رواية في ذمة الغريب الفصل الثاني 2 بقلم كنوز

انا الخواف يا دنيا انا الخواف من كلشي 

لو احلم حلم مو زين انا ارجف گبل رمشي

ادگ بالباب الف رزة وافز بليل الف فزة 

و تعز روحي 

واگل للخوف ظل بالبيت وانا امشي 

انا الخواف يا دنيا انا الخواف من كلشي 

━━━━━━━━━ ⚖ ━━━━━━━━━

قوتي بدأت تتلاشى ضعفت اديَّ وصارت ترتخي و وجه قرب عليَّ أكثر غمضت عيوني عاصرتهن حيل 

ماحسيت اله انشال من فوگي فتحت عيوني شفته عروه شاله عني وشمره بالطرمة وهو ينبح بشراسه 

ع عروه ويريد يرجع الي مرة ثانية راح عليه عروه بيده كرك ضربه حيل وبقى يضرب بي وينش لحد ما طلعه من البيت كله وطبگ الباب 

شمر الكرك واجه يركض الي واني ع وضعي امدده بالگاع و گلبي ينتفض بين ضلوعي،، لزم أيدي بأيده وايده الثانية خلاها ورا ظهري يسندني اگعد حاوط وجهي بثنين اديه القلق بعيونه 

والخوف برچفة كلامه وهو يسئل 

:: رحمة شو باوعيلي..... حاجيني ردي عليَّ بيج شي 

حلگي نشف من گد ما صيحت بلعت ريگي أكثر من مرة نحلت عقدة لساني و طلع صوتي خافت و كل كلمة اشهك بيها احس تشگ صدري همست بصوت خامل 

::راد يعضني اصيح عليكم وصوتي ما يطلع 

نطقتها واجهشت بالبواجي ما مصدگة خلصت حضني لصدره يمسح ع ظهري واني دموعي تصب برعب حقيقي 

فزيت من هذا الكابوس بفزع ع صوت يصيح باسمي بصوت عالي ويهز بكتفي شهگت شهگة قويه حسيت الصوت طلع خرخشه من صدري باوعت ابويه و اخواني.. رانيا كلهم واگفين ع راسي 

صوت بداخلي جوه گلبي يردد الحمد لله،، الحمد لله طلع هذا حلم مو حقيقة حسيت وجهي رطب رفعت أيدي ع عيوني لگيت دموعي بالصدك طالعة گعد ابويه گبالي يمسح دموعي بأديه و يسئل بقلق يريدني بس احچي وياه وانتبه اله 

::  شبيج بويه شو باوعيلي خل اشوفج مو وگفتي لگلبي 

نبرة صوته واضح بيها القلق بجيت بقوة احس الخوف صار مثل فقاعة هوى خانگة صدري حاوطني يمسح ع ظهري بحنان حط ايده ع راسي يقرا ايات قرانية شويه هدأت اجت رانيا بيدها كلاص مي 

::هاك ابراهيم شربها و غسل وجها خل ترتاح 

بعدني ابويه عن صدره اجيت اخذ گلاص المي أيدي متخدره وترجف قربه هو ع حلگي شربني و حط شويه بكف ايده يمسح ع وجهي ويشيل شعري عن وجهي احس الرؤية تشوشت واديَّ متخدره بثگل ماگدر احركهن صاح ابويه 

::  رانيا علاجها بساع 

قبل لا تنهض رانيا طفر أزاد ركض جابه واجه ع سريع انطاني ابويه حبايه وشربني مي رجه ظهره ع حايط وجرني سندني ع صدره ويمسح ع راسي 

::  شلون صرتي بوية لا تخوفيني عليج أكثر.. زين  اخذج للمستشفى ؟

يحجون و يسئلوني واني خوف ساكن گلبي نزلت عيوني ع أيدي وين خرمشني ماكو أثر بس احس الألم حقيقي أزاد گعد يم رجليَّه يمرغهن الي و عروه لازم اديَّه ومهدي واگف عيونه مدمعه يجر بطرف دشداشة رانيا ويسئل 

:: شبيها رحمة ماما 

دنگت عليه شالته تمسح دموعه وباست خده 

:: مابيها شي ماما شويه مريضة هسه تصير زينة 

عضيت اصابعي ندم لو گايمة من دگ المنبة وما راجعة نايمة مو احسن الي من هالكابوس ظليت بمكاني وابويه يردد قرآن لحد ما هدات و راح الخدر مني 

:: ها بويه شلون صرتي 

جريت نفس قوي بتعب روحي رايحه 

::  احسن شوية 

:: شبيج بويه شنو شفتي وهيج صار بحالج 

مسحت ع وجهي صورة الچلب ماتروح من راسي و صوته احس لسه بأذني رد عروه هم 

عروه :- صدك شنو شفتي ولج خمس دقايق واني اهز بيج اصيح وانتِ بس تونين و تبچين 

:: كابوس يرعب 

ما حبيت احجي الهم تفاصيله واني لسه الخوفة بيه اصلاً بلع أزاد ريگه عيونه متروسه دمع 

ازاد :- عبالي تخربطتي اجتج نوبه اجيت اشيلج واركض للمستشفى والله 

وجعني گلبي عليه أكثر شخص متعلق بيَّ أزاد لان اني ربيته أشرت اله بيدي تقرب حضنته وهمست اله اطمنه 

:: ما بيَّ شي يروحي هياتني صرت زينة

رجعت مددت بفراشي و أزاد گعد يم راسي يلعب بشعري طلعوا الباقين من طمنوا عليَّ جرت رانيا مهدي هم 

:: يله يمه تعال خلي اخيتك ترتاح 

هد ايده من ايدها واجه يركض مدد يمي وخلى راسي ع ايدي أشرت الها خلي طلعت و خزره أزاد جره من يمي 

:: شو گوم عنها انت الثاني ما تشوفها مريضة وتعبانة 

بجه مهدي مجلب بأيدي يباوعلي بعيون بريئة مدمعة حتى ادافع عنه 

:: عوفه أزاد  عقلك وعقله 

تنهد ازاد بصوت عالي يتأفف عيونه بيني و بين مهدي يوازن الموضوع براسه عبالي قنع تالي گال 

:: مهدي حبيبي رحمة مريضة تعال اگعد بحضيني 

:: لا اريد يم رحمة اگعد 

كزكز ازاد ع أسنانه بغيظ يتوعد اله و يهدده ما يطلعه وياه بعد ويشتريله واني اضحك عليهم 

:: دا اگلك تعال بحضني لا اگوم اصلخك دفره ارجعك بظهر ابويه 

فزيت من مكاني ع كلامه 

::  شنو هذا الكلام ازاد صدك تحجي اذا يسمعك ابويه يگطع الحزام ع ظهرك والله وهو منا متحمل الك 

ضحك خجلان يحك فروة راسه وبعثر شعره كلما يخجل يسوي هذة الحركة 

::  غير هو بزعني احجي وهو متنحر چنه مطي ماكل خبز يابس

:: وهم ما تحجي هيج  گدامه النوب يحفظ منك وترى هو طفل شتريده يگلك حاضر و صار 

هز راسه بـ اي صاح لمهدي الي بقى معاند وواگف مكانه و صافن ع كلام أزاد يريد يفهمه  د لمهدي ع فخده 

:: تعال حبيبي تعال هنا حتى اشتريلك مصاصة ام الديج 

باوعله مهدي مبرطم بزعل صفن شويه نفس صفة أزاد بالضبط من يضبط الموضوع براسه 

;; لع اريد ام الدجاجة 

:: ام الدجاجة و وياها كتاكيتها هم تعال 

صدك بي راح گعد بحضنه ظل شوية باوعت الجو بعده أظلم گمت عنه گال 

:: ها وين 

;:  اغسل بلكي هذا النحول يروح مني 

:: لعد اروح انام اني واذا ردتي شي گعديني 

اخذت ملابسي احس روحي خاملة الخوف الحسيت عبالك حقيقه طبيت للحمام غسلت من طلعت مأذن الفجر صليت و لميت فراشي باوعت الساعه بالسته وثلث 

سمعت صوت ابويه يصلي يقرا الآيات بصوت واضح من اسمع صوته بالبيت احس بالأمان رحت لغرفة عروه و أزاد رجعوا ناموا خطية كعدتهم 

:: عروه يله اگعد هم ياله تغسل و تبدل وراك طريق و زدحامات 

فتح عيونه باوعلي هز راسه ودفع رجلين أزاد عنه وگام دايخ باوعت لأزاد نايم و مهدي يمه نايم ع ايده ابتسمت عليهم تقربت عليه اهزه واانده بي 

:: أزاد يله گوم راح تتأخر 

:: هممم 

همهم الي ودار وجه عني بقيت الح وياه رد مزعوج بعد ما شاف الساعة 

:: صدك جذب يمه مكعدتني السبعة بعدها ما صايرة 

:: اي بين ما تغسل وجهك و... 

قطع كلامي يحچي بضيق 

:;ادري وجه لو راس مال تريلة عندي حتى ساعة ونص اغسل بيه 

باوعت اله وهو يغطي راسه بالمخدة ويرجع ينام... بفضل ازاد اني عشت الامومه قبل لا اتزوج طيور ترفرف وسط گلبي من يگلي كلمة يمه بس مستحيل اعوفه رجعت اگعد بي 

:: اگعد مو عندك امتحان اول درس و گلتي گعديني الصبح اراجع 

رد بصوت خشن من جوه البطانية 

:: عليج الله عوفيني راجعت والله راجعت 

:: گوم ازاد شنو تضحك عليَّه تريد 

:: بس خمس دقايق عليج الله 

شلت البطانية عنه 

;; ولا دقيقة يله بساع گومي بين ما اسوي الريوك الگاك گايم و مصلي 

گام يضرب رجليه بالگاع عاقج ملامحه و يدردم لميت فراشه اجه عروه ينشف بوجه بالخاولي

:: ها شلون صرتي 

:: لا احسن الحمد لله 

:: خوش تردين اروح اخذ الج اجازة 

:: لا عليمن اخذ ومابيَّ شي يجوز احتاجها غير يوم 

:: ع راحتج لعد

لم فراشه و وگف يصلي حطيت مي بالقوري وخليته ع طباخ وسويت بيض و بتيتة مثل ما يحب أزاد 

خليته الصينية وطلعت وجبن بعد طلعت اصيحهم لگيت أزاد گاعد ع سجادة يتثاوب صحت بيه 

::صدك جذب ازاد شوكت تصلي ما ظل الك وگت بعد 

باوعلي صفح و دردم بصوت ناصي

:: اي مو ع اساس رايح لعرعر هاي و ينها المدرسة ورا البيت 

وگف يصلي كعد ابويه و عروه ع صينية طلعت رانيا هم ايدها ع بطنها و مهدي مجلب بدشداشتها من ورا يبجي 

::ماما اريد جبس 

جرته كعدته يم ابوية 

:: مو صبحنا ع جباس مهدي اتريك وعود بعدين اشتريلك 

گام يبجي و افتر علينا واحد واحد يستعطفنا حتى نشتري اله جبس اخر شي گعدته يمي مسحت دموعه  

:: اتريك هسه حبيبي و من اجي من دوام اني اجيبلك حاجة وياي 

سكت بقى يناشغ رفع اصابعه گدامي مطلع سبعة وضام تلاثة 

:: مو حاجة وحدة هواي حاجات اريد... هلگد 

::  بعيوني يله اكل هسه 

هز راسه گام ياكل اجه أزاد باوعله عاگد مابين حواجبه و مبوز شفايفه ما عاجبه دنگ ع مهدي شاله من جوه ابطه خلى يم رانيا وگعد هو بصفي يحجي وياه بجدية وهو ياشر 

:: ذيج امك تگعد يمها و تنجب هاي امي اني لاتتقرب الها سامع 

رد عليه عروه ما قابل ع كلامه 

عروه :-  عقلك وعقل الجاهل 

أزاد :- اي عقلي وعقل الجاهل يم رحمة لا يتقرب نقطة راس سطر 

راد يگوم مهدي رجعته رانيا من اكتافه گعدته گدامها 

رانيا :- اگعد يمه مو طلعت اللگمة علينا سم 

گعد مهدي ياكل يباوع ع ازاد بطرف عينه والثاني يخزر بي و يحضن بيَّه يغور بي 

أزاد :-  وكليني عليج الله 

عروه :- ازاد لا تحرك گلبه لا اكوملك  

أزاد :-استغفر الله العظيم لك بابا اني و جاري شدخل حماري

طلع الجاي من خشمي و رانيا غصت بالگمة انطاها ابويه مي يدگدگ الها ع ظهرها و مهدي يضحك شماتة ع عروه

ابراهيم :- خوش احترمات عدكم للجبير 

عروه :- شحجيت اني يابه ما تشوفه لسانه شطوله يرد الكلمة بعشرة

ابراهيم :- وانت أزاد خلي النفس طيبة ترى ما ناسي الأربعين لسه 

أزاد :- بويه ترى هذا يسموا حقد مال ما تنسى و الحاقد م... 

دغيته بخاصرته بلع كلامه من شاف نظرات ابويه 

ابراهيم :- اي بويه كمل شبي الحاقد 

أزاد :- ما بي شي يابه يفتحوله بيبان الجنة بالعرض و يكلوله ادخلها بالسلامًا آمن 

هز ابويه راسه بتوعد 

ابراهيم :- كثرن سوالفك انت بس منتظر الشهادة واطلعهن كلهن عليك 

أزاد :- شهل القلق بويه گوم هسه حاسبني وفضها احسن ما اابقى بقلق وافكر شنو سويت وع شنو راح انخبز واني ذاكرتي صفر وها ترى انت سكتت من البداية مات حقگ بعد

هزله ابويه راسه بلا ما يرفع راسه ولا يحجي وياه او يرد ع كلامه ميل راسه عليّ همس بصوت خافت وهو يباوع ع ابويه 

أزاد :- بديت اقلق  يكول جامعهن الك

:: وانت شمصخم غير شهادتك المحمرة 

:: دين باليمين كلشي ما مسوي بس الجمعة ذيج لعبت طوبة وكسرت جامة سيارة ابو علي واجه ع ابويه يعاتبه بس سكت ماحاجاني بوقتها بس 

ضيقت عيوني بشك اعرفه من يگعد لحد ما ينام مصايبه معرة 

:: بس هاااي! ؟

صفن ودحرج عيونه بتفكير ابتسم وگال بتمسكن حتى يقلل حجم المصيبة 

:: وو اول البارحة طيرت طيور دا اهف خشبه عليهن طاحت ع بيت ابو رائد اجت براس الحجية امه وهم اجه ع ابويه 

::  ما شاء الله عين الحارة باردة كلشي ما مسوي خطية 

::  رحمة ماعليج بيهم انتِ امي يعني حتى لو غلطت او رسبت.. گتلت... صخمت انتِ وياي توگفين درع تصيرلي 

:: گتلك اني الغلط ما اوكف وياك عليه وكل مرة تحلف و ترجع تعيدها بعد ما ادخل وخل ابوية يحاسبك 

:: ليش هيج كلامج صاير نفس كلام ابوية تره ما يصير والله ابراهيم واحد مكفي و موفي 

:: كوم من يمي أزاد كومي 

ابعده بيدي وهو يلزم ذراعي بثنين اديه يحضني ويخلي راسه يتوسل بهمس اجه مهدي گعد بحضنه و يمد لسانه لعروة 

عروه :-الجلب يحب خناگه قبل شوية دفرك هسه تضحك وياه عليَّ اريد اشوف منو يجيبلك بايسكل بعد 

برطم مهدي دمعت عيونه راح عروه يريد يبوسه رفع عروه ايده گدامه بعتراض لان أدين مهدي كلهن زيت وبيض 

عروه :- لا تجي امروتك ابقى يمك هاي هي رضيت والله رضيت واجيبلك ثنين بدل الواحد بس ابقى بمكانك 

ضحك مهدي فرحان شرب عروه اخر جاي بالكوب عيونه ع أزاد عرفته يريد يسوي شي اله شال ايده يريد يضربه ع رگبته من ورا وهو غافل خليت أيدي اجت الضربة بيّه طلعت صوت عالي 

ابويه بساع فز خزر عروه و اخذ أيدي يمسح بيها صارت حمرة واصابع عروة انطبعت عليها 

ابراهيم :- هاي ليش 

تقرب عروه هم بساع اخذ أيدي يشوفها و گال 

عروه :-  والله ما ادري ردت اضرب أزاد وهي حطت ايدها اجت بيها 

::روح من گدام وجهي عروه هاي عود انت الجبير 

ضحك عليه أزاد واگف ورا ابويه و ياشرله يحرگ گلبه 

أزاد :- ابو بيضة يشوفها وابو سودة يشوفها شفتني يتيم و فقير گلت خل ادمغ بيه محد يدافع عنه شوف الله طيحك بشر أعمالك وصرت بلسان ابويه شيخصلك بعد 

رفع راسه ابويه اله بقلة صبر أشر ع خشمه 

::گوم انت الاخر بدل و روح للمدرسة ترى روحي صارت هنا منكم 

دنگ عليه أزاد باس راسه 

:: حاضر بويه صار تأمر انت واني انفذ شعندي غيرك غير انت الروح والري وكل الناس عارية 

نطق اخر كلامه وهو يباوع ع عروه عود يقصده بالكلام ما تحمل ابويه ضحك طلع الف من جيبه 

:: هاك واذا تحتاج دفاتر شي  اخذ من المحفظة ع ميز 

::  كلش كافي بويه حتى ربع من ريحتك عندي عدال مية 

جره ابويه باسه من راسه صح ابويه يقسى ع أزاد بس علمود مصلحته ودراسته و اشوفه كلما يضربه يبقى ياكل بروحه ندم و يدزنه عليه نشوفه 

رانيا شالت المواعين تغسلهن وكل واحد بدل ملابسه كملت شلت جنطتي طلعت يوميه هم انطيت لأزاد لان متعودة انطي أخذها خلاها بالدخل هي والالف مالت ابويه 

;: واذا جعت بالمدرسة شتاكل حصو 

:: ما اجوع مو تريكت اذا اخذ اليوميه اتلفسها خليها من هسه بالدخل احسن

طلعت الف ثاني ما قبل ياخذه 

:: ما أخذ والله كتلج ما اجوع 

دحسته بجيب الجنطة واني امشي ويا واحجي 

:: اي عود اذا ما جعت من ترجع خلي بالدخل هم 

التفت عليّ باس راسي 

:: ادعيلي يمه 

:: الله يوفقك يارب ويحميك 

راد يصعد بالخط انتبهت عليه ما لابس قمصلة صحت ورا 

:: ولك ليش ما لابس قمصلة الجو يكص كص انتظرني اجيبها 

ما انتظرت رده لان اعرف راح يكول ما بردان طبيت ركض للبيت نشت القمصلة من تعلاگة وطلعت انطيتها اله 

:: البسها أزاد مو تشمرها 

أخذها مني لبسها و راح الخط طبگت باب بيتنا وطلعت لدوام الجو بارد كلش بس بيتنا جان دافي فطلعت من دون قمصلة صرت مثل الي يعلم بالصلاة وما يصلي هذة عادتي دائما اطلع من دون قمصلة احب الشته واحب البرودة بس امي جانت تطلع وراي لباب البيت تلبسني القمصلة 

كلشي سوته امي الي دا اسوي لـ أزاد حتى احسسه بالامومة رغم هذا كله احس نفسي مقصرة الام غير الام عطاء ما ينضب،،

وصلت لدوام بصمت تلگتني سرى واگفة منتظرة المصعد وجهه ما يگصه السيف 

:: شكو من صباحية الله شادة الجينگو خيرج

عبالك جانت محملة و سئلتها مثل نفاخة طكت طلعت كلشي بگلبها 

:: ابو وجه المصفح ابو التفال كاتب بيّ تقرير تجاوز عليه اثناء الواجب و وتقصير بعملي بله اني اني مقصرة بشغلي عليج الله ؟ 

:: مو گتلج سكتي عنه هنه يومين يجمعون تواقيع نخلص منه 

عضت اصبعها بحرگه وضربت ايدها وحده بالثانية شايطة 

:: ااااخ تمنيته أنثى وحق الله الزمه اكضي بي التوبة اخلي يصيح ربي دخيلك اذا ما خليته من يشوفني بدرب يشرد لثاني اني فلا سرى بنت ابو سرى

تحچي وتأشر بعصبية فاتوا مجموعة أطباء يتناقشون بحاله مرضية قطعوا كلامهم صافنين عليها بستغراب ضحكت بوجوهم عود ماكو شي وكلامها كله ما دخل راسي غير كلمه انثى 

::  عود ليش أنثى خو كولي بنية مره 

صفنت بوجهي عاقجة ملامحها 

:: لانه مو رجال حبيبتي هذا بس ذكر و عكس الذكر أنثى فهمتي لو بعد اشرح للحجارة النايمة براسج بدل المخيخ 

التفتت تريد تروح ما قابلة احجي عليها رجعت ندارت عليَّ عوجت حلگها و هزت ايدها بستهزاء 

:: انتِ شلون دخلتي تمريض معقولة هيج من الله خاف واسطة ؟ 

نفخت ريشي شمرت طرف الشال ليورا بغرور مصطنع 

:: اولاً توفيق من الله ثانياً جبتها بذراعي لا واسطة ولا غش 

هزت ايدها بشتهزاء مصطنع وتحجي بسخرية بدون ما تباوعلي حتى لاتضحك وتروح الهيبة 

::ديله يله ع اساس طب عام هو گلج خلگ تمريض باجر عگبة تفتحين عيادة تكتبين عليها مطهرچية و زرق ابر 

فتحت عيوني ع وسعها ع كلمة مطهرچية و الي سمعوا الكلمه ضحكوا عليها هم 

:: عزا ولج انتِ ماعندج بريك شيجي براسج تحچي گبل بدون تفكير 

:: ديله شگلت يعني وقابل مجذبة 

:: اي مجذبة وين اكو ممرضة مطهرچية ترى ذوله الممرضين يسووها 

::وليش عني هالعنصرية شبيّه ناقصني ايد رجل ماعرف اگص 

بقيت فاتحة حلگي بصدمة تحچي من كل عقلها ضرب گصتي بيأس منها فطنت لكلامها قبل شويه تذم وهسه تمدح 

:: لعد شكو تكولين واسطة اذا هي تمريض وترى انتِ هم تمريض يعني دا تحجين ع نفسج 

تنهدت تتذمر 

:: سكتي مو ذاك اليوم مرافق المريض يفتر ويصيح وين السستر اريدها وضربي ابوي ابرة واني مغلسة والله لو ما ابوه خطية مريض ونقهرت عليه فلا اضربه 

ضحكت عليها 

:: هسه ما عرفتج تحجين علينه و تضوجين من احد يكول سستر 

:: اني اذم نفسي اي بس غريب لا 

وصل المصعد صعدنه اجت ممرضة من غير قسم تركض اريد تلحگ وتأشر بمعنى نخلي مفتوح وننتظرها راد ينسد مديت ايدي حتى يفتح ضربتني سرى ع أيدي وضغطت حتى ينسد وهي تضحك بوجه البنية بأنتصار 

:: يا خطية ليش سديتي 

باوعتلي صفح 

_ انتِ الخطية هذه فد وحدة كلاوجية ذاك اليوم مشتكية عليَّ جيف ما دخلتها لصالة ويا اختها شعدنه صالة لو حمام مال نسوان 

فتح المصعد راحت هي للمدير واني رجعت نزلت لصالة بديت الدوام بخمول تأثير الحلم لسه ساري عليَّ كأنه طاقة سلبية شفتها هدوء عبرت ع الخدج المعقم لبست كفوف ودخلت باوعت عليهم اتامل تفاصيلهم الصغيرة كأنهم أوراق 

بيضة نقية  كلما اختنگ من دوام أو شي يضايقني اجي ع خدج احس شوفة الأطفال حديثي الولادة راحة تقربت ع واحد منهم يفتح بعيونه و يسدها قريت الاسم بيده ابن فاطمة فاضل

ابتسمت الإنسان اول ما يولد يسموا باسم امه ومن ينادوا للحساب ينادوا باسم امه شفت بجه فتحت الحضانة شلته هو بجه وكلهم گام يبجون 

:: هاي ليش مو چنتوا حلوين ليش هالبجي يا عيني 

احجي وياه اتمنى ابوسه بس اخاف عليه لان بعده مناعته ضعيفة الممرضين والممرضات توزعوا ع أطفال و العاملة سوت حليب الهم شويه و طلعت احس براحة 

رجعت لصالة تلگتني سرى فرحانة تضحك من كل گلبها والضحكة من الاذان للاذان 

سرى :- وين رحتي ولج صارلي ساعه أدور عليج 

:: وين رحت هنا يمج بالخدج جنت 

جرتني من ايدي 

: تعالي عندي الج خبر يخليج فرحانة شهرين لگدام ولج ابو التفال شلفوا راح 

:: صدك تحجين 

:: اي والله رافعين التواقيع للمدير و واقف غيره خلى غيره مسؤول

:: هاي يراد الها هلهولة 

ما احس اله هلهولة زرفت اذني من هلهلت سرى خليت أيدي ع حلگها اسكت بيها وهي توخر أيدي وترجع تهلهل 

:: يا ولج صخام فضحتينه 

:: اشش ماعليج عبالهم وحدة جابت اللهم لا تجعلني شامت بس والله كلبي يصيح اني شمتان عندي شماتة هلگدها 

الشفت كله فرحان و يسولف الصار كلها ارتاحت منه الإنسان أثر لو كان طيب وياهم كانوا زعلوا ع روحته بس بسبب تصرفاته هم بنفسهم سعوا حتى يخلصون منه 

بين الصريخ والولادات خلص الدوام طلعت سرى المرايا ملتها الصغيرة من الجنطة و وكفت تعدل نفسها وتخلي حمرة

::فضينه سرى هسه منو راح يشوفج ترى طالعين 

:: واذا لازم اطلع بكامل كشختي واناقتي دائما ماتعرفين منو يصادفج بالطريق صديق والعدو 

:: الله يرزقني خلگج 

بصمنا و طلعنا قبل لا أأشر للكيه 

:: اوكفي دقيقة خل اأجر تكسي 

:: شنسوي بي هياتها الفورتات ونرجع 

:: لا مو ذاك اليوم من جانت مطيرة وكوه حصلنا سيارة كلت نذر عليَّه اذا خلصنا من ابو التفال ارجع رحمة بتكسي لبيتها 

::لهدرجة بازعة روحج منه 

:: اي والله جان موغف ع گلبي اشش لا تذكريني بيه صار عندي لعبان نفس من سيرته الكشرة 

أشرت لتكسي صعدنا ابو التكسي عيونه بالمرايا الامامية مشى شويه بعدين گال 

;; هذا الشارع بي حفريات راح افوت بغير طريق 

دغتني سرى تكرص بزندي وتهمس 

:: گليله لا ولج انطقي الخرسة ما تحجين سطرج العباس ع

خزرتها و رجعت انتباهي لسايق جليت صوتي وحجيت 

:: ليش عمو الصبح اجيت بنفس الطريق ما جان اكو شي 

:: اي عمي الظهر بدوا شغل بيه

سكتت رجعت سرى تگرص بيَّ وتهمس 

:: ليش سكتي ولج احجي گوليله لا رجعنه من نفس الدرب 

:; دا يگول حفريات شسوي اخنگه 

اباوع اديها وحدة تفرك بالثانية نزلت الجامة و ايدها ع يدة تاخذ احتياطتها ضحكت عليها 

:: ها شو خنستي لو بس وياي لسانج شطوله 

:: ولج اسكتي بطني گامت تلويني من الخوف يمكن ابو التفال شور بيَّه ماعندج رقمه 

صديت وجهي عليها مستغربه سؤالها وجهه عليه ملامح الخوف صدك نزلت نظري جنطتها بحضنها تعصر بيدتها بأديها بتوتر 

:: لا ماعندي شسوي برقمه قابل من حبي اله واخلي عندي 

:: مو ردت اتصل عليه يبرلي الذمة خاف هذا شو شيسوي بينه 

:: صدك تحجين ترى بعز النهار احنه والشارع متروس ناس و سيارت شبيج 

رفعت عيونها تباوعلي بأمل 

:: صدك 

:: والله شبيج ترى همه هم ع باب الله قابل شريد يسوي حده و محدوده يصجم يذبله حجاية 

سكتت شويه عيونها ع طريق رجعت تقربت عليَّه

;: شو احس الدرب صار بعيد يمكن راح يخطفنه رحمة  

::  استغفر الله شبيج ما تشوفين عيونه ترمش حتى الاشارة ما يشوفها وينه و وين الخطف 

:: خوفج من اليرمش ولج كله من ورا حمرتج هاي گتلج بعد لاتخلين منها تجيب التايه يله هذا راح يخطفنه مدري يبيع اعضائنه مدري يودينه نشتغل راقاصات 

اني ما أخذت من كلامها غير حمرتي 

:: ولج ماركة اخذتها بخمسين الف تردين اذبها واني مقررة حتى إذا خصلت احتفظ بالگشر 

لزمت اظافرها تكرض بيهن بين اسنانها بخوف نوب الشارع الدخل بي يصوفر فارغ مالت عليَّه تسئل 

:: شايلة شفرة مگص مشرط ابرة ،،،خيط صخام بعيني 

:: لا والله بس حمرتي الماركة بالجنطة 

:: شسويها بيها اذا طلع بينا گبل اگله اوگف خل احطلك من حمرة رحمة الماركة 

ضحكت عليها الرجال عمره بالخمسينات وهي جمدت ع نفسها النهار كله تمشى نافخة عضلاتها  وباقل موقف تجمد ع روحها من الخوف وصلنا راس الشارع يم بيت سرى گالت يمك هنانة و طلعت الكروة انطته وهو شمر ورقة صغيرة مطبگو 

عفناها ونزلنا ويا ما حطت سرى رجلها بالكاع رجعت القوة الها 

:: يعني الطريق كله عيونه تشرگلت بگصته وراد يصير بيَّه سكر من ورا علمود يشمر شدعي عليك هسه ولج يمه تعاليلي سافن ركبي 

::اي مو كتلج لا تخافين بس انتِ طوگعة

عوجت حلگها تقلد عليَّه 

:: ومن هيج سباعية شكو نزلتي ما خليتي يوصلج خاتون 

::وابقى وحدي وياه لا عيني خليني اتمشى منا اسوي رياضه وانتِ ادعبلي لبيتكم يله 

راحت تمشى بفرعهم واني كملت شويه عنهم بيتنا طبيت البيت صوت كارتون و مهدي كاعد يباوع مدت راسها رانيا من المطبخ 

::ها اجيتي شو تأخرتي اليوم خطية أبوج قلق عليج يتصل ماكو 

عگدت ما بين حواجبي لان ما اجاني اي اتصال و موبايلي بي صوت رديت عليها واني اطلع موبايلي اشوفه 

:: مو الشارع بي حفريات السايق جابنه بغير طريق 

طلعت موبايلي شفته طافي مخلص شحن 

:: موبايلي مخلص شحن مادري بيه وينه ابويه لعد 

::طلع برا ينتظرج عود يمكن راح يم محل ابو مصطفى يله فوتي بدلي منتظريج ما تغدينه 

طبيت غرفتي بدلت ملابسي غسلت وصليت اول ما طلعت من الغرفة اجاني مهدي يركض 

:: شنو جبتيلي وياج 

:: اليوم ما جبتلك لان العصر نطلع لسوگ واشتريلك مناك 

لمعت عيونه ابراءة وطلع اصابعه يعد و يحجي 

:: اريد سيارة مال شرطة واريد شفل و رافعه و... 

صاحت بي رانيا 

:: بعد ما تريد بالسوك گله مهدي 

باوع الها مبرطم شفايفه بزعل اني اگدر اشتريله بس ما اريد اعوده ع تبذير وشنو يريد لازم يجي 

::لع حبيبي شغلة وحدة تشتري و كلما نطلع اشترلك حاجة 

صفن بوجهي يفكر 

:: سيارة مال شرطة واطلع صوت 

::  صار من عيوني 

ضيقت عيوني من شفت أزاد متلفلف بالبطانية ونايم اديه بمكان و رجليه بمكان سئلت رانيا استفسر 

:: من شوكت اجه ازاد مبين صارله هواي نايم 

اخذت رانيا مهدي تغسل اديه قبل لا ياكل وهي ترد 

:: اي رجع من العشرة بس ممتحن وطالع يكول عندي شغلة مهمة منتظرها ماگدر اكمل الدوام 

رحت عليه اگعده فتح عيونه بنعاس من شافني ضحك 

: هاااجيتي 

:: شلون طلعت من المدرسة ولك بس لا شردت هم 

ضحك ولزم خدودي وتقرب باسني بكل خد 

:: هي كل اخت اخت بس انتِ ام 

::لا تأكل براسي حلاوة و تضيع عليَّ السالفة سوالفك هذني حافظتهن گول ليش طلعت من المدرسة 

قطعت كلامي صافنة وعقلي يفكر بسوداوية ضربت ع فخذي وصحت 

:: ولك بس لا مسويلك سالفة و فصلوك 

وهو فز ع صوتي دفر البطانية يسكت بيه وعيونه ع باب البيت لا ابوية يجي و يسمعني 

::خلفله عليج عمي سكتي لا يسمعج ابويه رايدها من الله عليَّ  ترى والله فقير اني مادري منين اجتني هاي السمعة

:: اي خطية فقير ياخذون خبزتك من ايدك 

::لا مو فقير ترتبيتج اني 

جريته من اذنه لويتها وهو يحاول يتملص من بين اديه ويضحك 

:: شقصدك ولك اني وكحة 

فك روحه مني ضحك ورجع ليورا ياخذ مسافة أمان يأمن ع نفسه خاف تلوحه ضربة مني 

::  تردين الصدك 

;: لا جذب عليَّ اني قابلة

::لا اني ما اعرف اجذب هسه راح احجي وياج اختي مو امي الصدك اي مو وكحة بس سباعبة ما تسكتين ع حقج واني تعلمت منج بعد 

::ملاحظ جنابك صارلك ساعة تلف و تدور وماكلت ليش طلعت من المدرسة وشلون طلعت 

ربع كدامي عينه ع موبايله كل شوية يتفقده وكال بضحك ولا كأنه مسوي شي 

:: شنو شلون هاي هم يراد الها علم حايط موجود  و طفرت منتظر شغلة توصيل گالي الظهر يجي ولسه ماكو

ضربت أيد ع ايد بيأس من تصرفاته الوم بيه و اعاتبه اخاف عليه من عصبية ابوية لان لو راد يحاسبه صدك لا اني ولا عروة نگدر نوگف بوجه 

::  تدري اذا يعرف ابويه شيسوي بيك 

سفط المخاد وحدة فوگ الثانية ونام وحط رجل فوك رجل يحجي بين القلق و الضحك 

:: يعرف كلش زين ماكو طلعة من المدرسة قبل الحله الا واحد يشرد بس هو غلس مو گتلج بدا يقلقني دا يجعهن عليَّه 

:: همزين من تعرف وهسه احجي شنو هاي الحاجة المنتظرها

:: لعد لو اريد اكلج شنو هي خو اوصيج انتِ تستلميها و ابقى بالمدرسة اكمل دوامي 

طنگرت بوجه نزعت شالي فتحت سترتي اجه وراي يتوسل 

::عليج الله اذا ابويه حجه لان طالع من المدرسة گليله اني مريت عليه و اخذت اله أجازة 

:: لعد من هيج خايف ما وصيت رانيا ابويه هنا هم و همه يستلموها 

ضحك ياشر ع نفسه ويحچي بستهزاء نافخ صدره عود هو مايخاف... يحجي بعنجهية 

:: منو يخاف اني!!! تهي بهي لو اخاف تلگين من المدرسو للبيت بس هيج شويه تعبان مابيّ حيل صوندته 

جذب اذا ابوية صاح بيه صوت يگوم يطگطك ويبقى يوم كامل يتختل وين ما يشوف ابوية يشرد منه لغير مكان

:: خوش لعد من يجيك لا تجي تختل وراي 

اجت رانيا تنهج بأنفاسها من ورا الحمل 

::عوف السوالف هسه و اطلع صيح ابوك گله رحمة اجت وجيب وياك بطل لبن 

قبل لا يطلع اجه ابوية من الباب خزر أزار بعيونه بس ما حجه شي وهز راسه بتوعد ومن صد وجه عليَّه ابتسم 

:: ها بويه الله يساعدج اجيتي واني انتظرج يم ابو مصطفى ظل بالي عليج شو ما شفتج من فتي 

:: هلا يابه مو الطرق حفريات ومسددة تأخرت 

::اي بويه لو شايلة الموبايل يابه راح اتأخر خليتني گاعد واضرب اخماس بسداس 

::خلص الشحن وما ادري بيه الا وصلت البيت و رانيا گالتلي 

گمت ويا رانيا اساعدها فرشنا السفرة اجه عروه من دوام شاف الاكل ضحك يفرك اديه وحده بالثانيه بحماس 

:: يا يابه دولمة

غسل اديه واجه كعد ياكل وبين مناكر مهدي و أزاد كملنه اخذت الملابس غسلتهن و شريتهن ع حبل طبيت لگيت رانيا كافه شغل المطبخ نظفت الهول و رتبته  اجاني مهدي من برا يبچي 

::ها شبيك هم تعاركت

:: أزاد گلي اجيبلك مصاصة ام الدجاجة هي و الكتاكيت ملتها وما جابلي 

دلگت جبيني من الصداع و عركات مهدي و أزاد من يصبح الصبح لحد ما انام عبالك رويسية و أزاد دائما يضحك ع مهدي و خطية هذا يصدك شلته مسحت خشمه عيونه تكت وهو يكت غسلت وجه 

:: اسكت حبيبي مو راح نطلع لسوك العصر ومناك اشتريلك كلشي 

هز راسه فرحان گعدته گدام الشاشة و طلعت اله كارتون اجت رانيا بيدها كلاص عصير هم گعدت يمنه نباوع ويا مهدي حجت فجأه 

:: اگلج ما تعلميني اقرا قرآن والله بنفسي اختمه 

صديت عليها مستغربة طلبها

:: اي ليش لا بس شرايج اعلمج قراءة وكتابة اول شي و انتِ راح تگومين تقرين وحدج  

صدت بجسمها كله عليه و بوجها ابتسامة حماس شفت الفرحة تطلع من عيونها واضح من تعابير وجهة شكد متحمسة لهذا الشيء عبالك حصلت على فرصة چانت تنتظرها گالت بلهفة 

:: صدك ! عليج الله ! تعلميني؟ 

::  اي والله لو گايلتلي جا علمتج من زمان اني ردت افتح وياج الموضوع بس كلت خاف هي ما تريد بين شغلها و مهدي ما تلحك 

:: لا والله اريد من و اني صغير بنفسي اعرف اقرا و اكتب 

:: لعد انوب كل يوميا افرغ من وقتي ساعة اعلمج بيها 

:: نبدي هسه 

حجتها بحماس صح تعبانة بس عبالك طفل فرحان و متأمل ماگدرت اكسر خاطرها 

:: اي خل اجيب دفتر و قلم اوكفي 

گمت لغرفتي طلعت دفتر مسودة عندي و قلم انطيتها الحروف اول شي و قسمتهن الها و علمتها عليهن باوعت الهن وگالت مستصعبة الأمر 

:: اكلج مو احسها صعبة اتعلم و اني جبيرة 

:: و شعليه العمر ما طول انتِ رايدة تگدرين كلشي تسوين اكو بنات تركن الدراسة بس يحبنها رجعن خارجي و بيت وجهال و نجحن و دخلن جامعة هم 

صفنت تنظر بعيد عبالك نرسم حلمها گدامها وشافت نفسها بيه بنبرة متروسة فرح وأمل گالت 

:: يااا وادخل اني جامعة و ابدل من الصبح واشيل جنطة و دفتر هم 

:: اي ليش لا  واحلى خريجة تصيرين والله 

:: اخاف ابراهيم ما يقبل 

:: يكيف ابويه تدرين بي يحب الدراسة ويحب واحد يسعى ويدرس 

كلامي مثل دفعة تشجيع رجعت تكتب و تردد انطيتها كلامات ع حروف وشلون تتهجى هم دنگت ع دفتر تكتب تهمس كلمات الحروف تتهجى اجه ابويه من برا رفعت راسها اله فرحانة

:: شوف ابراهيم رحمة راح تعلمني اقرا واكتب السنة الجايه اقدم خارجي سادس شتگول انت موافق 

ضحك ابوية ع ضحتكها كعد بصفها و حاوط كتفها باس راسها

:: والله لو ادري بيج رايدة الدراسة اني بيدي اعلمج 

:: لعد خوش ترى مو بس سادس ثالث وسادس اعدادي هم اريد ادخل جامعة 

:: دخلي بويه ما اكيف اني تصير بيدج شهادة و وعد مني الج اوكف بالتخرج واطش الج جكليت هم 

ضحكت متحمسة و الفرح مالي عيونها نص ساعة وگالت 

:: يله خل نروح لسوگ وبليل لو باجر هم نگعد نقرا 

:: يله هم ياله نروح و نرجع 

بدلت ملابسي و بدلت لمهدي وياي لان رانيا تتعب خطية كملت 

طلعنا ابويه گاعد بالباب يعدل بالتراب يريد يسوي حذيقة خارجية من شافنه مد ايده بجيبه طلع فلوس خلى بيد رانيا مشينا لراس الشارع التفت مهدي ورانا وگال 

:: اجه أزاد ذااااك

التفتت صدك اجه يمشي بخطوات سريعة مبتسم بيده موبايله يخابر رفع ايده يأشر رجعت نظري لشارع تكسي واگفة وگدامها صاحبها هم يخابر رجع الاشارة لـ أزاد ونهى الاتصال

عبرنا ازاد وهو يضحك راح اله اخذ منه علاگة ورقية فتحها يشوف الي بيها ماعرفت شنو طلع فلوس انطاه ورجع للبيت واحنه رحنه لسوگ 

اشترينه تجهيز حديث الولادة لطفلة و كاروك ومهدي جلب بالألعاب گوه قنع ياخذ حاجتين  

رجعنه من السوك سيارة حديثة عالية واگفة قريب بابنا طلع نزار جيرانه وياه واحد ثاني صعدوا السيارة و راحوا باوعتلي رانيا 

:: هذا يمكن اخوه شنو تصالح وياه اهله 

جعدت جبيني ما مفتهمة كلامها لان ما اطلع واختلط من دوام للبيت 

:: ليش هو متزاعلين هو وأهله 

:: اليوم البارحة غير 

:: ع شنو 

:: غير اهله طاگين بالدولة كلهم أبوه و عمه قضاة و اخوانه كلهم واصلين وهو حب بنيه فقيرة ابوها يلم حديد وابوه ما قبل ياخذها راح أخذها وحدة وعقد سيد ابوه من عرف لازمه مكسره و طارده من البيت حتى هويته ومستمسكاته اخذهن حتى عقد محكمة لسه ماعقدوا خطية 

:: استغفر الله معقولة هيج گلبه ينطي يكسر گلب ابنه و نوب يطرده و شبيها الفقيرة عايزها خشم رجل يعني ابنك حبها خل ياخذها 

:: هاي بعد كلمن و تفكيره 

وصلنه يم بيتهم واگفة البنية زوجة نزار اسمها طيبة بالباب وحاطة شال راسها ايدها ع بطنها و تباوع ورا السيارة وكفت رانيا تحجي وياها 

:: ها ولج ما الله هداهم عليكم ع اقل تعقدون محكمة قبل ما تولدين 

ابتسمت طيبة فرحانة 

::هذا اخوه الجبير حن گلبه عليه واجه تصالحوا هو وياه وگله راح يحجي ويا ابوه و اخوانه الباقين بلگي الله يلين گلبهم عليه هم من يعرفون راح يصير عنده طفل 

:: ان شاء الله خير عاد خل يجيب الكم الأوراق حتى تعتقدون محكمة ترى ما يدخلوج مستشفى تجيبين بلا عقد

:: نشوف الله كريم هو اخوه وعده راح يحجي ويا ابوه ويقنعه 

عفتهن يسولفن اجيت ادخل شفت أزاد گاعد ع بلوكه يم الحايط حاط رجل ع رجل و يغني منسم صحتله 

:: أزاد تعال طب يله راح تمطر

التفت الي ضحك اشرلي اطب وهو بقى گاعد وگال 

:: ابويه محضرلي الصوندة السودة و محشيها حصو

:: شسويت ولك انت ما توب 

:: والله ما سويت هذا مصطفى الوكي اجه يصيح كدام ابويه بالعناد منطينه الأوراق ورا ماطلعت اني وراسب

قبل لا احجي طلع ابويه عيونه دم من العصبية بيده الصوندة يأشر بيها لـ أزاد

:: تعال طب لا طلع صوتي كدام الناس 

:: بويه بس خل افهمك 

::  اي تعال يمي هنانة وفهمني خو ما اني بالشام وانت بحلب و نسولف 

يحجي و يتقرب و ازاد بساع ابتعد عنه راكض لنص الفرع وابوية يعض بـ إصبعه اله 

:: والله ما اطب لو اعرف اباب بالشارع اليوم 

صاح ابوية وهو راص ع اسنانة بغضب مكبوت 

:: تجي اطب لو اجيك اني وحق هو الله اذا اجيتك بالشارع اضربك والله حافظ ع كرامتك وطب جوه انگتل احسلك 

:: ما تكدر تركض وراي خليني بالشارع احسن الكرامة ما توكل خبز 

ركض ورا ابويه وهو صار وراي لازمني من قميصي ومنين ما يريد ابويه يجي يفرني بتجاه مسويني درع بشري 

::هد اختتتتك منا ناس شتكول علينا ازاد 

:: بس اسمعني يابه ترى ما صاير هاي ولا دايرة ايدك تشتغل قبل لا تسمع و تفهم 

:: شسمع بعد بالمدرسة مصخمها ويا العالم مفشلني بالبيت تعارك هذا وترد ذاك شسمع بعد گللللي

::  هم يعيلون بيَّ يابه تريدني اسكت مثلاً 

:: لا يا بوي شلون تسكت شيلك سيف و طبرهم

ازاد بيه حالة البرود لو الكدامة يفرفح ويشتعل نار وهو يبقى يضحك 

:: صار من عيوني 

ضغط ابويه ع أسنانه بعصبيه ونطق اسمه يشدد ع حروفه 

:: أززادد راح تجيبلي الجلطة ازاااااد

كرصته حيل وهو من شاف ابوية هيج هم ترك الضحك وحجه بجدية 

:: بس اسمعني أول عليك الله وبعدين احكم

:: طب واسمعك جوه 

:: استغفر الله بويه هسه اسئلك سؤال انت تصلي الظهر قبل الفجر

:: وين تريد توصلك انت 

:: هسه دجاوب حتى اكلك وين اريد اوصل 

:: لا 

::  لعد ليش تريد تضربني قبل لا تسمع 

لزمت أزاد من ايده اريده يطلع من ورا ما يقبل حجيت وياه ابويه بهدوء 

رحمة :: خلي يحجي بويه لخاطري وبعدين تفاهم وياه 

هز ابويه راسه بمعنى احچي

أزاد :: بويه هذا مصطفى فد واحد لوگي و الدرجة هذة مال انكليزي قديمة قبل لا اوعدك راح ادرس واشد حيلي يعني مو مال عربي الي درسناه قبل يومين والله 

::وهسه اني لازم اسكت وانت مصخمها بالانكليزي 

:: هو لازم تسكت لان هذة قبل الاتفاق وكلشي بعد العملة حرام 

زميت شفايفي اكتم ضحكتي من كلامه دغيته بعكسي ابطنه وحجيت وياه ابويه 

:: اخر مرة يابه لخاطري 

:: هاي لخاطر اختك راح أأعديها الك هالمرة بس والله اذا... 

قبل لا يكمل كلامه تقرب عليه أزاد حضنه وباس راسه 

::قبل لا تكمل كلامك اني بعد انطيتك كلمة والله دا اقرا و اجاوب زين هم وهسه تشوف اذا ما بيضت وجهك بالاخ

لانت ملامح ابويه وگله 

:: يله فوت اسبح و اكلك لگمة 

ابتسمت ع حنية ابويه دخلنه للبيت و رانيا اجت هم تسولف قصة طيبة و نزار مقهورهةعليهم سوينه عشه لفات تعشينه 

و گاعدين نتابع افلام كاترون حلو طلعه ازاد لمهدي وكلنا ضلينا نتابع قوري الجاي ع صوبة وابويه كل دقيقة والثانية يشرب باوعت عليه شرب اخر الإستكان وعيونه ع الشاشة مركز نزلت القوري صبيت اله وهو مايدري التفت الي توه يحجي 

:: صبيلي من يمج   بويه 

ضحك من شافني صابة أخذه مني و شرب منه شويه أخذته منه رانيا 

::  دكافي مو گلبك راح يوكف جكاير وچاي لو غارگة السفن مالتك هم مو هيج 

:: بس هذا رانيا جيبي بعد ما اشرب 

باوعت عليه واحنه نتابعهم شالت الإستكان وشربت الجاي هي 

:: ها اها خلصتك منه.. رحمة نزلي القوري من الصوبة ماكو بعد 

باوع الها و رجع باوع الي أيدت كلامها

:: صدك بويه مو زين عليك اصلا حتى القوري خلص ما بقى بي شي 

هز راسه و مهدي گاعد بحضنه انتبهت عليه دنگ ع مهدي يشاوره هز راسه مهدي يضحك وگام بحماس يركض للمطبخ اجه بيده ستكان لزمت القوري بيدي وهو يريد يصب اندار ابويه عليَّخ 

:: اخر استكان بويه راسي راح ينفجر 

گامت رانيا وكفت كدامه ومدت ايدها اله حتى يگوم.

::  دگوم خل انام راسك يوجعك من الگعدة من غبشة الله گاعد وهاي دكت الـ 12 

حط ايده بايدها ونهض 

:: اي والله حتى عيوني راحن بعد ما اشوف 

مدت ايدها لمهدي هم 

:: يله مهدي تعال نام كافي لعب 

عافها اجه بحضني گعد 

:: انام يم رحمة اني 

:: عوفي يمي روحي نامي  ارتاحي انتِ

راحت هي و ابويه أزاد مدد و تغطى بقينا نباوع صارت بـ الوحدة و ربع خلص مهدي غفى بحضني و أزاد هم نام گام عروه طفى الشاشة وجاب بطانية ثانية غطى أزاد صوت الگراگيع و المطر تذكرت الملابس برا وبحضني مهدي ماگدر اگوم 

:: عروه اركض الملابس ع حبل لا يتبللن 

طلع جابهن بساع ومد فراشه يم ازاد ونام،،، شلت مهدي لغرفتي خليته بفراشي غسلت وجهي وخليت مرطب هم رحت اريد انام رجعت فتحت الكنتور جريت نفس عميق واني اباوع لدشداشة امي معلگه بين ملابسي طلعتها لزمتها من طرف و طرف اتخيل امي واگفة 

گبالي.. طولها شعرها الأسود يتخلله الشيب رغم چان عمرها صغير بعدها مو ذاك الكبر بس الشيب غزى راسها اذكر كلامها ابتسامتها حنانها حضنت الشداشو لصدري اشم عطرها كأني حاضنه امي نفسها بستها رجعتها لمكانها بحرص 

ورحت مددت يم مهدي انتظر انام و اغفى و تسير عليَّه بمنامي مثل كل يوم من تجيني واشوفها 

صوت ينده باسمي وايد تهز كتفي حتى اگعد بلكوة فتحت عيوني صارت رانيا گبالي 

:: ادري ميتة.... ولج  گعدي 

:: همممم 

همهمت الها بنعاس وهي كالت 

:: كعدي هذا نزار  بالباب يكول طيبة مدري شبيها وكايلة اله صيحلي رحمة 

فتحت عيوني وراح النعاس مني نهضت جذعي من الفراش 

:: شنو شبيها 

:: ماعرف كسر الباب علينا يله كومي شوفيها خطية البنية مالها احد هنانة 

هزيت راسي الها گمت لبست حجابي ابويه بعده نايم من العلاج نومه ثگيل قشعر جسمي من لفحني الهوى البارد واني چنت دفيانة... عروه واگف يمه بالباب 

;; هاا خويه خيرها طيبة شبيها 

::  خيتي فدوة لعينج بس شوفيها شبيها تصيح صيحلي رحمة 

:: شنو شبيها مو بعده موعد ولادتها 

::  اي البارحة اخذتها لدكتوره گالت بعد اسبوع تسوي الها عملية وهسه ماعرف شبيها تخربطت 

رد عليه عروه معترض 

:: لعد غير تأخذها للمستشفى ياخويه شتگدر تسوي الها بالبيت 

:: مو تدري حظر تجوال الي ساعة واكف ع شارع اريد لي سارة تفوت ماكو 

مشيت ورا و رانيا وياي و عروه هم ظلوا برا و دخلنا الغرفة عليها اني و رانيا فتحت عيوني ع وسعها من شفت حالها امدده ع جرباية ترجف و وجها يصب عرگ والألم يعصرها ما جنت اظن وضعها بهل سوء اخذت خطواتي عليها بساع 

;; طيبه شنو يوجعج شبيج شو صححي وياي 

فتحت عيونها خاملهةبلعت ريگها أكثر من مرة بصعوبه 

:: رحمة دا انزف ساعديني احس روحي راح تطلع

شلت البطانيو عنها الدم تارس الفراش هزيت راسي الها طلعت لزوجها 

::دا تنزف شمنتظر بساع شوف سيارة

من سمع كلامي دخل الها بساع حاير مرتبك يحجي وياها و رجع طلع يحجي وياه نفسه بقهر و يردد راح تروح مني 

رد عليه عروه واگف خارج الغرفة

:: دمشي خل نشوف سيارة احسن ما وكفتك هنا

::خل اتصل ع اخويه بلكي يرد و يجينا 

طلع موبايله ايده ترجف يتصل وماكو رد گال بضياع لعروه 

::  منين اجيب سيارة اني هسه راح تروح من ايدي خويه 

جره عروه الي واگف برا من ايده يطلع هو وياه من البيت 

عروه :- بيت ابو إيهاب عدهم سيارة امشي نشوفهم

طلعوا بساع يشوفون سيارة اجيت ارجع الها طلعت رانيا 

:: ولج خطية شحالها صايرة ما تجيبيها 

همست الها بصوت ناصي حاد 

:: ماشوفين وضعها شلون تعبانة،، قابلة متمرسة هسه ما تجيبها بالبيت وتتحمل مسؤوليتها بهذا وضعها مو نوب اني جديدة

دخلت الها لازمة البطانية تعض بيها جريتها منها 

:: طيبة لا تدفعين مو زين عليج لا تجيبين هنانه بس شوية تحملي هسه راح يشوفون سيارة وناخذج 

نزلت دموعها بعجز حجت تلهث بأنفاسها عبالك تركض بمعركة مالها نهاية 

:: ماعدنا عقد رحمة حتى لو رحت للمستشفى ما يدخلوني 

::ماعليج انتِ بس اهدئي واذا ما دخلوج ناخذج لمستشفى اهلي لاتفكرين بأي شي هسه انتِ بس اهدئي 

عيوني تراقبها ماگدر اجيبها ماعندي اجازة و وضعها تعبان هم شلون اذا لا سامح الله ماتت بيدي... لو صار شي ع طفل روحي تنعصر وياها وهي تشهگ وتردد بصوت متقطع ادعية بين الألم و الرجاء 

لزمت ايدها بين اديَّه احاول اطمنها 

:: طيبة باوعيلي اخذي نفس عميق شهيق زفير حتى تهدئين لا تصير تقلصات عندج 

بدت تطبق كلامي تاخذ نفس قوي و تزفره كل شهگة تجرها عبالك تسحب جزء من روحها هي تدعي وان ادعي وياها توي تنتفست براحة لان بدأت تهدأ فزيت من صرخت 

:: لحگيني رحمة راح اجيب 

جسمها كله يرجف باوعت الها النزف زاد ونفسها ثگل صرخت برعب من شفتها 

::  رانيا الطفل نزل 

الفصل الثالث من هنا