رواية عيون المها الفصل الرابع والعشرون بقلم ظل الياسمين
علاقتك بالله هي العلاقة الوحيده التي لن تكسر قلبك ❤️ابدا...
🌷🌷🌷🌷🌷🌷🌷🌷
اجه عمو اسماعيل زوج امي ورحت وياه للبصره واني كلش فرحانه وانطيت خبر لسيد واجه وراي يتعرف على امي ويتقدملي رسمي
الكل تباركلي والكل فرحان على فرحي امي كالت
_يمه مها من يجي السيد نحجي وياه اني وعمج ونتفق على التفاصيل
خابرته من الارضي مالتهم
_الووو سيد السلام عليكم
_وعليكم السلام هله بيج
_سيد اشوكت تجي للبصره الكل منتظريك
_اذ الله سهل باجر اجي
_توصل بسلامه
ثاني يوم اخذتني امي لسوك العشار جابتلي ثوب كلش حلو وحذاء وشال
لضهر اجه السيد وحده
استقبلوه احسن استقبال وسوينه غده وهو جايب وياه فاكهه وحلويات
كعدو بلاستقبال
وامي راحت يمهم بقه السيد للعصر وطلع اجت امي فرحانه تكول هذا الولد مؤدب ومحترم
الف الحمد لله الله عوضج
رجعت للدوامي وعلى اساس يجيب مشيه وبنفس اليوم يجيب مشيه نسوان اتفقو هو وامي عدبيت عمو سالم اصير المشيه وعمو رحب بلفكره....خابرني
_الووو مها اشلونج
_هله سيد انته اشلونك
_اكلج امج تريد مشيه نسوان واني العلويه مريضه ما تكدر تجي
_ها خابرلهه وكلهه اشلون مو هيه تريد تعزم خواتي وخالتي واجيبهم لهنا
_دبريهه مها تره احنه لسه ما اتفقنه اني وياج اني الي شرط وانتي ما انطيتني مجال احجي وياج
_ههه اي بلله شنو شرطك
_اتركين الدوام اني ما اقبل زوجتي موظفه
_صدك تحجي عود ليش ما كلت من البدايه اني ما اعيف دوامي استوني استقريت
_مها انتي كبل كلتي روح لامي ما خليتنه نتفق
_انته غير متفق ويه عمو سالم وبعدين رحت لامي بعد اشلون يصير الاتفاق ليش تنغص فرحتي
اشو هذا زعل وطبك التليفون
ضليت بحيره منا امي الي جاي تحضر وتشتري وتكص وتفصل ومنا هذا مدري شبيه
اعرف حضي ما يجيني شي بسهوله ولا اتهنه بفرحه
بقيت يومين اكل بروحي لا هو متصل ولا اني تنازلت وخابرته
رحت لعمو وسولفتله كال
_عمو مها تره الرجال يحتاج كلمه حلوه وداعتج بسرعه يتقشمر كليله اي وصار وتدلل وشوفي النتيجه
_عمو الواه الزلم كله مثلك انته رجال بمعنى الكلمه
خابره عمو وبقه يحجي وياه هواي اني من كد ما ضايجه طلعت بطرمه كعدت
_عمو مها باجر السيد يجي واتفقو على اي شي ترديه
_فدوه عمو اني كوه استقريت بوظيفه ما اريد اترك دوامي
_واذ هو اصر على موقفه
بقيت صافنه
_يعني يخيرني لو شنو
_لو فرضنا هو شرطه الوحيد تعوفين دوامج وتلبسين بوشيه
_عود صدك تحجي عمو لو تشاقه
_ولج هاي السالفه بيهه شقى
كمت من يمه وطلعت لبيتي واني بين الحيره والضوجه
من القهر فصلت التليفون حتى ما اضوج امي واحجيلهه لان هيه تلح تريد تعرف الزغيره والجبيره گلب ام
ثاني يوم اجه حمودي دك الباب
_بابا يريدج يكول بسرعه تجي
لبست ملابس عادية وطلعت
دخلت وصاحني عمو كال تعالي هنا رحت للبراني
سلمت وكعدت بجهة عمو
كال _بويه مها اتفاهمي ويه السيد واني اطلع من الموضوع
رفعت راسي لكيته يدخن وضايج
_سيد اني ما اعوف دوامي ولا البس بوشيه
_مها اني ما اريد اخسرج انتي الوحيده الي گلبي وعقلي اتفقو عليهه واذ اصريتي ادوس على گلبي والغي عقلي من الوجود
_سيد تره طريقتك مو مال تفاهم مال تهديد
_مها عيوني اني من اريد اخذج وياي لبغداد ساكن بعماره والكل تقدرني وتحترمني اشلون اخلي مرتي يوميه طالعه لدوام بس جاوبيني
_خلص سيد نشيل من العماره ونكعد بمنطقه سكنيه وين المشكله
_مها اني جاي احارب من عده جبهات تدرين امي والعلويات ما موافقات ودازات رجل اختي يسال عليج
_اي خليهم يسألون اني الحمد لله ما عدي شي وفخوره بنفسي وبخلاقي تربيه الحجيه صفيه وعمو سالم
_هسه اشلون
_شنو اشلون سيد اذ ما مرتب وضعك ليش اجيت بحيل صدر
كام من مكانه انتفض كال مها اني حاولت وياج والضاهر ما جاي تفهمين حجي فكري بلكلته واذ عجبج الحجي رقمي يمج مع السلامه
خله وطلع واني كرفست روحي يم الحايط وكمت ابجي
هيه كوه الماعده حظ يضل طول عمره ما عده حظ وما تلوكله الفرحه
اجه عمو وزوجته وجهاله لكوني ابجي ردت اطلع ما قبلو
كمت احجي وابجي لعمو ترخصت وطلعت للبيت واني احس بغصه بصدري وبلعومي يحركني ومغص كلت خلي اخذ علاج وانام
اخذت وفعلا نمت....
وجه الصبح اسمع الباب اندك طلعت ولكيت امي
_يمه مها ليش التليفون مشغول
_ها مو البارحه وكع وما ادري بيه
تفضلو تفضلو
دخلو وسويتلهم ريوك واني اتلوه من الالم كتلهم اخذ اجازه وارجع نتغده سوه
طلعت بسرعه اخذت اجازه وجبت سمج ومسواك ورجعت لكيت امي منضفه البيت هههه
_مها هذا بيت عمتج اجرتيه
_ها لا لسه عارضيه عد الدلال وعمو يريد خوش ناس
_اكلج احنه جينه لعمج سالم نتفق على المشيه يعزمن ويجيب منو
_يمه ماكو مشيه السيد اهله ما راضيين وكام يطلع حجج ساعه بطلي من دوامج وساعه لبسي بوشيه كمت ابجي والالم كام يزيد قوي كمت اتقيئ
_يمه مها اسم الله شبيجح
كامت اصيح رجلهه نايم فز اخذوني للمستشفى كالو زائده ولازم عمليه
للعصر رحنه على حسابنه
وحولتي الدكتور عمليه امي بقت يمي ورجلهه راح عده شغل
سويت العمليه وصلت الموت كلش تاذيت واجه عمو وزوجته تحمدولي بسلامه كتله يروح لدوامي ياخذلي عياده وفعلا اخذت اجازه واحد وعشرين يوم كاعده بلبيت صرت احسن وامي بقت وياي عشر تيام
اوضاع البلد صارت كلش تخوف
نسيت التليفون ومالي خلك روحي اجو ناس تأجر البيت
واتفقو ويه عمو عائله مكونه من ام واب وبنات اثنين وولد ابوهم عسكري
مريت بحاله نفسيه صعبه وكلما اباوع لتليفون ابجي اكول ليش الله
ما كاتبلي الفرح
بديت اتاقلم على الوضع بس الگابه ملازمتني مره اجتني ام جعفر ام مرت عمو سالم
_مها تروحين ويانه لكربله لمولد الامام تدرين محد احيا هاي الليله والله ما انطاه مراده
_اي اروح خلي انطي خبر لعمو
اخذت حمودي ورحنه وياهم صار اشهر متگابه ومالي خلك روحي
رحنه لبيت قريب من الامام وره الضهر وصايمين كلمن جايب فطوره كملنه وكالو راح نسوي احتفال
خلو صواني اكبار وبيهن جكليت وشموع وفاكهه وكامن الملالي يصدحن بلقصايد لمولاي صاحب العصر والزمان
تغيرت نفسيتي كعدت يم ام جعفر وهيه تعرفني بلملالي وام البيت كالن طلبي مراد من صينيه الامام اول شي طلبته يرجع السيد وننجمع 😓
اجت بنيه كعدت يمي وكمنه انسولف
عرفتني على نفسهه اسمهه ميسون
وهيه معلمه ومخطوبه
كالت اطيني جفج اشوفلج البخت
_هههه ما اؤمن بهيج شي لا تحاولين
_شوفي مها اكو شخص متولع بيج وكلبه يريدج وجاي يصارع الضروف وهو عده جاه او رجال صاحب بخت
راح تزوجيه بس ما اعرف
_ههه كولي هم راح اخلف واصير ام
شوفي ميسون اني من الاخير اكلج اني فگر وحظ ما عدي فمايسه من نفسي
_ليش هيج تكولين انتي بعدج زغيره والحياه كدامج
طلعنه اني وياهه وحمودي زرنه وبقينه بلامام نتعبد حمودي نام واني وميسون بقينه للفجر حسيت براحه موطبيعيه
رجعنه كبل للبيت همزين ثاني يوم جمعه بقينه نايمين للعصر كعدنه سويت فطور واخذته لبيت عمو
_ها عمو مها اشلونج
_الحمدلله عايشين اليوم اني عازمتكم
صبيت الاكل وكعدنه ناكل واني كلساع اكوم اجيب حاجه خطيه مرت عمو بشهرهه الاخير
_مها انتي ليش فاصله التليفون
اني جنت مدنكه اكل واوكل بزيودي
رفعت راسي كتله ما احتاجه
_عمو لخاطري رجعي فتحيه امج تريد تسمع صوتج
عرفت عمو متواصل ويه السيد ويريد احجي وياه
كمت انسدت نفسي غسلت لجهال وسويت جاي انطاني فلوس الاجار
وكال اخذي حمودي يبات يمج
صدك رحنه حمودي هادئ بس زيودي لغوي ويحجي هواي ههه اولادي الما جبتهم
مراسبوع واني اشتاقيت لامي صدك ربطت الواير وخابرتهه
كعدنه نسولف كالت الاوضاع مو زينه واحتمال العراق يدخل حرب تعالي هنا علاقل اطمن عليج
_ههه ودوامي اشلون اني هنا يم عمو ما عدي شي
بقينه هواي نسولف اخر شي كالت نعست يمه مع السلامه
طبكت التليفون منهه وكمت وما احس الا دك التليفون الارضي
رفعت خط صحت الووو
_مها ويامن جنتي تحجين
تفاجئت هذا صوت السيد
_منو انته السيد
_اي مها احجي مشتاق لصوتج ولج جاي اموت يوميه ادك عليج حتى واني بشغل بس جاوبيني منو الجان يحجي وياج
_ امي سيد اترجاك اني ما مستعده اخوض تجربه فاشله واتاذه بسبب او بدون سبب تره صحتي حيل متاذيه
تعذرني ماكدر اتواصل وياك
_بس سمعيني مها اني موافق على دوامج ونزوج بمحافظتج بس
_سيد بس شنو تره اني مو لهدرجه رخيصة وتخلي شروط
_مها مره وحده فهميني رجل اختي سال عنج وكالوله دخلت الامن
واني اريد اعرف
_حقك سيد تعرف كلشي اني عبالي عمو مسولفلك واكثر من مره كتلك المريت بيه مو شويه
مثل ما انته عانيت من جور السلطه اني الوكت لعب بيه لعب وحاربني حتى بصحتي
اطمئن مو لبالك واني انسانه عفيفه
وهاي اخر مره احجي وياك عبالي انته شخصيه مستقله اثاري احجايه تجيبك واحجايه تاخذك
طبكت التليفون منه وفصلت الواير واني اعصابي 🔥
استغفرت وكمت توضيت وصليت حمودي فاتح التلفزيون وجاي يباوع
مها اكلج منو جان يحجي وياج
_ها هذا اخوي من امي
_ههه لا هذا السيد وانتي كتيله منو السيد وسكتي
كمت اللطفه واشاقيه ونمنه كوه
دمتم في امان الله
من❤️الى ❤️
