رواية سداد وبنت الفصل الرابع والعشرون بقلم الزهيريه
المعامله بالمثل تغنيك عن الف عتاب
ألق/ مرات تكون نيتنه حسنه بس المقابل يفهمها غلط وشگد ما تبرر ما يفيد يعني اني من چان بيدي موبايل سداد والله ما قصدي اخذه أبد وچنت اباوع عليه لان چان يدگ ويه حظي دخلت مومه وهاي مومه عبالك كاتله أبوها آول شي ما تفوت فرصه في سبيل تهيني وثاني شي متابعه أدق تفاصيلي وحتى من أنزل جوه وين ما أروح هي ورايه بس ما بيدي شي لازم أتحملها
وبيومها من چان الموبايل بيدي وشافته ظلت تولول وتگول هاي باگت الموبايل وشگد أحلف واگللها ما ماخذته بس ما يفيد واجتي هلات وانطيتها موبايل سداد وحلفت إلها بس هي ما جاوبتني آخذت الموبايل مني وراحت هي ومومه وعبرت ذيچ الليله واستحي أنزل جوه وعلى ثاني يوم الصبح متردده انزل لو ما إنزل الى ما ندگت الباب ودخلت هلات وگالت تعالي يريدچ سردار
گلت ويه نفسي أكيد راح يرزلني مثل امه تعال شلون راح افهمهم واذكرت بيبي الله يرحمها من چانت تگول الكردي من يگول ناو خلاص ولليوم ما فهمت شنو معنى كلمة ناو المهم نزلت للمطبخ وچان گاعد سردار يشرب چاي ومن شافني طلب من زوجته تعوفنه وحدنه
وألي طلب مني أتقرب منه صرت قريبه منه وبده كلامه
سردار/ شوفي الق أنتي تعرفين سداد لليوم ما يعرف إنتي زوجته واحنه ما نريده يعرف الى وقت احنه نشوفه مناسب ونبلغه اما هسه مستحيل نگول إله لإن يمر بمشاكل بس الله يعلم بيها وما ناقص هسه نبلغه إنه صرتي مرته وهو ما يعرف فهمتي ودائماً خلي مسافه بينچ وبينه
ألق/ أستاذ سردار يعني لشوكت راح ينضم عليه مصيره يعرف
سردار/ أعرف مصيره يعرف بس انجيبها إله بالتدريج وخلي في بالچ لا تخلين في عقلچ أفكار انه بيوم سداد راح يقبل بيچ كزوجه هاي عنده أستعداد ينحكم عليه بالاعدام وما يقبل بيچ واني اذا موضوع عليه أتمنى حتى الطلاگ يتم بدون ما يدري لهذا لا تخاطرين بنفسچ وتبلغي بالزواج فهمتي هذا شي اما الشي الثاني أنه راح تروحين ويه سداد على انه إنتي خدامه فهمتي وخاف يسألچ على اسمچ گولي أله غير اسمچ فهمتي وهسه آكلي وبعدها حضري روحچ حتى تروحين ويه سداد
وبعدها عافني وگام وآني ما أعرف أضحك ما ادري ابچي على حالي وبعدين اذكرت من يگلي حضري نفسچ قابل شحضر عندي ملابس عشر جنط وراح اگعد اصفط بيهن شو هو اني على گولة بيبيتي عصيتي وعبيتي والله اكبر وظليت أنتظر بالمطبخ على ما يجيني الفرج واجتي عليه يبرق وظلت يمي لما طلعنه آني وياها ورحنه على بيت سداد
ومر على وجودي يومين في بيت سداد بخلالها أنتبهت إنه سداد هواي متواضع واسلوبه حلو بشكل بس أحتمال لكون ما يعرف اني منو الله اليعلم يتعامل ويايه هيچ وبي طبيعه ما يحب يخلي فوارق طبقيه عكس خالته مومه وبهاي اليومين شكو شي يخص زوجته كله يگلي خلي بچياس زباله وانطاهن لزبال وبصراحة ملابسها كلها حلوه وجديدة ليش هيچ سوا عجبني تصرفه حتى واكو هواي ألبومات صور كلهن ذب عليهن نفط وحرگهن وبيوم الثالث بالليل جاب أشياء هواي وبصراحة اني هيچ اشياء ما شايفه أبد
سداد/ ورده أريد منچ ترتبين إلي جبته بالثلاجة وشوفي شنو سوين عشه اني جوعان
الق/ واني على اساس شيف شو اني اقوه شي احمس طماطه واگلي بتيته كلهن خليتهن بالثلاجة وظليت واگفه يمكن فوگ نص ساعة رجع إجى سداد باوع عليه مستغرب
سداد/ شنو ناويه تخلين العشه سحور شو كل شي ما مسويه مو گتلچ سوي عشه جوعان
ألق/ بصراحة أستاذ اكون صريحه وياك اني هذا الي جبته كلهن ما اعرفهن شلون يسوهن بعمري ما شايفه هيچ اشياء
علامات الاستغراب صدگ بينت على وجهه بس تلافى الوضع كله سداد/ ورده ليش ما شايفه هيچ اشياء شنو ابوچ ما چان يجيب الكم معلبات شنو تاكلون
الق/ ابويه وأمي منغوليين وامي من جابت أخويه ذبوها بيت جدي على أهلها
سداد/ واخوچ وين
الق/ لا تشغل بالك بيه أستاذ حمد لله على كل حال
واجتي يمه يبرق وهو شالها ويشمر بيها ليفوگ ويبوس بيها وبعدها گعدها على الكاونتر والتفت عليه
سداد/ هسه اشوفچ شلون سوين عشه من المعلبات واني عازمچ على اكله من أيدي
ألق/ وشلون يثرم بصل وطماطه وفلفل وبعدين طلع علبه وهو يضحك ويگلي هاي مارتديلا وكمل العشه وگلي جيبي وتعالي واخذ بنته وهو يدغدغ بيها ويبوس
وبيني وبين نفسي اگول ربي چان شيصير لو مخليني بعائله نفر بيها مثل سداد ومن خليت الاكل ردت أروح للمطبخ
سداد/ تعالي اكلي ويانه
الق/ خلصوا وبعدين آكل بالمطبخ
سداد/ تعالي بابا اكلي ليش تاكلين وحدچ ماكو داعي كلنه بشر وباچر كلنه بنفس الحفره ندفن ماكو داعي لتكبر
ألق/ اذكرت خالته چانت اذا الزم الثلاجة تجي تمسح بأب الثلاجة بمناديل رطبه ام العطر وگعدت وياهم بس طول الآكل اني كل شويه اباوع بوجهه في حين هو ما باوع عليه ابد ولا رفع عينه من الآكل بس صرت أحب اباوع بوجه نظراته تسحر وحتى من يبتسم على الخفيف بس ابتسامته تدخل الگلب وظلت حسره بگلبي اريد اعرف عنده بعد أطفال لو بس يبرق وسألته / أستاذ أنت عندك بس يبرق الله يحفظها الك
بس تفاجأت بي من نزلوا دموعه
سداد/ لا چانوا عندي 3 اطفال
الق/ سيدي لعد وينهم شو ما شفت بس يبرق
سداد/ واحد جوه التراب أبني أيليا آما بنتي روجيدا مريضه ادعيلها ربي يشفيها
الق/ ردت أسال على زوجته بس هو سد الموضوع من گام وگال الحمد لله والشكر ربي زيد وبارك
هنا فهمت هو ما يريد يحچي وبذيچ الليله أريد أنام ما اگدر افكر بس بسداد أريد ابعده من تفكيري ما گدرت أبد ونمت بساعه متأخره وبعدها حسيت على جرس ألباب الخارجي يدگ مستمر گوه گمت احس عظامي متكسره اباوع على الساعه چانت وحده وربع الظهر تفاجأت معقوله أني نمت الى هذا الوقت
گمت واني اتملل وطلعت للباب وچانت أكو وحده طبعًا بس شفتها عرفتها أخت مومه لآن الشبه بينها وبين مومه هواي واني من دفعتني ودخلت ما اعترضتها لان مبينه صلة القرابه ويه مومه من شبه الشكل
وهي تمشي بالگراج وتگلي/ انت منو
الق/ آني عامله تنظيف بالبيت
ودخلت للمطبخ وهي تسأل وتسحل بجنطه سفر/ سداد وينها يبرق وينه
ألق/ أنتبهت عليها بنيه تخاطبها كأنه ولد والولد تخاطبه كأنه بنيه
وآني عفتها بالمطبخ صعدت فوگ على سداد وچان غاط بنوم عميق وبنته يبرق بحضنه ندهت عليه أكثر من مره ما گعد ومن شفته ما يگعد خليت ايدي على كتفه وادغ بي واصيح بسمه وهو گبل گعد وفتح عيونه على وسعهن
سداد/ شوفي لچ نوبه ثانيه اياچ تخلين ايدچ عليه فهمتي
سداد/ مرات أكو مواقف تگول ربي الموت ولا انتظاره وأني كل يوم يمر عليه أحس روحي تنازع يعني اليوم الي يفوت يقربني من موعد فراق بنتي يبرق ولازم أسلمها لأمها بالمحكمه ومن اتصل بيه فرقد وگلي عرفت آسم ابو الدجاج طرت من الفرح يعني معقوله الحظ راح ينصفني
آما شلون عرف فرقد إسمه ألي فهمته انه فرقد من انطيته الرقم مال المحامي مالتها متصل عليه وطالب منه يبلغ آريا إنه لازم تروح عليه للمركز وهي من عرفت فرقد يريدها تجي عليه مرجعه جواب بيد المحامي أنه ترفض تقابل الضابط فرقد وإنه تشوفه بالمحكمه وهو يدلي بشهادته
بس فرقد ما ساكت عنها وراجع مبلغ المحامي انه اذا متجي للمركز راح تندم هي وأبو الدجاج المحامي ما فهم شنو معنى ابو الدجاج بس مبلغها وهي من سامعه التهديد موافقه تجي للمركز بس بشرط يجي وياها المحامي مالتها بس فرقد راجع جاوبه الها انه يجي المحامي مالتها يجي وياها بس ممنوع يدخل مكتبه أثناء كلامه وياها وهي موافقه وثاني يوم من ساعه 9 الصبح يمه بالمركز بس فرقد بي طبيعه يلعب على عامل الوقت يعني يتلف اعصاب الشخص بالانتظار وهو مخليها تنتظر الى ساعه 11 ونص يله مدخلها لمكتبه
فرقد/ آول شي إنتي غلطتي غلطة عمرچ من طلبتي شهادتي ببساطه اذا أشهد انه سداد طلگچ طلاگ تعسفي بما إنه انتي جاهلة بالقانون الطلاگ التعسفي انه تكونين كل شي ما مسويه گاعده بأمانة الله وطلگچ هذا معناها الطلاگ التعسفي مو إنتي مطينه الدنيا كلها وخنتي وجمعتي بين رجلين وتردين حقوقچ كامله منه والصار كله گدامي بما إنه طلبتي شهادتي اني ما أشهد وياچ لو تموتين
آريا/ حرام عليك هاي شهادة حق لازم تحچي ضميرك
فرقد/ هههههاي صدگ ضحكتيني يا ضمير يا حق بابا انتي ضميرچ إبليس يوميه يرش عليه مي ورد ويشعل درزن اعواد بخور بابا انتي عليمن دى تلعبين بابا اني فرقد كفيلچ الله غالب النغل 6 صفر اذا تردين الحق عادي أشهد وياچ بس أذكر الواقعه بما أنزلت إنه انتي خنتي زوجچ وعلى فراشه وزوجتي متعه من واحد ثاني واني ما اعرف منو گلچ زواج المتعه زواج عيني زواج المتعه گواده تحت ستار الدين واني مسوؤل على كلامي
وساعتها راح يجروچ للمحكمه انتي وأحمد
آريا/ أحمد منو
فرقد/ صاحبچ أبو الدجاج لو نسيتي اذا نسيتي هاي اني دى اذكرچ وعلى الباغي تدور الدوائر
آريا/ بس هو إسمه يسر
فرقد/ الله لا يسر عليه يعني هسه احنه مختلفين على إسمه ومو مهم الصار على العموم تردين اشهد وياچ بس اذكر كل الي گلتيه ما تردين ورحي سقطي دعوة الطلاگ التعسفي وبعد بقت يمچ إنتي تختارين وهسه روحي ما عندي وقت أضيعه وياچ
ومن طالعه أتصل عليه فرقد ورحت عليه
سداد/ تصور سيدي شنو راح سوي
فرقد/ اكيد سقط الدعوه لان عدها محامي اكيد راح يگلها اذا ثبتت عليچ تهمة الخيانه حتى حضانة الطفله راح تسقط من عندچ لهذا راح أشغل عقلها بفاينه ثانيه حتى تحصل منك فلوس لا أكثر لآن ما معقوله كاتله نفسها على 150 الف الي راح تنطيها نفقة إلها
سداد/ ليش سيدي وهي هم نفقه انطيها
فرقد/ شوف أنت أرفع عليها قضية بيت الطاعه اذا رفضت ترجع وياك تعتبر ناشز وكل حق ما إلها وسبق ان گتلك النفقه مال البنيه ما تسوه حتى تبقي البنيه يمها لهذا راح تعوف البنيه الك اما اذا رجعت وياك لبيت الطاعه راح تخسر حتى نفقة البنيه لإن راح ترجع وياك وتسقط قضية النفقة وما أظنها مخبله وترجع وياك
وأتفقت ويا أروح ثاني يوم على السوگ حتى أشوف منو يسر إلي خانتني ويا وهذا أصعب صراع نفسي عشته صعبه بعد ما قدمت كل شي لزوجتي في سبيل إسعادها وهي خانتي وعلى ثاني يوم طلعت لسوگ دخلت وأول ما سألت عليه يم واحد يبيع خضره جوابه انه ما يعرفه وآني أمشي بالسوگ اگول يمكن هاي كذابه وهذا مو إسمه
ووگفت يم واحد يبيع دجاج وسألته على يسر وگتله هم يبيع دجاج
جوابه آنه هذا عزل محله بالبداية شعرت بخيبة آمل لكن خطرت على بالي فكره گلت ويه نفسي عسى وعلى تنجح
سداد/ أخويه بلا زحمه اني چنت ماخذ منه دجاج لمناسبه عدنه وأني تمرضت وهو ما يعرف بيتي وين وظلن الفلوس مالته بذمتي اذا ما صير زحمه عليك انطيني رقمه اريد أتصل بي وشوف شلون يجيني او اروحله اريده ياخذ حقه
وبالفعل الولد ما گال لا انطاني رقمه ومن رجعت للبيت وأتواصل ويا وبلغته انه الرقم صار عندي ورسلته اله وبقيت أنتظر رد فرقد الي
وبعدها أتصلت بسحر وبلغتها انه ترفع دعوة بيت الطاعة على زوجتي
سحر/ سداد بيت الطاعة بي شروط لازم بيت وحدك وبيت مأثث
سداد/ هي من آول بيتها وحدها وأرقى الأثاث بي كل شي متوفر الها
وسحر رفعت قضية بيت الطاعه وأني خلاص بعد إنتهى الاسبوع وچان لازم أخذ يبرق للمحكمه وچان أصعب موقف والله شگد چنت حريص عليها بس خلاص لازم بعد انطيها لأمها وگعدت من الصبح وجهزتها امي وأخذتها ورحت للمحكمه وهي وصلت ويه المحامي مالتها واني شايل يبرق وابوس بيها الى ما صاحوا اسمائنه ودخلنه يم القاضي وطلب مني انه أسلمها لأمها وأني سلمت وقعت وهي استلمت مني ووقعت وطلعنه من مكتب القاضي ويبرق امها شايلتها
تخبلت يبرق ظلت ترافس بيدها وتبچي وتريد تجي عليه ورحت عليها دى آخذها منها بس ما قبلت
آريا/ والله اله اخلي شوفت يبرق حسره بگلبك بعد تموت وما أشوفها
سداد/ اخذت يبرق وهي مفرفحه بچي وراحت رجعت للبيت دموعي ما وگفت أبد وبس دخلت لصالة چانت امي گاعدة خليت راسي على رجلها واگلها/ يمه اخذت مني يبرق والله يمه دى أموت باليوم 1000 مره واني صفيت من 3 أطفال ماكو واحد منهم
امي/ الله ينتقم منك آريا اخذ البنيه وعافك بحسرة گلب
سداد/وآني من لوعة گلبي إتصلت بفرقد وطلبت منه انه يرجع يستدعي آريا ومن يحچي وياها يسجل كلامها حتى اقدمه ضدها بالمحكمة بتهمة الخيانة
فرقد/ اولآ المحكمه ما تعتمد على آي تسجيل خارجي يعني هي ما مرفوعه عليها قضية خيانه بصفتنه شنو نسجل إلها واني اي تسجيل يطلع من يمي راح يضرني لان هذا كله يعتبر مخالف لقانون شغلي بس من نطلع الخيانه عن طريق أرقامهم ساعتها يسقط عنها الحضانه وبدليل قاطع انه كل شي ما سوينه بس مجرد ننطي أرقامهم أثناء الدعوه لا اكثر والدوله بعد هي تحير احنه معلينه وقابل شركة الاتصالات ماخذه رشوه من عدنه
سداد/ شكرته على تعبه ويايه
وهو هم ما قصر ومر يومين من انطيت الرقم لفرقد بس فاجئني من گلي / ما أعرف شنو اگلك الرقم الي نطيته الي
