رواية سداد وبنت العرب الفصل التاسع والعشرون 29 بقلم الزهيريه

كنت أود إخبارك بآن الجميع خذلني 

الا انت ولكنك خذلتني قبل آن أخبرك 

ألق/ مرات الانسان من يشعر بخيبة آمل من الناس إلي يحبهم يصير يتخبط ما يعرف شيسوي يعني اني چنت مصوره في خيالي انه راح يگلي احبچ وهاي چانت امنية حياتي بس خيب أملي والمشكله وده چان صادم بالنسبه الي ومن رفضني بصراحه صار بعقلي وتفكيري أنه خلاص بعد زوجته راح ترجع وبعد ما يهتم الي وظليت ساعه اگول اگله على زواجنه والسوا بيه بس من أذكر إنه عمي بعده ما متواصل ويا سردار انچب واگعد وأسكت 

ويرجع تفكيري شلون لو سافر لأربيل وعافني وانوب التفكير موتني واگول ويه نفسي هسه ياخذ زوجته ويا ويعوفني من التفكير متعبه حالي وصحيت ثاني يوم على دولفين وهي تگلي / گوم هذا البيت بي هواي شغل وأنت نايم 

گمت واني اتملل بالگوه گمت من الفراش واني اسوحل بروحي طلعت من الغرفه ودولفين ما أدري اليوم شسامعه گاعده تطبخ من الصبح تعجبت اباوع على الساعه بعدها توها ب 8 وربع وهي شافتني واگفه يم الثلاجة 

دلفين/ انت واگف وما يسوي شي تعال ساعدني گول أجي اساعد انت هنا لعد شنو گاعد سوي 

الق/ والله يا ست دولفين اني ما اعرف اطبخ واستاذ سداد يعرف بهذا الشي اني بس تنظيف 

وهي تخبلت 

دلفين/ إسمي دلفين انت ما أفهم راسك شنو بي وبعدين اگعد من الصبح تنظف اليوم يجي آريا ويبرق 

الق/ أنتي تحچين صدگ مگعدتني من الصبح والله راح تجي ست آريا اي و آني شنو عيني عدها زوجها يحتفل برجوعها أني شكو 

وعفتها ورحت دخلت للغرفة وبعدها سمعتها من چانت صيح على سداد وشويه وصاح سداد عليه 

گمت على أقل من مهلي ومن طلعت صار بوجهي سداد اشرلي بيده بمعنى اتقربي اني امشي ببطئ يمكن السلحفاة أسرع مني وصرت قريبه منه 

سداد/ آني ما أعرف شنو انتي دى تتحديني يعني أصيح 

تمشين على كيفچ كأنه دى تمشين على بيض أمي تصيح عليچ حتى اساعديها ما تقبلين وعايفتها وداخله للغرفه شنو معناها انطيني سبب مقنع قبل لا أصرف تصرف اندم عليه بعدين 

الق/ بلا زحمه آني بالنسبه عني هنا أنظف بس مو اگعد اطبخ وآني أصلا ما أعرف اطبخ بس أعرف أطلع عضلاتي بالطماطه الحمس وافرش بيت ورد والله ترجع ست آريا وإذا انتوا محتفلين برجوعها أخذوها بمطعم راقي وأحتفلوا عمت عين حظي الي ما خله حظي مثل حظ هاي النسوان لو أهلي إلي چانوا الجوارين يدزون الفضاله مال أكلهم ياخذون سلفي ويه الاكل على أساس احنه طابخي 

وسداد وجهه مال واحد توه گاعد من النوم مات من الضحك وخله أيده على حلگي ويسد بحلگي 

سداد/ بس اسكتي ولچ مو لسان الله يغضب على راسچ وأنتي شبيچ ضايجه بابا ارحمي نفسچ أنتي وأصله مرحله متأخره روحي تعالجي 

ألق/ رجع على دولفين وهو حچى وياها عربي هاي المره فهمت عليهم 

سداد/ دايه رجاءً خليني گوه لازم أعصابي لا أرتكب جريمه على شنو تسوين سم إلها فوگ عارها گاعده تطبخين والله راح تجي جتي علومها ان شاء الله 

ألق/ وهي جاوبته كردي وما أعرف شنو گالت بگلبي اگول هسه الله يحاسبچ اذا حچيتي عربي حتى أفهم يعني هم غموض وهم فضولي كتلني والله لأن على أثرها سداد تخبل گام يصيح وآخذ جدر بي هواي لحم مسلوگ وطلع ذبه بالحاويه هو والجدر وحتى الكفوف الحراريه وحتى چانت مسويه حشو مال برياني هم شمره بالزباله تخبلت بگلبي گلت الله لا يوفقك ليش هيچ هسه لو أخويه وأبويه هنا يمي چان اخذت هذا الاكل وياكلون منه الله يرحم ايام كونه چانت اجيب آكل الناس وناكل وهنا الاكل يشمر بالزباله استغفر الله 

ودخل هو من الگراج وهو يحچي ويه دولفين/ شوفي إذا تكرر هذا الكلام مره ثانيه ساعتها لا تلوموني 

وراح سداد فوگ وهو يدردم ودولفين مطبقه مثل الي يگول ابويه ما يگدر بس على أمي وهاي دولفين گدرتها بس عليه اجتي ضربتني على راسي وهي تگلي 

دلفين/ انت عيب واگف يصنط عليه وعلى سداد ويسمع شنو اگول وشنو يگول سداد هذا عيب وحرام 

ألق/ إنتوا صدگ كراد يعني المنطقه كلها سمعتكم شنو حچيتوا وصلت يمي ما تريدين أسمع حمدلله والشكر 

دلفين/ يله روح نظف البيت لا تسمع شي من سداد 

آني هم عفتها وبديت أنظف وأول شي بديت بالصالة ونظفتها وبعدها رجعت على المطبخ ووصلت للگراج على النص وما يقارب ساعة 11 والنص ندگت الباب ولكون أني قريبه على الباب فتحتها وچانت آريا ويبرق وهي دفعت الباب عليه ودخلت واني اباوع عليها شنو من جمال تجنن وأناقة وعطرها يسطر وبيني وبين نفسي اگول آني مخبله وأريد سداد يحبني ويباوع عليه إذا عنده هذا الجمال كله ألق بيش كيلو 

وهي رادت تدخل من باب الصاله گتلها/ هذا مقفول أدخلي من باب المطبخ مفتوح 

اريا/ انتي شنو تعرفيني على بيتي 

الق/ اني بداخلي اتخبل منها أنوب تحاچيني بهاي الطريقه تخبلت بالزايد بس گوه ساكته وهي طريقتها أستفزازيه وصلت يم باب المطبخ 

آريا/ ما شوفيني وصلت يم باب المطبخ غير المفروض تجين قبلي وتفتحين الباب الي ليش إنتي هنا شنو شغلچ 

الق/ صدگ هنا بعد ما تحملت لان هذا كله فوگ طاقتي 

جاوبتها/ نعم شنو أفتح الچ الباب ليش شبيها ايدچ مكسوره لو معوقه انتي فتحتها 

وعفتها و جريت صونده وظليت ارش مي قريب عليها وصار مي عليها بحيث خليتها فتحت باب المطبخ ودخلت تركض وهي من دخلت اني گبل صارت حسره بگلبي أريد أشوفها راح تصعد لسداد للغرفه دخلت وراها هروله شفتها دخلت للصاله على دولفين وظلت حاضنه دولفين وتبچي وتبوس بيد ووجهه دولفين بگلبي گلت بلگت دولفين تتحول لقرش وتاكلچ وأخلص منچ 

ويبرق راحت صعدت فوگ على سداد واني گعدت على آول درجه من الدرج ما اعرف ليش اخاف لا تصعد على سداد وبنفسي حتى ما أخلي يشوفها واني گاعده على الدرج اسمعهن يسولفن بالكردي وبدي اگوم احرگهن ليش ما يحچن عربي لان كل شي ما أفهم 

طبعًا هذا الوقت كله الباب تندگ بس اني ما اطلع أخاف لا تصعد آريا يم سداد بحيث إلي دى يدگ الباب يمكن راح يكسرها ونزل سداد شايل بنته وهو يگلي 

سداد/ ورده شبيچ بابا ما سمعين الباب دى يندگ راح يكسروا علينه وأنتي گاعده هنا معقوله ما سمعين 

ألق/ اني ما جاوبته بس هو طلع وأني طلعت ورا وهو فتح الباب وأسمع واحد يگله بعد أخوك إنتوا فاتحين المي وبابنه غرگ والشارع غرگ بلا زحمه عليك سدوا المي 

صدگ طلعت ما سديت المي وعفته مفتوح وتعذر منه سداد واني رحت سديت الحنفيه وهو باوع عليه 

سداد/ شبيچ اذا بيچ شي گليلي اذا إطلع للباب تجين ورايه في حين الباب تكسر وما طلعتي والشي الثاني عايفه المي مفتوح شكو تركضين ورايه شنو أني مخلفچ وناسيچ 

الق/ ليش تريدني اعوفك حتى تبقى براحتك ويا ست الحسن 

سداد/ مرات نتعرض لضغوطات تكون اكبر من طاقتنه ونريد نفرغ هاي الطاقة بس بيمن نفرغها وبوقت ما نكون مضغوطين ما ننتبه على أشياء مقابيل عيونه بس من نتعرض للخيانه نصير ننتبه على أدق الأشياء وهذا چان حالي ويه ورده في وقت چنت عليه ضغوطات مال آريا وهاي البنيه إلي جبتها من ملهى أربيل وبوقتها اصروا عليه إنه ألا آخذ ويايه ورده على اساس أنه تخدمني وچانت يمي يبرق على تخدم بنتك بس آني في حين شگد صارت عندي مشاكل 

آول شي أنتبهت عليه بورده انه كل شي ما تعرف إضافة إلى ما اعرف وين چانت عايشه كل ما شايفه أدري انه من طبقه فقيره بس مو لهدرجه بعدين أسألها شگد اتفقتي على الراتب هم متعرف يعني هاي تخلي المطي يشك بيها حسيتها كذابه وراها شي متريدني أعرفه وآني بعد الأحداث إلي مرت بيه صرت اشك بكل الناس ما أشك بورده وصارت عندي إلف علامة أستفهام عليها من سألتها على أهلها چان جوابها غير متوقع 

ألق/ أهلي ليش تريد تعرف أهلي وين 

سداد/ عادي انتي تشتغلين عندي شي طبيعي لازم أعرف اهلچ وين صار عليچ قدر مثل تعرضتي لصعقه كهربائيه احترگتي او لا سامح الله توفيتي أو احتمال تبوگيني او تطلعين وبعد ما ترجعين غير أبلغ اهلچ لهذا أريد أعرف اهلچ وين 

الق/ آني من چنت عند أهلي ما إطلع لهذا ما أعرف اسم المنطقه إلي ساكنين بيها 

سداد/ اگلچ شنو شايفتنه سود عبالچ هنود هسه ما چنتي طلعين افتهمنه الا مال ما تعرفين بيا منطقة ساكنه ما تعرفين هاي واگفه وانتبهت عليچ حتى موبايل ما عندچ زين شلون تتواصلين ويه اهلچ واذا انطيچ الراتب شلون توصلي لاهلچ 

الق/ لا أستاذ راتبي انطي لأستاذ سردار هو يوصله ألهم 

سداد/ عجيبه أنتي سردار كل شي يعرف عنچ والعجيب بالموضوع انه سردار يعرف عنچ أكثر ما إنتي تعرفين عن نفسچ 

الق/ أستاذ اي شي تريد تعرفه عني اسأل أستاذ سردار 

سداد/ عرفت بوقتها آنه اي شي ما راح تگول بس شكيت بشغله وحبيت أتأكد أتصلت بسردار ومن سالته على ورده وأهلها ظني بمكانه هو هم ما انطاني اي معلومة وبعد ما نهيت إتصالي ويه سردار وصلت لقناعه انه سردار تربطه علاقة بورده وما يگدر يخليها في بيت أهله لإن زوجته موجوده لهذا جابها هنا وخصوصًا بعد ما شفت سردار طلع من غرفتها 

بس ملعبه الظاهر تريد اني هم تقيم علاقة ويايه هاي متدري گلبي خلصان من هاي السوالف لهذا قررت حدي وياها لراس الشهر وخلي سردار يحير بيها آني شنو 

وبهذا التوقيت چانت آريا دى ترجع للبيت ولازم أخلي أعصابي بثلاجه واتحملها بس ما باليد حيله لازم أتحمل 

وبهذا الوقت كله چنت اجهز روحي في سبيل الرجعه لأربيل بعد خلاص ما ابقى في بغداد وهاي چانت غلطة عمري من اجيت لبغداد وبالفعل رحت على المدير مالتي وبعد السلام 

المدير/ سداد اني كم مره نهيتكم عن الگعدات والسهرات يعني الله يرحمه اوزجان طلعت نتيجة التحليل مالته وچان تحت تأثير مخدر محرم دوليًا وهذا النوع يستخدموا فقط للتجارب بس أريد أعرف هذا النوع منين جبتوا 

سداد/ والله سيدي اني حچيتلك الحادثة بما أنزلت بس گلي شنسوي والله ما نعرف منو سوه بينه هيچ 

المدير/ تدري انت هسه گدامك بعد كارثتين أولها إنتوا الباقين نرفع بيكم مجلس تحقيقي وأنت اجتني بيك طراطيش حچي انه والد اوزجان بعد ما أعرف أبنه چان متخدر وهو چان يسوق سيارتك والمشكله انه سيارتك من بعد فحصها تبين إنه چان فگس البريك بفعل فاعل هو يتهمك انه أنت قتلت أبنه وچان الدافع موضوع البنيه إلي جبتها وياك من ملهى أربيل 

سداد/ يعني شنو سيدي آني صرت المتهم الوحيد واني حالي حالهم هم چنت راح أموت بذيچ الليله المشؤمه 

المدير/ سداد انت هسه متگدر بعد تدخل اربيل وبس يشتكي عليك ابو اوزجان يتم إلقاء القبض عليك لهذا أنصحك تحاول تتواصل ويه أبو اوزجان وتحلها ودي 

سداد/ طلعت من يم المدير وآني سودت الدنيا بعيني وما أعرف وين انطي وجهي ضاقت عليه الدنيا بكبرها وأتصلت على فرقد ومن طلبت منه اشوفه 

فرقد/ والله كاكا سداد اني مو بشغلي وأني بيه طبيعه كل أسبوع أخلي آلي يوم اطلع ارفه بي عن نفسي اذا تريد تعال إني بالكوفي…. وهم آبن خالتي ويايه 

سداد/ هسه أجي سيدي ومن عرفت هو وين رحت عليه وصلت وچان يمه هذا الولد نفسه ألي إجى اخذ عينه الفحص وگعدت 

فرقد/ أطرقها كاكا سداد لان ما شاء الله راح اتبناك أحسن الي 

سداد/ واني حچيتله كل شي وگتله/ سيدي والله اني چنت ضحيه حالي حالهم يعني شنو أصير آلمتهم الوحيد 

فرقد/ اني شگتلك مو گتلك الي وقع عليه ضرر أقل راح يشيل الليله كلها 

احمد/ شوف أخويه اني بالأدلة الجنائية وأعرف شنو دى اگلك وأخذها من يمي ترى هذا المخدر اختصاصه مافيات چبيره يعني انتوا گدام تصفيه 

فرقد/ سداد اني من خلال خبرتي اگلك هاي المافيا لازم تتعامل ويه شخص قريب عليكم وهو عرف شوكت طلعتوا وعلى شنو اتفقتوا بس منو هذا الشخص انت بعد اعصر بذاكرتك عسى صار موقف گدامك وأنت نسيته 

سداد/ والله سيدي ما أعرف منين أتلگاها من شغلي وهاي الرجعت للبيت وگوه لازم أعصابي وياها 

فرقد/ اي همزين رجعت ليلى لعيالها وطير السعد يبرالها شوف هاي امحيها من حساباتك هاي مو صاحبة طويله هسه فتره وتطفر أهم شي تسد عليها كاك النفط اني ما اگدر كل شي أسوي بقضيتك بس في حالة اتهمك أبو اوزجان بلغني لان بهيچ حاله لازم نسحب تصوير الكاميرات كلها مال الشارع الا ما اوگع على عله 

سداد/ تدري سيدي كل المصايب اجتني من وره هاي البنيه الي جبتها من ملهى أربيل وروح أبني اذا توگع جوه أيدي ما اعوفها الا اطلع روحها بيدي 

فرقد/ هذا حچي بعد ما يفيد هسه الصار بعد صار هسه احنه ولد اليوم وخلي نشوف شنو راح يصير 

استأذنت منه ورجعت للبيت واني ارتاحيت من رجعت يبرق يمي وأني بيوم الچانت تريد تجي أمي طلبت مني إنه اسامح آريا وإنه هي متصله على أمي تتوسل تريدني أسامحها وهي ندمانه وتريدني اسامحها والعجيبه آنه أمي تگلي غلطت وعرفت غلطها وسبحان إلي ما يغلط وهذا چان كفيل إنه يخبلني أسامح على شنو 

وهذا چان الي يخبلني بكلام امي 

ومن رجعت أحس الجروح كلها انفتحت أنسى أبني لو بنتي وهاي ولأ كأنه وبالليل الصراحه چنت تعبان لهذا ذبيت نفسي من التعب وبين النايم وبين الگاعد حسيت على وحده نايمه بصفي وحاضنتي 

الفصل الثلاثون من هنا