رواية لأني عاقر الفصل الخامس والعشرون بقلم مريم خفاجة
خاف اترز بيك
حد كطع النفس
وازهك واضرك
خاف تتطشر ولك
وشلون المك؟
عَريان السيد خلف
#لأني_عاقر
#البارت_الخامس_والعشرون
#مريم_الخفاجي
صوتوا للبارت+تعليق بين الفقرات+متابعة
لحسابي
ــــــــــــــــــــــــــــــــــــــــــــــــــ
ملك:-هاي صدك دتحجي تعاي
عفتها وراي ودخلت لغرفة
امي وفتحت تلفوني اتصفح بي
دخلو تلاثتهم
باوعتلهم ورجعت عيوني للتلفون
امي كالت:-اطلعوا خلي احجي وياها
طلعوا وهم يهزون بديهم
كعدت بصفي ولزمت ايدي
واني منزلة عيوني:-يمة ليش ماتردين تداومين
سكتت
ايمان:-جامعة وحلوة وتشوفين ناس جديدة
ملاك:-هو لان اشوف ناس جديدة ماريد
ايمان:-ليش يا حبيبتي اتاقلمي ويا الناس وشوفي الطبيعة وشوفي العالم والله ترتاحين
ملاك:-يا أُمي اني تعبانة لا بية
اختلط ولا بية اعاشر وتعاي صادقي
وتعاي خافي ولاتحجين شي ولاتگولين شي
خوفاً ؏ سمعة دراسة تعب طريق
جهد واني مال حيل روحي يا يمة؟
خلوني كاعدة بينكم مطمئنة اعرف
شنو الينتضرني بالجامعة؟ لا مانعرف خليني
يمة هيج مرتاحة مابية حيل والله مابية
ايمان:-جاي تضيعين عمرج
ابتسمت:-ليش هو ما ضاع يمة؟
أُمي كم سنة وادخل 30
وجسمي تعب احس الروح مالها خلك تتحمل بعد
ايمان:-جا ليش خليتينة نقدملج وفرحانتلج
وادعيلج والله ترتاحين صدكي
ملاك:-اني من كلبي ينغزني معناها ماراح ارتاح
عوفيني يمة وطفي الضوة وياج تعبانة
حجيتها وطفيت تلفوني
وتمددت غطيت راسي وهي حسيت بيها
ذبت حسرة وكامت عني
وطفت الضوة وطلعت واسمع
جاسر يكلها:-يمة صدددك تحجييين
لا مو بكيفها تداوم غصباً ما عليييها شنو هو لعب
ايمان:-ماتريد ماريد اجبرها
ملك:-يلا بلا شنو تضحك علينة هاي
ايمان:-اختكم تعبانة يمة عوفوها
سكتوا بعدها
واني نمت وجريتها لليل يلا كعدت
وهاي هيج كاضيتها انام واكعد انام واكعد
وماكو شي جديد بحياتي
واخواني يحرمصولي اداوم واني
مصرة ماداوم وهمه تعبوا من شافوني مارد
عليهم
اما ملك بحث آخر كثرت خطاطيبها
وصار يومية جاية جوگة مال نسوان
ويردون يخطبون وامي تضل تبلعم
وملك ترفض
واني ماطلع من الغرفة
خاف يشوفني احد ومالي خلك خطوبات
ولو اموت ماتزوج
ومرة من المرات امي وملك وافقن
؏ احد خطبها
بس بعدها بمدة جنت كاعدة
يم امي وتلفونها دك شالتة بعد السلام
كالتلها المرة:-سمعت عندكم بنية مطلگة؟
ايمان:-اي حبيبتي گتلج اني بنتي منفصلة
_بس ما گلتيلي السبب؟ بتكم عاگر؟
غمضت عيوني وكلبي ضل يرگع
أيمان:-ومايحتاج اكللكم السبب وهذا مرض
مالة داعي اشهر ببنتي
_لعد اعتبري نصيب ماكو بيناتنه لان ابنة نريد
نشوف اطفالة وهذا الشي اكيد وراثة عدكم
في امان الله
سكتت امي وضلت عبرتها تجرح ببلعومها
واني صافنة اباوعلها ودموعي بعيني
زين شنو ذنبي؟
جرتني امي لحضنها وصرت اشهك
وهي تدعي ؏ كمال وأمة
عفتها وصعدت فوك
لغرفة جاسر فتحت الباب جان
متمدد ويسولف ويا صديقة شافني ابتسم
واشرلي تعاي
واني امسح بدموعي
رحت يمة صعدت ؏ جرباية وهو ضل يتلمس
شعري لحد ما طبك المكالمة
جاسر:-شبيج يروحي؟
ملاك:-فصخوا خطوبة ملك بسببي
جاسر:-شلون يعني؟
ملاك:-هسة خابرتها المرة وكالتلها
عدكم مطلگة وبتكم عاگر
واحنة نريد اطفال
جاسر:-ديلا هسة احنة ضالين عليهم
ضليت اشهك بقوتي
وهو مستغرب:-هاي شبيج صدك تحجين؟
بابا واذا حجوا طز بيهم يروح واحد يجون مية
هزيت راسي بـ لا:-ميجون ميجووون
بس يسمعوني اني عاگر اكيد
محد راح يخطب من عدنة ولا راح يتزوجن
خواتي
جاسر:-انتي ليش تفكيرج اعوج عود؟
منو گالج نريد نتزوج؟ خواتج ويييين بعددد
ملك ترة وافقت وهي ماتريد انه اعرفها!
وريم؟ بعدها زغيرة وينج وينها
ملاك:-وانت
جاسر:-وحق هو الله ماريد اتزوج
مو ببالي الفكرة اصلاً
سكتت وهو اتصل ؏ ملك
كاللها:-تعاي صعديلي
ملك:-دولي الي خلكك
جاسر:-راح اجي اركعج بالنعال تعاي صعدي
ملك:-والله ما اجي
جاسر:-اليوم افرج بالسيارة اخذج
للسفير وين ماتردين اخذج
ملك:-كول وداعة امي؟
جاسر:-وداعة امي
ملك:-يلا راح اجي
ضحكت وهي طبگتة:-شكد تحب الخوارة
جاسر:-دينها وربها الطلعات بوية مو بشر
لاتمل ولاتجزع
شوية واجت
فتحت الباب وشافتني وعكدت حواجبها
وتخصرت:-شهالخيانة هاي؟
كمت من حضن جاسر واني امسح
دموعي الباقيات ؏ خدي
وانتجيت ؏ تاج الجرباية
وسحبت البطانية ؏ رجلية
وهي اجت صعدت ؏ الجرباية
ملك:-خير اكو موضوع مهم لو شنو؟؟
ملاك:-فصخوا الخطوبة
فتحت عيونها وصاحت:-جذاااابة؟؟؟؟
بلعت ريكي وهمست:-والله
اشو هاي هلهلت بصوت عالي
ضليت صافنة وفاتحة حلكي
ملك:-يمة الحمدلله والشكر
ملاك:-صدك بلا
ملك:-اصلاً مارايدتها
ملاك:-ليش؟
ملك:-هو قصير واني ماريد واحد قزم
هزيت ايدي وضحكت:-الغسل الج
ملك:-والله شني اريد چنتل مان
جاسر:-وهاي صارلها ساعة تنوح تكول من وراي
شو دباعيلي امددداج بعد بعد غمة امداج
ضربتة بصدرة وضحكت
ملك:-وهمة ليش فصخوا؟
ملاك:-عرفوا بية عاقر
ملك:-يا وطبهم مرض عرفوا والماعرفوا وانتوا
مصعديني ؏ هاي امداكم
ملاك:-لا والله بس عبالي تضوجين
ملك:-شوف هاي والله بطرانة
ترة لا بحال رجال ولا بحال سند ولا بحال اي
شي بالدنيا اسمة ذكر
عدى جاسر ينحسب ؏ نسوان
جاسر:-يا بت النعال دكومي منا
دفرها وهي تدربلت من الجرباية و وگعت
كامت وهي عصبية وتمالخوا
هي تكتلة وهو يكتل بيها واكيد
ماتكدرلة
طيح حظ حضها
لحد ما كامت تبجي وخر عنها
وكاللها:-يلا لاتبجين هسة شوية ونطلع
ملك:-جلب اني اعلمك وحق محمد اذا ما اخسرك ماتسمة ملك اوكفلي نذل
جاسر:-هذا هو عمي قابلين خسريني لاتبجين
وهو يمسح دموعها وهي تخرمش بية
هزيت ايدي عنهم واني اضحك
جاسر:-دكومي يلا اطلعي برا
طبت بنصنة وكالت:-لا اريد انام يمكم
جاسر:-نامي يلا
ملاك:-عود انتَ ليش تحبنة هواي؟
ملك:-هاي تدور واحد يحبها
ضربتها ؏ كصتها وهو گال:-لان ماكو احد
يحبجن بكدي اني الوحيد الي تميلن علي
بوقت الدنيا تصير عوجة
ملك:-يا والله حلو تحجي شو عيد
ملاك:-يا حبيبي الله يخليك النة
جاسر:-يلا انطمرن
نام وملك نايمة ؏ ايده واني بصفها
وهو يتلمس شعري وكل ساعة
يباوعلي ويبتسم
شوية وطبت ريم كالت:-ملك وينها هاي
ملاك:-نايمة
ريم:-هاي شنو كلكم متجمعين هنا جا ليش ما صحتولي شكد ادبسزية
جاسر:-دور علينة الزغيرة تغلط
ريم:-امي تريد ملك
ملك:-يعني نايمة شلون انزللها
متت ضحك وضليت اغص بضحكتي
وجاسر يضحك ويغم بيها
راحت ريم وشوية ورجعت
وكالت:-سوولي مكان يلا
تدنيت وصارت بيني وبين ملك
هي زغيرونة بسرعة تندحس ناعمة حيل
شبكتها وهي ضامة راسها بصدري
نوب باوعتلي:-اكلج
ملاك:-ها
ريم:-باعي اذا اطب اني جامعة سجلي وياية
ملاك:-حبي دخلصي من الثالث انتي هسة
ريم:-تؤ هسة دعوفي الثالث حبابة سجلي
وياية جامعة اني اخاف اطب وحدي
ملاك:-وهسة انتي ماعندج صديقات بالمدرسة؟
ريم:-لا ابد ولا بنية
ملاك:-ليش؟
ريم:-امي تكلي لاتصادقين احسلج واني
امشي بنصايح امي دائماً
ملاك:-عفية اني الغبية الماخذت نصيحتها بيوم
كالت تطلكي
ريم:-يمكن اكثر خبر فرحت بي هو يوم طلاقج
ملاك:-تدمرت نفسيتي حياتي كلشي
بية متدمر ومتهشم اتمنى ارجع
لملاك السابقة التنكتل من ابوها
الصبح وبالليل تضحك ومايهمها شي غيركم
انتوا
ريم:-ترجعين صدكي بس هي فترة وتمر
ملاك:-الله يسمع منج
ريم:-اهم شي هسة انتي تطلگتي منة بعد الباقي سهل ومايهم النسيان نعمة الله خلقها للبشر فـ اكيد راح تكدرين تنسين
ملاك:-يابعد روحي زغيرونتنه التعرف تحححجي
ريم:-شنو جا عبالج خرسة ترة اني
هادئة صح بس كلامي درر
كفختها ملك من ورا:-ام الوصخ كلامها
درر دغسلي جواريبج اول
ملاك:-دنامي كش منج تعاي ريومة اروح فدوة
لعقلج الأكبر مني ومن هاي الخبلة
حضنتها واني اشم عطرها نفس عطر امي
من كد ما متعلقة بأمي صارت تشبهه
حتى كلامها وحنيتها
نمنة كلنة
فزيت ؏ صوت باوعت امي واكفة
وتباوعلنة مبتسمة ودموعها مبينات رغم الظلام
وهي رافعة اديها تدعيلنة
ابتسمت ونمت مرتاحة
هو اكو احلى من النومة بين الأهل؟
اكو احلى من من ننام مرتاحين واحنة بين
ناس لايذلونة ولا يتعبونة ناس يحبونة
اكو؟
ومرت ايام وايام ويوم يسحل يوم
وشهر يسحل شهر
وسنة تجر بسنة
واحد اشهر هاي السنة
واحد يوم هذا الشهر
اشوف امي مخبوصة بعيونها ندم هواي
اشوف ملك عيونها دم ومتأذية وكل ما اسألها تتشرد
وبيوم جاي اشر الملابس
شفت ملك طلعت من المطبخ واجت علية
وهي بحلكها حجي وتتلفت
ملك:-ملاك اريد اگلج شي
ايمان:-ملللللك تعاااااي طببببي بسسسرعة
ملك:-يمة كااااااففففي كاااااااافي
اجت سحبتها من عكسها
وطببتها للصالة واني رحت وراها
انشف بأيدي:-شكو شسالفة
ايمان:-ماكو شي يمة روحي كملي شر هاي
اكو بعد وجبة
هزيت راسي واني اسمع ملك ضلت تصيح
من فوك وتشمر بالغراض
هزيت ايدي ورحت اكمل شر
ورة ايام
اجاني جاسر العصر يحك بشعرة
مرتبك:-تكومين تطلعين؟
ملاك:-وين؟
جاسر:-هيج نفتر اريد اخذ ملابس للدوام واريد ذوقج
ابتسمت:-يلا ، ملك تروحين
باوعت لجاسر بحقد ونترت:-لا ماروح
ملاك:-شعجب؟
ملك:-مالي خلك وروحي لعبانة
عفتها وكمت بدلت ولبست
وطلعنة وهو مرتبك ويتلفت اشترة
ملابس الة دخلنة اكثر من مول
واشترالي كم قطعة الي هم
بعدها كتلة:-جاسر رجلية موتتني يلا خلي نرجع
جاسر:-هسة بس شوية تروحين نشرب ازبري؟
ملاك:-تؤ ماريد ضهر يأذيني
بلع ريگة ومشة بالسيارة ورجعنة
للبيت دخلت واني
اسمع صوت نسوان؟
منو؟
دخلت اكثر مريت من يم الاستقبال
جانن اكو نسوان هواية
وملك كاعدة منزلة راسها وامي يمهن
شافتهن التفتلي امي باوعتلي بصدمة
تقدمت رجلية ترجف:-السلام عليكم
الكل رد:-وعليكم السلام
كامت امي مرتبكة وهي لازمتني
من ايدي:-ههه هاي بنتي ملاك الجبيرة
كامن سلمن علية واني مستغربة
من الوضعية شديصير
كعدت بصف ملك لزمت ايدي
بسرعة وهمست:-جايين يخطبوني
ابتسمت وكلت:-اها خفت عبالي اكو شي
جا شبيج انتي؟
ملك:-مادري شو احس ماريد اتزوج
مسدت ؏ ايدها:-كولي يالله
باوعت للجنط وعكدت حاجبي
ورجعت حجيت ؏ كيف
وهنه عيونهن علية:-شنو ذني الجنط؟
ملك:-نيشاني غير
ملاك:-هاي شنو يعني صاير كلشي؟
منطين موافقة؟
ملك:-اي
سكتت واني عرفت ليش امي
ماتريد تكلي حتى محد يعرف اني مطلقة
وعاقر ويرجعون يفصخون
وحدة حجت:-انتي يمة مزوجه؟
بلعت ريكي وكلت:-لا منفصلة
و وجوهن صارت صفر كلهن
واني گلبي ضل يدك
اجت امي خايفة وجهها احمر
امي تفكيرها راح يذبحني شدتسوي؟
وزعتلهن وهنه وحدة تهمس للثانية
عفتهن وكمت بدلت
ورحت للمطبخ جاي اصب
چاي
اجتني وحدة منهن
جايبة استكانها وكالت:-ولو ازحمج بس
اريد جاي لبيبيتي وين
ملاك:-اي تعاي حبي اني اصبلج
وهي تباوع لشعري وطولة كالت:-حلوة انتي
الله يحفظج
ملاك:-حبيبتي عيونج الحلوة
_انتي منفصلة صارلج شكد يعني؟
ملاك:-سنة ونص تقريباً هيج
_اها بس بعدج زغيرة شنو سبب طلاقج
وجهي صار الوان ينطي شگللها؟
سكتت وضليت اباوعلها
اعض بشفتي شگللها؟
زين اني ليش مستحية؟
هو مرض مرض
ملاك:-اني عاقر
_اها الله يعوضج
ملاك:-آمين
اخذت الچاي وراحت واني حطيت
ايدي ؏ كلبي اهدي دگاتة
شوية وطلعن وهنه
احسهن خايفات
اجت امي تكرض باضافيرها
بحكلها:-خاف يرفضون
ملك:-واااااذذذذذااااا رفضوووووواااا
يمممممة حررررام علللييييج شددددتتتتسسسوين
انتتتي
ملاك:-لج لاصيحين ؏ امي لاكسر سنونج
بحلگج فوگاها
اخذت امي ورحنة للغرفة
وهي تكلي:-ليش كتيلهم يمة ليش؟
ملاك:-يمة اولها وتاليها يعرفون ليش
احنة ضالين خايفين هو مرض
رضوا رضوا مارضوا يمة ماحاجة تكتلين روحج هيج
ايمان:-اخاف محد ياخذ خواتج بسبب هذا المرض
بطني مغصتني وضليت اباوعلها
عيوني مدمعة وبيها عتب
ملاك:-يمة بس مو ذنبي
جرتني لحضنها وهي تبجي:-والله مو قصدي
يمة والله
ضلت توخر الشعر عني وتبوس بوجهي
وتكول:-الله كريم حتى لو مارضوا تضلن
يمي ومانطيجن ابد اني غبرة شون
جاي افكر ماريد اغلط نفس الغلط يمة ضلن يمي
ضلن
وهي تحضن وتبوس بشعري واني
ضامة راسي بصدرها
وفعلاً ورا ايام دزوا رسالة فصخوا
الخطوبة
وبيومها كرهت البشر
كرهت شكو انسان ؏ وجهه الكرة الارضية
شنو ذنب اختي
اذا اني عاقر؟
حاولوا اهلي ينسوني السالفة
وماخليت بالي يمها ابد
ومن اشوف ملك فرحانة ارتاح
لان فعلاً هي متريد تتزوج
ومَرت سنة أُخرى وصار سنتين
اني بدونة!
كدرت والله كدرت
والله عفتة وكدرت اكمل بدونة
وبيوم امي كالت خلي نروح للنجف
وفعلاً ثاني يوم لبست وخلصت ونزلت
بيدي الجنطة
كعدت ؏ تخم اكلب بالموبايل
ومنتضرتهم
واني اخر وحدة بدلت واول وحدة خلصت
وبقت ملك فوك وجاسر
حبيبي لابس دشداشة سودة وهي مرتبة
جسمة
بقيت اباوعلة واقرة المعوذات
وهو يصيح ؏ ملك فوك بعدها
نزلت وهي لابسة جبة ضيكة
و وجهه متروس مكياج ماينشاف ضحكت
وهو هز البيت هز بصياحه
جرها من ايدها وهمه يتعاركون
لحد ما خلاها تمسح المكياج
وطب لغرفة امي
اخذ جبة وخلاها تلبسها اعرض
من جبتها
طلعنة وهي مطنگرة
رحنة اول شي للمقبرة زارت امي
امها
ورحنة للأمام علي
جنت من زماااان مارايحتلة كُلش من زمان
دخلنة للضريح
بارررد حيييل ابتسمت وكلبي رفرف
زرت وكعدت اسبح
شوية وسمعت صوت رفعت راسي
شفتها مرت خالي عصام
عيوني راحت للوراها
وردة
دك كلبي واني بوسط الامام
كمت سلمت
وبوستها وهي مدنكة ماشالت راسها
ابد وكلبها يدك حيل
كعدن يمنة واني كعدت بعيد وسويت روحي
ملتهية اقرة بالزيارة وهي ماباوعتلي
ابد لحد ما گامن سحبت نفس
واجيت بصف امي
شوية ضلينة نسولف لحد مادك
جاسر طلعنالة واني مجلبة بعباية أمي
جاسر:-ترحن مطعم لو اجيب اكل ونكعد هنا؟
ملك:-مطعم اكيد
ايمان:-عمي والله بالمطعم مارتاح وماعرف
اكل جيبلنة هنا ناكل احسن
ملاك:-اي اني هم اكول احسن
هنا
ملك:-يااا شنهاي
جاسر:-احنة شلون بالعايقة نصي صوتج
لا اركع راسج بالحايط
طنكرت واخذلنة مكان وكعدنة
ضليت اسولف وابتسم ويا امي وهي تضحكني
وملك ضلت مخلية راسها بتلفونها
شوية واجة جاسر كال:-هسة نص
ساعة ويجهز الاكل واجيب
هزينة روسنة وضلينة مستمرين نسولف
ثواني وسمعنة صوت رجال
وجاسر كام وامي رفعت راسها
وهي ضحكت وتهلي بيهم
اخواتي كامن واني كمت وياهن
باوعت رجال وبنية شايلة طفلة شايفتها
بس مدري وين
سلمت علية وازدادت ابتسامتها
وحضنتني حيل يكول تعرفني:-شلونج
عكدت حاجبي:-الحمدلله حبيبتي
عافتني وهي تسلم ؏ ملك وتبوسها
حيل وملك هم
سمعت صوت الولد كال:-شونكم شلونج خالة
ايمان:-هلة يمة هلة بعد خالتك
سلم علينة وهو يكول "شلونچن خوية"
سلمن خواتي واني سكتت
وگعدت بصف امي والبنية حطت الطفلة
بالكاع وكعدت كبال امي لازمة اديها
وتحجي وامي مندمجة وياها
همست لريم:-منو ذول
ريم:-هذا غيث صديق جاسر يحبة كلش
ورغد هاي اختة دائماً يجونة
ملاك:-ها ها تذكرتهم
باوعت للطفلة وضحكتلها وهي ابتسمت
جانت حلوة حيل غمازاتها تخبل
ولابسة ثوب نيلي كصيرون
سحبتها يمي وهي اديها سمان
ورجليها هم مدبدبة ودي آكلها
ملاك:-شنو اسمج انتي؟
_تينا
ملاك:-هاا حلوو تينا
رغد:-لا مو تينا اسمها دينا بس هي متلفظ الدال
ملاك:-يا حبيبتي
ضليت اضحك وياها واكرص
خدودها وهي تضحك وغمازاتها تطلع
متت بيها
لمن شوية وگاموا
وهذا صديق جاسر يكولة:-جا يا غبي
ماتگول شلنة حتى رقمك ضاع مني
جاسر:-نسيتك وحق علي
ضربة بوكسي ببطنة وجاسر
صاح:-يا نذل ناسيني واني بس انت عندي
ضحك جاسر ودك ؏ متنة:-والنعم منك
وفي
غيث:-ترة اني اذا اوفي ويا البشر
لحد گطع النفس يلا انساه
ايمان:-يابعد روحي وعلي دوم ؏ بالي انتوا
اخذ ايدها وباسها
سلموا وراحوا بقيت اباوع للطفلة واسويلها
باي وهي تضحك حيل
جاب الاكل اكلنة ورجعنة
للبيت
نمت بسرعة لان تعبانة
مرت ايام
واليوم هو ذُكرىٰ موعد طلاقي
بيومها اختنكت حيل
باوعت للساعة بـ 8
واني بغرفة جاسر نايمة بصفة
وهو نايم لان تعبان مستشفى ودوام
كلبي يدك بسرعة ومن التوتر والقلق
رحايتي گبت علية
طلعت للصالة الي هي بالطابق الفوك
كعدت ؏ تخم منفرد وضليت
اضغط ؏ رحايتي وابجي
واحاول اهدئها باعواد السنون وهي
تزود بالزايد صرت ادك ؏ رجلية
من الالم
ساعة كاملة واني ابجي
وكاعدة بالصالة انفتح باب الغرفة
وطلع جاسر
يفرك بعيونة عكد حواجبة وحجة بقلق:-هاي
شبيج؟
كلت بخنگة:-رحايتيييي
تقرب من يمي وهو يريد يفتهم شبيها
شاف اعواد الاسنان يمي كام يصيح:-انتي
بربج شمسوووية زارفة رحايتج شمسوية
شو اشوف وخر ايدج
وخرت ايدي والدم كام يجري
منها ضل يزمخ ويغلط علية واني ابجي
راح لغرفتة وشوية وطلع وكال:-كومي
شو تعاي بدلي خلي اخذج لدكتور
واني حاطة ايدي واحجي بهمس:-منين
اكو دكتور هسة
جاسر:-صديقي امشي
حط ايدة ؏ ضهري وفتح
خانة كنتورة الي اشتركت وياه بي
لان كرهت غرفتي من يوم الاعتدى علية
النذل
طلعلي جبة
ولبسنياه وطلع شال ضل يلف
بي يجيبة منا ويحطة منا
جاسر:-شون يلف هذا لخاطر ربجن
وخرتة واني لفيتة بيد وحدة
هز ايدة ومشاني وياه ونزلنة امي كاعدة
تقري بريم
شافتنة وعكدت حاجبها:-هاي وين؟
جاسر:-بتج المصونة مدري شمسوية برحايتها
راح اخذها يشوفون شبيها
ايمان:-اجي وياكم؟
جاسر:-لا شسالفة عليمن هي هسة نص ساعة ونرجع
ملك:-خلي اروح اني
جاسر:-راح اركعج بالنعال وين رايحين قابل نتونس
ملك:-اي الزمها خاف ماتكدر
جاسر:-انجبي انجبي تعاي يلا ملاك
ترة رحايتج توجعج مو رجليج وماتكدرين تمشي
ضحكت واني ضاغطة ؏ سنوني
وضربتة بضهرة
ومشينة للسيارة
من الالم احس فقدت كام يصعد لراسي
واني اعصر بفخذي
واني ادعي بكلبي
؏ كمال
وصلنة للعيادة
ونزلني واحنة نمشي بسرعة
جانت العيادة فاررغة ولا طير بيها
لا سكرتير ولا ناس عكدت حاجبي
ومشيت ورا جاسر
دك الباب وصاح الي جواها:-تعالوا
دخلنة وجان نفسة الرجال الشفناه
بالنجف
تسالمو وهو كال:-تعاي صعدي هنا
صعدت ؏ سدية والاجهزة
كبالي من الخوف صرت زينة
اموت من تشليع السنون واكرهه اطباء الاسنان
للأبد
ضل يبحوش بيها مدري
شيسوي بعدها كال:-تؤ تؤ هاي متهشمة
شصاير بيها
جاسر:-الاخت لكيتها لاعبة بيها لعب بالاعواد
غيث:-لا ميصير شلون شو افتحي حلكج اكثر
ضغط على رحايتي اكثر
بجيت وعطت ولزمت ايدة
غيث:-بس اثبتي باعيلي حطي عينج بعيني لاتفكرين بالألم
ضليت اباوعلة وعيوني ترجف
وايدي فوك ايدة
حتى الدم بلعت
خدرها وكال:-هسة شوية ونشلعها الج
عادي لو نحشيها؟
همست واني خدي مورم:-بكيفك
غيث:-هي دائمية يعني حتى اذا نشلعها
ماتبين لان صايرة للاخير
حتى من تضحكين ماتبين
حجاها وابتسم هزيت راسي
وضليت نايمة ؏ سدية ومغمضة عيوني
واسمعهم يسولفون
بس عقلي فاصل
واسمع جاسر يكلة:-يلا هي عالجتك وانت عالجتها
بعد ماكو دين بيناتكم
غيث:-هم صح
ضحكوا ثنينهم
عالجتة؟ شوكت شو هذا يمخرط
نص ساعة وگال:-يلا جاهزة.
ملاك:-لا حباب لاتشلعها انطيني علاج
غيث:-ماتصيرين زينة والله حتى من احشيها
توكع الحشوة لان متهشمة تهشم
ملاك:-حباب اخاف
غيث:-لاتخافين ما أذيج اني يمج
ضلي باوعي لعيوني
ملاك:-لا تأذيني
غيث:-والله ما أذيج كتلج باوعيلي
ومعليج
ملاك:-اخاف والله
غيث:-اني يمج
ملاك:-زين بس هسة اوگف شوية
غيث:-يلا اني واگف
گمت وحجيت ؏ كيف:-صرت زينة والله
لاتشلعها
غيث:-حتى لو صرتي زينة مايصير تنزلين تدرين؟
عكدت حاجبي وهمست:-شلون؟
غيث:-لان بس تنزلين تنتلين
ملاك:-ليش؟
غيث:-باعي هذا الجهاز
ملاك:-اي؟
غيث:-اول ماتنزلين تتكهربين لان ماتشلعين رحايتج
هو ياهو يصعد هنا لازم يتعالج يلا ينزل
ملاك:-هاا وهذا الجهاز شلون يعرف اني
ماشلعت رحايتي؟
غيث:-يعرف شلون ميعرف
ملاك:-شنو انت تضحك علية ترة اني
مو طفلة؟
غيث:-اذا مو طفلة ليش تخافين؟
عكدت حاجبي هذا شبي؟
رجعت نمت و
فتحت حلگي
وباوعت لعيونة وهو يباوعلي
مبتسم وجلبت بالسدية
وايدة جانت خفيفة ما أذاني قليل يعني هي
اذية الرحاية نضفها الي
وخلة الگطنة وكال:-ضغطي عليها بسنونج
ضغطت وگمت غسلت حلگي
واني ارتب بجبتي واشوفها مفتوحة
ورجلية وبطني طالعة الله ياخذني
متفرعة تفرع كبال الرجال
وجاسر النذل كاعد عازل روحة ويلعب بتلفونة
عود اعتمدت علي
ضل يعقم بيدة
الدكتور ويحجي ويا جاسر ويسولفون
جاسر:-تعبتك وعلي
غيث:-لاتدلل و؏ كولتك رد الدين
جاسر:-مشكور ماتقصر نردلكياها بعرسك
غيث:-انتَ حالف ترگصلي ترة؟
جاسر:-دلل بعيوني
يلا اودعناك
غيث:-براحتكم حبيبي
مشة جاسر واني وراه لازمة
ايدة وبينة مسافة سمعت صوتة
غيث:-ملاك
درت وجهي وهمست:-ها؟
