رواية عيون المها الفصل الثلاثون بقلم ظل الياسمين
الامان هو ان تشعر باحدهم يحميك
بقلبه قبل ✋ 💔
اجه السيد خايف ومرعوب كال
_بسرعه مها اخذي اجازه وروحي لعمج هاج هذا تليفون نوكيا خليتلج خط اتصلي بيه
هو اخذ المستندات وطلع واسمع صوت دراجه بلباب مديت راسي ودعيتله من گلبي يرجع بسلامه
لبست ابني وطلعت لدوام واني احس بغصه وخنكه
اخذت عياده ورجعت للبيت كلت خلي اتصل بسيد نتغده سوه
اتصلت بسرعه جاوب
_ها مها اكو شي
_لا سيد ماكو شي شبيك خايف
بس ردت نتغده سوه
_ولج يا غده اخذي ابنج وروحي لبيت عمج بسرعه صعدي للعلاوي ومناك كبل بوجهج يلله
_ما اروح لحد ما تجي
_هاي اشلون بلوه ولج بغداد عالكه
_انته بس لا اصيح تعال وخلي نتفاهم وصلني للكراج عاد
سده بوجهي كمت سويت اكل الي ولابني وكمت الالمل بلغراض كلت لحد ما يجي بلكي الله يهديه
صار العصر وهو ماكو صار الليل وهم ماكو قلقت كمت اتصل يطلع مغلق
اكلني الخوف ولا عدي غير رقمه
رحت لامل
_فدوه امل ما عدج رقم عمج ابن عمج
_خير شكو
_السيد من الضهر ما جاي احصله
_لا ما عدي لا تخبصينه هسه يجي
صارالمغرب كمت توضيت وصليت تعشينه والسيد ماكو كمت ادعي واصلي واتعبد غفيت على المصلايه
وجه الصبح حلمت السيد راكب سياره ومخلي امه بصدر ردت اركب ما خلاني وراح بس وجهه حلو وملابسه تخبل رفع ايده يسلم وهو مبتسم وشخط السياره بسرعه 😓
فزيت على صوت الاذان ربي دخيلك السيد ما اجه وين اروح وين اطي وجهي صليت كوه طلع الفجر عليه بدلت واخذت ابني وردت اطلع رجعت لامل
_علويه اني قلقانه على السيد وانتي ما جاي اساعديني راح اروح ادور عليه
_حجت بزمخه تعالي انطيج رقم ابن عمي
اخذته منهه واتصلت
_صباح الخير خويه اني مرت سيد احسان ابن عمك ومن البارحه طلع وما رجع 😭
_لا تخافين انشالله ماكو شي اني جايكم
وره ساعه ونص اجه الولد امل استقبلته ودخلو
_فدوه خويه مو مال كعده هو راح يودي المستندات ما اعرف لاي جهه
_خلص فهمت راح اتحرك كام يخابر ويحجي ويه اكثر من واحد واخر شي كال طالع انتظرو مني مكالمه
_امل سدي بابكم ولا تفتحون لاي احد مفهوم
_اني من القلق صار عدي مغص وكمت اتقيئ وابني يفتر وراي ويبجي اقل من ساعه واسمع موبايل امل دك
_ها سيد شكو
صرخت اخووووي يمه احسااااان
طلعت بطارمه تعيط اني صفر الضغط عدي ما اعرف شنو اسوي كعدت على حيلي واسمعه تصرررررخ
اجت العالم على اصياحه وجيرانه كومتني
_خاله انتي حامل اتعوذي من الشيطان وكومي بدلي وغسلي
شربتي مي وجابتلي ملح وعيت البيت مكلوب گلاب بناس
كمت ابجي بحرگه گلب 💔
واعيط واملخ بنفسي اكيد اني فگر
وعميت عليه
خلصت الفاتحه واجت امي وخواتي
اشو هاي امل كامت تعيط عليهن
_كله بسبب هاي الفگر بت الفگور هيه من يوم دخلت حياتنه خربتهه
اني كل عمري ساكته بس من سمعته كمت على حيلي
وكدام خواتهه وعمتهه
_شوفي امل تحملتج اسنين لخاطر السيد وانتي كل يوم يمر علينه تنغصينه وتدعين علينه وما شايفه هيج اخت ما تريد راحه لخوهه جاي ينطيج اعذار بس انتي مثل البزون تدعي على راعيهه بلعمى ولا يوم من وراج شفنه راحه وكل يوم تخلقين مشكله بس لمجرد نضحك ونسولف
مشكووووله ذمتج ليوم الدين
كامت تعيط وتطرد واجه عمو كال/شكو اخذت ملابسي وملابس صفاوي وطلعت
رحنه لبيت عمو سالم وهناك حسيت اني فقدت السيد وبعد ماكو رجعه 😭 يوميه ابجي وصرت الوم نفسي اني فكر مريت باصعب ايام بحياتي
مرت اربع اشهر رحت لامي مرتين ورجعت للبيت عمو
بيت عمو عائله واني اجيت فوكهم
جبت بعمليه وامي دخلت وياي بس الحمد لله امي دخلتني باحسن مستشفى بلبصره وهناك عنايه
سميتهه مسره وفعلا مثل ما كال السيد تشبهني 😭
صار عمر مسره شهرين ورجعت لبيت عمو وهو مسويلي نقل وماخذلي اجازه وضع
_فدوه اروحلك والله ما اجازيك
_لا تكولين هيج انتي بتي
عمو مها باجر تخلين بتج عد نرجوسه ونروح اني وياج لبغداد ناخذ حمودي ويانه لان راح اروح اسوك وانتي روحي استلمي تعويض السيد كل شهيد اله 10مليون هم تفيدج
طلعنه الصبح وره الاذان وصلنه من وكت بس بغداد ازدحام والامريكان سادين الشارع بالف يا علي وصلنه
عمو راح لشورجه واني رحت للمحافظه كمت اسال دلوني على ولد يمه المعاملات
_خويه اريد اسوي معامله تعويض زوجي شهيد كال وين شهاده الوفاة استغربت كتله وبعد شتريد
كتبلي قسام شرعي وصوره قيد انتم باسم منو كتله السيد احسان وانتي شنو اصيرين منه كتله زوجته
كام على حيله وكال/وره ست اشهر جايه وجايه ادورين تعويض روحي عمي روحي استلمتهن اخته
كعدت بلكاع وكمت ابجي حتى بهاي ما عافتني امل بحالي
خابرت على عمو وصعدنه التقينه بيه بلعلاوي وحجيت كل الكاله الولد
خابر عمو على ابن عم السيد وكله
_السلام عليكم سيدنه
_وعليكم السلام تفضل
_سيد اني عم ام مصطفى زوجه سيد احسان اليوم راجعنه علمود التعويض وبلغونه خواته مستلمات
مو هاي صارت منكم وبيكم ليش هيج سيد وهاي اموال ايتام
_والله اني ما ادري بالموضوع واشوف الجماعه وانطيكم خبر
_سيد احنه ما راح نسوي كل اجراء ننتظر منكم خبر
سده عمو منه بس اني متت قهر
رجعنه واني محرجه من عمو اكل من كده وخلصن فلوسي والبيت هوسه هو غرفتين وجهالي يبجون ليل نهار وجهاله عدهم ادراسه
اجت امي وحجيت الهه كتله اريد تقرضني مبلغ بسيط اكعد بتجاوز منا لحد ما ارتب وضعي
فعلا جابت مليونين واشتريت بيت بلوك تعبان عمو ما قبل بس لان قريب عليهم كال استقري
وره اسبوع عمو رجع خابر السيد وهلمره سجل مكالمه بينه وبين السيد
_سيدنه اشو ماكو كل خبر عن تعويض اليتامه
_ها يعني بدون سلام والله ايكولون خل تشتكي مالهه شي يمنه
_ها هيج صار الحجي بسيطه
طبكه عمو وكال باجر نروح لبغداد ونبات هناك
_عمو والله اهواي صارت المصاريف عليك
_مها انتي بتي ولازم اخذ حقج
رحنه واخذت الجهال وياي وحمودي ونرجوسه هم راحو رحنه كبل لباب الحوائج موسى بن جعفر عليه السلام
ما نشفت دمعتي طلبت العونه منه يساعدوني على تربيه اطفالي
بصدفه لكينه واحد معمم يلتقون بيه الناس
_مها صيري سباعيه وروحي لسيد ذاك واحجي مضلوميتج
رحت وكفت ازدحام كام من مكانه وتخطاني صحت سيد بصوت مخنكوك
التفت كال اتفضلي بويه كله هيبه ووقار
حجيت قضيتي والدموع عشره كال منو جاي وياج
كتله/ عمو
كال/ تعالي وراي
اشرت العمو جاب الجهال وطلعنه سوه وره السيد مشه هواي وبفرع زغير دخل مثل المكتب دخلنه وراه
كعد بلكاع وبصفه ميز ارضي
سالني/انتي زوجه احسان
-اي
_اخته تكول ما مزوج وهيه هنا اداوم بلعتبه وجايبه جنسيه اعزب وعلى هلاساس صرفولهه
بقينه مستغربين اني وعمو يعرف كلشي عنه وعن سيد احسان
عمو كله/انته تعرف السيد
_اي واعرف على شنو انقتل الله يرحمه برجمته الواسعه
اني بقيت ابجي بحرگه گلب💔
سيد اني زوجته وهذا عقد زواجي وذول اطفالي بس البنيه لسه ما مسجلته لان ما عدي شهادة وفاة
_لا تبجين الي اخذ حقج يتحاسب
روحي وباجر تعالي من وقت هنا
التفت لعمو وكاله عدكم مكان تباتون بيه
_اي سيد مشكور ماجرين فندق
طلعنه بس الحمد لله الامام ما قصر ثاني يوم الفجر زرنه وصلينه واخذنه الجهال ورحنه للمكتب
لكينه امل واخته ورجل اخته
حجه السيد
_علويه هاي البنيه تدعي انه زوجة احسان وعده عقد قانوني اضافتا الى العقد الشرعي
كامت تطي الوان كالت ها اي هو ازوجه مو برضاتنه
_يعني زوجته لووووو لا
_ها اي زوجته
شوفي علويه تسلمين التعويض الهم وتنطيهم شهادة الوفاة وتاخذين متعلقاتج بلعتبه وما اريد اشوف وجهج
صاح بصوت عالي افتهمتي كالت اي
_لا ما افتهمتي
صاح وياه واحد كاله احجزهه وصاح لرجل اخته روح جيب الفلوس هسه وباقي المستمسكات بسررررعه
راحو واحنه هم رحنه للعصر راح عمو واستلم المبلغ وشهاده الوفاه وصورة القيد والقسام مخليته بسمهه وضايفيني اني والجهال الحمدلله والشكر
ثالث يوم رحنه طلعنه جنسيه لمسره واليوم الرابع راجعنه التقاعد وهم لكينه مسويه بسمهه الراتب ومستلمه علبو اداوم بلعتبه يسهلون الهه بس ما تدري الله حق واهل البيت عليهم السلام ما يرضون بضلم
دخلنه للمدير وكال قدمو شكوى
وفعلا قدمنه وخله عمو رقم موبايله
رجعنه ميتين تعب بس الحمد لله والشكر حصلنه نتيجه وفيت امي وكملت البيت وانطيت عمو مبلغ صح ما قبل وزعل بس قسمت عليه بروح بيبي
وره اسبوع اندكت الباب وما اشوف بس عكل وناس هواي واكفين لبست عباتي وطلعت
_تفضلو
_ام مصطفى احنه جايين عليج احنه عمام سيد احسان
وديتهم لعمو وهنا سمعت كل الحجي
_سادتنه انتم اولاد رسول الله ما ينهان عدكم شخص خصوصا المنكم وبيكم
_بت اختي محسوبه عليكم وانهانت
تقبلون العلويات ياخذن حقهه وحق الايتام وتزور راتبهم ما كلتو منين تاكل تشرب وهيه حرمه وعدهه اثنين اطفال
جبيرهم حجه/لا بلله مقصرين من السمه للكاع وشنو تفصلون نلبس
_سيد احنه اريد المقصر ياخذ جزاءه وبلقانون وما نتنازل
_عمي احنه اهل وعيب يدخل القانون بينه
خلص سادتنه الراتب للايتام وما اريد شي منكم
تنازلنه عن العلويه واخذنه راتب شهيد
رجعت لدوام ومسره صار عمرهه سنه وصارت تخبل نرجوسه وحمودي سكنو وياي وحتى زيودي ما يقبلون يرحون
وضعي المادي صار زين واشتريت عرصه طابو
كل الي عشته ويه السيد 3سوات
وكل عمري جان 28سنه
داومت بنفس دائرتي القديمه وتفاجئت علي ابن ام عبد يداوم حرس بدائرتي اجه سلم
_السلام عليكم اشلونج مها البقاء بحياتج
_وعليكم السلام حياتك الباقيه
_مها اعتبريني اخوج اي شي تحتاجينه اني مستعد اساعدج
_تسلم ما تقصر
مر شهر وسويت معامله ابوي بمؤسسه الشهداء ولكيت عمي مسوي راتب شهيد ويستلم وحتى جدي ماخذ كل حقوقه
قررت اكلف علي واشوف عده هواي معارف وعده ضهر
وره مراجعات هواي طلعت هويه بسمي لان ابوي شهيد بس بقه بيت جدي الي حصه بيه وراح عمو سالم ويه علي وحجو ويه عمي اخو ابوي الي بعمري لا اعرفه ولا يعرفني
كام يطفر عليهم
هددوه بلقانون وفعلا سوينه شكوه بلمحكمه بقت القضيه سنه والمحامي اخذ هواي اتعاب وفعلا الله ما يضيع حق يتيم اجه عمي وكعد ويانه يريد نتفاهم اني رفضت رفض قاطع لان هواي تبهذلت وخسرت دخلوني شريكه وياه بكاع جدي الي هو باني عليه عماره وطلعت لجنه تقيمهه وانطوني اسهم والفضل يعود لله وعلي ابن ام عبد
حسيت من عده بعجاب بس اني ابد ما انطيته مجال
مره كال
_مها اني كلش معجب بيج واريد اخطبخ اذ توافقين واذ لا اعتبري كلشي ما حجيت
_اني اعتبرك مثل اخوي واني خذت نصيبي من الدنيا تعذرني
بنيت بيت بطابو والفضل لعمو سالم واخذت حقوق ابوي وكملت دراسه سمعت بامل مزوجه مرتين ومنفصله ماخذه عامي والساده متبرين منهه
كبرو اولادي وحمودي حبيبي كبر وتخرج واشتريتله سياره ياخذنه ويجيبه ونرجوسه صارت عروسه والعالم تتخطبه والحمد لله رب العالمين الى هنا وتنتهي قصة مها ولا زلت احتفظ بذكريات السيد رغم الالم بس هو كان الامان والراحة ورجعلي الثقه بنفس
ربي يرحمه برحمته الواسعه ويسكنهه فسيح جناته
في امان الله وحفظه ♥️
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
