رواية كحل عرب الفصل العشرون
(رحلة الى بغداد )
جَمِ لَيلَهِ آعلَهِ لَيلَهِ يـعـز عــلَيـهِ آلَنـــــــٌوُمِ
بّــًسً حلَمِـــــكَ تُـــــــوُآلَي آلَلَيـــّــلَ خــــطآري
(عريان السيد خلف)
سرحان : رديت للبيت و انا كلام خنجر ابالي ، شنهي معكول حظي حتى ويا العشك ما راهم ؟
ثجيل خوالي و ضاحي عمامي ، هيج الله و يعلكني بيناتهم ، جا شنهي من حظ حظي .
منهي اعليها وكلبي تعلك بيها ، انا جاي احطن رجلي بكاع رمله، شنهي يعني ، لهنا و اكف و ما احبها بعد
جا هو بالكيف ، يو عكلي اقتنع ، الگلب شيقنعه
(اعبر النهر دامه ضيج )
عبارة لزكت بمخي ، ظليت امشي و افكر بيها ..
رديت للقصر ، دخلت غرفتي و كعدت، فتحت علي الباب امي من باب بيتها : دشيت خاطر اغشوفنك خاف متكشف لجن ما لكيتك بفريشك ، وين جنت ؟
- اعلى للشط
- بهالوكت ييمه و الدنيا ثلج
- يمه اسألنج سؤال ؟
- كول يمه
-انا اعرف هواي حالات نهوة ،لجن هم شفتي مرة فكت النهوة ، و شلون الواحد يكدر يفكها
- والله ييمه الأعرفنه ، تنشري بفلوس، تروح للمنهي و تشتريه بس صارت عدنا بكاع ثجيل نهو اعلى بت و شردت .
- و فكت ؟
- لا دوروهم و طلعت جويعدة بالناصرية ويا رجلها الماخذها، جتلوهم اثنينهم ، و ما دفنوها اعتبروها عار.
- هاي بتمن ؟
- بت نشمي اخو سلطان، ونعمة ابن سلطان الجان ناهي اعليها و جتلها
- و انسجن ؟
- لا ، ذاك هو جويعد ويا ابوه بديوانه.
تنهدت ، و احس صدري ضاك ، اندكت الباب ، صحت : تفضل
صبيحة : الريوك جاهز تفضلوا .
- جايين ، يلا يمه لفي شيلتج ، انا خل امرن اعلى الخاتون اشوفنها .
مشيت لحجرة الخاتون ماهي ، اكيد حضرت الريوك ، مشيت ، و كبل لا افوت ع الحجرة ، عاينت هدوة جويعدة و تركب.
همس : شسسسسس
دارت وجها ، و سليمة مدت راسها ، تفاجئت بوجود.سليمة غيرت موجة بسع : الخاتون وينها
- جدامك بالحجرة
- هاا مو مريت ما لكيتها ، فنشدت عنها ، ياله استعجلو
عاينت هدوة دنجت تضحك ، غيرت ملامحي و انا اعدل بشماغي على جتافي ، دشيت : صبحكم الله بالخير .
ردو وانا كعدت و فكري كله بهالموضوع، دشت وكعدت هي و انا جن هموم متلتله اعلى كلبي ، عيني حاير اشيلنها و اعاين يو النظرة تاذيها ؟
حجه الشيخة ملوك : ابو زناد انا حجيت ويا مرت كاطع اعلى بتها ، لزناد وناطرة حجايتك وياه و خطبتك
-و شنهي راي زناد
- الراي رايك بويه
- و حرمتك ؟
- الشرع حلل ٤
- اذا انت راغبها انا ما عدي مانع .
عاينت لهدوة، و درت للشيخ : و يو جيتك انا و كلت الك راغب بت يشيخ شنهو الراي .
- راية الله بيضة ، جا غير يو تفضها
ضحكت بدون رغبه و انا اكلله : الله كريم ، جريب ان شالله ..... درت للخاتون ... اذا كملتي يمه اريدنج بشغيلة احاجيج.
- ان شاءالله .
خلصت الريوك وتبعتها لغرفتها ، بست راسها : شلونج اليوم ؟
- الحمد لله ، شنو المحيرك وليدي احجيلي
ضحكت : احبنج من كون تفهميني بلا حجي
- ربيتك بين اديه و اعرفك ، كول ماما
كعدت يمها : يمه انا حبيت
- هدوة
- و شلون عرفتي
- مو لازم عيون حتى اعرف مرات الاحساس اقوى من الشوف
- بس احساس
- وقت اللي تمر هدية تتخربط اوضاعها و كلامكم و رموزكم توضحلي المعنى .
- بالضبط ، انا حابها
- لعب طيش ، لو حب زواج
- تعتقدين انا احبن طيش والعب اعلى الوادم.
- عاشكها ؟
- الا طايح اعلى وجهي
ضحكت : شمنتظر لعد متكول دا نزوجك و نفرح بيك .
-بس اكو شي
- شنو ؟
- هدية منهي اعليها من ال ثجيل .
- هااا
دخلت هدية ، شافت سرحان كاعد : اااا خاتون
حجت الخاتون : روحي ماما هناك لما اصيحلج تعالي .
- على امرج.
طلعت و صكت الباب و انا عيني وراها .
- البنت لطيفة و حبابة
- و النهوة
- اني ما اعرف تقاليدكم ، بس النهوة شنو حكمها
- النهوة هي عادة عشائرية يحق لأبن العم ينهي على بت عمه و يمنعها من الزواج سواء راغبها او لا يريدها او لا ، و اله الحق في حال خالفة النهوة و اتزوجت ان يكتلها و يكتل الأخذها .
- عزااا ، هاي تحجي صدك ؟
- اي بالله ، و حاير حيرة ما منها حيرة
- و ناوي تتراجع
- لو اكدر ؟ يمه انا عاشكها ، الليل هاذ اليمر اكعد اتخايلها و اسرح بيها و انطر ساعة شوفتها لحظة لحظة و من اشوفنها ارتاح و كلبي يحط عدها .
- يا ويل كلبك ، اني برأي استمر وياها
- و التالي ؟
- انت مو انسان عادي ، انت ابن شيخ ، ومستقبلك كدامك و ابوها صديقك ، لو كل واحد منكم دنك راسه لهاي العادات ما راح تنمحي وراح يصير القتل شريعة ، و النهوة حق .
- وشلون اواجه
- ما اعرف ، بس اذا انت حابها واجه، و لا ادنك لناس باطلين و تنطيهم بنية علكت امالها بيك و تشوف بعيونك الحب، هاي لو عفتها خوفا من عمامها شنو راح يصير بيها ؟
- ولو خذتها يكتلونها .
- متعرف الله شنو ضام ، جاري الأمور وشوف وين توصل ، و اغلب الناس تنشري بالفلوس لو رضوا انطي و اخذها ، بس لا تتنازل .
- انا مو خوف و مستعد اواجه العالم لجلها ، لجن الناهين ال ثجيل و ذول طالت طلايبهم ويانا ، ابوي يتأذى و حاكم و الكل وانا ما استحمل اذي انسان ، خايف هالموضوع يسبب كارثة.
- النهايات الله يحطها ، امشي و عوف باقي الامور الله يتولاها .
وبقت الخاتون تقنعه ان ما يستسلم كدام هاي العادات ، و جانت هي واثقة من سرحان ، بس جان عيبها ان هي ما داركة حجم خطورة الموضوع .
جانت تحجي وياها و مستهينه بهذه العادات و التقاليد ، متعرف هم متمسكين بيها اكثر من تمسكهم بأرواحهم .
طلع سرحان من الخاتون و صدره مملي امال ، و عزم هالعشك عشكه و ما يهده لحد كطع النفس .
طلع ، سأل صبيحة : راديون وين ؟
- بالحديقة ويا هدية
- ولج هدوة كلبي جمرة وروحي جاي تذبل كل يوم
- جا عليش ما يتكدم و يخطبج
- ياااا ، خاطر يجتلونه مو بس يرفضونه ، انا ورطت كلبي بواحد ما يتوب من فعايلة
- جا هو موش كالج انا راح اجوزن
- ابو الطبع ميجوز من طبعه ، احتاريت ولج احتاريت لا كادرة اطي روحي لواحد غيره و ارضى بقسمتي ولا اكدر انجمع وياه ، كليلي شلون بيه .
- والله يا ما اعرف شكللج
-جاي تاجر و خاطبني من ابوي ، و ابن عمي شاد حزامة رايدني و امي تلح اعليه خاطر ارضى بالتاجر .
- ما تريدين ، جا شنهي غصب خو موش غصب
- ما غاصبيني لجن ملحتهم زادت و كلما واحد منهم حجه يضيك صدري.
حجتها و اختنكت ، انقهرت اعليها كلش ، عليش هاي الصعوبات يو كل واحد يحب ينطونه اليحبه جان الوادم عاشت بخير ، تنهدت و انا اعاين اعليها بهظم ، شفت سرحان اجا للحديقة .
- اجا سرحان
بسع هكت اعلى عيونها تفرك بيهن و تمسح بأثار الكحل ، و تكلي : مدري شمالهن عيوني
وصل سرحان و انا اكللها : خافن من البرد ما تحملن
سرحان : ها ؟
راديون : هلا خوية ، مدري جن عيوني متحسسه ، انا اكومن
- اخذي راحتج خوية
يحجيها و هو يحك بلحيته ، دنك للكاع و رجع عاين عليه ، ردت امشي وراها ، همس : هدوة
جن كزبر جسمي وكت الهمس ، وكفت و عاينت اعليه باطراف عيوني و انا مدنجة : رايد احجي وياج جعدة موش بساع بساع .
- ما اكدر
- لا اتكدرين ، روحي و انا راح اطلبنج لخدمة امي ؤدحة و تنتقلين للبيت الثاني
- ولو شافني احد
- خلي الباكي علي ، امشي هسه و انا تابعج .
هزيت راسي ، و مشيت ، بس ردت اتعثر من كون اعرفنه جاي يعاين وراي ، مدري شكلي مرتب من وره يو مرعبل ، درت اعليه ، ابتسم .
جعل محد يتبسملي غيرك
يربي انا من اشوفن عيونه ، خيط نار ويوج بجسمي ما اكوم اسيطر اعلى كل كتر بيه.
مشيت للمطبخ ، صبيحة و امي واكفات ، و كلها تشتغل ، لهيت نفسي بأي شي ، اجا هو : الخاتون بغرفتها ؟
صبيحة : بحجرتها يولدي كول
- ان جان ما عدها شي ، خلي هدية تنتقل يم امي ، تشوف شمعتازة
كواغد : انا اروحن
هدية : لا لا ما عدي شي اروحن انا يمه
- روحي ياله و اذا اعتازيتي شي ، ودي عليّ
-خوش
طلعت للحديقة للبستان و حولت اعلى البيت ، دشيت لكيت امه كاعد : ها شلونج خالة
- هلا يبعد خالاتج كلهن ، كولي بنيتي .
- اجيت اعاوننج
- ما عدي شي ، تعاي كربي خلني اصبلج استكين جاي .
دش سرحان : هدوة اكو حطب بالبستان يم شجرة الزيتون ، جيبيهن و تعاي خاطر اوجهن هنا
ردحة : خافنهن اثكال عليها
- لا لا ، مو ثكال
هدية : هسه اجيبنهن .
طلعت و هو طلع وراي ، كض حصانه وركب ، و اشر براسه خاطر اتبعنه، شو هاذ نفض اللجام و صاح ديييييخ
و ركض .. ياااااع شنهي رايدي يركضني وراه
مشى و سبكني ليغاد ، و انا مشيت كومي ، من ابتعد خفف سرعته و كام يمشي مشي ، و انا وراه ، ليما وصلني لمكان بعيد كلش ، و جن مهجور ، كله نخل
وكفت ، حجه : كربي
- خاف احد يتفكدني
- لا تخافين
ظليت اعاين منا و منا :انا امي ما ترضى اطلع و يزلمة يو شافتني تذبحني و علي اخافن .
- ما راح اذيج و محد راح يشوف بس رايد احجي وياج جم جلمة ، هاذ المجان محد يجيله و تابع لكاع ابوي ، وكت النريد نحجي راح نلتكي هنا ، خوش .
- بس يو دروا
- انا رايدج يهدوة
ظليت اعاين بعيونه و كلبي يدك خوف عشك توتر ، ما اعرف شو كلهن التمن علي ، البرد يكتل و انا احتريت : انا اريد اروحن
-عليش هيج خايفة مني
- موش منك ، بس اخاف احد يشوفنا
- تخافين و انت وياي ؟
كمت ارجف لجن موش من برد ،
مدري منيش من عيونه مدري اخافن لا احد يشوفنه .. مدري و المدري حرت بيها .
كرب علي اكثر ، دكات كلبي كمت اهيسهن ابلعومي موش بصدري ، حجيت : انا من تعاين بعيوني هيج اتيهن، اكوم ما اهيس احد والله
- هذا العشك يهدوة ، انا عاشكج
دنجت ، و درت وراي اعاين خاف هكو احد ، حجه : انا رايدج اعلى سنة الله ورسوله
رديت عاينت بيه ، بانت البسمة اعلى خدودي لجن الساني ما ادري شماله جن تاه مثلي و ما يجمع الچلمات و يرد بيهن .
بس بسمتي اختفت لما تنهد و كال : لجن ادري اعمامج ناهين عليج
وچدت بعيونه : يعني ما يصير
- دامني عاشكج ما اعوفنج و ما اخلي جلمة الما يصير ادش قاموس عشكي وياج .
ضحكت و دنجيت ، حجه : اغدي فدوة انا لهالضحكة التتيه عكلي .
توترت حيل ، مدري شرت ، ما اعرف احجي ، ما طلع وياي غير : انا لزوم اردن
- دربنا طويل يهدوة ويهد الحيل .
- عليش ؟
- محد راح يرضى بهالزواجه انا اعرف ، لجن انا حطيتج بكلبي و بعكلي و رايدج و رايد تحطين ايدج بيدي و ما تهدينها ابد .
رفعت ايدي، ابتسم و هو يكضها : ما قصدت اكضن ايدج ، كصدي ما نخذل بعض .
ردت اسحب ايدي، ظل كاضها و عاصر اعلى ايدي و يعاين بعيوني و احسن دخت ، جن ارد اطيحن ، كمت اجر بيدي ، عافها و خله اديه وره ظهره و غير الموضوع
: ابالي سؤال ؟ ، انا يوم الرحت منا كتبت الج اريد اشوفنج بالبستان ، و ظليت ناطرج ساعات عليش ما اجيتي
- انا ما اعرف أقرا ، ومحتفظة بالكاغد لليوم لجم ما اعرف اقراه
- لا تحتفظين بيه ، خافن احد يشوفه وتتاذين
- ما يطيني كلبي اذبنها .
- عليش هيج الله حاط بيج كل هالترافة
- انا لزوم اردن
- انا احبنج يهدوة
عفته و درت وجهي ، وافرك على صدري ، كلبي موتني يدك حيل صدري كام يوجعني و دخت ، ما اعرف شجاوبنه ، مشيت وعكلي تايه ،درت ليه مبتسمه ، هو يعاين و يتبسم
دايره اعليه وامشي، التوت رجلي من الثول و عثرت ، تكرب : الله الله
- انا اروحن اروحن
- اي روحي بس وچدي دربج لا اطيحين .
مشيت و انا ما اهيس روحي ، كل كلام الكون ما يوصف الجاي احسنه ، طايرة ويا الهوى ، موش زلمة اخذ عكلي و كلبي و حيلي كله ، يريد يتزوجني ؟
انا اخذه ؟ و اصيرن ابيته ، و اعاينه كل يوم ، و اصيحن اعليه بلايا خوف ولا مستحى و ثول ،و اعيشن ويا قصة عشك يحجي بيها السلف.
جن ملكت الدنيا بهالشعور ، ما اهيس بروحي كلش يمتى وصلت القصر ما دريت ، دشيت و انا اسمي بين الناس و فاكدة عكلي ، كضتني امي : شمالج
- ها
- شمالج يمه
- لا هيج جنت افكر
- عاونتي ام سرحان ؟
- اي اي ، انا اروحن اشوفن الخاتون .
مشيت ورحت لحجرة راديون ، شاعله الراديو ومدنجه تستمع ، كربيت اعليها ، كعدت يمها ، دارتلي : شمالج
- اسرنج ؟
- كولي
-انا حجي بكلبي هواي و اريد احجي رايدة اصيح و اخلي العالم كله يدري باللي بكلبي ، اعلى كثر ما فرحانة
- عليش ؟
- انا احبن سرحان وهو كال رايد يطلبني من اهلي.
اتفاجئت ، كامت من مكانها ، عاينت برا ،ردت صكت الباب و طفت الراديون و كعدت مكابيلي : من يمتى انتم تحبون بعض
- ما اعرف ، من كبل اسبوعين كالي احبنج ، و اليوم كالي رايدج اعلى سنة الله ورسوله
- بس عمامج مو ناهين عليج
- اي
- وشلون ياخذج
- ما اعرف
- يويلج يمكرودة حظج مثل حظي .
- عليش
- خايبة انت موش دارية بزمانج، النهوة اعليها جال يو كسرتيها .
-بس انا حتى لو انجتل ما ارضى اعوفن سرحان ، انا كتله ما اهدن ايده.
ظلت تعاين بعيوني : الله يكتبلي و يكتبلج القسمة النريدها
- راديون انا كلبي ما كمت اهيسنه
ضحكت : انا هيج من اشوفن خنجر تضيع علومي، و الودي ساعة شوفته ما تخلص و اطول عمر لجن تمر جن هبت هوى امعصفة تبربد حيلج و تمش .
بس شفايدة عشكنا و احنا دروبنا طويلة ويمكنها مستحيلة
- بس الله يكدر
- و النعم بالله
- و دام امورنا بيد الله ، خلينا نفرح كلوبنا و نهد الكدر
ضحكت ، صحت شعلي الراديون شعلي
شعلته و ظلت تكلب و طلعت ( يا يمة انطيني الدربيل ) كضينا حجاباتنا و ظلينا نهوس و نصيح ( يايمة انطيني الدربيل لنظر حبي و اشوفه لابس عباة شغل الدير و تبرج ما بين اجتوفه )
دشت الشيخة ملوك : كصرن حس الغنا ، شنهي شعدنا كيولية
جفلنا بساع و ركضت راديون اطفي بالراديون .
..
سرحان : خايب كضني
خنجر : ويهد كون شمالك
- خايب طحت و عيب اندل دربي
- جا عيونك شمالهن
- زعم العشك عماهن
- جا شلون احنا بعنتر ابن شداد
ضحكت بصوت عالي : حايب احبنها و العباس احبنها
- و تالي هالعشك يسرحان ؟
- عوف التالي لله و كلي شسوي ، انا عزمت اعلى خطبتها و شراي لنهوتها و تصل ليوين ما تصل عوينت ابيهم.
- ابوك يوافك ؟
- اعرفنه ما راح يوافك لجن كلت الك عاشك البت و رايدها ، عليه و على اعدائي .
- العشك ماخذك يسرحان و مستسهل الامر لجن نكول الله كريم .
- اششش اجا ابوها ، اسكت ، هلا ابو ستار
- هلا سرحان شلونك يابه
- الحمد لله بخير ، شنهي هكو شي
- هسه اتصال اجاني من بغداد
- منين ؟
- من المعمل ، نعمان خابر و طلبني و ندهوني ، خابرت اعليه و خبرني
- بيش ؟
- حجي منير انطاك عمره
- ااااااااالى رحمة الله ، انا لله و انا اليه راجعون ، لا والله مو خوش خبر
- اي والله حيل انقهرت تعليه
- جا لزوم نروح لبغداد
- خبر الخاتون ، و انا راح اخبر العايلة ، خاطر نطلع غبشة
- ان شاءالله ان شاءالله .
حاكم : رديت و انا افكر بهالمسكينة ، والله مكرودة لا شافت ابوها ولا اتهنت وياه خاطر اخبرها بموته .
دشيت للبيت ، لكيتعا تشنغل : ها الله يساعدج
- هلا بيك
- جا وينهم ؟
- امك و جمرة طلعن ويا الحيوانات
ابتسم و هو يهز راسه : كصدج طلعن يرعن بالحلال
- اي ، و يسرى طلعت ورا امك
- وين ؟
- ما اعرف
- هاا ، باجر طالعين لبغداد
فزت و الفرحة لاحت عيونها : صدك ؟
- عليش فرحتي
- راح اشوف بغداد
- هههه حكج بويه لجن عدي الج خبر موش زين
- شنوه ؟
- ابوج سلم امانته
- المن ؟
- لله جا المن لبوي .
- يعني شنو مفهمت !
- خايبة يعني مات مات
ظلت تعاين بعيوني و الفرحة انباكت من وجهه : جا انا ردت اخفف الخبر وما اكلج ما لجن يا بويه انت ما تفهميني .
دشت جوا : امونه ، عزيزتي .
كعدت بالكاع و دنكت تبجي : عليش تبجين بويه هو راح لدار حقه وكلنا اعلى هالدرب هاذ
تعاين علي و ادموعها تهمل و ايدها اعلى حلكها : كفي دموعج يابه و البسي خاطر اخذج للقصر ، يم عمتج و باجر غبشة نطلع لبغداد .
كامت للحجرة تلبس و تبجي بهداي ، كسرت خاطري ، رغم هي ما شافت من ابوها شي لجن خبر موته اذاها ،
أيمان : معرف ليش من عرفت هو مات انقهرت هواية ، صح معشت وياه بس كافي جان يذكرني كل شهر بمصرف و ما ناسيني ، و لما قربت منيته انطاني حصة اعلى من حصتي وراد يعوض ، عشت وياه كم يوم وجنت اشوف الندم بعيونه كل ما اباوعه .
بدلت ملابسي .. بس اني من يوم السيد وصاني بالحرز ولبسته و ما تأذيت بعد ، كمت ما افاركه ابد ، بس واني ابجي و ابدل ، نسيته معلك بثوبي النزعته و بدلت و طلعت الحاكم ابجي .
ويا ما وصلت عتبة الباب و عثرت عثرة و انجبح اباب البيت ، صاح حاكم : الله الله شكالج بويه وچدي دربج
- اااااااخ رجلي
اباوع لرجلي الاظفر مال اصبعي الجبير كله مشلوع وكام ينزف دم بقوة : اااااااي كومي كومي ، غير اديري بالج ، كومي غسلي
- يوجعني
- بس غسلي انا هسه اشدنه الج
كمت للحمام اغسل بيه و يبز دم ، اجا حاكم جايب وصله ولف رجلي كلها، وسواها عنجوره هاكبرها برجلي
- لعد اشون البس النعال بعد ؟
ضحك : شلون سالفة عاويه هاي ربي
دنك مرة ثانية ونزع الوصلة و شك منها طرف و لفها مرة لخ .
دنطلع دخلت امه : ها وين
- ابوها توفى وماخذها لعمتها غاد تكعد وياها
- ياااااا البكا بعمرج يمه الله يرحمه .
هزيت راسي
- روحو يمه روحو مودعين بالله.
..
سرحان : بوجهي للقصر لاكيت ابوي و زناد
الشيخ : ها
سرحان : هلا بويه ، ما سمعت ؟
- شنهو ؟
- حجي منير اخو الخاتون توفى
- لااااااا ، انا لله و انا اليه راجعون ، يمتى ؟
- خابروا حاكم من المعمل خبروه ، توفى امس .
- كلت للخاتون ؟
- لا والله هل داش اخبرنها .
- خليها تتغدى و خبرها لا تكللها هسه و تنقهر خطية بويه.
زناد : زعم نأجل روحتنا لبيت كاطع اعلى الخطبة
الشيخ : لزوم تتاجل ليما يطلع الاربعين عيب من الخاتون نخطب و اخوها متوفي، ياله خل ندش نتغدا.
دشينا اعلى البيت ، كعدنا و نطرت ليما اجت الخاتون و هدية كايدتها ، هامت عيني اعلى عشكي و ظليت موچد بيها .
صبوا الغدا و هي جدامي تناوش الخاتون، خطرت ابالي ! حاكم راح يروح وياخذ مرته ويانا و اكيد كعدتهم اتصير ابيت الخاتون غاد ابغداد.
فكرة !!
نطرت ليما خلصنا الغدا و ابوي خبر الخاتون بالأمر ، دنجت الخاتون تبجي ، و انا كمت ليها اواسيها و كاض ايدها و اصبر عليها .
ملوك تهمس لزناد : جا وكته يموت ، ساعة الردنا نخطبلك بت كاطع ؟
راديون : يمه تراه موت ما يصير هيج تكولين
- جا انت حاطة راسج ويانا
الشيخ : موش وكتها يم زناد ، ما اطير الخطبة وليلة لا تعطلها يبوي ، كعدت البت عد اهلها موش زينة ، رد مريتك و حطها اعلى راس جهالها ولا تخلي احد يكودك
سرحان : عمه صبيحة انقلي الخاتون لغرفتها وانا جاي
كمت من مكاني ، لاكيت ام ستار : ام ستار باجر غبشه طالعين لبغداد ان شالله و حاكم و بت الحجي طالعين ويانا ، ياريت تكليلهن للبنات يحضرن غراض الخاتون
- امرك يوليدي
- و دام حاكم رايح ويانا ، خلي هدية ترافك الخاتون ، خافن الدرب يصعب اعلى صبيحة اريدنها تظل ويا امي بالبيت بغيابي ، هدية خفيفة شمايل و تعرف اداري الخاتون.
- ان شالله احجي ويا ابوها.
انفتحت باب القصر و دشت ايمان و الحارس يكول : حاكم بالباب
- دخله للديوان
دخل و انا بلغت الشيخ يطلع ليه و انا رحت للخاتون كعدت اواسي بيها ووصيت صبيحة على امي و كلت الها تظل تبات يمها ليلة الانا ماكو .
كواغد : خايبة دية اريدن انشدنج لجن حايرة
- كولي
- شو الخاتون ساعت العرفت اخوها مات ، لا ثغبت لا لطمت لا ناحت لا شكت زيجها ، جا دية بس اتبكبكت .
- يااا جا طبايع بغداد موش مثلنه يديه ، غاد يبجن شويون و يسكتن ، الا مثل طبايعنا مامش ، يو راحلنا عزيز ينهد حيلنا .
: ياااااع جا انا و يجيني علم واحد من خواني . يممممممممه غير اموتن
ولطمت ( اشضمتي يا كاع من اهلي اشضميتي) احو احو احو
- يا ديه لا تفاولين اعلى هلج شمالج
- يا اسم الله اعلى هل سور سور و النبايا حضور وبيرغ علي المنشور اليحفظهم ان شالله و يحميهم بجاه الحسين، نضيع عكبهم و علي .
- اي والله ديه، انا راحو هلي مبجر و ضعت ، الا ديه ما تنعيلنا شوية ، جنها الكلوب مكدره
- اي والله ديه اكعدي اكعدي ، خلينا ننعه شويونه
كعدن : بس اكلج ديه خافنه نفاول اعليهم بهالنعي
- جا انعي اعلى الحسين
- اي اي مت عيني اعلى الحسين البجي اعليه يطيب الكلوب ، كعدي ديه اكعدي
وتكابلن ينعن و يثغبن ، مرت ملوك : جا هنا تنعن ، تعالن غاد خل نكعد وياجن و انعن
- اي والله شيخة
والتمن كل البالقصر ، حتى ردحة ودن اعليها وسون الهن مجلس ونعن ويصيحن ، و اعلى نعاويهن الكل كلمة بيه توجع الكلب ،الخاتون كامت تبجي بقوة وياهن ، و ايمان تبجي
الشيخ كاعد ويا حاكم و سرحان و زناد يمه : شني هاذ الصوت
زناد : اسمع حس كواغد تنعى
سرحان : شكلهن نسوانه نصبلهن عزا
حاكم : جا مرتي و اعرفنها وعلي بكل عزا لطامه .
الشيخ : هههههه خليهن اعلى كيفهن يفرغن البكلوبهن ، احنا الزلم يو مو عيب جا هم نحنا اعلى الهموم الحاطة اعلى كلوبنا .
حاكم : الحمد لله اعلى كل حال ، هسه باجر انا اطلع بالعايلة و انتم تلحكونا غاد
سرحان : عليش ، سيارتي و سيارة ابوي نروح اثنينا ، عليش تروح توهدنهن بالكراجات .
- اوهدن منو، بس ايمان تروح وياي
سرحان : جا الخاتون ياهو الها ؟ و صبيحة خليتها يم الوالدة عكب طلعتي .
- كصدك اخذ هدوة وياي ؟
- ما دامك انت ابوها وياها ، خلها تمش، هدوة تعرف طبايع الخاتون .
درت لابوي لكيته مركز بيه و يعاين : يو عدك راي شيخنا
- الله كريم .
دنكت عيوني للكاع و انا امسح اعلى لحيتي ، ما جان المفروض احجي جدام الشيخ ، اعرفنه ابوي يفرزنها بساع ، لجن عشكي فاضحني و سابكني ، لزوم انتبه اعلى تصرفاتي اكثر.
رضى حاكم بته تروح ، و يا فرحتي و انا اتخايلها بظهر سيارتي و اعاينها .
....
هدية : ردينا للبيت المغرب ، و ايمان ويانه ، حجا ابوي
- هدوة بويه حضري غريضاتج باجر تمشين ويانا الصبح
- صكد بويه ، كول و علي
- اي جا بويه الخاتون ياهو الها ، وايمان ابوها الميت خافنها تتوهدن غاد وياهو النا.
كواغد : عفية بتي موش بس تصفنين و تسرحين يو تغنين و تنسين روحج ، عينج اعلى الخاتون ، صيري عصاتها وين ما تروح انت مرافكتها لا تفشليني
- لا يمه و علي ما افشلكم ، اروحن احضر غراضي .
احضر و انا يا كاع الما تلم فرحتي
كل ساعه اتخايل باجر شلون اشوفنه و شلون يظل ويانا ، هيج راح يحجي ، هيج راح يهمسلي، راح اظلن ايام وياه و اشوفنه هواي ، جا ياهو بكد فرحان الساعه .
أيمان : حاكم
- ها
- ما شايف الحرز مالتي ؟
- الصبح انا شفته بهدومج
- اي بس من بدلت ما اعرف وين نسيته
- خافنه مشكل بهدومج النزعتيهن
- ماكو ملكيته
- جا وين راح
- ما اعرف
اندكت الباب ، صاح حاكم : ياااهو ؟
يسرى : عمي تشرب جاي
- اي والله
طلع و يسرى تحط الجاي كبال ستار ، حجه حاكم ويكعد : عينك اعلى الدار عكبي ، بطل السرسرة و الدياحة و اثبت بالبيت .
- جا شنهي انظف بمجانهن؟
- الا تنظف ، اكلك عينك اعلى البيت
- اعلى طاري البيت بويه ، انا يوميه بالليل اهيس وادم تحجي
- شنهي وادم تحجي
- ما اعرف ، انا اغمض عيني ، و اسمع فروخ تصارخ و ناس يحجون ، ومرات من اروحن اكضي حاجه اسمع حس اجدام وراي ، اندار مامش احد ، راح اتسودن انتم تسمعون هيج يو بس انا ؟ .
حاكم :- هاي من كثر ما تديح و اجدامك ما تبطل فرفرة و اطرطر هالكمت تتخايل ، استجن واكعد و انت ما تتسودن .
ايمان : خاف طنطن ؟
كواغد : خايبة دحجي عدل انت ياله تكولينها ، مو ابوج اليوم مسلمها و اكول مكيريده و ما اريد اهفنج اعلى حلكج الفاهي ، خايبة دسكتييي.
ضحك حاكم : شمالج وياها ، جا صححيلها
- جا انت من تحجي ويا ابنك ، انهديت بيه رزايل من عبن كالك اهيس حس اجدام ، و من حجيت اعلى هاي المتيريسه انتفضت ، خايبين انتم الزلم ما تنحزرون و علي يو السالفة تصير بيها نساوين تصيرون نمنم .
ضحك و هو يهز راسه ، و اخذ الاستكان يشرب ، صدت عينه بهدية تلم بغريضاتها والفرحة شاكه حلكها و تحجي ويا روحها
حجه : ها بويه هدوة جن روحة بغداد نشنشت اخديداتج .
عاينت عليه و الضحكة تارسه وجهه : ياله انا اكومن انامن.
يسرى : و انا هم اجدامي تعبت من الشغل
كواغد : من الشغل يو من التخامة ، اليوم وين طالعة
- رحت لهلي عمه شفت امي و اجيت
- جا ما تحشمين احد و تكولين انا رايحه ؟ يو فالتوه وكت الطك ابالج تروحين
- محشومة عمه ابطن عيني يو رحت مرت الاخرى اكللج
ام حاكم : تكليلها الها ، جا شنهي انا هنا فزاعة خضرة
كواغد: جا غير جنتي ؟
- من كونها جنتج و لزوم تحترمج ، عليش ما تحترمين انت زعم من يوم الاخذتج لوليدي ولليوم ما حشمتيني و اخذتي رايي و كتيلي عمه انا طالعة و انت النهار كله تفرفرين
- يااااع انا كاغد كلب ابوي ، اخذ راي احد، كلاب الدنيا اي والله
- حووووووووويكم يمممممممه وينك
كواغد : انا رايحة انامن اخيرلي، و انت المتيريسه ، كومي شيلي الصينية ياله يو ناطرة اخدمنج ؟
ام حاكم : يعابيج العباس كووون
- يااااع تدعين اعليه
حاكم : اشتمهممممممممممم يو لا ؟
سكتن كلهن وفزت ايمان للصينية خاطر تشيلها
(تحذير : ان كنت ممن يخافون مشاهد الرعب مرر الصفحة لحين علامة ⛔✔
ايمان : طلعت حتى اودي الصينية ، الهوى بارد خليتها ، سمعت صوت هوى عالي مر من الباب ، دنكت دا احط الستكاين بالطاسة مال المي ، سمعت صوت احد ينفخ وراي .
فزيت من مكاني وطلعت بسرعة واشوف هناكه ورا البيت كأنو احد واكف ، زغر عيوني و اني اركز بس حتى اعرف منو هذا اللي واكف
فجأة من مكانه صار كبالي وصرخ بوجهي
مكدرت اصرخ ، اتربطت بمكاني و بس عيوني مفتوحات حيل الى ان وكعت .
✔⛔
حاكم نايم بحجرة كواغد ، و يسرى و ستار دخلو ينامون ، و ام حاكم انمطلت ، ويا مطلتها غفت بساع ، و هديه ملتهيه بروحها و ناسية الدنيا ومتمددة بفراشها و تضحك ويا روحها .
جمارة تتحجج بمكانها خاطر ما تنام كل ساعة مطلعت الها سالفة ، اجت لهدية : هديوة هديوة ، خيبه هيووووو ، خب هديووووووه
- هااااااااا وسم ، شرايدة
- كومي وياي للحمام
- شتريدني
- انحصرت
- جذابة انطمري
- لا و علي ما اجذب كومي
- ميلي عني
- هدية عليج الله .
- ولييييي
ايست من هدية كامت بنفسها فتحت الباب ورادت تطلع ، شافت ايمان طايحة بالكاع ، ركضت : بويه بويه
ودشت لحجرة امها : بويه ايمان ماتت بويه
- شنهي
- وعلي ماتت بويه كوم
فز حاكم من مكانه بساع ، طلع و شافها مجطوله بنص الحوش صرخ : ايمااااااااااااااااان ، ايماااان
فز الكل اعلى صرخت حاكم ، طلعوا .
شالها ووداها للحجرة ، كبل ليحطها ، فتحت عيونها : شمالج ؟
ظلت تعاين عليهم ودارت عينها مركزة على الباب
: شمالج بويه بس فهميني ؟
ما تحجي بس تعاين للباب ، اندار للباب مامش احد كلهم وياه بالغرفة : عليش تعاينين .
ظلت تعاينله بخوف : اني شفت
- اششش نامي نامي ، تعبانة
كواغد : جا هو كل ما اجا ينام يمي طلعلج واحد ، هالكلاوات ملينا منهن ترا
حاكم : كواااااغد
- ظل يمه كابلها حبيّب ، اروحن انامن اخيرلي من ملاعيبها .
اخذها هو و كال الهم : امشو نامو يله ، اندار الها و هو يكللها : الحرز مالج وينه من يوم اللبستيه خلصت من هالسالفة .
ايمان : اني راح اموت
- عليش تكولين هيج
ضحكت ، ارتفع ضحكها بصوت عالي ، ضل صافن بيها : ولج بويه انت صاحية ؟
ظلت تضحك بصوت عالي ، هز بيده و كام منها ، صرخت : عااااااااااااااااااا
- يا ستار يا ربي
رد ليها بساع و هو ينومها ، كام يقرأ المعوذات اعلى راسها ، كامت تبجي و تصرخ .
ام حاكم : اشمالها البت يمه
- غير يو اعرف شمالها
- عوفها وروح نام يم كواغد ، خاف تعبانة
اندار الها مدنكة تبجي : هسه هاي تضحك لو تبجي
- عوفها وروح نام يمه ، ابوها متوفي و البت متاذايه اعلى موت ابوها .
- لا يمه شو جنها موش طويبة خليني اظلن يمها، روحي نامي انت.
ظل صاحي الليل وياها الى ان هودت و نامت .
هدية : عيني ما غفيت ولا خذت نوم الليل كلة افكر اباجر و اتخايل باجر وشوفة سرحان ودايرة ظهري
، حسيت واحد واكف ورا ظهري ، كلت هاذ ابوي غمضت عيوني خاطر لا ينتبه انا كاعدة الهساعة ، هسه يكول شعدها تفكر و سهرانه ويكوم يشك و هو العنده بعبة سر يخاف من كلشي لا ينفضح .
لجن حسيت طال بوكفته ، كلت خاف يريد شي خلني اسوي روحي فزيت و اكله ها بويه ، جفلت من فراشي و انا ادير ظهري : هاا....
اتفاجئت مامش احد !
بس انا متأكدة احد جان وراي حتى سمعت حس نفس
مدري يمكن اتخايل .
درت وجهي ورديت افكر بسرحان ما غمضت عيني ليما طر الفجر ، كمت من فراشي اركض لبست القبوط و طلعت للشط ، لجن ما شفت سرحان
جا شنهي ما مشتاكلي من الصبح ناطر يشوفني يو رحنا ، جا بالله ما رضى ، يو انا ما رضيت ، هيج مطكن انا اروحن و ما اجا يشوفني .
ضجت حيل ترست ماي و كلت اردن بساع خاطر اكعد ابوي و نمش بسرعة ، يو ما شفته يوم اموتن .
اخذت الماي و انا امشي سريع و ما اهيس الا طربكة حصان وراي من بعيد جاي ، ليما وصل يمي خفف ، ضحكت
انداريت و شفته اعلى ظهر احصانه و متلفلف : كلت ما تجي
- شلون ما اجي لجن عيني ما خذت نوم الليل كله و انا افكر بشوفتج ، ما غفيت الا كبل الفجر و فزيت مفزوع كلت ما راح الكاج، الا بسببج تأخرت و علي
- جا انا شلي غرض
- يو ما ماخذة عكلي جا نمت مبجر و ما طلعت بهالفجر و البرد الازرك.
- جا انا هاي كعدتي من امس عيني ما نايمة تناطر شوفتك اذا انت نمتلك ساعة
وكف حصانه و فز ، ويا فزته فزيت من كرب علي الحصان و طاح الماي من متني و تبدى : لااا طاح الماي
- عوينة ابو اصله ، الا كليلي صدك انت تفكرين بيه مثلي و ما نايمة
- اي وعلي ، بس روح لا يشوفنه
- الماي اتبده امشي اترسي من جديدة
- يا ما بيه ، باردة و علي
- انا اترسلج امشييي عليج الحسين
رديت للجرف و هو ركب احصانه و لحكني ، من وصلت غاد ، ترس بمجاني و اطاني : جن مامش احد اليوم ، ولا وحيد اجا يترس
- خايبة الضوا بعده ما طالع يا مسودن هاذ يكعد بهالبرد يترس ، ينطرون الشمس تطلع خاطر تدفى شوي ياله يجون، الا احنا المسودنين مامش مثلنا
ضحكت : ههههههههههههههههه
ضل صافن بوجي اعلى ظحكتي العلت ، سكتت بساع : هدوة شعملتي بيه ، خذتي عكلي و كلبي و حيلي و خذتي حتى النوم من عيوني .
- يمتى تحجي ويا ابوي اعلى الخطبة
- جا سالفة حجي منير طلعت النا صفح ، لزوم انطر .
- بس انا وكتي يطول ، الساعة عدي سنة
- اااااااخ اعلى كلبي يو ينكك و يحجي ، جا عرفتي شصاير بحالي .
- انا امشي
- جا مترهي اليوم، راح اشبع بشوفج ، ولو شيشبعني منج غير بركع ابيض اعلى راسج و مومن يكلي صارت حلالك .
ابتسمت و انداريت امشي وهو رد ركب اعلى احصانه ويغني : يانبعة الريحان حني على الولهان ..حني على الولهان
- انت كلك لجن صوت ما اعرف
- شماله ؟
- تريد الصكد ؟
- اي ؟
- مو حلو
ضحك بصوت عالي : جا جامليني شويه شمالج ، يو منغرة اعليه بصوتج
- لا وعلي ان كونه مزنجر بس انا عدي احلى من صوت للبلبل عبن احبنه
- تحبين صوتي يو تحبيني
- الشمس جنها طلعت
- لا تلوفينها
- روح لا احد يشوفنا
- جا كطعتي كلبي
- لا اسم الله اعلى كلبك عليش تكول هيج
- احبنج يهدوة
دنجت و انا اكله : موش كثري
ضحك بصوت عالي و كض بلجام حصانه وركب ورفع رجليها ، الخيل كام يصهل و سرحان يضحك بكل علو صوته
سرحان : هديتها تمش و انا يو ما عيب من عكالي جا نزعته وهوست .
رديت للبيت ما اهيس روحي و الضحكة لوحيدها باركة بوجهي ، لاكاني الشيخ : شعدك طالع من الفجر ، و عليش هيج تضحك من الصبح .
- مامش ، لجن طلعت بحصاني خاطر اشمن هوا
- يا هوى هاذ بهالبرد الازرك ؟
- وان كون ، انا مرتاح
تنهدت و هو يكلي : الله يريح بالك دوم بويه.
دشيت مستعجل شلت الجنطة و خليتها برا ، ساعة يلا اجا حاكم و البنات وياها ، طكيت و انا انطر.
راد الشيخ يركب ، حجه حاكم : عنك شيخ انا اسوقن
- لا بويه اركب انت بسيارة سرحان و امش وياه ، و انا اخذ النساوين وياي ونمش
بلعت ريكي ساعة الحجة هيج، ردت انطك و اكولن عليج ، لجن اعرف راح يشك ، بالكوة كضيت روحي .
هدوة تعاين، سكتت ما حجيت : ياله عودينه اشوفنها غاد .
ركبت بسيارة ابوي هي و الخاتون ، و ايمان صعدت ويانا ورا و حاكم يمي بالصدر .
وطلعنا لبغداد ، دخلنا السيارات للبيت ، الخاتون كعدت و هدوة شابعة نوم
ندهه حاكم : هديوة بويه ، وصلنا كعدي ياله ، خب هديوة .
- ها هاااااااا
- شمالج بويه ؤ دكعدي فشلتينا
فكيت عيني وابوي ينده و سرحان يقفل بسيارته، بس النومة بعيني ويا ما دشينا البيت ، عاينت كرويته مثل البيت الشيخ ، حطيت راسي و انمطلت
ويا ما انمطلت نمت
ظل حاكم واكف برا ، حجه الشيخ : تعال ابو ستار انت موش غريب النسوان نسوانك و الخاتون عمة مرتك ، دش بويه العرض واحد
حاكم : الله يسلمك شيخ
اهاا هديوة بويه جا هم نمتي ، خب شمالج بويه شنهي ما نايمة
الخاتون : اذا نعسانه عوفوها خطية، سرحان ماما جيب غطا الها و انطيه لابوها
حاكم : هديوة بويه جا الشيخ و ابنه موجودين زحمة دكومي شنهي ممطوله كبالهم
يحجي و هو يذب قبوطه اعليها
- بويه بس انامن شوية و علي نعسانة
سرحان : خلها ابو ستار هاك هاذ غطا وخليها
- جا غير نروح ؟
الشيخ : ناكل النا الكيمة ياله نمش
حاكم : اكلك شيخ انا ابتلشت بهاي البت مدري شجرالها
- شمالها ؟
- امس لكيتها طايحة و الليل كله يا تضحك يا تبجي و تكلي اشوفن واحد
الخاتون : يااااا داده عزه ، خاف البنية بيها شي ؟
الشيخ : والله ما اعرف بس يظهر انها موش طويبة ، الوجه مصوفر كلش ، عودن ناخذها للطبيب ، بس احجولنا بالمواجيل ترانا طالع مناك بلايا ريوك
حاكم : اي هسه ايمان تكوم تسوي اكل ، ايمان خايبة شمالج وحدة نايمة و الاخرى صافنة دكومي
سرحان : شكلنا اجينا البغداد و لازم نتبغدد ونخدم النسوان، كف اردانك وكوم وياي خوية ......
