رواية كحل عرب الفصل الثالث والعشرون
( قربان الشياطين )
ضمني بليل ثاني و حل حلال الخل
شحيحة افراحنا و دكانها معزل
الضحچة نبوكها من الاه و الياويل
وصياد الهموم بدفتره يسجل
يا كلبي شبعد ومعكرات الكيف
زمن توزهن ما اظن بعد تحمل .
(عريان سيد خلف )
ضربني جف
كضيت خلكي و انا اتنهد قهر ، حجيت : هاي الخامسة يا شيخ
- وانعل سلفاك وكت التوكف بوجهي وتعصيني ولك
- انا ما رايد اعصي، انا عاشك البت ورايدها وما رايد شي اخر .
- هالبت ما تصيرلك .
- وانا اكلك تصيرلي، عن اذنك يشيخ
طلعت و هو يصيح وراي : سرحااااااان ، سرحاااااااااان
مشيت و ما رديت ، اخذت الفرس ، وكفني حميد : الشيخ معصب منك ، رد احجي وياه
- من رخصتك بويه حميد
- سرحان بويه عداك ناطريلك العثرة لا تطيهم الفرصة يا بويه ، رد و اتفك و يا الشيخ .
- انا موش زغير وكل ما حلاله يطكني جف ، انا ما كتله الشي اليستحق يهيني لجن الشيخ بكل مرة ما يوفر فرصة لأهانتي ، اودعناك بويه
حجيتها و انا احرك بالحصان ، جريته و صحت : ديييييييخ
وركضت بيه ، انا الكل عمري غريب وشفت اهلي كلهم بعيون هالسمرة ، عيوني الما شافت غيرها ولا سهرن لغير شوفها ، مستعد ادفع عمري، بس كون احصل اعليها .
مشيت وكعدت ع الشط و انا افادي موجر ضيم ...
واتضكر بجلماته ( انجوم الظهر اكربلك من بت حاكم )
تنهدت و فركت وجهي ..
وانا حيران بيش ادبر هالامر وشلون ارهمنا وابوي موش راضي، التجئ لخوالي يو اتوانه .
امش اطلبها من ابوها و اخلي ابوي وراي ؟
ما اكدر ..
رفض ابوي خلاني بزاوية ضيجة و ما اعرف شلون اطلع منها ، انا جنت اعرف هو ما راح يوافك و متأكد، بس هو موش موافك من كون منهي اعليها ازود مما هي بت ثجيل و محرمه اعليه.
(القصر )
دخل الشيخ الضحى وهو عصبي على غير عادته، صاح : ملوووووووووك ، ياااااا ملوك
فزت الشيخة الجانت جويعدة و هي تدهن بشعر راديون و تسرح بيه : يا ستار شماله ابوج ؟
- ما اعرف بس حسه جنه اعصاب .
كامت من حيلها و هي تلف بشيلتها و تهم تطلع تشوفه ، وصلت عده : امر يبو زناد
- رايدج بالديوان بسع
مشت وراه و هو نار كبرى وتمشي، دش و هي حايرة "شماله هيج اعصابه" وكف و تنهد و كال الها: بت حاكم منا وجاي ما اريدنها تخدم بالقصر
- عليش ؟
- سمعتي
- امرك لجن غير اعرف شنهي السالفة خاطر اطي حجة اعلى طردتها عيب نتفاشل وياهم
- اطي حجه من يمج و اطرديها من القصر يااااااله
- السبه سرحان ؟
- ملوك حد اعصابي واصل هامتي ، نفذي و فارجي عني .
حجاها وطلع معصب ..
تنهدت .. ضحكت : والله وجنيت اعلى رويحتك يسرحان .
سليمة سليييييييمة
- امرج شيخة
-بلغي كواغد بتها منا و جاي ما الها شغل بالقصر ، و شوفي احد من كرابتج التوثقين بيهن يجن و يحل مجانها خاطر نعرف نتصرف.
- طردتها شنهي اسبابها
- الوكت موش وكت مناشد يسليمة امشي و بعدين نفصل الأمور
-امرج
مشت سليمة الكواغد : ام ستار وينج
- ها يسليمة شرايدة
- انا ما رايدة شي لجن الشيخ تكول بتج منا وغاد ما الها شغل بالقصر ، يعني مطرودة
- عليش
- جا تسعلين الشيخة عليش؟ ، قصرهم واعلى كيفهم ياهو الينطرد و ياهو اليظل
- جا انا ما معترضة لجن غير اعرف شنهي الاسباب .
- انا بلغتج وما الي غرض بالباكي
هدية : عليش هيج يمه ؟
- شعاملة و هيج الوادم رايدة طرتج
- وعلي ما مسوية شي ، يمه انا ما غلطيت
كواغد : امشي نروح للشيخة ونفهم منها الصاير ، امشي
مشت كواغد وهدية لديوان : السموحة يشيخة لجن سمعيت من سليمة...... قاطعتها
- الكالته سليمة يتنفذ يم ستار
- جا عليش بتي تنطرد ؟
- انا اعزنج و يعز اعليه اطرد بنيتج وما ارضاها لجن يمكنها غلطانة بدوا الخاتون وهالشيخ معصب منها
هدية : لا وعلي انا ما غلطانه ، جاي اطيها دواها مضبوط
- جا من كونج ما غلطانه مامش غير الشيخ غلطان ، موش هيج يهدية ؟
كواغد : محشوم وبتي موش هاذ كصدها
- اخذي بنيتج يم ستار ، وانا من يهدأ الشيخ اعرف منه شنهي السالفة .
- امرج يم ازناد ، امشي
هدية : طلعنا وانا الهم جاتلني ، عليش طردوني ما غلطيت بشي والله ، شلون راح اشوفن سرحان بعد ، شلون ، بطلت يعني راح اكعد بالبيت و اسكت ما الي طلعة ، اموتن و علي يو ما شفته ، شلون بيه .
ايمان :
كل ما يصادف طلوع حاكم و ام حاكم من البيت يسرى تكوم تسوي شغلات غريبة ، تحجي ويا نفسها ، تحفر بالحيطان و مدري شتخط .
ما تحاول اركز بأمورها اخاف اشوفها بشوفات مرات تتحول سودة و اظل اتخيلها بالليل فأخاف، فكل ما اشوفها هشكل ابتعد و ما احاول اركز وياها.
... مثل كل مرة لما افضى و ما عندي شي ، احط ادوات التطريز واكعد اطرز على راحتي ، و يمر على بالي حاكم و حجاياته و كلماته الحلوة اليه ، اظل اتذكرهم و اضحك و اطرز .
واني مدنكة ، سمعت صوت .. مثل صوت البزونه اللي تعيط ، كزب جلدي من الصوت ، شلت راسي واني اباوع ، الباب مفتوح كدامي ..
سألت نفسي ( اكوم اشوف شكو ؟ )
وردفت جواب لروحي (لا شعلية خل اكعد واسكت معليه اخاف)
رجعت اطرز و رجع الصوت يعلى اكثر و اكثر ..
واني اخاف من صياح البزون ، عفت من ايدي وكمت بخوف ، الصوت يطلع من غرفة ستار .
الباب مفتوح بس اخاف اتقرب ..
اخذت نفس قوي و اني اردد (بسم الله الرحمن الرحيم )
مديت راسي و اني اباوع للغرفة .. ماكو شي !!
اني متاكدة الصوت جان يطلع منانه !
باوعت بالغرفة عدل، و درت للشباك ..
ابدا ماكو شي ، درت بلا اهتمام و اني الوم بنفسي لإن دا اتخيل هيج امور واخوف بروحي
ويا ما انداريت والكا يسرى واكفة بالباب و تباوع عليه مخزرة : شعدج بحجرتي ؟
- سمعت بيها صوت بزونه
تقربت، واني كلبي رجف ، ورجليه اخذت خطواتي بالتراجع ... من الخوف .
- شكثر عليج
- شنو؟
- صالج شكثر حامل
- ما اعرف ، يمكن ٤ اشهر
تتقرب واني اريد اوكف مدا اكدر .. الخوف تملكني منها
ردت اطلع ، لزمتني من ايدي : هاي شبيج عوفيني
- مدت ايدها على بطني و هي تتحسسها : شنو شصارلج دعوفينيييي
انفتح الباب الخارجي و صوت جمارة ، طلع ، عافتني بسرعة و هي تكلي : اكضنج بس بوكتج .
دخلت جمارة : هاااااه انا رديت
باوعنا الها، ضحكت الها يسرى و هي تكللها : يا هلا بجلجول شنهي اليوم اجيلنا جم وحيد جتلتي .
اخذت نفس و هي تمشي مني، طلعت من الغرفة دا اريد امشي لغرفتي، سمعت صوت هدية و هي تدخل و تكول لأمها : شنهي ما تكديني وعلي ما غلطيت بشي
كواغد : جا منيش طردوج الوادم ، انا وامشي و اوصي يمه هديوه وجدي بشغلج ، هدي راديون و الركص و الهوسة وياها ، ولا تسمعين ولا يمج
- جا انت ما كضيتي علي الا كعدي ويا راديون ، انا ما اهدن الخاتون الا تجي صبيحة بمجاني ياله اروحن لراديون ، شنهي يواي يو ضدي .
حجت وبجت ، تقربت يسرى و اني طلعت : ها شنو ؟
يسرى : شنهي شصاير ؟
كواغد : طردوها من الغصر
يسرى: ياااااع عليش
- جا انا عرف خاطر تسعليني، هالدايخة بهالطركاعة
ايمان : لويش دايخة واذا طردوها قابل دا تموت جوع ، عادي
كواغد : انت كضي السانج و فاركي عني موش طايكة اشوفن جهرتج.
سكتت ، كامت هدية من امها و مشت لغرفتي و سدتها ، وكواغد كاعدة و امددة رجليها و ايدها على خدها ، ويسرى كاعدة كبالها .
كمت منهم مشيت ورى هدية ، دخلت الها : شنو شصار ؟
حجت و هي تبجي : ما اعرف ، بس الجاتني بعد شلون ما اشوفن سرحان بعد
همست : اي مو دا تشوفي كل يوم الفجر
- موش مثل من اكعد و اكابلنه يوميه اعلى الريوك و الغدا و اوجد بوجهه ، كلبي غادي نار ، بس لو اعرف شنهي جرمي و طردوني، وعلي ما غلطانه بالدوه
همست: خاف عرفوا بعلاقتج ويا سرحان ؟
وكفت عن البجي و شالت راسها : تظنين هيج ؟
- ما اعرف بس يمكن
- دخيلك يا علي، جا يو درو اهلي يكطمون راسي والعباس.
- اششش مو اكيد ، انت اسكتي هسه ونشوف شنو يصير
- خافنهم صكد عرفوا، ولج انا سمعيت الشيخ معصب، و اعلى الريوك جان موش اعلى عوايده ، خافنه صكد ؟
- اهدي هسه و ادعي الله يعديها على خير ، ولا تبجين هواية حتى ليشكون .
- مسحت دموعها و هي تكولي : ولج خوفتيني.
- هسه منعرف شنو صاير ، انتظري، و بعدين حتى لو بطلتي من القصر انت دا تشوفي يومية ، و اذا كلش وردتي تلقين وياه ، ندبرها و اطلعين ، بس لتبجين عفية .
- جا انت خوفتيني
- خوفج اهون، هدية اني يسرى مدا ارتاح الها
- ولا انا من كون جم مرة تراقبني و تلحكني من اطلع للشط.
- اخاف لتعرف و ساكته
- بسرحان ؟
- اي ؟
- لا ما شايفته ، خب انت شمالج اليوم طيحتي كلبي ، كليلي شي يبردني موش يخوفني
ضحكت .. و هي ظلت اطكطك بأصابيعها خوف .
سمعت صوت جدتها دخلت ، كمنا اثنينا و طلعنا ، وكواغد تحجي لام حاكم السالفة وعمتي خلصتها ياع و ياع .
شويه و فات حاكم و هم كعدوا يسولفون الهم ، شاف هديه متضايقه ، حجه : ويطبهم احريشي عليش شايلين هم ، جا شنهي انكطع الهوى يو الماي علينا، وحتى انت يا كواغد بطلي
- ياااا عليش تكبرها
- انا و ابنج موجودين ونشتغل ، ما يحتاج انتن تشتغلن
- جا منين تشتغل من يوم الاخذت هالمتيريسه هاي و انت نسيت شي اسمه شغل
- شنهي تعايريني انت ؟
- انا اعيرك يو اكللك يو كعدنا منين ناكل و منين نشرب
- انا حجيت وي حجي نوري وراح اجر منه الكهوة مالته و اخلي ستار يكضها ، و شغل الكهوة خير من الله من كون الحجي تعب وما بيه حيل وكفت كهاوي و مقرر يأجرها .
- ونكعد و نسكت
ضحك : صبرج علي البيت الجاي ابني بصفة قطعة كاع مربعة يو الله وفقنا اخذها الج و اشتغلي بكاعج عليش بعد ظاله تشتغلين حدر ايد ذاك و هاذ
ضحكت : عليك العباس، و تصير عدي كاع و ازرع و احصد ، ينراد الها بخت
ام حاكم : جا موش بس الج
كواغد : كلنا بيها و نتعاون اعليها و نزرع ، و علي نسويها جنه ، و الا اسوي بيها حديقة لهديوة مثل حديقة راديون واترسنها ورد .
ضحكت هدية : صكد يمه ؟؟؟
- وعلي جا شنهي ، بت الشيخة اخير منج ، لخلي بنات الديرة يغارن منج .
حاكم : جا بنيتن كل هالاحلام اعلى جلمة وحدة ، كتلجن خلي الله يوفقنا والله كريم .
كواغد : عليش ننطر ؟ نبيع الحلال ونزود عليه وانت كاعد اعلى ورث ، عود خلي الها حصة بالكاع يو ما رضت المتيريسه ، نشترييها وعودينه الله يوفكنا
حاكم : الله كريم جا هي حجايه و انحجت خاطر لا اخليجن تتضايكن ، موش وكتها .
- لا والله انا اريدلي كاع .
- عوفي الكاع ابنج وينه
- شتدري وين يلفي
- يم جده ، جا انا غير يو اخلص من جده جان ارتاحيت ، انا ابو يوكف وياي يكلي بويه شتحتاج ما محتاج ، عايفني و مكابل جده
- جا الزود للربى موش للخلف ، و الرباه ابوي موش انت
- ظلي عايري انت ما منج غير المعايرة .
كام منها و هي دارت لام حاكم يحجن بسالفة الكاع، دخل لغرفتي، اني فرحت و كمت بسرعه رحت وراه لكيته امدد على الجرباية ، اشر للباب ورايه اقفلها
اندرت و سركيته .
كعدت يمه : شوكت يخلص البيت ؟
- توني جيت منهم ما ظل جم يوم ويخلص .
- ما اكدر بعد اتحمل هنانه
- جا شسوي ما تكليلي
- يسرى اني اخاف منها
- عليش ؟
- يومية اسمع صوت غريب من غرفتها كأنو صوت بزونه تعيط ، ومرات اشوف بوجهه شوفات تخوف
- شلون يعني ؟
- اول ما اجت للبيت لما اتزوجوا ، اني شفتها مرة شايلو وصلة مثل الوصلة مال العرس مالتنا اني وياك .
- غصدج البياض
- ما اعرف يمكن اي، بس هو مثله
- اي
- شفتها تدفن بيه ووياه عظم
عقد حواجبه : شني هاذ ؟
- ما اعرف وقتها خفت هواية لإن شفتها هي كالتلي ما اكو لاحد وبعدين ركضت ورايه و خوفتني
- اكلج خاف انت خايفة منها بلاش
- انت ليش دوم متصدكني ؟
- جا شنهي هي هم بيها طنطل ؟
- ليش ذيج المرة مو صارت تصرخ و تعيط المغرب
- البيت مسكون و انا اريدن اشيلن خاطر نخلص من هالسالفة .
- بس هي تخوف
- انا بانيلج بيت غاد معزول لا كواغد طكتني ولا يسرى خوفتني تصكين بابج وتكعدين، بس صبرج علي هاي الأيام ، خوش ؟
هزيت راسي و اني اتبسمله .
فتح اديه و اخذني بحضنه ، جر قراستي من راسي و فتح شعري يلعب بيها : اشتاكيتيلي يو لا ؟
- اني من تطلع شويه اضوج هواية ، اتمنى تبقى يمي كل الوقت .
- وانا يو فاركتج ساعة اشتاكلج ، موش بت تربعتي بكلبي و نمتي بيه.
ضحكت ، و هو يسرح بشعري بأصابيعة ، اندكت الباب كواغد تصيح : يعرسااااان الغدا انحط ، تجون يو نعزل الكم ليما تخلصون شغلكم
ضحك هو و كال : لمي شعرج بساع وفكيلها الباب.
لميت بسرعة و كمت للباب و هي بعدها ادك، فتحته
كواغد : شنهي ما صالي سويعة من اجيت و انعزلت ، جا كول خلني اكابلها احجي وياها .
كام من مكانه : توني راد من الشغل غاد بالبيت تعبان، خلص الغدا
طلع و هي تهز ايدها و تمشي، مشيت برا ، هديه تحضر بالغدا ويا يسرى، دنكت اساعدهم ، حجت يسرى : لا عليش يو ضاله حدر عمي ، عليش مكلفة روحج
هدية : وانت شلج غرض تحاسبينها تره هي مرت ابوي ، وانت مالج سلطة اعليها .
يسرى : صافة وياها يهديوة .
كواغد : خفن ايدجن ياله بلا تهذري .
شلنا الغدا بساع و مشينا
......
سرحان : دخلت البيت عكب الظهر ، كاعدين يصبون الجاي ، عاينت اعلى الخاتون هدوة موش يمها .
مشيت للمطبخ مامش ولا بحجرة الخاتون
فاتت صبيحة : عمه
- ها عمه
- جا ام ستار وينها ، ما هي ؟
- انطردت بتها من الشغل و الشيخة كالت الها اخذيها ليما اعرف شنهي السالفة .
- ليش شصاير
- والله علمي علمك لجن يكولون الشيخ طاردها
- هاااه، خوش .
مشيت لحجرتي ، اخذت منها الكتب الاقراها و الاحتاجهن و قفلت الحجرة و اخذت مفتاحها و مشيت للهول الكاعدين بيه ، دشيت الشيخ جن ما عايني .
دنجيت و حطيت المفاتيح جدامه و كتله : الحجرة موش بحاجتها انا، راح انتقل لبيتي الكاعدة بيه امي .
حجيت وردت امي، وكف و كال : سرحان
وكفت و انا اندارله و الكل يعاين : يو طلعت من القصر مالك دشه اله و انا موش ابوك.
- السموحة يشيخ جلمتك اعلى عكالي لجن القصر الانهان بيه كعدتي بيه مذله وهيهات ارضى الذلة
مشى و طلع عنهم و كال : اتبعني
مشيت وراه و انا صدري منلي غيض منهم، طلعنا القصر ، نزل للبستان : انت شنهي سالفتك يالولد يبني ، انا ابوك موش عدوك
- طردتك لبت حاكم بلا سبب اهانة الي
- انت جاي تحط ايدك بالنار سرحان
- انا راضي ورايدها
- وانا موش راضي ، و غصبا ما عليك تاخذ بشوري.
- حز زردومي يو طلعيت عن شورك انت ابوي و غصبا ما على شاربي امشي بشورك لجن السموحة بويه طردتك لليهوها كلبي اهانة، وانا ارويحتي موش حمل مذلة .
- شنهي ولك انطر ليما تكلب الغصر كو....ه
- ان جان ضنك بيه هيج ، خيبت ضني بضنونك بيه ، بويه بسك و العباس اختنكت .
حجيتها و عفت المكان و اخذ نفس بكل صدري خاطر اكدر اتحمل اضنونه و اهاناته و ظلمة " شنهي العملته خاطر استاهل كل هالجفا و الاهانه منه، ما كتله غير عاشك بت ، هالكثر عشكي صعب اعليه و هاني بيه"
نزلت للبستان امشي بلا راي
ذبيت الغراض مالاتي من ايدي وتوجهت للجول اعرف خنجر غاد يكعد ، وصلت غاد لكيت خنجر كاعد و البطل بيده .
- صار الشرب حتى بالنهار ؟
اندار : هلا سرحان ، تفضل
كربت وكعدت يمه و هو يكلي : الشوك تارسني ترس وروحي موش حاملتني و كلبي موجر
يحجي و انا كاعد بلا ما ارد اعليه عاين علي: شنهي شمالك ، صاير شي ؟
- فاتحت ابوي بخطبة بت حاكم
- ورفض مو ؟
هزيت راسي ، حجه : شجنت اتظن غير هيج ؟
- جنت اظنن ع الاقل يحترمني ، موش يطردها من القصر ، جا يو سألوا اعلها اعلى اسباب طردتها شنكللهم.
- تصرفه طبيعي
- شلون طبيعي و هو يكلي رايد تسوي البيت مك***
- حجاها بعصبية لا يظل ابالك .
- هدني من هاذ كله ، انا شلون اكدر اخطبها وابوي حتى موش راضي اشتري نهوتها
- اهدى هسه و خلي الشيخ يهدا و كلشي ينحل
- وشلون ؟
- ربك يلكالها الف حل ، تشرب ؟
- خليه الك انا حدي مخي طاير من همي موش من شرب.
عاينت ...
يو رحت لسلطان و حجيت تظن يساعدني.
- سلطان يكره ابوك ، لجن ما اعرف نواياه وياك
- هو كالي انا اكره اهلك لجن حبيتك، اعرف هو موش كفو الواحد يأمن بيه لجن انا عكلي متخربط و ما جاي اعرف بشنهي اتصرف
عاينت اعليه .. متجي راسه و يشرب و صافن ، هزيت ايدي ، و دنكت وانا افرك براسي ، اتذكرت جلمة ابوي لما يكلي يو صادفتك طلابة ويحتاج منك تتصرف ، انطر واخذ وكتك و بات بمصيبتك ليلة خاطر تفرزنها .
كلت انطر و اصبر اعلى كلبي و اشوفن شلون احلنها .
هدية : تغدينا و كعدنا اعلى صينة الجاي ويا جم سالفة منا و مناك اعلى كعدت ابوي، ليما نزلت الظهرية كلش ، كل واحد توسد و نامله ساعة .
حتى انا اخذتلي غفة .. كعدنا العصرية
كامت امي لحجرتها و طلعت كل غراضها و كامت تعزل النريدة و تذب الما تريده ، تكول : خاطر يو ردنا نشيل ما نتعب .. الغريضات موجهه بس يشيلونها
خلصنا عصريتنا وياها نلملم .. ليما صار المغرب و نزل الليل .. كاعدين نتعشى اندكت الباب
فزت جمارة خاطر تشوف ياهو، صاح جدي : هااااا الله يساعدهم .
كامت امي من العشا : هاذ حس ابوي ، هلا بويه هلا ، تفضل تفضل
طفرن يسرى و ايمان لحجرهن ، و حبوبتي ظلت تعدل بشيلتها و ابوي وكفت : هلا عمي هلا بيك زارتنا البركة
- شلونكم بويه
دش هو وجدتي ، رد ابوي : بخير الله يديمك ، تفضل تفضل ، وسادة لجدج بويه .
ركضت جمارة تجيب ليه ، عاين علي : هديوة جدو تعاي احبنج
كربت ليه و انا اسلم ، حجت امي : شنهي بويه هكو شي .
- لا والله يا بويه لجن تعشينا و كلت لمج كلبي مشتاك لكاغد رايد اشوفنها ، كلبي وله اعليج و اجيتج
- يساعة المباركة اعلى هالجية
كامت من مكانها و هي تحب راسه : الله يديمك يعزيز گلبي .
- شنهي شلونكم شحوالكم، ما خلص البيت
حاكم : لا ان شالله ما ظل شي ، جم يوم و ننتقل بيه
- بيه الخير ان شاءالله ، ما اوصيك اعلى كاغد كلبي يحويكم .
- شنهي عمي جديد عهد و توصيني ، ام بيتي هي.
ضحكت كواغد و هي تكله : الله يحفظك يبو ستار .
وظلينا نسولف وجدي يحجي ويا ابوي ، كدمناله الجاي ، شرب و كال : ياله انا اروحن
كاغد : جا توك جيت
- والله يا بويه تعيبان و اهيس جسمي بايد و اريدن انامن و اديه صار يومين ما ياخذن شغل ، نعم الله اعلى ستير الشايل عني و صاير عكازتي الا ابوج موش حيله الاولي يكاغد .
- عدك العافية بويه ما تشوف شر بجاه الأمير .
- الله يحفظكم بويه، يالله اودعناكم
حاكم : هلا بيك عمي ، جثير الهلا
وصلو للباب سلموا علي وردوا ، حجه ابوي : انا طالع شوية و اردن .
حجيتها و طلعت من البيت تمشيت على ال ثجيل من كون عدهم طلابة ويا ال منعم ورايديني اعلى كعدة باجر ، فكلت امرن خاطر اعرف الحجي كبل الكعدة .
وانا امش توني دشيت العجد ، و اشوف كاطع طلع من بيت سلطاز ، تفاجئت، شعده هاذ ابيت سلطان ؟
هو وجه من اذيج الناحية و مشى و انا مريت من هالناحية، وصلت ليهم سلمت ، حجه سلطان : جيت بوكتك
- ها شنهي .
- اظنن جعدت باجر يفصلونا
- جا حنون مدمي ابنهم و كاسر مخه
- انا راح اطلب منهم عطوة
- و عكبها
- انا حجيت وياهم من كون حنون ما عده بت ويو فصلونا شنطيهم .
- يبيع كاعه ويطي جا شلهن غرض بناتنا و يتحملن اثامه هالأغم ، وبالنهاية ابنهم موش ميت ويطلبونا بدم .
- الله كريم
....
هدية : تكولين باجر يجي يو لا ؟
ايمان : وليش ميجي ، هو يحبج
- خافنهم صكد عرفوا و يمنعونه
- ليش دا تسبقين الامور ، باجر اطلعي و شوفي الاجه كل تفكيراتنا ما الها معنى ، و اذا ما اجه
- معناها عرفوا
- اي
دخلت يسرى: صايرة اسرار بيناتجن وكعدات ما ينسمع حسها
- جا ما تكعدين ياهو الكاضج
كربت و كعدت بصفنا، احنا سكتنا، ضحكت : خلصت اسوالفجن
- انت شرايدة من عدنا .
اندارت لأيمان : بعد شكثر و تجيبين ؟.
ضحكت هدية : يظهر انج جاتلتج الحركة من كونها حامل و انت لا .
كامت من المكان بسرعة ، و كالت : كعدتجن مثلجن ما اريدنها
مشت و ايمان تسأل : عفية اني من اشوفها اخاف
- البيت وضعه يوم عن يوم يزيد ، انا كمت اخافن اطلع الحمام بليل ، يو اهيس احد ، يو اشوفن خيال ، يو اسمع وحيد يحجي بكفاي .
- اني جنت اشوفهم شوف ، جنت اموت من الخوف، بس هسه صرت ما اشوفهم ، بس مرات احس اكو طكطكه لو احد وراية، بس ما كمت اخاف.
- من كون ابوي كل سبت و خذاج للنجف هالتشافيتي و تحصنتي منهم
- اي واني مكمت اترك القرأن حتى لا ارجع اشوفهم .
ظلينا نحجي و نسولف انا وياها ليما رد ابوي، دش للحجرة ، كمت انا بساع ، كال : لا ظلي انا رايح انام بحجرة امج ، ظلي يم ايمان.
رديت كعدت و كملنا سوالف ، و هي اندمجت تسولفلي على حبوبتها غاد و شلون جانو نسوان خوالها يعاملوها .. وضاربه عكس ، واسولف وياها .
(تحذير: ممر ان كنت تخاف مشاهد الرعب لحين علامة⛔✔)
شوية و كمنا نهيس طكطة برا يم الشباك ، عاينت لأيمان : ياهو الوره البيت ؟
- ما اعرف، لا تنتبهين عفيه اخاف
-انسي ، كملي سالفتج
دا تريد تحجي ، اندك الشباك مال الحجرة ، جفلنا اثنينا : انفتحه يو لا ؟
- لا عفية اخاف
مسحت وجهي و عفته ، اندك مرة ثانية ، و سمعت حس ستار برا و هو يغني ، كمت كتلها : خل نخلي ستار هو اليشوف شكو
فتحت الباب و ستار ما هو ، انداريت الباب انسدت وراي بقوة : هاي شمالها ؟ جا كولي اطلعي اريد انامن موش هيج تضربها وراي
جريت الفراش مالي من النضدة و مديته و انجطلت ، توني جاي انسدح على ظهري والكا جدامي واحد ما اعرف شلون اوصفه .. ما شفت غير طول واسود و عيونه و اعوذ بالله منهن .
واكف عد رجليه ، اريد احرك اصبع مني ، لشتي كلها تربطت .. حتى شفافي ما جاي اكدر احركهن خاطر اتعوذ
عرك جسمي كله ، و كضني الرجيف ، بس اريد انطق ( يا الله) ما جاي اكعد، الحرارة مشت بجسمي كلها ، كوة كدرت احرك شفافي و تطلع مني كلمة (الله )
اختفى من جدامي ، و انفكيت ، كعدت اصرخ بعلو صوتي و افرك اعلى اعلى بلعومي جن انكطع الهوى عني واصرخ ( ااااااااااااااااه اااااااااااا)
فز ابوي اعلى صياحي و طلع بساع وحبوبتي فزت، و امي طلعت ، ويا ما ركض ليه و كضني ، صرخت ايمان من حجرتها .
⛔✔
عافني ابوي و حضنتني امي : هديوة يمه شمالج ، بتي يمه احجي وياي
اريد احجي جسمي كله يرجف و دموعي يجرن بقوة ، حضنتني امي و هي تقرا الحمد ، نطقت و انا اكللها : يمه اخافن يممممممه يمممممه
وبجيت حيل ، و ايمان تصرخ وتبجي، طلع ستار ويسرى وراه، و انا ابجي بحضن امي و ايمان اسمع ابوي يهدي بيها .
صرخت امي على ستار و هي تكله : شغل المشجل و حط الكاسيت مالت القرعان ، بساع اختك راح تتسودن
كمت ابجي بقوة .
اندكت الباب بقوة ، كلنا فزينا و جفلت حبوبتي : خايبين راح نتسودن و علي
جمارة فتحت الباب ، و دش ابن خالي صلاح و هو يصرخ : عمه ماااااااااات جدي ماااااااااات
كامت تمي من حيلها و هدني : شنهي ولك
- جدي ماااااات ، عممممممممممممممه
ويصرخ ... صرخت امي و لطمت اعلى وجه و هي تصرخ : ابوووووووي يمه ، ابوووووووي المسا جان عدي ولك لا تجذب اعلييييه
- عمه وعلي مات عمممممه
ستار : جديييييييييييي
نطقها و هو يصرخ و يطلع من البيت ، و ابوي يكله : خايب شنهي مات المسى جان جويعد هنا
و ابن خالي يصرخ ( ماااااات )
كمت ابجي و اصرخ اعلى اصريخ امي و لطمها ، حتى نسيت الطنطل من صدمتي اعلى جدي ، جرت عباتها امي ، وايمان جابت العباية ليه و كالت : خلي نمشي وياها
كضينا عبينا انا و حبوبتي و ايمان و كدنا امي و هي تصرخ بالشارع : ولك بوييييييييييه عفتني شلووووووووون بيه بوووووووويه
الناس طلعت كلها اعلى الصريخ و احنا نبجي وياها و نهدي بيها ، وصلنا بيت جدي و الوادم مكلوبه كلاب اعلى الصريخ .
حبوبتي نشمية و نسوان خوالي كلهن يتصارخن ، وكفت امي بالباب و صاحت : ولك بووووووووووووووووويه
( ااا يل جايب علمك هد حيلي ، يل جايب علمك هد حيلي )
طلعن النسوان كابلنها و هي تصرخ و تلطم اعلى راسها ، وكربت لحجرة جدي ، خوالي كلهم منومي اعلى جثة جدي و يصارخون
من كربت هي الزلم الغربة طلعو ، شكت ثوبها و هي تصرخ ( عفتني بوووووويه ليش عفتني بويييه ، ياهو البعد يكلي هلا بكاغد كلبي يو دشيت بويه ، بيمن افازع و احجي بزود بويه بيمن اتومس و اهوس عكبك ، كوووم من امچينك ورد لبنيتك بووووويه )
وحضنته حيل ونامت اعلى صدره و تصرخ من كل كلبها و هو امدد و احنا نصرخ وياها و نبجي بلا وعي
يريدون يجرونها و هي تصيح وتنعى اعلى صدرة و تكلهم : خلوني اوادع العزيز بهداي، خلوني اشمنه و اشبع منه هدوووووني .
صلاح : بسج خويه و علي ما يصلح ، لا تعذبينه خلنا نشيله .
جروها غصب عنها و طلعنها النسوان برا و هي وكفت تصرخ و النسوان مكابلاتها يلطمن وياها ، انطحنت اعلى حالتها و بجيها.
امي الكوية العمرها ما دنجت راس ذاك اليوم ما جانت رافعة راسها ، مدنجته بهضم و هي تصرخ (بويه )
كربت ليها اريدن ابس اهدي اعليها ، كضيتها و كلت الها : بهداي عليج العباس يمه .
حضنتها و كمت اصرخ وياها، و هي اخذتني بحضنها و تصرخ : ولج راح العزيز هديوة يمه ، انكسر ظهري ولج يمه .
شالو جدي و طلعوا ، هدتني و ظلت تصرخ وراه ، لجن جدتي ما حملت ، ساعت الطلعوه و هي تصرخ، خرت من طولها و طاحت ، تكابلن اعليها نسوان خوالي ، و امي بلا وعي تمشي وراهم جيف ماخذينه .
ركض خالي جبار لجدتي و شالها و طلع و لحكته مرته بهية ، ستار اخوي يصرخ و يبجي ، جن فاكد ابوه موش جده
كعدت ابجي بقوة، كعدت ايمان يمي و كاضه ايدي، حضنتني و تبجي وياي ، ظليت انحب بحضنها و ابجي .
كمنا انا وياها و طلعنا ، الديرة كلها التمت، حتى سرحان واكف ولاف شماغه على ركبته ومغطي بيه خشمه وواكف .
عيني سهت اعليه لجن هو جان ملتهي وياهم و يصيح : بهداي بهداي
وحطوا جثة جدي بسيارة حمل ولفوها ابطانية
ما فزيت غير اعلى حس ابوي و هو يكلي: امشي لامج ، استريها امشي .
عاينت اعليه يمسح بعيونه يبجي ، و يصيح عليه و عينه على امي، مشيت لمي و انا اغطي بيها بالعباية و هي طايحة بالكاع تشيل و تحط على راسها و تصرخ .
صاحن النسوان على ثوب لمي ، لبسوها فوك ثوبها و عدلوا شيلتها ، تحركت السيارة البيها جثة جدي ، كامت امي اعلى حيلها و تصرخ .
كرب اعليها خالي اعليوي و جرها لسيارة سرحان و صعدها وره، انا ابجي و اعاين امي غدت تراب و ما واعيه اعلى كل الحولها .
مديت ايدي اعاى شيلتي و انا احسن ادموعي، انتبهت بسرحان يعاين اعليه بالمشوافه العلى يسرته .
ظلت اعاينله و ابجي ، درت لستار و هو يصرخ و ابن خالي كاضة .
حجه ابوي : دهلن بويه الزلم التموا ، زحمة وكفتجن
- بويه و امي
- راحوا وياها اخوتها و انا هسه رايح وراها، دشن بويه الزلم منا ياله فوتن .
دخلنا جوا و هو كض ستار و باس راسه، حضنه ستار و هو يكله : جدي عزيز كلبي مات بويه
كام يبجي ابوي وياه ، وهو حاضنه : امش خلنا ناخذ تكسي و نتبعهم .
اخذ ستار ومشوا و انا ظليت كاضة الباب و اعاين و ابجي .. اعلى جدي و امي و اعلى الحال الاحنه بيه .
كضتني جمارة و حضنت بطني و تبجي و تكول : اريدن اروحن ويا امي
- ما اطول هسه اترد ، انطري
- امي تبجي حيل .
-ابوها مات حكها ، امشي ندش داخل
دخلنا و البيت فرغ تقريبا بس نسوان اخوالي الصغار يعزلن و يركضن من كون فاتحة و الناس بس تطلع الشمس تجبل .
كعديت انا و جمارة و بنات خالي وايمان ، نبجي .
جم ساعة و طر الفجر ، و جابو تابوت جدي ، دخلوا وخلو بوسط البيت، التموا عليه خوالي و امي و حبوبتي اصريخ و لطم
واحنه واكفين نبجي ، كربيت لمي ما احمل ونها ، اريدن اكضنها و هي تصرخ و تصيح ( شيحمل فراكك بويه ، اخذني وياااك بويه )
تكرب ابوي و هو يهدي بيها و يجر بعبايتها اعلى راسها و يحازل يوعيها ، وكف الشيخ مطر و كال : ياله بويه هم ياله نصل النجف و ندفن .. شيلوا التابوت
تكابلوا اعليه ولده و الكل يصيح ( لا اله الا الله )
ويشيعون بيه ، و انا و ايمان وخلود كاضين بأمي ، و نسوان كاضه بحبوبتي و يشيعون بيه حس الصريخ على الديرة .
طلعوه السلف و هم يشيعون بيه ، ليما وصلوا اعلى الشارع غاد ، حطو بسيارة حمل وكامو يشدون بيه ، وصعدوا خوالي كلهم وياه .
ابوي راح ويا الجنازة وسيارة الشيخ شال وياه الزلم الكبار، و سيارة جبيرة شالت نسوان وزلم . بس ما رضوا انا اروحن .
ردينا للبيت و احنا نبجي ، حجت مرت خالي : ما يصير هيج و ثيابجن مزكرشه لزوم تردن و اطلعن هدوم سود و تلبسن عيب وادم تجينا و انتن ملونات
انا اخذت ثوب من بت خالي ، لجن ايمان و يسرى ظلن ، حجت يسرى : نرد للبيت و نبدل ثيابنا
ايمان : اني اخاف
يسرى : بسج من هالعيارة و امشي وياي يله
جمارة : انا امشي وياج ، ياله
ايمان : لزمت ايد جمارة ورجعت و اني ابجي، اول مرة بحياتي اشوف هيج ناس يبجون بهالقوة ، الموقف كلش اثر بيه ناس تصرخ و ناس تلطم و ناس تشك بملابسها ، و صريخهم يقهر .
مكدرت اسكت و اني اتذكرهم امشي و دموعي تجري عليهم ، دخلنا للبيت ، رحت لغرفتي دورت كل ملابسي ما بيها ملابس سود
هم متعودين كل محرم يلبسون شهرين اسود فعدهم ملابس سود هواية ، اني ما عندي، طلعت ليسرى كلت الها ؛ اني من وين اجيب ملابس سود
- ما عدج ؟
- لا
- جا عيب و ان جانت ضرتج لزوم تلبسين اسود
- اعرف بس ما عندي .
- اطيج مني ؟
- يكفيلي ؟
- اي انا شويه ارهه منج لجن يكفي .
- تمام .
انطتني ثوب من عدها ، بس من لبسته مرتاحيت بيه ، كأنما خنكني ، ردت انزعه بس ما عندي غيره ولازم ارجع لبيت اهل كواغد .. عدهم عيب لو ما حضر الكل
كعدت على جربايتي و اني حايرة ، بس احس مبيه حيل اكوم بعد ، بجي و صياح و منايمة من البارحة ، كأنما نعست حيل .
كلت خلي اكسر نعاسي و انام شويه هم راحوا كلهم للدفن ، بين ميجون اني انام شويه و ارجع لبيتهم ، عادي ما اعتقد احد يحجي .
كمت اقنع بروحي حتى انام شويه ، لإن حيل نعست
غلبني النعاس ومحسيت بعدها بشي
تحذير✔⛔
فزيت على ايد انحطت بطني ،افتح عيوني و يسرى فاتحه شعرها و تازل عليه و مخزره بيه ، و تتنفس قوي و تنفخ ..
اريد اتحرك جسمي كله اتربط ، و هي وجهه ينطي سواد ، وما اعرف بشنو تحجي تتلفظ بكلمات غريبة ، الساني ما كام ينطق ، بطني صارت تلويني ، و الوجع تملكني من كل مكان .
وما بيه غير بس شاهكة و فاتحة عيوني و تجري دموع منها ، درت عيوني و اشوف وجوه ما جنت اعتقد اشوفها بعمري
⛔✔
الألم لزم رجليه و وكمت احس شي صار ينزف مني ، الى ان حسيت طلع من جسمي شي و انسحب مني .. انفك عني و هي صرخت
كمت و اني اصرخ بكل صوتي واشهك .. واشوف الدم كدامي ع السرير ......
