رواية لأني عاقر الفصل الثاني بقلم مريم خفاجة
...
فتحت عيوني عدل وشفته كمال
بلعت ريكي وعدلت حجابي وگمت
وهو جر كرسي گبالي ويباوعلي بشك:-أگعدي
گعدت بدون صوت:-ليش نايمة هنا؟
واني اعدل بحجابي كتله:-منتضرة وردة بالحمام
باوع لجهة الحمام ورجع باوعلي:-متأكدة؟
ملاك:-اي نزلت وياها هي بالحمام
ضليت اباوع لكدام جلبت هاي بالحمام شنو السالفة
باوعتله مبتسم يباوع عليه رجعت دنكت
شوية وسألني:-بت منو أنتي؟
ملاك:-بنت إيمان
كمال:-العدها بس بنات؟
هزيت راسي بـ أي
همس بـ همم رجع گال:-الجبيرة الزغيرة؟
ملاك:-لا اني ملاك الجبيرة
كمال:-اها
سكت شوية ورجع حجه:-مختارين أسمج بدقة
مابدر مني أي ردة فعل سكتت وبقيت
؏ وضعيتي من التوتر جسمي كام يصب
عرك مسحت بطن أيدي من العرك وعضيت
شفايفي أعرفه ديباوعلي بحيث حسيت گلبي صار ببطني
كمال:-هسه انتِ شعندج كاعدة هنا؟
باوع للساعة ورجع باوعلي:-ب4 الفجر؟
ملاك:-گتلك منتضرة وردة
كمال:-ماكو احد بالحمام
ملاك:-لا هي هنا
كمال:-ماكو روحي شوفي
گمزت من مكاني بگلبي أسب والعن بيها باوعت لباب الحمام شفته مفتوح معناها طالعه الحقيرة رجعت باوعتله ضحك
صعدت ركض شفتها نايمة ومتغطية رفستها حيل بضهرها صاحت اوووي شبيكممم
ورجعت نامت
نمت بفراشي وأهفي ؏ وجهي من التوتر
شنيمني اني فاهية لغسل الي
گعدت الصبح ؏ صوت
أمي كالت:-يلا يمة خلي نرجع لبيتنه
ملاك:-شنو السالفة يمه البارحة أجينة كلشي ما شفنة منهم
أيمان:-لا هم يلة كافي بعد شتشوفين
ملاك:-؏ اقل للعصر؟
أيمان:-لا شنو للعصر گومي يمه يلا
ملاك:-يا أمي راح يطير البيت قابل
أيمان:-لايرجع ابوج من الشغل ويشوفنه ماكو ويلعب جولة
ملاك:-ماگوم والله تعبانه
أيمان:-شلون احنه ويا العناد گومي يلا گتلج بدون نقاش
تأفأفت وگمت متكسرة غسلت وجهي وبدلت ملابسي ولبست عبايتي ونزلت شفت الكل موجود وأمي واخواتي يتريگن
وجدان:-تعاي خالة أكلي
ملاك:-ماريد
هزت راسها ورجعوا ياكلون واني روحي لعبانه
لازمة الجنطة وأفر بيها
مجرد فكرة راح نرجع للبيت
ونگابل نفس الخلق ما أرتاح جنت محتاجة
أبقى كم يوم أرتاح بيهن بس أمي بعد..
گمت افتريت وگفت برة بالصبة وضليت
العب برجلي بالزرع
_ليش ضايجة؟
التفتت شفتة كمال
ملاك:-مابية شي
كمال:-اذا تردين تضلين عادي حاجي أمج وضلي!
ملاك:-ابوية مايقبل
كمال:-ليش غير بيت جدج؟
ضحكت بگلبي لو يدري اول البارحة
شسوة لأن رحت سنتمترات
ملاك:-مايقبل بعد ، شوية خلي أعبر
ماوخر
رفعت عيوني علي ركز بيهن رجعت أكدت ؏ كلامي:-وخر
وخر من طريقي عبرته مستغربة شبي هذا يلطش
طلعنه لبيتنه وكل احنه گالبين گصصنة
وصلنه للبيت تلگانة جاسر گاعد بالباب
بسته بخدة:-شلونك؟ خو ما ضربتك أمك؟
شاورني:-ضربتني هواي
همست:-الغسل ألها ، وانتَ ماعرفت تدافع عن نفسك ادفعها وخلي تولي
ضربتني أمي ؏ ايدي وخزرتني:-لاتكرهين الولد بأمه ، جاسر أمي مالك دخل بأختك أمك هاي ميصير تسوي هيج
جاسر:-حتى لو ادفعها ماتندفها دبة
ونفخ روحه مثلها
صدك ضحكني واني ضايجة
سمعته أمه وأجت تريد تضربة وگفنه ثلاثتنه گدامها
ملك:-مدي أيدج وشوفي شسوي
ضربتها راشدي لزمت ملك خدها:-أدبسزززز أنييي تهددني وحدة بگد فخذي
خزرتها ملك وما أدراك ما ملك
تفلت بوجهه وخلتها تحتار تمسحه وشالت رجله ودفرتها ببطنها رأسا تدربلت بالگاع
لزمت ملك شعرها وتملش بيها حيل:-جلبة تضربيني وتردين تضربين أخوووووي
ابتعدت ميته ضحك خوش صباح والله
ريم وجاسر لبدوا وراي وأمي تريد تفك ملك عن نجلاء متگدر بس بهالحالة امي تضحك ومن ضحكها متگدر توخرها
لحد ما وخرت ملك وحدها وگالت:-حتى لو تگولين لأبوووي ما خايفة منكم جلاب ثنينكم
بقت تتلوى نجلاء بالگاع عفناها وشردنة واخذنه جاسر ويانه
لطمت أمي ؏ خدها:-عزة بعيني ولجن راح نندك ولجن وين ننطي وجوهنه
ملك:-فنه اليجي يلزمنة اطيح حظه
ملاك:-ما طلعتي گدرتج من ضربني أول أمس
ملك:-جنت صغيرة
ملاك:-صار يومين ترررة يومين كبرتي مليكان هسه تخنسين جنج بزونه
ايمان:-اضحكن اضحكن شوفن شراح يسوي بيجن
اذا طلعنه عدلين من جوة أيدة أكص ايدي
رحت ؏ جربايتي واخذت ريم
لحضني:-عادي تعودنه
بقت أمي بخوفها المعتاد وأحنه گعدنه نسولف ؏ امس سمعنه الباب ندك مستحيل أكابر واكول ما خفت حتى ملك بس بطبعها متبين
دموع أمي كام تجري قبل ليصير شي وترتنه من لا شيء
باوعت لملك وگلت:-گومي فزعي يلا
ملك:-خلي يصعد أول
ريم:-راح نموت من الهوف مو من أبوية
ملاك:-گومي لبدي جوة الجرباية يلا
لبدتها هي وجاسر واحنه كلمن خذتلها زوية كأنما استعداد لموتنة
صعد وصوت صياحة وصل لآخر الشارع غمضت عيوني وقريت ؏ روحنه السلام
اول ما بلش بأمي صفگها
راشديات وصاح:-ولججج متآمراااات ع مرتي أنتي وبناتججج شحشوووو براسججج أهلج الـ....... واجيتو لمرتتتي
أيمان:-ولك اني هم مرتك هم مرتكك
ماصرفله هالحجي ونطاها بوكسي ؏ وجهه
وأتجهه لملك:-ولج بطول النعال تمددددددددديييييين أيدددددددج ؏ مررررت أبوووووج اليوم ادميجن اليوم
ملك:-ما خاف منك وأذا ضربتني أشرد بالشارع وخلي العالم كلها تدري بيك
جان حجيها أكبر منها وكأنو واحد مدربها ؏ كلام
صرت اشوف ابوية بعدة وجوه
الغضب الحقد الكره من خوفي من شكلة
غمضت عيوني وگمت من مكاني
وصعدت ؏ جرباية وصفطت روحي بالحايط
وصرت أناشغ وأبجي بصمت وعلى وضعيتي
نجريت من أيدي صرت أبجي بصوت عالي وهو
موگفني مستقيم ويضرب بية بالحزام جلدي أحسة
وگع وطلع جلد ثاني أحس كلبي خلص نبضاتة من گد ما بجيت وناشغت
الصراخ ، الدموع ، الضرب ، الأهانة
كل يوم ينعادن نفس الـشيء بدون تعب وبدون كلل يستمتع بالضـرب كأنما الضرب ونسة عنده!
مايدري هو بيدة دمرنه...
بين الكاعدة وبين الغافية شهگات أمي تنسمع
دگات گلب ريم وهي نايمة من الخوف تنسمع
ون ملك و وني يلچمن الروح
أخذت ملك لحضني وبست راسها:-عـبالي أكدرلة
أبوية وحششش وحشش
ملاك:-بعد منخلي راسنه براسهم حتى جاسر ممنوع منعاً باتاً يصعد لغرفتنه او تنزلن لغرفته حتى لعب ماكو تعبنه ترة!
ملك:-أنعل أبوهم لابو حتى الينزل الهم
ملاك:-لنحتك بيهم بعد تعبنه كافي الله يخلصنه منهم
هزت راسها وهي بحضني
صار وكت العصر وأحنه ما نازلين أمي حاضنة ريم واني حاضنة ملك
أيمان:-يمه جوعانات؟
محد جاوبتها:-يمه ملاك انتي ما تريگتي راح أنزل اجيبلج شي
ملاك:-لا ماريد ضلي هنا لايأذيج
ذبت حسرة ومسدت ؏ شعر ريم
وبقت گاعدة شوية و
نفتح الباب وراد يوگع لأن مكسور طفرت امي لزمته ودخل جاسر
بيدة أربع لفات
تأفأفت ودموعي بعيني منگدر نهملة او نعوفة كل احنه متعلقين بي
حاجته أمي:-جاسر حبيبي لا يكتلك ابوك روح أنزل
جاسر:-من وراي كتلج بابا مو؟
أيمان:-لا حبيبي مو من وراك يلا روح روح
جاسر:-بس أبوسهن؟!
خذت نفس وكالتله:-يلا
صعد ؏ الجرباية وباس ريم ومد ايده عليها:-هاج لفة
مدت ايدها خذتها وضمتها لصدرها ورجعت
شابگة نفسها
أجه علينا واني مبتسمة أباوعلة
ضحك:-منو أبوس أول ملاك لو ملك؟
ملك:-اني أكيد
باسها حيل وهي شبگته وباسته برگبته نطاها لفة وباسني هم ونطاني
ضله يمنه شوية ونزل
اول مانزل سمعنه صراخة عرفنه ضربته
بقت أمي تتحسب عليها وترجع لورا أكلنه اللفات وضحكنه ؏ حنيته كل وحدة بينه مسويلها لفة جبيرة حتى نشبع ومصعدلنه دولكة مي
من زغرة وهو سندنه
ضلينة محبوسين بالغرفة لحد الـ10 بالليل حسينة الببت صار هدوووء يعني نامو
وأحنه باقين ؏ لفة جاسر وماكلنة شي بعدها
نزلت أمي واحنه وراها دارت وجهها وهمست:-لاتطلعن صوت
بهالأثناء بطني گامت تصيح ضحكت وحطيت أيدي ؏ حلگي خزرتني أمي حجيت بصوت ناصي:-والله مو اني بطني
ملك:-جا شلون ننفضح احنه
حجت بحدة وصوتها ناصي:-أسكتتتننن
سكتنه ونزلنة جوة من الجوع راسي وبطني
وجسمي كلة يوجعني
فتحنه الثلاجة مقفولة زفرت امي النفس
وباوعتلنه مأيسة:-مكتوبلنه ننام بدون أكل
ونزلت دمعة منها مسحتها رأساً
راحت ملك خذت سجينة
أيمان:-شتسوين ولج
ملك:-بس أسكتي يمة سدي الباب
سديتة ؏ كيفي وهي بقت تحاول لحد مانفتح القفل ضحكت لأمي وهزت حواجبها
فتحنه الثلاجة اشكال والوان بس طبعاً ملازم
نمد أيدنة عليهن بدون أذنة يحسب حتى گرص الخبز
طلعنة اكل بايت حمته امي ؏ سريع
كملت رتبنة الغراض وكل شي رجعناه بمكانه
واخذنه الصينية وصعدنة فوك
شلنة الباب اني وملك ليفوك حتى نفتحها
دخلت امي والصينية بيدها التمينة عليها
وگعدنه ناكل
رفعت عيني لأمي بس توكل بريم مخلت شي بحلگها
زحت نفسي لورا وكلت:-شبعت الحمد الله
ايمان:-ليش أمي أكلي
ملاك:-لا ماريد هاج أخذي الكبايات اكليهن
ايمان:-لا يمة شبعت أكلت هواي
ملاك:-عليمن تقشمرين يمة اكلي ترة أباوعلج ماكلتي
ابتسمت وهزت راسها بقهر:-اشبعن أنتن اني اشبع
رجعتلها الأبتسامة وبقيت أباوعلها
ملك گامت هم ونطتها حصتها
وريم هم
بقيت هي تاكل وأحنه مكابليها كل ساع ترفع راسها علينة وتنزلة بخجل
حتى اللگمة تحطها بخجل تاكلها ؏ كيف
انتضرناها لحد ما خلصت خلينة الصينية
؏ صفحة وگمنة نمنه...
ومرت الأيام مرور الكرام
وأجه عرس رندة
قبلها طلعنة للسوك خالاتي اخذنة
واشترينة ملابس للعرس
اشتريت ثوب زيتوني وهالمرة اصريت
اخذ شي مناسب للحفلة امي تلبسنه
دوم بناطير لو ثياب طوال هالمرة اخذنه من أختيارنه
بيوم العرس لبست عبايتي
وصعدنه بادية جبيرة ويا خالاتي وانطلقنة لبغداد نمر من المناطق ونتذكر طفولتنه قبل السقوط
وملك تگلي هذا المكان هيج جان وهيج صارر
واني متونسه رجعت بغدادنه القديمة
وصلنه لبيت خالتي يموووت جان
حييل جبيرر ومساحتة واسعة مثل بيوت الملوك بضبط
ملاك:-الله يجنن
ملك:-هاي احنه وين معقولة بالعراق؟ يمه خاف تيهنه
ريم:-الله اريد اعيش هنا
ايمان:-صلن على محمد يمه صلن
صلينة كلنه ودخلنه الحديقة ضخمة حييل ومزينة بورود وجانت گعدة بيها اعتقد للزلم
دخلنه للبيت وجان أحلى بعد استقبلتنه وردة و
جمالها طاغي
وردة:-هلا هلا دخلو
أيمان:-فدوة لجمالج
وردة:-حبيبتي عمة دخلي
دخلنه وراها ردنه ندخل ويا امي للصاله لزمتني وردة:-لج انتي تعالي ضلي وياي
ضليت واكفه يمها وهي تستقبل بالناس لحد ما ملت وعافتهم وجرتني للغرفة مالتها:-نزعي يلا نزعي
فكيت عيوني:-شنزع؟؟؟
وردة:-عبايتج وحجابج شگد غبرة
ضحكت:-ولج نسيت عمي نساني جمالج
وردة:-ترة اخجل ماعرف أرد
ضربتها بزندها ضحكت ونزعت صوفرت جنها
ولد وتتغزل بية:- دبااااااع عيني افتري افتري شوف الشعر فديتج
ابتسمت بخجل:-ناقصج شي واحد
ملاك:-شنو؟
وردة:-عيونج الحلوات تحتاج كحل
ملاك:-حتى امي تشرني وتشرج ؏ حبل
وردة:-لا لا اروح اقنعها وأرجع
ملاك:-ماتقبل والله
وردة:-اقنعها بطريقتي عيني
ملاك:-يلا خنشوف طريقتج
راحت تركض واني اباوع لطول شعري وللفستان
شعري برمته الي أمي سوته بالورق من الليل سحبتة بالبداية بالأوتي ولفت أطرافة بأوراق وضليت للصبح بيهن وفتحتهن صار مبروم
وفستاني جاي ؏ جسمي نازلة أكتافة
ولابسة گلادة امي ذهب ناعمة
انفتح الباب ودخلت وردة:-ها؟
وردة:-يابة عندي طرق اقنع اكبر راس فديتني
ملاك:-قبلت والله؟
وردة:-وحمرة هم ههههه
ملاك:-خاف مارحتي لأمي معقولة؟
ضحكت:-أمج أمج بدمها وبشحمها
ملاك:-يلا لعد
وردة:-بس قبلهن شي صغيروني
ملاك:-لا تگليلي شي اكبر بعد هسه يطيح حضنه من صدك
وردة:-شوية أكبر منهن شوية بس أمج قبلت والله كتلها كالتلي هيه متقبل
ملاك:-شنوو هوة؟
وردة:-شواربج
شهكت:-لاااا لا مستحيل ماريد روحي عني
وردة:-ولج حمرة وشوارب شي ميشبهه شي
بعد محاولات عديدة قبلت گوة سوتلياهن ؏ سريع وماخلت الحمار يبين خلتلي خافي عيوب
وحطتلي حمرة وكحل باگت مسكارة وخلت
وردة:-هاي لو أطلعج للزلم كلها تچيت عليج
ضحكت وغميتها واني اباوع
لروحي:-بس والله اجنن
عيوني حلوات؟
وردة:-جمال من فوك لجووة تخبلين
ملاك:-عززة شُكراً
ضحكت بقيت أباوع لنفسي ممصدكة مستحيل هاي اني أول مرة اخلي هيج مكياج
حتى لو خفيف بس مبين اني مخلية
فتحت باب الغرفة وعدلت فستاني طلعت وياي ورد هي لابسة ثوب أسود مبطن بماروني فوق الركبة ومكياج صاروخ وشعرها كاري ساحبتة طالعة جمال
وصلنه يم باب الأستقبال و وگفنه:-يلا دخلي ملاك
ملاك:-ادخلي انتي اول
وردة:-لا انتي الجبيرة غير
ملاك:-انتي اختي العروس
وردة:-صخام بوجهج
فتحت الباب وگلوبنه تدك من الخجل دخلنه سوة ورحت گعدت يم أمي وهي بصفي
دارت وجهه امي علية وأبتسمت:-شنو هذا الجمال
ابتسمت وكالت وردة:-شكراً عمة
ضلت عيونها علية مبتسمة بهدوء
من أبتسامتها خجلت
نص ساعة وأجت العروس من الصالون
دخلت اول شي مصورة
وكفت بعيد عن الباب وشغلت كامرتها
دخلت رندة ببدلة لون أحمر
دخلت والمصورة تصورها لحد ما کعدت ؏ كوشة
بين الأغاني والرگص والهوسة والهلاهل
همست امي بأذني:-ريم ويين؟
ملاك:-مادري
ايمان:-روحي شوفيها
گمت عدلت فستاني رجعت جرت أيدي وگالت:-ديري بالج لايشوفج احد من الزلم
هزيتلها راسي وطلعت عبرت ؏ مطبخ جانت وردة تحضر الماي رفعت راسها شافتني:-وييين ولج؟
ملاك:-ادور ريم ماهية
وردة:-اي شفتها طلعت
هزيت راسي وطلعت أدورها
دخلت للحديقة
ابتسمت لجمالها
وبقيت أباوع للورود دنگت شلعت وردة لون أحمر
شميت عطرها طييب
درت وجهي واني اشم بيها ومغمضة عيوني
فتحتهن ومشيت وانصدم بكمال
واگف گبالي وبيدة نشرة مال اضوية وصافن
هذا الله مسلطة علية
جسمي سرت بي رعشة كهربائية
ملاك:-شدتسوي هنا؟
صفن وماحجة شي انتبهت لنفسي بدون حجاب
وخفت خاف امي تجي وتموتني اذا شافتة
يباوعلي بدون حجاب
ملاك:-وخر كمال مالابسة حجاب دور وجهك حباب
ماحجة وهو صافن علية بلعت ريگي وركضت
عبرت من يمة لزمني من زندي ورجعني
گبالة
گلبي نزل للگاع لزم حنجي
وهمس: -من يا سمة نازلة أنتِ؟...
