رواية عشكت جنوبية الفصل الثاني بقلم نسرين الاسدي
**
هنادي :گعدت على صوت الديج بعد ما جنت حلمانه حلم كلش خوفني گعدت على افراشي تعوذت من الشيطان وصليت على محمد وانه اتنفس حيل ودگات گلبي كلش سريعة وريگي يابس وكل ما غمضت اعيوني رجع عليه الحلم رفعت دولكت الماي وردت اشرب بس طاح منه على فراشي لأن ايدي ترجف
باوعت لأمي لگيتها بعدها نايمة كسرت خاطري لأن تعبانة وماردت تخرب نومتها لفيت روحي بالشرشف وحاولت ارجع انام ..بس ما گدرت ضليت اتخيل الحلم كل ساع
گمت بعدت خواتي وصرت بيناتهن حتى ما يرجعلي الحلم وضليت اقراء ايات وادعي حتى انسى الحلم لحد ماغفيت بدون ما احس
گعدت الصبح على اصوات اخواني وخواتي وهمة يضحكون عليه
فتحت عيوني وباوعت عليهم ..گلت بسرعة: شنو شبيكم؟ !..عليمن تضحكون؟ !
صاحت امي : كافي يمة ..بسكم يلا
هنادي :گمت وتقربت لأمي و سألتها: يمة شنو الي صار
خلت امي ايدها على جتفي وگالت: ما صار شيء يمة روحي غسلي انتي
فهد: يمة ليش تجذبين عليها كليلها بالصدگ ..ضحكن حياة وليلى وگالن سوة: هنادي عود هاي انتي الجبيرة وضحكن حيل
ضحك هيثم وياهم ونوب صاح عليهم : كافي بنات فهد اسكت عوف السالفة
صاحت هنادي عليهم : شنو هو احجوا ..ليش تخلوني مثل الأطرش بالزفة؟ !
فهد :علينا هنادي ..هو انتي اصلآ عفتي فراشج ورحتي يم البنات بس حتى ما نشك بيج ..بس احنه عرفنا السالفة ..ها هنادي ام البول
هنادي : استحيت وصار وجهي احمر ودمعن عيوني بس ماهتميت وركضت ورا واصرخ عليه : لگ فهد انا اعلمك ..بس اصبرلي شوية وين تروح الحگك
ركضت سمية وراهم حتى تفاككهم وهيثم ضل ويه خواته فوگ الي ميتات من الضحك عليهم
##
ليث : گعدت من النوم شفت الساعة صايرة فوگ العشرة الصبح واني بعدني ما راجع للبيت ولا رايح للشركة
گمت عالسريع دخلت الحمام سبحت ولبست ملابسي خليت فلوس على الميز وطلعت
نزلت وركبت سيارتي بس قبل لا اتحرك قررت اخابر مروان أول لأن ادري بيه هسة بعده نايم وماطالع
رد علي مروان وهو نعسان : الوو
ليث : مروان وين انته؟ !
مروان : بعدني بالملهى حبيبي
ليث : مروان اتأخرنه على الشغل يلا تعال بسرعة
مروان : ماشي ..جاي ماراح اتأخر
بعد نص ساعة تقريبآ جان ليث گاعد بمكتبه ويخلص اوراقه
اندگ الباب ودخل مروان :صباح الخير ليوثي
ليث : ياصباح هذا مروان شلون تتأخر هيج طار نص اليوم واحنه كلشي ما مسوين
مروان : اعتذر حضرة المدير ماراح تنعاد ..بس البارحة كثرت بالشرب شوية
ليث : يلا لا تعودها بعد
مروان: صار ..حاضر سيدي
ذب عليه الملفات الي يمه
ضحك مروان وشالها وخلاها على المكتب مرة ثانية وطلع عالسريع
##
دخل قاسم للبيت واتلگوه الكل وگالوا : الله يساعدك بابا
بس هو شافهم مو على بعضهم
سأل : خير شبيكم واحد زعلان من الثاني صاير شيء وانا ما ادري ؟!
سمية : لا حبيبي قاسم السالفة ما تستاهل عوفهم
هيثم : وليش لا يمة كليله خل يعرف شسوت هنودة اليوم وضحك
ضربته هنادي على جتفها وگالت : هيثم انوب انته
ودمعن عيونها
سحبها قاسم اله وحظنها وگال : هيثم هاي ليش ويه اختك ..باسها بگصتها ومسح دموعها
وگال : لا تبجين حبيبتي هنودة دموعج غاليات
هي ما تحملت بجت اقوة وحضنت ابوها حيل
وگالت : اروحلك فدوة بابا ..بس هيثم وفهد كلش زعلوني
باوع الهم وگال : ليش ويه اختكم يلا گلولي
ضحكن حياة وليلى وگالن : بابا غير هنادي صبحت بايلة اليوم واجت نامت يمنه حتى محد يعرف وضحكن
صاح عليهن : ليلى حياة ..شنو هالحجي اسكتن يلا
هنادي : بابا والله البارحة حلمت حلم خوفني ومن شربت المي نزل على الفراش وهمة من الصبح لحد الأن يضحكون عليه
قاسم : يلا كافي ولحد يعيد هالسالفة مرة ثانية مفهوم
وانتي بابا هنودة عوفيهم لا تضوجين يلا انا جوعان ماكو غدة اليوم
مسحت دموعها وگالت : صار بابا
##
دگ مروان الباب ودخل
مروان : ليث عندي خبر
ليث : شنو هو گول
مروان : هذا اگو واحد تاجر جبير ومعروف شاف شركتنا وحب يتعامل ويانه
ليث : اي وليش لا
مروان : بس المشكلة هو مو هنا بالبصرة ..احنة نگدر نخلي رئيس الفرع الي عدنه هناك يروحله ويتفق وياه
ليث : لا مروان هيج شغلات اني ما أئمن بأحد غيرك انته وهسة انته ما موجود لازم انروح اني وياك ونعرف كلشي عن هذا التاجر وبعدين نقرر نشارك وياه لولا
مروان : عادي ليث اذا انته ما حاب تروح اروح اني بمكانك وارتبلك الأمور
ليث : خل افكر الليلة واردلك خبر باجر
مروان : صار ..يلا هسة اني استرخصك لازم اروح
ليث : ليش ماتجي تتغدة وياي مروان؟ !
مروان : خليها غير مرة اليوم امي مسوية برياني واني اعشگه من ايدها
ضحك ليث وگال : اذا هيج ..بالعافية لعد
مروان وهو يوگف : الله يعافيك ليوثي ..يلا اشوفك باجر
##
گعدوا هنادي وأهلها يشربون جاي بعد الغدة
گالت سمية : أكول قاسم انا اليوم جنت عد جيرانه وانطتني خوش فكرة
قاسم : وشنو هي سمية ؟!
سمية : گالت أكو نسوان الله رازقهن وموضفات ورجالهن هم يشتغلون وهنة ما فارغات لشغل البيت واكثر الأوقات يجيبون أكل جاهز وخبز من المخبز
واذا انا اتفقت وياهن وخبزتلهن راح ينطني مبلغ كل يوم حسب عدد الخبزات ..انا شفتها خوش فكرة انته شتكول؟
قاسم : لا حبيبتي انا ما ارضاها ..انا بعدني موجود وبيه حيل شلون اخليج تشتغلين وتخبزين للناس يعني همة نسوانهم مرتاحة لأن شغلهم زين وانا اتعبج عالمود الفلوس ..لا سمية ما حبيتها منج
خلت ايدها على رجله وگالت : حبيبي قسومي انا مستعدة اتعب حتى اساعدك ليش انته مو جاي تتعب عالمودنه وحتى نومة الليل ما متهني بيها شكو بيها خليني اساعدك ..ولا تخاف ماراح اخبز هواي بس لوحدة ثنين ..واذا تعبت انا من نفسي راح اعوفها هلبت الله وتتعدل حالتنه اليمته احنه نضل هيج ومنو يدري يمكن اگدر الگه شغلة لهيثم وفهد على عرف هاي الناس
باوعلها ونزل رأسه
ضلوا هنادي وخوانها وخواتها يباوعن لأبوهم منتضرين رأيه
شوية وگال : يلا موافق بس بشرط ما تعبين روحج ولا تتفقين ويه هواي بنفس الوقت
ابتسمت وگالت : ان شاء الله يروحي
##
گعد ليث ويه اهله على الغدة وگال: بابا اريد أگولك شيء
سامر : تفضل ابني
ليث : اني حطلع للبصرة باجر
سامر : ليش بابا؟
ليث : أكو تاجر يريد يدخل ويانة بشراكة واني ما أئمن بأحد وغلطة صغيرة راح تكلفنه هواي لهلسبب لازم اروح اني بنفسي واعرف هذا الشخص منين بالظبط وكلشي يخصه
سامر : اذا هيج مثل ماتريد ابني ..ربي يوفقك
ليث : شكرآ بابا
اسراء : وشكد راح تبقى هناك؟ !
ليث : بعدني ممتأكد بس احتمال خمس طعش يوم اوعشرتيام
اسراء : ماشي ماما بالتوفيق ان شاء الله
هنادي : گعدت الصبح لگيت ابوي طالع للشغل واخواني هم وخواتي رايحات للمدرسة لأن مدرستهن صباحي اليوم
وامي مخلصة نص شغل البيت ..سألتها ليش ما گعدتيني گالت شفتج تعبانة وخليتج نايمة وبعدين لبست عباتها وطلعت تسأل منو الي تحتاج تخبزلها هي لأن اليوم راح يصير أول يوم الها بهاي الشغلة
كملت انا بقية الشغل من تنضيف وسويت الغدة ونوب لبست حجابي و طلعت للحديقة مالتنه حتى اجيب النه خضرة
هي ما جان بيها هواي انواع ..بس كرفس ونعناع وريحان
بس بابا معتني بيها ومرتبها هو جان ناوي يزرع بعد غير الخضرة بس ما عدنه مساحة هي صغيرة ما تجاوز ثلث مترات
گطعت من كل نوع مجموعة ورجعت للبيت حطيتها ونضفتها
شوية واندگ الباب
طلعت امي وجانت فرحانة
گلت: يمة اشوفج فرحانة الله يديمها بس شنو السبب
گالت: يمة حصلت ثلث بيوت اخبزلهم وباليوم راح ينطني عشر تالاف على الوجبة وهاي سبب فرحتي راح أگدر اساعد ابوج وخوانج
گلت: اي يمة الحمدلله والشكر
ورا شوية اجوا بابا وخواني وخواتي هم رجعن غسلوا وبدلوا ملابسهم وانا جهزتلهم الأكل بس،طلعوا لكو كلشي كامل
گعدنا ناكل واحنه متونسين لأن حياة وليلى جايبات درجات عالية وفهودي وهيثم هم خوش بايعين اليوم الحمدلله
ليث :قررت اليوم اطلع للبصرة جهزت كل اموري وخلصت شغلي بالشركة
بعدين خابرت لمراون حتى يجهز نفسه ويروح وياي وصلي الساعة اثنعش الضهر ركبنا بسيارتي وطلعنا انا احب اروح بسيارتي لكل مكان ماحب اتقيد ويه شخص واعتمد عليه
تحركنا ومروان جاب وياه أكلات طيبة امه مسويتها طبخها يعجبني لأن هي تعتني بي
وصلنا بليل حجزلنا مروان غرفة بالفندق حتى نرتاح بيها الليلة وباجر من الصبح اروح لفرع الشركة مالتنه ونشوف هذا التاجر
هنادي: انا اليوم ضجت من نفسي لأن شفت امي راح تساعد بابا بالمصرف واخواني جاي يتعبون حتى يساعدونه هم وخواتي يدرسن حتى يحصلن معدلات وتفيدهن دراستهن بالمستقبل
بس انا لا ما جاي اسوي اي شيء اساعد بابا بي بس من شفت الخضرة مالتنه شلون كبرانة وتارسة الحديقة اجتلي فكرة اخذ منها وابيعها عالجيران واذا قبل بابا اروح للسوگ ويه هيثم وفهد ونرجع سوة حتى يصير عندي شيء اساعد بيه بابا انا هم
بس خل يصير الصبح واكله
بس وية ماردت اخلي راسي عالمخدة وانام اجاني ذاك الحلم مرة ثانية وخفت كأني هسة اشوفه رجع ذاك الأسد الي هاجمني وراد ياكلني ..ضليت ارجف بس تماسكت وقريت ايات وماحسيت على نفسي الا وانا نايمة
