذا اليوم الراح يجي؟
فكرت انو اني راح اصير عاقر وتنقلب
الموازين؟
جنت عايشة بنعيم تذكرت
اول ليلة النة
اول صباح النة
اول يوم واني وياه
اول مافتحت عيوني وتلاكيت بعيونة
ملاك تخيلي
الصبح يكعدون ويصفن بيها
وهي نايمة بصفة
راح تدنى روحه ويرجع يبوسها ويتقربلها
مثل المحروم
وهي راح تكعد حتى تحرك گلبي بي
راح تنطي اليريدة والفوگاه هم
وبهيج هو يصير الها وماكو داعي لوجود ملاك اصلاً
زين اتخيل بعد؟
عندة طفلين واحد بحضنة و واحد بحضنها
وانت يا ملاك؟ اكو داعي لوجودج؟
شنو راح يستفاد هو منج؟
اكيد مراح يستفاد شي
حبج بشنو يفيدة؟ يوكلة يشربة؟
ينطي عمر زايد؟ لو تكمل عائلتة؟
أسرتة تكمل ان كنت موجوده او لا!
صوت حوراء فززني من صفنتي
كم ساعه اني صافنة
فركت عيوني وكمت
صعدت بالسيارة بروحي هاي الذابلة
بروحي المتعذبة
بگلبي المهتلف والماعرف يهوة
جانت سيارة اخوها وهي كاعدة بصفي لازمة
ايدي وتوصيني واني ساكتة شجاوبها؟
هو الاريدة راح مني شيفيد بعد
وصلت للقاعة
باوعتلها عملاقة
وانتي؟
صوت الاغاني والزلم الي بالشارع
والهوسة شافوني
خوالي ثنينهم اجو لناحيتي
عصام: بابا ملاك شجابج؟؟
عثمان:-صدك تحجين تردين تموتين روحج انتي
ملاك:-ليش وهسة اني ما ميتة؟
عصام:-منو جابج
ملاك:-صديقتي واخوها
خالو سويلي طريق خلي اعبر
حاوطوني ثنينهم
وخالي عصام مخلي ايدة ورا ضهري
ويمشيني الجانوا
واكفين يم الباب ابتعدوا
صوت هلاهل تلگتني
بس مو الي
ألها
دخلت لجوة جانت غرفة زغيرة
واكو بنية كاعدة ويمها مفاتيح
عرفتها هاي مال موبايلات ومدري شنو
ملاك:-اكدر اخلي عبايتي هنا يمج؟
الموضفة:-اي عادي تلفونيج جيبي
تذكرتة وهمست:-ما جايبتة
الموضفة:-هذا هو لعد خليهن هنا عادي
نزعتهن وهي باوعتلي من فوك لجوة
وابتسمتلي:-شتصيرين منهم انتي
ابتسمت بألم:-مرت العريس
اختفت ابتسامتها وتحولت نضراتها للقلق
والحزن:-شلون يعني طليقتة لو شنو؟
ملاك:-لا لا زوجتة
سكتت وهي تاخذ غراضي
عدلت فستاني وتلمست الكلادة وباوعتلها
گلبي يدك حيل
دخلت للقاعة
اجواء والاضوية الخافتة
واغاني هادئة لكاضم الساهر
مشيت ؏ كيف
وايدي ؏ گلبي شلون راح يكون منضرهم
ياترى؟
واني مغمضة عيوني ومدنگة
رفعتهن
لو معميات؟ لو ميتة؟ لو مانخلقت اصلاً؟
مخلوقة للتعب اني
ضهرها ؏ صدرة وهو حنجة ؏ كتفها
والمصورة تطگلهم صور
ابتسموا ثنينهم
دارها علي
وحط گصتة ؏ كصتها ولازم خصرها
وشفايفة تتحرك يعني ديحجي وياها؟
وهي تبتسم وتحجي هم
حاوطت رگبتة والمصورة
من كل جهه تصور
حسيت ايد لزمتني باوعتلها وردة:-ملاك شجابج؟
اشرت عليهم واصبعي يرجف:-جابني
هذا الموقف الي ببالي الماردته يتحقق
عضت شفتها بقهر
باوعتلها من فوك لجوة وابتسمت:-متحضررة لعرس اخوج؟
سكتت ومسحت دموعها
وردة:-راح اوكف هناك واصورج
هزيت راسي
وهي ركضت لبعيد لبداية القاعة وفتحت تلفونها
واشرتلي تعاي
گلبي يدك يدك بسسرعة
ماتوقف ومحتاجة اتقيأ حتى ارتاح بس
ماكدرت
وطأت قدمي اول خطوة
وخصري اليتمايل ويا كل طگة كعب
رجفات جسمي المامبينة
دكات گلبي
والموقف الگبالي
اشرتلهم المصورة ؏ حركة
واني امشي مستمرة القاعة طويلة كلش
وخصري يتمايل يمين ويسار
واليشوفني يگول يا قوتها هاي
واني رمل واليدوسني انهدم للكاع
ضحك وحك حاجبة وابتعد ودارها اله
وهو يكول للمصورة:-هيج؟
يقصد ؏ حركة
اجت عدلت ايدها خلتها ؏ متونة
رفع راسة وابتسم مادري لمنو
بعدها نضراتة توزعت ؏ القاعة وثبتت عيونة
بعيوني وعرفني وسط هذا الظلام كلة
ابتعد عنها بسرعة
جبت كلشي
وعفت كلشي
ومدري شلون اجيت امشي
اجيتك ردت اگلك شوف
ردت اعوف كلشي وماگدرنا نعوف
جبت كلشي اليسولف بيك
خيالي وصحوتي وطيوف
جبت دگات گلبي
الگطعن گلبي بچفاك سيوف
كون تشوف حالي شگد الك ملهوف
مثل حلة مدارس روحي احسها
اطفال حلت وتركتني وباقي بس صفوف
ويا وحشه اصفوفي من يجيني الليل
ويا لون الوجه بعدك يضل مخطوف
فتح حلگة وهو يباوعلي
وعيونة كلها قلق
وهي هم عكدت حواجبها تباوعلي
شلت فستاني
وصعدت درجات و وگفت ؏ ستيج
والكل يباوعولي لدرجة الاغاني انسدت
تقدمتلة وابتسمت ورفعتله
حاجبي وكلت:-الف مبروك عريسنة
رجفت شفايفة راد يحجي وماكدر
بستة بخدة وابتعدت مبتسمة
باوعتلها لابسة بدلة لون ازرك
تقدمت بوستها وهمست:-الف مبروك يارب تضلون سوة للابد
لزم معصمي وهمس:-شجااابج
بعدتة عني وعدلت قاطة
من يم الأكتاف:-طالع حلو عاش ذوقك
باوعتلة بيأس ونزلت نضراتي لأيديهم
عفتهم ونزلت خالتي تلگتني:-انتي شعندج هنا؟؟؟
ملاك:-غير عرس زوجي يعني لازم احضر مو؟
ضغطت ؏ اسنانها حيل واني اشوفها
متأنقة ؏ اخر حباية
لزمتني وردة من ايدي واخذتني للطاولة
الي هي بداية القاعة يعني گبالهم بالضبط
رندة خزرتني وضلت تباوعلي
درت وجهي وخليت ايدي ؏ خدي متكيتها ؏ الطاولة
وحاطة رجل ؏ رجل
واباوعلهم
اخذتلهم صورة وبعدها اشر بيدة
كافي
و ولاء وجهه ميگصة الطبر
من العصبية احسها راح تنزع البدلة وتجي تكتلني
هه
مانكر طالعة حلوة
حيل مكياجها وترتيبها كلش حلو
مرجعة نفسي للكرسي واباوع واني ؏ وضعيتي
كصو الكيك
وكلتة وهو هم
حتى ما اكل كلش
ابتسمت خليتك حتى بيوم عرسك تنسبي
شلون لعد باقي حياتك؟
اذا ما أكلبها الكم جحيم فـ لا اتسمى
ملاك
وتبقى نفسي بيك
وماتتهنى بحياتها ذيج
وصار وكت يتبادلون الحلقات
كمت من مكاني بسرعة وفتحت عيوني
باوعت لايدة حلقتي موجوده
وهو مدنك يفر بيها
رفعت عيوني لولاء تباوعلي
رفعت حاجبها ومدت ايدها لكمال
واخذت ايدة ونزعت الحلقة وانطتها لخالتي
دار وجهه علية واحس عيونه نملت دموع
رأساً دار لغير جهه وفرك عيونه
وحطت بأيدة غير حلقة
يمكن وبا ما تبدلت حلقتي
تبدل گلبة وياها
شمدريني؟
اجتني وردة وحطت الحلقة بأيدي
باوعتلها وفريتها بيدي وضحكت
وعيوني متروسة دموع
عيونة ثواني الها
وساعات يصفن بية عافها وطلع
شوية واجتني وردة
وهمست باذني:-كومي كمال يريدج
ابتسمت واني شايلة فستاني
واتمشى ؏ كيفي
الكعب عالي كلش وصلت لاخر شي
دخلت نفس الغرفة الدخلتها مساع والموضفة تباوعلنه
لزمني من زندي وحد اسنانة
وهمس:-شتسسسسوووين هنااا اني مو كتلج ماتجييين؟؟؟؟؟
ملاك:-ليش ما اجي علمود تاخذ راحتك؟ علمود تضحك
بكيفك وتتلمس وتحضن براحتك؟ مو
فرك وجهه بحرگة
ورجع باوعلي وكال:-لبسي خلي ارجعج يلا
وخرت ايدي عنه وكلت:-لا ليش اروح خلي نزفك
كمال:-ملاك لاتكفرررريييينننني روحيي لبسسسي لا احرررك الدنييييا فوك راسج روووحي يلاااا
ملاك:-شتريد تسوي سوي وما اروح
دفعتة عني ومشيت ودموعي تجري
مسحتهن بسرعة ورجعت
بعدني جاي امشي واجت خالتي لزمت عكسي
عكدت حاجبي
اخذتني وياها وهي تضحك
وكفتني كبال مجموعة نسوان وكالت:-هاي مرة كمولي الاولى
باوعت للنسوان يباوعلي بقهر
وحدة كالت مستغربة:-حلوة تخبل جا ليش تزوج؟
والثانية ردت عليها:-عاقر خطية
عيوني نملت دنكت راسي بسرعة
_شكد عمرج انتي خالة؟
حجيت بصوت ناصي:-24
_خطية زغيرة
كافي كافي خطية خطية خطية
اني تعبانة
اني مو خطية
اني نضلمت
رجعت
لمكاني ضلت وردة يمي وتفرك بمتني
واني كاعدة وبالي مو يمي
و ولاء بنات هواي واكفات ؏ ستيج
ومسويات دائرة وهي ترگص
وتصفك وتباوعلي
وخالتي تهلهل
وفرحانة يكول اول مرة كمال يتزوج
كلبي ويا كل هلهولة منهن
تنخفض دكاتة
بدلت مرة ومرتين وتلاثة
وكل بدلة تكول للثانية اني احلى منج
سوولها الجلوة وهي لابسة بدلة زيتونية
حطولها حنة ولفو ايديها
والملة تقرة سور وادعية وذني يصلن على محمد
_سبع ويلاد وبنية
الگفلة الخلتني اسافر لبعييييد لمكان
ابعد من الخيال
يوم عرسي
نفس الگفلة
واني متونسة
ومأمنة راح اجيبلك سبع ويلاد وبنية؟
واني ما جبتلك لا السبعة ولا البنية
رجعت لواقعي خذوها يبدلولها
وتلبس اخر بدلة
واجت لابسة بدلة كريمي
وبيها لؤلؤ
ومغيرة الكلادة ومخليتها نفس الؤلؤ
الي بالبدلة
ليش كلشي حلو؟
معقولة حياتها تصير حلوة؟
ينساني؟
ودخل و وراه ابوها وجدي
واخوانها ثنينهم
وخالتي تهوس كبالهم وتهلهل
طَرف ثالث تدخل وانتَهت وياك
خربها وتبَاها…. وحگه يتبَاها
هاي الرَادها وهاي التِمناها
لزم جفوف اديها و واكف بصفها
وعيونة تدور علية
واني بين النسوان يا كمال تلمحني؟
ولمحني وظل صافن بعيوني
لحد ما زفوهم
واخوانها يهوسون
جاسر مات بجي علية؟
واني انتهت عيوني من البجي؟
اشوفها مكيفة حتى ماودعت امها بس ابوها
باستة
زفوهم وطلعوا رحت لمكان
جان مطبخ مدري شنو بس جان بي اكل
كعدت ؏ كرسي وضليت
امرغ برگبتي واشهك بصوت عالي
ودموعي تجري:-اااااخ يارررربي اااااخ
واني اشهك
وروحي تنمرد وكلبي ولك كافي تحن اله كافي
تعبتني والله واني مو مال تعب
ياربي كافي حن انتَ علية واخذني
يمك مو تعبت تعبت واحس الدنيا صارت سودة
كمت كوة اجر النفس
صرت ادور ؏ هوى دوارة
سمعت صوت بنات ثنين طبن يضحكن
نوب سكتن:-يااا شبيج حبيبتي
احاول احجي بس اريد انطق
ماكدرت
_لج جيبييي مااااي عزززة راح تموووت البنية
جابن ماي شربني و كف ببلعومي
ضليت اكح بصوت عالي حيل
وهنه يمرغن بصدري وحدة منهن همست:-هي هاي
مرتة سودة بوجهك ان شاءلله هالحسن كلة وتتزوج علية
_انجبي هسه البنية بيا حال اسكتي
دنگت علية ومسدت ؏ شعري:-صرتي زينة؟
ملاك:-ص.. صيحي ور.. وردة
_وردة اخت كمال مو؟
هزيت راسي اكثر من مرة اي
ركضت وحدة منهن وراحت تصيحها ورجعت
كالت ماهيه
حتى انتي يا وردة نسيتيني؟
هزيت راسي وكمت وهنة سندني:-تنزعين الكعب؟
هزيت راسي بـ اي
دنكت البنية نزعتنيا همست:-بس وصلني لغرفة
خليت بيها غراضي
_مال تسليم الموبايلات مو
رجعت هزيت بـ اي
مشني ثنينهن كايداتني وصلني يم
الغرفة ابتسمتلهن بخفوت:-شكراً
_حبيبتي اذا تريدن شي بعد كولي؟
_نلبسج احنة خاف متكدرين؟
ملاك:-لا لا شكراً متقصرن واعتذر تعبتجن
ابتسملي وراحن ثنيهن
دخلت والبنية تباوعلي بحزن ومقهورة علية
ملاك:-غراضي عفتهن هنا؟
الموضفة:-اي تعالي موجودات
اخذتهن وايدي ترجف
لبست الجبة
ولفيت شالي عدل وهي تباوع لايدي الترجف
ودموعي المعلگات برموشي
دنكت لبست حذاء انصى لان جايبة وياية
حوراء مخليتلي اخذتهن
وتشكرت منها وهي تكلي:-لاتضوجين
ربج مايضيع عندة حوبة احد
ملاك:-والنعم بالله
عفتها وطلعت واصوات الموسيقى والدك
عكدت حاجبي وطلعت اباوع فرقة
موسيقية تدك بالطبل
واكو نص يلعبون جوبي
ضليت واكفة اخير شي اباوع
باوعت لوردة تضحك وتصفك ويا علاوي
وتكلة باوع شون حلو
بعدها ركبو بالسيارات وردة مادارت وجهه الي
ابد
هو منو الدار وجهه الي اصلاً؟
باوعت منو ياخذني كمال وبصفة ولاء
ويتشكر من ذولة الفرقة
دار وجهه يدور
وباوعلي ونوب باوع للسيارات
واني ضالة عليك؟
وعيني ؏ ذاك اليحرك كلبك
فارس
تذكروا اكيد؟
مشيت وهو عكد حاجبة و ولاء تباوع
مطنكرة
وصلت يمة
هو ارتبك نزل راسة:-اعتذر بس سيارتكم فارغة؟
باوع لكمال واني درت وجهي
واحس راح يكب وجهه صار احمرر
وعاكد حاجبة يباوع لناحيتي
رجعت باوعت لفارس:-فارغة لو اروح لغير سيارة؟
وخر عن الباب وكال بارتباك:-لا لا تفضلي تفضلي اختي اكو مجال مو نور؟
سولي خواتة مجال وقبل لا اصعد
شفت ولاء صعدت للسيارة وطبكت الباب
بعصبية
وهو يخابر وكذلك عصبي ويصيح
ودمارات وجهه مبينة ويباوعلي
دخلت وسديت الباب
باوعتلي مرت خال كمال وابتسمت:-انتي ملاك مو؟
هزيت راسي:-هلا بيج يخالة خو ما متضايقة؟
ابتسمت:-لا خالة المكان جبير
_اقصد من غير شي؟
باوعتلها بيأس وهمست:-اتعود
مشت السيارات واحنة وراهم
وهذا فارس مطلع اغنية بس منصيها
وخواتة يحجن ويسولفن وياي
واني ارد ؏ كد السؤال
افتروا هواي احس راسي داخ من كلشي
باوعت للساعة ب12 بيش الساعه ناوين
يوصلون للبيت بـ1؟
عقلج وين يملاك
وكفوا كبال مبنى جبير عكدت حاجبي
من شفت سيارة كمال نزلوا منها
شنو قاعة ثانية؟
باوعت للبنية وهمست:-هاي وين؟
نور:-هذا فندق ينامون بي حبيبتي
فتحت عيونها بوسعها يعني حتى ماراح يرجعها للبيت؟؟
شنو هذا الديصير درت وجهي بسرعة
عنهم ونزلت دموعي شهگة فالتة طلعت مني
دارت وجهه علية المرة الجبيرة:-اوف يربي ارحم بحالها
حطيت ايدي ؏ حلكي واني مدنكة
ودموعي تصب والبنية تمسد ؏ ضهري وتهمس:-اهدي
يگلبي يمة احس روحي راح تطلع الله يساعدج
مبينة تحبة هواي
ولكم مو بس احبة اني مستعدة
اذا يكلي موتي امووت ليش هيج يسوي بية
لييييش
ولكم حبي الة مايضمة لا رقم ولا عدد
مايتوصف ليش عيشني بأمال
وكذب ليش؟ ليش ماگالي يابة ترة اني نص
الدرب واشوف غير طريق لاتمشين
وياي للنهاية تتأذين؟
كلشي ما گال عافني بعمى عيوني
انفتح الباب اليمي باوعت وعيوني مغوشة
ولك رغم الغواش اعرف هيأتك
جا شتريد بعد؟
مدلي ايدة وهمس:-تعاي نزلي
مرت خالة:-عوفها يمة مرتاحة هنا
كمال:-لا مو علمود يذبوها هناك انتوا تتأخرون يلا انزلي
حطيت ايدي بأيدة ونزلني
وطبك الباب
كمال:-كتلج لا تجين لاتجين شستفاديتي هسه؟
سكتت وامسح دموعي اخذني
لسيارة امير ودارني الة وحضني وباس كصتي
ماهمة السيارات كلها والناس الي تباوعلنة
كمال:-كافي ملاك تعبتيني وتعبتي روحج عيونج هاي تعبت من البجي
ملاك:-؏ اساس اني ابجي بدون سبب
روح روح لعروستك تنتضرك
كمال:-ملاك....
قاطعتة وفتحت باب السيارة:-تصبح ؏ خير والف مبروك مرة الثانية
دخلت وسديت الباب بقوتي
ورجعن دموعي مايلمسن خدي ينزلن
كبل للكاع لزمت ايدي
وردة وكالت:-دورت عليج واجو بنات ثنين كالولي تخربطتي وردتيني بس والله جنت يم علاوي وخفت لايضيع لان صارت هوسة
هزيت راسي ومسحت عيوني:-امير شمنتضر؟
امشي رجعنة للبيت
هز راسة وحرك السيارة ومشة
بينة
فتحت الجامة وضليت اتنفس
والهوى بارد يبرد خدودي الدرب طويل
غفيت من التعب و وردة يمي تمسد ؏ ايدي
ماعرف بعد شوكت وصلنة
كعدتني وردة نزلت دايخة مانتضرت
احد يسندني
ليش جابوني لهذا المهجوم؟
دخلت بسرعة وعفتهم صعدت لفوك ريحتة
تارسة الغرفة سديت الباب
وكعدت وراها واني ادك ؏ رجلية:-شتعاتتبييين
بعدددد شتعاتتبييين
كمت واني ماعرف شلون امشي
وصلت يمة المرايا ها يملاك؟ وهاي صفيتي وحدج
والخفتي منة صار
والردتي مايصير....صار
مكياجي وعطوري المرتبات ؏ ميز المرايا
شمرتهن بالگاع
ضليت اشيل واشمر
واضرب بروحي بدون صياح وبدون مانطق
حرف واحد تعبت تعبت من الكلام ومن العتاب
انفتح الباب وركضتلي ورد:-لج كاااافي موووووتتتتتييي رووووووحج
صحت:-لاتكوووووولووووون كاااافي لاتتتتتتكووووولوووووون
لزمتني واني ماحسيت بشي بعد
وكعت للكاع اخر شي سمعتة صرختها
وردة:-ملاك كووومي الله لايوفقج يمة ولا يوفقك يكمال
كومي ملاك ابوس ايدج
واني اطبطب ؏ خدها وارش الماي
واحط عطر دك تلفوني شفتة كمال شلتة بسرعة:-كمال
تخربطططت وكعت بين ادية
كمال:-ياللللهي كعديها شوفيها رشيتي ماي؟
وردة:-اي اي فتحت عيونها ملاك هذا كمال
وهي تباوع لفوك ودموعها تنزل من الجهتين
كمال:-شوفيها مصخنة؟
تلمست كصتها وطلعت فعلاً
داوية نار:-اي مصخنة
كمال:-باعي فتحي الثلاجة تلكين
بالأخير بالجرارات شراب بي لزكة خضرة
انطيها مرتين منه
واني فاتحة سبيكر كمت طلعت العلاج
وكومتها وهي ماتحس فاقدة
وصايرة بيدي مثل الطفل
شربتها رجعت غمضت عيونها
كال:-ها؟ شربتيها؟
وردة:-اي
كمال:-فتحي السبيكر خلي احجي وياها
فتحت السبيكر وخليتة يم اذنها:-ملاكي
كولي ها خلي اسمع صوتج مو حركتيني حرك انعل ابو هيج ليلة لابو هيج يوم شو اسمعج وينج
حجت متقطع:-ها
كمال:-ملاك لاتبجين عيونج راح يابعد عيوني
ولج تعبتيني بس خلي هاليلة تعدي ؏ خير
ملاك:-روح ن.. نام بحضنها.. وتعدي... ؏ خيير
كمال:-وليش هية هينة علية؟ التحسين بي احس بأضعافة ملاك لاتتصورين اني بدونج اعيش بكل دمعة منج نزلت بسببي ينقص يوم من عمري
ملاك:-اممم
ضمت شفايفها ومسحت دموعها
وهو يذب حسرات ويهمس:-وينج سمعيني صوتج صرتي زينة؟
واجة صوت ولاء الخربط كل
الموازين:-كمااال وينك يلا تعال اكل حبيبي
دارت وجهه بسرعة للموبايل
وحطت ايدها الترجف ؏ الغلق ونهت الاتصال
وياه
وضمت وجهها بالمخدة وهمست:-طلعي وردة
وردة:-ماطلع ترتاحين يلا
سكتت واشوف جسمها يهتز
واني دموعي تنزل بسكتة لشوكت ويطيبن
جروح ملاك ياترى؟
دزلي رسالة كمال كاتب:-ها وردة وينها نامت؟
كتبتلة:-اي
كمال:-ما بجت؟
كتبت:-لا جاي تضحك وتصفك وتركص كمال شتتوقعها يعني؟
ماكو كتابة بس هو متصل
رجع كتب:-روحي بيها وردة شلون بية بهاليلة مالي نفس بيها والله يارب ارحمني
كتبت:-كافي روح اني يمها راح انام
كمال:-اذا تخربطت لو صار شي دزيلي تمام؟
وردة:-تمام
وراح
كمت عزلت الغرفة وريحت العطور ترست
الغرفة ترس بحيث تخنك
فتحت الشباك والمراوح عليتهن
باوعتلها فاتحة عيونها
طلعتلها تراك وكومتها غصب ماتحجي
هي بس ماتريد تكوم
نزعتلها الثوب ولبستها تراك ورجعت
نامت جبت كلنس مبلل ومسحت وجهها وهي نايمة
نزلت لجوة هوسة للستار
ورندة كاعدة وتضحك وتسولف والدنيا
مخبوصة
رحت لابني سوده بوجهي لكيتة
نايم ؏ كاع ويعبرون علي ومحد يشيلة
شلتة وهو فز خليتة ؏ جتفي ورحت
لرندة الكاعدة تدك سوالف:-رنددة
ماسمعتني كررتها مرتين وتلاثة ماسمعتني
لمن كمت اغلط يلا:-راح اصعد انام تعبانة كلش
هاي الهوسة عدليها كلها
رندة:-وملاك وين شنو انضف يمة غير خطار
وردة:-هي يومية رايحة رادة وتكلي خطار
وملاك بيا حال هسة لخاطر ربج فرشيلهم وخلي ينامون يلا
عفتها وصعدت وعطت بالجهال يخافون مني
كلها سكتت يم امهاتها وصعدت لغرفة ملاك
اسمعها تناشغ وهي نايمة
هزيت راسي بقهر وحطيت علاوي
؏ جرباية بدلتلة وغيرتلة حفاضتة ونيمتة
بصفها
واني اخذتلي دشداشة منها ولبستها ارتاحيت
سديت باب كنتورها واني
ابتسم لترتيبها وترتيب ملابس كمال
كل لون وحد
تغطيت ونمت بصف علوش ونمت بسرعة
من التعب
بليل فزيت ؏ صوت رسالة
فتحت عيوني كوة اشوف باوعت
للساعة بـ3 وملاك تطكطك بأصابعها
فتحت التلفون لكيت رسالة من
كمال فتحتها كاتب:-ها وردة نمتوا؟
ورسالة ثانية:-نايمة ملاك شلونها؟
عدلت كعدتي وحاولت افتح عيوني
حتى اكتب عدل كتبت:-اي نمت وملاك زينة بس مادري كاعدة لو لا
كمال:-شوفيها
وردة:-مغطية راسها
كمال:-طكطك اصابعها؟
عكدت حاجبي وكتبت:-اي ليش؟
كتب:-يعني كاعدة
ضحكت وكتبت:-هاي هيج حافضها
رد:-اي
ثواني ودز:-شوفيها حبابة حاجيها خاف تخربطت
عفت التلفون و وخرت الغطة عنها
بسرعة غمضت
هزيتها:-ملاك كاعدة يروحي؟
سكتت
فضحتها دمعة منها نزلت خاطفة
مسحتها وهي ناشغت واخذت الغطا وغطت
راسها
استغفرالله ياربي
اخذت التلفون وكتبتلة:-تبجي بعدها
مادز ظل صافن بالمحادثة
رجعت كتبت:-خلصتوا؟
كتب:-اي
وردة:-كلشي تمام؟
كمال:-اي
سكت شوية ودز:-تدرين حتى املي
بهاي السالفة خليتة كلت بلكي يصير شي
حتى انهي المهزلة هاي كلها
وردة:-الله كريم حبيبي كلشي بي صالح روح نام تعبان انت
دز:-ونعم بالله تعبتج
وردة:-شعندي قابل عشر اخوان هو هالواحد تعبك راحة حبيبي
شافها ودز كلب وراح
واني ضليت اراقب بملاك لحد ما نمت
رجعت كعدت بالعشرة الصبح
باوعت الشمس طابة بعيني شباكهم شكبرة
صاير ؏ جهة الشمس
باوعتلهم علاوي حاط ايدة بصدر ملاك
عبالة اني وهي حاضنتة حيل
ابتسمت وعفتهم ونزلت ؏ كيفي كلت
هسه الكاها هوسة طلعت ماكو صوت
استغربت رجعت باوعت للساعة
بالعشرة شوكت يجون
نزلت لجوة واني ارتب بشعري ودخلت للمطبخ
ماكو احد يمكن ببيت جدي
بس ليش محد كعدنة؟
كلت يمكن مكعديني وماكعدت لان تعبانة
ومانمت عدل
تريكت وغسلت اماعين وصعدت
لفوك شفت تلفوني يدك شفتة امير
وانتَ نسيتك
شلت الخط:-ها حبيبي
أمير:-ادري شنو السالفة اختفيتي وما بينتي دكولي عندي رجال عندي بيت
غمضت عيوني وكلت:-آسفة والله التهيت بملاك لو تشوف حالها يبجي الصخر ماكدرت اعوفها
سكت وكال:-راح امرلج اخذج
همست:-يلا منتضرتك
غلقت الخط واخذت نفس
وصعدت لفوك لبست عبايتي وملاك
شابگة علاوي حيل خفت اوخرة وتكعد وهية
كوة نامت
؏ كيفي سحبتة منها وهي ضلت ؏ نومتها
همزين ماگعدت اخذتة وطلعنة لأمير
وكلبي ضل يمها...
ملاك:-
الساعة بـ1 ضهر لو ليل؟
ضوة الشمس بعيني يعني ضهر
اني وين
اتذكر اخر شي شبگني علاوي
واني حضنتة
وماتذكر شي بعدها
عيوني تأذيني وتدمع وحدها وراسي
يريد ينفجر
ليش ماكو صوت؟
اليوم صباحيتة غير؟ يعني
لازم يجي ويكعدني؟
والله بطرانة بحضن ولاء هو بعد يا ملاك يا دنيا
كمت اتطوطح منا ومنا رحت للحمام
غسلت وجهي فركتة حيل واحاول اصحصح
طلعت نشفتة واخذت حباية وجع
راس وفتحت الباب غرفتهم كبالي مطفي
الضوة
اكيد نايمين اخذت نفس وذبيتة بقوة
ونزلت
خالتي تباوع ؏ تلفيزون
من سمعتني نزلت باوعتلي ورجعت دارت
وجهه
ملاك:-شلونج خالة
بيداء:-هلا
ملاك:-شنو محد اجة لهنا؟
بيداء:-ليش يجون؟
بلعت ريكي وكلت:-غير صباحية عرسهم
بيداء:-هم العرسان ما جايين شكو جاية الناس
تباركلي الي
جسمي ظل يرجف كعدت ؏ تخم
بسرعة:-شلون يعني ما جايين غير فوك؟
بيداء:-لا حاجزلهم ابو علي ليلتين بالفندق
بهت وجهي ورجف شفايفي:-ل.. ليش يومين؟
باوعتلي ورفعت حاجبها:-جا انتي
مو ضليتي بهالبيت يومين بس هي بالفندق
ياخذون راحتهم اكثر
تحجي بنتر وشايلة خشمها علية
هي ليلة وكوة عديتها ياللهي بعد ليلة؟ ماتحمل والله
سكتت وكمت والنار ببلعومي
باوعت لأيدي ترجف ما ماكلة صارلي يومين
طلعت اكل من الثلاجة حميتة
وكعدت آكل يكول شبعانة ولا يكول صار شكد ما ماكلة
نص الاكل وعفتة رجعتة
غسلت اماعيني احاول الهي روحي
وماضل افكر
طلعت برة وكعدت ؏ مرجوحة
غمضت عيوني وهم رجعتن تخرن دموع؟
دكافي
واني اهز بالمرجوحة
ومغمضة عيوني وراسي رافعت لفوك
صارت ايد ؏ عيون حطيت ايدي ؏ الايد وهمست:-منو؟؟
صار صوت بأذني:-انتي حزري منو؟
ابتسمت لصوتها وخرت ايدها وهي دارت
علية وحضنتني:-شلونج؟
ملاك:-زينة
ملك:-هاي بعده التانكي مالتج مزروف دكافي شكد تبجين ماتملين
ملاك:-لا مليت وهوووواي هم
ضلت تسولف وتحجي وياي
وتضحكني
تناسيت شوية السالفة
طلعت خالتي وكالت:-هاي منو هنا؟
كلبت وجهه ملك ودارتة عليها:-هلا خالة
كامت سلمت من ورا خشمها ورجعت كعدت
يمي لليل ضلت
ملك:-خلي نسوي بيتزا؟؟
باوعتلها واني روحي ما طايقتها:-الي خلگج
مابية حيل
ملك:-دنجبي يلا كومي يلااا
كومتني غصب وكعدنة نطلع المكونات ونشتغل
ونضحك وهي تحشش وتحجي ؏ خالتي
بصوت ناصي
وخالتي تطب علينة تهز اديها وتطلع
سويتلها غير شي ؏
ما صارت البيتزا
ملك:-زين هاي ماتنوكل الة وياها بيبسي؟؟
ملاك:-ومنين اجيبلج ببسي يمة؟
ملك:-عدنة رجلين وفلوس موجودة وابو المحل
قريب ونروح اني وياج تيرارا تيرارا
ضحكت ودمغتها:-اكلي تبن مايرضى كمال اطلع للمحلات
ملك:-وهو كمال وينة؟
باوعتلها ودمعت ودنكت راسي
وگلبي انتفض
ملك:دمشي لبسي صايتج حبابة عود نكول لهاي الشمطاء
ملاك:-تؤ تؤ تؤ لاتغلطين
عفتها ورحت لخالتي:-خالة راح اطلع لهذا
المحل الي هنا اني وملك بس نجيب ببسي ونجي مانتأخر
هزت راسها وهي تباوع لتلفيزون
وتاكل ركضت لبست جبتي ولبست برجلي
ونزلت
وطلعنة اني وياها يمة اول مرة اسويها
بحياتي
بجيث الوجوه صارت كلها كمال
وكلها تخزر بية وتكلي شعندج طالعة
طبعاً هاي تخيلاتي لا اكثر
دخلنة اشترت اندومي وببسي وحلويات
ورجعنة للبيت ناكل تونست وياها
همزين اجت
عاد التهي بشي
غسلت الاماعين وصعدنة لفوك
باوعت للغرفة وابتسمت:-عبالك جديدة
ملاك:-تعاي ندخل لغرفة ولاء؟
ملك:-اي جا شمنتضرة خية خنطبلها نخرب الغراض ونطلع
ضربتها وطلعنه المفتاح معلك
حطيتة بالباب وانفتحت فتحتها ؏ كيفي
ودخلنة
فتحنة الاضوية وهي تباوع:-ترة غرفتج احلى
ملاك:-اي ماعدها ذوق
ملك:-ماتشوفيها اختارت كمال
ملاك:-لج ادبسز
ضلت ملك بفضولها تدور وتبحوش حتى
ملابسها فتشتهن تالي
اخذتها وطلعنة ورجعت كلشي لمكانة
ورجعنة لغرفتي
كعدنة ؏ جرباية نسولف
ملاك:-يعني منو الاصعب الجامعة لو السادس؟
ملك:-شواية الله عليك يالسادس وعلي احنة
مو وجهه نعمة جان مدارينه واحنة نتبطر
اسهل اسهللل من الجامعة كلشي مافتهم اني من الاساتذة والدكاترة
عاد بالسادس احنه متعلمين مو هذا المواد كلشي مانعرف منها
ملاك:-هسه انتي طب عام يعني شتروحين من تخلصين؟
ملك:-تشريح اروح احبه هو اختصاصي اصلاً
2
ملاك:-ودارستج شوكت تخلص
ملك:-سالفة طويلة حُبي منا لمن يدك عمري 40 سنة يلا اخلص من الدراسة
ملاك:-شنقضية
ضحكت ودنكت تكرز حب
ملاك:- وجاسر يخلص قبلج مو
ملك:-مجنص ابن اللذين سنتين بعدلة ويخلص
ملاك:-بعد روحي يصير مُحلل احس لايگتلة
ملك:-يمة حمدت الله وشكرتة هو مو وياية
ملاك:-هههههه انتوا من الابتدائية لحد السادس اعداي سوة نفس المدرسة مو؟
ملك:-ااي لج جانت مختلطة
دخلي اسولفلج هذا الموقف من جنت بالاول ابتدائي
ملاك:-اممم سولفي
تربعت وكعدت تسولف
ملك:-باعي تقريباً هيج اشهر من داومنة بالاول
خرب يومة جان ميخلني اكعد يم بنية
ولا يخليني اسولف ويا ولد ولا احجي
المهم
فـ مرة جان ويانة ولد اسمة مؤمن
طبعاً اني ساقطة من جنت زغيرة اموت ؏ حلوين
شكد صلفة
الولد يخبل يشك شك
وعلي العيون زرك شون عيونج بس هو افتح
بحيث تشوفين مستقبلج بيهن هههههههه
ضحكت وغميتها
ملك:-فـ هو اندعم كالوا بس ماصار بيشي
واني ابجي وماخذني الواهس
ابجي علي جنت فـ وراها بكم اسبوع
داوم واني نسيت هذا الاثول اخوج
ركضت وحضنتة
ونوب كعدت يمة انطي الدروس
وطب جاسر للصف جان يشتريلي
يمة شلعب كتل الولد كتلة من هاي الزينة
وجان مؤمن ستوة طالع من العمليات مدري شنو
ماتذكر بس جان ملفوف راسة
وضل الولد ينزف تالي
فصلوا جاسر اسبوع وماخلاني اداوم هم وياه
يشبگني ويضل يبجي مايرضى
تالي اخذت اجازة وكعدت وياه كش جان
لازك لازك بية
وحتى هسه كل ساع عايف محاضراتة وجاي
ملاك:-ههههههههه سوالفة تضحك احبة من يغار
ملك:-خلي يولي اني اضل اتعارك وياه همزين
لازمة روحي بالجامعة وما ننفضح
ملاك:-اني اخاف منة تدرين ذيج المرة رزلني ؏ مكياج وكمت ماخلي من اجيكم
ملك:-حتى اني يرزلني بس اني اخاف؟ لاع شون
اطلع بدون مكياج يمة اموت
ملاك:-اني جنت احبة بس
تعبت نفسياً من كلشي وتركتة ومالي خلك اكعد اتحمر
غمتني بثنين اديها:-عود باجر من يجون
ضلي بهذا وجهج حطي مكياج وتأنقي ولبسي
اكلج اوكفيلي خلي اخابر امي واكلها ابات يمج حتى اشوفج شلون اطلعيلهم بدون مكياج
وبدون ترتيب
ضحكت وتمددت وهي خابرت امي
وضلت امي تصيح عليها بعدين اقتنعت من اني
حاجيتها:-والنبي الوسطاني مضلوم
ملاك:-انقهر عليج
هزت ايدها وتسوي روحها حزينة
كامت سوتلني اندومي واكلنة لل2 يلا نامت
وبقت عيون ملاك المساهرة المنتضرة
طيفة يمر عليها
اذن الاذان صليت وردت انام فتحت
تلفوني لا رسالة ولا اتصال
هزبت راسي ونمت
فزيت ؏ صوت ملك:-لج رااااح يجوون كومي جنج قندرة
ملاك:-نعسانه
ملك:-كومي لا اركعج بالنعال كوووومي
گمت غسلت وجهي وفرجت
وضلينة نختار اللبس
ملاك:-شعندي لابسة ثوب هسه تكول غارت مني لا مالبس
ملك:-صح والله زين بنطرون؟
ملاك:-اتبنطر من صباح الله خير
اكو دشداشة حلوة تخبل شوفيها جنها ثوب
طلعتلهيا وهي نبهرت
جان لونها ازرك ويم الخصر ينشد وينضب
الفوك جانت حلوة
لبستها وهي سحبتلي شعري وبرمتة
وكعدت تمكيجلي
حطتلي كحلة طوخت عيوني
حتى مايبين الحمار
وحطتلي جوة عيوني خافي عيوب
حتى السواد يخف
وضلال فوك العين وحمرة طلعت حلوة
انيقة ومرتبة شعري ضفرتة وهي دمغتني:-جا
واني المن صارلي ساعة اسحب ايدي وكعت
ملاك:-لا ماريد احلة عوفي هيج مبيني ارتب
هزت راسها وكالت:-بكيفج
وضلت تعلمني وتكلي شسوي واني اضحك
عليها بطرانة
تكلي اذا شفتي لاتبينيلي انتي مشتاقتلة
ماتدري هسه اذا اشوفة اطب بكلبة وماطلع بعد
واصواتهم بدت تعلى والهلاهل والجكليت
واني وملك نباوع من فوك
غمضت عيوني وهي كامت تصيح
بسكتة:-ملاك لاتخليني اركع راسج بالحايط راح يخرب المكييييااااج ولج ايدي ماتت كفشتي لسة مامعدلتها عفت امتحاني علمود خلقتج وتردين تبجين من اروح ابجي براحتج عاد ماشوف تعبي وانقهر
هفيت ؏ وجهي وكلت خلي انزل
ملك:-اني راح ارتب الغرفة وابدل لازم ارجع
هزيتلها راسي
وهي طبت واني انزل ؏ كيفي
ودكات كلبي تزداد صارت كبال محاوطتها
خالتي وامها ورندة سمعن خطواتي
دارن وجههن الي
ملاك:-صباح الخير
تقدمت وهنه صبحن علية و ولاء
رافعة حاجبها ومبتسمة
بوستها وهي
بس مادة راسها همست بغصة:-الف مبروك
ان شاءلله اشوف حضنج متروس اطفال...
