رواية سداد وبنت الفصل الواحد والعشرون بقلم الزهيريه
لو تنفع ابره واخيط جرحي
واگدر اروفه چان ما خليت
شامت يشوفه
لو تنفع ابره واخيط جرحي
واگدر اروفه چان ما خليت
شامت يشوفه
ألق/ مرات تكون الخيارات گدامنه ونگدر نطلع بأقل الخساير ونخلص من أي مشكله بس الطمع بني ادم يدمر كل شي لان الطمع قل ما جمع من اجتي خالة سداد وعرضت فلوس وهاي چانت غاية عمي نزار الفلوس
نزار/ أنتي خاف حچيتي شي گدامها ترى أحتمال دى سجل كلامچ وتنطي للشرطة
ألق/ لا عمو كل شي ما گلت بس گتلها اگول لعمي نزار
نزار/ اي عفيه خاف تجي مره ثانية اي شي تگلچ گوليلها يم عمي نزار
ألق/ وبقى عمي نزار يحسب خاف كذب كلامها وتريد توگعنه بمشكله بس بعد مكالمات عده أجراها ما اعرف ويه منو گلي جيبي رقم الموبايل مال هاي المره خالة الكردي
ألق/ انطيت الرقم لعمي ومن اتصل عليها ما قبل يحچي وياها بالموبايل وطلب منها تجي للبيتنا وبالليل لان هو موجود بس بالليل
وخالة سداد هم نفذت كلامه واجتي بالليل وياها ولد جماله فوگ مستوى الطبيعي سلموا ودخلوا وبس ما قبلوا يگعدون وانوب اضاءة البيت تعمي أكثر ما تخليك تشوف وبده الحديث عمي وياهم
نزار/ الله بالخير عليكم انتي اجيتي على ألق بغيابي وهي بعدها طفله ما فهمت على كلامچ شنو تردون احنه بينه وبينكم القانون
والولد الي كلش حلو واخذ گلبي بجماله عرف عن سردار/ الله بالخير عليك حجي احنه ما نريد محاكم وتبقى بنتكم بنيه واكيد أنت تخاف على سمعتها وامي اجت حتى تحلها ودي وكل طلباتكم أوامر بس بالمعقول
نزار/ شوف أبني اني الله ما رزقني بذريه بس رزق أخويه المنغولي هاي البنيه وربيتها بمي العين وما جرى واجى أبن اقربائك غرر بيها وسرق فلوسي ونهزم ولما دعوتي لرب العالمين انه ترجع سالمه چان ما رجعت
مومه/ خافوا ربكم الولد حتى ما يعرفها وهو بيا حال وعلى شنو يباوع عليها زوجته ايه من الجمال
وبده عمي يغرد نزار/ لمن عنده مره حلوه ليش لعب على بنتنه وشهر بيها گوموا طلعوا بره بيته المحاكم
سردار وهو يبوس راس عمي نزار وأعرف شنو يرطن وياها بالكردي/ عمي معليك بأمي الموضوع كله يمي والحچي ويايه شنو طلباتك أمرني
نزار/ عيني بسمار
سردار/ عمي أسمي سردار مو بسمار
نزار/ والله بعد عمك اسمك ثگيل وما أعرف اگوله المهم بعد عمك آول طلب يجي ياخذ البنيه على سنة الله ورسوله واريد المبلغ الي اخذه مني بعد مره ونص
سردار/ عمي گول يالله اولآ البنيه مستحيل ياخذها أبن خالتي وأعرفه أما بالنسبه عن المبلغ كلش چبير
نزار/ هذا أخر كلام عندي والله وياكم
ألق/ طبعًا طول ما عمي نزار يحچي ام سردار ترطن كردي شتگول ما نعرف وعمي قفل وياهم الحچي من گللهم الله وياكم وهمه طلعوا وعمي گبل أتصل ما اعرف بيمن وظليت اسنط عليه وسمعته
نزار/ لا شرطي الأول ياخذ البنيه لان اذا اخذت الفلوس هاي مره وحده وتنگطع بس من ياخذها صير يوميه هزي رطب يا نخلة واني جمعت عنه معلومات عنده خير من الله أخلي هذا الخير يفوتني
ألق/ وبعدها غلق الخط وطلع وهسه عرفت ليش عمي يريد سداد يزوجني وعلى ثاني يوم أتصل سردار وبلغ عمي آنه سداد رفض يزوجني والفلوس تعهد سردار المبلغ إلي يريده عمي موافق عليه ويدفعه
بس عمي نزار رفض وچان رفضه قاطع انه الا يزوجني سداد يله نتنازل عن القضيه غير هذا الكلام ما عنده
وتقريبًا ظلت المفاوضات ويه سداد وسردار 10 أيام وبعدها إتصل سردار وبلغ عمي انه سداد قبل يزوج ألق والعقد راح يتم والوكيل مال سداد هو سردار والفلوس جاهزه انه باچر الصبح يجي سردار واحنه نحضر السيد حتى يتم العقد
واجى عمي نزار بلغني انه اتحضر لان باچر عقد وياخذوني وياهم وصدگ الي گال شر البليه مايضحك بس أريد اعرف شحضر مثلًا شنو قابل أروح صالون واجيب كيك وعصير وأنظف الخرابه مالته ظليت ساكته ما حچيت شي وهو من اجيت يمه صار أسبوعين إني أدخل للحمام بس أسبح بمي لان عمي جايب بس چيس تاي ابو 500 دينار وهو يسبح بي اما ملابس عمي ريحتهن تسطر المطي لان ما يغسلهن يطب يسبح بتاي ويرجع على نفس الملابس واني مو احسن من عمي اني هم ما عندي غير بس الملابس الجابهن إلي اوزجان بأربيل هم أسبح بمي وأرجع البسهن
وعلى ثاني يوم عمي مگعدني من الفجر يگلي گومي سوي ريوگ خاف شويه ويجون على مود العقد اباوع الجو بعد بي ظلام بس شنو اگله سكتت رحت على هذا الي ما يسمى طباخ وسويت بس چاي وعنده جبن قبل بيوم باقي منه واكو صمونات يتيمات وگعد ياكل وهو نسف الأول والتالي وبعدين يگلي تريگي لاظلين جوعانه على اساس خايف عليه
وظلينه ننتظر شوكت يجي سردار وهو كل شويه يتصل على السيد واني ما أعرف وين لگه عمي هذا السيد الي گاعد يعقد من فجرية الله وأكيد هذا السيد من سوگ مريدي لان عمي نزار ما يعرف غير بس الناس الكلاك مثله وحدود ساعة 7 ونص إجى السيد وسردار ماكو ولساعة 8 ونص يله إجى وبده السيد بالعقد عمي وكيلي لكون اني قاصر وسردار وكيل سداد وبعد العقد صرت زوجة سداد
وطلعونه كلنه وبسيارة سردار وسيارته حديثة وبالأول نزل السيد على الشارع العام وبعدها طلع بينه على منطقه راقيه وهو عنده معطر كل شويه يوش بداخل السياره الظاهر ريحتنه اختنگ منها ونزل يم بيت راقي ما اعرف شنو آخذ وطلع ورجع اخذنه على المركز ودخلنه يم هذا آبو شوارب ويحاچي عمي نزار بعد ما عرف آنه احنه دى نتنازل عن حقنه وعن القضيه
فرقد/ حلو الأنسان يستخدم عقله بس غباء آنه الواحد يظن آنه ذكي والمقابيله غبي لان كل ذكي اكو الأذكى منه بس هيچ أحسن الك وهاي خوش تجارة
نزار/ ما عندي شي ويا طالما صلح غلطه وعقد على البنيه صار نسيبي بعد شريد منه
ألق/ بس الضابط الكلام كله ما دخل بدماغه بس ما اله حق بشي لأن احنه جايين نتنازل وبعد ما وقع عمي على التنازل طلعنه لباب المركز سلم سردار لعمي جنطه وگله/ هاي الفلوس كامله ما بيها اي نقص علينه بالعوض وعليك بالتلف
واخذني ويا سردار لسيارته وصعدني
نزار/ ما توصلني بدربك بعد عمك
سردار/ ليش ما عندك فلوس اخذلك تكسي منا وروح اني شعليه
ألق/ وسردار صعد شخط السيارة وطلع بينه ورجعنه على نفس البيت الي قبل شويه دخل سردار اله ونزل فتح الباب ونزلني ودخلني للبيت لان ما دخل السياره للگراج بس شنو امشي ومنبهره شلون بيت يجنن الحديقة وحدها عبالك لوحة مرسومه لمنظر طبيعي ودخلني من باب صالة وهاي تعجبت بيها اتجنن وصاح على امه الي من شافتني ظلت ترطن بالكردي بعصبيه
سردار ما اعرف شنو يجاوبها وگوه يله هدئت وباس راسها سردار وطلع
أما اني أتلفت مثل الهبله أتفرج على فخامة الصالة وواگفه يم تحفه بس تحركت رجلي نلطخت بالتحفه وگعت التحفه على الارضيه وسوت صوت يطرش الآذان وام سردار صارت ترطن بكل اللغات
سداد/ كل مكان يگدر يطبع بيه الأنسان بس كارثة من تدخل مكان بعيد عن عالمك بعد السماء عن الأرض يعني مستحيل اگدر اطبع باطباع ذوله الي بسجن وكلهم مجرمين وقتله ومهربين ومغتصبين گاعد على أعصابي وبوقتها كوجر متصل باوزجان وطالب منه الحضور لبغداد حتى يشهد شهادة حق ومن إجى اوزجان
واستدعاني الضابط فرقد ومن دخلت وشفت اوزجان گدامي صدگ من حرگت گلبي من إجى دى يبوسني ويسلم عليه گبل ضربته بوكس على وجهه وهو بعده ما مستوعب الصار ضربته مره ثانية گبل صار بينه كوجر
سداد/ الله لا يوفقك تدري شصار بيه ولك آني خسرت حياتي وسمعتي
اوزجان يحاچي فرقد/ سيدي ترى سداد ما يعرف البنيه والله اني من عندي انقهرت عليها لان شفتها گامت تبچي وصغيره وطلبت من سداد أنه يجيبها ويسلمها في بغداد لا اكثر ما أدري راح تورطه وياها واني أشهد بالمحكمه ويا
فرقد/ شوف كاكا اوزجان انه بعملنه اكبر غلط انه سوي خير خلي في بالك اي خير سوي مليون بالميه ينگلب عليك شر انت وين شفت آول مرة ألق
اوزجان/ اول مره بالملهى
فرقد/ عليك نور البنيه دى تحچي قبل ما تدخل لأربيل يعني هو مهزمه من أهلها لهذا شهادتك ما بيها أي فائده
فهمت كاكا اوزجان
سداد/ سيدي شنو كلها مقفله بوجهي شلون راح اطلع من هاي الورطه
فرقد/ لازم تحلها ودي وياهم لان اني الى هسه ما دى أرفع أوراق قضيتك آلى المحكمة مو بصالحك تنرفع محكمة مليون بالميه راح تنحكم وساعتها صير من أصحاب السوابق
سداد/ ظليت بموقف لا يحسد عليه وظل اوزجان يتوسل بيه ويتعذر هنا صدگ فقدت أعصابي وخصوصًا بالي يم بنتي يبرق گتله لاوزجان/ شوف وربك اذا ما صرفت وطلعتني من هاي المصيبه إلي ورطتني بيها ساعتها راح إعترف على نفسي انه اتاجر بالبنات بعد ما نخطفهن من أهلهن ونبيعهن بأربيل لدعاره وتجارة الأعضاء واگول احنه عصابه وويايه اوزجان صديقي
وعفتهم وطلعت ويه الشرطي ورجعت على الزنزانه بس شنو ارجف جسمي كله يختض من گد ما عصبت يعني الله يرضاها آلي يصير ويايه ورجعت بتفكيري على آريا شنو چانت سوي بالبيت وشنو اخذت وبدي صير عندي جناحات وأروح للبيت وأشوف عسى تكون تركت شي ورآها وبقيت بعد 3 ايام وصار أسبوع عليه وآني بالسجن بس شنو يوم بعد يوم أعصابي تنهار وصرت مثل المخبل أنوب صار واهس بيه على بنتي يبرق وكل مره اطلب من الضابط موبايلي وأتصل بي على خالتي واحچي ويه بنتي وبعدين اطلب من فرقد يروح على روجيدا يشوفها واحس نفسي گاعد على بركان وبيوم السابع اجى عليه
سردار / وبلغني انه عم ألق انه آلا أزوج ألق وأدفع المبلغ إلي يريده
سداد/ لو اموت وربك اموت وما أزوج وحده گح... شبيه شحال مو طلعتها من ملهى الى هاي الدرجه اني مگرن حتى اقبل بيها وبلغتهم انه يبلغون عمها إنه بينه المحاكم والله ما يقبل بالظلم واكيد راح يطلع برائتي
سردار/ خلاص هاي رغبتك بعد والله كريم ان شاء الله يظهر الحق
وراح سردار وقبل ما أرجع على زنزانتي طلبت أشوف فرقد وهو ما قصر قبل يشوفني
فرقد/ تفضل سداد تريد شي
سداد/ سيدي اني دماغي راح ينفجر شنو ممكن تكون أخذت اريا من البيت
فرقد/ اني هم مثلك سألت هذا السؤال شنو إلي خلاها تجازف هيچ مجازفه وتدخل البيت ما خلت إحتمال انت تكون بالبيت وتقتلها او سوي بيها شي آذن لازم يكون شي مهم وظليت اعصر بدماغي الى ان وصلت الى استنتاج وأريد أسالك سؤال واجابتك هي راح تحدد أكتمال الصوره بدماغي سؤالي شلون چانت تستخدم الموبايل مالتها يعني من النوع مخليه رمز سري وما تقبل واحد يلزم موبايلها لو عادي ذابته و مو بحاله وعدها جهاز واحد لو أثنين
سداد / لا أصلًا اريا بالبرامج الكترونيه ما تعرف حتى برامجها من فيس انستا واتساب غيرها كلها اني مسويها يعني حتى رمز ما تعرف تخلي لموبايلها وچان موبايلها بيد اطفالنه وحتى اني عادي اگلب بي وهي عدها جهاز واحد لا غير
فرقد/ عفيه هنا عرفت شنو دخلت اخذت من البيت سداد آريا دخلت آخذت الجهاز الثاني الي چانت تتواصل بي ويه ابو الدجاج وهذا اكبر دليل ضدها تدري لو انت لگيت هذا الموبايل چان گدرت ترفع قضية عليها بجمع بين الزوجين والخيانه الزوجية ولازم حتى تدفعلك تعويض مبلغ كلش چبير هسه نحلت وعرفنه شنو آخذت من البيت وتدري مو الا نلگه الموبايل هاي غبيه إذا ينعرف رقم الي چانت تستخدمه الا اسمط جدها السابع عشر هاي بعدها ما تعرف ويامن دى تلعب هاي دى تلعب ويه فرقد هسه اني دى ابحوش وراها وربك الا اوگعها وهسه شوف
سداد/ سيدي اخذته بعد وضاعت بنتي بعد
فرقد/ لا بعد ودائماً ما يوگع غير الشاطر والا ما تكون تركت وراها شي دليل ضدها وهسه شوف بس يحتاج وقت لا أكثر
سداد/ مرات الانسان إذا الشغله مو بي يكون بارد الأعصاب واني چنت احسد فرقد على أعصابه بس بعدين اذكر ان المصيبه مو مصيبته لهذا أعصابه بارده
ومر على دخولي لسجن 10 ايام واجى عليه الشرطي سلام وبلغني انه العقيد فرقد يريدني بمكتبه
واني چان كل يوم يمر عليه اليأس يملأ نفسي آنه خلاص بعد ما إطلع بس من وصلت لمكتب العقيد فرقد ودخلت لگيت سردار وكوجر موجودين
فرقد/ تفضل سداد ما بقى شي بس نكتب التقرير النهائي بقضيتك ونسلمك حاجاتك وتروح الله وياك
سداد/ وين اروح سيدي اليوم انرفع محكمة
فرقد/ لا خلاص راح تطلع لان تنازل نزار عم ألق عن القضيه
سداد/ هنا صدگ ما صدگت اذني شنو سمعت معقوله يتنازل وبهاي البساطه سالت فرقد شلون تنازل
فرقد/ ما أعرف هو قبل ساعه ونص إجى وتنازل عن القضيه وهسه راح تطلع لو شنو عجبتك الگعده يمنه
ظليت اباوع على كوجر وسردار أريد أجابه منهم بس ظلوا ساكتين وبعدها كمل التقرير ووقعت عليه واخذت موبايلي وهويتي وسلمت على فرقد ووعدني نظل على تواصل وطلعت واني گوه مسيطر على فرحتي وصعدت بسيارة سردار وكوجر بسيارته ورحت على بيت خالتي واول دخلتي للبيت شفت خالتي وحضنتني وظلت تبوس بيه من وجهي وعيوني واني بست أيدها وراسها وصاحت على زوجة سردار انه جيبلي يبرق ومن جابتها ضميت بنتي لصدري وظليت أبوس بيها
وسألتهم شلون عم ألق تنازل عن القضيه
جاوبتني خالتي / شلون تنازل غير حلبنه حلب يله تنازل
سداد/ يعني شنو أخذ المبلغ الي يريده
سردار/ اي اخذ المبلغ الي حدده وأكثر يله تنازل شلون قبل يتنازل لما قبض الملات
سداد وبعدنه دى نحچي وسمعت صوت شي نكسر بالمطبخ گلت / سردار روح شوف مرتك خطيه خاف نجرحت ما أدري شنو نكسر
مومه / لا خاله هاي مو زوجة سردار هاي الخدامه لا تخلي في بالك
